Author: G.O.

Data 8 shtator ishte historike për Kosovën në aspektin sportiv pasi u arrit objektivi për të marrë të drejtën e organizimit të Lojërave Mesdhetare për vitin 2030. Me 55 vota pro dhe tetë kundër, Kosova mori të drejtën për organizimin e kësaj ngjarje të madhe sportive, por rruga për të arritur deri tek ky sukses nuk ishte aspak e lehtë.

Në një intervistë për KosovaPress, presidenti i Komitetit Olimpik të Kosovës (KOK), Ismet Krasniqi, ka zbuluar prapaskena interesante që nga lindja e idesë për të kandiduar e deri tek triumfi i madh.

“Në kohën kur ishim në Oran të Algjerisë, aty lindi ideja që t’i marrim Lojërat Mesdhetare. E kemi studiuar sa kemi qenë në Oran të Algjerisë gjithë organizimin e atij procesi, kemi pyetur edhe njerëz të cilët kanë qenë të kyçur ne shtetin e Algjerisë për organizimin e garave edhe Lojërave Mesdhetare në atë shtet, i kemi mësuar të gjitha sfidat, problemet që kanë hasur ata gjatë gjithë periudhës edhe kemi menduar që ne mund t’ia dalim… Pastaj filluam lobimin, filluam të bisedojmë më disa njerëz, por ka qenë shumë vështirë sepse Kosova një shtet i ri edhe shumica e shteteve mesdhetare as që e kanë njohur Kosovën, pra 12 shtete të Komitetit Olimpik Mesdhetar nuk e kanë njohur Kosovën, mandej ky problem ishte një sfidë shumë e madhe.”, theksoi Krasniqi.

I pari i KOK-ut zbulon më tutje se u përballën me dy sfida tejet të vështira gjatë kësaj rruge, që ishin përballja me Serbinë dhe ndryshimi i statutit të Komitetit Ndërkombëtar të Lojërave Mesdhetare.

“Mandej kemi pasur probleme gjatë rrugës, normal, sidomos me shtetin e Serbisë që dihet se edhe në fund u deklaruar hapur kundër kandidaturës sonë, por pa sukses sepse lobimi ynë ishte shumë i fortë, kështu që probleme ka pasur shumë. Në momentin kur ne ishim në asamble, sfida e madhe kaloi kur ne e kaluam statutin, ne më shumë jemi frikësuar tek statuti sepse lobimi ynë gjatë gjithë kohës ka qenë që të jemi i vetmi kandidat, kjo ka qenë një luftë shumë më e madhe se të gjitha të tjerat, sepse kanë qenë disa shtete që nuk dua t’i përmendi që kanë shpallur kandidaturën, mirëpo me mirëkuptim e me bashkëpunim, kemi arritur që ata të tërhiqen nga kandidatura”, tha Krasniqi.

Krasniqi u shpreh i lumtur që tani do të bëhen investime konkrete në infrastrukturën sportive dhe kjo për shkak se është dhënë garanci nga shteti para Komitetit Ndërkombëtar të Lojërave Mesdhetare.

“Të gjitha këto që janë folur rreth investimeve infrastrukturore, gjithmonë janë folur, por jo diçka konkrete. Tani, përmes Lojërave Mesdhetare do të bëhen konkrete sepse është dhënë një garanci që këto do të bëhen. Stadiumi kombëtar patjetër që do të bëhet sepse na duhet për hapjen dhe mbylljen solemne të Lojërave Mesdhetare dhe na duhen minimum 30 mijë ulëse. Është kërkesë, kjo është në statutin e Komitetit Olimpik të Lojërave Mesdhetare, nuk mund ta ndryshojmë”, theksoi Krasniqi.

Menjëherë pas lajmit që Kosova fitoi organizimin e Lojërave Mesdhetare u zhvillua një debat mes Ministrisë së Sportit dhe Komunës së Prishtinës mbi atë se kush dha kontribut më të madh në këtë sukses, por kryetari i KOK-ut ka një përgjigje për këtë debat.

