ATV

Author: K.B.

  • Raundi i dytë i zgjedhjeve, kandidatët e LDK-së takojnë qytetarët dhe prezantojnë vizionin

    Raundi i dytë i zgjedhjeve, kandidatët e LDK-së takojnë qytetarët dhe prezantojnë vizionin

    Kryetari aktual i Prishtinës dhe kandidati për një mandat të dytë nga radhët e Lidhjes Demokratike të Kosovës, Përparim Rama ka ndarë video – incizim për projektet e realizuara gjatë 4 viteve, përfshirë: rikonstruksionin e mbi 500 rrugëve me ndriçim publik smart, krijimin e hapësirave të gjelbëruara dhe modernizimin e transportit urban.

    Rama premtoi se nëse rizgjidhet do të vijojë me instalimin e ngrohjes qendrore në Bregun e Diellit 2, transformimin e hapësirave publike dhe zgjerimin e ndriçimit në pjesët e larta të qytetit.

    Kurse në Fushë Kosovë, kandidati Besnik Osmani zhvilloi takim me qytetarët ku I falenderoi për mbështetjen e tyre.

    Osmani prezantoi edhe planet e tij për mandatin 2026–2029, duke përfshirë ndërtimin e tre parkingjeve nëntokëspre përmes partneritetit publiko-privat.

    Në Obiliq, Xhafer Gashi, i cili kandidon për një mandat të ri, përkujtoi përkushtimin e tij ndaj fermerëve dhe zhvillimit bujqësor, duke garantuar mbështetje të vazhdueshme për kultivimin dhe zhvillimin e kulturave bujqësore.

    Në Pejë, kryetari në detyrë Gazmend Muhaxheri, kandidat edhe për një mandat rikujtoi investimet në hapësira publike duke modernizuar ndriçimin, gjelbërimin dhe kubëzimin te Qendra Zejtare.

    Sokol Haliti, kryetar i Vitisë që kërkon vote edhe për një mandat, zhvilloi një takim me veteranët e UÇK-së, familjet e dëshmorëve dhe organizatën e invalidëve të luftës. Ai falënderoi për sakrificën e tyre dhe tha se përkushtimi i tij është ta çojë përpara amanetin e tyre për qytet dhe komunitet, me punë, zemër dhe dashuri për atdheun.

  • Dita e katërt e fushatës, kandidatët e AAK-së kërkojnë besimin për një mandat të ri

    Dita e katërt e fushatës, kandidatët e AAK-së kërkojnë besimin për një mandat të ri

    Në ditën e katërt të fushatës gjashtëditore për raundin e dytë të zgjedhjeve lokale, kryetari aktual I Gjakokovës, Ardian Gjini kandidat edhe për një mandat 4 vjecar mbajti një tubim me pjesëmarrjen e liderit të AAK-së, Ramush Haradinaj.

    Ky I fundit tha se Gjakova ka ndryshuar ndjeshëm nën drejtimin e Gjinit, duke theksuar investimet infrastrukturore dhe shërbimet e avancuara për qytetarët.
    “Ardiani është garanci e vazhdimësisë së transformimit të Gjakovës,” u shpreh Haradinaj, duke shtuar se qytetarët kanë besim në rezultatet konkrete të qeverisjes së tij.

    Në mëngjes, Gjini mori pjesë edhe në inaugurimin e Kishës Protestante “Rilindja” në Gjakovë. Ai ka falënderuar donatorët ndërkombëtarë për mbështetjen dhe duke theksuar rëndësinë e bashkëjetesës fetare në komunë.

    Në Klinë, kryetari aktual Zenun Elezaj ka shpërndarë një video me punët e realizuara gjatë mandatit të tij, me moton “Fitojmë sepse punojmë – Për Klinën e të gjithëve”.

    Kandidati i AAK-së në Suharekë, Bali Muharremaj, që kërkon një mandat të ri, ka prezantuar punimet për pastrimin e Lumit “Toplluha” dhe ka zhvilluar një tubim në Budakovë.

    Në Junik, kandidati i AAK-së Agron Kuçi ka reaguar ndaj pretendimeve të kundërkandidatit, duke sqaruar se investimet për rregullimin e shtratit të Lumit Erenik janë realizuar me mbështetje nga Qeveria e Kosovës dhe donatorë ndërkombëtarë. Ai premtoi se, nëse merr një mandat do të me mirëmbaj infrastrukturën ujore dhe do të përfundoj rrugën Junik–Gjeravicë.

