Author: G.O.

Gjykata Supreme e Kosovës ka marrë vendim në çështjen penale ndaj të pandehurve Edmir Ahmagjokaj, Aurel Kaziu dhe Ardit Laska, të dyshuar për veprën penale “shpëlarja e parave”, duke shqyrtuar ankesat e paraqitura nga mbrojtësit e tyre.

Sipas vendimit të marrë në seancën e kolegjit më 30 mars 2026, Supremja ka aprovuar ankesat e mbrojtjes kundër aktvendimit të Gjykatës së Apelit të Kosovës (PN.1.S.nr.68/2026, i datës 18 mars 2026), duke e anuluar këtë aktvendim dhe duke e kthyer çështjen në rivendosje në të njëjtën gjykatë.

Kujtojmë se Gjykata Themelore në Prishtinë, Departamenti Special, me aktvendimin e 9 marsit 2026, kishte refuzuar kërkesën e Prokurorisë Speciale për caktimin e paraburgimit ndaj të pandehurve.

Ndërsa, Gjykata e Apelit e Kosovës, më 18 mars 2026, kishte aprovuar ankesën e Prokurorisë, duke ndryshuar vendimin e shkallës së parë dhe duke u caktuar të pandehurve masën e paraburgimit prej 30 ditësh.

Pas këtij vendimi, mbrojtësit e të pandehurve paraqitën ankesa, duke kundërshtuar ligjshmërinë dhe bazueshmërinë e paraburgimit.

Gjykata Supreme vlerësoi se këto ankesa janë të bazuara, duke konstatuar se aktvendimi i Gjykatës së Apelit përmban shkelje esenciale të dispozitave të procedurës penale.

Sipas vlerësimit të Supremes, gjykata e shkallës së dytë nuk ka bërë ndërlidhjen e qartë ndërmjet provave dhe veprimeve të të pandehurve.

Po ashtu, Gjykata Supreme thekson se ekzistimi i dyshimit të bazuar është kusht themelor për caktimin e paraburgimit, në përputhje edhe me praktikën e Gjykatës Evropiane për të Drejtat e Njeriut.

Presidentja e Kosovës, Vjosa Osmani, ka shprehur mbështetje të fuqishme për Kombëtaren e Kosovës në prag të ndeshjes së rëndësishme kundër Turqisë.

Përmes një postimi në Facebook, Osmani ka theksuar rëndësinë që ka kjo përballje për vendin, duke e lidhur atë me rrugëtimin dhe sakrificat e popullit të Kosovës.

Ajo është shprehur se Kosova “ka lindur mes vështirësive dhe sakrificave, është rritur me krenari dhe sot qëndron në fushë me dinjitet, duke përfaqësuar ëndrrat e një populli të tërë”.

Më tej, presidentja ka vlerësuar futbollistët si “simbol i qëndresës, i guximit dhe i shpresës”, ndërsa ka shtuar: “Jemi me ju, djem! Me Kosovën, përgjithmonë. Me Dardanët!”

Drejtori i Departamentit për NATO dhe Politika të Sigurisë në Ministrinë e Punëve të Jashtme dhe Diasporës, Astrit Zemaj, ka pritur në takim lamtumire Drejtorin e Ekipit Këshillues dhe Ndërlidhës të NATO-s në Kosovë (NALT), Gjeneral Brigade Dr. Sven Lange, me rastin e përfundimit të mandatit të tij në vend.

Sipas një njoftimi të Ministrisë së Punëve të Jashtme, gjatë takimit është vlerësuar bashkëpunimi i ngushtë ndërmjet institucioneve të Kosovës dhe NATO, përmes NALT-it, duke u theksuar se ky bashkëpunim ka ndikuar drejtpërdrejt në avancimin e kapaciteteve dhe rritjen e ndërveprueshmërisë me strukturat e Aleancës.

“Bashkëpunimi i ngushtë dhe i vazhdueshëm me NALT ka kontribuar në avancimin e kapaciteteve të Kosovës dhe në rritjen e ndërveprueshmërisë me strukturat e NATO-s”, thuhet në njoftim.