“Ky është një interes kombëtar dhe meritat i ka gjithë ky popull. Meritat i ka Majlinda Kelmendi, Distria, Nora, Toni, garuesit e tjerë, sportistët e tjerë nga boksi, karateja e të gjitha sportet e tjera që na kanë dhënë motiv ne që të punojmë në këtë drejtim sepse po të mos kishim motivim nga këta sportistë që po na bëjnë krenarë, ne ndoshta nuk do të hynim në këtë punë fare. Kështu që meritat po ua lëmë të gjithëve, nuk ka nevojë t’i ndajmë, me rëndësi është që është arritur një fitore shumë e madhe për të gjithë popullin e Kosovës. Unë personalisht si kryetar i Komitetit Olimpik që gjatë asaj periudhe i kemi sjellë një gëzim popullit të Kosovës”, tha Krasniqi.

Në fund Krasniqi bëri të ditur se një fokus të veçantë para Lojërave Mesdhetarë do t’i kushtohet sportit të futsallit pasi shihet si një prej sporteve me kapacitete të mëdha për t’u zhvilluar në Kosovë dhe që Kosova të përfaqësohet sa më mirë në futsall në këto lojëra në vitin 2030.

Një banesë ishte përfshirë nga zjarri në rrugën “Nënë Tereza” në Fushë Kosovë gjatë ditës së premte, ku për pasojë 16 persona kanë kërkuar ndihmë mjekësore.

Sipas policisë, për shkaqe të panjohura nga zjarri ishte përfshirë një banesë e cila gjendet në katin e 5 të objektit banesor.

Në vendin e ngjarjes kanë dalë të gjitha njësitë relevante të policisë, zjarrfikësit të cilët e kanë shuar zjarrin, eksperti i zjarreve dhe autoambulanca.

Si pasojë e zjarrit disa banorë janë evakuuar nga objekti banesor, ndërsa si pasojë e tymit 12 qytetarë, dy zyrtarë policorë dhe dy zjarrfikës kanë pranuar tretman mjekësor, ku tre prej qytetarëve janë dërguar edhe në QKUK dhe pas tretmanit janë liruar.

Lidhur me rastin është njoftuar prokurori i cili e ka cilësuar rastin dhe vazhdon të hetohet.

Një person ka humbur jetën në fshatin Jabllanicë e Madhe të komunës së Pejës pasi kishte pësuar lëndime me motosharrë.

Policia konfirmoi se rasti ishte raportuar nga i biri i të ndjerit që në çastin kritik kishte qenë duke prerë dru.

“Ankuesi ka raportuar se babai i tij, viktima mashkull kosovar, duke prerë dru, dyshohet se është lënduar me motosharrë dhe për pasojë ka mbetur pa shenja jete”, raportoi policia.

Vdekjen e ka konfirmuar ekipi i emergjencës.

Me vendim të prokurorit, trupi i pajetë i viktimës është dërguar në Institutin Mjekoligjor për obduksion.

Numri i rasteve të kancerit të gjirit tek moshat e reja po shënon rritje. Rreth 430 gra gjatë këtij viti mendohet se do të jenë raste të reja të atakuara me këtë sëmundje. Përveç sfidave me shëndetin, ato ballafaqohen edhe me kushte jo të mira për trajtim. Drejtoresha e Qendrës për Luftimin e Kancerit të Gjirit “Jeta/Vita”, Nafije Latifi ngrit shqetësimin se 5.5 gra konkurrojnë në ditë për një shtrat në Klinikën e Onkologjisë. Gjatë “muajit rozë”, siç njihet tashmë tetori, ajo thotë se do të organizojnë ligjërata me komunitetet në vend. Për të 17-n herë me radhë do të marshohet edhe me thirrjen “Zbulimi i hershëm – mbijetesë”.

Nafije Latifi, e cila është drejtoreshë e Qendrës për Luftimin e Kancerit të Gjirit “Jeta/Vita” thotë se mbi 400 raste me kancer të gjirit po shënohen çdo vit në vend.

