Komisioni Qendror i Kosovës, po vazhdon të përditësoj të dhënat sa i përket votave të kandidatëve për deputetë.
Në faqen e saj, KQZ, bën të ditur edhe se kush prej kandidatëve deri më tani, ka arritur të siguroj ulësen në Kuvend.
Lidhur me këtë, një garë e ‘ashpër’ është duke u zhvilluar mes tre kandidatëve nga PDK’ja për ulësen në parlament.
Hajdar Beqa, Rrustem Mustafa e Xhavit Haliti kanë dallim vetëm disa vota mes tyre.
Për të parë përditësimet e fundit, klikoni KËTU:
Gjykata Supreme, ka njoftuar se është refuzuar ankesa e LVV-së lidhur me përfshirjen e të miturve në aktivitete zgjedhore, të paraqitur kundër vendimit të Panelit Zgjedhor për Ankesa dhe Parashtresa.
Në njoftimin e gjykatës, thuhet se, PZAP kishte pranuar si të bazuara ankesat e Organizatës Joqeveritare Instituti Demokratik i Kosovës, të cilat kishin të bënin me pjesëmarrjen e fëmijëve në dy tubime zgjedhore të organizuara nga LVV më 3 qershor në Podujevë dhe Lipjan, dhe se, pas bashkimit të procedurave, PZAP kishte konstatuar se pjesëmarrja e të miturve në këto aktivitete përbënte shkelje të rregullores zgjedhore për Fushatën e Zgjedhjeve, Monitorimin e Fushatës së Zgjedhjeve dhe Deklarimin Financiar.
Komunikata:
Refuzohet ankesa e LVV-së lidhur me përfshirjen e të miturve në aktivitete zgjedhore
Prishtinë, 12 qershor 2026 – Kolegji i Gjykatës Supreme të Kosovës e ka refuzuar si të pabazuar ankesën e subjektit politik Lëvizja Vetëvendosje (LVV), të paraqitur kundër vendimit të Panelit Zgjedhor për Ankesa dhe Parashtresa, lidhur me shqiptimin e gjobës në shumën prej 6,000 euro, për shkelje të Kodit të Mirësjelljes për Subjektet Politike, gjatë fushatës zgjedhore për Zgjedhjet e Parakohshme, të mbajtura më 7 qershor 2026.
PZAP kishte pranuar si të bazuara ankesat e Organizatës Joqeveritare Instituti Demokratik i Kosovës (KDI), të cilat kishin të bënin me pjesëmarrjen e fëmijëve në dy tubime zgjedhore të organizuara nga LVV më 3 qershor 2026 në Podujevë dhe Lipjan. Pas bashkimit të procedurave, PZAP kishte konstatuar se pjesëmarrja e të miturve në këto aktivitete përbënte shkelje të nenit 5 paragrafi 3 të Rregullores Zgjedhore Nr. 07/2024 për Fushatën e Zgjedhjeve, Monitorimin e Fushatës së Zgjedhjeve dhe Deklarimin Financiar.
Në ankesën e paraqitur në Gjykatën Supreme, LVV pretendon se dispozita e lartcekur nuk ndalon çdo prani të të miturve në aktivitete politike, por vetëm angazhimin e tyre aktiv nga subjekti politik, dhe se në rastin konkret nuk ishte provuar një angazhim i tillë.
Pas shqyrtimit të pretendimeve ankimore, përgjigjeve në ankesë dhe provave të administruara në lëndë, Gjykata Supreme gjeti se ankesa është e pabazuar.
Gjykata vlerësoi se PZAP ka zbatuar drejt dispozitat relevante të Rregullores Zgjedhore Nr. 07/2024 dhe se qëllimi i nenit 5 paragrafi 3 është mbrojtja e të miturve nga përfshirja në aktivitete politike dhe zgjedhore. Sipas vlerësimit të Gjykatës Supreme, interpretimi i kësaj dispozite duhet të bëhet në përputhje me qëllimin e saj mbrojtës dhe me parimin e interesit më të mirë të fëmijës, të garantuar nga instrumentet vendore dhe ndërkombëtare për mbrojtjen e të drejtave të fëmijëve.
Gjykata Supreme ka vlerësuar se përgjegjësia e subjektit politik nuk përjashtohet nga fakti nëse të miturit kanë qenë të shoqëruar nga prindërit e tyre apo nëse iniciativa për pjesëmarrje ka ardhur nga vetë ata.
Gjykata Supreme gjithashtu vlerësoi se PZAP, gjatë caktimit të gjobës, ka marrë parasysh natyrën dhe peshën e shkeljes, ndikimin e mundshëm në procesin zgjedhor, si dhe faktin se subjekti politik ishte i njoftuar me obligimet ligjore dhe ishte sanksionuar edhe më parë për shkelje të ngjashme.
