ATV

Author: K.B.

  • Dallaveret me patentë-shoferë në Pejë, aktakuzë ndaj 12 personave

    Dallaveret me patentë-shoferë në Pejë, aktakuzë ndaj 12 personave

    Një skandal i madh korrupsioni që dyshohet se ka funksionuar për vite me radhë në Qendrën për Patentë Shoferë në Pejë ka përfunduar me ngritjen e një aktakuze voluminoze nga Prokuroria Themelore në Pejë. Në bankën e të akuzuarve janë përfshirë 12 persona, të cilët dyshohen se përmes ryshfetit, manipulimeve dhe shkeljeve të ligjit u kanë mundësuar kandidatëve pajisjen e kundërligjshme me patentë-shoferë.

    Sipas Prokurorisë, aktakuza prej 391 faqesh është ngritur nga Departamenti për Krime të Rënda dhe përfshin veprat penale “Keqpërdorim i pozitës zyrtare apo autoritetit zyrtar”, “Manipulim me prova”, “Legalizim i përmbajtjes së rreme” dhe “Dhënie ryshfeti”.

    Në qendër të rastit është i pandehuri A.Sh., i cili në cilësinë e Koordinatorit të Njësisë së Qendrës për Patentë Shoferë në Pejë dyshohet se, nga viti 2021 deri më 23 korrik 2024, ka organizuar dhe mundësuar mbajtjen e provimeve teorike në mënyrë të kundërligjshme. Sipas aktakuzës, kandidatëve u është lejuar testimi edhe kur nuk figuronin në listat zyrtare apo nuk kishin dokumentacion të plotë.

    Prokuroria pretendon se në këtë skemë ka qenë i përfshirë edhe i pandehuri R.S., i cili dyshohet se ka ndërmjetësuar ryshfete nga përfaqësues të auto-shkollave në vlera prej 300 deri në 1 mijë euro, me qëllim të kalimit të kandidatëve në testet teorike dhe praktike.

    Në aktakuzë përmendet edhe manipulimi me prova, ku A.Sh., T.Sh. dhe R.S. dyshohet se më 17 nëntor 2023 kanë vepruar në bashkëkryerje në zyrën e koordinatorit të Qendrës për Patentë Shoferë në Pejë.

    E pandehura T.Sh., si pyetëse e pjesës teorike, akuzohet se u ka ndihmuar kandidatëve duke iu treguar përgjigjet e sakta gjatë testimit dhe duke lejuar hyrjen në provim edhe pa dokumentacion të kompletuar. Veprime të ngjashme, sipas Prokurorisë, dyshohet se janë kryer edhe nga M.Sh, transmeton Klankosova.tv.

    Pjesë e hetimeve është edhe zyrtari administrativ L.G., i cili dyshohet se ka lejuar kandidatë të hyjnë në provime me dosje të pakompletuara dhe nuk ka regjistruar dhjetëra kandidatë në librat zyrtarë. Gjatë kontrollit, hetuesit kanë gjetur edhe dosje të mbajtura jashtë institucionit në mënyrë të kundërligjshme.

    Ndërkohë, ekzaminuesit e pjesës praktike B.K. dhe N.D. akuzohen se kanë organizuar testime jashtë orarit zyrtar dhe në kundërshtim me procedurat administrative, duke mundësuar kalimin e kandidatëve pa plotësuar kriteret ligjore.

    Sipas Prokurorisë, përfitime nga kjo skemë dyshohet se kanë pasur edhe disa auto-shkolla, të cilat kanë fituar avantazh të padrejtë në treg duke regjistruar shumë më tepër kandidatë sesa konkurrentët.

    Në mesin e të akuzuarve janë edhe përfaqësues të auto-shkollave, të cilët ngarkohen për “Dhënie ryshfeti” dhe “Legalizim të përmbajtjes së rreme”.

