Author: K.B.

Prodhuesi gjerman i dronëve Quantum Systems planifikon të zgjerojë bashkëpunimin e tij industrial me Ukrainën, me një numër të sipërmarrjeve të reja të përbashkëta që do të zbulohen gjatë një takimi të politikëbërësve të rangut të lartë, tha kompania të martën.

Quantum Systems po rrit gjithashtu prodhimin e 10,000 dronëve shumëfunksionalë kuadkopterë në Gjermani të destinuar për forcat e armatosura të Ukrainës, pasi një grup fillestar u dorëzua në fund të marsit 2026, shkruajnë mediat e huaja.

Duke komentuar sipërmarrjet e përbashkëta gjermano-ukrainase, Matthias Lehna, drejtor menaxhues i Quantum Frontline Industries, tha: “Jemi të bindur se kjo formë bashkëpunimi formon një themel qendror për aftësitë e ardhshme mbrojtëse të Evropës”.

Gjatë disa vizitave në Ukrainë, ministrat gjermanë kishin thënë se Gjermania dëshironte të zgjeronte bashkëpunimin industrial me kompanitë ukrainase të mbrojtjes.

Ata kanë argumentuar se kjo pritet të jetë gjithashtu në dobi të Bundeswehr-it, forcave të armatosura të Gjermanisë, qoftë drejtpërdrejt ose përmes përvojës që fiton.

Dhe një lajm i vjen i tillë vjen në ditën kur presidenti ukrainas Volodymyr Zelensky pritet të vizitojë Berlinin më vonë të martën për bisedime me kancelarin Friedrich Merz, konfirmoi një zëdhënës i qeverisë gjermane.

Vizita, e cila shënon konsultimet e para zyrtare gjermano-ukrainase në vite, ishte mbajtur sekret për arsye sigurie.

Zelensky do të shoqërohet nga disa ministra të kabinetit.

Sipas mediave të huaja, politikëbërësit pritet të diskutojnë mbështetjen financiare dhe ushtarake për Ukrainën, si dhe përpjekjet e rindërtimit dhe kthimin e refugjatëve ukrainas.

Të dyja palët pritet të nënshkruajnë disa marrëveshje dhe Merz dhe Zelensky kanë planifikuar të mbajnë një konferencë të përbashkët për shtyp.

Ministri i Jashtëm i Rusisë, Sergei Lavrov, mbërriti në Kinë të martën për bisedime mbi luftërat në Ukrainë dhe Iran, si dhe mbi marrëdhëniet dypalëshe.

Lavrov u shfaq në televizionin shtetëror rus duke mbërritur në Pekin, ku pritet të zhvillojë takime me ministrin e Jashtëm kinez, Wang Yi. “Pritet një shkëmbim i thelluar pikëpamjesh për një sërë çështjesh të ‘nxehta’ dhe probleme rajonale, përfshirë krizën në Ukrainë dhe situatën në Lindjen e Mesme,” thuhet në një deklaratë të Ministrisë së Jashtme të Rusisë.

Sipas ministrisë, Lavrov dhe Wang do të diskutojnë gjithashtu bashkëpunimin dypalësh dhe atë në forume shumëpalëshe si Kombet e Bashkuara, BRICS, Organizata e Bashkëpunimit të Shangait, G20 dhe Bashkëpunimi Ekonomik Azi-Paqësor (APEC).

Kina dhe Rusia shpallën një partneritet “pa kufij” në shkurt të vitit 2022, kur presidenti rus Vladimir Putin vizitoi Pekinin, vetëm pak ditë para se të dërgonte dhjetëra mijëra trupa në Ukrainë. Putin e ka përshkruar ndonjëherë Kinën si një “aleate”.

Në vlerësimin e saj vjetor të kërcënimeve, agjencitë amerikane të inteligjencës e konsiderojnë Kinën dhe Rusinë si rivalët kryesorë të Uashingtonit në fusha që variojnë nga Arktiku dhe inteligjenca artificiale deri te hapësira dhe armët bërthamore./A2Cnn

Kryeministri britanik, Keir Starmer dhe Emmanuel Macron do të bashkëorganizojnë këtë javë në Paris një samit për të vazhduar përpjekjet për rihapjen e Ngushticës së Hormuzit.

Udhëheqës ndërkombëtarë do të mblidhen të premten në një përpjekje për të hartuar një plan që të sigurohet që kjo rrugë tregtare jetike të mbetet e hapur për transportin detar, pas kërcënimeve të Donald Trump për bllokimin e saj, raportojnë mediat britanike.

Një zëdhënës i Downing Street tha: “Samiti do të çojë përpara punën drejt një plani të koordinuar, të pavarur dhe shumëkombësh për të mbrojtur transportin ndërkombëtar pasi konflikti të përfundojë.”

Macron më herët ka thënë se vendet pjesëmarrëse në këtë nismë do të punojnë në një “mision rreptësisht mbrojtës, të ndarë nga palët ndërluftuese të konfliktit”, i cili “synon të vendoset sapo ta lejojnë rrethanat”.

