Author: G.O.

Ministri në detyrë i Financave Hekuran Murati ka njoftuar se është hapur aplikimi për certifikim të ofruesve të arkave fiskale digjitale.

Murati përmes një postimi në profilin e tij në rrjetin social Facebook, ka publikuar edhe linkun ku mund të aplikohet.

Postimi i tij:

Hapet aplikimi për certifikim të ofruesve të arkave fiskale digjitale!

Të gjithë operatorët ekonomikë që janë të interesuar të aplikojnë si ofrues të arkave fiskale digjitale për bizneset (SEF), mund të aplikojnë për t’u certifikuar në linkun në vijim https://apps.atk-ks.org/sefaplikimi/

Gjykata Supreme e Kosovës ka reaguar ndaj raportimeve të fundit në media, duke sqaruar se vendimi i fundit i Gjykatës Kushtetuese nuk ka të bëjë me aktgjykimin e saj për liberalizimin e tregut të energjisë elektrike dhe kërkesëpadinë e Odës Ekonomike të Kosovës (OEK).

Përmes një komunikate, Supremeja thekson se pretendimet se “Gjykata Kushtetuese ka rrëzuar vendimin e Gjykatës Supreme për tregun e lirë të energjisë” janë të pasakta. Sipas saj, vendimi i Kushtetueses i referohet një aktvendimi tjetër të Gjykatës Supreme, me të cilin ishte hedhur poshtë si e palejueshme një padi administrative e një paditësi tjetër.

“Vendimi i Gjykatës Kushtetuese nuk i referohet aktgjykimit P.A.nr.18/2025, me të cilin ishte aprovuar padia administrative e Odës Ekonomike të Kosovës kundër Zyrës së Rregullatorit për Energji (ZRRE)”, thuhet në sqarimin e Gjykatës Supreme.

Institucioni gjyqësor rikujton se aktgjykimi P.A.nr.18/2025 mbetet në fuqi dhe paraqet një çështje të veçantë, e cila nuk është objekt i vendimit të fundit të Kushtetueses.

Postimi i plotë:

Sqarim lidhur me vendimin e Gjykatës Kushtetuese për kthimin në rishqyrtim të vendimit të Gjykatës Supreme për tregun e lirë të energjisë elektrike

Prishtinë, 4 qershor 2026 – Gjykata Supreme e Kosovës informon opinionin publik se raportimet sipas të cilave “Gjykata Kushtetuese ka rrëzuar vendimin e Gjykatës Supreme për tregun e lirë të energjisë dhe e ka kthyer çështjen në rishqyrtim”, nuk i referohen aktgjykimit të Gjykatës Supreme me të cilin ishte aprovuar padia administrative e Odës Ekonomike të Kosovës (OEK) lidhur me liberalizimin e tregut të energjisë elektrike.

Për sqarim, vendimi i Gjykatës Kushtetuese ka të bëjë me një aktvendim tjetër të Gjykatës Supreme, përmes të cilit ishte hedhur poshtë si e palejueshme padia e një paditësi, me arsyetimin se akti i kontestuar nuk përmbante elementet e një akti nënligjor normativ dhe, rrjedhimisht, nuk ishin plotësuar kushtet ligjore për shqyrtimin e tij në procedurë administrative.

Linku i aktvendimit të kthyer në rivendosje:

Ndërkaq, aktgjykimi i Gjykatës Supreme P.A.nr.18/2025, i cili ka të bëjë me kërkesëpadinë e Odës Ekonomike të Kosovës kundër Zyrës së Rregullatorit për Energji (ZRRE), mbetet një çështje e veçantë dhe nuk është objekt i vendimit të Gjykatës Kushtetuese për të cilin po raportohet.

