ATV

Author: K.B.

  • Gjykata del me njoftim pasi e dënoi Xhelal Sveçlën: Dënimi me burg nuk i ekzekutohet nëse s’kryen vepra brenda një viti

    Gjykata del me njoftim pasi e dënoi Xhelal Sveçlën: Dënimi me burg nuk i ekzekutohet nëse s’kryen vepra brenda një viti

    Gjykata Themelore në Prishtinë, Departamenti i Përgjithshëm – Divizioni Penal, ka dalë me një komunikatë për media pasi ka shpallur aktgjykimin në çështjen penale ndaj ministrit në detyrë Xhelal Sveçlës për veprën penale Përdorimi i armës apo mjetit të rrezikshëm, nga neni 375 paragrafi 2 në nenin 375 paragrafi 1 të Kodit Penal të Republikës së Kosovës.

    “I akuzuari Xh.S. është shpallur fajtor dhe është dënuar me dënim me burgim me kusht në kohëzgjatje prej 1 (një) viti, i cili dënim nuk do të ekzekutohet nëse i akuzuari nuk do të kryej vepër penale brenda një viti”, njofton Gjykata.

    “I akuzuari Xh.S. është shpallur fajtor, pasi më datë 21.03.2018, në periudhën kohore nga ora 12:10 deri në ora 15:40, në Prishtinë, në sallën e seancave plenare të Kuvendit të Republikës së Kosovës, gjatë mbajtjes së seancës së jashtëzakonshme plenare, kishte përdor bombolë me gaz lotsjellës me përmbajtje të agjentit kimik CS ndaj deputetëve dhe personave të tjerë të pranishëm në sallë. I njëjti, në disa raste gjatë seancës, kishte aktivizuar bombolën dhe kishte hedhur brenda sallës plenare, pa paralajmërim paraprak dhe pa u lënë personave të pranishëm mundësi largimi, duke shkaktuar përhapjen e gazit irritues në hapësirën e mbyllur. Si pasojë, personat e pranishëm ishin detyruar të largohen nga salla dhe seanca plenare ishte ndërprerë.

    Obligohet i akuzuari që në emër të paushallit gjyqësor të paguaj shumën prej 50 euro si dhe në emër të kompensimit të viktimave të krimit shumën prej 20 euro, të gjitha këto pas plotfuqishmërisë së aktgjykimit.Pala e dëmtuar, për realizimin e kërkesës pasurore juridike udhëzohet në kontekst të rregullt juridiko-civil.Kundër këtij aktgjykimi, palët kanë të drejtë ankese në Gjykatën e Apelit të Kosovës, brenda afatit prej 30 (tridhjetë) ditësh nga dita e pranimit të aktgjykimit” përfundon njoftimi./Express/

  • Austria nis zbatimin e ndalimit të shamisë për vajzat nën 14 vjeç

    Austria nis zbatimin e ndalimit të shamisë për vajzat nën 14 vjeç

    Ndalimi i shamisë së kokës për vajzat nën 14 vjeç ka nisur të zbatohet me fillimin e vitit të ri shkollor në Austri, ndërsa komuniteti mysliman dhe organizata të tjera e kundërshtojnë masën.

    Me rikthimin e nxënësve në shkolla, Austria ka nisur zbatimin e ligjit që ndalon mbajtjen e shamisë së kokës për vajzat nën moshën 14-vjeçare. Masa është kundërshtuar nga organizata myslimane dhe grupe të tjera, të cilat e konsiderojnë atë diskriminuese, transmeton albinfo.ch.

    Viti i ri shkollor ka nisur të hënën në Vjenë, Austrinë e Poshtme dhe Burgenland, ndërsa në pjesën tjetër të vendit shkollat do të rihapen javën e ardhshme.

    Ligji është propozuar nga koalicioni qeverisës i përbërë nga tri parti të qendrës, i cili e ka arsyetuar masën me mbrojtjen e lirisë së vajzave. Legjislacioni u miratua në parlament në dhjetor, me mbështetjen edhe të Partisë së Lirisë, ndërsa kundër tij votuan vetëm të Gjelbrit.

    Kundërshtimi nga komuniteti mysliman

    Komuniteti Fetar Islamik në Austri (IGGO), organizata që përfaqëson zyrtarisht myslimanët në vend, e ka cilësuar ndalimin si shkelje të të drejtave themelore dhe ka paralajmëruar se do ta kundërshtojë ligjin në Gjykatën Kushtetuese.

    Gjykata Kushtetuese kishte hedhur poshtë në korrik disa kundërshtime, duke argumentuar se ligji ende nuk kishte hyrë në fuqi.

