Author: K.B.

Deputetja e Partisë Demokratike të Kosovës, Vlora Çitaku, ka thënë se nëse Kosova shkon në zgjedhje, fajtori është Kryeministri Albin Kurti.

Ajo tha Kurti është i vetmi fajtor, sepse ka 66 deputetë dhe nuk po arrin ta mundësojë zgjedhjen e Presidentit.

“Nëse vendi shkon në zgjedhje sërish, përgjegjës i vetëm është Albin Kurti dhe Lëvizja Vetëvendosje, ata e kanë një shumicë parlamentare prej 66 deputetësh, PDK i ka 22, nëse PDK është e papërshatshme janë edhe 98 deputetë të tjerë që mund të arrijnë marrëveshje. Po ashtu 6 deputetë të AAK-së janë përjashtuar fare nga Albin Kurti, ndërsa siç ka pasur deklarime zonja Osmani ka pasur mbështetjen e LDK, por Kurti kërkonte 83, 84, lojëra me fjalë”, ka thënë ajo në T7.

Sipas Çitakut, Kurti është munduar që PDK’në “ta fus në lojën e emrave”, sa i përket çështjes së presidentit.

“Ne ia kemi qartësuar në komunikimin që Hamza ka pas me Kurtin, që ne si PDK këtë proces e trajtojmë shumë seriozisht dhe ne nuk duhet të hyjmë në një lojë të simulimit të një procesi politik pa asnjë përmbajtje…”, tha Çitaku.

Një pallat 12-katësh në kompleksin “Arlis” pranë QSUT në Tiranë është përfshirë nga flakë të mëdha, duke u shkrumbuar thuajse tërësisht. Zjarri dyshohet se ka nisur në një market në katin e parë dhe më pas është përhapur me shpejtësi në gjithë godinën.

Në vendngjarje kanë ndërhyrë zjarrfikës, policia dhe forca të emergjencës, si dhe helikopterë që kanë ndihmuar nga ajri për shuarjen e flakëve.

Raportohet se 7 persona janë asfiksuar nga tymi dhe janë dërguar për trajtim në QSUT, ndërsa evakuimi i banorëve është bërë me vështirësi për shkak të përhapjes së shpejtë të zjarrit.

Për muajin mars 2026, Ministria e Punëve të Brendshme e Kosovës ka publikuar raportin statistikor lidhur me shtetësinë, migracionin dhe mbrojtjen ndërkombëtare, duke dhënë një pasqyrë të zhvillimeve kryesore në këtë fushë. Sipas të dhënave, në Qendrën e Përkohshme të Pritjes për migrantë kanë qenë të akomoduar 75 persona, ndërsa në Qendrën e Mbajtjes për të Huaj janë ndaluar 5 persona. Ndërkohë, në Qendrën e Azilit janë regjistruar gjithsej 20 aplikime për mbrojtje ndërkombëtare.

Sa i përket shtetësisë, gjatë këtij muaji 50 persona kanë fituar shtetësinë e Kosovës, 333 persona kanë ri-fituar atë, ndërsa 55 persona janë liruar nga shtetësia. Në fushën e migracionit dhe kthimeve, janë regjistruar 55 persona të ripranuar në vend, si dhe janë lëshuar vendime për kthim në vendin e origjinës, një pjesë e të cilave janë edhe ekzekutuar.

Raporti tregon gjithashtu një numër të lartë të lejeqëndrimeve të përkohshme, me 857 të tilla të lëshuara gjatë marsit, krahasuar me 30 lejeqëndrime të përhershme. Po ashtu, janë regjistruar 95 kërkesa për verifikim të vizave.

Këto të dhëna pasqyrojnë një aktivitet të shtuar në menaxhimin e migracionit dhe shtetësisë në Kosovë, duke përfshirë trajtimin e aplikimeve për azil, rregullimin e statusit të të huajve dhe proceset e kthimit në vendet e origjinës.

Shoqëria Aksionare “Trepça” ka bërë të ditur se ka suspenduar një punonjës nga puna, për shkak se i njëjti ka ndërprerë qëllimisht energjinë elektrike, në mënyrë që të mos funksiononte ventilimi.

