Author: G.O.

Klinika e Kirurgjisë në Qendra Klinike dhe Universitare e Kosovës ka mbetur pa energji elektrike për shkak të një defekti në një trafo prapa saj.

Zëdhënësja Mirlinda Qyqalla, për Sinjalin tha se në pikat vitale të Klinikës janë vënë në funksion gjeneratorët, ndërsa ekipet teknike dhe ato të KEDS-it po punojnë për sanimin e defektit.

“Pas një defekti të paraqitur në një trafo elektrike mbrapa Klinikës së Kirurgjisë, ekipet e shërbimeve teknike kanë reaguar menjëherë duke dalë në vendin e ngjarjes. Gjithashtu, në terren ka dalë edhe ekipi për mirëmbajtjen e trafove nga KEDS, të cilët janë duke punuar në sanimin e defektit. Në pikat vitale të rëndësishme të Klinikës së Kirurgjisë janë vënë në funksion gjeneratorët për të siguruar furnizim me energji elektrike”, tha Qyqalla.

Presidenti i Serbisë, Aleksandar Vučić, ka deklaruar se Beogradi është i shqetësuar për bashkëpunimin ushtarak mes Kroacisë, Shqipërisë dhe Kosovës, duke e cilësuar atë si kërcënim serioz për vendin e tij.

Ai përmendi edhe takimin në Mynih mes kryeministrit të Kosovës, Albin Kurti, dhe kryeministrit kroat, Andrej Plenković. Sipas Vuçiqit, takimi si dhe koordinimi mes ministrave të mbrojtjes të tre vendeve ka rritur shqetësimet e Serbisë.

“Zagrebi, Prishtina dhe Tirana kanë arritur të na shqetësojnë. Ne e kuptojmë këtë si kërcënimin më serioz për Serbinë dhe do të ndërmarrim hapa në përputhje me rrethanat”, ka thënë Vuçiq.

Mospjesëmarrja e LDK-së në procesin e votimit të Rezolutës së propozuar të PDK-së në përkrahje të ish-krerëve të UÇK-së në Hagë ka nxitur reagime të shumta e akuza në drejtim të partisë së themeluar nga Ibrahim Rugova.

Lidhur me këtë ka folur deputeti i LDK-së, Anton Quni. Ai në një intervistë të shkurtër për Gazetën Express ka thënë kjo situatë është shfrytëzuar për ta goditur LDK-në politikisht, meqë sqaron se partia e tij ishte  e gatshme ta përkrahte rezolutën nëse do të përfshihej edhe amandamenti i kërkuar nga LDK.

“Ishte një rast i shkëlqyer që të gjitha partitë shqiptare të unifikoheshin rreth një teksti që nderon luftën tonë çlirimtare, por edhe garanton se asnjë krim i pazbuluar nuk do të mbetet peng i agjendave politike.Përpjekja për ta paraqitur kushtëzimin tonë parimor si “mosperkrahje” është një tendencë e pastër për goditje politike. Megjithatë, për LDK-në, drejtësia nuk mund të jetë selektive”, ka thënë Quni.

Ai ka thënë se tejkalimi i pozicioneve të vjetra bëhet vetëm duke u ballafaquar me të vërtetën e plotë.

“Besojmë fuqishëm se tejkalimi i pozicioneve të vjetra arrihet vetëm duke u ballafaquar me të vërtetën e plotë. Ne jemi për një Kosovë ku drejtësia vepron mbi parimet e paanësisë dhe barazisë para ligjit për çdo qytetar”, ka potencuar deputeti i LDK-së.

Sipas Qunit, LDK s’ka qenë kundër Rezolutës dhe se ky ishte një keqkuptim që u tentua të mbillet në opinion.

