ATV

Author: K.B.

  • Avni Qenajt i caktohen 30 ditë paraburgim, në Beograd

    Avni Qenajt i caktohen 30 ditë paraburgim, në Beograd

    Ministria e Punëve të Jashtme dhe Diasporës ka njoftuar se autoritetet gjyqësore të Serbisë kanë iniciuar procedurë penale ndaj shtetasit të Republikës së Kosovës, Avni Qenaj, dhe i kanë shqiptuar masën e paraburgimit prej 30 ditësh, me pretendime për krime lufte të vitit 1999.

    Në një njoftim zyrtar, Ministria e Punëve të Jashtme dhe Diasporës ka deklaruar se ky veprim përbën vazhdimësi të praktikave të Serbisë për ndjekje politike ndaj qytetarëve të Kosovës, përmes akuzave të pabazuara dhe të motivuara politikisht.

    Mes të tjerash, në njoftim të MPJD-së thuhet:

    Ministria e Punëve të Jashtme dhe Diasporës, përmes Zyrës Ndërlidhëse në Serbi, do të vazhdojë monitorimin e afërt të këtij rasti dhe do të ndërmarrë të gjitha veprimet e nevojshme diplomatike për të mbrojtur të drejtat e z. Qenaj dhe për të kundërshtuar këto akuza të pambështetura dhe me motiv politik.

    Në kuadër të këtij angazhimi, ambasadori i Republikës së Kosovës në Serbi, Jetish Jashari, dje ka vizituar z. Qenaj në Qendrën e Paraburgimit të Gjykatës së Lartë për Krime të Luftës në Beograd, ku i ka ofruar mbështetjen e plotë institucionale të Qeverisë së Republikës së Kosovës, në përputhje me të drejtën ndërkombëtare dhe standardet e drejtësisë.

    Z. Qenaj ka deklaruar se gjatë qëndrimit në arrest policor i është ushtruar presion psikologjik, por pa keqtrajtim fizik, dhe se as aktualisht nuk ka keqtrajtime nga autoritetet e paraburgimit.

    Ai ka bërë të ditur se ende nuk është vizituar nga familjarët, por pret vizitën e tyre në ditët në vijim. Familjarët e tij kanë angazhuar katër avokatë mbrojtës për përfaqësimin e tij ligjor.

    Z. Qenaj është arrestuar më 26 nëntor 2025 në pikëkalimin kufitar Merdarë, gjatë transitit drejt Bosnjë dhe Hercegovinës, ku familja e tij ka një biznes familjar. Pas arrestimit, ai është mbajtur për 48 orë në Prokuplje dhe më pas është transferuar në Beograd. Më 28 nëntor, ai ka dalë para gjykatësit të procedurës paraprake në Gjykatën e Lartë për Krime të Luftës të Beogradit, ku është njoftuar se Prokuroria e Lartë për Krime të Luftës e Beogradit ka iniciuar procedurë penale kundër tij dhe i është shqiptuar masa e paraburgimit.

  • Specialja ia vazhdon paraburgimin Hashim Thaçit

    Specialja ia vazhdon paraburgimin Hashim Thaçit

    Gjykata Speciale ka njoftuar se në rastin “Thaçi dhe të tjerët” të administrimit të drejtësisë, Hashim Thaçit dhe të tjerëve u është vazhduar paraburgimi.

    “Në vendimin mbi rishikimin e paraburgimit më 3 dhjetor 2025, Gjykatësi i Vetëm urdhëroi vazhdimin e paraburgimit të Hashim Thaçit, Bashkim Smakajt dhe Fadil Fazliut. Gjykatësi Gosnell konstatoi se ekziston rreziku real që të akuzuarit, nëse do të liroheshin, mund të pengojnë ecurinë e procesit dhe të kryejnë vepra penale të tjera”, njofton Specialja.

