Author: K.B.

Bizhuteri me vlerë miliona euro u vodhën gjatë një grabitje në muzeun e prodhuesit francez të qelqit luksoz Lalique.

Autorët hynë me forcë në muzeun në Wingen-sur-Moder në Francën verilindore dhe u nisën drejt e në dhomën e bizhuterive.

“Rreth 20 bizhuteri u vodhën. Humbja po vlerësohet aktualisht, por mund të arrijë në disa milionë euro, ndoshta afër katër milionë”, sipas një personi.

Muzeu tha në faqen e tij të internetit se do të jetë i mbyllur për disa ditë për shkak të vjedhjes.

“Një alarm u dëgjua, por në kohën kur kompania e sigurisë kishte përfunduar kontrollet e saj, ishte një pastruese që mbërriti e para në vendngjarje dhe thirri policinë”, thanë hetuesit.

Pamjet e kamerave të sigurisë po shqyrtohen aktualisht.

Muzeu, i dedikuar argjendarit dhe prodhuesit të qelqit të stilit Art Nouveau dhe Art Deco, Rene Lalique, u hap në vitin 2011 pranë fabrikës së kompanisë.

Një grabitje e xhevahireve gjatë ditës në muzeun e Luvrit në Paris në tetor të vitit të kaluar e vuri sigurinë në muzetë dhe galeritë franceze në qendër të vëmendjes.

Hajdutët ia mbathën me bizhuteri me vlerë 102 milionë dollarë nga Luvri në një bastisje që zgjati më pak se tetë minuta.

Një i ri nga Kosova ka humbur jetën në Suedi. Ai dyshohet se u qëllua aksidentalisht gjatë një konflikti mes bandave rivale. Viktima ishte kalimtar rasti.

Lajmin e ka bërë të ditur familja e viktimës përmes një njoftimi publik, ku thuhet se i riu, Genti, nuk kishte lidhje me ngjarjen, por ishte kalimtar i rastit në momentin kur ndodhën të shtënat.

““Mbremë Genti na la tragjikisht nga plumbat e konflikteve te bandave te shumta në Suedi, ku Genti duke ecur ne lagje u vra aksidentalisht nga qerimi i hesapeve te bandave rivale”, thuhet në reagimin e familjes./Indeksonline/

Policia e Kosovës nën autorizimin e Prokurorisë Speciale të Republikës së Kosovës ka zhvilluar një operacion në Prishtinë më 30 qershor 2026, si rezultat i të cilit janë sekuestuar asete me vlerë 1 milion euro.

Operacioni është realizuar në kuadër të një hetimi mbi pastrimin transnacional të të ardhurave të nxjerra nga trafikimi i drogës, i realizuar nga autoritetet italiane dhe franceze, të koordinuara nga Europol dhe Eurojust, në bashkëpunim të ngushtë me Prokurorinë Speciale dhe Policinë e Kosovës.

Analiza e materialit të sekuestruar gjatë hetimit, së bashku me informacionin e marrë nga Prokuroria Speciale e Republikës së Kosovës – Departamenti për Hetimin e Krimit të Organizuar në ekzekutimin e një kërkese për ndihmë të ndërsjellë juridike të paraqitur nga autoritetet gjyqësore italiane, i mundësoi hetuesve të identifikonin llogaritë bankare, interesat e biznesit, pasuritë e paluajtshme dhe automjetet me vlerë të lartë në pronësi të një çifti të martuar shtetas të Kosovës që banojnë në Itali. Çifti, i cili është nën hetim penal në Itali me dyshimin për pastrim parash, u arrestua në Francë në shtator 2025. Policia kishte zbuluar më shumë se 56 kilogramë shufra ari dhe 2.5 milionë euro të fshehura brenda në ndarjeje të modifikuar të dy automjeteve.

Po ashtu, po në shtator 2025, ishin sekuestruan të ardhura të tjera nga veprimet kriminale me vlerë më shumë se 30 milion euro. Këto asete ishin të lidhura me një rrjet kriminal transnacional të angazhuar në pastrimin e të ardhurave të gjeneruara nga trafikimi i drogës në Francë nga individë të lidhur me grupe kriminale në Francë.

