ATV

Author: K.B.

  • Fushata për raundin e dytë, KDTP dhe Halk Hareketi garojnë për drejtimin e Mamushës

    Fushata për raundin e dytë, KDTP dhe Halk Hareketi garojnë për drejtimin e Mamushës

    Fushata zgjedhore për raundin e dytë të zgjedhjeve për kryetar të Komunës së Mamushës ka hyrë në ditën e saj të dytë, me dy kandidatët që garojnë në balotazh, Abdulhadi Krasniq nga Partia Demokratike Turke e Kosovës (KDTP) dhe Fikret Morina nga Mamusha Halk Hareketi, të cilët kanë shpalosur zotimet e tyre kryesore për qytetarët e Mamushës.

    Kandidati i KDTP-së, Abdulhadi Krasniq, theksoi besimin që qytetarët kanë treguar ndaj partisë së tij në zgjedhjet e 12 tetorit, ku KDTP siguroi shumicën në Këshillin Komunal me 8 nga 15 ulëset. Ai falënderoi qytetarët për mbështetjen dhe njoftoi se prioritet kryesor në mandatin e ardhshëm do të jetë përmirësimi i arsimit.

    Sipas Krasniqit, projekti i aneksit të ri të Shkollës Anadolliane do të nisë vitin e ardhshëm, me një buxhet tashmë të ndarë nga komuna. Aneksi do të përfshijë klasa moderne, një mensë, zona rekreative dhe hapësira për aktivitete sociale dhe kulturore.

    “Me këtë projekt, nxënësit tanë do të kenë arsimim me orar të plotë nga mëngjesi deri në orën 16:00. Arsimi është themeli i së ardhmes sonë, dhe me mbështetjen tuaj më 9 nëntor, do ta bëjmë realitet ëndrrën e një arsimi bashkëkohor në Mamushë,” deklaroi Krasniq, duke i bërë thirrje qytetarëve që ta përkrahin në raundin e dytë.

    Krasniqi shtoi se me një këshill të fortë të KDTP-së, bashkëpunimi mes pushtetit legjislativ dhe atij ekzekutiv do të mundësojë një qeverisje shembullore, të përkushtuar për zhvillimin e Mamushës.

    Nga ana tjetër, kandidati i Mamusha Halk Hareketi, Fikret Morina, i cili në zgjedhjet e 12 tetorit fitoi pesë ulëse në Këshillin Komunal, u shpreh se partia e tij është gati të sjellë një vizion të ri dhe një administratë të re për komunën.

    Në qendër të platformës së tij, Morina vendosi përmirësimin e kujdesit shëndetësor dhe forcimin e lidhjeve me institucionet e Republikës së Turqisë. Ai premtoi se, nëse zgjidhet kryetar, do të punojë për të mundësuar që qytetarët me prejardhje turke që jetojnë në Kosovë të përfitojnë nga shërbimet shëndetësore në Turqi, përmes njohjes së të drejtës për Karta Blu.

    “Kjo nuk është vetëm një kërkesë për lehtësi, por një çështje e drejtësisë dhe e vëllazërisë që na lidh me atdheun tonë. Do të punojmë me vendosmëri që kjo e drejtë të realizohet,” deklaroi Morina.

  • LDK nis fushatën për raundin e dytë të zgjedhjeve lokale

    LDK nis fushatën për raundin e dytë të zgjedhjeve lokale

    Sot ka nisur zyrtarisht fushata zgjedhore për raundin e dytë të zgjedhjeve për kryetarë komunash në Kosovë, e cila do të zgjasë gjashtë ditë.

    Kryetari aktual i Prishtinës dhe kandidati për një mandat të dytë nga radhët e Lidhjes Demokratike të Kosovës Përparim Rama, ka ndarë një video-incizim nga lagjja Dardania, ku premtoi vazhdimin e punës për ndriçimin publik e ndërtimin e parkingut nëntokësor.

    Rama po ashtu rikujtoi punët e realizuara pranë Termokosit, ku sheshi i ri dhe hapësirat përreth ndërtesave me fasada të rinovuara kanë transformuar zonën.