    Aktakuza kundër të akuzuarve u konfirmua më 29 nëntor dhe u bë publike më 6 dhjetor 2024. Më 3 prill 2025, Paneli i Gjykatës së Apelit miratoi pjesërisht apelin e ZPS-së kundër vendimit të Gjykatëses së Procedurës Paraprake të datës 29 nëntor 2024 për konfirmimin e aktakuzës.

    ZPS-ja kundërshtoi interpretimin e Gjykatëses të nenit 32(3) të Kodit Penal të Kosovës (KPK), me argumentin se ajo gaboi që përjashtoi përgjegjësinë penale të Hashim Thaçit për nxitje bazuar në një keqinterpretim të kritereve të dënimit. Me vendim të shumicës – gjykatësja Jorgensen ishte në mospajtim – Paneli u pajtua se neni 32(3) zbatohet për vepra penale për të cilat shkallëzimi i dënimeve përfshin pesë vjet ose më shumë se pesë vjet, edhe nëse jo dënim minimal. Paneli ia ktheu çështjen Gjykatëses së Procedurës Paraprake për shqyrtim të mëtejshëm.

    Më 14 prill 2025, Gjykatësja e Procedurës Paraprake ndryshoi vendimin e saj duke konfirmuar një formë përgjegjësie penale shtesë për Thaçin në bazë të nenit 32(3) të KPK në akuzat e paraqitura në Pikat 1, 2, dhe 3 të aktakuzës. Ajo urdhëroi ZPS-në të dorëzojë aktakuzën e re të konfirmuar, e cila u dorëzua më 16 prill 2025.

    Sipas Aktakuzës së konfirmuar, së paku midis 12 prillit 2023 dhe 2 nëntorit 2023, gjatë vizitave jo të privilegjuara në objektin e paraburgimit, Hashim Thaçi u dha Smakajt, Kilajt, Fazliut dhe Kuçit informacion konfidencial në lidhje me dëshmitarë të ZPS-së, udhëzime për të ndikuar në dëshmitë e dëshmitarëve të ZPS-së dhe hollësi se si duhej ta bënin këtë.

    Në aktakuzë më tej pretendohet se Thaçi bashkërendoi tri grupe të veçanta, të formuara me Smakajn, me Fazliun dhe me Kilajn, dhe persona të tjerë kundër të cilëve nuk janë ngritur akuza, si dhe me Kuçin, me synimin për të ndikuar në dëshmitë e dëshmitarëve të ZPS-së në kontekstin e gjykimit aktual për krime lufte Thaçi dhe të tjerët.

    Isni Kilaj u arrestua më 2 nëntor 2023 në Kosovë dhe u transferua në njësinë e paraburgimit të DHSK-së më 3 nëntor 2023. Seanca e paraqitjes së parë të Kilajt, si i dyshuar, para Gjykatësit të Vetëm, u mbajt më 4 nëntor 2023, në bazë të nenit 41 të Ligjit dhe rregullës 55 të Rregullores. Në maj 2024, për shkak të vonesave të konsiderueshme të afatit të procedurave, Gjykatësi i Vetëm përcaktoi se zgjatja e paraburgimit të tij do të ishte e paarsyeshme dhe urdhëroi lirimin e Kilajt në Kosovë me kushte të rrepta. Vendimi i Gjykatësit të Vetëm u konfirmua në vijim nga Gjykata e Apelit e DHSK-së. Gjatë gjithë kësaj periudhe ai u konsiderua vetëm si i dyshuar.

    Pas konfirmimit të Aktakuzës kundër pesë të akuzuarve, Isni Kilaj, Bashkim Smakaj dhe Fadil Fazliu u arrestuan nga ZPS-ja më 5 dhjetor dhe u transferuan në objektin e paraburgimit të Dhomave të Specializuara të Kosovës (DHSK) në Hagë më 6 dhjetor 2024. Hashim Thaçit iu dorëzua fletarrestimi në objektin e paraburgimit të DHSK-së më 5 dhjetor, ndërsa Hajredin Kuçit iu dorëzua fletëthirrja për paraqitjen e parë.