Sipas autoriteteve, konvertimi i parave të gatshme në ar shërbeu për një qëllim të dyfishtë: fshehjen e origjinës së paligjshme të të ardhurave kriminale dhe lehtësimin e fshehjes dhe transportit të tyre ndërkufitar, veçanërisht në Kosovë, Turqi dhe Marok.

Në ekzekutimin e kërkesës për ndihmë të ndërsjellë ligjore, Prokuroria Speciale e Republikës së Kosovës – Departamenti për Hetimin e Krimit të Organizuar, në koordinim të ngushtë me Policinë e Kosovës, ndërmori të gjitha masat e nevojshme procedurale dhe hetimore, duke rezultuar në identifikimin, gjurmimin dhe sekuestrimin e aseteve brenda territorit të Republikës së Kosovës me një vlerë të vlerësuar prej afërsisht 1 milion eurosh.Europol dhe Eurojust ofruan mbështetje të konsiderueshme gjatë gjithë hetimit duke lehtësuar bashkëpunimin gjyqësor dhe operacional ndërkufitar midis autoriteteve italiane, franceze dhe atyre të Kosovës, të cilat kanë luajtur një rol kyç në identifikimin, gjurmimin dhe sekuestrimin e aseteve kriminale në juridiksione të shumta.

Autoritetet Pjesëmarrëse:

Francë: Juridiksioni i Specializuar Ndërrajonal i Marsejës (JIRS); Xhandarmëria Kombëtare e Marsejës – Seksioni i Hetimit.

Itali: Zyra e Prokurorit Publik të Milanos – Drejtoria e Qarkut Anti-Mafia (DDA); Guardia di Finanza – Njësia e Policisë Ekonomike dhe Financiare të Milanos (GICO) dhe Shërbimi Qendror për Hetimin e Krimit të Organizuar (SCICO).

Kosovë: Prokuroria Speciale e Republikës së Kosovës – Departamenti për Hetimin e Krimit të Organizuar, në bashkëpunim me Policinë e Kosovës.

Hetimi mori gjithashtu mbështetje nga Programi i Punëve të Brendshme i Bashkimit Evropian në Kosovë (HAPE).

Këshilli Gjyqësor i Kosovës, ka autorizuar kryetarët e Gjykatave të Supremes, Apelit, Administratives, Komerciales dhe Themelores në Prishtinë, që të ndërmarrin masa për shkak të temperaturave të larta që mbizotërojnë në Pallatin e Drejtësisë.

Tashmë iu mbetet kryetarëve të gjykatave në Pallatin e Drejtësisë, që në bazë të vlerësimit të mund të reduktojnë ose pezullojnë punën.

Në mbledhjen e sotme, kryesuesi i KGJK-së, Rrustem Thaçi pavarësisht nga vlerësimi i kryetarëve, tha se mund të vendosin për reduktimin apo pezullimin deri në përmirësimin e gjendjes.

“Autorizojmë kryetarët e Gjykatës Supreme, së Apelit, Komerciale, Themelore dhe Administrative që të vlerësojnë kushtet e punës, gjendjen e temperaturave të larta dhe pavarësisht nga vlerësimi të vendosin për reduktimin e punës apo pezullimin deri në përmirësimin e gjendjes”, tha Thaçi.

Ai tha se gjendja në Pallatin e Drejtësisë është alarmante dhe e patolerueshme.

“Unë që nga 2017 kam qenë pjesë e punës në Gjykatën e Apelit dhe Supreme dhe gjendja është alarmante, është e papranueshme, e patolerueshme. Më nuk po flasim për kushtet e punës po flasim për jetën e njerëzve, është detyrim i joni që të sigurojmë të paktën mos të pësojnë me shëndet. Në ora 11 mendojnë se a munden me mbijetua deri në ora 16:00”, tha ai. /KP/

Presidenti i SHBA-së, Donald Trump, ka postuar një imazh ku shfaqet pranë kryeministres italiane, Giorgia Meloni, me mbishkrimin: “Nevojitet një urdhër kufizues”.

Një urdhër kufizues është një masë paraprake me anë të së cilës një urdhër gjykate kërkon që autori i krimit të mbajë distancë nga personi tjetër.

