Author: K.B.

Trajtim shumë më serioz për vajzat që merren me sport, po premton kandidati për kryetar të Prishtinës nga Vetëvendosje, Hajrulla Ceku. Pasi zhvilloi takim me vajzat e FC 2 Korrikut, klub që numëron mbi 150 lojtare dhe është kampion i Kosovës në ligat U15 dhe U17, Ceku tha se Komuna e Prishtinës me të në krye do t’i ndihmojë në avancimin e tyre.

Për zejtarinë do të ketë më shumë fokus, nëse Ardian Gola bëhet kryetar i Gjakovës. Të premten ai takoi një nga argjendarët e kësaj komune, ku edhe tha se bizneset e tilla, dhe shumë të tjera si ky, do të jenë synim i përkrahjes nga qeverisja që ai do ta bëjë.

Në ndihmë bizneseve që krijojnë vende të reja pune dhe produkte vendore premton se do t’iu dalë nëse bëhet kryetar i Prizrenit, kandidati Artan Abrashi.

E Qemajl Aliu që po kërkon një mandat tjetër për Shtimen ka zhvilluar takime me qytarë në disa fshatra, ku mes tjerash tha se do ta vazhdojë punën për secilin pa dallim.

Ditën e shtatë të fushatës zgjedhore, pretendenti për mandatin e dytë në Gjilan, Alban Hyseni e nisi në Qendrën e Transfuzionit të Gjakut.

Më pas takoi përfitues të granteve, për çka premtoi mbështetje edhe në vitet e ardhshme.

Ndërkaq përkujdesje institucionale dhe investim për Bibliotekën e Kaçanikut, ka premtuar kandidati Jeton Raka.

Më afër qytetarëve dhe zë I tyre premton se do të jetë, nëse veç arrin të bëhet kryetar i Fushë-Kosovës, kandidati nga Vetëvendosje Valon Prebreza.

Ndërsa mbështetje për bizneset e vogla ka premtuar kandidati për Lipjanin, Ilir Qeriqi.

Ardian Gjini nga Aleanca për Ardhmërinë e Kosovës i cili kërkon edhe një mandat për të udhëhequr Gjakovën, në ditën e shtatë të fushatës mori pjesë në Garën ë Vrapimit të Gjeneratës sic e quajti ai të Pavarësisë.

Ai tha se ky aktivitet gjallëron qytetin dhe dëshmon shpresën, energjinë dhe guximin e të rinjve për të ardhmen.

Gjatë ditës, Gjini u takua edhe me Tankut Soykan, Zëvendës Shef i Zyrës së Këshillit të Evropës në Prishtinë, dhe Sakibe Jashari, Zyrtare e Lartë e projektit “Forcimi i qeverisjes shumë nivelëshe dhe demokracisë pjesëmarrëse.”

Aktiv gjatë ditës ishte edhe kryetari aktual i Suharekës, Bali Muharremaj. Gjatë parakalimit në Festivalin “Festari”, ai parakalimin e vlerësoi udhëtim krenarie, gëzimi dhe bashkimi për Suharekën. Mes tjerash, Muharremaj kërkoi besimin edhe për një mandat tjetër.

Kandidati për Vushtrrinë nga kjo parti, Mensut Ademi thotë se në qeverisjen e tij fokusi do të jetë – përmirësimi i infrastrukturës dhe shërbimet publike.

E, Nazim Gagica i cili synon postin e kryetarit të Gjilanit gjatë së premtes prezantoi kandidatin për asamble komunale, Muharrem Sadikun.

Takim me qytetarët e Lipjanit nga ora 19:00 mbajti kandidati për kryetar, Qazim Nimani. Gjatë takimit u prezantuan edhe kandidatët për Asamblenë Komunale.
Aktivitetet e Aleances për Ardhmërinë e Kosovës vazhduan edhe në mbrëmje.

Lidhja Demokratike e Kosovës po vazhdon fushatën elektorale me intensitet të lartë me kandidatët e saj në disa komuna të vendit që kanë paraqitur projektet, premtimet dhe vizionin për katërvjeçarin e ardhshëm.