“Përkundrazi, ne kemi qenë të gatshëm ta mbështesim atë, por kemi kërkuar që ky dokument të ishte gjithëpërfshirës dhe t’i përgjigjej nevojës për drejtësi të plotë në Kosovë. Për këtë arsye, ne kemi propozuar plotësimin e tekstit të rezolutës me amendamentin vijues:

“KËRKON nga të gjitha institucionet e rendit dhe ligjit në Republikën e Kosovës, si dhe inkurajon mbështetjen ndërkombëtare, për intensifikimin e përpjekjeve drejt zbardhjes së plotë të të gjitha vrasjeve të pazbuluara të ndodhura gjatë dhe pas periudhës së luftës në Kosovë, me qëllim që të sigurohet drejtësia për të gjitha viktimat, të zbardhet e vërteta dhe të fuqizohet shteti i së drejtës mbi parimet e paanësisë dhe barazisë para ligjit.”, ka shtuar Quni.

Deputeti i LDK-së thotë se ky propozim i LDK-së fatkeqësisht s’gjeti përkrahjen e partive të tjera parlamentare.

“Ky propozim i yni, i cili synon fuqizimin e shtetit të së drejtës dhe zbardhjen e së vërtetës pa dallim, fatkeqësisht nuk gjeti përkrahjen e partive të tjera parlamentare”, ka përfunduar ai.

Mbi 200 mijë qytetarë pritet të jenë në marshin “Drejtësi, jo politikë”, që do të mbahet me 17 shkurt në sheshin “Skënderbeu” në Prishtinë, raporton Ekonomia Online.

Kështu ka bërë të ditur përfaqësuesja e platformës “Liria ka Emër” , Eliza Hoxha, në konferencën për media.

“Kjo nuk është çështje partie, pushteti, por është çështje drejtësie dhe dinjiteti kombëtar. Kemi marrë konfirmime nga shqiptarë nga i gjithë rajoni dhe Evropa. Diaspora jonë po organizohet, po vjen, po udhëton me orë të tëra për të qenë bashkë. Po na vijnë fotografi e mesazhe me familje të cilat na tregojnë që do të jenë prezente aty bashkë. Ky është momenti kur e kupton që ky marsh nuk i përket vetëm një platforme dhe individi, thjesht ky marsh i përket popullit të Kosovës. Presim mbi 200 mijë qytetarë në këtë marsh. Do të jetë marshi më i madh në historinë e Kosovës së lirë. Por madhështia e tij nuk matet vetëm me numra, por do të matet me qetësinë tonë, me disiplinën dhe dinjitetin tonë dhe seriozitetin e mesazhit që do të përcjellim atë ditë”, tha Hoxha.

Eliza Hoxha theksoi se qytetarët do të dalin për të kërkuar drejtësi për Hashim Thaçin, Kadri Veselin, Jakup Krasniqin, Rexhep Selimin dhe bashkëluftëtarët e tyre.

Në këtë marsh do të jenë pesë folës, por asnjëri nuk do të jetë partiakë, ndërsa do të performojë edhe këngëtari Ilir Shaqiri dhe Lyrical Son.

“E ripërsëris edhe sot: asnjë folës nuk do të jetë partiak. Ky është marsh qytetar,” theksoi Tasholli.

Programi do të përfshijë edhe performancë artistike nga Ilir Shaqiri dhe Lyrical Son, ndërsa do të realizohet një aksion simbolik tek monumenti NEWBORN, si moment reflektimi për lindjen e shtetit të Kosovës dhe përgjegjësinë për mbrojtjen e së vërtetës së tij.

Platforma njoftoi gjithashtu se sot do të publikohet agjenda e nisjes së autobusëve nga secila komunë e Kosovës. “Janë qindra autobusë që do të nisen në mënyrë të organizuar drejt Prishtinës. Agjenda do të bëhet publike në faqen zyrtare të platformës ‘Liria ka Emër’, në mënyrë që çdo qytetar të ketë informacion të saktë,” deklaroi Tasholli.

