Author: K.B.

Policia e Kosovës ka konfiskuar disa armë zjarri dhe municion gjatë bastisjes së dy shtëpive në Podujevë, në kuadër të hetimeve për rastin “Vrasje në tentativë” dhe “Mbajtje në pronësi, kontroll ose posedim të paautorizuar të armës”.

Sipas policisë, me urdhër të prokurorit janë bastisur shtëpitë e dy të dyshuarve, ku janë gjetur dhe sekuestruar tri pistoleta, tre armë të gjata, 67 fishekë si dhe pjesë të ndryshme armësh.

Policia bën të ditur se të dyshuarit ndodhen në kërkim policor, ndërsa hetimet lidhur me rastin janë duke vazhduar.

Qytetarët që po planifikojnë të udhëtojnë drejt ose nga Kosova mund ta bëjnë këtë pa pritje të gjata, pasi në këtë orë situata në të gjitha pikat kufitare paraqitet e qetë.

Sipas të dhënave të fundit nga Qendra Kombëtare për Menaxhim Kufitar, në hyrje dhe dalje të vendit nuk janë raportuar kolona automjetesh, ndërsa pritjet janë minimale ose nuk ka fare pritje.

Qarkullimi po zhvillohet normalisht në të gjitha pikat kufitare, duke u mundësuar udhëtarëve kalim të shpejtë dhe pa vështirësi.

Megjithatë, duke pasur parasysh fluksin e shtuar të mërgimtarëve dhe sezonin e verës, situata mund të ndryshojë gjatë orëve në vijim. Zakonisht, kolonat fillojnë të krijohen në pjesën e paradites dhe gjatë mesditës, kur numri i automjeteve rritet ndjeshëm.

Pas Zetës dhe Plevlës, iniciativa për miratimin e deklaratave simbolike për tërheqjen e njohjes së Kosovës pritet të zgjerohet edhe në një komunë tjetër në Mal të Zi.

Lideri i Partisë Demokratike Popullore (DNP), Milan Knezheviq, ka bërë të ditur se partia e tij së shpejti do të shpallë emrin e komunës së radhës ku do të kërkojë miratimin e një deklarate për “çnjohjen” e Kosovës, ndonëse nuk ka zbuluar ende se për cilën komunë bëhet fjalë.

Paralajmërimi vjen pasi Kuvendi Komunal i Plevlës miratoi një deklaratë për tërheqjen e vendimit për njohjen e Kosovës, duke u bërë komuna e dytë në Mal të Zi, pas Zetës, që ndërmerr një veprim të tillë me iniciativë të DNP-së.

Deklarata u votua nga 18 këshilltarë të pranishëm. Përfaqësuesit e Lëvizjes Evropa Tani (PES) dhe një këshilltar i pavarur u larguan nga seanca para votimit, ndërsa këshilltarët e Partisë Demokratike të Socialistëve (DPS) nuk morën pjesë në mbledhje.

Knezheviq e përshëndeti vendimin e Plevlës, duke e cilësuar njohjen e Kosovës si “padrejtësi historike”, ndërsa nga Uashingtoni njoftoi se DNP ka nisur një fushatë diplomatike me sloganin “Ta bëjmë Malin e Zi sërish të madh”.

Megjithëse deklaratat e miratuara nga komunat nuk kanë asnjë efekt juridik, pasi njohja ose tërheqja e njohjes së shteteve është kompetencë ekskluzive e Qeverisë së Malit të Zi, ato po përdoren si platformë politike nga komunat ku partitë pro-serbe kanë shumicën.

Veprimi i Plevlës shkaktoi reagime të menjëhershme në Podgoricë. Ministri i Administratës Publike, Marash Dukaj, tha se komunat nuk kanë kompetenca për politikën e jashtme dhe se iniciativa të tilla dëmtojnë rrugën evropiane të Malit të Zi dhe marrëdhëniet e mira fqinjësore.

Kritika erdhën edhe nga përfaqësues të DPS-së dhe SDP-së, të cilët vlerësuan se këto deklarata thellojnë ndarjet politike dhe dërgojnë mesazhe negative ndaj partnerëve evropianë të Malit të Zi.