“Kemi kërkuar çdo herë ndërgjegjësim së pari, sepse ne si shoqëri civile këtë kompetencë e kemi, që të informojmë dhe të ndërgjegjësojmë gratë që sëmundja është këtu, atakon një numër të madh të tyre. Këtë vit mendohet që do të jenë rreth 430 gra raste të reja. Dhe jemi munduar që të sensibilizojmë edhe institucionet që të kenë kujdes më të madh për mundësitë e diagnostikimit dhe të trajtimit të grave. Për vite nga koha kur jam atakuar unë në vitin 2004 ka ndryshime të mira, pozitive”, shprehet ajo.

Rastet e reja të prekura me këtë sëmundje po atakojnë së fundmi edhe moshat më të reja.

“Për fat të keq po shihet se po bie mosha e grave që atakohen me këtë sëmundje. Derisa viteve të kaluara dhe nëpër botë atakohet një moshë rreth 45-55 (vjeçare) kjo është mesatarja që atakohen gratë nëpër botë, tek ne për shkak të moshës më të re të popullsisë po vërehet që edhe mosha e grave që atakohen me këtë sëmundje është në rënie. Kemi edhe raste edhe rreth të 30-tave, rreth të 40-tave që janë paciente në Onkologji”, deklaron Latifi.

Derisa thotë se kosto për trajtimin e pacientëve është shumë e madhe, gruaja e cila u atakua vet nga kjo sëmundje tregon se mungojnë kushtet për trajtimin e kancerit të gjirit.

“Kushtet në Onkologji janë mjaft të kufizuara, ajo ndërtesë është paraparë për një numër shumë më të vogël të pacientëve, kurse numri çdo herë shtohet dhe mundësitë janë të vogla. Vitin e kaluar është dhënë një shënim që 5.5 pacientë konkurrojnë në ditë për një shtrat. Merreni me mend sa duhet të pritet. Kemi edhe lista të pritjes edhe në Radiologji në Radioterapi, mirëpo nuk janë të jashtëzakonshme, sepse është sjellë edhe një aparat shumë i sofistikuar për radioterapi. Kushtet po përmirësohen dita-ditës por jo me atë dinamikë sa është nevoja e pacientëve”, shton Latifi.

Qendra për Luftimin e Kancerit të Gjirit “Jeta/Vita” po kërkon çdo vit që të sigurohen produktet që u nevojiten grave gjatë trajtimit me kancer të gjirit.

“Një prej kërkesave tona është edhe sigurimi i produkteve të cilat ndikojnë në psikiken e grave, siç janë parukat, protezat dhe gjoksoret. Për vite me radhë i kemi siguruar duke i lypur nga kompanitë e ndryshme të cilat na kanë ofruar donacionet për shoqatën, por ne të gjitha ato i kemi orientuar për nevojat e pacientëve”, deklaron ajo për KosovaPress.

Me mesazhin se sëmundja e kancerit mund të tejkalohet, Nafije Latifi e cila mposhti kancerin e gjirit kërkon nga rrethi që të përkrahin gratë.

“Të gjitha gratë që diagnostikohen edhe trajtohen nga kjo sëmundje duhet të gjejnë forcën në vete që të trajtohen me një pozitivit, me një forcë, besim të madh që do ia dalin. Së pari është mesazhi për familjarët edhe për rrethin e tyre që të kenë mirëkuptim, t’i mbështesin, t’ju ndihmojnë dhe t’ia dalin së bashku. Në rrugëtimin tim nga viti 2004 me këtë sëmundje, ka qenë familja, bashkëshorti im i ndjerë dhe miqtë e mi të cilët kanë qenë çdo moment pranë meje dhe më kanë dhënë shumë forcë që t’ia dal për vite me radhë edhe pse sëmundja më është kthyer disa herë, unë kam pasur shumë mbështetje dhe shumë besim, përkrahje nga familjarët dhe miqtë që të përballojë dhe t’ia dal kësaj sëmundje”, shprehet Latifi.

