Author: G.O.

Asociacioni i Gazetarëve të Kosovës (AGK) është thellësisht i shqetësuar që 700 punëtorët e RTK-së vazhdojnë të mbesin pa pagë për muajin korrik.

AGK-ja është e brengosur për mirëqenien ekonomike të gjithë kolegëve, që nuk janë paguar për punën e tyre, që vazhdojnë ta kryejnë edhe gjatë muajit gusht.

AGK-ja e fton Menaxhmentin e RTK-së që të intensifikojë përpjekjet për të siguruar buxhetin, dhe të jetë transparent për veprimet e veta me të punësuarit e RTK-së.

AGK-ja e sheh mosalokimin e buxhetit për pjesën e dytë të vitit për RTK-në, si formë të presionit të shtuar politik ndaj Transmetuesit Publik nga ana e Qeverisë në detyrë Kurti.

Është koha e fundit që Qeveria të eksplorojë të gjitha mundësitë ligjore për të alokuar mjetet që i takojnë RTK-së.

AGK-ja qëndron në solidaritet me kolegët e RTK-së dhe njeh punën e tyre të rëndësishme për informim në interes të publikut.

Ministria e Punëve të Brendshme e Serbisë ka bërë të ditur të enjten se i ka ndaluar dy persona me inicialet X.E dhe B.E në pikën kufitare mes Serbisë dhe Hungarisë, Horgosh, nën dyshimet se me pjesëtarë të Ushtrisë Çlirimtare të Kosovës (UÇK) kanë kryer krime lufte kundër popullsisë civile, shkruan Radio Evropa e Lirë.

Në komunikatën e ministrisë nuk është përmendur nacionaliteti i të ndaluarve.

Në të, autoritetet serbe kanë thënë se dyshojnë që më 1999, të ndaluarit e kanë kidnapuar një serb me inicialet J.M në Rahovec, e kanë dërguar në një drejtim të panjohur dhe që prej atëherë nuk dihet asgjë për të.

Ministria serbe ka thënë se i ka ndaluar dy personat për 48 orë dhe më pas ata do të dalin para prokurorit të rastit.

UÇK-ja ishte forcë politiko–ushtarake e cila ka luftuar për çlirimin e Kosovës nga sundimi serb në periudhën 1990-1999.

Më herët gjatë këtij muaji është ndaluar edhe Behar Preniqi në pikën kufitare Batrovci, në kufirin mes Kroacisë dhe Serbisë. Akuza ende nuk është bërë publike.

Autoritetet e Kosovës i kanë konsideruar gjithmonë këto arrestime si arbitrare dhe kanë kërkuar lirimin e tyre.

Kosova dhe Serbia kanë arritur Marrëveshje për Ndihmë të Ndërsjellë Juridike, më 2013, me ndërmjetësimin e Bashkimit Evropian, por bashkëpunim mes tyre për rastet e krimeve të luftës nuk ka pasur thuajse fare.

Dronët ukrainas goditën dy qytete ruse të enjten dhe së paku 16 persona u lënduan, thanë autoritetet lokale, një ditë para një samiti mes presidentëve të ShBA-së e Rusisë për luftën në Ukrainë.

Trembëdhjetë persona u lënduan, dy prej tyre seriozisht, kur një dron goditi një objekt banimi në qytetin jugor rus, Rostov-on-Don, tha guvernatori rajonal në detyrë, raporton agjencia e lajmeve “Reuters”.

Tre civilë u plagosën në qytetin Belgorod afër kufirit me Ukrainën, sipas guvernatorit të atij rajoni, i cili publikoi një video ku dukej se shfaqej një dron duke goditur një veturë në qendër të qytetit.

Në një rast tjetër, kreu i rajonit Volgograd të Rusisë tha se mbetjet nga dronët ukrainas kishin shkaktuar një zjarr në një rafineri nafte.

Nuk pati koment të menjëhershëm nga Ukraina.

Presidenti amerikan, Donald Trump, dhe homologu i tij rus, Vladimir Putin, do të takohen të premten në Alaskë, përderisa kreu i Shtëpisë së Bardhë po mundohet që ta sjellë fundin e luftës në Ukrainë.