    Në Rahovec, kryetari aktual Smajl Latifi ka zhvilluar një takim me veteranët e luftës, duke u zotuar për mbështetje institucionale dhe përkujdesje të vazhdueshme për këtë kategori.

    Po ashtu, Latifi ka ndarë pamje nga tubimet në Hoçë të Vogël dhe Brestoc, ku ka falënderuar qytetarët për përkrahjen dhe duke theksuar se “numri 174 është zgjedhja për punë, zhvillim dhe mirëqenie”.

  • Fushata e raundit të dytë, kandidatët e LVV-së: Të dielën voto për të ardhmen e komunës

    Fushata e raundit të dytë, kandidatët e LVV-së: Të dielën voto për të ardhmen e komunës

    Në ditën e katërt të fushatës për raundin e dytë të zgjedhjeve lokale, kryetari i komunë së Gjilanit, kandidati i Lëvizjes Vetëvendosje për mandat të dytë, Alban Hyseni gjatë një tubimi madhështor ku mori pjesë edhe kryeministri Albin Kurti, theksoi punët e kryera gjatë mandatit të parë dhe nënvizoi rëndësinë e votës së qytetarëve më 9 nëntor. “Gjilani është me zemër me Lëvizjen Vetëvendosje! Të dielën do ta vulosim fitoren,” tha Hyseni.

    Në Viti, kandidati Arsim Ademi, gjatë një tubimi ku mori pjesë edhe kryeministri Albin Kurti, u drejtua te qytetarët duke kërkuar mbështetjen e tyre. Ai premtoi një qeverisje efikase, të drejtë dhe transparente, me derën e hapur për çdo qytetar që ka ide për të ardhmen e komunës.

    Në kryeqytet, kandidati Hajrulla Çeku nëse arrin të bëhet kryetar synon lehtësimin e trafikut dhe zgjerimin e parkingjeve publike.

    Ai gjatë ditës vlerësoi arritjet e nxënësve të Shkollës së Muzikës “Amadeus” në garat ndërkombëtare, duke e parë si frymëzim për të rinjtë e Prishtinës.

    Kandidati Ardian Gola në Gjakovë, premtoi rikthimin në funksion të Parkut “Ali Podrimja”, themelimin e festivalit ndërkombëtar të poezisë dhe ndërtimin e një teatri modern për artistët lokal.

    Në Prizren, kandidati i LVV-së, Artan Abrashi, mori pjesë në disa takime me qytetarët së bashku me kryeministrin Albin Kurti, ku u pritën me mbështetje të jashtëzakonshme nga qytetarët.

    Abrashi nënvizioi energjinë dhe vendosmërinë e banorëve të Korishës dhe Kurillës për ndryshim dhe u bëri thirrje qytetarëve që të dielën më 9 nëntor të votojnë për ndryshimin që Prizreni e meriton.

    Në Pejë, kandidati Taulant Kelmendi premtoi vëmendje për fshatrat dhe lagjet, dhe se qytetarët nuk duhet të jenë viktimë e premtimeve të rreme.

    Valon Prebreza kandidat për kryetar në Fushë Kosovë inkurajoi qytetarët që të votojnë numrin 105.

    Në Mitrovicë, kandidati i Vetëvendosjes Faton Peci prezantoi planet për rehabilitimin e Kodrës së Cërnushës dhe krijimin e ekipeve vullnetare për parandalimin e zjarreve pyjore.

    Ndërsa në Vushtrri, Sylejman Meholli premtoi se dëmet nga vërshimet e vitit 2023 do të kompensohen për fermerët dhe ekonomitë familjare.

    Në Obiliq, kandidati Halil Thaçi premtoi kthimin nën menaxhim të komunës të një objekti shkollor që ka qenë peng i uzurpatorëve për shumë vite.