Në Prishtinë, kandidati për mandat të dytë, Përparim Rama, rikujtoi transformimin në lagjen Dardania dhe tunelin nën Kurriz, të cilin e cilësoi simbol të ndryshimit urban.

Në Fushë Kosovë, Besnik Osmani theksoi rëndësinë e investimeve në shëndetësi përmes karvanit informues “Përshëndetje”.

Në Viti, Sokol Haliti, që po kërkon një mandat të ri, prezantoi investimet në infrastrukturë dhe siguri rrugore, duke i cilësuar si dëshmi të vizionit për një qytet më të sigurt dhe të zhvilluar.

Në Ferizaj, Visar Azemi zhvilloi takime me qytetarë dhe vuri në pah nevojën për një model të ri qeverisës që i adreson sfidat reale të qytetit.

Në Lipjan, Imri Ahmeti, që kërkon një mandat të ri, prezantoi projektin e rrugës “Pjetër Bogdani”, që pritet të lehtësojë qarkullimin dhe të lidhë qytetin me rrugë strategjike.

Në Obiliq, Xhafer Gashi mori pjesë në fushatën “Dita Botërore e Pastrimit” ku bëri thirrje për kujdes ndaj ambientit.

Në Pejë, Gazmend Muhaxhiri kujtoi investimin prej gati 20 milionë eurosh në sistemin modern të trajtimit të ujërave të zeza që garanton standarde evropiane në mbrojtjen e mjedisit dhe shëndetit publik.

Në Gjilan, Arbër Ismajli kritikoi qeverisjen aktuale lokale si “pushtet i intrigës” dhe u zotua për mbështetje të bizneseve dhe të rinjve, në kuadër të konceptit “Gjilani i Ri”.

Në ditën e shtatë, LDK-ja në Junik prezantoi listën e kandidatëve për Asamble, në krye me Ruzhdi Shehu.

Kandidatët e PDK-së nëpër komunat e vendit po vazhdojnë fushatën zgjedhore me premtime konkrete, duke vënë në qendër investimet në infrastrukturë, zhvillimin ekonomik dhe mirëqenien qytetare.

Kandidati për kryetar të Prishtinës, Uran Ismajli, ka prezantuar projektin për lagjen “Bregu i Diellit”, duke theksuar nevojën për jetë urbane dinamike dhe moderne.

Në Mitrovicë, Arian Tahiri premton tregun e ri të qytetit dhe iniciativën “Made in Mitrovica”, që synon të mbështesë bizneset dhe prodhuesit lokalë.

Në Istog, Ali Nimanaj e cilësoi “Banjën e Pejës” si pasuri të Istogut dhe u zotua për përkrahje për bizneset që sjellin zhvillim lokal.

Shukri Buja në Lipjan prezantoi një program të plotë për bujqësi moderne, me subvencione, rrugë rurale, trajnime dhe grante për të rinjtë, për të kthyer bujqësinë në një sektor të qëndrueshëm e konkurrues.

Në Pejë, Arta Nallabani premton mbështetje për fabrikat vendore, krijimin e vendeve të reja të punës për të rinjtë për një ekonomi më të fortë.

Në Podujevë, Isak Shabani kritikoi pushtetin lokal për mungesën e ndriçimit në lagjet e Podujevës duke kërkuar ndriçim të qëndrueshëm gjatë gjithë vitit, jo vetëm për fushata.

Ndërsa në Vushtrri, Ferit Idrizi është zotuar për mbështetje më të madhe për tregun dhe për tregtarët, duke kërkuar një mandat të ri me synimin për zhvillim më të mirë lokal.

Në Viti, kandidati Bekim Azizi u zotua për arsim cilësor, digjitalizim të shërbimeve komunale, bujqësi moderne dhe zhvillim ekonomik lokal me fokus te rinia dhe gratë si forcë ndryshimi.