Në njoftimin e minierës thuhet se M.Ll, i punësuar në Njësinë Biznesore “Minierat me Flotacion Kishnicë dhe Artanë”, dyshohet se ka ndërprerë energjinë elektrike të ventilatorit që shërben për ventilimin në minierë, duke e bërë atë jofunksional në mënyrë të qëllimshme, shkruan Insajderi.

Njoftimi i plotë:

Me datën 14.04.2026, Kryeshefi Ekzekutiv ka nxjerrë Vendimin me nr. prot. 3167 për largimin e përkohshëm nga puna të punonjësit z. M.LL., i punësuar në Njësinë Biznesore “Minierat me Flotacion Kishnicë dhe Artanë”.

Ky vendim është nxjerrë në bazë të denoncimit me nr. prot. 557, të datës 14.04.2026, të paraqitur nga Drejtori i Prodhimit në njësinë përkatëse, sipas të cilit i njëjti dyshohet se ka kryer veprime të kundërligjshme.

Konkretisht, i njëjti dyshohet se ka ndërprerë energjinë elektrike të ventilatorit që shërben për ventilimin në minierë, duke e bërë atë jofunksional në mënyrë të qëllimshme.

Me këto veprime, i njëjti dyshohet se ka kryer shkelje të rëndë të detyrave të punës, në kuptim të nenit 10, paragrafi 1, nënparagrafët 1.5, 1.8 dhe 1.24 të Rregullores për përgjegjësinë disiplinore dhe materiale të punëtorëve të Trepça Sh.A.

Ambasada izraelite në Uashington ka konfirmuar se bisedimet e së martës me Libanin dhe Shtetet e Bashkuara të Amerikës kanë përfunduar.

Pas këtyre negociatave, ambasadori izraelit në SHBA, Yechiel Leiter, ka dhënë detaje rreth këtyre negociatave që janë zhvilluar në departamentin e shtetit të SHBA-së.

“Ne folëm për një sërë gjërash, më e rëndësishmja për vizionin afatgjatë, ku do të ketë një kufi të përcaktuar qartë midis vendeve tona, dhe e vetmja arsye pse do të na duhet të kalojmë në territorin e njëri-tjetrit do të jetë me kostume biznesi për të kryer biznes ose me kostume banje për të shkuar me pushime. Ne e bëmë të qartë se siguria e civilëve tanë nuk është në negociata,”, ka thënë ai.

Ai ka shtuar se Hezbollahu është më i dobësuar se kurrë më parë. “Luftërat e Izraelit në Liban e kanë dobësuar Hezbollahun deri në atë pikë sa është e mundur që qeveria libaneze të “kalojë në një epokë të re paqeje”, ka thënë ai. thotë Leiter.

Ai ka thënë se të tre palët kanë folur për dy orë e gjysmë dhe një deklaratë e përbashkët pritet të publikohet së shpejti.

Eugen Cakolli nga Instituti Demokratik i Kosovës ka deklaruar se mosemërimi i anëtarit të 10-të KQZ-së po cenon funksionimin e rregullt të këtij institucioni.

Sipas tij, u.d. Presidentja Albulena Haxhiu s’ka asnjë të drejtë qe ta zvarris më tutje këtë çështje ashtu siç s’ka pasur as Osmani.

Cakolli ka theksuar se si pasojë e mokompletimit të KQZ-së në rast të shkuarjes në zgjedhje të reja secili vendim i këtij institucioni mund të kontestohet për nga legjitimiteti.

“Afati është shkelur gjatë javës së kaluar, në radhë të parë nga Osmani dhe në të dytë nga Haxhiu të dyja këto mosveprime paraqesin mosushtrim të kompetencave kushtetuese që është shkelje në vetvete…Kjo e ka lënë KQZ-në në kuptimin kushtetues pa përbërje të plotë e që duhet ta kishte…kjo e cenon funksionimin e rregullt, cenohet besimi i publikut në administratë zgjedhore dhe në rast të një procesi zgjedhor rrezikojmë ta kemi një KQZ ku s’ka përbërje të plotë dhe secili vendim i KQZ-së mund të kontestohet nga legjitimiteti…U.D. presidentja s’ka asnjë të drejtë si s’ka pasur as ish- presidentja Osmani që ta zvarris më tutje këtë çështje sepse po pengohet funksionimi kushtetues KQZ-së si institucion në nivel kushtetues dhe së dyti për shkak se znj. Haxhiu bart funksione dhe brenda LVV-së. Mos ushtrimi i kompetencave është shkelje si nga u.d presidentja e po ashtu edhe nga ish-presidentja Osmani”, tha Cakolli për rtv21.