Me këtë rast, Zemaj ka shprehur mirënjohje për angazhimin dhe lidershipin e gjeneralit gjatë mandatit të tij në Kosovë.

“Vlerësojmë lidershipin dhe kontributin e Gjeneral Brigade Dr. Sven Lange në përmbushjen e standardeve që e afrojnë Republikën e Kosovës me synimin strategjik të anëtarësimit në NATO”, thuhet më tej.

Nga ana tjetër, u theksua se Kosova mbetet e përkushtuar për thellimin e bashkëpunimit me NATO-n dhe vendet aleate, duke e konsideruar këtë partneritet thelbësor për sigurinë dhe integrimin euroatlantik.

Ambasada e Shteteve të Bashkuara të Amerikës ka publikuar disa fotografi që tregojnë atmosferën e ndeshjes më të rëndësishme në historinë e futbollit të Kosovës që luhet sonte në Prishtinë.

Në njërën prej fotografive shihet E Ngarkuara me Punë e Ambasadës në Prishtinë, Anu Prattipati, e veshur me fanellën e kombëtares së Kosovës në futboll.

Në prag të ndeshjes finale të play-offit ndërmjet Kosovës dhe Turqisë për kualifikim në Kampionatin Botëror 2026, Ambasada Amerikane shpreh mbështetjen për futbollistët kosovarë me një mesazh të veçantë.

“Nga të gjithë ne në Ambasadën e Shteteve të Bashkuara, po ju mbështesim – luani fort dhe bëjeni Kosovën krenare!”.

Ministri i Mbrojtjes, Ejup Maqedonci ka bërë të ditur se ka pritur në takim komandantin e anijes zbarkuese USS Pearl Harbor, shtetasin amerikan me prejardhje shqiptare, Alban Dervishi.

Maqedonci në një postim në Facebook shkruan se përkushtimi, profesionalizmi dhe suksesi i tij janë dëshmi e fuqishme e rolit gjithnjë e më të madh të shqiptaro-amerikanëve në institucionet e sigurisë dhe mbrojtjes së SHBA-së.

Lexoni të plotë postimin e ministrit Maqedonci:

Sot pata kënaqësinë të mirëpres në takim Komandantin e anijes amfibe zbarkuese USS Pearl Harbor, Alban Dervishi, oficer amerikan me rrënjë shqiptare që shërben në Forcat Detare të Shteteve të Bashkuara të Amerikës.

Përkushtimi, profesionalizmi dhe suksesi i tij janë dëshmi e fuqishme e rolit gjithnjë e më të madh të shqiptaro-amerikanëve në institucionet e sigurisë dhe mbrojtjes së SHBA-së. Ai përfaqëson me dinjitet vlerat e shërbimit, përgjegjësisë dhe lidershipit.

Gjatë takimit, ai u shpreh i nderuar që po viziton Kosovën dhe vlerësoi arritjet e vendit tonë, veçanërisht në zhvillimin dhe avancimin e sistemit të mbrojtjes.

E falënderova për vizitën dhe ritheksova mirënjohjen tonë për mbështetjen e palëkundur që Shtetet e Bashkuara të Amerikës i kanë dhënë dhe vazhdojnë t’i japin Republikës së Kosovës. SHBA mbetet aleati ynë strategjik dhe i pazëvendësueshëm.

Mbrojtja e Bashkim Smakajt dhe ajo e Hajredin Kuçit kanë njoftuar se nuk do të paraqesin prova në rastin në të cilin Smakaj e Kuçi së bashku me Hashim Thaçin, Isni Kilajn dhe Fadil Fazliun akuzohen për vepra penale kundër administrimit të drejtësisë.

Të dy këto parashtrime, mbrojtja i kan dorëzuar ndaras duke njoftuar se nuk kanë ndonjë listë të dëshmitarëve, raporton “Betimi për Drejtësi“.

