Author: K.B.

Është ndarë nga jeta ish-luftëtari i Ushtrisë Çlirimtare të Kosovës, njëherësh pjesëtar i Policisë së Kosovës, Sami Gashi.

Kryetari i Vushtrrisë, Ferit Idrizi ka shprehur ngushëllime për vdekjen e Gashit, teksa shtoi se ai do të kujtohet gjithmonë për kontributin e tij të çmuar në shërbim të atdheut, si dhe për angazhimin e tij në ruajtjen e rendit dhe sigurisë publike.

“Në këto momente të rënda, ju shpreh ngushëllimet e mia më të thella dhe bashkëndjej dhimbjen me ju. Qoftë i përjetshëm kujtimi për të!”, thuhet në telegramin e ngushëllimit.

Një atentat i dyfishtë ka ndodhur ditën e djeshme në Balldre të Lezhës, ku mbetën të vrarë Kreshnik Mujeci dhe bashkëshortja e tij, Gentjana Mujeci, prindër të katër fëmijëve.

Makina me të cilën ata po lëviznin u godit më mbi 30 plumba, duke i lënë të vdekur në vendngjarje.

Mësohet se viktima, në tetor të vitit 2017 u arrestua si i dyshuar për vrasjen e shtetasit Genci Mhillaj në Shkodër. 30 vjeç në atë kohë, Mujeci u akuzua për veprën penale “Vrasja me paramendim”, e kryer në bashkëpunim.

Po ashtu, raportohet se viktima, Kreshnik Mujeci kishte denoncime në polici edhe nga vetë prindërit për dhunë në familje.

Ndërkohë Arben Nasufi, kreu i Policisë Lezhë konfirmon se mjeti u godit me breshëri plumbash ndërsa ishte në lëvizje.

Policia ndërkohë ndodhet në vendngjarje dhe po punon për kapjen e autorëve, raporton Top Channel.

Pesë raste të dhunës në familje janë raportuar gjatë 24 orëve të fundit në Kosovë.

Policia bën të ditur përmes raportit se dy raste janë regjistruar në Prishtinë, një në Podujevë, një tjetër në Pejë dhe një në Gjakovë, me ç’rast janë arrestuar katër persona.

Njoftimi i policisë:

Prishtinë / 26.04.2026 – 06:00. Janë arrestuar një mashkull dhe një femër kosovare pasi të njëjtit dyshohet se janë përleshur fizikisht në mes vete. Me urdhër të prokurorit të dyshuarit janë liruar, ndërsa rasti vazhdon në procedurë të rregullt.

Prishtinë / 26.04.2026 – 16:30. Është raportuar se pas një mosmarrëveshje i dyshuari mashkull kosovar ka ushtruar dhunë fizike ndaj viktimës femër kosovare. Viktima ka pranuar tretman mjekësor, kurse i dyshuari pas intervistimit me urdhër të prokurorit është liruar në procedurë të rregullt.

Gjakovë / 26.04.2026 – 10:50. Është arrestuar i dyshuari mashkull kosovar pasi kishte kryer veprën e lartcekur ndaj viktimës femër kosovare. Me vendim të prokurorit i dyshuari është dërguar në mbajtje.

Podujevë / 26.04.2026 – 09:00. Është raportuar se i dyshuari mashkull kosovar kishte ushtruar dhunë fizike ndaj viktimës femër kosovare. Viktima ka pranuar tretman mjekësor. Rasti në procedurë hetimore.

Pejë / 26.04.2026 – 06:30. Është arrestuar i dyshuari mashkull kosovar, pasi që dyshohet se kishte kryer veprën e lartcekur ndaj familjarëve të tij. Me vendim të prokurorit ndaj të njëjtit është lëshuar vendim për ndalim dhe i njëjti është dërguar në trajtim mjekësor.

Kryeministri i Kosovës, Albin Kurti, ka qëndruar sot në veri të vendit, ku ka marrë pjesë në hapjen e zyrave të reja të Ministrisë së Bujqësisë.

Kurti u prit nga ministri Armend Muja, si dhe nga Xhelal Sfeqla dhe Elbert Krasniqi. Në këtë aktivitet morën pjesë edhe kryetari i Komunës së Mitrovicës, Faton Peci, si dhe deputetja Arjeta Fejza.

