Author: K.B.

Kjo është dalja e tij e parë publike që pas arrestimit. Presidenti i Partisë së Lirisë, Ilir Meta ka nisur direkt me një fjalim pas kafazit prej xhami, ku po mbahet seanca në themel në GJKKO. Ai ka lëshuar akuza në drejtim të sistemit të drejtësisë, duke e cilësuar si proces të turpshëm.

“Nuk jam unë në pozita të pabarabarta, por ata. Me shpifje dhe gënjeshtra, një proces i turpshëm kundër shtetit shqiptar.

Nga sot deri në momentin e fundit, ju ftojë të ndiqni dhe transmetoni seancën”, dëgjohet teksa flet Meta pas kafazit prej xhami. Meta shfaqet për herë të parë publikisht për mediat, që pas arrestimit të tij në tetor të 2024-s, ndërsa dukshëm shfaqet ndryshe në pamje.

Meta ka kërkuar me këmbëngulje që seancat gjyqësore të transmetohen live, si një kush sipas tij që gjithçka të jetë transparente. Ai iu drejtua me një kërkesë të veçantë edhe Gjykatës së Posaçme në lidhje me këtë çështje vetëm pak ditë më parë.

“Transparenca përpara qytetarëve shqiptarë dhe llogaridhënia është detyrim për çdo institucion dhe çdo funksionar publik”, shkruan ai në një postim në rrjetet sociale. Që prej 21 tetorit 2024, Meta nuk është shfaqur në publik dhe nuk ka dhënë asnjë intervistë, ndërsa imazhi i fundit i tij mbetet momenti i arrestimit.

I sh-presidentja e Kosovës, Vjosa Osmani ka thënë se 27 prilli, Dita e të Zhdukurve me dhunë gjatë luftës, mbetet një plagë e hapur për Kosovën.

Në një postim në Facebook, ajo ka shkruar se familjet e viktimave ende jetojnë në pritje dhe ankth, disa për një varr e disa për një përgjigje për fatin e më të dashurve të tyre.

“Familjet ende presin. Disa për një varr. Disa për një përgjigje. Që të gjithë në ankth. Kosova kërkon drejtësi të plotë. Serbia duhet të hapë arkivat dhe të japë llogari për krimet. Mbajtja e të zhdukurve me dhunë dhe fshehja e varrezave masive është krim i përsëritur i Serbisë. E ardhmja ndërtohet vetëm mbi të vërtetën. Paqja e vërtetë ndërtohet vetëm kur ka drejtësi. E vërteta e vetme është se Serbia ende fle mbi varreza masive”, shkroi Osmani

Bashkimi Evropian ka thënë të hënën se shpreh keqardhje që Serbia nuk i ka marrë ende hapat e nevojshëm për t’i përballur me drejtësinë përgjegjësit për sulmin në fshatin Banjskë të Kosovës në vitin 2023.

Një zëdhënës i BE-së i ka bërë këto deklarata, teksa e ka komentuar vendimin e Gjykatës Themelore në Prishtinë, e cila më 24 prill i ka dënuar tre të akuzuarit për sulmin: Bllagoje Spasojeviqin dhe Vladimir Tolliqin me burgim të përjetshëm, ndërsa Dushan Maksimoviqin me 30 vjet burgim.

Sulmi në Banjskë ndodhi më 24 shtator 2023, si pasojë e të cilit u vra rreshteri i Policisë së Kosovës, Afrim Bunjaku.

Në këmbim e sipër të të shtënave u vranë edhe tre sulmues serbë.

Millan Radoiçiq, atëbotë nënkryetar i Listës Serbe – partisë më të madhe të serbëve në Kosovë, e cila gëzon mbështetjen e Beogradit zyrtar – mori përgjegjësinë për sulmin.

Tre të dënuarit kanë qenë pjesë e grupit prej 45 personash ndaj të cilëve kanë ngritur aktakuzë autoritetet e Kosovës, përfshirë Radoiçiqin. Përveç tre të dënuarve, pjesa tjetër e të akuzuarve janë në arrati.