    Në Gjilan, kandidati i LDK-së, Arbër Ismajli, i cili garon në koalicion me Partinë Demokratike të Kosovës (PDK) takoi banorët e Malishevës së heroit Abdullah Tahiri, nga aty u tha se qytetarët po bashkohen për “ndryshimin përfundimtar të një qeverisjeje që ka dështuar në zhvillimin e Gjilanit”.

    Kurse në Fushë Kosovë, kandidati Besnik Osmani ka premtuar rinovimin e banesave në Bresje, duke e cilësuar këtë si një zotim të palëkundur ndaj banorëve të asaj zone.

    Kryetari aktual i Obiliqit, Xhafer Gashi që kërkon edhe një mandat të ri kërkoi besimin e qytetarëve për të vazhduar projektet zhvillimore me mesazhin: “Premtimet e dhëna i kemi dëshmuar me punë e vepra.

    Gazmend Muhaxheri, kryetari në detyrë i Pejës, ditën e parë të fushatës për raundin e dytë të zgjedhjeve ka ndarë pamje nga transformimi i qytetit me moton “#PejaDje & #PejaSot.

    Sokol Haliti, kryetari aktual i komunës së Vitisë dhe kandidat për një mandat të ri, ka zhvilluar takim me Forumin e Gruas të LDK-së teksa ka lavdëruar angazhimin e grave në politikë.

    Në Junik, kryetari aktual dhe kandidat për mandat të ri, Ruzhdi Shehu u zotua për qeverisje të ndershme dhe kritikuar “kontratat e keqmenaxhuara” të ish-qeverisjes, duke thënë se “ka kaluar koha e jackpotëve”.

  • Balotazhi i 9 nëntorit, kandidatët e VV-së dalim në terren

    Balotazhi i 9 nëntorit, kandidatët e VV-së dalim në terren

    Lëvizja Vetëvendosje ka hapur sot zyrtarisht fushatën për raundin e dytë të zgjedhjeve lokale, që do të kulmojë më 9 nëntor.

    Në Prishtinë, kandidati Hajrulla Çeku u takua me banorët e Mramorit për të diskutuar problemet bazike dhe potencialin turistik të zonës, duke promovuar projektin “10 fshatrat” për zhvillim rural dhe agroturizëm.

    Në Gjakovë, kandidati Ardian Gola tha se kjo javë është vendimtare për qytetarët që kërkojnë ndryshim teksa prezantoi vizionin e tij për Gjakovën e së nesërmës.

    Në Gjilan, kryetari aktual dhe kandidati për mandat të dytë, Alban Hyseni premtoi ndërtimin e një strehimoreje të re për të mbijetuarat e dhunës në familje, subvencionim të pagave për gratë që kërkojnë punë, si dhe bursa studimore për vajzat dhe gratë studente.

    Në Kaçanik, kandidati Jeton Raka falënderoi qytetarët për mbështetjen në raundin e parë dhe ftoi për mobilizim të plotë në balotazh.

    Në Mitrovicë, kandidati Faton Peci ndau një video-mesazh nga ku premtoi takim e komunikim të drejtpërdrejtë me banorët në çdo lagje dhe fshat për të rikonfirmuar fitoren më 9 nëntor.

    Kandidati, Halil Thaçi mbajti një tubim në Obiliq ku mori pjesë lideri i partisë Albin Kurti. Thaçi u zotua për punë të ndershme dhe prioritet në arsimin, shëndetësinë, infrastrukturën dhe bujqësinë.

    Në Prizren, kandidati Artan Abrashi nisi fushatën me një takim në Shatërvan së bashku me partnerët e tij politikë: Zafir Berisha (BD), Besnik Krasniqi (AAK), Emilija Redžepi (NDS) dhe Haxhi Avdyli (Guxo). “Bashkë me partnerët për ndryshimin dhe fitoren e madhe të Prizrenit më 9 nëntor! Fitorja është e pashmangshme”, shkroi Abrashi.

    Në Vushtrri, kandidati Sylejman Meholli krahë me Albin Kurtin premtuan zhvillim ekonomik, mbështetje për bizneset e vogla dhe investime në Zonën Ekonomike të Lumadhit. Meholli gjithashtu ftoi qytetarët për mobilizim të plotë në balotazh më 9 nëntor.