  • PDK intensifikon fushatën në ditën e katërt para raundit të dytë të zgjedhjeve lokale

    PDK intensifikon fushatën në ditën e katërt para raundit të dytë të zgjedhjeve lokale

    Shaqir Totaj, kryetari aktual i Prizrenit, kandidat i Partisë Demokratike të Kosovës edhe për një mandat, në ditën e katërt të fushatës për raundin e dytë të zgjedhjeve lokale, ndau një video të titulluar “4 vite në 40 sekonda”, ku paraqiten investimet dhe projektet e realizuara në të gjitha lagjet dhe fshatrat e qytetit.

    Totaj falenderoi bashkatdhetarët për mesazhet dhe mbështetjen e tyre. Ai u bërë thirrje qytetarëve që të votojnë të dielën në mënyrë të organizuar.

    Në Dragash, kandidati i PDK-së Shaban Shabani apeloi qytetarët për mbështetje në raundin e dytë të zgjedhjeve.

    Nga Kaçaniku, kryetari aktual Sabedin Vishi, kandidat edhe për një mandat, ditën e katërt të fushatës e fokusoi në fuqizimin e pozitës së grave dhe vajzave të reja me premtimin për fuqizimin e pozitës së gruas në shoqëri.

    Në Mitrovicë, kandidati i PDK-së Arian Tahiri gjatë takimit në “Birlik” premtoi një qeverisje të bashkuar dhe gjithëpërfshirëse në raundin e dytë të zgjedhjeve që zhvillohet të dielën, më 9 nëntor.

    Tahiri shpërndau edhe një video-mesazh, ku shprehet se qytetarët janë prioriteti i tij: “I përulem vullnetit qytetar. Jetojmë dhe punojmë për Mitrovicën.”

    Ferit Idrizi, kryetari aktual, kandidat edhe për një mandat në Vushtrri, ishte pranë qytetarëve në rrugë, tregje e biznese për të promovuar vizionin e tij për një të ardhme më të mirë.

    Ndërsa në Klinë, kandidati Sokol Bashota premtoi infrastrukturë, arsim, shëndetësi dhe zhvillim ekonomik.

  • Dita e katërt e fushatës në Mamushë, garë mes premtimeve dhe kritikave

    Dita e katërt e fushatës në Mamushë, garë mes premtimeve dhe kritikave

    Në ditën e katërt të fushatës për raundin e dytë të zgjedhjeve për kryetar të komunës së Mamushës, kryetari aktual dhe kandidati i Partisë Demokratike Turke të Kosovës, Abdulhadi Krasniq ka ndarë pamje të një nga projektet që e quan “realizimin e një ëndrre të kahmotshme” për qytetarët e Mamushës, furnizimin me ujë të pijshëm nga sistemi i Radoniçit.

    Ai tha se testimi i linjave të ujësjellësit tashmë ka përfunduar dhe se shumë shpejt banorët e Mamushës do të kenë ujë të pastër dhe cilësor në çdo shtëpi.
    “Që nga sot, uji i pijshëm Radoniç është lidhur me linjën e shpërndarjes së Mamushës. Ky është fillimi i një epoke të re për komunën tonë, ku mungesa e ujit do të mbetet vetëm kujtim i së kaluarës,” deklaroi Krasniq.

    Ai gjithashtu u bëri thirrje bashkatdhetarëve nga diaspora, veçanërisht atyre që jetojnë në Turqi, të marrin pjesë në zgjedhje, duke njoftuar për transport të organizuar nga qyteti i Bursës drejt Kosovës.

    Ndërkaq, kandidati i Mamusha Halk Hareketi, Fikret Morina, vazhdoi fushatën me kritika ndaj kundërshtarit të tij, duke e akuzuar për, siç tha ai, “përdorim të institucioneve për fushatë dhe mashtrime me lajme të rreme për mbështetje të fermerëve”.

    Morina rikujtoi premtimin e dhënë më 23 shtator për “grante ndaj fermerëve, tregtarëve dhe artizanëve”, duke thënë se deri më tani asnjë nga këto mbështetje nuk është realizuar.

    “Fermerët dhe tregtarët u mbushën me shpresë, por grantet nuk ekzistojnë. Këto janë vetëm premtime të bëra për vota. Banorët e Mamushës nuk do të bien më në të njëjtën grackë,” – deklaroi Morina.

    Ai theksoi se nëse zgjedhet kryetar, prioritet i tij do të jetë mbështetja reale për bujqësinë dhe zhvillimin ekonomik vendor, pa ndasi partiake apo etnike.