Për autoritetet e Kosovës, Radoiçiq ka qenë “udhëheqësi i grupit terrorist” dhe sulmi është organizuar nga shteti i Serbisë. Beogradi, në anën tjetër, i hedh poshtë këto akuza.

Autoritetet në Kosovë i kanë ndarë procedurat penale kundër Spasojeviqit, Tolliqit dhe Maksimoviqit, të cilët ndodheshin në paraburgim që nga shtatori 2023, ndërsa e kanë hedhur poshtë kërkesën e Prokurorisë Speciale për një gjykim në mungesë për 42 të pandehurit e tjerë.

Institucionet e Bashkimit Evropian u kanë bërë thirrje rregullisht autoriteteve të Beogradit që të përcaktojnë përgjegjësinë për sulmin dhe t’i nxjerrin përgjegjësit para drejtësisë.

Megjithatë, pavarësisht thirrjeve nga blloku evropian, Shtetet e Bashkuara dhe NATO-ja, autoritetet në Serbi nuk kanë ngritur asnjë aktakuzë, madje as ndaj Radoiçiqit i cili besohet se është në Beograd.

Gjykata e Lartë në Beograd ka bërë të ditur se ekziston vendimi që ia ndalon Radoiçiqit largimin nga banesa e tij dhe ka detyrim që të paraqitet në polici, ndërsa Zyra e Prokurorit nuk e ka komentuar ndonjë aktakuzë eventuale./REL

Anëtari i Komisionit për të Drejtat e Njeriut, Barazi Gjinore, Punë, Familje, Vlerat e Luftës Çlirimtare dhe Peticione nga Partia Demokratike e Kosovës, Artan Behrami, ka propozuar dërgimin e një ftese zyrtare për raportim në këtë komision parlamentar, drejtuar kryetares së Dhomave të Specializuara, Ekaterina Trandafilova.

Behrami, gjatë mbledhjes së komisionit, shpjegoi arsyet pse, sipas tij, është e nevojshme që Trandafilova të raportojë para deputetëve.

“Në këto gjashtë vite të funksionimit të kësaj gjykate, kemi qenë dëshmitarë të një devijimi shumë të madh të mandatit që deputetët e Republikës së Kosovës ia kanë dhënë kësaj gjykate. Ka pasë shumë kritika edhe nga Ombudspersoni (Avokati i Popullit) i Republikës së Kosovës me seli në Prishtinë, nga përfaqësues të të drejtave të njeriut, nga gazetarë, nga mbrojtja, shqetësime serioze për cenim të të drejtave të njeriut të të paraburgosurve, në këtë rast krerëve të UÇK-së të cilët gjenden në Hagë. Dhe kam dëgjuar po ashtu argumentet të cilat thonë se ligji të cilin e kemi miratuar në Kuvend nuk e lejon një gjë të tillë. Mirëpo, unë fola edhe një herë për këtë devijim që ka ndodhur nga mandati i kësaj gjykate. Dhe unë mendoj që kjo neve na jep të drejtë që si Komision për të Drejtat e Njeriut të cilat janë të drejta universale, të cilat nuk mund të ndalohen me asnjë ligj, me asnjë konventë ndërkombëtare që të monitorohen shtetasit e Republikës së Kosovës edhe në institucione ku Republika e Kosovës ka mandat, po edhe në institucione të cilat Republika e Kosovës nuk ka juridiksion”, u shpreh Behrami.

Behrami sqaroi se raportimi nuk ndërhynë në drejtësi.

“Dhe ne kemi pasur diskutime, por pikënisja ka qenë edhe fjalimi i zëvendëskryeministrit të parë dhe ministrit të punëve të jashtme, zotëri Glauk Konjufca, i cili në Këshillin e Sigurimit të OKB-së e ka zgjuar edhe një herë këtë kritikën tashmë të shpërndarë jo vetëm në Kosovë, por te të gjithë ata që kanë monitoruar Gjykatën Speciale. E cila, fatkeqësisht, nuk i raporton Kuvendit të Republikës së Kosovës i cili e ka krijuar, por përmes EULEX-it i raporton UNMIK-ut, duke shfrytëzuar Rezolutën 1244. Dhe unë mendoj që të gjithë ata që e kanë votuar Gjykatën Speciale, nuk e kanë votuar që kjo gjykatë t’i raportojë në çfarëdo forme EULEX-it edhe UNMIK-ut përmes Rezolutës 1244, por t’i raportojë Republikës së Kosovës dhe Kuvendit të Republikës së Kosovës.