Pas Zetës dhe Plevlës, kërkesa për një deklaratë të ngjashme është bërë edhe në komunën e Herceg Novit, ku subjektet pro-serbe po synojnë ta vendosin çështjen e Kosovës në rendin e ditës të kuvendit komunal.

Dy shtetas serbë në dy raste të ndara në veri të vendit janë ndaluar nga policia pasi të njëjtit kanë kaluar ilegalisht kufirin Serbi-Kosovë.

Njëri rast ka ndodhur në pikën kufitare Jarinje mesditën e së martës.

“Raportohet se është ndaluar i dyshuari mashkull shtetas i Serbisë, pasi që i njëjti ka kaluar ilegalisht kufirin Serbi-Kosovë. Pas intervistimit, me vendim të prokurorit i dyshuari është liruar dhe rasti shkon në procedurë të rregullt”, thuhet në njoftim.

Rasti tjetër ka ndodhur në fshatin Koshuticë të Leposaviqit mbrëmjen e së martës. Edhe ai është liruar dhe rasti ka shkuar në procedurë të rregullt.

“Raportohet se është ndaluar i dyshuari mashkull kosovar, pasi që i njëjti ka kaluar ilegalisht kufirin Serbi-Kosovë. Pas intervistimit, me vendim të prokurorit i dyshuari është liruar dhe rasti shkon në procedurë të rregull”, thuhet në njoftimin 24-orësh të Policisë së Kosovës.

Rastet janë iniciuar si “Kalim ilegal i kufirit”.

Instituti Hidrometeorologjik i Kosovës ka lëshuar një paralajmërim meteorologjik të nivelit portokalli për të gjithë territorin e Kosovës, duke njoftuar se gjatë ditës së nesërme priten stuhi të fuqishme me bubullima, reshje intensive shiu, breshër dhe erëra të forta me karakter stuhish.

Sipas njoftimit të IHMK-së, paralajmërimi do të jetë në fuqi nga ora 00:00 deri në 23:59 (GMT+2).

Instituti bën të ditur se zhvillimet e fuqishme konvektive mund të shkaktojnë rreziqe të konsiderueshme për qytetarët dhe infrastrukturën.

Ndër pasojat e mundshme përmenden goditjet e rrufesë me rrezik për njerëzit dhe kafshët, dëmtimet në rrjetin elektroenergjetik dhe ndërprerjet e furnizimit me energji elektrike, pengesat në telekomunikacion, përmbytjet e shpejta lokale në zonat me reshje intensive, si dhe dëmtimet në objekte, automjete, infrastrukturë dhe kultura bujqësore nga breshëri dhe erërat e forta.

Po ashtu, IHMK paralajmëron se shkarkimet atmosferike mund të rrisin edhe rrezikun për shpërthimin e zjarreve.

Instituti u ka bërë thirrje qytetarëve që të shmangin qëndrimin në ambiente të hapura gjatë stuhive, të mos strehohen nën pemë të vetmuara, pranë shtyllave elektrike apo objekteve metalike, të mbrojnë automjetet dhe pronën nga breshëri dhe erërat e forta, si dhe të tregojnë kujdes të shtuar në komunikacion për shkak të dukshmërisë së reduktuar dhe rrugëve të rrëshqitshme.

Dy persona kanë humbur jetën pas një aksidenti në fshatin Shushicë të Istogut. Familja njofton se ceremonia e varrimit do të bëhet të mërkurën në varrezat e fshatit Pemishtë, në ora 15:00.

Njoftimi i familjes i publikuar nga RTV Fontana:

Me pikëllim të thellë njoftojmë miqtë, shokët dhe dashamirët se, si pasojë e aksidentit tragjik, kanë ndërruar jetë më të dashurit tanë, Ramiz Miftar Qorraj (69 vjeç) dhe Arbresha Arbër Qorraj (10 vjeçe), nga fshati Pemishtë, duke na lënë përgjithmonë të pikëlluar .

Varrimi i të ndjerëve bëhet nesër më datë 22.07.2026 ditë (E MËRKURË), në varrezat e fshatit Pemishtë, në ora 15:00.

Funerali niset nga shtëpia e të ndjerëve.

Të pikëlluar përjetë mbesin mbarë familja Qorraj.