  • Kandidatët e PDK-së nisin fushatën gjashtëditore për raundin e dytë të zgjedhjeve lokale

    Kandidatët e PDK-së nisin fushatën gjashtëditore për raundin e dytë të zgjedhjeve lokale

    Në ditën e parë të fushatës gjashtëditore për raundin e dytë të zgjedhjeve lokale për kryetarë komunash, kryetari aktual i Prizrenit dhe kandidati për një mandat të dytë, Shaqir Totaj, ka nisur fushatën me publikimin e një video-mesazhi, duke theksuar vazhdimësinë e projekteve zhvillimore dhe përkushtimin për ndërtimin e një Prizreni modern.

    Kryetari aktual i Kaçanikut, kandidati për një mandat të dytë, Sabedin Vishi, premtoi vazhdimin e punëve të filluara, përmirësimin e shërbimeve publike dhe zhvillimin e mëtejshëm të komunës. Ai ka ftuar qytetarët që më 9 nëntor të mbështesin një qeverisje me përkushtim dhe transparencë.

    Në Mitrovicë, kandidati i PDK-së Arian Tahiri ka hyrë në raundin e dytë me mbështetjen e Lidhjes Demokratike të Kosovës (LDK). Ai ka mbajtur një tubim me qytetarët ku është konfirmuar bashkëpunimi ndërmjet dy subjekteve politike për të siguruar një qeverisje të përbashkët në interes të qytetit.

    Kryetari aktual i Vushtrrisë dhe kandidati për një mandat të dytë, Ferit Idrizi, ka vizituar disa biznese lokale gjatë ditës së parë të fushatës, duke vlerësuar kontributin e tyre në zhvillimin ekonomik të komunës dhe krijimin e vendeve të reja të punës.

    Në Klinë, kandidati i PDK-së Sokol Bashota ka filluar fushatën për balotazhin me falënderime për qytetarët dhe me thirrje për pjesëmarrje të gjerë në zgjedhjet e 9 nëntorit, duke theksuar rëndësinë e një qeverisjeje të ndershme dhe të përkushtuar ndaj qytetarëve.

  • Spasiç tërhiqet nga gara në Kllokot, KQZ: Gara për mryetar vazhdon sipas planit

    Spasiç tërhiqet nga gara në Kllokot, KQZ: Gara për mryetar vazhdon sipas planit

    Kandidati për kryetar të Komunës së Kllokotit, Sreçko Spasiç nga Nisma Qytetare “Uniteti Kombëtar Serb”, ka njoftuar më 3 nëntor se i është bashkuar Listës Serbe dhe nuk do të marrë pjesë në raundin e dytë të zgjedhjeve për kryetar të komunës, i planifikuar të mbahet më 9 nëntor.

    Në një deklaratë, Spasiç tha se të gjithë energjitë dhe burimet e nismës qytetare do t’i përkushtojë fitores së Listës Serbe, të cilën e cilësoi “familja politike që bashkon popullin serb në Kosovë”.

    “Njëkohësisht, unë, Sreqko Spasiq, dëshiroj të njoftoj opinionin publik dhe të gjithë qytetarët e komunës së Kllokotit se tërhiqem nga gara zgjedhore dhe nuk do të marr pjesë në rundin e dytë të zgjedhjeve për kryetar të komunës së Kllokotit që do të mbahet më 9 nëntor. Me gjithë forcën dhe energjinë time, së bashku me anëtarët e deritanishëm të ‘Unitetit Kombëtar Serb’, e tashmë anëtarë të Listës Serbe, do të përkushtohemi për fitoren e Listës Serbe”, u tha në njoftim.

    Lista Serbe ka mirëpritur vendimin e tij, duke e quajtur atë “dëshmi të pjekurisë dhe përgjegjësisë politike”.

    Ndërkohë, Valmir Elezi nga Komisionin Qendror i Zgjedhjeve (KQZ) ka bërë të ditur se tërheqja e Spasiçit nuk ndikon në zhvillimin e raundit të dytë.