    Në paraqitjen e tyre të parë më 8 dhjetor 2023, Thaçi dhe Smakaj nuk u deklaruan në lidhje me fajësinë ose pafajësinë, ndërsa Fazliu u vetëdeklarua i pafajshëm për të gjitha pikat e aktakuzës. Një ditë më vonë, më 9 dhjetor, Kuçi dhe Kilaj u vetëdeklaruan të pafajshëm për të gjitha pikat e aktakuzës.Pasi Thaçi dhe Smakaj vendosën të mos deklarohen lidhur me fajësinë gjatë seancës së 17 dhjetorit 2024, gjykatësja e procedurës paraprake kërkoi që ata të deklarohen në formë të shkruar deri më 7 janar 2025. Më 6 janar 2025, Thaçi dorëzoi njoftimin përmes të cilit u vetëdeklarua i pafajshëm. Vetëdeklarimi i pafajësisë së Bashkim Smakajt u dorëzua më 3 janar ndërsa u bë publike më 14 janar 2025.

    Më 19 shtator 2025, ZPS-ja dorëzoi, si konfidenciale, dosjen e vet paraprake. Më 7 tetor 2025, ZPS-ja e dorëzoi versionin e redaktuar publik të dosjes paraprake të korrigjuar. Më 20 dhe 23 tetor 2025, Fadil Fazliu dhe Hashim Thaçi dorëzuan versionet e redaktuara publike të dosjeve të tyre paraprake.

    Më 11 nëntor 2025, Gjykatësja e Procedurës Paraprake njoftoi Kryetaren se dosja e çështjes do të jetë gati për t’iu kaluar një trupi gjykues më 12 nëntor 2025. Rrjedhimisht, Kryetarja e DHSK-së caktoi gjykatësin e vetëm në gjykimin e kësaj çështjeje. Më 12 nëntor 2025, Gjykatësja e Procedurës Paraprake ia kaloi dosjen e çështjes gjykatësit të vetëm.

    Konferencat për përgatitjen e gjykimit u mbajtën më 28 nëntor 2025.

  • Jori Delli fejohet me reperin italian Fred De Palma

    Jori Delli fejohet me reperin italian Fred De Palma

    Tashmë është zyrtare! Jori Delli i ka thënë “PO” partnerit të saj, reperit italian Fred De Palma. Çifti ka ndarë pak më parë lajmin e gëzueshëm me ndjekësit, duke publikuar disa momente magjike nga fejesa.

    Në fotot e publikuara, modelja shfaqet rrezëllitëse duke treguar unazën me diamant, ndërsa në një shkrepje tjetër shumë romantike, Fred shfaqet duke e puthur në faqe, me Jorin që nuk e fsheh dot lumturinë.

    Mbishkrimi i tyre është i shkurtër por flet shumë: “X SEMPRE” (Përgjithmonë).

    Kur dhe ku ndodhi propozimi?

    Edhe pse çifti zgjodhi ta ndante lajmin mëngjesin e sotëm, një vëzhgim i thjeshtë në profilet e tyre në Instagram zbulon një detaj interesant.

    Nga postimet e bëra në rrjetet sociale, kuptohet qartë se dyshja ka qenë duke shijuar pushimet në parajsën e Maldiveve rreth një javë më parë. Kjo lë të kuptohet se propozimi romantik ka ndodhur pikërisht gjatë atyre ditëve të relaksit, larg zhurmës mediatike, dhe dyshja ka pritur momentin e duhur për ta bërë publike unazën pasi janë rikthyer.

    Çifti duket më i dashuruar se kurrë dhe ky hap vjen si konfirmim i lidhjes së tyre të fortë që ka rrëmbyer zemrat e fansave si në Shqipëri, ashtu edhe në Itali.

     

     

    View this post on Instagram

     

    A post shared by Jori 🧿🧿🧿 (@joridelli)

  • KQZ mblidhet sërish sot, ky është rendi i ditës

    KQZ mblidhet sërish sot, ky është rendi i ditës

    Komisioni Qendror i Zgjedhjeve do të mblidhet sërish sot për përgatitjet mbi zgjedhjet e 28 dhjetorit, shkruan Reporteri.net.