Ndërsa, mbrojtja e Kuçit ka thënë se e rezervon të drejtën që t’i drejtohet gjyqtarit gjatë fjalëve përfundimtare.

Ndryshe, nga dy të lartpërmendurit, mbrojtja e Thaçit dhe Kilajt kanë thënë se do të paraqesin prova, ndërsa ajo e Fazliut tha se nuk do e bëjë një gjë të tillë. Mirëpo, Fazliu ka rezervuar të drejtën që përmes mbrojtjes të marrë pjesë në deklaratat hyrëse dhe përmbyllëse në këtë rast.

Në seancën fillestare më 27 shkurt 2026, Hashim Thaçi, Bashkim Smakaj, Fadil Fazliu, Isni Klilaj dhe Hajredin Kuçi, u deklaruan të pafajshëm për veprat penale që iu vihen në barrë.

Po atë ditë (27 shkurt 2026), nisi dëshminë edhe dëshmitari i parë në këtë çështje gjyqësore, i cili ishte me masa mbrojtëse. Dëshmia e tij përfundoi më 2 mars 2026.

Më 3 dhe 4 mars 2026 dëshmoi dëshmitari i dytë Koen Herlaar- ekspert i kriminalistikës në Institutin e Kriminalistikës së Holandës. Po më 4 mars nisi dëshminë dëshmitari i tretë, Chrisopher Kelly- hetues i forenzikës digjitale. Ky dëshmitar e përfundoi dëshminë më 5 mars.

Ndryshe, Hashim Thaçi ndodhet në Qendrën e Paraburgimit në Hagë që nga nëntori i vitit 2020. Ai është duke u gjykuar për krime lufte, si dhe më 2024 i është ngritur aktakuza kundër administrimit të drejtësisë.

Lidhur me rastin kundër administrimit të drejtësisë, Bashkim Smakaj, Fadil Fazliu dhe Isni Kilaj u arrestuan më 5 dhjetor 2024 në Kosovë dhe u transferuan në objektin e paraburgimit në DhSK, më 6 dhjetor 2024 në bazë të aktakuzës së konfirmuar dhe fletarrestimeve të lëshuara nga Haga.

Ndërsa, Thaçit i është dorëzuar fletarrestimi në objektin e paraburgimit në Hagë më 5 dhjetor 2024, gjithnjë sipas njoftimit të DhSK-së.

Kurse, Hajredin Kuçit i është dorëzuar aktakuza e konfirmuar dhe fletëthirrja për t’u paraqitur para gjykatëses së procedurës paraprake për paraqitjen e parë, e cila u mbajt 9 dhjetor.

Sipas aktakuzës, Thaçi individualisht dhe përmes veprimeve të përbashkëta me grupet; Grupi Fazliu (Fadil Fazliu dhe FahriFazliu), Grupin Smakaj (Bashkim Smakaj, Blerim Shala dhe Artan Behrami) si dhe Grupin Kilaj (Isni Kilaj dhe VllaznimKryeziu), kanë ndjekur një model të sjelljes për të penguar personat zyrtarë në kryerjen e detyrave zyrtare.

Në aktakuzë thuhet se Thaçi ka udhëhequr dhe marrë pjesë në këto përpjekje përmes vizitave të tij në objektet e paraburgimit gjatë kohës sa ishte i paraburgosur në kuadër të gjykimit të tij për krime lufte dhe krime kundër njerëzimit.

Aty thuhet se anëtarët e Grupit Fazliu, Grupit Smakaj dhe Grupit Kilaj u koordinuan për të ndikuar në dëshmitarët e ZPS-së gjatë vizitave jo të priveligjuara të datave 2 korrik, 9 shtator dhe 6 tetor 2023.

Si rrjedhojë, ndaj Thaçit rëndojnë tri akuza për pengim të personit zyrtar në kryerjen e detyrave zyrtare, tri për shkelje të fshehtësisë së procedurës dhe katër akuza për mosbindje ndaj gjykatës.