Për këto arsye, Gjykata Supreme ka lënë në fuqi vendimin e PZAP-it dhe ka refuzuar ankesën e subjektit politik Lëvizja Vetëvendosje si të pabazuar.
Ish-presidenti i Kosovës Hashim Thaçi ka shprehur ngushëllimet e tij për ndarjen nga jeta të ish-komandantit të Ushtrisë Çlirimtare të Kosovës, Sahit Jashari.
Lajmin e ka bërë të ditur djali i tij, Endrit Thaçi, përmes një postimi në “Instastory”, ku tregoi se ka zhvilluar një bisedë telefonike me të atin, i cili po mbahet në paraburgim në Hagë.
“Sapo përfundova një bisedë telefonike me babin. Ishte thellësisht i pikëlluar me ndarjen nga jeta të luftëtarit të orëve të para të UÇK-së, Sahit Jasharit. Nga Haga, ai më kërkoi t’ia përcjell ngushëllimet më të sinqerta familjes Jashari, bashkëluftëtarëve dhe miqve. Ata që iu përgjigjën të parët kushtrimit të lirisë nuk do të harrohen kurrë!”, shkruhet në postimin e tij.
Kryetari i Drenasit, Ramiz Lladrovci, ka reaguar lidhur me vdekjen e ish-komandantit të UÇK’së, Sahit Jashari.
Lladrvoci, në lidhje direkte me Kosova Live, ka thënë se Sahit Jashari, ka qenë trim dhe veprimtar i çmuar.
‘’E kam njoft në ’90 kur ne ishim në organizim ilegal, bashkë me Adem Jasharin, Hashimin, Kadrinë, Saminë, me Ilazin, Fadili, Zenuni e shumë bashkëveprimtar. Unë e kujtoj si një djalë të jashtëzakonshëm, trim veprimtar shumë të çmuar. Sahiti ka hjek shumë se ka qenë edhe i plagosun në vitet e para të luftës, më vjen keq që nuk këna mujt shumë me i ndihmu as shoqëria as na’’, ka deklaruar ai mes tjerash.
Pakti i BE-së për Eigracionin dhe Azilin hyri në fuqi të premten, pasi u miratua në maj 2024.
Pakti rishikon kuadrin e bllokut për emigracionin dhe azilin formëson qasjen e tij të re ndaj emigracionit, sipas një deklarate nga Komisioni Evropian.
“Për herë të parë, BE-ja ka një kuadër gjithëpërfshirës për emigracionin dhe azilin, me mbrojtje të fortë të kufijve të jashtëm, rregulla të drejta dhe të forta për azilin, si dhe një ekuilibër midis solidaritetit dhe përgjegjësisë”, thuhet në deklaratë.
Që nga kjo e premte, shtetet anëtare do të jenë në gjendje t’i zbatojnë plotësisht rregullat në praktikë.
Pakti, sipas deklaratës, synon të forcojë kufijtë e jashtëm përmes regjistrimit të detyrueshëm dhe kontrolleve të hollësishme të sigurisë për emigrantët e parregullt që kalojnë kufijtë e BE-së.
Gjithashtu, synon të futë procedura të shpejta kufitare në zonat kufitare për njerëzit që konsiderohen të pamundur të kenë nevojë për mbrojtje, që konsiderohen rrezik sigurie ose që zbulohen se kanë mashtruar autoritetet, së bashku me kthime të shpejta pa autorizim për të hyrë në territorin e BE-së.
Pakti prezanton afate më të shkurtra për procedurat e azilit, së bashku me rregulla më të rrepta për aplikimet abuzive dhe ato pasuese.
Gjithashtu, vendos atë që deklarata e quajti një “ekuilibër i drejtë midis solidaritetit dhe përgjegjësisë, me një mekanizëm të përhershëm të detyrueshëm solidariteti dhe një mundësi që Shtetet Anëtare të kontribuojnë në solidaritet në një mënyrë fleksibile”.
Ai tha se pakti gjithashtu forcon mbrojtjet për të mbrojtur të drejtat themelore, duke përfshirë monitorimin e pavarur gjatë shqyrtimit dhe procedurave të azilit kufitar.
“Shtetet Anëtare do të vazhdojnë të përshtatin dhe përsosin procedurat e reja në muajt në vijim, me mbështetje të vazhdueshme nga Komisioni dhe Agjencitë e BE-së”, shtoi deklarata.
Dita e Çlirimit të Kosovës, e cila shënohet çdo 12 qershor dhe përkon me hyrjen e forcave të NATO-s në vend, është përkujtuar dhe uruar nga institucione dhe përfaqësi të ndryshme ndërkombëtare.
Në këtë kuadër, Ambasada e Italisë në Prishtinë ka theksuar kontributin e vendit të saj në misionin paqeruajtës të KFOR-it, duke nënvizuar se kontingjenti italian mbetet më i madhi në kuadër të këtij misioni.