    Fillimisht do të bëhet certifikimi i rezultateve përfundimtare për Kuvendin Komunal në Istog, për zgjedhjet e 12 tetorit.

    Pastaj janë pikat për zgjedhjet e dhjetorit:

    -Shqyrtimi dhe miratimi i Procedurës së votimit dhe numërimit në vendvotim;

    – Shqyrtimi dhe miratimi i Procedurës së Qendrës Komunale të Numërimit;

    – Shqyrtimi dhe miratimi i korikulës së trajnimit “Trajnimi i trajnerëve”.

    – Shqyrtimi dhe miratimi i programit të trajnimit për trupat menaxhuese të zgjedhjeve dhe stafin zgjedhor për Zgjedhjet e parakohshme për Kuvendin e Republikës së Kosovës, 28.12.2025;

    Mbledhja do të mbahet në orën 15:00.

  • Sa kafe duhet të pimë në ditë?

    Sa kafe duhet të pimë në ditë?

    Gjatë shekullit të 17-të, pirja e kafesë dënohej me vdekje. Në atë kohë, besohej se kishte efekte që ndryshonin mendjen. Për fat të mirë, tani ne mund të pimë kafe sa të duam, dhe shumëllojshmëria e përbërjeve që përmban është provuar se ndihmojnë shëndetin tonë.

    Por ende ka shumë diskutime rreth asaj se sa kafe është e sigurt për të pirë gjatë një dite. Por sa filxhanë kafe janë të mirë për trupin tonë dhe sa janë më shumë seç duhet.

    Sasia e duhur e kafesë ndihmon zemrën tuaj.

    Një grup shkencëtarësh nga Gjermania kanë zbuluar se kafeina bën që qelizat në enët tona të gjakut të reagojnë në një mënyrë të caktuar. Përmirëson mënyrën e funksionimit të këtyre qelizave dhe i bën ato të performojnë si më të reja. Studiuesit besojnë se sasia optimale e kafesë që na duhet për ta mbajtur zemrën më të re për më gjatë është 4 filxhanë në ditë.

    Konsumatorët e kafesë jetojnë më gjatë.

    Gjatë viteve, studiuesit kanë vërejtur se konsumuesit e rregullt të kafesë kanë më pak të ngjarë të preken nga kushte të ndryshme shëndetësore. Lista përfshin sëmundjet e zemrës, goditjet në tru, lëndimet, sëmundjet e frymëmarrjes, infeksionet dhe diabetin.

    Një studim masiv i 400,000 njerëzve në SHBA. zbuloi se njerëzit që pinë kafe çdo ditë kishin më pak të ngjarë të vdisnin nga ndonjë shkak sesa njerëzit që ndërpresin kafeinën.

    Por mos e teproni!

    Njerëzit që pinë rregullisht shumë kafe mund të pësojnë disa ndërlikime shëndetësore. Pirja e më shumë se 6 filxhanëve ekspres çdo ditë mund të rrisë rrezikun e sëmundjes së zemrës deri në 22%, sipas një studimi.

    Çfarë e bën kafenë tuaj jo të shëndetshme?

    Nëse jeni duke pirë më shumë se 6 filxhanë kafe në ditë, nuk është vetëm kafeina që mund të jetë e dëmshme për shëndetin tuaj. Shumë adhurues të kafesë ngarkojnë pijet e tyre me sheqer dhe krem ​​që shtojnë kalori dhe yndyrë, të cilat nga ana tjetër mund të shkaktojnë komplikacione të mundshme shëndetësore.

    Është e vërtetë që sasia e duhur e kafesë së zezë zvogëlon rrezikun e diabetit, por, duke shtuar ëmbëlsues, krem ​​dhe aromatizues mund të rrisni nivelet e sheqerit në gjak.

    Duhet të keni parasysh që kafeja nuk është burimi i vetëm i kafeinës. Mund të gjendet gjithashtu në çajra dhe ushqime të tjera.

