Author: G.O.

Kryeministri në detyrë i Malit të Zi, Dritan Abazoviq ka thënë sot se kanë raportet të shkëlqyera me Kosovën.

Abazoviq në konferencën e përbashkët me kryeministrin Albin Kurti, u deklarua se qasja e Malit të Zi ndaj Kosovës nuk do të ndryshojë, pavarësisht se atje kanë ndodhur disa procese politike.

“Mali i Zi dhe Kosova janë duke dhënë shembull se si funksionojnë dy shtete fqinje. Jemi në rrugë të duhur që të bëjmë disa projekte që do t’i quaja historike. Ideja jonë është me kriju qasje më të lehtë për dy popujt e vendeve tona. Na vijmë me një mesazh paqësor, miqësor edhe në të ardhmen do të kemi një atmosferë ku do të japim shembull. Në Mal të Zi kanë ndodhë disa procese politike, por kjo nuk do të ndryshon qasjen ndaj Kosovës. Ne jemi të gatshëm me kapacitetet tona të përkrahim Kosovën”, tha ai.

Gjithashtu, ai shtoi se “ardhmërinë tonë e shohim në Bashkimin Evropian, edhe Kosova edhe Mali i Zi kanë treguar që me drejtësinë e tyre kundër korrupsionit kanë pasur shumë sukses”.

Abazoviq në fund të konferencës ftoi kryeministrin Kurti për një vizitë në Podgoricë.

Kryeministri i vendit Albin Kurti se bashku me kryeministrin e Malit të Zi, Dritan Abazoviq kanë nënshkruar sot marrëveshjen bilaterale për korridorin e qiellit të hapur, me të cilin parashihet lejimi i shfrytëzimit të hapësirës ajrore të Malit të Zi nga aeroplanët që fluturojnë nga Aeroporti i Prishtinës.

Kryeministri i Kosovës, Albin Kurti, ka thënë se rregullat e Bashkimit Evropian dhe forcimi i aleancës trans-atlantike janë qëllimi dhe qëndrimi i Kosovës për bashkëpunim rajonal.

Në konferencën e përbashkët për medie me kryeministrin në detyrë të Malit të Zi, Dritan Abazoviq, Kurti tha se dy vendet duhet të punojnë për promovim të paqes dhe sigurisë në rajon.

Në anën tjetër, Abazoviq, tha se Mali i Zi nuk do të ketë asnjë ndryshim të qëndrimit ndaj Kosovës, përkundër ndryshimeve politike atje.

Policia e Kosova ka njoftuar se tri vetura janë përfshirë nga zjarri, në rrethana të panjohura, në fshatin Pasjak të Novobërdës.

Raportohet se rasti ka ndodhur mëngjesin e së enjtes.

“Pasjak, Novobërdë, 13.04.2023 – 04:50. Dy ankuesit meshkuj kosovarë kanë raportuar se në rrethana të panjohura nga zjarri u janë përfshirë tre vetura. Zjarrfikësit kanë shuar zjarrin. Rasti në procedurë hetimore”, thuhet në njoftimin e Policisë.

Mëngjesin e sotëm (e premte) zjarri përfshiu në hyrje të një banese shumëkatëshe në lagjen “Ulpiana” në Prishtinë.

Policia në Prishtinë tha se zjarri është lokalizuar dhe nuk ka pasur të lënduar.

“Sot rreth orës 08:00, kemi pranuar informatën për një incident zjarri në afërsi të një objekti, në lagjen Ulpiana në Prishtinë. Zjarri është lokalizuar, është raportuar vetëm për dëme materiale”, tha zëdhënësja e Drejtorisë Rajonale të Policisë në Prishtinë, Flora Ahmeti.

Aktualisht hetimet po vijojnë për të kuptuar më shumë mbi shkaqet e këtij zjarri.

KosovaPress ka tentuar të kuptojë më shumë për ngjarjen edhe përmes Zjarrfikësve në Prishtinë, por të njëjtit, deri në publikimin e këtij artikulli, nuk kanë qenë të qasshëm.

Policia e Kosovës në Ferizaj ka arrestuar një 21-vjeçar të dyshuar për disa vjedhje dhe tentim vjedhje. I dyshuari ndodhet në mbajtje ndërsa automjetet e vjedhura tashmë u janë kthyer pronarëve.

Raportohet se i dyshuari me inicialet M.E kishte tentuar të kryejë disa vjedhje edhe në shtëpi banimi.

“Me datën 04.04.2023 në rrugën ‘’ Isa Boletini’’ është vjedhur një veturë pikap; me datën 04.04.2023 në rrugën ‘’Rexhep Bislimi’’ është vjedhur një veturë e tipit Passat; me datën 11.04.2023; në rrugën ‘’Daut Dauti’’ është vjedhur një kamionet e tipit Mercedes; me datën 11.04.2023 në rrugën ‘’Rexhep Bislimi’’ është tentuar të vjedhet në një shtëpi banimi; me datën 11.04.2023 në rrugën ‘’Riza Goga’’ është tentuar të vjedhet në një shtëpi banimi dhe të vjedhet një veturë”, thuhet në njoftimin e Policisë.