Në një postim në rrjetet sociale, ambasada ka rikujtuar 12 qershorin 1999 si një datë historike që shënon 27 vjet paqe dhe përkushtim për sigurinë dhe stabilitetin në Kosovë dhe rajon.
Italia vazhdon të jetë një nga vendet kyçe kontribuuese në kuadër të KFOR-it, misionit të udhëhequr nga NATO në Kosovë.
Një pikturë e artistit të njohur Mark Rothko ka vendosur rekord të ri në ankand, pasi u shit për 98.4 milionë dollarë në shtëpinë prestigjioze të ankandeve Christie’s në Nju Jork.
Vepra “No. 15 (Two Greens and Red Stripe)”, e realizuar në vitin 1964, arriti çmimin prej 85 milionë dollarësh pa tarifat shtesë, ndërsa me komisionet përfundimtare shifra totale shkoi në 98.4 milionë dollarë, duke thyer rekordin e mëparshëm të artistit.
Piktura, e cila kishte një vlerësim paraprak prej rreth 80 milionë dollarësh, ngjalli interes të madh mes koleksionistëve dhe u shit pas rreth një duzine ofertash nga blerës të ndryshëm.
Vepra kishte qenë në pronësi të koleksionistes dhe filantropes së njohur Agnes Gund, ish-presidente e nderit e Museum of Modern Art. Ajo e kishte blerë pikturën drejtpërdrejt nga Rothko në vitin 1967, vetëm tre vjet para vdekjes së artistit në vitin 1970, dhe e kishte mbajtur për dekada në shtëpinë e saj.
“No. 15 (Two Greens and Red Stripe)” është një abstraksion monumental mbi shtatë metra i lartë, i karakterizuar nga nuanca të thella jeshile dhe indigo, të ndërprera nga një vijë e kuqe-portokalli në pjesën e poshtme të kompozimit.
Rekordi i mëparshëm i Rothkos ishte vendosur në vitin 2012, kur piktura Orange, Red, Yellow u shit për 86.9 milionë dollarë, po në Christie’s.
Vetëm pak ditë më parë, një tjetër vepër e Rothkos, Browns and Blacks in Reds, u shit në Sotheby’s për 85.8 milionë dollarë, duke iu afruar rekordit të artistit.
Shitja e fundit konfirmon edhe një herë statusin e Mark Rothkos si një prej emrave më të kërkuar dhe më të vlerësuar në tregun ndërkombëtar të artit.
Kryeministri i Shqipërisë, Edi Rama ka uruar Kosovën në 27 vjetorin e çlirimit.
Sot kur në Kosovë shënohet “Dita e Çlirimit”, Edi Rama ka publikuar një numër të madh të forografive që shfaqin momente të ndjeshme nga kjo ditë, 27 vite më parë.
Rama shkroi: Gëzuar 27 vjetorin – Ditën e Çlirimit
Komisioni Qendror Zgjedhor po vazhdon me publikimin e të dhënave në kuadër të mbledhjes së votave nëpër përfaqësi diplomatike.
Sipas përditësimeve të fundit të Komisionit Qendror të Zgjedhjeve (KQZ), deri më tani janë numëruar 13 nga 47 vendvotime, që përbëjnë 27.66% të totalit të votave të hedhura në përfaqësitë diplomatike.
Ndërsa në Ambasadën e Kosovës në Ankara tashmë ka përfunduar numërimi
Kësisoj është bërë e ditur se tanimë ka përfunduar numërimi në Ambasadën e Republikës së Kosovës në Ankara.
Sipas rezultateve, Kosova Demokratik Turk ka siguruar 36 vota apo 72%. Lëvizja Vetëvendosje ka siguruar 22.00% apo 11 Vota, LDK-ja ka siguruar 4% apo 2 vota dhe IRDK ka siguruar 1 votë.
Zëvendëskomandanti i misionit të NATO-s në Kosovë (KFOR), brigadieri gjeneral Federico Collina, ka marrë pjesë në një aksion për dhurim gjaku të mbajtur në Prishtinë me rastin e Ditës Botërore të Dhuruesve të Gjakut.
Aktiviteti është organizuar nga Qendra e Kosovës për Transfuzion të Gjakut, me mbështetjen e Njësisë së Përbashkët Mjekësore të KFOR-it (JMED) dhe Ekipit të Ndërlidhjes dhe Monitorimit (LMT K8).
Sipas KFOR-it, iniciativa të tilla janë pjesë e angazhimit të vazhdueshëm të misionit për bashkëpunim me institucionet lokale dhe për promovimin e shëndetit dhe mirëqenies së qytetarëve në Kosovë.
Ky aktivitet u vlerësua si një shembull i bashkëpunimit ndërmjet KFOR-it dhe institucioneve shëndetësore në vend.