Në aspektin e sigurisë dhe organizimit, platforma konfirmoi se janë ndërmarrë të gjitha përgatitjet e nevojshme, në koordinim me Policinë e Kosovës, zjarrfikësit, njësitet emergjente shëndetësore, stacionet e autobusëve dhe strukturat përgjegjëse për parkingjet. Organizimi teknik i binës, videomaterialeve dhe sistemit të zërimit është planifikuar me kujdes për të garantuar një tubim të sigurt dhe dinjitoz.

“Ky do të jetë një marsh paqësor dhe i organizuar, që do të tregojë pjekurinë qytetare të Kosovës,” u tha në konferencë.

Një 25-vjeçar shqiptar ka humbur jetën në Itali i vrarë me armë zjarri. Mediat italiane shkruajnë se ngjarja ndodhi të shtunën në zonën e Pizës, në Montecalvoli, një fshat i vogël në komunën e Santa Maria a Monte, ku  25-vjeçari shqiptar Kevin Muharremi u qëllua për vdekje.

Viktima u qëllua me armë zjarri ndërsa udhëtonte me makinën e tij, nga një automjet që udhëtonte paralel me të.

Sipas mediave në vendin fqinj, i riu u qëllua në kokë ndërsa udhëtonte në një makinë me dy shokë të tjerë: ai ishte ulur në sediljen e pasagjerit përpara.

Oficerët e karabinierisë po përpiqen të rindërtojnë motivin: nga ajo që ka dalë deri më tani, duket se krimi mund të ketë rrjedhur nga një grindje. Vrasësi ishte në një makinë me një person tjetër, i cili më pas iku nga vendi i ngjarjes. Hetuesit po shqyrtojnë kamerat e mbikëqyrjes në zonë, përfshirë kamerat e targave. Oficerët e karabinierisë po intervistojnë gjithashtu disa dëshmitarë.

Federata e Futbollit të Kosovës (FFK) ka dalë në mbështetje të organizimit të marshit “Drejtësi, jo politikë” që do të mbahet më 17 shkurt në ora 14:00 në sheshin “Skënderbeu” në Prishtinë.

FFK ka thënë se ata do t’i bashkohen këtij marshi, ku u ka bërë thirrje edhe komunitetit të futbollit dhe qytetarëve që të marshojnë në mbrojtje të vlerave të luftës çlirimtare.

Postimi i plotë:

DREJTËSI, JO POLITIKË!

FFK i bashkohet protestës së organizuar nga platforma “Liria ka Emër” dhe u bën thirrje komunitetit të futbollit dhe të gjithë qytetarëve që të marshojnë për drejtësi dhe në mbrojtje të vlerave të luftës çlirimtare.

📆 17 shkurt, 2026

⏰ 14:00

📍 Sheshi “Skënderbeu”, Prishtinë

#LiriaKaEmër

Asnjë “tabu” nuk mund të mbetet e pakontestueshme në lidhje me mbrojtjen evropiane, tha presidentja e Komisionit Evropian, Ursula von der Leyen, në Konferencën e Sigurisë në Munih të shtunën, ndërsa foli për nevojën për një strategji të re evropiane të sigurisë.

Duke iu referuar mënyrës se si blloku ka mbetur i palëkundur në mbështetjen e tij për Ukrainën, Von der Leyen tha: “Ky është një zgjim i vërtetë evropian dhe ky është vetëm fillimi i asaj që duhet të bëjmë.”

Ajo foli për nevojën për një strategji të re evropiane të sigurisë dhe për të “formalizuar fillimet ad hoc të bashkëpunimeve të reja të sigurisë”, raportoi CNN.

Von der Leyen theksoi tutje rëndësinë e pavarësisë evropiane, duke shtuar se Evropa duhet të “ngrihet” dhe të marrë përsipër përgjegjësinë e saj.

“Një Evropë e pavarur është një Evropë e fortë dhe një Evropë e fortë përbën një aleancë transatlantike më të fortë. Disa vija janë kaluar që nuk mund të kalohen më”.