    Në vitin 2020, e njëjta gjykatë kishte shpallur të paligjshëm një ndalim të mëparshëm të shamisë, i cili zbatohej për fëmijët nën 10 vjeç. Sipas gjykatës, masa diskriminonte myslimanët dhe cenonte parimin e neutralitetit fetar të shtetit.

    Gjobat mund të arrijnë deri në 800 euro

    Legjislacioni i ri parashikon që shkolla të zhvillojë fillimisht një bisedë me çdo nxënëse që shkel ndalimin. Pas kësaj procedure, mund të vendoset një gjobë prej 150 deri në 800 euro.

    Ministri i Arsimit, Christoph Wiederkehr, ka thënë se ende nuk është e sigurt se si do të vlerësohet ligji nga Gjykata Kushtetuese.

    “Ne në qeveri zhvilluam konsultime shumë intensive dhe në Ministrinë e Arsimit u përpoqëm shumë të hartonim një ligj që të ishte në përputhje me kushtetutën”, ka deklaruar Wiederkehr për transmetuesin publik ORF./Albinfo.at

  • E rëndë në Gjermani: Lojtari dyshohet se helmoi për vdekje shokun e skuadrës për një arsye tronditëse

    E rëndë në Gjermani: Lojtari dyshohet se helmoi për vdekje shokun e skuadrës për një arsye tronditëse

    Një futbollist 35-vjeçar në Gjermani, i identifikuar si Marius, është arrestuar nën dyshimin se ka helmuar në mënyrë fatale një shok skuadre gjatë një udhëtimi në fund të sezonit.

    Futbollisti, i cili luan për klubin amator TuS Rockenberg, dyshohet se helmoi fshehurazi një bashkëlojtar gjatë një udhëtimi të ekipit në Dresden, ku futbollistët kishin shkuar për të festuar përfundimin e sezonit.

    Gjatë udhëtimit, njëri prej lojtarëve, Philipp, papritmas filloi të ndihej keq. Pasi u kthye në shtëpi, gjendja e tij u përkeqësua dhe familja e tij thirri ambulancën.

    Philipp u dërgua në spital, por fatkeqësisht ndërroi jetë të nesërmen, më 16 qershor 2025, në moshën 30-vjeçare, pavarësisht përpjekjeve të mjekëve për ta reanimuar.

    Fillimisht, familja e viktimës besonte se ai ishte prekur nga një helmim i rëndë ushqimor, pasi gjatë udhëtimit ekipi kishte konsumuar peshk.

    Megjithatë, hetimet e mëvonshme zbuluan se shkaku i vdekjes së Philippit ishte dështimi i shumëfishtë i organeve, i shkaktuar nga helmimi.

    Gjatë hetimit, Marius u identifikua si i dyshuari kryesor.

    “Ne supozojmë se bëhet fjalë për një akt hakmarrjeje”, deklaroi prokurori i lartë Thomas Hauburger për mediat lokale, duke shtuar se dyshohet që motivi i hakmarrjes lidhej me një vajzë.

    “Jemi të gjithë të befasuar dhe të tronditur. Askush nuk e priste këtë. Shpresojmë që policia të jetë në gjendje të zbardhë plotësisht atë që ka ndodhur”, tha Manuel Barufe, drejtuesi i departamentit të futbollit të TuS Rockenberg, në një deklaratë për mediat lokale.

  • Lushaku e LDK-së: PISA 2025, turpi qeveritar!

    Lushaku e LDK-së: PISA 2025, turpi qeveritar!

    Deputetja e LDK-së, Jehona Lushaku ka komentuar publikimin e fundit të PISA’së, e cila Kosovën e rendit thuajse në fund.

    Sipas saj, rezultatet e PISA 2025 tregojnë se 3 nga 4 nxënës të Kosovës nuk e arrijnë nivelin bazë në matematikë, lexim dhe shkencë.

    Postimi i plotë:

    PISA 2025, TURPI QEVERITAR

    Sot u publikuan rezultatet e Testit të PISA-s 2025, që janë shqetësuese jo vetëm për faktin se Kosova vazhdon të jetë në fund të tabelës, por për mospërmirësimin e njohurive të nxënësve tanë në dhjetë vitet e kaluara. Duhet të na alarmojë ajo që fshihet pas këtyre numrave!

    Rezultatet e PISA 2025 tregojnë se 3 nga 4 nxënës të Kosovës nuk e arrijnë nivelin bazë në matematikë, lexim dhe shkencë.

    Mendoni pak çfarë do të thotë kjo!