Sipas Policisë, i dyshuari është identifikuar pas mbledhjes së informacioneve si dhe shikimit të kamerave të sigurisë.

“I dyshuari M.E është shoqëruar në stacionin e policisë në Ferizaj dhe pas intervistimit të tij nga policët hetues, në prani edhe të avokatit mbrojtës, me vendim të prokurorit të rastit është ndaluar në mbajtje për 48 orë, për procedura të mëtejme hetimore, ndërsa automjetet e vjedhura pas përfundimit të procedurave u janë kthyer pronarëve”, ka bërë të ditur Policia.

Komisioni Qendror i Zgjedhjeve (KQZ) ka publikuar raportet e paaudituara financiare të partive politike të vitit 2022.

“Duke pasur parasysh se ende nuk është bërë auditimi i këtyre raporteve, publikimi i tyre shoqërohet me tekstin sqarues: “Këto raporte financiare janë të paaudituara dhe mund të pësojnë ndryshime dhe saktësime gjatë procesit të auditimit”. Pas përfundimit të procesit të auditimit nga auditorët e jashtëm, raportet e audituara do të publikohen në të njëjtën hapësirë në ueb faqen e KQZ-së”, thuhet në njoftimin e KQZ-së.

KQZ-ja ka publikuar raportet financiare për 51 subjekte politike, përfshirë edhe partitë e mëdha në vend.

Katër raste të dhunës ndaj grave janë raportuar në 24 orët e fundit në Kosovë, njoftoi Poicia. 

Sipas raportit 24-orësh thuhet se rastet kanë ndodhur në Prishtinë, Podujevë, Lipjan dhe Viti.

Në Prishtinë, një burrë është arrestuar pasi që ka ushtruar dhunë ndaj gruas. Viktima ka pranuar tretman mjekësor, ndërsa i dyshuari është dërguar në mbajtje.

Dhunë fizike dhe psikike u ushtrua edhe ndaj një gruaje në Podujevë, ndërkohë që burri i dyshuar u dërguar në mbajtje.

Derisa në Lipjan, viktima femër kosovare ka raportuar se i dyshuari mashkull kosovar ka ushtruar dhunë psikike ndaj saj. Me vendim te prokurorit, i dyshuari është dërguar ne mbajtje.

Ndërkohë, në Viti, një grua u sulmua fizikisht nga burri, pas një mosmarrëveshje. Edhe ky, me vendim të prokurorit është dërguar në mbajtje.

Tre të dyshuarit për sulm ndaj gazetarit Valon Syla do të dalin sot para Gjykatës Themelore në Prishtinë.

Prokuroria Speciale e Republikës së Kosovës (PSRK), ka paraqitur kërkesë për caktimin e masës së paraburgimit ndaj tre personave të ndaluar për veprën penale ‘’Nxitja e përçarjes dhe urrejtjes’’, L.D., K.H dhe O.H.

Tre të dyshuarit u arrestuan më 12 prill, ndërsa Prokuroria Speciale më pas njoftoi se të arrestuarit janë personat e dyshuar me inicialet L.D, K.H dhe O.H., dhe se të njëjtit dyshohen se kanë kryer veprën penale ‘’Nxitje e përçarjes dhe mos durimit’’.

Ambasada e Shteteve të Bashkuara të Amerikës, ka reaguar duke thënë se sulmet ndaj gazetarëve dhe ndërhyrja në pavarësinë dhe lirinë e tyre të shprehjes, shkelin parimet thelbësore demokratike.

Lidhur me këtë rast, ka reaguar edhe Kryeministri Albin Kurti, i cili kërkoi nga institucionet që rastin ta trajtojnë me seriozitet. Njëjtë kërkoi edhe ministrja e Drejtësisë, Albulena Haxhiu.

Sulmin ndaj Sylës e ka dënuar edhe Qendra Evropiane për Liri të Shtypit dhe Medias. Ndërsa, Këshilli për Mbrojtjen e të Drejtave e të Lirive të Njeriut, ka thënë se dhuna fizike ndaj gazetarëve po shndërrohet në një dukuri dhe se kësaj dhune po i paraprinë fillimisht një linçim publik medial. KMDLNj e ka cilësuar sulmin ndaj Sylës si sulm ndaj lirisë së shprehjes.

Kurse, në raportin 24 orësh të Policisë, të mërkurën, u tha se rasti ka ndodhur mbrëmë rreth orës 22:29, në rrugën “Ilir Durmishi” në Prishtinë.

Lidhur me rastin ka reaguar edhe Asociacioni i Gazetarëve të Kosovës (AGK), duke kërkuar hetime urgjente.

Gazetari Syla, përmes një postimi në Facebook, ka thënë se është mirë dhe tregoi se cili mendon të jetë shkaku i sulmit.

“Sulmi me çdo gjase ka të bëjë me reagimet e mia rreth ‘Mulla Mercedesit’ dhe ngjarjeve në BIK, qe duket se nuk ju ka pelqyer fare dhe keshtu ka nxitur ketë komunitet te militanteve islamik të organizojne sulm fizik të paramenduar”, ka shkruar ndër të tjera ai. /BetimipërDrejtësi