    Prokuroria Themelore në Pejë ka kërkuar nga gjykata që, pas shqyrtimit të provave, të akuzuarit të shpallen fajtorë dhe të dënohen sipas ligjit, duke theksuar se mbetet e vendosur në luftimin e korrupsionit dhe keqpërdorimeve që cenojnë besimin e qytetarëve në institucionet publike.

  • Zafir Berisha nuk është kandidat në këto zgjedhje, parashikon zgjedhje të reja pas tre muajsh

    Zafir Berisha nuk është kandidat në këto zgjedhje, parashikon zgjedhje të reja pas tre muajsh

    Ish-deputeti i disa legjislaturave në Kuvendin e Kosovës, Zafir Berisha ka njoftuar se nuk do të jetë kandidat për deputet në Kuvendin e Kosovës.

    Berisha ka thënë se ka pasur disa shqetësime shëndetësore dhe në këto zgjedhje nuk do të jetë kandidat për deputet.

    Megjithatë, ai parasheh se pas tre muajve vendi do të shkoj sërish në zgjedhje të parakohshme.

    “Edhe pse kam pasur oferta s’kam pranu sepse këto zgjedhje i shoh zgjedhje koti. Pas tre muajve do të shkojmë sërish në zgjedhje, sepse numri i analfabetëve politik vazhdon të dominoj ende në Kosovë”, ka thënë ai për IndeksOnline.

    Në zgjedhjet e 28 dhjetorit, ishte kandidat nga radhët e AAK-së.

  • Hasani: Jam propozuar nga dega e Prizrenit që të jem në listën e deputetëve për zgjedhjet e 7 qershorit

    Hasani: Jam propozuar nga dega e Prizrenit që të jem në listën e deputetëve për zgjedhjet e 7 qershorit

    Ish-deputeti i Partia Demokratike e Kosovës, Nait Hasani, ka konfirmuar se është propozuar nga dega e Prizrenit për të qenë pjesë e listës për deputet në zgjedhjet e 7 qershorit.

    Hasani tha se kandidatura e tij ka ardhur si propozim nga struktura e degës në Prizren, ndërsa shtoi se beson që do të jetë pjesë e listës zyrtare të subjektit politik për këto zgjedhje.

    Ai po ashtu tha se nga dega e Prizrenit i janë dërguar qendrës 7 kandidatë.

    “Jam propozuar nga dega e Prizrenit dhe besoj se do të jem pjesë e listës së PDK-së për zgjedhjet e 7 qershorit”, ka deklaruar Hasani. /Indeksionline

  • Xhinset ju janë ngushtuar pas larjes? Pesë gabime që ua prishin formën, ngjyrën dhe butësinë

    Xhinset ju janë ngushtuar pas larjes? Pesë gabime që ua prishin formën, ngjyrën dhe butësinë

    Kujdesi i duhur nis nga etiketa: temperatura, centrifuga dhe mënyra e tharjes janë vendimtare nëse dëshironi që xhinset tuaja të preferuara të zgjasin më shumë

    Xhinset nuk janë vetëm pjesë e domosdoshme e stilit tonë, e përditshmërisë dhe e gardërobës që i veshim në pothuajse çdo rast, pavarësisht moshës, stinës apo vendit. Ato janë shumë më tepër se një rrobë e zakonshme.

    I duam, i veshim shpesh dhe, megjithatë, sa herë vjen koha për t’i larë, shumë prej nesh shqetësohen nëse do të dalin nga rrobalarësja me të njëjtën formë, ngjyrë dhe butësi.

    Xhinsi është material i fortë dhe i qëndrueshëm, por jo i përjetshëm. Herët a vonë, do të vijë momenti kur duhet të ndahemi nga ato pantallona që na kanë shoqëruar më gjatë se shumë gjëra të tjera në jetë. Megjithatë, ekspertët thonë se xhinset nuk dëmtohen aq shumë nga vjetërsia, sa nga kujdesi i gabuar, sidomos nga larja e papërshtatshme.