Ndërsa, Kilaj, Smakaj dhe Fazliu akuzohen për tentativë të pengimit të personave zyrtarë në kryerjen e detyrave zyrtare dhe mosbindje ndaj gjykatës. Kurse, Kuçi i ka dy akuza për mosbindje ndaj gjykatës.. /BetimipërDrejtësi

Ditët e ardhshme të luftës me Iranin do të jenë “vendimtare”, ka thënë shefi i Pentagonit, Hegseth.

“Ditët në vijim do të jenë vendimtare. Irani e di këtë dhe pothuajse nuk ka asgjë që mund të bëjë ushtarakisht për këtë,” tha Hegseth në konferencën për shtyp, e para e tij pas gati dy javësh.

“Kemi gjithnjë e më shumë opsione, ndërsa ata kanë më pak… brenda vetëm një muaji ne kemi vendosur kushtet; ditët e ardhshme do të jenë vendimtare. Irani e di këtë dhe pothuajse nuk ka asgjë që mund të bëjë ushtarakisht për këtë”, shtoi ai.

Ai shtoi se morali është i lartë dhe se ka një dëshirë të madhe te personeli ushtarak për “ta përfunduar misionin”.

“Këta trupa duan ta përfundojnë këtë luftë për fëmijët dhe nipërit e mbesat e tyre. Kjo ka të bëjë me historinë, kjo ka të bëjë me trashëgiminë”, tha ai.

Sekretari i Mbrojtjes thotë se, ndërsa presidentët e mëparshëm ishin “vetëm fjalë”, Trump është duke vepruar.

Presidenti amerikan Donald Trump ka reaguar sërish për çështjen e sigurisë energjetike në kontekstin e tensioneve të lidhura me Irani, duke theksuar se vendet që përballen me vështirësi në furnizimin me karburant përmes Ngushtica e Hormuzit duhet të ndërmarrin iniciativa pa u mbështetur te Shtetet e Bashkuara.

Në një deklaratë të publikuar në rrjetet sociale, Trump përmendi veçanërisht Mbretërinë e Bashkuar, duke pretenduar se ajo nuk mori pjesë në veprime që sipas tij, do të çonin në “neutralizimin” e udhëheqjes iraniane.

Ai propozoi dy alternativa për vendet që hasin vështirësi në furnizim me karburant: blerjen e energjisë nga SHBA, duke theksuar se tregu amerikan ka rezerva të mjaftueshme, ose marrjen e një roli më aktiv në sigurimin e burimeve energjetike, shkruan Abcnews.al.

“Të gjitha ato vende që nuk mund të marrin karburant për avionë për shkak të Ngushticës së Hormuzit, si Mbretëria e Bashkuar, e cila refuzoi të përfshihej në operacion, kam një sugjerim: së pari, blini nga SHBA-të, kemi me bollëk, dhe së dyti merrni iniciativa vetë. Duhet të mësoni të veproni pa mbështetjen tonë”, u shpreh Trump.

Dhjetëra tifozët nga Shqipëria janë nisur sot në drejtim të Prishtinë, për të qenë në përkrahje të Kosovës.

Kosova është nikoqire e Turqisë në ndeshjen e sotme, e cila është planifikuar të zhvillohet në stadiumin Fadil Vokrri në Prishtinë, me fillim nga ora 20:45.

Dardanët janë gati për këtë ndeshje finale, pasi ëndrra e madhe është kualifikimi në një ngjarje të madhe sportive dhe Kupa e Botës është kulmi i çdo arritje.

Për të qenë sa më afër vëllezërve, shumë tifozë nga Shqipëria janë nisur sot drejt Prishtinës, për atmosferë dhe përkrahje të Dardanëve.

Një video që po qarkullon në rrjetet sociale, shihen shumë vetura me flamuj shqiptarë duke ardhur në drejtim të Kosovës dhe është thjesht emocionuese.

Një kualifikim i Kosovës do të ishte plotësim i një ëndrre të madhe të një shteti të ri, por të vuajtur ndër shekuj.