Author: G.O.

Një i mitur është plagosur ditën e së enjtes në Istog.

Policia pas marrjes së kësaj nformate, kanë dalë në vendin e ngjarjes, përkatësisht në një poligon të armëve, ku kanë arrestuar një të dyshuar.

“Stacioni Policor nё Istog, me datё 22.08.2024, rreth orёs 16:00, ёshtё njoftuar nga QKMF-Istog, se ёshtё paraqitur njё person (i mitur), i cili ishte plagosur me armё zjarri. Njësitet relevante kanё dalё ne vendin e ngjarjes, ne njё Poligon tё Armёve nё qytetin e Istogut, ёshtё arrestuar i dyshuari nga i cili ёshtё sekuestruar arma, dhe pas intervistimit me urdhёr tё Prokurorit tё shtetit ёshtё dёrguar nё mbajtje pёr 48 orё”, thuhet në kumtesën e policisë.

Edona Maloku-Bërdyna është emëruar ambasadore e re e Kosovës në Portugali.

Për këtë ka njoftuar ministrja e Jashme Donika Gërvalla.

“Edona Maloku Bërdyna është një figurë e shquar në shkencat sociale, me një karrierë që bashkon hulumtimin akademik, praktikën e aplikuar dhe zhvillimin e politikave në nivel kombëtar dhe ndërkombëtar. Ajo ka doktoraturë në Psikologji/Shkenca Sociale nga Universiteti Leiden në Holandë, ku edhe ka përfunduar Masterin e Shkencave me vlerësimin më të lartë të dhënë në universitetet holandeze (Cum Laude)”, ka shkruar Gërvalla në Facebook.

Ajo ka thënë se puna e Maloku-Bërdynës është njohur dhe vlerësuar në shkallë globale, “duke përfshirë çmimin prestigjioz Otto Klineberg dhe disa njohje ndërkombëtare për ndikimin e saj në ndryshimin social dhe drejtësinë shoqërore”.

“Me këtë përvojë të pasur dhe vizion të qartë, jemi të bindur se nën drejtimin e saj, marrëdhëniet e Kosovës me Portugalinë do të arrijnë nivele të reja të zhvillimit dhe bashkëpunimit. Në arsim, kulturë, ekonomi dhe fusha të tjera kyçe, Maloku Bërdyna do të sjellë një perspektivë të freskët dhe energji të reja për të fuqizuar këto lidhje”, ka shkrua ajo.

Gërvalla ka falënderuar ambasadorin e deritashëm për punën. “Një falënderim për Ambasadorin e deritanishëm, Ylber Kryeziu, për angazhimin dhe kontributin e tij gjatë këtij shërbimi jashtë vendit”, ka shkruar Gërvalla.

Gjykata Themelore në Prishtinë, i ka caktuar masën e paraburgimit prej një muaji të dyshuarës N.M, 56-vjeçare për vrasjen e kunatit të saj XH.M, të ndodhur mbrëmjen e 20 gushtit në lagjen Kodra e Trimave në Prishtinë.

Ajo dyshohet për vrasje të rendë dhe armëmbajtje pa leje, ku thuhet se në korridorin e shtëpisë së saj ka shtënë 10 herë ndaj viktimës.

Prokuroria Themelore në Prishtinë, Departamenti për Krime, kërkesën për caktimin e masës së paraburgimit, e ka arsyetuar mbi arsyet ligjore pasi ekziston dyshimi i bazuar se e pandehura ka kryer veprën penale që i vihet në barrë.

Prokuroria, në seancën dëgjimore të mbajtur me 21 gusht 2024, ka thënë se këtë dyshim e mbështetë në prova siç janë raporti i Policisë, deklaratat e dëshmitareve e palës së dëmtuar.

Sipas Prokurorisë, ekziston rreziku se nëse e pandehura lihet në liri do ta pengojnë zhvillimin e suksesshëm të hetimeve, duke ndikuar në dëshmitaret të cilët kjo prokurori ende nuk i ka dëgjuar. Po ashtu, Prokuroria ka arsyetuar se duke u nisur nga pesha e veprës penale dhe mënyra e kryerjes, raportet-problemet familjarë ekziston rreziku se e njëjta mund të përsërisë veprën penale.

Andaj, sipas prokurorisë është e nevojshme që t’i caktohet masa e paraburgimit pasi me asnjë mase alternative nuk do të arrihet të sigurohet prania e saj në këtë çështje penale.

Mbrojtësi i të dyshuarës, avokati Hysen Berisha, ka kërkuar masë me të butë, siç është paraqitja në stacion policor, apo masa e arrestit shtëpiak duke thënë që e pandehura nuk ka mundësi që të ndikojë në dëshmitarë dhe as në prova materiale sepse të gjitha këto janë në dispozicion të organit të Policisë dhe të Prokurorisë.

E dyshuara, N.M para gjykatës është deklaruar se është me terapi për shërimin e sëmundjes dhe se ka probleme pasi është e traumatizuar

Ajo gjithashtu kishte deklaruar se nuk kishte fjetur gjithë natën prej kanosjes dhe kërcënimeve të vazhdueshme nga burri dhe kunati saj, kjo pasi që burri i saj kishte qenë i ndikuar nga kunati, ku edhe e kanë sharë dhe ofenduar vazhdimisht.

Ajo kishte shtuar se ka pasur ankth dhe depresion, për çka edhe ishte trajtuar dhe ka të gjitha dokumentet mjekësore.

Gjykatësja e procedurës paraprake, Fatime Dërmaku caktimin e masës së paraburgimit e ka arsyetuar duke thënë se propozimi i Prokurorisë i bazuar, bindës dhe mjaftueshëm i argumentuar për këtë fazë. Kurse, mbrojtësi i të pandehurës nuk ka bindur gjykatën për masa alternative.