Me këtë aktgjykim, Gjykata Supreme kishte aprovuar si të bazuar kërkesëpadinë e OEK-së dhe kishte:

shpallur të paligjshëm dhe shfuqizuar nenin 8 të Udhëzuesit për Liberalizimin e Tregut të Energjisë Elektrike, të datës 18 janar 2017;

shpallur të paligjshëm dhe shfuqizuar nenin 2 të Udhëzuesit për Ndryshimin dhe Plotësimin e Udhëzuesit për Liberalizimin e Tregut të Energjisë Elektrike në Kosovë.

Linku i aktgjykimit:

Në arsyetimin e këtij aktgjykimi, Gjykata Supreme kishte konstatuar se mospërputhjet ndërmjet dispozitave ligjore dhe dispozitave të akteve nënligjore normative kishin krijuar pasiguri juridike dhe ekonomike për konsumatorët e energjisë elektrike. Sipas vlerësimit të gjykatës, kjo situatë e bënte të domosdoshme ndërhyrjen gjyqësore për interpretim të unifikuar të normave dhe për mbrojtjen e parimit të sigurisë juridike, si dhe të trajtimit të barabartë në tregun e energjisë elektrike.

Për hir të informimit të drejtë, të saktë dhe të plotë të opinionit publik, ju ftojmë që ta publikoni këtë sqarim.

Presidenti i Serbisë, Aleksandar Vuçiq, ka konfirmuar se do të udhëtojë për në Mal të Zi për të marrë pjesë samitin e Bashkimit Evropian dhe vendeve të Ballkanit Perëndimor.

“Po shkoj në Mal të Zi. Është shumë e rëndësishme që atje ta përfaqësoj Serbinë”, tha Vuçiq gjatë një konference të përbashkët për media me presidentin e Këshillit Evropian, Antonio Costa.

Ky konfirmim vjen në një kohë të tensioneve të rritura mes Beogradit dhe Podgoricës si dhe pas porosisë nga shërbimi serb i inteligjencës se Vuçiqi nuk duhet të shkojë në Mal të Zi, për shkak të rreziqeve të sigurisë.

Vuçiq tha se është i informuar për njoftimin e Agjencisë së Sigurisë dhe Informacionit të Serbisë (BIA), e cila e ka këshilluar të mos udhëtojë në Mal të Zi për shkak të, siç u tha, “veprimit armiqësor të shërbimeve të huaja dhe klaneve kriminale” në atë vend.

Ai shtoi se për çështje të tjera do të flasë në Mal të Zi.

Policia e Kosovës, ka njoftuar se gjatë 24 orëve të fundit, ka shqiptuar 2248 gjoba trafiku.

Në raport shtohet edhe se, gjatë kësaj kohe janë raportuar 19 aksidente me të lënduar, ndërsa, 30 me dëme materiale.

Po ashtu, shtohet se janë arrestuar 14 persona, ku, 3 janë dërguar në mbajtje.

Presidenti i Këshillit Evropian, Antonio Costa, tha gjatë vizitës në Prishtinë se dialogu i Kosovës me Serbinë mbetet “prioritet thelbësor” për sigurinë dhe prosperitetin rajonal.

“Normalizimi është thelbësor për të ardhmen evropiane si të Kosovës ashtu edhe të Serbisë. Duhet të ndërtojmë mbi të dhe të sigurojmë zbatimin e plotë të Marrëveshjes së Ohrit”, tha Costa.

Zyrtari i lartë i Brukselit rikonfirmoi gjithashtu se “e ardhmja e Kosovës është në Bashkimin Evropian”.

Ish-kryetari i Aleancës për Ardhmërinë e Kosovës, Ramush Haradinaj ka thënë se mbështesin protestën e Këshillit Studentor të Fakultetit të Filologjisë në mbrojtje të përdorimit të gjuhës shqipe në provimet shtetërore në Maqedoninë e Veriut, e cila do të mbahet të premtën në Prishtinë.

Përmes, një postimi në profilin e tij në rrjetin social Facebook, Haradinaj ka thënë se e drejta themelore për përdorimin e gjuhës shqipe, e garantuar me Kushtetutë, është e pacenueshme dhe nuk duhet të vihet në pikëpyetje nga askush. Çdo përpjekje për ta cenuar atë përbën shkelje të rëndë të të drejtave themelore.

