Author: K.B.

Aeroporti Ndërkombëtar i Prishtinës “Adem Jashari” ka njoftuar për disa përditësime në procedurat e udhëtimit, të cilat kanë hyrë në fuqi nga 1 prilli 2026, duke synuar lehtësimin dhe përshpejtimin e procesit të fluturimeve.

Sipas njoftimit zyrtar, udhëtarët këshillohen të përdorin check-in online dhe të mbajnë kartën e imbarkimit në celular ose të printuar, ndërsa pasagjerët pa bagazh të regjistruar mund të shkojnë direkt në portën e nisjes.

Po ashtu, është theksuar se pasagjerët duhet të jenë në aeroport shumë më herët se zakonisht, duke filluar nga tri orë para orës së nisjes së fluturimit, për shkak të procedurave të imbarkimit dhe mbylljes së check-in-it.

“Aeroporti u bën thirrje të gjithë pasagjerëve që të jenë në aeroport më herët dhe të respektojnë oraret e përcaktuara sipas politikave të linjave ajrore”, thuhet në njoftim.

Kompania ajrore “low cost” Ryanair ka njoftuar mbylljen e bazës së saj në Berlin, duke argumentuar se vendimi vjen si pasojë e rritjes së tarifave aeroportuale.

Sipas kompanisë, shtatë avionë Boeing 737 do të largohen nga kryeqyteti gjerman dhe do të zhvendosen në tregje të tjera më konkurruese në Evropë, përfshirë Suedinë dhe Shqipërinë.

Vendimi ka surprizuar operatorin e aeroportit të Berlinit, i cili ka mohuar çdo rritje tarifash. Në një reagim të shkurtër, kompania menaxhuese bëri të ditur se është në negociata me linjat ajrore dhe se nuk ka në plan rritje të çmimeve aeroportuale.

Ryanair pretendon se tarifat në Berlin janë rritur me 50% që nga viti 2019 dhe ka konfirmuar se baza do të mbyllet më 24 tetor. Pilotët dhe stafi i kabinës janë njoftuar për vendimin, ndërsa punonjësve u është ofruar mundësia për t’u transferuar në baza të tjera të kompanisë.

Sipas vlerësimeve të kompanisë, ky hap do të përgjysmojë numrin e fluturimeve nga Berlin, duke reduktuar lidhjet ajrore me destinacione të afërta. Në muajt e fundit, edhe kompani të tjera si easyJet kanë shkurtuar operacionet e tyre në qytet.

Ryanair paralajmëron se vendimi do të sjellë humbjen e mbi 2 milionë vendeve në vit dhe një rënie të trafikut nga 4.5 milionë pasagjerë aktualë në rreth 2.2 milionë deri në vitin 2027.

Kompania thekson se, në mungesë të reformave për uljen e kostove në Gjermani, do të vazhdojë të zhvendosë avionët drejt tregjeve më konkurruese në Evropë.

Deputeti i Lëvizjes Vetëvendosje Agim Bahtiri, i ka bërë thirrje opozitës që të marrin pjesë në seancë ku do të votohet presidenti.

Kjo thirrje e Bahtirit vjen pas seancën së mbrëmshme kur Lëvizja Vetëvendosje provoi të votonte pa pjesëmarrjen e opozitës.

“Edhe sot i bëjmë thirrje opozitës: EJANI NË SALLË PLENARE, mos rrini në zyre të grupeve parlamentare. Prej kujt po frikësoheni që s’po zbritni poshtë? Propozoni kandidatin tuaj. Edhe njëherë e keni mundësinë. EJANI poshtë e votoni, mos e lini vendin të shkojë në zgjedhje, edhe ashtu po dihet se e keni kuptuar se shkaktar kryesor të cilët do t’i dënoj populli jeni ju”, ka shkruar Bahtiri.

Mbrëmë, VV-ja tentoi që ta bënte zgjedhjen e presidentit pa qenë 80 deputetë në sallë ashtu siç kërkohet me Kushtetutë.

Deputeti i VV-së, Vigan Qorolli është deklaruar në lidhje me çështjen e zgjedhjes së shefit të shtetit.

Për Klan Kosova, ai tha se Feride Rushiti, si askush tjetër i plotëson standardet për të qenë presidente e Kosovës. Sipas tij, ajo është kandidaturë konsensuale për tërë popullin e Kosovës.

“Feride Rushiti është kandidaturë konsensuale për tërë popullin e Kosovës. Si askush tjetër, zonja Rushiti i plotëson standardet për të qenë shefe e shtetit, nuk është kandidaturë veç e VV-së, por e përfaqëson më së miri se çka ka bërë në këto dy dekada”, deklaroi Qorolli.

Ai tha se pret që opozita të marrë pjesë në seancë.