Mund të jemi në shekullin e 21-të, por praktikat që të kujtojnë kohët e mëparshme duket se vazhdojnë të ekzistojnë në spitalet në Pakistan.

Një hetim i fshehtë i BBC-së ka zbuluar parregullsi serioze në një spital qeveritar në epiqendrën e një shpërthimi të HIV-it që ka prekur më shumë se 300 fëmijë.

Provat sugjerojnë se ripërdorimi i shiringave dhe shkeljet sistematike të rregullave të sigurisë luajtën një rol kyç në përhapjen e virusit brenda spitalit. Në të njëjtën kohë, kanë dalë pamje të pacientëve që marrin injeksione përmes rrobave të tyre.

Studimi zbulon se të paktën 331 fëmijë rezultuan pozitivë për HIV në qytetin Taunsa, provinca Punjab, midis nëntorit 2024 dhe tetorit 2025. Shumë prej fëmijëve thuhet se u infektuan gjatë procedurave rutinë mjekësore në spitalin publik THQ Taunsa në Pakistan.

Sipas të dhënave zyrtare, në më shumë se gjysmën e rasteve, shkaku i mundshëm i transmetimit të HIV është përdorimi i gjilpërave të kontaminuara, ndërsa transmetimi nga nëna tek fëmija u regjistrua në një pakicë rastesh.

Edhe pse autoritetet njoftuan masa parandaluese në vitin 2025, hetimi – me më shumë se 32 orë regjistrim sekret – tregon se stafi mjekësor vazhdoi të ripërdorte shiringat dhe të trajtonte pajisjet në mënyrë të papërshtatshme.

Në të paktën 10 raste, shiringat u ripërdorën në shishe me doza të shumëfishta , ndërsa në katër raste, ilaçet nga e njëjta enë iu dhanë disa fëmijëve. Përveç kësaj, u regjistruan dhjetëra incidente ku injeksionet u dhanë pa doreza sterile, si dhe trajtimi i mbetjeve mjekësore pa mbrojtje.

Ekspertët paralajmërojnë se rreziku i transmetimit mbetet edhe nëse gjilpëra ndërrohet, për sa kohë që tyta e shiringës është e kontaminuar.

Administrata e spitalit mohon vërtetësinë e të dhënave ose pretendon se ato janë nga një periudhë e mëparshme. Në të njëjtën kohë, autoritetet lokale deklarojnë se nuk ka prova të qarta epidemiologjike që e lidhin drejtpërdrejt spitalin me epideminë.

Megjithatë, një raport inspektimi në prill 2025 nga një mision ndërkombëtar identifikoi të njëjtat probleme: injeksione të pasigurta, higjienë të dobët të duarve, ripërdorim të pajisjeve dhe kushte të papërshtatshme në repartet pediatrike.

Ekspertët thonë se problemi nuk kufizohet vetëm në një spital të vetëm. Pakistani ka një nga normat më të larta të përdorimit të injeksioneve në botë, shumë prej të cilave konsiderohen të panevojshme.

Presioni nga pacientët, i kombinuar me mungesat e burimeve dhe furnizimeve mjekësore, shpesh çon në praktika të rrezikshme siç është ripërdorimi i pajisjeve.

Rasti i Taunsës nuk është i izoluar. Në vitin 2019, një shpërthim i ngjashëm në qytetin Rato Dero infektoi qindra fëmijë, me raste që pritet të arrijnë rreth 1,500 deri në vitin 2021. Incidente të ngjashme janë regjistruar edhe në Karaçi, ku ripërdorimi i shiringave u konfirmua si shkak i transmetimit.

Pavarësisht garancive nga autoritetet, gjetjet tregojnë se praktikat e rrezikshme vazhdojnë. Rasti ngre pyetje kritike në lidhje me sigurinë e sistemit të kujdesit shëndetësor dhe përgjegjësinë e autoriteteve kompetente, me fëmijët që janë viktimat më të cenueshme.