    “Sipas procedurave dhe afateve të vendosura nga KQZ, afati i fundit për tërheqjen e kandidatëve nga gara zgjedhore ishte data 2 shtator 2025. Rrethi i dytë i zgjedhjeve për kryetar të komunës së Kllokotit vazhdon me emrat e dy kadidatëve që kanë fituar më së shumti vota në rundin e parë”, tha Elezi.

    Sipas rezultateve preliminare nga raundi i parë në Kllokot, Bozhidar Dejanoviq i Listës Serbe fitoi 893 vota ose 41.38 për qind, ndërsa Sreçko Spasiç mori 674 vota ose 31.23 për qind.

    Kllokoti është e vetmja komunë me shumicë serbe ku zhvillohet balotazhi, pasi në nëntë komunat e tjera Lista Serbe fitoi qysh në raundin e parë të zgjedhjeve më 12 tetor.

  • AAK nis fushatën e balotazhit për kryetarët e komunave

    AAK nis fushatën e balotazhit për kryetarët e komunave

    Në ditën e pare të fushatës gjashtëditore për raundin e dytë të zgjdhjeve lokale për kryetarë komunash, kryetari aktual i Gjakovës dhe kandidati i AAK-së për një mandat të ri, Ardian Gjini, ka hapur zyrtarisht fushatën e balotazhit duke falënderuar qytetarët për mbështetjen e deritanishme teksa ka premtuar vazhdimin e projekteve zhvillimore duke bërë thirrje për mobilizim dhe pjesëmarrje aktive gjatë ditëve të fushatës.

    Në Suharekë, kryetari aktual Bali Muharremaj ka nisur fushatën duke theksuar përkushtimin për përmirësimin e infrastrukturës lokale teksa ka njoftuar për asfaltimin e rrugëve në Vraniq dhe segmentin Shirokë–Topliqan.

    Kryetari i Rahovecit dhe kandidati I AAK-së për mandat të ri, Smajl Latifi, falenderoi qytetarët për mbështetjen e tyre dhe bëri thirrje për pjesëmarrje active gjatë fushatës gjashtëditore për balotazh.

    Në Junik, kandidati i AAK-së Agron Kuci, që garon në këtë balotazh me mbështetje nga Lëvizja Vetëvendosje premton punë të ndershme teksa kërkoi vote me 9 nëntor.

  • Kurti për ndarjen nga jeta të Fatos Nanos: U kujtoftë për rolin e tij historik

    Kurti për ndarjen nga jeta të Fatos Nanos: U kujtoftë për rolin e tij historik

    Kryeministri në detyrë Albin Kurti ka reaguar lidhur me ndarjne nga jeta të Fatos Nanos.

    Kurti shkruan se Nano ishte figurë e rëndësishme për rolin e tij në luftën e Ushtrisë Çlirimtare të Kosovës. Kurti më tej ka shprehur ngushëllimet e tij për familjen.

    “Kur e mora lajmin për vdekjen e Fatos Nanos, më erdhën në mendje kujtime nga dy takimet që dikur i kam patur me të. Herën e parë në fillim të vitit 2002, disa muaj pasi kisha dalë nga burgu në Serbi, ku isha mbajtur si rob lufte bashkë me mbi 2000 shqiptarë të tjerë. Kjo përvojë e imja, u kthye natyrshëm në temë të bisedës sime me Nanon në atë takim tonin njohës.

    Fatos Nanon e kam takuar për herë të dytë kur ishte zgjedhur Kryeministër i Shqipërisë, me ç’rast ai më priti bashkë me Adem Demaçin dhe Arbën Xhaferin. Nga atëherë, më kanë ngelur të pashqitshme nga kujtesa bisedat e tij plot pasion për politikën me Bacin Adem, simbolin e rezistencës sonë dhe me Arbën Xhaferin, liderin politik aq origjinal.