  • Singapori i rikthehet librit, qytetarët nxiten të lexojnë 15 minuta në ditë

    Singapori i rikthehet librit, qytetarët nxiten të lexojnë 15 minuta në ditë

    Singapori ka nisur një lëvizje të re kombëtare që synon të forcojë kulturën e leximit, duke i nxitur qytetarët të lexojnë të paktën 15 minuta çdo ditë. Nisma pesëvjeçare, e quajtur “ReadSG”, u lansua më 6 shtator nga National Library Board (NLB).

    Një nga programet kryesore është “ReadSG Challenge”, përmes së cilës pjesëmarrësit mund të regjistrojnë kohën e përditshme të leximit, të vendosin objektiva personale dhe të fitojnë shpërblime virtuale. Platforma përfshin edhe seri ditore leximi, pikë eksperience dhe monedha virtuale që mund të përdoren për shpërblime.

    Sfida do të pilotohet nga 6 shtatori deri më 31 dhjetor, ndërsa veçori të reja pritet të shtohen në bazë të reagimeve të përdoruesve. NLB synon që deri në shtator 2027, në këtë sfidë të marrin pjesë rreth 150 mijë persona.

    Presidenti i Singaporit, Tharman Shanmugaratnam, i cili është patron i “ReadSG”, mori pjesë në ceremoninë e lançimit në National Library Building në Bugis. Duke shpjeguar vendimin për ta mbështetur lëvizjen për pesë vjet, ai theksoi se krijimi i zakoneve kërkon kohë.

    “Pesë vjet në fakt nuk janë shumë gjatë, por shpresojmë që pas pesë vitesh të shohim diçka ndryshe në zakonet tona”, tha ai.

    Sipas NLB-së, qëllimi i “ReadSG” është të ndihmojë qytetarët të ndërtojnë zakone të qëndrueshme leximi përmes hapave të vegjël dhe të arritshëm. Drejtoresha ekzekutive e institucionit, Melissa Tam, tha se nisma vjen në një kohë kur njerëzit kanë qasje në një sasi të jashtëzakonshme informacioni dhe përmbajtjeje, por mund të kenë më pak kohë për t’u përqendruar thellësisht në atë që lexojnë.

    Ajo vuri në dukje se leximi i rregullt i teksteve të gjata ndihmon në zhvillimin e mendimit kritik, imagjinatës, empatisë dhe përqendrimit.

    “Zakonet ndërtohen përmes veprimeve të vogla dhe të qëndrueshme. Prandaj, po fillojmë me një objektiv të thjeshtë – vetëm 15 minuta lexim në ditë. Në autobus, para gjumit ose gjatë drekës”, tha Tam.

    Një tjetër nismë e “ReadSG”, “Get It Now”, do t’u mundësojë përdoruesve të Libby-t të lexojnë një titull të përzgjedhur pa radhë pritjeje, të premten e parë të çdo muaji deri në mars 2027.

    Lëvizja përkon edhe me fillimin e “National Reading Month”, që do të zhvillohet çdo shtator dhe do të sjellë aktivitete të ndryshme të lidhura me librin në bibliotekat e Singaporit.

    Leximi i regjistruar gjatë muajit shtator do të kontribuojë gjithashtu në fushatën bamirëse “Read for Good”. Nisma synon që gjatë vitit 2026 të arrijë 7.5 milionë minuta leximi dhe të mbledhë deri në 150 mijë dollarë për komunitetet në nevojë.

    Nga 6 shtatori deri më 7 tetor, çdo 15 minuta lexim i regjistruar në ditë do të kontribuojë në këtë përpjekje. NLB synon që fondet të ndihmojnë rreth 10 mijë persona përmes mbështetjes për fëmijët dhe komunitetet më pak të privilegjuara, duke siguruar materiale leximi dhe mësimi, si dhe libra të dhuruar nga sponsorët.

    “ReadSG” mbështetet nga më shumë se 40 partnerë dhe përfaqësues të institucioneve, përfshirë agjenci shtetërore, Ministrinë e Arsimit, Këshillin Kombëtar të Arteve, Shoqatën e Botuesve të Librit të Singaporit, SPH Media dhe Mediacorp.

    Lëvizja synon të përfshijë të gjitha grupmoshat. Për fëmijët, institucionet theksojnë rëndësinë e leximit të hershëm për zhvillimin e vëmendjes, kureshtjes dhe imagjinatës, ndërsa për të moshuarit parashikohet përfshirje përmes qendrave të ndryshme të aktivitetit dhe plakjes aktive.

    Mes aktiviteteve të tjera të “ReadSG” janë “Readers Assemble: A Marvel Festival”, “Time of Your Life Celebration” dhe “A Book A Day”.

