Author: G.O.

Gjykata Themelore në Ferizaj i ka caktuar një muaj paraburgim të pandehurit B.R., i cili dyshohet se të hënën mbrëma ka vrarë me armë zjarri djalin e axhës së tij, I.R.

Ngjarja e rëndë ka ndodhur në një fshat të Ferizajt, si pasojë e një mosmarrëveshjeje të mëhershme.

Sipas njoftimit zyrtar të gjykatës, krimi i rëndë ka pasur si motiv një konflikt pronësor mes dy kushërinjve.

Pas një fjalosjeje verbale në rrugën e fshatit, i pandehuri dyshohet se ka nxjerrë armën dhe ka shtënë katër herë në drejtim të viktimës.

Si pasojë e plagëve të marra, viktima ka ndërruar jetë rrugës për në Qendrën Emergjente në Ferizaj.

Gjyqtari i procedurës paraprake ka aprovuar kërkesën e prokurorisë, duke e lënë të dyshuarin në paraburgim për 30 ditë, ndërsa hetimet për zbardhjen e plotë të rastit janë në vazhdim.

Gjykata Themelore në Prishtinë, Departamenti Special ka aprovuar kërkesën e Prokurorisë Speciale të Republikës së Kosovës dhe përmes Aktvendimit ka caktuar masën e paraburgimit në kohëzgjatje prej një (1) muaji ndaj të pandehurit D.N., për shkak të dyshimit të bazuar se ka kryer veprën penale Krime lufte kundër popullatës civile.

Sipas një njoftimi për media bëhet e ditur se gjyqtari i procedurës paraprake, pas seancës dëgjimore vlerësoj se janë përmbushur kushtet ligjore për caktimin e masës së paraburgimit për të pandehurin D.N., pasi ekziston dyshimi i bazuar se i njëjti ka kryer veprën penale Krime lufte kundër popullatës civile.

“Ekziston dyshimi i bazuar se i pandehuri D.N. në cilësinë e Komandantit të Nënstacionit Policor në Zhegër, duke shkelur rregullat e së drejtës ndërkombëtare, përkatësisht nenit 86 dhe 87 të protokollit shtesë I të vitit 1977, Konventës së Gjenevës e vitit 1949, duke vepruar në përgjegjësin komanduese, nuk kishte ndërmarr asnjë veprim, që të parandaloj apo ndëshkoj kryerësit e krimeve të kryera ndaj popullsisë civile të atij fshati nga forcat serbe dhe paramilitarët serb, të kryera me datë 30.04.1999 nga i pandehuri S.A ku janë vrarë 13 anëtarë të familjes Hyseni dhe Shabani në shtëpinë e familjes Hyseni. Edhe pse ishte lajmëruar përmes një letre nga të dëmtuarit D.H. dhe I.H., i pandehuri ka qenë i detyruar të ndërmarrë veprime brenda kompetencave të tij, si komandant i atij nënstacioni, i njëjti është larguar nga vendi i ngjarjes pa ndërmarrë masat e nevojshme dhe të arsyeshme për të parandaluar, ndaluar ose për ti paraqitur rastet për hetim apo procedim penal dhe në këtë mënyrë është pajtuar me shkaktimin e pasojës së dëmshme, e këto veprime inkriminuese vërtetohen edhe me deklaratat e të dëmtuarve dhe dëshmitarëve, nga të cilat dëshmi vërtëtohet edhe fakti se i pandehuri D.N. ishte komandant i nënstacionit policor në Zhegër, në kohën e kryerjes së veprës penale”, thuhet në njoftim.

Tutje në njoftim bëhet e ditur se Gjykata vlerësoj se pesha e veprës penale është e natyrës së rëndë dhe komplekse, andaj caktimi i masës së paraburgimit është masë e domosdoshme në këtë rast penal dhe se çdo masë tjetër do të ishte e pamjaftueshme, për zbatimin e suksesshëm të procedurës penale.

“Gjykata konstatoj se ekziston dyshimi i bazuar se i pandehuri D.N. nëse gjendet në liri, mund të arratiset duke pasur parasysh faktin se është shtetas i Serbisë, dhe i njëjti mund të jetë i pa arritshëm për fazat tjera të procedurës penale. Kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë”. /Telegrafi/

Dëshmitari Paul Williams duke folur para Gjykatës Speciale për mbështetjen që delegacioni kosovar i ka dhënë Tribunalit Penal Ndërkombëtar për ish-Jugosllavinë (TPNJ) gjatë bisedimeve në Rambuje, pohoi se Hashim Thaçi e dinte që kjo mund të përfshijë edhe hetime potenciale ndaj anëtarëve të UÇK-së.