  • Skandali i korrupsionit që tronditi Brukselin – çfarë bashkëpunimi kishte Mogherini me institucionet e Serbisë?

    Skandali i korrupsionit që tronditi Brukselin – çfarë bashkëpunimi kishte Mogherini me institucionet e Serbisë?

    Ish-përfaqësuesja e lartë e Bashkimit Evropian për Politikë të Jashtme dhe Siguri, Federica Mogherini, është në qendër të një prej skandaleve më të mëdha kundër korrupsionit në institucionet e BE-së në dekadën e fundit.

    Prokuroria belge edhe zyrtarisht e ka akuzar për mashtrime procedurale, korrupsion, konflikt interesi dhe shkelje të sekretit zyrtar, në lidhje me tenderin për trajnimin e diplomatëve të rinj në kuadër të EU Diplomatic Academy – akademisë që drejtohej nga College of Europe, raporton nova.rs.

    Akademia filloi si një pilot projekt më 2022 për të bashkuar trajnime për diplomatë, zyrtarë të institucioneve evropiane dhe ekspertë nga vendet kandidate; por tani, faza e institucionalizimit të saj po vlerësohet me dyshime serioze – prokuroria heton nëse tenderi ishte i manipuluar për t’i favorizuar College of Europe.

    Në Serbi, vëmendje të veçantë ngjalli fakti se vetëm pak muaj përpara arrestimit të ish-lehtësuesja e dialogut Kosovë-Serbi, ajo kishte nënshkruar një memorandum bashkëpunimi me Telekom Serbia.

    Bashkëpunimi i tyre filloi në vitin 2023 me nënshkrimin e një memorandumi mirëkuptimi midis Mogherinit dhe Vladimir Luçiqit. Telekomi siguroi bursa për studentët serbë që dëshirojnë të ndjekin programet pasdiplomike në Akademinë Diplomatike në Bryzh dhe Tiranë. Financimi përfshinte shkollimin, qëndrimin dhe aktivitetet akademike, dhe programi u paraqit si pjesë e kontributit strategjik për integrimin evropian të Serbisë.

    Në janar të vitit 2025, gjatë një takimi në Bruksel, u ra dakord që Telekomi të siguronte edhe dhjetë bursa të tjera, gjë që u paraqit si “investimi më i madh i Telekomit në programet evropiane arsimore deri më tani”.

    Pas arrestimit të Mogherinit, shtrohet edhe pyetja: a do ta përfshijë hetimi edhe natyrën e marrëdhënies së saj me Telekom Srbija, veçanërisht duke pasur parasysh se ky program ishte një nga partneritetet arsimore më të promovuara të kompanisë shtetërore serbe jashtë vendit? Edhe pse aktualisht nuk ka indikacione formale që Telekomi të jetë pjesë e hetimit, fakti që Mogherini pak para shpërthimit të aferës e zgjeroi bashkëpunimin me kompaninë shtetërore serbe, hap hapësirë për pyetje të reja.

    Në nëntor të vitit 2024, Mogerini qëndroi në një vizitë dyditore në Beograd, ku promovoi programet e Kolegjit të Evropës dhe u takua me presidentin, Aleksandar Vuçiq.

    Gjatë kësaj vizite ajo dërgoi disa mesazhe politike, përfshirë edhe komentin se “ata që festojnë fitoren e Donald Trump do ta kuptojnë shumë shpejt se nuk do ta kenë të lehtë”.

    Takimin me Vuçiqin e pranoi edhe Vladimir Luçiq, gjë që tregon më tej intensitetin e partneritetit mes Kolegjit dhe Telekomit.

  • Lushtaku komenton rikthimin e Lladrovcit në PDK: Personalisht nuk e konsideroj pjesë të partisë

    Lushtaku komenton rikthimin e Lladrovcit në PDK: Personalisht nuk e konsideroj pjesë të partisë

    Kryetari i Skenderajt, Sami Lushtaku, ka folur edhe për zhvillimet e fundit brenda Partisë Demokratike të Kosovës, përfshirë rikthimin e Ramiz Lladrovcit në këtë subjekt politik.