    Në historinë politike të Shqipërisë së periudhës së tranzicionit nga sistemi monist dhe regjimi komunist tek ai demokratik liberal dhe pluralist, emri i politikanit Fatos Nano ishte një figurë qendrore. Ai shërbeu tre herë si Kryeministër i Shqipërisë: nga 22 shkurti deri më 4 qershor 1991, kur Shqipëria ishte në kapërcyell nga komunizmi në demokraci; pastaj nga 25 korriku i vitit 1997 deri më 27 shtator të vitit 1998, kur Shqipëria u përfshi nga trazirat kurse Kosova nga lufta; për herë të tretë dhe më së gjati, Nano shërbeu si Kryeministër i Shqipërisë për tri vite, mes 29 shtatorit 2002 dhe 1 shtatorit 2005, kur Shqipëria po përballej me sfidat e ngritjes nga pasojat e regjimit të gjatë komunist dhe nga trazirat.

    Në biografinë e tij politike, Fatos Nano ka një kapitull të rëndësishëm për rolin e tij në luftën e Ushtrisë Çlirimtare të Kosovës, gjatë vitit të parë të luftës nga dalja publike e UÇK-së deri te ofensiva e verës së vitit 1998, kur terreni shqiptar ishte arenë e lirë e organizimit të UÇK-së. Historia moderne e shtetit shqiptar dhe historia politike e Shqipërisë dhe e Kosovës, do ta kenë të dendur emrin e tij mes emrave të politikanëve shqiptarë të viteve ’90 dhe fillimshekullit XXI.

    Ngushëllime familjes Nano, bashkëpunëtorëve dhe bashkëpartiakëve të Fatos Nanos, si dhe miqve e të afërmve të tij. U kujtoftë mes kryeministrave të Shqipërisë, për rolin e tij historik”, shkruan Kurti.

    Ish-kryeministri Fatos Nano është ndarë këtë të premte nga jeta në moshën 73-vjeçare. Prej më shumë se 3 javësh Nano gjendej i shtruar në një spital privat në kryeqytet në gjendje të rëndë.

    Nano ndodhej në spital prej datës 8 tetor pas problemeve kronike respiratore. Ish-kryeministri, Nano pësoi arrest kardiak dhe më pas vdekje klinike të trurit. Prej ditësh gjendja e tij shëndetësore ishte e rënduar dhe pa përmirësim. Në 16 shtator të këtij viti, ish-lideri histrorik i PS, Nano festoi ditëlindjen e 73-të.

  • Presidenti sirian ‘i shpall Iuftë’ korrupsionit nis hetimet nga vëllai i vet

    Presidenti sirian ‘i shpall Iuftë’ korrupsionit nis hetimet nga vëllai i vet

    Presidenti sirian Ahmad al-Sharaa ka ndërmarrë një fushatë të paprecedentë kundër korrupsionit dhe gjithçka e ka nisur nga familja e tij.

    Sipas agjencisë Reuters, Sharaa ka urdhëruar mbylljen e zyrës së vëllait të tij të madh, Jamal al-Sharaa, ndërsa u ka kërkuar zyrtarëve që posedojnë makina luksoze t’i dorëzojnë çelësat ose të përballen me hetime për pasuri të pajustifikuar.

    Në një takim të mbajtur më 30 gusht në bazën e tij të dikurshme në Idlib, presidenti nuk kurseu ironinë ndaj të pranishmëve që kishin mbërritur me automjete luksoze. S’kisha kuptuar që pagat e shtetit qenkan kaq të larta!”, tha ai, sipas burimeve.

    Më pas, Sharaa ka mbledhur të gjithë familjarët, përfshirë edhe babain e tij 79-vjeçar, duke i paralajmëruar të mos përdorin emrin e familjes për përfitime personale.

    Ndërkohë, Ministria siriane e Informacionit ka konfirmuar mbylljen e zyrës së Jamal al-Sharaa, duke theksuar se ai “nuk ka asnjë funksion zyrtar dhe nuk lejohet të ushtrojë veprimtari tregtare”.