Ukraina ka thënë se nuk do ta njohë kurrë pushtimin rus të rajoneve lindore të saj, ndërsa Rusia ka thënë se kushtet e saj për ndaljen e luftimeve nuk kanë ndryshuar: tërheqja e forcave ukrainase nga katër rajonet lindore dhe heqja dorë nga ambicia për t’u anëtarësuar në NATO.

Situata nga zjarret në bashkinë e Gramshit vijon të jetë e tensionuar, me vatra të reja që janë shfaqur gjatë ditës dhe riaktivizime të zjarreve ekzistuese në disa zona malore dhe pyjore të njësive administrative të bashkisë.

Që në orët e para të mëngjesit, forcat zjarrfikëse kanë nisur punën për shuarjen e flakëve në fshatin Kullollas, Njësia Administrative Skënderbegas, ku një sipërfaqe e madhe pyjore është përfshirë nga zjarri.

Aktualisht, zjarre aktive raportohen në fshatrat Sojnik, Mukaj dhe Snosëm, duke e mbajtur situatën në nivel alerti. Forcat operacionale në terren janë të shumta: 30 zjarrfikës me 11 automjete nga MZSH-të e Gramshit, Elbasanit, Cërrikut dhe Librazhdit; 60 punonjës të bashkisë; 80 vullnetarë dhe 70 efektivë të Forcave të Armatosura me 2 mjete zjarrfikëse. Në operacion janë përfshirë gjithashtu dy helikopterë – një çek dhe një sllovak – të cilët po ndihmojnë nga ajri në zonat më të vështira.

Një tjetër vatër e përmasave të mëdha është regjistruar në zonën e Kodovjatit, pranë fshatit Posnovisht, ku pas ndërhyrjes së shpejtë të ekipeve në terren, zjarri është izoluar dhe po monitorohet gjatë natës.

Ndërkohë, në fshatrat Mukaj dhe Sojnik, në Njësinë Administrative Kukur, vazhdon djegia e një sipërfaqeje me shkurre dhe ferra. Fatmirësisht, nuk raportohet rrezik për banesat.

Sot janë regjistruar gjithashtu vatra të reja zjarri përballë fshatit Snosëm, mbi fshatin Sarasel dhe në zonën e Teqes së Dushkut, ku ndërhyrja është duke u zhvilluar me mbështetjen e Forcave të Armatosura.

Sipas autoriteteve, pavarësisht përhapjes së flakëve, aktualisht nuk ka rrezik të drejtpërdrejtë për jetën e banorëve, ndërsa operacionet tokësore dhe ajrore pritet të vijojnë me intensitet gjatë gjithë ditës për të vënë nën kontroll të gjitha vatrat aktive.

Qytetarët janë duke u përballur me pritje të gjata në pikat kufitare për të dalë nga Kosova.

Siç tregojnë të dhënat, pritjet në Merdarë shkojnë mbi dy orë e gjysmë. Të Dheu i Bardhë janë mbi një orë, kurse në Jarinje rreth 40 minuta.

Sa i përket pritjeve për të hyrë, ato nuk zgjasin më shumë se 20 minuta.

Kryeministri Edi Rama, ka folur rreth situatës me zjarret me të cilat po ballafaqohet Shqipëria, këtyre ditëve.

Rama theksoi gatishmërinë e strukturave dhe përkushtimin e njerëzve në terren.

Derisa, shprehu edhe shqetësimin për rrezikun e vazhdueshëm dhe për sjelljen sipërfaqësore të disa zërave publikë.

Ai tha se ndonëse situata është e përmirësuar falë “mundimeve dhe sakrificave”, rreziqet dhe të papriturat mbeten të pranishme në çdo moment.

Shefi i qeverisë shqiptare, i falënderoi të gjithë ata që janë në shërbim të përballimit të flakëve, por nuk i kurseu tonet e ashpra ndaj atyre që, sipas tij, “krehin veten para pasqyrave mediatike”.

“Dhe me një tjetër ditë gatishmërie të lartë e përpjekjesh të përbashkëta, përballë një situate të përmirësuar falë mundimesh e sakrificash të admirueshme por me rreziqe e të papritura në çdo çast, me neveri për lehaqeniet që vazhdojnë avazin e tyre të krehjes para pasqyrave mediatike, teksa në tërë Europën Jugore digjen në flakë mijëra vatra zjarri nga Spanja e deri në Turqi, ju uroj një ditë sa më të qetë të gjithëve”, deklaroi Rama