Për të sqaruar edhe një gjë: tendenca jonë që kemi kërkuar një raportim të tillë nuk është që të ndërhyjmë në drejtësi. Sepse të drejtat e njeriut kur ato adresohen, nuk është ndërhyrje në drejtësi; është bash përkundrazi, është një iniciativë për me vu drejtësi. Dhe meqë jemi në fund të procesit të gjyqit në Hagë dhe të verdiktit, këtë komision edhe një raportim i tillë nuk do të ketë fare ndikim as në verdikt. Por është një komision që dëshiron të vijë deri te e vërteta se çfarë ka ndodhur atje, cilat janë të drejtat e të paraburgosurve që janë shkelur, në mënyrë që të sigurojmë edhe të vërtetën nga perspektiva e Republikës së Kosovës”, thekson ai, raporton Ekonomia Online.

Ai gjithashtu renditi shkeljet që kjo gjykatë ka bërë.

“Dhe ndër shkeljet më të mëdha ka qenë padyshim: Monitorimi i kufizuar dhe jo privat i intervistave; Pengimi i mandatit të pakufizuar të institucionit të të drejtave të njeriut; Mungesa e llogaridhënies dhe mbikëqyrjes ndaj institucioneve të Kosovës; Raportimi jashtë kornizës kushtetuese; Transparenca e ulët e qasjes, e kufizuar në informata publike; Mosrespektimi i parimit të barazisë së armëve; Pranimi i provave jo objektive, për shembull nga librat; Paqartësi mbi provat nga Serbia; Mungesa e standardit të qartë të veprës në procedurë; Monitorim, pengim i komunikimit dhe kufizimi i vizitave familjare; Paraburgim i zgjatur dhe kufizime pa proporcionalitet; Mungesë e mekanizmit të pavarur të ankesave dhe mbikëqyrjes; Funksionim pa kontroll institucioni dhe transparencë efektive; Strukturë e centralizuar e gjykatës; Dyshime për pavarësi; Përfshirja e Dhomës Kushtetuese brenda strukturës; Pozita e Avokatit të Popullit brenda strukturës, që është në kundërshtim të plotë me Parimet e Parisit; Përgjimi i komunikimeve edhe me mbrojtjen; Kohëzgjatja e tepruar e paraburgimit dhe mungesa e alternativave; Mosbesim ndaj institucioneve, standard jo i barabartë, e kështu me radhë.

Pra janë një sërë shkeljesh që ndërlidhen me të drejtat e njeriut, për të cilat ne si komision kemi të drejtë që të ftojmë edhe Ombudspersonin e Dhomave të Specializuara të Republikës së Kosovës, por edhe kryetaren e këtij institucioni, për t’u informuar nga ta nëse janë respektuar të gjitha këto të drejta të njeriut, edhe nëse ka pasur devijim nga mandati i tyre, meqë në nenin 1 të Ligjit për Dhomat e Specializuara të Republikës së Kosovës përmendet qartë raportimi i Dick Marty-t që ndërlidhet me trafikim të organeve, një gjë që nuk është adresuar fare nga kjo gjykatë”, thotë tutje ai.

Alban Krasniqi, bashkëshorti i Albulena Haxhiut, e shlyu postimin ku i kërkoi Lidhjes Demokratike të Kosovës që të zyrtarizojë përmes nënshkrimeve propozimin e Vjosa Osmanit.

Ai tha se kjo çështje të mos bëhet në rrjete sociale por në sekretariat të kuvendit.

Por, me ç’duket, pishman është bërë Alban Krasniqi i cili fshiu postimin.

Alban Krasniqi i VV’së: LDK është dashur t’a zyrtarizojë emrin e Osmanit me shkresë e nënshkrimet e të gjithë deputetëve

“Në fluturimin Milano–New York të muajit prill, vendi 40L në një Boeing 777 ofron hapësirë të bollshme për këmbët pasi ndodhet pranë daljes së emergjencës. Por ka një “mangësi” të dukshme, nuk ka dritare.”