Në objektin e ri do të vendosen Drejtoria Rajonale e Agjencisë për Zhvillim të Bujqësisë dhe Drejtoria Rajonale e Agjencisë Pyjore të Kosovës, të cilat deri më tani kanë operuar në objekte me qira.

Gjatë fjalës së tij, Kurti theksoi rëndësinë e sektorit të bujqësisë për ekonominë e vendit, duke bërë të ditur se ky sektor përbën rreth 7 për qind të Bruto Produktit Vendor. Ai rikujtoi edhe sloganin “buka jonë në sofrën tonë nga toka jonë”, duke shtuar se institucionet po ofrojnë mbështetje përmes granteve që tashmë janë më të qasshme për qytetarët, pa diskriminim.

Ky zhvillim vjen në vazhdën e vendimit të fundit të Ministrisë së Bujqësisë, të bërë të ditur nga ministri Muja, sipas të cilit të gjitha drejtoritë rajonale të agjencive vartëse që aktualisht funksionojnë në objekte me qira do të zhvendosen në objekte shtetërore.

Sot mbushen 27 vjet nga masakra në Mejë të Gjakovës, ku më 27 prill 1999 u vranë 376 persona.

27 vjet më parë, forcat serbe rrethuan Rekën e Keqe dhe Lugun e Carragojës në rrethinën e Gjakovë.

Brenda disa orëve u krye ekzekutimi më makabër dhe masakra më e madhe në luftën e Kosovës gjatë viteve 1998-1999.

Në një operacion të planifikuar u ndërprenë të gjitha rrugët duke lënë të hapura vetëm dy rrugë në drejtim të Mejës.

Grumbullimi i djemve dhe burrave në grupe nga mosha 15-60 vjeç filloi në orët e hershme të mëngjesit.

Në një bilanc të tmerrshëm u goditën 15 fshatra të rrethit të Gjakovës, duke i ekzekutuar të gjithë djemtë dhe burrat shtëpi për shtëpi.

Njësitet e ushtrisë serbe, policia, beretat e kuqe, paramilitarët, fqinjët e maskuar krijuan kordonin me imazhet e Srebrenicës duke ekzekutuar 376 meshkuj shqiptarë në atë që njihet si dita e festës së Jugosllavisë së fundit e cila nën vallen e gjakut ishte krijuar me lojërat e juristëve të Slobodan Millosheviqit më 27 prill 1992.

Atë ditë asnjëri nga të ndalurit nuk arriti të dilte i gjallë nga Meja dhe pas luftës trupat e masakruar të tyre, disa u gjetën nëpër varreza masive nëpër Kosovë kurse të tjerët ka informacion se janë ende diku nëpër Serbi.

Përkundër kërkesave të familjarëve dhe organizatave të ndryshme në Kosovë që trupat e tyre të kthehen nga Serbia, kjo gjë është zvarritur nga shteti serb dhe ende nuk është bërë.

Sot në ora 08:30, pritet të mblidhet Komisioni për të Drejtat e Njeriut, Barazi Gjinore, Punë, Familje, Vlerat e Luftës Çlirimtare dhe Peticione.

Në rendin e ditës janë disa pika, përfshirë miratimin e rendit të ditës dhe shqyrtimin e draft-planit të punës së komisionit për sesionin pranveror të vitit 2026.

Gjithashtu, komisioni do të shqyrtojë dhe votojë propozimin e deputetit Artan Behrami për dërgimin e ftesës zyrtare për raportim në Komisionin Parlamentar për të Drejtat e Njeriut, drejtuar kryetares së Dhomave të Specializuara, Ekaterina Trandafilova.

Rendi i ditës:

Miratimi i rendit të ditës;
2. Shqyrtimi i draft-planit të punës së Komisionit për sesionin pranveror të vitit 2026;
3. Shqyrtimi dhe votimi i propozimit të deputetit Artan Behrami, për dërgimin e ftesës zyrtare për raportim në Komisionin Parlamentar për të Drejtat e Njeriut, drejtuar kryetares së Dhomave të Specializuara znj. Ekaterina Trandafilova;
4. Të ndryshme.