Gjykata ka vlerësuar se përmbushet kushti kryesor se në këtë stad të procedurës ka dyshim të bazuar se pandehura N.M ka kryer veprat penale për të cilat dyshohet.

Për caktimin e paraburgimit, sipas vendimit të gjykatës ka arsye të besueshme se e dyshuara do të pengojë rrjedhën e procedurës penale dhe ekziston rreziku i ndikimit tek dëshmitaret, ngase i ka familjar dhe do mundohet t’i manipulojë që të dëshmojnë në favor të saj. Gjithashtu, edhe provat e tjera materiale ka mundësi që do t’i asgjësonte apo t’i fshehë, që t’i ikë përgjegjësisë penale.

Gjykata vlerëson se janë përmbushur edhe kriteret tjera e që janë rrethanat e kryerjes së veprës penale.

“E dyshuara e ka pasur kunat, vëlla të burrit të saj, si dhe karakteristikat e saj personale, që në vazhdimësi gjatë seancës dëgjimore në mënyrë shumë profesionale tenton gjykatën ta vë në lajthim lidhur me gjendjen e saj shëndetësore për t’i ikur përgjegjësisë së rëndë penale”, thuhet në arsyetimin e gjykatës.

Sipas vendimit për caktimin e paraburgimit, e pandehura dyshohet se në korridorin e shtëpisë së tyre, për shkak të problemeve familjare, e pandehura me dashje që ta privojë nga jeta kunatin e saj, tani të ndjerin Xh.M ka shtënë në drejtim të tij dhjetë herë me armën e tipit “Girson Compakt MC” ku si pasojë e plagëve të marra i dëmtuari ka ndërruar jetë në vendin e ngjarjes.

E pandehura, kishte deklaruar se ka aplikuar për marrjen e lejes së armës, e që në kohën e kryerjes së veprës penale ende nuk e kishte poseduar.

“…Fakt që përcakton edhe karakterin e të pandehurës lidhur me posedimin dhe kontrollimin e armës në shtëpinë e saj, të familjarët e saj, pasi e njëjta nuk kishte pasur ndonjë pozitë të lartë shtetërore, apo të ishte afariste e njohur, apo që do të ishte person i rrezikuar të posedonte armë”, thuhet tutje në arsyetim.

Andaj, sipas gjykatës këto janë rrethana të arsyeshme për caktimin e masës së paraburgimit./BetimipërDrejtësi

Gjykata Supreme e Maqedonisë së Veriut ka shfuqizuar vendimin e Penales lidhur me lëndën për ekstradimin e ish-ushtarit të UÇK-së, Blerim Ramadanit.

Sipas njoftimit, veprimi dhe marrja e vendimit të tillë në gjykatën e shkallës së parë, sipas vlerësimit të Gjykatës Supreme është e paqartë dhe e pakuptueshme, pa arsye relevante nga të cilat këshilli është bazuar gjatë marrjes së vendimit, raporton AlsatM.

“Këshilli Penal pranë sektorit të krimit të organizuar dhe korrupsionit në kuadër të Gjykatës Penale-Shkup, gjatë marrjes së vendimit, me të cilin ka konstatuar se nuk janë përmbushur parakushtet ligjore për ekstradim, nuk ka dhënë arsyetim se në cilat shkaqe është bazuar kur ka pranuar që vendimi i filluar në pajtim me nenin 75 alineja 1 nga Ligji i bashkëpunimit Ndërkombëtar në materialin penal, si procedurë e shkurtuar të udhëhiqet si procedurë e rregullt në pajtim me nenin 68 lidhur me nenin 51 nga ligji i njëjtë”, theksohet në arsyetimin e Supremes.

“Gjatë veprimit të serishëm, gjykata e shkallës së parë është e obliguar që t’i marrë parasysh vërejtjet e theksuara, si dhe përcaktimet e Ligjit për Bashkëpunim Ndërkombëtar në materialin penal dhe Konventën Evropiane për Ekstradim me Protokollin e parë dhe të dytë shtesë lidhur me Ligjin për ratifikimin e protokollit të tretë shtesë të Konventës Evropiane për Ekstradim, dhe në bazë të tyre me zbatim të duhur të dispozitave të marrë vendim të drejtë dhe ligjor”.

Një 18 vjeçar ka ndërruar jetë sot në spital pas një aksidenti që ka ndodhur të enjten në autostradën Tiranë-Durrës.

Policia në Shqipëri njofton se 18-vjeçari duke drejtuar veturën e tipit “Volkswagen” ka humbur kontrollin dhe për pasojë ka dalë nga rruga duke rënë në kanal.

“Më datë 22.08.2024, rreth orëve të para të mëngjesit, në autostradën Tiranë-Durrës, shtetasi A. T., 18 vjeç, duke drejtuar mjetin tip “Volksëagen”, ka humbur kontrollin mbi drejtimin e tij dhe automjeti ka dalë nga rruga duke rënë në kanal. Drejtuesi i mjetit është dërguar në spital për ndihmë mjekësore, por si pasojë e dëmtimeve të marra ka ndërruar jetë më pas”, thuhet në njoftimin e policisë.

Një vullkan në Islandën jugperëndimore shpërtheu të enjten në mbrëmje për të gjashtën herë që nga dhjetori, duke nxjerrë lavë të kuqe përmes një çarjeje të re në Gadishullin Reykjanes.

Shpërthimi filloi pak pas orës 21:00.pas një serie tërmetesh të forta dhe brenda një ore një çarje prej 4 kilometrash preu kraterin Sundhnukur, raporton AP.

Autoritetet e Islandës thonë se efektet e shpërthimit mbeten të lokalizuara me mbylljen e rrugëve, por nuk kërcënojnë popullsinë.