  • Putini sfidon botën, arma e re bërthamore që mund të zhysë të tërë Manhatanin nën ujë

    Putini sfidon botën, arma e re bërthamore që mund të zhysë të tërë Manhatanin nën ujë

    Një raportim i “Daily Mail” ka tronditur opinionin ndërkombëtar, pasi zbulon se Rusia ka zhvilluar një armë të re bërthamore, e cilësuar si më e frikshmja që Moska ka ndërtuar ndonjëherë.

    Arma mban emrin “Poseidon” një supertorpedë me energji dhe ngarkesë bërthamore, e aftë, sipas ekspertëve, të zhysë brigjet e Shteteve të Bashkuara nën ujëra radioaktive në rast konflikti.

    Burime perëndimore pohojnë se “Poseidon” është projektuar për të vepruar në thellësi të mëdha, duke shmangur sistemet e mbrojtjes detare dhe duke shkaktuar cuname të përmasave katastrofike.

    Raporti paralajmëron se një shpërthim pranë brigjeve amerikane mund të fundosë qytete të tëra – përfshirë Manhattanin – nën ujë të kontaminuar radioaktiv.

    Publikimi i këtyre detajeve ka ngritur alarmin në Uashington. Sipas “Daily Mail”, zhvillimet e fundit e kanë detyruar ish-presidentin Donald Trump të shqyrtojë “të paimagjinueshmen” në lidhje me ekuilibrin bërthamor dhe strategjitë mbrojtëse të SHBA-së.

    Nga ana tjetër, Rusia e paraqet projektin si një “armë parandalimi strategjik”, por në Perëndim ai shihet si një kërcënim i drejtpërdrejtë ndaj sigurisë globale.

  • Qeveria e Kurtit nis pagesat prej 100 eurosh, paralajmëron grupin e dytë

    Qeveria e Kurtit nis pagesat prej 100 eurosh, paralajmëron grupin e dytë

    Kryeministri në detyrë, Albin Kurti, ka bërë të ditur se sot është nisur procesimi i pagesave për grupin e parë të studentëve që janë kualifikuar si përfitues të shumës së njëhershme prej 100 eurove, në kuadër të mbështetjes për fillimin e vitit të ri akademik.

    Në njoftimin e tij, Kurti ka theksuar se 49,623 studentë nga të gjitha drejtimet dhe institucionet arsimore, publike e private, janë përfshirë në këtë grup të parë.

    Ai ka shtuar se pjesa e mbetur e aplikuesve që plotësojnë kriteret do të shqyrtohen dhe procesohen në ditët në vijim, si pjesë e grupit të dytë të përfituesve.

    “Sot është procesuar pagesa për grupin e parë të studentëve që janë kualifikuar si përfitues të shumës së njëhershme prej 100 eurove, me rastin e fillimit të vitit të ri akademik. Janë gjithsej 49,623 studentë përfitues të të gjitha drejtimeve e institucioneve arsimore, publike e private që janë procesuar me grupin e parë. Pjesa e mbetur e aplikuesve që plotësojnë kriteret për përfitim do të shqyrtohen dhe procesohen me grupin e dytë në ditët në vijim. Me qeverinë tonë, studentët çdoherë do të kenë mbështetjen e shtetit,” ka shkruar Kurti.

  • Detaje tronditëse nga Malisheva, kryeprokurori Gashi zbulon të dhënat e para nga vendi i ngjarjes

    Detaje tronditëse nga Malisheva, kryeprokurori Gashi zbulon të dhënat e para nga vendi i ngjarjes

    Një ngjarje e rëndë ka tronditur sot fshatin Golluboc të komunës së Malishevës, ku dy vëllezër kanë mbetur të vrarë nga një person tjetër, që dyshohet se është dhëndri i tyre.

    Kryeprokurori i Prokurorisë Themelore në Gjakovë, Enis Gashi, ka konfirmuar për mediat nga vendi i ngjarjes se autoritetet janë duke ndërmarrë të gjitha masat e nevojshme për kapjen e të dyshuarit, i cili aktualisht ndodhet në arrati.