    Arsyeja është e thjeshtë: uji i nxehtë shkakton tkurrje, centrifuga me shpejtësi të lartë e prish formën, tharja mbi radiator e bën materialin të fortë, ndërsa ngjyra gradualisht shpëlahet dhe zbehet. Kjo vërehet sidomos te xhinset e errëta dhe modelet elastike, ku rëndësi nuk ka vetëm nuanca, por edhe prerja.

    Lexoni gjithmonë etiketën

    Disa xhinse mund të lahen në rrobalarëse, disa kërkojnë kujdes më të butë, ndërsa xhinsi i papërpunuar kërkon trajtim edhe më të kujdesshëm.

    Prandaj, rregulli i parë është i thjeshtë: lexoni mirë udhëzimet në etiketë. Aty zakonisht tregohet temperatura më e lartë e lejuar, mënyra e tharjes, intensiteti i centrifugës dhe kushtet e tjera të mirëmbajtjes.

    Nëse prodhuesi ka shënuar larje në 30 gradë, larja në 60 gradë nuk do t’i pastrojë më mirë xhinset, por mund t’i ngushtojë, t’ua zbehë ngjyrën dhe t’ua dëmtojë strukturën.

    Zgjidhni ujë më të ftohtë dhe centrifugë më të butë

    Për xhinset e zakonshme, uji më i ftohtë dhe centrifuga më e butë janë zgjedhje më e sigurt. Xhinset e errëta dhe ato me elastan nuk e durojnë mirë ujin e nxehtë.

    Nëse e harroni këtë rregull, pas disa larjeve mund të vëreni se materiali është bërë më i ashpër, ndërsa forma nuk është më e njëjta.

    Centrifuga duhet të përdoret sa më pak, ose të shmanget krejtësisht kur është e mundur, në mënyrë që të ruhen ngjyra, forma dhe materiali.

    Lajini të kthyera mbrapsht

    Rregulli i dytë është që xhinset të lahen gjithmonë të kthyera mbrapsht. Para se t’i fusni në rrobalarëse, mbyllni zinxhirin, pullat dhe kapëset.

    Kjo ndihmon që pjesa e jashtme të fërkohet më pak gjatë larjes dhe që ngjyra të ruhet më gjatë.

    Mos i përzieni xhinset e errëta me rroba të çelëta

    Rregulli i tretë është të shmangni larjen e xhinseve të errëta me rroba të çelëta, sidomos në larjen e parë.

    Xhinsi i errët mund të lëshojë ngjyrë dhe t’ju krijojë problem me rrobat e tjera.

    Sa shpesh duhet të lahen xhinset?

    Kjo është një pyetje për të cilën diskutohet prej vitesh. Natyrisht, higjiena personale është më e rëndësishmja. Si çdo rrobë tjetër, edhe xhinset mbledhin baktere, qeliza të vdekura të lëkurës, djersë dhe aroma të pakëndshme.

    Nëse i vishni çdo ditë, këshillohet të lahen së paku një herë në javë. Megjithatë, eksperti i larjes së rrobave, Patrick Richardson, thotë se idealisht xhinset mund të lahen pas nëntë ose dhjetë veshjeve, mundësisht me dorë dhe në ujë të vakët.

    Sigurisht, kjo varet edhe nga koha që keni në dispozicion dhe nga mënyra se si i përdorni.

    Mos i thani në radiator ose në diell të fortë

    Rregulli i pestë lidhet me tharjen. Shmangni tharjen e xhinseve mbi radiator, në diell të drejtpërdrejtë ose në tharëse, përveç rasteve kur etiketa e lejon qartë.

    Temperaturat e larta rrisin rrezikun e tkurrjes dhe deformimit të materialit. Prandaj, kur është e mundur, tharja në ajër të pastër mbetet zgjidhja më e mirë.