Nga 13 shtatori ka nisur zyrtarisht fushata zgjedhore për zgjedhjet lokale dhe kandidatët e Nismës Socialdemokrate tashmë kanë filluar prezantimin e prioriteteve dhe programeve të tyre në komunat ku garojnë për postin e kryetarit.

Në Malishevë, kryetari aktual Ekrem Kastrati, i cili garon për një mandat të dytë ka ndarë foto nga takimet në Panorc dhe Rud, ku tha se përkrahja për Nismën dhe numrin 186 po rritet dita-ditës.

Ndërkohë në Vushtrri, kandidatja e Nismës, Xhevahire Izmaku, ka vizituar objektin e Handikos-it, ku u njoh nga afër me kushtet e rënda në të cilat marrin shërbime personat me nevoja të veçanta. Izmaku u zotua se kushdo që do të udhëheqë komunën duhet ta ketë si prioritet përmirësimin e kushteve në këtë objekt.

Në Prizren, kandidatja për kryetare, Albulena Balaj Halimaj, ka prezantuar një nga pikat kyçe të programit të saj – “Pakoja Punë & Praktikë”. Ajo premton krijimin e programeve për punësim dhe praktika profesionale, duke u dhënë përparësi të rinjve dhe grave të komunës.

Në ditën e shtatë të fushatës zgjedhore për zgjedhjet lokale të 12 tetorit, Partia Socialdemokrate (PSD) po paraqet propozime konkrete për qeverisje lokale përmes kandidateve të saj.

Në Prishtinë, kandidatja e PSD-së, Besa Shahini, tha se në takimet me qytetarë po has mirëkuptim dhe mbështetje për idetë që po prezanton, por edhe hezitim për të votuar ndryshe.

Në Deçan, kandidatja e PSD-së, Natyra Kuçi, ka vënë theksin në zgjidhjen e problemit të mungesës së ujit të pijshëm.

Kurse kandidati për kryetar të Kamenicës nga radhët e PSD-së, Qëndron Kastrati, theksoi rëndësinë e fuqizimit të grave në shoqëri dhe ekonomi. Ai tha se mbështetja për to nuk duhet të shihet si ndihmë, por si vlerësim dhe partneritet i barabartë për zhvillim të përbashkët.

Partia Socialdemokrate ka vazhduar fushatën zgjedhore në ditën e gjashtë, me aktivitete simbolike dhe zotime konkrete nga kandidatët e saj për kryetarë komunash.

Në Prishtinë, kandidatja e PSD-së, Besa Shahini, ka zhvilluar një aktivitet elektoral që sipas saj kushtoi sa paga mesatare e një qytetari në kryeqytet, 650 euro. Shahini tha se kjo shifër përfaqëson realitetin ekonomik të shumë qytetarëve të Prishtinës.

Teksa në Deçan, kandidatja e PSD-së, Natyra Kuçi, ka premtuar zgjidhje për një nga problemet më të mëdha të banorëve, mungesën e rrjetit të kanalizimit. Nga fshati Isniq, Kuçi tha se çdo lagje dhe lokalitet do të përfshihet në projektet e reja infrastrukturore.

Në Kamenicë, kandidati i PSD-së, Qëndron Kastrati, ka shpërndarë një video në të cilën shpreh falënderim që është i rrethuar nga njerëz me pasion për zhvillimin e Kamenicës.

Në kuadër të zgjedhjeve lokale të 12 tetorit në Kosovë, edhe kandidatët e Partisë Demokratike të Kosovës po prezantojnë programet e tyre përmes vizitave në terren dhe takimeve me qytetarë.

Në Prishtinë, kandidati i PDK-së, Uran Ismajli, përmes një video-incizim ka prezantuar projektet kryesore për Hajvalinë: Ndërtimin e një çerdheje të re, rindërtimin e Qendrës Kulturore dhe përmirësimin e Unazës me trotuare të sigurta, gjelbërim dhe park.

Në Kaçanik, Sabedin Vishi ka kërkuar besimin e qytetarëve duke u zotuar për një udhëheqje që është pranë njerëzve çdo ditë. Ai përmes sloganit #Mamirë#PërKaçanikun premton përkushtim dhe qeverisje të afërt me qytetarët.