    “Kjo është një lëvizje kombëtare shumëvjeçare për leximin dhe ne po mendojmë afatgjatë. Jo vetëm për librin e parë që dikush zgjedh, por për atë se si do të duket jeta pesë vjet më vonë, kur leximi të jetë bërë një pjesë e natyrshme dhe domethënëse e përditshmërisë”, tha Tam.

  • Renditja në PISA, Sejdiu: Pas 6 vitesh qeverisje, fëmijët tanë me rezultatet më të dobëta – kaq për “ndryshimin”

    Renditja në PISA, Sejdiu: Pas 6 vitesh qeverisje, fëmijët tanë me rezultatet më të dobëta – kaq për “ndryshimin”

    Analisti Dardan Sejdiu ka thënë se pas gjashtë viteve qeverisje të Albin Kurtit, fëmijët e Kosovës po dalin me rezultate edhe më të dobëta në testin PISA.

    Në një shkrim në Facebook, ai ka thënë se “pas gjashtë vitesh nuk mundesh me tregu më kush e la keq”.

    “Pas gjashte vjetesh qeverisje, femijet tane po dalin me rezultate me te dobeta. Kaq per “ndryshimin”. Sepse pas gjashte vjetesh nuk mundesh me tregu ma kush e la keq. Qeverisja matet me ate qe e ke bo ma mire. “Bota ka ec. Na kemi ngec.” – Po te ishte dikush tjeter ne pushtet, ky do te ishte slogani”, ka shkruar ai.

    Theksojmë se sipas rezultateve që u bënë publike sot, nxënësit nga Kosova sërish janë renditur në fund të listës së PISA.

  • Para zyrës së Speciales në Prishtinë kërkohet lirimi i katërshes së UÇK-së

    Para zyrës së Speciales në Prishtinë kërkohet lirimi i katërshes së UÇK-së

    Tetë ditë para se të shpallet vendimi për katërshen e UÇK-së në Hagë, aktivistë të organizatës “Liria ka Emër” kanë kërkuar lirimin e tyre në një aktivitet simbolik të zhvilluar para objektit të EULEX-it në Prishtinë, ku ndodhet edhe Zyra e Dhomave të Specializuara.

    “Në emër të popullit, shpalleni të pafajshëm”, thuhej në banerin që mbante figurat e Hashim Thaçit, Kadri Veselit, Jakup Krasniqit e Rexhep Selimit.

    Kryeministri në detyrë, Albin Kurti, sot ka deklaruar se nuk asnjë informacion se çfarë vendimi është marrë në Gjykatën Speciale.

    Katërshja e UÇK-së është në pritje të aktgjykimit lidhur me këtë rast, i cili do të shpallet në seancë publike më 16 shtator.

    Vetëm në vitin 2025 janë organizuar pesë protesta në mbështetje të UÇK-së. Ndërsa, dy të tjera u mbajtën gjatë këtij viti.

    Më 12 shtator do të mbahet një protestë tjetër në Prishtinë për të kërkuar vendim lirues për katërshen e UÇK-së.

  • Hoti kërkon konventë të LDK-së: Na duhet një pajtim i madh

    Hoti kërkon konventë të LDK-së: Na duhet një pajtim i madh

    Deputeti i Lidhjes Demokratike të Kosovës, Avdullah Hoti, ka kërkuar mbajtjen e një konvente të madhe të LDK-së, përmes së cilës, sipas tij, partia duhet të qartësojë rrugën e saj politike dhe të rikthejë besimin e brendshëm.

    Hoti ka thënë se në këtë konventë duhet të përfshihen të gjitha strukturat e LDK-së.

    “LDK-ja ka nevojë urgjente për një konventë të madhe, për një pajtim të madh për të qartësuar rrugën tonë përpara”, ka shkruar Hoti.

    Sipas tij, konventa duhet të shërbejë si një moment i ri për partinë dhe të përcaktojë ekipin që do ta udhëheqë LDK-në në zgjedhjet e ardhshme.

    “Konventa duhet të jetë një bashkim i madh dhe një moment i ri për LDK-në. Ajo duhet të përcaktojë ekipin që do ta udhëheqë LDK-në drejt fitores në zgjedhjet e ardhshme”, ka deklaruar Hoti.

    Ai ka theksuar se rikthimi i besimit brenda partisë është kusht për unitet dhe punë ekipore.

    “Mbi të gjitha, konventa duhet të ri-vendosë besimin e brendshëm, që është parakusht për unitet, punë ekipore dhe fitore”, ka shkruar ai.