“Presim që opozita të reflektojë dhe të vijë në seancë”, shtoi deputeti, njofton Klankosova.tv.

Ndërsa sa i përket mesazhit të Naim Bardiqit, deputeti tha se nuk i komenton mesazhet individuale.

“Nuk paraqet qëndrim të tillë, sepse presidenti paraqet unitetin e popullit. Kosova duhet të ketë president, kemi bërë përpjekje maksimale që t’i evitojmë zgjedhjet”, tha Qorolli.

Një operacion i forcave speciale të Marinës meksikane ka çuar në arrestimin e Audias Flores Silva, i njohur si “El Jardinero”, një nga figurat më të rëndësishme të kartelit Jalisco Nueva Generacion.

Aksioni u zhvillua në shtetin Nayarit, në veri të Guadalajara, dhe u konfirmua nga sekretari i Sigurisë, Omar Garcia Harfuch.

Sipas autoriteteve, Flores Silva konsiderohej një nga komandantët kryesorë rajonalë të organizatës kriminale, me ndikim të gjerë në zonat bregdetare të Paqësorit. Ai përmendej gjithashtu si një nga pasuesit e mundshëm të liderit të kartelit, Nemesio Oseguera.

Ndaj tij ishte lëshuar një urdhër arresti në Meksikë, ndërsa Shtetet e Bashkuara kishin kërkuar ekstradimin, duke ofruar një shpërblim deri në 5 milionë dollarë për kapjen.

Autoritetet bëjnë të ditur se arrestimi është rezultat i një operacioni të mirëplanifikuar nga Marina meksikane, me përfshirjen e njësive elitare.

Flores Silva përballet me akuza të rënda në SHBA, përfshirë komplot për trafik ndërkombëtar droge – veçanërisht kokainë dhe heroinë – si dhe shkelje që lidhen me armëmbajtjen. Ai ishte përfshirë edhe në listën e trafikantëve ndërkombëtarë të drogës nga Departamenti i Thesarit amerikan.

Ky nuk është arrestimi i tij i parë. Më herët ai kishte vuajtur një dënim pesëvjeçar për trafik narkotikësh, përpara se të rikthehej në Meksikë dhe, sipas autoriteteve, të rifillonte aktivitetet kriminale.

Karteli Jalisco Nueva Generacion, i themeluar në vitin 2009, konsiderohet një nga organizatat më të fuqishme dhe më të dhunshme të trafikut të drogës në Meksikë.

Edhe pse kanë kaluar gati 30 minuta nga ora 10:00, kur ishte paraparë të niste vazhdimi i seancës për zgjedhjen e presidentit të Kosovës, në sallën e Kuvendit nuk ndodhet ende asnjë deputet.

PDK dhe LDK kanë paralajmëruar se nuk do të marrin pjesë në këtë seancë.

Ata kanë akuzuar partinë në pushtet për “puç kushtetues”.

Seanca për zgjedhjen e Presidentit do të jetë vazhdim i asaj të së hënës, që u ndërpre mbrëmë.

Për këtë pozitë janë propozuar Feride Rushiti dhe Hatixhe Hoxha. Para se kryekuvendarja, Albulena Haxhiu ta ndërprente seancën, mbrëmë u mbajt një votim që nga u cilësua si jokushtetues me vetëm 64 deputetë në sallë. 63 vota ishin për kandidaten Feride Rushiti, ndërsa Hatixhe Hoxha nuk mori asnjë votë.

Kryeministri i Kosovës, Albin Kurti, i shoqëruar nga ministri i Brendshëm, Xhelal Sveçla, janë drejtuar drejt Kuvendit të Kosovës.

I pyetur për çështjen e presidentit, Kurti në ecje e sipër ka thënë se janë duke bërë përpjekje maksimale për të bërë zgjidhje.

Megjithatë ai s’ka dhënë ndonjë përgjigje kur është pyetur nëse do ta përkrahin emrin e Vjosa Osmanit.

Deputetja e PDK-së, Ganimete Musliu, ka vlerësuar se VV-ja po dëshiron zgjedhjen e presidentit jashtë rregullave demokratike.

Ajo ka bërë me dije se kjo është rrëshqitje e rrezikshme drejt një forme të grushtshtetit.

Në profilin e saj në Facebook, ajo ka shkruar se Kosova meriton ligj dhe respektim të demokracisë.

“Kur institucionet kapen, ligjet anashkalohen dhe vendimet merren jashtë rregullave demokratike, kjo nuk është më qeverisje është rrëshqitje e rrezikshme drejt një forme të grushtshtetit. Kosova meriton rend, ligj dhe respekt për demokracinë, jo improvizim dhe kapje të shtetit”, ka shkruar ajo.