    Me pak kujdes, xhinset tuaja të preferuara mund ta ruajnë më gjatë ngjyrën, formën dhe butësinë, pa u shndërruar pas disa larjeve në një rrobë të ngushtuar, të zbehur dhe të ashpër.

  • Hoti: Më 7 qershor, qytetarët do të votojnë për partneritetin strategjik të Kosovës me BE-në dhe SHBA-të

    Hoti: Më 7 qershor, qytetarët do të votojnë për partneritetin strategjik të Kosovës me BE-në dhe SHBA-të

    Ish-kryeministri i Kosovës, Avdullah Hoti, ka bërë me dije se më 7 qershor qytetarët e Kosovës do të votojnë për partneritetin strategjik të Kosovës me BE-në dhe SHBA-në.

    Ai ka vlerësuar se ky partneritet nuk është vetëm përcaktim ekonomik dhe politik i Kosovës.

    Në profilin e tij në Facbook, Hoti ka shkruar se është ekzistencial për të ardhmen euro-atlantike të Kosovës dhe të gjithë shqiptarëve.

    “Më 7 qershor, qytetarët e Kosovës do të votojnë PËR partneritetin strategjik të Kosovës me BE dhe SHBA. Ky partneritet nuk është vetëm përcaktim ekonomik dhe politik i Kosovës, është ekzistencial për të ardhmen euro-atlantike të Kosovës dhe të gjithë shqiptarëve”, ka shkruar Hoti.

    Në statusin e tij të gjatë, ai ka treguar për marrëveshjet e rëndësishme që qeveritë e mëhershme kanë nënshkruar me BE-në dhe SHBA-të.

    “Pas shpalljes së pavarësisë më 2008, qeveritë e njëpasnjëshme kanë nënshkruar marrëveshje për bashkëpunim dhe partneritet strategjik të Kosovës me aleatët perëndimorë. Në këto marrëveshje hyjnë partneritetet bilaterale, anëtarësimet në organizata ndërkombëtare si Banka Botërore dhe FMN, dhe marrëveshjet e borxhit shtetëror për projekte strategjike etj. Në mesin e këtyre marrëveshjeve, dy janë kryesoret, që mund të konsiderohen marrëveshje historike pasi e kanë përcaktuar partneritetin afatgjatë të Kosovës me aleatët euro-atlantikë, e para me BE-në dhe e dyta me SHBA-në”, ka shkruar ai.

  • Ramush Haradinaj përkujton Agron Rrahmanin: Hero që jetën ia kushtoi lirisë së atdheut

    Ramush Haradinaj përkujton Agron Rrahmanin: Hero që jetën ia kushtoi lirisë së atdheut

    Kryetari i AAK-së, Ramush Haradinaj ka përkujtuar Agron Rrahmanin në përvjetorin e rënies së tij heroike.

    Përmes një postimi në Facebook, kreu i Aleancës thotë se Rrahmani jetën e tij ia kushtoi lirisë së atdheut dhe mbeti përjetësisht simbol i sakrificës dhe atdhedashurisë.

    “Më 12 maj 1998, pushkët e luftëtarëve të lirisë kumbuan në Anadrini. Betejat në Ratkoc, Vrajakë, Bratotin dhe Malësi të Vogël shënuan një kapitull të ri të Luftës Çlirimtare në Zonën Operative të Pashtrikut. Jo rastësisht, 12 Maji shënohet si Dita e Dëshmorëve në Komunën e Rahovecit”, ka shkruar Haradinaj.

    Ai përkujtoi edhe Milaim Krasniqin, Elmi Morinën e Bedrush Gashin.

    “Atë ditë ranë heroikisht Milaim Krasniqi dhe Elmi Morina. Një vit më pas, ra dëshmor edhe një nga luftëtarët më të dalluar të Anadrinisë, Bedrush Gashi. Lavdi të gjithë atyre që u flijuan për lirinë e Kosovës ndër breza”.