Postimi u shfaq vetëm disa orë para samitit të NATO-s në Ankara, i planifikuar për 7 dhe 8 korrik , në të cilin pritet të marrin pjesë të dy udhëheqësit.

Sipas Corriere della Sera, qeveria italiane nuk ka ndërmend këtë herë të reagojë “ndaj këtij provokimi”.

Foto duket se thellon përçarjen midis presidentit amerikan dhe kryeministres italiane, duke shënuar një ftohje të mëtejshme të marrëdhënieve midis dy vendeve.

Dallimet filluan të dolën në pah në pranverën e vitit 2026, mbi çështje që lidhen me menaxhimin e krizave në Lindjen e Mesme dhe Iran, kritikat e Trumpit ndaj Papa Leos XIV dhe distancimin gjithnjë e më të madh të Italisë nga disa nga kërkesat e administratës amerikane brenda NATO-s.

Pika e kthesës erdhi më 19 qershor, kur Trump tha në një intervistë se Meloni “e kishte lutur të bënin një foto së bashku” gjatë G7 dhe se ai kishte rënë dakord vetëm “nga keqardhja”.

Kryeministrja italiane i përshkroi pretendimet si “krejtësisht të shpikura”.

Fjalët e Trumpit shkaktuan një reagim të fortë në Itali dhe pasoja të menjëhershme diplomatike, përfshirë anulimin e një vizite në SHBA nga Ministri i Jashtëm Antonio Tajani.

Drejtoria e Policisë së Prishtinës është duke zbatuar planin operativ “Kontrolli i Motoçikletave”, në kuadër të cilit po zhvillohen aktivitete të shtuara policore me fokus kontrollin e motoçikletave dhe rritjen e sigurisë në trafik.

Bazuar në njoftimin e policisë, nga 2 korriku e deri më sot, njësitet e Drejtorisë së Policisë së Kryeqytetit kanë shqiptuar gjithsej 132 gjoba ndaj drejtuesve të motoçikletave për shkelje të ndryshme.

Prej tyre, 18 gjoba janë shqiptuar për prishje të rendit dhe qetësisë publike, ndërsa gjatë kësaj periudhe janë sekuestruar edhe 24 motoçikleta.

Ramadush Emini nga dega e parë e LDK-së në Zvicër, kanë rikonfirmuar mbështetjen për kryetarin e partisë Lumir Abdixhuiku, pasi një grup tjetër po kërkon largimin e tij.

Përmes një postimi ën Facebook, Emini ka thënë se kanë pasur në degë një diskutim, duke mbështetur çdo vendim që do të marrë kryesia e LDK-së.

“Sot, Dega e Parë e LDK-së në Zvicër mbajti takimin e analizës së rezultateve të zgjedhjeve të qershorit. Pas një diskutimi të hapur dhe konstruktiv, unanimisht shprehëm mbështetjen tonë për çdo vendim që do të marrë Kryesia Qendrore e LDK-së lidhur me hapat e mëtejmë politikë, gjithmonë në funksion të ofrimit të institucioneve të qëndrueshme dhe në interes të Kosova dhe qytetarëve të saj. Njëkohësisht, rikonfirmuam mbështetjen e plotë për lidershipin e Lidhjës Demokratike e Kosovës, në krye me Lumir Abdixhiku, duke besuar se uniteti, përgjegjësia dhe vizioni janë rruga përpara. Të bashkuar, të vendosur dhe gjithmonë në shërbim të atdheut”, ka thënë ai.

Ankaraja po përfundon përgatitjet për organizimin e Samitit të NATO-s, që do të zhvillohet më 7 dhe 8 korrik, ndërsa mediat turke kanë publikuar detajet e para mbi vizitën e presidentit amerikan Donald Trump dhe axhendën e takimit të tij me presidentin Recep Tayyip Erdogan.

Sipas raportimeve, Trump pritet të mbërrijë në kryeqytetin turk më 7 korrik, i shoqëruar nga një delegacion i gjerë amerikan. Ekipet e sigurisë dhe ato logjistike kanë nisur prej ditësh përgatitjet për zhvillimin e vizitës.