Arian Tahiri, kandidati për kryetar të Mitrovicës, ka zhvilluar takime me biznese lokale duke theksuar rëndësinë e bashkëpunimit mes komunës dhe sektorit privat. Ai ka përmendur zhvillimin profesional të të rinjve dhe mbështetjen për bujqësinë si prioritete të programit të tij.

Në Lipjan, Shukri Buja ka identifikuar problemet në transportin publik përmes një udhëtimi simbolik me autobus, ku ka premtuar ndërtimin e një stacioni të ri, lidhje të rregullta me fshatrat dhe transport falas për nxënësit.

Në Prizren, Shaqir Totaj ka theksuar potencialin turistik dhe historik të qytetit përmes një vizite me gazetarin shqiptar Blendi Fevziu. Ai ka theksuar rëndësinë e promovimit të vlerave kulturore për zhvillimin ekonomik dhe identitetin kombëtar.

Në Vushtrri, Ferit Idrizi ka vizituar objektin e ri të Kryqit të Kuq nga ku ka theksuar rëndësinë e përkrahjes për institucionet humanitare dhe ka premtuar përkushtim të vazhdueshëm për ofrimin e kushteve më të mira për qytetarët.

Në ditën e gjashtë të fushatës zgjedhore, lideri i NISMA Socialdemokrates, Fatmir Limaj zgjodhi Vushtrrinë, që të kërkojë votë për kandidaten për këtë komunë, Xhevahire Izmaku.

Në takim me qytetarët Limaj thotë se një grua në krye të Komunës është zgjidhje e duhur për Vushtrrinë.

Mbështetje për gratë që janë kryefamiljare premtoi, Xhevahire Izmaku, duke kritikuar në anën tjetër pushtetin aktual se nuk ka ofruar mbështetje deri më tani për këto gra.

Aktive gjatë të enjtes ishte edhe kandidatja tjetër grua nga kjo parti, Albulena Balaj Halimaj. Ajo premtoi transport të përballueshëm për nxënësit në Prizren, ndërkaq udhëtim falas për personat që i takojnë rasteve sociale.

Bashkëbisedime me qytetarë, takime me gra dhe vizita tek klubet e sportit ose në biznese të ndryshme, bënë në ditën e gjashtë kandidatët për kryetarë e aktivistë të Vetëvendosjes. Të shpërndarë në shumë komuna, ata po shpalosin pikat e programit të tyre dhe po zotohen se premtimet do t’i realizojnë.

Kandidati për kryetar të Prishtinës, Harjulla Ceku thotë se disa lagje janë degraduar. I njëjti po premton kthimin e identitetit të tyre historik.

Shpejtim Bulliqi i cili synon të jetë në krye të Podujevës edhe për katër vjet gjatë të enjtes derisa premtoi se do të vazhdojnë ta transferojnë Podujevën, ndau në Facebook edhe rinovimin e ish-hotelit “Llapi” që tash është shndërruar në një galeri.

Se punën për transformim do ta vazhdojë, premtoi edhe kryetari aktual që po kërkon votën edhe për një mandat për Kamenicën, Kadri Rahimaj. Si njoftoi se tashmë rrugët në fshatin Feriqevë kanë përfunduar.

E kandidati për Ferizaj, Enver Haliti thotë se qëllimi është i qartë – një Ferizaj ndryshe.

Planet për arsim nën qeverisjen e tij, të enjten i shpalosi kandidati për Lipjanin, Ilir Qeriqi.

Takime me qytetarë ka zhvilluar edhe kandidati për kryetar të Obiliqit, Halil Thaci, i cili thotë se do të jetë “zgjidhja” për nevojat e banorëve të kësaj komune.

Ndërkaq, Uji i pijes, trotuari e kanalizimi thotë se nuk do të jenë më problem i Fushticës, nëse veç besimin për kryetare e merr Egzona Tërdevci.