  • Starmer përballet me ditën e tij më të vështirë

    Starmer përballet me ditën e tij më të vështirë

    Këtë mëngjes, kabineti i kryeministrit anglez,Keir Starmer është i ndarë në çështjen më themelore politike me të cilën mund të përballet ndonjëherë grupi më i lartë i ministrave të qeverisë: nëse ai duhet të vazhdojë mandatin.

    Është e qartë se një kabinet i ndarë në këtë drejtim është i paqëndrueshëm. Ose ministrat e kabinetit duhet të japin dorëheqjen apo të shkarkohen, ose vetë kryeministri duhet të largohet, shkruan BBC.

    Mbrëmë, ministrat shkuan për të takuar Starmer dhe ai u prit me një sërë këshillash. Disa thanë se ai duhet të vazhdojë të luftojë. Disa thanë se ai duhet të caktojë një afat kohor për largimin e tij. Dhe të tjerë, ndërsa ai peshonte mundësitë e tij, u përpoqën ta ndihmonin të mendonte se si mund të përballonte skenarin me të cilin përballet tani.

    Një digë duket se është thyer, me deputetët laburistë që deklarojnë publikisht humbjen e besimit të tyre tek kryeministri me aq shpesh sa ndonjëherë mund të jetë e vështirë t’i numërosh.

  • Trump ‘po e shqyrton seriozisht bërjen e Venezuelës shtetin e 51-të të Shteteve të Bashkuara’

    Trump ‘po e shqyrton seriozisht bërjen e Venezuelës shtetin e 51-të të Shteteve të Bashkuara’

    Presidenti Donald Trump i tha Fox News të hënën se ai “po e shqyrton seriozisht bërjen e Venezuelës shtetin e 51-të” pasi rrëmbeu presidentin e vendit Nicolas Maduro.

    Korrespondenti i Fox News për Kongres, Bill Melugin, raportoi të hënën në mëngjes se Trump kishte folur me prezantuesin e Fox News, John Roberts dhe kishte thënë se ai “po e shqyrton seriozisht bërjen e Venezuelës shtetin e 51-të të SHBA-së”.

    Presidenti thuhet gjithashtu se i tha Roberts se “Venezuela e do Trumpin”, përpara se të vinte në dukje se vendi kishte 40 trilionë dollarë naftë, transmeton Telegrafi.

    Presidenti i Venezuelës, Nicolas Maduro, u rrëmbye nga forcat amerikane dhe u dërgua në New York, ku aktualisht është i burgosur, gjatë një operacioni ushtarak në janar.

    Venezuela aktualisht drejtohet nga presidentja në detyrë Delcy Rodriguez, e cila më parë kishte shërbyer si zëvendëspresidente e Venezuelës deri në rrëmbimin e Maduros.

    Pas operacionit ushtarak, Trump bëri një postim tallës në mediat sociale duke e deklaruar veten si presidenti i ri i Venezuelës.

    Trump njoftoi gjithashtu se do të shiste naftën e Venezuelës dhe se paratë do të kontrolloheshin personalisht prej tij.

    “Jam i kënaqur të njoftoj se Autoritetet e Përkohshme në Venezuelë do t’i dorëzojnë Shteteve të Bashkuara të Amerikës midis 30 dhe 50 milionë fuçi naftë të sanksionuar me cilësi të lartë”, u mburr ai.

    “Kjo naftë do të shitet me çmimin e saj të tregut dhe ato para do të kontrollohen nga unë, si president i Shteteve të Bashkuara të Amerikës, për të siguruar që përdoren në dobi të popullit të Venezuelës dhe Shteteve të Bashkuara”, shtoi ai.

    Në shkurt, Trump vlerësoi Rodriguezin, duke përgëzuar presidentin në detyrë të Venezuelës për “një punë të shkëlqyer” në dorëzimin e naftës së vendit te SHBA-të.