Në Gjykatë Themelore të Prishtinës sot do të shpallet aktgjykimi ndaj ish-punëtores së OSBE-së Jelena Gjukanoviq, e cila akuzohet për veprën penale të spiunazhit.

Në fjalën përfundimtare, Prokuroria ka kërkuar dënim prej 25 vjetësh (dënim maksimal) në këtë rast që konsiderohet si një ndër më të rëndësishmit në fushën e sigurisë që është trajtuar në Kosovë

Ndryshe, shpallja e aktgjykimit ndaj Gjukanoviqit pritet të shpallet nga ora 13:15.

Anëtarët e familjes Shkodra, të kërkuar për vrasje të rëndë, janë ende të pakapshëm për institucionet e drejtësisë. Derisa policia thotë se ka ndërmarr të gjitha masat, për arrestimin e tyre, IPK-ja vazhdon të mbajë të suspenduar por me pagesë, zyrtarët policor që dyshohet se janë të përfshirë në rastin e tyre.

Kanë kaluar 9 muaj që nga vrasja e trefishtë në komunën e Gjilanit, ndërkohë që të dyshuarit ende nuk janë kapur nga institucionet e drejtësisë.

Mefail Shkodra së bashku me dy djemtë e tij, Edonis e Engjull Shkodra vazhdojnë të jenë të paarritshëm, derisa nga policia e Kosovës thonë se i kanë marr të gjitha veprimet e nevojshme, duke përfshirë edhe flet arrestin ndërkombëtar.

“Referuar kërkesës suaj të mëposhtme ju informojmë se lidhur me rastin Policia e Kosovës ka ndërmarrë të gjitha veprimet e nevojshme duke përfshirë edhe flet arrestin ndërkombëtar, ndërsa sa i përket çështjes së zyrtarëve policorë ju lutem që ti adresoheni IPK-së.”

E pas vrasjes që ndodhi në gusht të vitit të kaluar, në një kafene në qytet ishin aktivizuar edhe Inspektorati Policor i Kosovës, të cilët thanë se edhe më tutje katër zyrtarët policor vazhdojnë të jenë të suspenduar.

“Duke ju referuar kërkesës suaj gjeni përgjigjen nga IPK-ja si në vijim: Sa i përket zyrtarëve policorë IPK ju konfirmon se të njëjtit janë ende të suspenduar me pagesë dhe se kjo do të vazhdojë deri sa të jetë në interes të hetimit penal të cilin është duke e zhvilluar IPK-ja. Rasti në fjalë është ende në hetim dhe hetuesit e Inspektoratit Policor të Kosovës janë duke kryer disa veprime hetimore në koordinim me prokurorinë kompetente.”

IPK-ja kishte rekomanduar suspendimin e një rreshteri policor dhe një hetuesi nga Njësiti i Hetimeve Rajonale në Gjilan, një rreshter policor që ishte shef i hetimeve në Stacionin Policor të Novobërdës, dhe një zyrtar policor të Njësisë së Reagimit të Shpejtë në Gjilan.

Avokati Valdet Hoxha thotë se mungesa e bashkëpunimit juridik me shtetin e Serbisë që potencialisht mund të jetë strehë për të dyshuarit, sjellë sfida për arrestimin e tyre.

“Natyrisht që është sfidë e jashtëzakonshme edhe në rastet kur të dyshuarit mund të mos jenë brenda shtetit dhe mund të kenë kaluar kufirin atëherë sfida e radhës për institucionet e vendit tonë është edhe mungesa e bashkëpunimit ndërkombëtar me disa shtete ku eventualisht të dyshuarit mund të strehohen, prandaj këto janë sfidat që ballafaqohen mekanizmat kompetent, por nuk duhet të pushojnë dhe duhet të marrin veprimet që parashihen me kornizën ligjore”, ka deklaruar Hoxha.

Kompetencat për këtë rast kanë kaluar në Prokurorinë Speciale, derisa kjo e fundit nuk ka kthyer përgjigje, rreth hetimeve të këtij rasti.

Anëtarët e familjes Shkodra të kërkuar për vrasje të rëndë, ishin të njohur për institucionet e drejtësisë edhe për rastet e fajdeve meqë ishin arrestuar në të kaluarën, e që më pas ishin liruar./Tv Dukagjini