Sipas programit, ndalesa e parë zyrtare e presidentit amerikan do të jetë në Anıtkabir, mauzoleun e themeluesit të Republikës së Turqisë, Mustafa Kemal Atatürk, ku ai do të vendosë një kurorë me lule dhe do të bëjë homazhe.

Më pas, Trump do të pritet në Pallatin Presidencial nga presidenti Erdogan, ku do të zhvillohet ceremonia zyrtare e mirëseardhjes.

Pas ceremonisë, dy liderët pritet të zhvillojnë fillimisht një takim kokë më kokë, i cili do të pasohet nga bisedime mes delegacioneve të dy vendeve. Në fokus të diskutimeve pritet të jenë marrëdhëniet dypalëshe, çështjet e sigurisë, bashkëpunimi në kuadër të NATO-s, si edhe zhvillimet rajonale dhe ndërkombëtare.

Mediat turke raportojnë se, pas përfundimit të takimit, nuk përjashtohet mundësia që Trump dhe Erdogan të mbajnë një konferencë të përbashkët për mediat, ndërsa po shqyrtohet edhe nënshkrimi i disa marrëveshjeve bashkëpunimi.

Në kuadër të Samitit të NATO-s, më 7 korrik do të zhvillohet edhe Forumi i Industrisë së Mbrojtjes, në Qendrën e Kongreseve ATO në Ankara. Në këtë aktivitet pritet të marrin pjesë zyrtarë të NATO-s, përfaqësues të qeverive dhe drejtues të kompanive kryesore të industrisë së mbrojtjes, me synimin për të forcuar partneritetet dhe bashkëpunimin në sektorin e mbrojtjes. /Panorama

Ish-deputeti i Kuvendit të Kosovës nga radhët e PDK-së, Bekim Haxhiu ka kritikuar gjendjen në sektorin e shëndetësisë, duke akuzuar Ministrinë e Shëndetësisë për, siç tha ai, keqmenaxhim, tenderomani dhe degradim të shërbimeve shëndetësore.

Haxhiu në një intervistë për Ekonomia Online tha se sistemi shëndetësor është shndërruar në një sistem biznesi në funksion të grupeve të interesit dhe se qytetarët po përballen me lista të gjata pritjeje dhe mungesë të barnave e materialeve mjekësore.

“Sistemi jonë shëndetësor tanimë është shndërruar në një sistem të biznesit për përfitime të grupeve të interesit të lidhura me Ministrinë e Shëndetësisë. Tanimë është evidente që ofrimi i shërbimeve shëndetësore nuk është në nivelin të cilin do të duhej të ishte, për më keq që këto shërbime shëndetësore po prolongohen dhe nuk po u ofrohen qytetarëve të Republikës së Kosovës. Listat e pritjes për marrjen e shërbimeve shëndetësore tanimë janë afër gjashtë vite, prej gjashtë muaj deri në gjashtë vite. Ndërsa Ministria e Shëndetësisë merret me tenderomani. E keni parë dhe rastin e fundit të publikuar edhe në media, përveç atyre abuzimeve të tjera, tani edhe ambulantat të cilat janë të kontraktuara nga Ministria e Shëndetësisë, janë të pacertifikuara me çmime abuzive e në të cilat nuk garantojnë cilësinë e shërbimit për ata që kanë nevojë për të marrë një shërbim të shpejtë.”, tha Haxhiu.

Ai i bëri thirrje Prokurorisë që të veprojë lidhur me, siç u shpreh, abuzimet në sektorin e shëndetësisë.

“Unë ftoj Prokurorinë e Republikës së Kosovës që vërtet, ashtu siç kam kërkuar edhe më herët, që të lë një prokuror kujdestar për të gjitha këto abuzime të cilat pothuajse janë të përditshme në sektorin e shëndetësisë”, tha ai për Ekonimia Online.

Haxhiu tha se mungesa e furnizimeve me barna dhe materiale mjekësore ka ndikuar në rritjen e listave të pritjes, duke përmendur si shembull situatën në Ortopedi dhe Radiologji.