    “Kemi të bëjmë me një vrasje të rëndë, konkretisht me një vrasje të dyfishtë me dy viktima. Kryerësi i kësaj vepre penale është ende në arrati dhe policia, në bashkëpunim me prokurorinë, po ndërmarrin të gjitha masat që sa më shpejt të identifikohet dhe të sigurohet prezenca e tij”, tha Gashi.

    Ai shtoi se për momentin nuk mund të jepen më shumë detaje për shkak të procesit të verifikimit të informatave.

    “Tani për tani s’mund të japim informacione shtesë sepse duhet të bëjmë verifikimin e të dhënave dhe më pas do të dalim me një njoftim zyrtar që informatat të jenë sa më të sakta. Ajo që mund të konfirmoj është se viktimat dhe i dyshuari kanë raporte familjare,” shtoi ai.

    Sipas kryeprokurorit, policia është në terren dhe po punon në koordinim të plotë me prokurorinë për mbledhjen e provave materiale dhe personale. Pas kësaj, pritet të jepet një njoftim më i detajuar për rastin.

    Ndërkohë, personi i dyshuar, me inicialet A.I, është aktualisht në kërkim nga Policia.

  • Kush është Zohran Mamdani, migranti 34-vjeçar që do të udhëheqë New Yorkun

    Kush është Zohran Mamdani, migranti 34-vjeçar që do të udhëheqë New Yorkun

    Vetëm një vit më parë ishte pothuajse i panjohur, Zohran Mamdani tani është bërë kryetar i 111-të i bashkisë së New Yorkut.

    Shumë njujorkezë ia pëlqejnë prejardhjen prej migrantit dhe parimet socialiste, por jo edhe presidenti amerikan, Donald Trump.
    Qyteti më i madh në Shtetet e Bashkuara më 4 nëntor përfundoi votimin për zgjedhjet e kryetarit të bashkisë për vitin 2025, ku 34-vjeçari mposhti republikanin, Curtis Sliwa dhe kandidatin e pavarur, Andrew Cuomo, i cili u mbështet nga Trump dhe Elon Musk.

    Mamdani lindi më 8 tetor 1991 në Kampala, në Ugandë, me emrin Zohran Kwame Mamdani.

    Ai është mysliman me prejardhje indiane. Nëna e tij, Mira Nair, është regjisore e njohur, ndërsa babai i tij, Mahmood Mamdani, është shkencëtar.

    Familja iu zhvendos përkohësisht nga Uganda në Afrikën e Jugut kur Zohran ishte pesëvjeçar.
    Dy vjet më vonë ai arriti me familjen në New York. Ai e ka përshkruar fëmijërinë si “të privilegjuar”, por pranon se përvoja nuk ishte tipike për atë qytet.

    Ngjitja politike ka qenë e shpejtë. Ai u zgjodh në Asamblenë e shtetit të New Yorkut në vitin 2020.

    Kur në muajin tetor të vitit 2024 shpalli kandidaturën për kryetar bashkie, shumë njerëz menduan se nuk kishte asnjë shans të afrohej me nominimin. Në fund, triumfi ndaj Cuomos ishte bindës fitoi 56,4 për qind të votave.

    Mamdani është adhurues i hip-hopit dhe dikur ka performuar e prodhuar vetë muzikë në atë zhanër.

    Ai është tifoz i disa klubeve sportive, përfshirë ekipin e bejzbollit New York Mets, ekipin e futbollit amerikan New York Giants dhe klubin londinez të Arsenalit.

    Cilat janë qëndrimet e tij politike?
    Pjesërisht falë punës së mëparshme, kur ndihmonte të varfrit të shmangnin dëbimet e detyruara, strehimi i përballueshëm është bërë shtylla kryesore e fushatës së tij.
    Në metropolin që ka qiratë më të shtrenjta në botë ku një apartament mesatar me tre dhoma kushton 8.500 dollarë në muaj (rreth 7.350 euro) thirrjet për ngrirjen e qirave të banesave me qira të rregulluara, ndërtimin e më shumë banesave të përballueshme dhe kontroll më të rreptë mbi pronarët privatë kanë gjetur miratim te qytetarët.