Postimi i tij i plotë:

Mbështesim protestën e studentëve në kërkesat e tyre të drejta për mbrojtjen e gjuhës shqipe në Maqedoninë e Veriut. Nesër, në ora 14:00, në Prishtinë.

E drejta themelore për përdorimin e gjuhës shqipe, e garantuar me Kushtetutë, është e pacenueshme dhe nuk duhet të vihet në pikëpyetje nga askush. Çdo përpjekje për ta cenuar atë përbën shkelje të rëndë të të drejtave themelore.

Jemi krah studentëve shqiptarë në Maqedoninë e Veriut, në kërkesat e tyre të drejta dhe legjitime.

Një person ka raportuar se një grua është larguar nga shtëpia dhe ende nuk është kthyer.

Sipas raportit 24 orësh të Policisë së Kosoëvs bëhet e ditur se rasti ka ndodhur më 02.06.2026, në Vushtrri.

Tutje bëhet e ditur se lidhur me rastin eshte njoftuar prokurori kujdestar, ndersa rasti po hetohet nga ekipet kompetente.

“Vushtrri / 02.06.2026 – 09:00. Ankuesi mashkull kosobar ka raportuar se viktima femer kosovare është larguar nga shtepia dhe ende nuk është kthyer. Lidhur me rastin eshte njoftuar prokurori kujdestar, ndersa rasti po hetohet nga ekipet kompetente”, thuhet në raport. /Telegrafi/

Dhoma e Përfaqësuesve e SHBA-së ka miratuar një masë që synon të ndalojë presidentin, Donald Trump nga ndërmarrja e veprimeve të mëtejshme ushtarake kundër Iranit.

Votimi me rezultat 215–208 ishte i suksesshëm pasi katër republikanë iu bashkuan demokratëve në një shfaqje publike kundërshtimi ndaj luftës, e cila filloi në shkurt.

Ky është përpjekja e katërt e Dhomës së Përfaqësuesve për të kufizuar kompetencat e Trumpit për zhvillimin e luftës, për të cilën kritikët thonë se nuk e kanë miratimin e Kongresit.

Kryesuesi i Këshillit Gjyqësor të Kosovës, Rrustem Thaqi, ka pritur në takim Shefen në Detyrë të Zyrës së Bashkimit Evropian në Kosovë, Eva Palatova.

Sipas një njoftimi për media, Thaqi dhe Palatova diskutuan për zhvillimet në sistemin gjyqësor dhe bashkëpunimin ndërinstitucional.

“Fillimisht, Palatova e uroi Kryesuesin Thaqi për zgjedhjen në krye të KGJK-së, duke i dëshiruar suksese në ushtrimin e mandatit dhe në zhvillimin e mëtejmë të sistemit gjyqësor në Kosovë.

Kryesuesi Thaqi falënderoi shefen në detyrë të Zyrës së Bashkimit Evropian në Kosovë për përkrahjen e vazhdueshme ndaj institucioneve të drejtësisë, duke theksuar rëndësinë e bashkëpunimit në funksion të rritjes së efikasitetit, transparencës dhe besimit të qytetarëve në sistemin gjyqësor.

Nga ana tjetër, znj. Palatova ritheksoi përkushtimin e Zyrës së Bashkimit Evropian në Kosovë për të vazhduar mbështetjen ndaj institucioneve të drejtësisë dhe proceseve reformuese në vend.

Të dy bashkëbiseduesit vlerësuan rëndësinë e bashkëpunimit dhe konfirmuan angazhimin në drejtim të avancimit të mëtejmë të këtyre proceseve me qëllim forcimin e sundimit të ligjit, jetësimin e proceseve reformuese në drejtësi si dhe realizimin e Agjendës Legjislative dhe asaj evropiane të reformave”, thuhet në njoftim.