    Ky vendim ka ngjallur reagime brenda degëve lokale dhe ka hapur debat për konsolidimin e PDK-së në prag të procesit të ri politik në vend.

    I pyetur pas betimit të tij për mandatin e ri, Lushtaku deklaroi hapur se qëndrimi i tij personal në lidhje me Lladrovcin mbetet i pandryshuar, pavarësisht vendimit zyrtar të partisë për ta rikthyer atë në strukturat e saj.

    “Mendimet asnjëherë nuk i ndryshoj. Për mua, Lladrovci nuk është PDK, por unë i respektoj vendimet e kryetarit dhe kryesisë së partisë”, tha Lushtaku, duke nënvizuar se dallimet e tij me Lladrovcin janë të njohura dhe nuk kanë ndryshuar me kalimin e viteve, përcjell Telegrafi.

    Ai shtoi se, pavarësisht rezervave personale, është i gatshëm të respektojë hierarkinë e partisë dhe vendimmarrjen kolektive, duke sinjalizuar se nuk do të krijojë tensione të reja brenda degës së Skenderajt.

    Deklaratat e Lushtakut vijnë në një moment kur PDK-ja po tenton të paraqitet e unifikuar para opinionit publik, ndërsa rikthimi i disa figurave të vjetra është parë si përpjekje për forcimin e partisë. Megjithatë, vërehet se dinamika e brendshme vazhdon të jetë e ndjeshme, sidomos në zonat ku figurat politike kanë histori të gjata rivalitetesh.

    Me këtë qëndrim, Lushtaku la të kuptohet se edhe pse është i gatshëm të punojë në kuadër të vendimeve zyrtare, distanca e tij politike ndaj Lladrovcit mbetet e qartë.

  • Durmishi: Nga e hëna fillojmë mirëmbajtjen dhe sanimin e gropave në të gjitha rrugët

    Durmishi: Nga e hëna fillojmë mirëmbajtjen dhe sanimin e gropave në të gjitha rrugët

    Ushtruesi i detyrës së ministrit në detyrë të Infrastrukturës, Hysen Durmishi ka njoftuar se nga e hëna do të fillohet me mirëmbajtjen dhe sanimin e gropave në të gjitha rrugët që është në kompetencës e Ministrisë që drejton ai, gjithashtu njoftoi se tashmë janë përgatitur për sezonin e dimrit.

    Në një njoftim në rrjetet sociale, Durmishi bëri të ditur takimin së bashku me drejtorin e Departamentit për Menaxhimin e Rrugëve, Qamil Feka, dhe me menaxherët e kontratave të mirëmbajtjes dhe me punëkryesit. Në takim morën pjesë, gjithashtu, edhe zyrtarë të Policisë së Kosovës, nga Departamenti për Menaxhimin e Trafikut Rrugor, Jeton Rexhepi.

    Ai shtoi se bashkëpunimi ndërinstitucional është kyç për më shumë siguri në rrugë dhe qarkullim më të lehtë.

    “Nga e hëna fillojmë mirëmbajtjen dhe sanimin e gropave në të gjitha rrugët që janë në kompetencë të Ministrisë sonë. Përveç sanimit të gropave, njoftojmë edhe një herë qytetarët se jemi të përgatitur për sezonën e dimrit. Kujdesi i shtuar në komunikacion mbetet gjithmonë i nevojshëm”, ka shkruar Durmishi.

  • Kusari për deklaratën e Lushtakut ndaj Adriana Matoshit: E papranueshme dhe e rrezikshme

    Kusari për deklaratën e Lushtakut ndaj Adriana Matoshit: E papranueshme dhe e rrezikshme

    Aktivistja Flutura Kusari ka reaguar ndaj gjuhës së kryetarit të Skenderajt, Sami Lushtaku, për deputetën e VV-së, Adriana Matoshit.

    Ajo ka thënë se shprehjet e tij janë të paparanushme dhe të rrezikshme.