  • Serbia në prag kolapsi energjetik, Vuçiq i kërkon SHBA-së të ndalë sanksionet

    Serbia në prag kolapsi energjetik, Vuçiq i kërkon SHBA-së të ndalë sanksionet

    Presidenti serb Aleksandar Vuçiq i është drejtuar Shteteve të Bashkuara të Amerikës me një kërkesë të veçantë për më shumë kohë, në përpjekje për të shmangur përplasjen përfundimtare lidhur me rafinerinë e vetme të naftës në vend, e cila është në pronësi të shumicës nga gjigandi rus i energjisë Gazprom, raportoi të mërkurën Bloomberg.

    Sipas raportit, më herët këtë muaj Shtëpia e Bardhë ka aktivizuar kufizime të reja që godasin kompaninë NIS (Industria e Naftës e Serbisë). Ky vendim shkaktoi pasoja të menjëhershme — Kroacia fqinje pezulloi furnizimet me naftë bruto, duke rritur rrezikun që rafineria të mbyllet plotësisht.

    Sanksionet kanë prekur gjithashtu edhe rrjetin e stacioneve të benzinës të operuar nga NIS, të cilat nuk mund të pranojnë më kartat American Express, Mastercard apo Visa.

    “Shpresoj që SHBA-të të mos fillojnë sanksione dytësore, të paktën deri në mesin e dhjetorit,” tha Vuçiq, duke shtuar se Beogradi po përpiqet të gjejë një zgjidhje për çështjen e aksioneve shumicë të Gazprom në NIS. Ai thuhet se u ka kërkuar zyrtarëve amerikanë që të përmbahen nga synimi për të goditur institucionet financiare serbe që lehtësojnë pagesat në stacionet e rafinerisë.

    NIS është një nga kompanitë më të mëdha energjetike në Ballkan, me një rafineri në Pançevo, afër Beogradit, dhe një rrjet rajonal prej më shumë se 400 stacionesh benzine. Sipas të dhënave, Gazprom Neft zotëron 44.85% të aksioneve, Gazprom mban 11.3%, ndërsa shteti serb ka 29.87%.

    Zyrtarët amerikanë, të cituar nga Bloomberg, kanë bërë të ditur se Uashingtoni pret që Beogradi ose të sigurojë shitjen e aksioneve të Gazprom në NIS, ose të marrë kontrollin përmes shtetëzimit.
    Megjithatë, më herët këtë javë, Vuçiq thuhet se ka refuzuar çdo veprim të njëanshëm kundër gjigantit rus, duke theksuar:

    “Unë nuk jam as komunist dhe as fashist.”

  • Rita Ora publikon bisedën private me Yll Limanin, a po vjen një duet bombë?

    Rita Ora publikon bisedën private me Yll Limanin, a po vjen një duet bombë?

    Rita Ora ka ndarë me ndjekësit e saj një moment të veçantë komunikimi me artistin kosovar, Yll Limani dhe fansat tashmë po flasin vetëm për një gjë: a po vjen një bashkëpunim mes tyre?

    Në një screenshot të publikuar në Instagram Story, këngëtarja me famë botërore ka zbuluar bisedën private me Yllin, pasi të dy janë bërë së fundmi miq në rrjet. Menjëherë pas ndjekjes së njëri-tjetrit, Ylli i shkroi i pari Rites:

    “Rita, e dua ‘All Natural’.”

    Rita iu përgjigj me fjalë të ngrohta, duke treguar respekt dhe afërsi me artistin shqiptar:

    “Oh legjendë! Faleminderit, do të thotë shumë për mua e thënë nga një shok shqiptar.”

    Pa humbur kohë, Ylli e çon bisedën në një tjetër nivel, duke i propozuar asaj:

    “Bashkëpunim?”

    Dhe përgjigjja e Rites ka qenë e menjëhershme dhe shumë premtuese:

    “Do ta doja këtë.”

    Ky shkëmbim i shkurtër, por domethënës, ka ngjallur entuziazëm dhe reagime të shumta nga fansat, të cilët tashmë po presin me padurim një projekt të përbashkët mes dy prej emrave më të dashur shqiptarë.

    Duke zgjedhur ta publikojë vetë këtë bisedë, Rita ka dhënë një sinjal të qartë se diçka po gatuhet pas kuintave dhe sipas komenteve të ndjekësve, mund të jetë vetëm çështje kohe para se ta dëgjojmë.