    “Delcy ka bërë një punë shumë, shumë të mirë dhe marrëdhënia është e fortë. Nafta po del dhe shumë para po paguhen për naftë nga kombe të tjera”, tha ai.

  • Njollë kafe në lëkurë? Shenjat që tregojnë se duhet marrë seriozisht

    Njollë kafe në lëkurë? Shenjat që tregojnë se duhet marrë seriozisht

    Shumica e njollave kafe lidhen me diellin, moshën ose ndryshimet hormonale, por ndryshimi i formës, madhësisë, ngjyrës apo gjakderdhja kërkon kontroll dermatologjik

    Njollat kafe në lëkurë janë shumë të zakonshme. Pothuajse çdo njeri, në një moment të jetës, mund të zhvillojë ndonjë formë të tyre. Në shumicën e rasteve ato janë shenja të padëmshme të ekspozimit në diell dhe të plakjes së lëkurës, por ndonjëherë mund të tregojnë edhe gjendje më serioze shëndetësore.

    Kjo hiperpigmentim ndodh kur trupi prodhon më shumë melaninë, gjë që shkakton paraqitjen e njollave ose zonave më të errëta në lëkurë.

    “Çdo ditë shoh njolla kafe në praktikë dhe pothuajse te çdo pacient. Gati çdo person ka ndonjë lloj njolle kafe, zakonisht nishane ose njolla nga dielli”, thotë dr. William Kwan, dermatolog i certifikuar në Golden State Dermatology në Kaliforni.

    Dr. Elizabeth Rubin, mjeke e certifikuar e mjekësisë emergjente në një spital në Los Angeles, thekson se çelësi është dallimi ndërmjet njollave të qëndrueshme, me ngjyrë të njëtrajtshme, dhe atyre që me kalimin e kohës ndryshojnë ngjyrë, madhësi ose formë. Këto të fundit kërkojnë vlerësim mjekësor.

    Shkaqet e njollave kafe në lëkurë

    Njollat kafe mund të paraqiten në disa forma, secila me karakteristika të veçanta. Dermatologët më shpesh shohin këto lloje:

    Njollat e moshës ose njollat nga dielli

    Shkaku më i zakonshëm i njollave kafe është ekspozimi në diell. “Ekspozimi i grumbulluar në diell dhe rrezitja çojnë në shumë njolla kafe në pjesët e lëkurës që janë të ekspozuara”, thotë dr. Kwan.

    Këto njolla të sheshta zhvillohen pas ekspozimit në diell dhe mund të kenë nuanca të ndryshme kafeje, të nxira ose të zeza. Zakonisht shfaqen në fytyrë, duar, shpatulla dhe pjesën e sipërme të krahëve.

    “Rrezatimi UV nxit prodhimin e tepërt të melaninës në zona të caktuara, duke krijuar ato njolla karakteristike të errëta. Edhe plakja luan rol të rëndësishëm, sepse mekanizmat natyrorë të riparimit të lëkurës dhe shpërndarja e pigmentit bëhen më pak efikasë me kalimin e kohës”, shpjegon dr. Elizabeth Rubin.

    Nishanet

    Pothuajse të gjithë kanë nishane, njolla kafe, shpesh pak të ngritura, që mund të shfaqen kudo në trup.

    Dr. Kwan thotë se nishanet janë ndër llojet më të shpeshta të njollave kafe që kanë njerëzit.

    Edhe pse shumica e nishaneve janë plotësisht beninje, çdo nishan që ndryshon madhësi, formë ose ngjyrë duhet të kontrollohet nga dermatologu.

    Pikat e diellit dhe qukat

    Qukat janë njolla të vogla kafe, me prirje trashëgimore, të cilat bëhen më të dukshme pas ekspozimit në diell.

    Ato janë të sheshta, zakonisht kafe të çelëta, dhe shfaqen shpesh në pjesët e trupit që preken më shumë nga dielli, si fytyra, shpatullat dhe duart.