Megjithatë, kjo nuk është shqetësimi kryesor për pasagjerët.

Problemi qëndron te çmimi i zgjedhjes së këtij vendi gjatë check-in-it: 235 euro për çdo drejtim, ose 470 euro vajtje-ardhje. Një shumë që tejkalon koston e vetë biletës së fluturimit transatlantik, e cila në disa raste mund të jetë rreth 400 euro.

Sipas të dhënave të fundit, tensionet në Gjirin Persik kanë ndikuar ndjeshëm në rritjen e çmimit të karburantit të avionëve (kerosenit), i cili është dyfishuar krahasuar me fundin e shkurtit. Kjo ka sjellë rritje të përgjithshme të tarifave të fluturimeve, një trend që vështirë se mund të shmanget nga kompanitë ajrore.

Por ndikimi nuk ndalet këtu. Janë rritur ndjeshëm edhe çmimet e shërbimeve shtesë që përdoren nga rreth 40% e pasagjerëve të kompanive low cost dhe 5–10% e atyre të linjave tradicionale, zgjedhja e vendit, bagazhet dhe ushqimi në bord.

Sipas IATA-s, çmimi i një ton kerosen në Europë ka arritur në 1.484 dollarë, mbi 106% më shumë se një vit më parë. Karburanti përbën 35–40% të kostove operative të linjave ajrore, dhe mbi 50% për kompanitë low cost.

Në këtë situatë, edhe kompanitë që blejnë karburant me kontrata afatgjata po përballen me rritje të ndjeshme të shpenzimeve. Vetëm për pjesën e blerë me çmime aktuale, disa kompani raportojnë dhjetëra milionë dollarë kosto shtesë në muaj.

Në nivel global, tarifat mesatare të fluturimeve janë rritur me rreth 24% krahasuar me një vit më parë. Megjithatë, sipas industrisë, çmimet ende mbeten nën nivelet e para pandemisë nëse merret parasysh inflacioni.

Një pjesë gjithnjë e më e rëndësishme e fitimeve të kompanive ajrore vjen nga shërbimet “ancillary”, që dikur përfshiheshin në çmimin e biletës. Këto përfshijnë zgjedhjen e vendit, bagazhet dhe imbarkimin prioritar.

Sipas të dhënave të industrisë, vetëm në vitin 2025 këto shërbime kanë gjeneruar 157 miliardë dollarë të ardhura, duke u rritur ndjeshëm krahasuar me një dekadë më parë.

Në disa raste, rritjet janë të forta: bagazhet me 21–24%, ndërsa zgjedhja e vendit ka shënuar rritje deri në 40%.

Përfaqësues të industrisë pranojnë se rritja e çmimit të karburantit po e bën të vështirë ruajtjen e tarifave aktuale. Sipas tyre, pa rritje të të ardhurave nga të gjitha shërbimet, disa kompani rrezikojnë seriozisht stabilitetin financiar.

Në këtë kontekst, një vend në avion që nuk ka as dritare si 40L është kthyer në simbol të një tendence më të gjerë: fluturimet po bëhen më të shtrenjta, dhe çdo detaj po kthehet në shërbim me pagesë.

Organizata për cilësi në arsim ORCA ka zhvilluar një aksion simbolik para objektit të Kuvendit të Kosovës, duke kundërshtuar, siç u tha, tentimet për cenimin e pavarësisë së Agjencisë së Kosovës për Akreditim.

Aktivisti i ORCA-s, Dibran Hoxha, para mediave theksoi se ndërhyrjet në këtë proces rrezikojnë drejtpërdrejt integritetin e sistemit të arsimit të lartë në vend.

“Pavarësia e AKA-së duhet të mbrohet me çdo kusht dhe standardet duhet të zbatohen pa kompromis. Kuvendi i Kosovës nuk duhet të votojë një proces të komprometuar, por të ruajë integritetin institucional dhe besimin publik në sistemin e akreditimit,” deklaroi Hoxha.