“Mungesa e furnizimeve të nevojshme me barna e me material mjekësor. Ju e dini që tani veç për proteza dhe material tjetër të nevojshëm mjekësor në Ortopedi po prolongohet pothuajse që një vit e gjysmë, me këtë menjëherë ka rritur listat e pritjes për pacientët. Gjithashtu edhe në sektorë të tjerë. Ato blerje të cilat janë bërë, po marrim shembull të rezonancave magnetike, janë bërë sa për të përfituar nga blerja e tyre. Ju rikujtoj që në vitin 2020 lista e pritjes në Radiologji për rezonancë magnetike ishte zero deri në një javë, ndërsa sot kjo listë e pritjes ka kaluar më shumë se gjashtë deri në tetë muaj. Si është e mundshme që me dy rezonanca magnetike në vitin 2020 të mos ketë listë të pritjes ose të jetë ajo një javë, ndërsa sot me pesë rezonanca magnetike lista e pritjes të jetë kaq e gjatë? Pra kjo tregon për një sistem shëndetësor i cili është marrë me tenderomani për përfitime personale të grupeve të caktuara të interesit dhe jo për të blerë aparaturë e cila kishte me i shërbyer pacientëve dhe që ata të mos prisnin në lista të gjata të pritjes.”, shtoi Haxhiu.

Ai tha se përgjegjës për gjendjen janë Ministria e Shëndetësisë dhe kryeministri, duke i akuzuar se janë fokusuar në renovime dhe jo në përmirësimin e shërbimeve.

“Edhe Ministria e Shëndetësisë edhe vet Kryeministri si Kryetari i Komisionit për Shëndetësi të cilin e ka vetëemëruar veten janë përgjegjës për këtë degradim të sektorit të shëndetësisë. Ata janë marrë kryesisht me disa renovime, fasadime të cilat kanë pasur qëllim përfitimet të grupeve të caktuara të interesit. Gjëra të cilat i kam bërë publike, të njohura për opinionin shumë më herët, me çmime abuzive janë rinovuar klinikat e caktuara me një kualitet jo të duhur, e pas një periudhe menjëherë ato janë demoluar e prishur dhe nuk ka pasur një qasje e cila kishte me ofruar dhe me rritur kualitetin në shërbimeve shëndetësore dhe që ato të jenë efikase në kohë për t’i shërbyer pacientit. Pra nuk ka përmirësim të sektorit të shëndetësisë që i rrit kualitetin e shërbimeve shëndetësore. Ka mungesë të madhe të barnave, dhe ka barna të cilat sot në treg janë me çmime abuzive”, tha ai.

Drejtoria Rajonale e Policisë në Prishtinë ka njoftuar se gjatë javës së kaluar ka realizuar një sërë aktivitetesh policore në kuadër të zbatimit të ligjit dhe rritjes së sigurisë.

Sipas komunikatës, në lokacione të ndryshme dhe përmes aksioneve të ndara janë ekzekutuar gjithsej 105 urdhëresa të gjykatës, prej të cilave 33 kanë qenë për vepra penale, ndërsa pjesa tjetër kanë pasur të bëjnë me kundërvajtje, seanca gjyqësore, verifikime dhe procedura të tjera.

Policia bëri të ditur se, në përputhje me urdhëresat e gjykatës, personat e dënuar me burgim janë dërguar për vuajtjen e dënimit, ndërsa ata që ishin dënuar me gjobë janë liruar pasi kanë përmbushur obligimet e përcaktuara në urdhëresa.

Aktivitetet policore janë shtrirë edhe në fushën e sigurisë publike. Gjatë kësaj periudhe janë sekuestruar 13 armë zjarri të llojeve dhe kalibrave të ndryshëm, si dhe sasi municioni të kalibrave të ndryshëm.

Ndërkohë, edhe kontrollet në trafikun rrugor kanë vazhduar me intensitet. Brenda javës, zyrtarët policorë kanë shqiptuar 3,917 masa administrative me gjobë për shkelje të ndryshme të rregullave të trafikut. Prej tyre, 396 kundërvajtje janë evidentuar përmes veturës inteligjente dhe veturës së pajisur me radar mobil.

Policia ka bërë të ditur se aktivitetet e tilla do të vazhdojnë edhe në ditët në vijim, me synim rritjen e sigurisë publike dhe zbatimin e ligjit.