Në Westminster është krijuar një komitet i ri qeveritar për të trajtuar pasojat e konfliktit me Iranin.

Që nga orët e para të së martës, (14 prill), Operacioni “Daku” ka qenë në zhvillim e sipër, me 28 masa paraprake të ekzekutuara nga Policia e Shtetit në Itali, në provinca të ndryshme, ku pjesa më e madhe e të ndaluarve janë shqiptarë.

Operacioni, i koordinuar Antimafia dhe nga Operacionalja e Trentos, përfshinte gjithashtu personel nga Seksioni Hetimor i Shërbimit Qendror të Operacioneve në Trieste. Bastisja u përqendrua në një komplot të trafikimit të drogës në provincën e Bolzanos.

Organizata ishte e dedikuar në aktivitetin e trafikut dhe shpërndarjes së lëndëve narkotike, teksa aksioni është ende aktiv dhe pritet të zbardhen detaje të reja.

Operacioni e ka marrë emrin “Daku” për shkak të nofkës shqip apo pseudonimit që shumë nga të dyshuarit shqiptarë thërrisnin njëri-tjetrin.

Masat paraprake kundër njëzet e tetë të dyshuarve, kryesisht shqiptarë, po ekzekutohen nga hetuesit e Skuadrës Fluturuese të Bolzanos, së bashku me kolegët nga Belluno, Trento, Venecia, Verona dhe Vicenza, dhe nga njësitë SISCO të Breshias, Trentos, Triestes dhe Venedikut, të bashkuara në kryeqytetin e Tirolit të Jugut nga Shërbimi Qendror i Operacioneve, si dhe Njësitë e Parandalimit të Krimit të Milanos dhe njësitë e qenve të Ankonës, Milanos dhe Padovës.

Dhjetë nga të dyshuarit janë burgosur, tetë janë nën arrest shtëpiak dhe dhjetë prej tyre janë urdhëruar të qëndrojnë në shtëpitë e tyre, informon media italiane.

Provincat e Barletta-Andria-Trani, Brescia, Monza Brianza, Pordenone dhe Sondrio janë gjithashtu të prekura në këto raste të fundit.

Deputeti i Vetëvendosjes, Mefail Bajqinovci, tha se nëse dështon zgjedhja e Presidentit “faji dhe turpi” do të jetë i opozitës.

Duke u përpjekur t’ia lë fajin opozitës, ai po ashtu përdori frazën “nëse opozita na çon në zgjedhje”, ndërsa nuk dha ndonjë përgjigje mbi përgjegjësinë e Vetëvendosjes për të dalë nga kjo situatë si grupi më i madh parlamentar në Kuvend. Këtu ai përmendi ftesat e shefit të tij, Albin Kurti, për takime me partitë opozitare dhe kërkesat për dërgim të emrave.

Sidoqoftë, Lëvizja Vetëvendosje s’ka lëvizur nga propozimet e saj për President, dy anëtarët e saj, Glauk Konjufca dhe Fatmire Mulhaxha-Kollçaku.

“Opozita duhet të reflektojë dhe jo vetëm të shkojë në takime, por edhe të ketë dëshirë të bëjë zgjidhje. E në këtë rast zgjidhja është të bëhet presidenti i Kosovës”.

Ai tha se opozita duhet të ketë “dëshirë” dhe jo të bëjë deklarata që “ne duhet të shkojmë në zgjedhje”.

“Kjo s’është e mirë sepse vendi nuk ka nevojë të shkojë në zgjedhje për shkak se i ka institucionet stabile dhe nuk duhet populli të maltretohet çdo gjashtë muaj në zgjedhje”, tha ai për RTV 21.

I pyetur se në cilën parti këmbëngul më shumë Vetëvendosja për bashkëpunim, Bajqinovci, tha se nuk ka ndonjë parti politike opozitare që ka “kërkesë të bashkëpunojmë më shumë a më pak”.

“Iu kemi dërguar ftesa, por po shihni se shpesh ka deklarata se “vetëm zgjedhje dhe nuk ka tjetër”. Pra, nuk ka reflektim nga opozita”.

Bajqinovci gjithashtu e cilësoi si “absurde të shkohet në zgjedhje kur dihet se sapo kemi dalë me një rezultat prej 51.1% për Lëvizjen Vetëvendosje”.

I pyetur se me dy anëtarët partiakë të propozuar për pozitën e Presidentit, Vetëvendosje po synon të dështojë këtë proces, Bajqinovci sërish akuzoi opozitën.

“Ata nuk i kanë dërguar emrat. Faji dhe turpi është te opozita. Kërkimi i emrave është bërë publik disa herë”.

Megjithatë, ai tha se është i bindur se do të ketë zgjidhje sepse në të kundërtën opozita “e di” fatin e saj.

“Shumë i bindur jam që do të ketë zgjidhje për çështjen e Presidentit. Në bazë të asaj që po e shoh. Unë besoj se do të ketë reflektim, sepse nëse opozita na çon në zgjedhje dihet se cili do të jetë fati i tyre”.