Ai foli gjerësisht për zhvillimet e fundit lidhur me përzgjedhjen e anëtarëve të Këshillit Shtetëror të Cilësisë, duke e cilësuar të gjithë procedurën si të përshpejtuar dhe problematike.

“Më 7 prill 2026, Ministria e Arsimit shpalli thirrjen publike për nominimin e tre anëtarëve vendorë në Këshillin Shtetëror të Cilësisë, me një afat aplikimi prej vetëm 8 ditësh. Për këtë thirrje aplikuan gjithsej 10 kandidatë. Më 20 prill, komisioni vlerësues u mblodh dhe brenda rreth 48 orëve përfundoi vlerësimin e të gjithë kandidatëve, duke hartuar një listë rekomandimesh që iu dorëzua ministrit Hajrullah Çeku,” tha ai.

Sipas Hoxhës, mënyra e procedimit ngre shqetësime serioze për transparencën dhe ligjshmërinë e procesit.

“Raporti është proceduar në Qeveri në mënyrë urgjente, pa qartësi nëse është nënshkruar nga të gjithë anëtarët e komisionit. Ndërkohë, kandidatët e refuzuar nuk kanë marrë njoftime zyrtare dhe nuk është respektuar afati ligjor për ankimim. Këto elemente krijojnë dyshime serioze për integritetin e gjithë procesit dhe për respektimin e procedurave ligjore,” u shpreh ai.

Ai hodhi poshtë edhe arsyetimin për urgjencë në këtë proces.

“Pretendimi për mungesë kuorumi në Këshillin Shtetëror të Cilësisë nuk qëndron. Përbërja aktuale e këtij organi garanton funksionimin e tij edhe për një periudhë të konsiderueshme kohore. Nuk ka asnjë bazë faktike apo ligjore për të krijuar urgjencë artificiale për ndërhyrje në përbërjen e tij,” theksoi Hoxha.

Në deklaratën e tij, ai përmendi edhe rikthimin e një kandidature të kontestuar.

“Në këtë proces është rikthyer emri i Driton Velës, ish kandidat për deputet nga Lëvizja Vetëvendosje në vitin 2019, i cili në vitin 2023 ishte diskualifikuar nga një proces i ngjashëm për shkak të deklarimeve të pasakta në aplikim. Ai kishte pretenduar rol akademik si bartës programi në Universitetin e Prishtinës dhe kishte paraqitur në mënyrë të pasaktë përvojën e tij akademike,” deklaroi ai.

Hoxha shtoi se edhe zhvillimet e fundit lidhur me këtë kandidat janë shqetësuese.

“Në tetor 2025, ai u përfshi në një incident publik me sjellje joakademike gjatë një mbledhjeje të Këshillit të Fakultetit të Mjekësisë, ndërsa në shkurt 2026 është ndëshkuar me vërejtje me shkrim nga Universiteti i Prishtinës për cenim të imazhit institucional. Pavarësisht këtij historiku, ai është rekomanduar sërish për një pozitë vendimmarrëse,” tha ai.

Sipas ORCA-s, reagimi kundër këtij procesi është më i gjerë.

“Katërmbëdhjetë organizata të shoqërisë civile dhe rrjeti ROSCAP kanë kërkuar ndalimin e këtij procesi dhe refuzimin e listës së propozuar, duke paralajmëruar për pasoja serioze në kredibilitetin e Agjencisë dhe në pozitën e saj në mekanizmat ndërkombëtarë të sigurimit të cilësisë,” theksoi Hoxha.

Ai bëri thirrje për anulim të plotë të procedurës dhe nisje të një procesi të ri.

“Ky rast tregon qartë se si një proces që duhet të bazohet në meritë dhe transparencë po shndërrohet në një procedurë të përshpejtuar ku standardet relativizohen dhe kriteret anashkalohen. ORCA kërkon që ky proces të anulohet dhe të iniciohet një procedurë e re, transparente dhe e bazuar në meritë. Çdo vendim që cenon pavarësinë dhe kredibilitetin e Agjencisë së Kosovës për Akreditim rrezikon drejtpërdrejt edhe pozitën ndërkombëtare të sistemit të arsimit të lartë në vend, përfshirë anëtarësimin në mekanizma si EQAR dhe ENQA,” shtoi ai.