    “Shprehjet e Sami Lushtakut drejtuar Adriana Matoshit jane te tmerrshme, te papranueshme dhe te rrezikshme per krejt grate qe jane prezente ne domenin publik!” – ka shkruar Kusari.

    Në anën tjetër Lushtaku ka thënë: “Ajo është niveli i saj, sikur kur del prej një shtëpie publike, e jo si një deputete që ka përgjegjësi për fjalën që flet me qytetarët. Prandaj, mendoj se edhe zonja Matoshi edhe do zonja tjera duhet të kenë kujdes se çka flasin sepse mendoj se fjala e tyre është bajagi me peshë.”

  • Specialja në Hagë vendos për vazhdimin e paraburgimit të Hashim Thaçit

    Specialja në Hagë vendos për vazhdimin e paraburgimit të Hashim Thaçit

    Gjykata Speciale në Hagë ka vendosur që Hashim Thaçi t’i vazhdohet paraburgimi, duke theksuar se bazat ligjore për qëndrimin e tij në qendrat e paraburgimit vazhdojnë të jenë të vlefshme edhe pas shqyrtimit më të fundit.

    Sipas gjykatës, rreziqet e parashikuara në Nenin 41(6)(b) – rreziku i arratisjes, mundësia e pengimit të procedurës dhe rreziku i kryerjes së veprave të reja penale – vazhdojnë të ekzistojnë dhe nuk mund të zbuten përmes masave më të lehta se paraburgimi.

    Zyra e Prokurorit të Specializuar ka thënë se asnjë kusht lirimi nuk i adreson në mënyrë të sigurt këto rreziqe, ndërsa Mbrojtja kërkoi rivlerësim duke theksuar ndryshimet e rrethanave pas përfundimit të fazës së provave në rastin kryesor të vitit 2020.

    “Zyra e Prokurorit të Specializuar kërkon vazhdimin e paraburgimit të z. Thaçi, me arsyetimin se nuk ka dalë asnjë rrethanë apo informacion i ri që do të minonte gjetjet e Gjyqtarit të Procedurës Paraprake në Vendimin e Shqyrtimit të Pestë. Më konkretisht, ZPS-ja thekson se vazhdimi i paraburgimit mbetet i domosdoshëm pasi të tre rreziqet sipas nenit 41(6)(b) vazhdojnë të jenë të pranishme. Po ashtu, sipas ZPS-së, asnjë kusht i mundshëm lirimi nuk do t’i zbusë në mënyrë të përshtatshme këto rreziqe, të cilat mund të menaxhohen vetëm në Qendrat e Paraburgimit të Dhomave të Specializuara. Së fundmi, ZPS-ja argumenton se paraburgimi i vazhdueshëm i z. Thaçi mbetet proporcional, duke pasur parasysh kohën e kufizuar që ka kaluar, dënimin potencialisht të gjatë me të cilin ai përballet dhe progresin e procedurave aktuale”.

    Gjykatësi ka theksuar se ky shqyrtim është bërë nga e para (“de novo”), por se nuk janë paraqitur ndryshime të mjaftueshme që do të justifikonin lirimin e ish-presidentit në këtë fazë.

    Gjykata ka caktuar edhe afatet e reja procedurale, Thaçi, nëse dëshiron, mund të paraqesë parashtresa të reja deri më 13 janar 2026, ora 16:00. Nëse ai nuk paraqet parashtresa, ZPS-ja duhet të dorëzojë qëndrimin e saj deri më 20 janar 2026, ora 16:00.

    Më pas, Thaçi mund të përgjigjet deri më 27 janar 2026, ora 16:00.

    Në të njëjtin vendim, masa e paraburgimit është vazhduar edhe për Bashkim Smakajn dhe Fadil Fazliun, të cilët akuzohen për vepra kundër administrimit të drejtësisë.

    Thaçi po përballet me dy procese të ndara në Hagë, një për krime lufte, që ka nisur që nga viti 2020, dhe një tjetër për pengim të drejtësisë.