    Hoti ka bërë të ditur se do të angazhohet për këtë proces, duke thënë se vetëm një LDK e bashkuar mund të rikthejë besimin e qytetarëve.

  • Eduard Kuçi mohoi dhunën, Policia e shpall në kërkim për moskallëzim krimi

    Eduard Kuçi mohoi dhunën, Policia e shpall në kërkim për moskallëzim krimi

    Një tjetër zhvillim është bërë publik lidhur me ngjarjen ku këngëtari Jozefin Marku dhe shoferi i tij, Kristjan Nikolli, janë arrestuar nga Policia.

    Prokuroria ka kërkuar masën e sigurisë “arrest me burg” për të dy, ndërsa hetimet vijojnë për të zbardhur rrethanat dhe rolin e personave të përfshirë.

    Ndërkohë, Eduard Kuçi, i cili dyshohet se është sulmuar, është shpallur në kërkim policor për moskallëzim krimi.

    Detajet e reja janë bërë publike nga gazetarja Anila Hoxha gjatë emisionit “Breaking” me Fjori Dardhën në Top News.

    “Prokurori i çështjes, Françesk Galaj, i ka kërkuar gjykatës arrest me burg. Ende nuk është caktuar ora e seancës për dy të arrestuarit, Jozefin Marku dhe Kristjan Nikolli. Eduard Kuçi nuk e ka kallëzuar krimin, në polici ka thënë se ka qenë një konflikt i thjeshtë për shkak të bllokimit të rrugës me makinë.

    Më pas policia ka konfirmuar dhe ka bërë verifikimet e nevojshme, ka ngritur akuzën e moskallëzimit të krimit për Kuçin dhe e ka vënë në kërkim policor. Më pas, Marku është thirrur në polici, por ai nuk ka pranuar. Pas arrestimit ka thënë se është mërzitur që Kuçi e ka ofenduar në rrjetet sociale.

    Prokuroria ka ngritur disa akuza ndaj tij dhe Kristjan Nikolli. Kuçi nuk ka bërë denoncim dhe është një hetim i nisur nga ana e policisë. Kuçi është në kërkim policor, që ndryshon nga kërkimi nga ana e gjykatës apo prokurorisë. Ai kërkohet të japë sqarime për ngjarjen.

    Prokurori ka kërkuar akt-ekspertimi për të kuptuar nëse ka dëme trupore ndaj viktimës së sulmit. Po hetohet gjithashtu për përdorimin e simboleve të policisë së shtetit. Pika më e fortë e mbrojtjes së Markut do të jetë fakti që Kuçi nuk ka bërë denoncim”, u shpreh Anila Hoxha.

  • Xiaomi nuk ndalet te telefonat, në 2027 sjell veturat elektrike

    Xiaomi nuk ndalet te telefonat, në 2027 sjell veturat elektrike

    Xiaomi po synon të shkojë përtej telefonave inteligjentë.

    Në panairin IFA 2026 në Berlin, kompania kineze prezantoi planet për të sjellë makinat e saj elektrike në Evropë në vitin 2027.

    Kompania tashmë shet automjete elektrike në Kinë dhe tani synon të zgjerohet në tregun evropian.

    Por ambicia e Xiaomi nuk kufizohet vetëm te shitja e makinave.

    Në qendër të strategjisë së saj është ekosistemi “Human x Car x Home”, që synon të lidhë telefonat, automjetet dhe pajisjet inteligjente të shtëpisë në një sistem të vetëm.

    Në prezantimin në IFA, Xiaomi tregoi se përdoruesit mund të kontrollojnë nga makina pajisje të ndryshme në shtëpi, si kondicionerin apo perdet inteligjente.

    Kompania synon që Al dhe sistemi HyperOS të mundësojnë një koordinim më të avancuar mes makinës, telefonit dhe shtëpisë.

    Xiaomi prezantoi gjithashtu konceptin elektrik Vision Gran Turismo, një hiper-makinë futuriste e krijuar për serinë e lojërave Gran Turismo.

    Megjithatë, ky model mbetet vetëm një koncept.

    Për hyrjen në tregun evropian, Xiaomi ka nënshkruar marrëveshje me tetë grupe gjermane të shitjes së automjeteve, ndërsa Gjermania pritet të jetë vetëm pika e parë e zgjerimit në Evropë.

    Kompania ka njoftuar gjithashtu se planifikon të investojë më shumë se 24 miliardë euro në kërkim dhe zhvillim globalisht gjatë viteve 2026–2030, në fusha si Al, automjetet inteligjente, robotika, gjysmëpërçuesit dhe prodhimi i avancuar.