Ldhur me angazhimin që TPNJ-ja të ketë mundësinë që të ketë kompetenca të mjaftueshme që të zbatojë mandatin e saj, Williams tha se edhe Thaçi ishte i këtij mendimit, raporton “Betimi për Drejtësi“.

“Ai tha se kjo pasqyron këtë që na intereson edhe neve”, deklaroi Williams për Thaçin.

Dëshmitari pohoi se ishte i vetëdjshem se bashkëpunimi me TPNJ-në përfshinte edhe hetime potenciale lidhur me UÇK-në.

“Delegacioni i Kosovës që përfaqësonin UÇK-në duke përfshirë edhe Hashim Thaçin kishin mundësinë që të shihnin se si TPNJ-ja vepronte në kontekstin e Kroacisë dhe Bosnjës dhe se Tribunali kishte ngritur aktakuzë ndërmjet këtyre palëve”, tha ai.

Ai tha se dihej që Tribunali Ndërkombëtar do të kërkonte prova në drejtime të ndryshme.

“Situata ishte faktike se Tribunali Ndërkombëtar do të kërkonte prova në drejtime të ndryshme që do të përfshinte edhe aktorë të armatosur joshtetëror”, tha ai.

Në draftin e marrëveshjes, dëshmitari tha se shkruhej se prokurorja do të kishte qasje edhe në territorin e Kosovës përveçse në Serbi.

Policia ka njoftuar se një grua është raportuar e zhdukur në fshatin Kçiq i Madh të Mitrovicës së Jugut. Rasti është denoncuar nga familjarët e saj të martën.

Sipas informacioneve fillestare të ofruara në raportin e Policisë, gruaja ishte larguar nga shtëpia e saj ditën e hënë rreth orës 10:00.

Që nga ai moment, familjarët nuk kanë pasur asnjë kontakt me të dhe nuk kanë informacion për vendndodhjen e saj aktuale.

Rasti është iniciuar si ‘Person i zhdukur’ dhe njësitet relevante policore kanë nisur hetimet për gjetjen e saj.

Testet e reja laboratorike tregojnë se Alexei Navalny është helmuar, ka deklaruar e veja e tij, Yulia Navalnaya, duke fajësuar presidentin rus, Vladimir Putin, për vdekjen e tij.

Navalnaya ka pohuar se dy analiza laboratorike, të kryera në mënyrë të pavarur nga njëra-tjetra, tregojnë se burri i saj është helmuar para vdekjes.

Në një video të publikuar në YouTube, ajo kujtoi detajet e letrës së fundit nga Navalny, një ditë para se të vdiste në një koloni penale në Rusi, dhe përshkroi ditët e tij të fundit në paraburgim, duke nxjerrë në pah mungesën e reagimit të autoriteteve ndaj raporteve të tij për gjendjen shëndetësore.

Ajo gjithashtu tregoi fotografi nga brenda qelisë ku ai ishte sëmurë.

“Në shkurt të vitit 2024, ne ishim në gjendje të merrnim dhe të transferonim në mënyrë të sigurt mostra biologjike të Alexei jashtë vendit. Laboratorët në të paktën dy vende i testuan në mënyrë të pavarur ato mostra”, tha Navalnaya.

Ajo shtoi se laboratorët arritën në përfundimin në mënyrë të pavarur se Alexei ishte helmuar. “Laboratorët në dy vende të ndryshme arritën në përfundimin në mënyrë të pavarur: Alexei u vra, domethënë, u helmua”, deklaroi Navalnaya, pa dhënë prova të tjera mbështetëse.

“Unë kërkoj që laboratorët që kryen analizat të publikojnë rezultatet e tyre. Unë pohoj se Vladimir Putini është përgjegjës për vrasjen e burrit tim, Alexei Navalny”, shtoi ajo.

E veja e Navalny paralajmëroi se nuk duhet t’i jepet qetësi Putinit: “Mos e kënaqni Putinin për disa ‘konsiderata’ më të larta. Nuk mund ta qetësoni. Ndërsa heshtni, ai nuk ndalet”.

Në gusht 2020, Navalny u helmua në fund të një udhëtimi në Siberi me një agjent nervor, Novichok.

Ai filloi të shkruajë librin e tij me kujtime, Patriot, teksa i nënshtrohej trajtimit specialistik në Gjermani.

I shëruar, ai u kthye në Moskë në janar 2021 dhe u dërgua menjëherë në paraburgim.

Navalny kaloi 37 muajt e mbetur të jetës së tij në burg, gjatë të cilëve ai mbajti shënimet e ditarit të mbledhura në kujtimet e tij.