Author: G.O.

Gjatë zjarreve shkatërrimtare që përfshinë Kaliforninë në janar të vitit 2025, mediat u mbushën me pamje dramatike të ndërtesave të rrënuara, komuniteteve të shkatërruara dhe kafshëve të egra të plagosur që përpiqeshin të mbijetonin në mes të shkatërrimit.

Por, ndryshe nga njerëzit, për të cilët rreziku më i madh është gjatë vetë zjarrit, për jetën e egër sfida më e madhe vjen pas flakëve. Ekspertët vërejnë se megjithëse shumë kafshë arrijnë të shpëtojnë nga zjarri, ditët dhe javët që pasojnë janë kritike. Ushqimi, uji dhe strehimi bëhen burime të rralla, dhe për shumë specie, mbijetesa bëhet pothuajse e pamundur.

Disa kafshë janë të përshtatura për të jetuar në mjedise që ndjekin një zjarr pyjor, por rritja në intensitetin dhe shpeshtësinë e zjarreve po e tejkalon kapacitetin adaptues të shumë prej tyre. Habitatet e shkatërruara nënkuptojnë mungesë të resurseve thelbësore dhe zhvendosje të detyruar, shpesh në zona urbane, ku rreziku për kafshët është edhe më i madh.

Për më tepër, shkencëtarët theksojnë një cikël shqetësues siç është humbja e biodiversitetit, e cila vjen si pasojë e zjarreve, mund të përkeqësojë vetë kushtet që çojnë në zjarre të tjera.

Apeli i komunitetit shkencor është i qartë thotë se nevojitet ndërhyrje e menjëhershme për restaurimin e habitateve, ruajtjen e biodiversitetit dhe parandalimin e fatkeqësive të ardhshme, jo vetëm për jetën e egër, por edhe për sigurinë e njerëzve.

Një person ka humbur jetën si pasojë e një zjarri të madh që ka shpërthyer në rajonin Aude në Francën jugore, kanë bërë të ditur autoritetet lokale të mërkurën.

Prefektura e Aude ka njoftuar se zjarri po përparon “shumë shpejt”, ndërsa 1,820 zjarrfikës janë angazhuar për të vënë nën kontroll flakët.

Rreth 2,500 familje në zonën e prekur janë aktualisht pa energji elektrike, sipas njoftimit të prefekturës.

Presidenti francez, Emmanuel Macron, ka shkruar në X të martën në mbrëmje se të gjitha burimet e qeverisë janë mobilizuar për të luftuar zjarrin dhe për të ofruar ndihmë në këtë situatë kritike.

Komisioni Qendror i Zgjedhjeve nisi procesin e shkatërrimit të materialit zgjedhor të përdorur në zgjedhjet e mbajtura më 9 shkurt 2025.

Ky veprim bëhet në përputhje me afatet ligjore dhe procedurat e përcaktuara për ruajtjen dhe më pas asgjësimin e materialit zgjedhor, pasi është përmbyllur tërësisht procesi i shqyrtimit dhe certifikimit të rezultateve.

Më shumë se 100 persona raportohen të zhdukur pasi përmbytjeve të mëdha në shtetin verior indian të Uttarakhand.

Ngjarja tragjike ndodhi të martën në zonën malore të Uttarkashi, ku ujëra të furishme përfshinë fshatin turistik Dharali, duke përmbytur rrugë, ndërtesa dhe duke lënë pas rrënoja të shumta.

Operacionet e kërkim-shpëtimit janë ende në zhvillim, por përparimi është i ngadalshëm për shkak të shiut të dendur, rrëshqitjeve të dheut dhe rrugëve të dëmtuara rëndë. Autoritetet lokale kanë konfirmuar se rreth 130 persona janë shpëtuar deri tani, ndërsa të paktën 10 ushtarë të bazës ushtarake në Harsil figurojnë të zhdukur.

Sipas mediave vendase, katër persona janë konfirmuar të vdekur, por autoritetet nuk kanë gjetur ende asnjë trup.

Shpërthimi i reshjeve ndodhi të martën rreth orës 13:30 me orën lokale, duke bërë që lumi Kheerganga të fryhej në mënyrë të menjëhershme dhe të përmbytë zonën përreth. Një pjesë e madhe e lumit Bhagirathi është bllokuar nga balta dhe mbetjet, duke krijuar një liqen artificial që ka përmbytur edhe një helipad qeveritar. Zyrtarët paralajmërojnë se nëse uji nuk largohet shpejt, mund të kërcënohen seriozisht vendbanimet përreth.

Situata rëndohet më tej nga moti i keq, me reshje që vijojnë edhe sot. Rrugët kryesore në rajon janë të dëmtuara rëndë, me çarje të mëdha dhe rrëshqitje dheu. Komunikimi me ekipet e emergjencës në terren është i pamundur për shkak të ndërprerjeve të energjisë dhe mungesës së sinjalit.

Zyrtarët e motit kanë parashikuar reshje të tjera të dendura në ditët në vijim dhe u kanë bërë thirrje qytetarëve të shmangin udhëtimet në zonat me rrezik të lartë për rrëshqitje dhe përmbytje. Shkollat janë mbyllur në disa pjesë të Uttarakhand-it.

Fshati Dharali, një ndalesë e njohur për pelegrinazhin Char Dham Yatra, zakonisht ka shumë turistë gjatë verës. Por këtë sezon, për shkak të reshjeve dhe paralajmërimeve për rrezik, numri i vizitorëve ishte i ulët – çka ndoshta parandaloi një tragjedi edhe më të madhe.