Një plan për vrasjen e presidentit turk, Recep Tayyip Erdogan gjatë tentativës së dështuar për grusht shteti në vitin 2016 është zbuluar.

Sipas informacionit të publikuar, autorët e dyshuar kishin planifikuar ta kapnin Erdoganin në hotelin ku ai qëndronte gjatë natës së puçit, më pas ta nxirrnin jashtë Turqisë me një avion të huaj dhe ta vrisnin gjatë fluturimit, shkruajnë mediat.

Plani, megjithatë, dështoi pasi presidenti turk ishte larguar nga hoteli pak para se grupi i atentatorëve të mbërrinte në vendngjarje.

🚨 BREAKING: Assassination plot against Erdoğan revealed

Turkish President was allegedly targeted during the failed 2016 coup attempt, according to the newspaper Türkiye.

The plan was to capture him at his hotel, fly him out on a foreign aircraft, and kill him midair. The plot… pic.twitter.com/hzlyikfYz4

— NEXTA (@nexta_tv) July 21, 2026

Tentativa për grusht shteti ndodhi më 15 korrik 2016, kur një grup ushtarakësh tentuan të merrnin kontrollin e institucioneve kryesore të Turqisë.

Pas përplasjes mes forcave qeveritare dhe puçistëve, më shumë se 250 persona humbën jetën.

Qeveria turke ka fajësuar rrjetin e klerikut Fethullah Gulen për organizimin e puçit, ndërsa imami tashmë i ndjerë dhe përkrahësit e tij i kanë mohuar akuzat.

Ngjarja mbetet një nga momentet më të rëndësishme politike në historinë moderne të Turqisë.

Aleanca ka prezantuar logon e saj të re, vetëm një ditë pas mbajtjes së mbledhjes së Këshillit të Përgjithshëm, në të cilën u zgjodh Kryesia e re e partisë.

Në mbledhjen e mbajtur të hënën, Këshilli i Përgjithshëm miratoi përbërjen e re të Kryesisë, duke përmbyllur procesin e riorganizimit të brendshëm të subjektit politik.

Përveç zgjedhjes së Kryesisë, u funksionalizuan edhe organet e tjera drejtuese të Aleancës, ndërsa delegatët votuan edhe për miratimin e logos së re të partisë.

Sipas Aleancës, ndryshimet e miratuara janë pjesë e procesit të reformimit dhe organizimit të strukturave të saj, me synim forcimin e funksionimit të brendshëm dhe përgatitjen për aktivitetet e ardhshme politike.

Asociacioni i Komunave të Kosovës (AKK) ka kërkuar nga institucionet qendrore që të kompensojnë menjëherë dëmet e shkaktuara nga vërshimet dhe të krijojnë një Fond Emergjent për Komunat, duke theksuar se qytetarët kanë nevojë për mbështetje konkrete dhe jo për vizita simbolike.

Përmes një reagimi publik, Bordi i AKK-së shprehu shqetësimin e thellë për dëmet e shkaktuara nga vërshimet e fundit në disa komuna të vendit.

Sipas AKK-së, është e papranueshme që një pjesë e madhe e dëmeve nga vërshimet e vitit 2023 dhe ato të janarit 2026 ende nuk janë kompensuar.

“Qytetarët nuk kanë nevojë për vizita dhe fotografi, por për mbështetje konkrete dhe kompensim të drejtë e të shpejtë”, thuhet në reagim.

AKK thekson se komunat kanë përfunduar vlerësimin e dëmeve dhe kanë përmbushur obligimet e tyre, ndërsa tani, sipas saj, përgjegjësia bie mbi institucionet qendrore për të vepruar pa vonesa.

Bordi i Asociacionit ka përsëritur tri kërkesa kryesore:

kompensimin e menjëhershëm të dëmeve nga vërshimet e vitit 2023 dhe të janarit 2026;

ndarjen e fondeve urgjente për komunat e prekura nga vërshimet e fundit;

themelimin e Fondit Emergjent për Komunat, si mekanizëm i përhershëm për reagim të shpejtë ndaj fatkeqësive natyrore.

Në fund të reagimit, AKK ka bërë thirrje për veprime konkrete nga institucionet, duke theksuar se qytetarët nuk kompensohen me fotografi, por me vendime dhe mbështetje reale.