    Më shpesh vërehen te njerëzit me lëkurë të çelët dhe me flokë më të hapur.

    Melasma

    Edhe luhatjet hormonale mund të shkaktojnë një lloj të veçantë pigmentimi kafe, që quhet melasma.

    “Shtatzënia, menopauza ose përdorimi i pilulave kontraceptive mund të çojnë në melasmë, një lloj pigmentimi kafe që shpesh shfaqet në faqe ose në ballë”, shpjegon dr. Rubin.

    Kjo formë hormonale e hiperpigmentimit prek shumë gra dhe mund të zgjasë për një kohë të gjatë.

    Hiperpigmentimi pas inflamacionit

    Ky lloj hiperpigmentimi shfaqet kur lëkura errësohet pas një dëmtimi ose inflamacioni.

    “Aknet janë shkak i shpeshtë i hiperpigmentimit, ashtu si çdo lloj dëmtimi i lëkurës”, thotë dr. Rubin.

    Këto njolla të errëta mund të mbeten edhe pasi lëkura të jetë shëruar nga djegiet, prerjet, gërvishtjet, ekzema ose irritime të tjera.

    Ndryshimi i ngjyrës i lidhur me barnat

    Disa barna mund ta rrisin ndjeshmërinë ndaj diellit dhe të ndikojnë në ndryshime të pigmentimit.

    Sipas dr. Rubin, barnat antiinflamatore josteroide, disa antibiotikë dhe disa barna kimioterapie mund të çojnë në shfaqjen e njollave kafe.

    “Këto lloje barnash mund edhe t’i përkeqësojnë njollat kafe. Faktorët e stilit të jetesës, si pirja e duhanit, ekspozimi i tepërt në diell dhe mbrojtja e pamjaftueshme nga dielli, e përshpejtojnë zhvillimin e njollave kafe në të gjitha kategoritë”, shton dr. Kwan për Healthy.

    Shkaqe të rralla, por serioze të njollave kafe

    Edhe pse shumica e njollave kafe janë të padëmshme, ekzistojnë edhe disa shkaqe më të rralla që kërkojnë vëmendje të menjëhershme.

    “Sëmundja Addison, çrregullim i gjëndrave mbiveshkore, mund të shkaktojë errësim të lëkurës, sidomos në palosjet e lëkurës ose në pikat e presionit. Kjo lidhet me faktin se gjëndrat mbiveshkore nuk prodhojnë mjaftueshëm hormone”, shpjegon dr. Kwan.

    Hemokromatoza, gjendje që lidhet me grumbullimin e tepërt të hekurit në organizëm, mund t’i japë lëkurës pamje bronzi.

    Edhe disa gjendje gjenetike, si sindroma Peutz-Jeghers, shkaktojnë njolla karakteristike kafe ose të ngjashme me quka rreth gojës ose në mukozë.

    Problemet metabolike po ashtu mund të shfaqen përmes ndryshimeve në lëkurë.

    “Diabeti mund të shkaktojë acanthosis nigricans, që është errësim i lëkurës me pamje të butë, si kadife, zakonisht në qafë, sqetulla dhe ije”, thotë dr. Rubin.

    Insuficienca akute dhe kronike e mëlçisë gjithashtu mund të çojë në hiperpigmentim.

    “Këta janë vetëm disa shembuj, prandaj nëse dikush fillon të vërejë shenja të njollave të reja kafe në moshë të rritur, do të ishte e mençur të konsultohej me dermatolog të certifikuar”, thotë dr. Kwan.

    Kur njollat kafe mund të sinjalizojnë kancer të lëkurës

    Çdo nishan që ka ndryshuar madhësi, formë ose ngjyrë duhet të kontrollohet nga dermatologu, theksojnë të dy ekspertët.