    Anëtarësimi tek grupi amerikan socialisto-demokrat e konfirmoi më tej bindjen e tij ideologjike. Ai propozon një taksë të unifikuar prej 2 për qind mbi të ardhurat mbi një milion dollarë në vit, rritje të taksës mbi fitimin, futjen e transportit publik falas me autobusë, pagë minimale prej 30 dollarësh në orë (në vend të 16,50 që është tani) dhe zgjerimin e kujdesit publik për fëmijët.

    “Duhet të flisni në një gjuhë që të gjithë e kuptojnë dhe në të cilën mund të identifikohen”, tha Mamdani për të përjavshmen britanike The New Statesman. “Dhe duhet të flisni për betejat që njerëzit i përballojnë çdo ditë. Partia Demokratike shpesh flet për demokracinë, por nëse nuk mund të përballoni të jetoni në qytetin që e quani tuajin nuk keni kohë të shqetësoheni për vlerat”, deklaroi ai.

    Pse është i rëndësishëm posti i kryetarit të bashkisë së New Yorkut?

    Me pothuajse 8,5 milionë banorë dhe rreth 65 milionë vizitorë në vit, New Yorku është një qendër kulturore dhe financiare globale që përballet me sfida serioze në fushat e strehimit, transportit dhe financave publike.

    Kryetari i bashkisë ka në dispozicion një buxhet prej 116 miliardë dollarësh dhe gëzon kompetenca të gjera.

    Pas fitores së Mamdanit, përplasjet me Donald Trumpin i cili është gjithashtu nga New Yorku – pothuajse me siguri do të bëhen një temë e vazhdueshme.

    Trump e ka quajtur tashmë “i çmendur komunist” dhe “një katastrofë që mezi pret të ndodhë”.

    Mamdani, nga ana tjetër, ka thënë se do të përpiqet të bashkëpunojë me presidentin për të mirën e qytetit, por se nuk do të lejojë të frikësohet.

    Duke pasur parasysh se pikëpamjet e tyre politike janë diametralisht të kundërta, marrëdhënia midis presidentit dhe kryetarit të ri të bashkisë së New Yorkut mund të shndërrohen në një tjetër fushëbetejë të politikës amerikane.

  • Raundi i dytë i zgjedhjeve lokale, kandidatët e LDK-së prezantojnë projekte inovative

    Raundi i dytë i zgjedhjeve lokale, kandidatët e LDK-së prezantojnë projekte inovative

    Kryetari aktual i Prishtinës dhe kandidati për një mandat të dytë nga radhët e Lidhjes Demokratike të Kosovës, Përparim Rama, ka ndarë një video nga projektet e realizuara në lagjen Dardania dhe aktivitetet e tij me mësimdhënesit, duke nënvizuar angazhimin e tij për një Prishtinë që respekton mësuesit, fuqizon shkollat dhe investon në të ardhmen e nxënësve.

    Besnik Osmani, kandidati për kryetar të Fushë Kosoves ka vizituar banorët e Lismirit të cilët i dhanë një përkrahje të madhe.

    Osmani po ashtu gjatë ditës ka prezantuar projektin ideor për rinovimin e lagjes “Kolonia” dhe ndërtesave të reja në Bresje.

    Kurse kandidati i LDK-së për kryetar të Suharekës, Ardian Shala ka zhvilluar takime me banorët e fshatrave Nëperbisht dhe Samadraxhë, duke dëgjuar nevojat e tyre dhe duke premtuar investime që do të dërgojnë Suharekën në një epoke të re zhvillimi dhe permirësimi të jetesës.

    Kandidati për Gjilan, Arbër Ismajli premton punësim për mjekët e sapodiplomuar, për të garantuar që do qytetarë të ketë mjekun e vet, pajisje moderne dhe efikasitet në menaxhimin e shërbimeve shëndetësore.

    Kryetari aktual dhe kandidat për një mandat të dytë në Viti, Sokol Haliti ka zhvillar takime me Forumin e Gruas, aty ai premtoi angazhimin e tij për një të ardhme më të drejtë dhe me dinjitoze për qytetarët.

    Xhafer Gashi, kryetari aktual i Obiliqit, kandidat edhe për një mandat 4-vjecar ka publikuar video mbi punën e ndermarrjes komunale ne fushën e mjedisit, duke përmirësuar hapësirat e gjelbra, parkun dhe kënde atraktive për qytetarët.