Uttarakhand është një prej rajoneve më të rrezikuara nga përmbytjet dhe rrëshqitjet e dheut në Himalaje. Kujtojmë se në vitin 2013, përmbytje të ngjashme morën jetën e mijëra personave, shumë prej të cilëve nuk u gjetën kurrë.

Bashkimi Evropian njoftoi më 5 gusht për pezullimin e tarifave hakmarrëse ndaj mallrave amerikane në vlerë prej 93 miliardë eurosh, pasi Brukseli arriti një marrëveshje me Uashingtonin muajin e kaluar.

“Komisioni Evropian ka miratuar sot procedurat e nevojshme ligjore për të pezulluar zbatimin e kundërmasave tona, të cilat pritej të hynin në fuqi më 7 gusht”, tha zëdhënësi për tregti i BE-së, Olof Gill.

Komisioni Evropian, i cili është përgjegjës për politikat tregtare të bllokut prej 27 shtetesh, kishte përgatitur një listë me mallra amerikane që do të goditeshin me tarifa nëse bisedimet me Shtetet e Bashkuara nuk do të rezultonin me marrëveshje.

Kundërmasat e BE-së kishin në shënjestër një sërë eksportesh amerikane, nga soja deri tek aeroplanët, makinat e uiski.

Por, presidentja e KE-së, Ursula von der Leyen, arriti një marrëveshje kornizë me presidentin amerikan, Donald Trump, më 27 korrik, teksa afati i 1 gushtit për vendosjen e tarifave të larta po afrohej, njofton REL.

Pas arritjes së marrëveshjes, eksportet e BE-së pritet të përballen me tarifa gjithëpërfshirëse prej 15 për qind që nga data 8 gusht – më të larta se taksat doganore para se Trump të rikthehej në Shtëpinë e Bardhë, por më të ulëta se tarifat prej 30 për qind, që presidenti amerikan kishte kërcënuar se do të vendoste.

Kriza humanitare në Rripin e Gazës po rëndohet çdo ditë, teksa shifrat e viktimave vazhdojnë të rriten. Sipas Kombeve të Bashkuara, rreth 28 fëmijë po humbin jetën çdo ditë për shkak të bombardimeve izraelite dhe kufizimeve në shpërndarjen e ndihmave humanitare.

“Vdekje nga bombardimet. Vdekje nga kequshqyerja dhe uria. Vdekje nga mungesa e ndihmës dhe shërbimeve jetësore”, tha Fondi i OKB-së për Fëmijë (UNICEF) në një postim në X të martën, raporton Telegrafi duke cituar mediat e huaja. Agjencia theksoi se fëmijët në Gaza kanë nevojë urgjente për ushqim, ujë të pastër, ilaçe dhe mbrojtje, duke shtuar: “Më shumë se çdo gjë tjetër, ata kanë nevojë për një armëpushim, TANI”.

Sipas Al Jazeera, që nga fillimi i ofensivës izraelite, më shumë se 18 mijë fëmijë janë vrarë – që do të thotë një fëmijë çdo orë.

Në total, të paktën 60,933 palestinezë janë vrarë dhe 150,027 të tjerë janë plagosur që nga 7 tetori 2023, kur Hamasi sulmoi Izraelin jugor. Vetëm në 24 orët e fundit, të paktën tetë persona, përfshirë një fëmijë, kanë vdekur nga uria në Gaza. Deri tani, 188 persona, mes tyre 94 fëmijë, kanë humbur jetën nga uria, ndërsa Izraeli vazhdon të bllokojë ndihmat dhe të sulmojë kërkuesit e ndihmave, shkruan Al Jazeera.

“Për ata që mbijetojnë, fëmijëria është zëvendësuar nga një luftë e përditshme për gjërat elementare të jetës”, tha gazetari i Al Jazeerës, Aksel Zaimoviq.

Ndërkohë, realiteti tronditës pasqyrohet edhe nga rrëfimi i Kadim Khufu Basim, një fëmijë palestinez i zhvendosur, i cili tregon se është i detyruar të punojë për të mbajtur familjen pasi babai i tij është i plagosur dhe po trajtohet në Egjipt.

“Më pëlqen të luaj futboll. Por tani shes biskota. Fëmijëria ime ka ikur. Që kur filloi lufta, nuk na ka mbetur më fëmijëri”, tha Basim për Al Jazeerën.

Sipas ligjit ndërkombëtar, fëmijët duhet të mbrohen nga efektet e luftës. Por në Gaza, siç thekson Zaimoviq, ndodh e kundërta: “Shkollat janë shënjestruar qëllimisht, objektet e ujit janë shkatërruar, furnizimet me ushqim janë bllokuar sistematikisht. Dhe të drejtat themelore të fëmijërisë… arsimi, loja, ushqyerja e duhur… janë përdorur si armë kundër një brezi të tërë”.

Alpinistja Uta Ibrahimi ka bërë të ditur se bashkë me kryeministrin në detyrë, Albin Kurti, para disa ditësh kanë ngjitur Majën e Gjeravicës.

“Para disa dite, bashkë me kryeministrin e Kosovës Albin Kurti e ngjitem Majën e Gjeravicës. Ndajtëm eksperienca për zhvillimin e turizmit, për mbrojtjen e natyrës, për punët që na presin. Gjithmonë krenare”, ka shkruar Ibrahimi.