    “Çdo njollë që rritet shpejt, bëhet e dhimbshme, krijon kore ose gjakos spontanisht duhet të kontrollohet menjëherë nga mjeku ose dermatologu”, paralajmëron dr. Rubin.

  • Sezoni i gjashtë i “La Casa De Papel” po vjen? Paralajmërimi që bëri lëmsh rrjetin

    Sezoni i gjashtë i “La Casa De Papel” po vjen? Paralajmërimi që bëri lëmsh rrjetin

    Interesimi për një vazhdim të “La Casa de Papel” (“Money Heist”) është rritur sërish në ditët e fundit, pas diskutimeve online dhe një “teaser”-i të Netflix-it që ka ndezur spekulimet se universi i serialit mund të rikthehet me një kapitull të ri.

    Fansat po pyesin hapur: a do të ketë “Money Heist” sezoni i gjashtë, apo Netflix do ta çojë françizën në një drejtim tjetër me histori të reja dhe personazhe të rinj?

    Çfarë dihet për sezonin e gjashtë?

    Netflix ka bërë të qartë se po zgjeron universin “Money Heist”, por jo në formën e një sezoni të gjashtë të drejtpërdrejtë që vazhdon rrëfimin origjinal ashtu siç përfundoi në vitin 2021.

    Platforma flet për një ‘fazë të re’ të françizës, duke lënë të kuptohet se mund të kemi projekte të tjera ose kapituj të rinj që mbajnë të njëjtin ‘shpirt revolucionar’, por jo domosdoshmërisht të njëjtën strukturë si seriali i parë.

    Netflix publikoi një paralajmërim ku shfaqen pamje të njohura nga grabitjet ikonike në Royal Mint dhe Bankën e Spanjës, i shoqëruar me mesazhin “the revolution never ends” (“revolucioni nuk mbaron kurrë”).

    Edhe pse videoja nuk konfirmon qartë një sezon të ri, ajo mbyllet me një moment që ka bërë fansat të flasin shumë: një skenë ku sugjerohet se zbulohet/zbërthehet një shufër ari e fshehur.

    Ky detaj i vogël ka ndezur teori se historia mund të rikthehet në periudhën pas grabitjes së arit, duke hapur rrugë për një vazhdim apo një tjetër grabitje të madhe.

    A do të rikthehet Profesori dhe ekipi origjinal?

    Thuhet se nuk ka ende një listë zyrtare kasti për një sezon të mundshëm të gjashtë.

    Fansat, natyrisht, shpresojnë që nëse do të ketë vazhdim direkt, të rikthehet edhe Alvaro Morte në rolin e Profesorit, sepse ai është figura qendrore e gjithë rrëfimit.

    Megjithatë, paralajmërimi lë të kuptohet se ‘fryma e revolucionit’ mund të vazhdojë edhe nëse françiza ecën përpara me personazhe të rinj, duke ruajtur tensionin, rebelimin dhe dinamika të ndërlikuara marrëdhëniesh – elementë që e kanë bërë serialin aq të suksesshëm.

    Në kast përmenden edhe Michelle Jenner, Tristan Ulloa dhe Begona Vargas.

    Sipas përshkrimit, sezoni i dytë do të lidhet me grabitjen e quajtur “Lady with an Ermine” (Zonja me hermelinë), e cila paraqitet si një episod kyç që mund të shërbejë si urë drejt zhvillimeve të reja në universin “Money Heist”, duke shfaqur një anë më të rrezikshme dhe më hakmarrëse të botës së grabitjeve.

    Kur dhe ku shfaqet?

    Sipas informacionit të dhënë, “Berlin” Season 2 pritet të shfaqet globalisht më 15 maj 2026, dhe do të jetë i disponueshëm në Netflix, si pjesa tjetër e projekteve të kësaj.

    Detaje të tjera për ‘fazën e ardhshme’ të “Money Heist” pritet të bëhen më të qarta pas premierës së “Berlin”.