Ish-kryebashkiaku i New Yorkut, Eric Adams është zyrtarisht banor i Njësisë Administrative Nr. 2 në Tiranë.

Pak ditë më parë Adams mori nënshtetësinë shqiptare.

Sipas njoftimit të bërë publik, Adams ka kryer procedurat e regjistrimit si rezident në kryeqytet dhe, sipas fotove të publikuara, ka aplikuar gjithashtu edhe për pajisjen me pasaportë shqiptare.

Kreu i Njësisë Nr. 2, Florian Pullazi,i cili ka ndarë foto në rrjetin e tij social Facebook, e ka cilësuar Adams si “banorin më të ri të njësisë”, duke e pritur atë në ambientet e institucionit lokal.

“Eric Adams, banori më i ri i njësisë nr. 2 në Tiranë!

Me kënaqësi mikprita sot në ambientet e njësisë administrative nr. 2 në Tiranë, ish-kryetarin e bashkisë së Nju-Jorkut dhe ish-senatorin e njohur, Eric Adams.

Eric Adams është një mik i madh i shqiptarëve – sot, shqiptar me pasaportë – përveçse një politikan i njohur për fokusin tek çështjet e sigurisë publike, si ish-kapiten i Departamentit të Policisë së Nju-Jorkut.

Siç e thotë edhe vetë ai, marrja e shtetësisë shqiptare është edhe reflektim i lidhjes së gjatë dhe të thellë mes qytetit të Nju-Jorkut dhe komunitetit shqiptar në SHBA.

Kënaqësi që, nga sot, e kemi banor të njësisë nr. 2 në kryeqytet”, shkruan ai.

Detaje të reja janë zbardhur lidhur me sulmin e armatosur të regjistruar paraditen e kësaj të marte në Turqi. Autori i sulmit është identifikuar si Omer Ket. Sipas raportimeve ai ishte një ish-nxënës i shkollës ku u krye sulmi teksa la pas 16 të plagosur.

Këtë mësohet se kishte postuar një mesazh në llogarinë e tij në Instagram para sulmit, ku shkruhej: “Përgatituni, do të ketë një sulm në këtë shkollë brenda pak ditësh, përgatituni”.

Pas aktit të rëndë, autori i ka dhënë fund jetës. Ngjarja ndodhi në një shkollë të mesme në Siverek, Sanlıurfa. Nxënës dhe mësues u plagosën në sulm, dhe një numër i madh personeli mjekësor dhe policor i operacioneve speciale u dërguan në zonë.

Një dëshmitar deklaroi se sulmuesi, i përshkruar si 18-19 vjeç, fillimisht hapi zjarr në oborrin e shkollës përpara se të hynte në shkollë dhe të vazhdonte të qëllonte.

“Ai ishte 17 ose 18 vjeç. Sapo hyri nga dera e përparme, nxori armën e tij me tytë të gjatë. Filloi të qëllonte majtas e djathtas dhe drejt shkollës. Pastaj hyri brenda në shkollë dhe filloi të qëllonte. I dëgjova nxënësit duke bërtitur ndërsa ai qëllonte mbi këdo që haste. Pastaj mbërriti policia”, tha ai.

Një deklaratë nga Ministria e Brendshme tha se mes të plagosurve janë 10 nxënës, 4 mësues, 1 oficer policie dhe 1 punonjës mense.

Kuvendi i Kosovës ka miratuar në lexim të parë dy projektligje të propozuara nga Ministria e Mjedisit, Planifikimit Hapësinor dhe Infrastrukturës, që kanë të bëjnë me menaxhimin e resurseve ujore dhe banimin social.

Sipas njoftimit, bëhet fjalë për Projektligjin për financimin e menaxhimit të resurseve ujore dhe Projektligjin për banim të përballueshëm dhe social, të cilat synojnë të përmirësojnë politikat publike në dy fusha me rëndësi të veçantë për qytetarët.

“Projektligji për financimin e menaxhimit të resurseve ujore synon krijimin e një sistemi të qëndrueshëm dhe efikas për mbrojtjen, zhvillimin dhe menaxhimin e ujërave në vend. Përmes tij parashihen mekanizma të qartë financiarë që sigurojnë investime afatgjata në këtë sektor, me ndikim të drejtpërdrejtë në mbrojtjen e mjedisit dhe shëndetin publik”, thuhet në njoftim.

Ndërkaq, Projektligji për banim të përballueshëm dhe social synon të adresojë nevojat e qytetarëve për strehim të dinjitetshëm.

Ai krijon bazën ligjore për zhvillimin e politikave që mbështesin familjet në nevojë dhe kategoritë e cenueshme, duke rritur qasjen në banim të përballueshëm në nivel vendi.

Autoritetet kanë bërë të ditur se këto projektligje pritet të kalojnë edhe fazat e tjera të shqyrtimit në Kuvend para hyrjes në fuqi.