Tetori, i njohur ndryshe si “muaj rozë” shënon muajin ndërkombëtar të luftimit të kancerit të gjirit.

Edhe këtë vit do të organizohet marshi tradicional “Zbulimi i hershëm – mbijetesë”, me thirrjen që gratë të bëjnë kontrolle të rregullta.

“Këtë vit kemi paraparë ligjërata në bashkëpunim me Shoqatën e Onkologëve të Kosovës, me të cilët bashkëpunojmë për vite me radhë dhe me të cilët kemi qenë në të gjitha komunat e Kosovës. Vitin e kaluar kemi qenë në 11 kolegje dhe kemi bashkëbiseduar sepse këto ligjërata janë interaktive… Sivjet kemi planifikuar ligjërata me pjesëtarë të minoriteteve, të cilat jetojnë në Kosovë dhe jemi në koordinim me ta. Kemi paraparë ecjen tradicionale për herë të 17-të, shpresojmë që do të kemi popullatë por do të kemi edhe krerët e institucioneve”, përfundon ajo.

Marshi tradicional do të organizohet me 14 tetor nga ora 12 nga sheshi “Skënderbeu” në drejtim të atij “Zahir Pajaziti”

Po ashtu do të publikohet edhe promo televizive, e cila fton gratë për vet kontrolle dhe donacione për gratë e prekura nga kanceri i gjirit.

Kryeministri Albin Kurti ka pasur një bisedë telefonike me këshilltarin për siguri kombëtare në Shtetet e Bashkuara, Jake Sullivan.

Ai ka falënderuar zyrtarin e lartë amerikan për mbështetjen e SHBA por në të njëjtën kohë ka kërkuar ndihmë më të madhe kundër planeve luftarake të Serbisë.

“Kam falënderuar Shtetet e Bashkuara për mbështetjen dhënë Kosovës në sigurinë kufitare dhe kam kërkuar ndihmë më të madhe kundër planeve luftarake të Serbisë. E kam siguruar për bashkëpunimin e vazhdueshëm të Policisë së Kosovës me KFOR-in dhe se përkushtimi ynë për t’i mbrojtur të gjithë qytetarët është i palëkundur”, ka shkruar Kurti në “X”.

Një ditë më parë (29 shtator) Koordinatori për komunikime strategjike në Këshillin e Sigurisë Kombëtare të SHBA-së, John Kirby, shprehu shqetësimin e Uashingtonit, për siç tha, “dislokimin e madh” të trupave të Serbisë përgjatë kufirit me Kosovën.

Në orët e para të 24 shtatorit, një grup terrorist i udhëhequr nga njeriu i ngushtë i presidentit serb Aleksandër Vuçiq si dhe nënkryetari i dorëhequr i Listës Serbe, Millan Radoiçiq, sulmuan policinë e Kosovës ku humbi jetën rreshteri Afrim Bunjaku.

Instituti Hidrometeorologjik i Kosovës parashikon që sot (30 shtator) të mbajë mot me diell dhe vranësira të shpërndara.

Temperaturat minimale do të lëvizin ndërmjet 7-10 gradë celsius, ndërsa maksimalet e ditës parashihen të lëvizin ndërmjet 22-25 gradë celsius.

Të dielën parashihet të mbajë mot me diell dhe pjesërisht i vranët. Vranësirat vende-vende, kryesisht rreth relievi malor parashihen të sjellin riga shiu.

Temperaturat minimale do të lëvizin ndërmjet 7-9 gradë celsius, ndërsa maksimalet e ditës parashihen të lëvizin ndërmjet 20-23 gradë celsius.

Do të fryjë erë kryesisht nga juglindja me shpejtësi 1-5m/s.

Forca Sigurisë së Kosovës (FSK) përmes një njoftimi publik thotë se po vazhdojnë të rritën dhe të zhvillohen me standardet më të larta profesionale.

FSK po ashtu njofton për stërvitjen e fundit që janë duke realizuar.

“Komanda e Doktrinës dhe Stërvitjes (KDS), po vazhdon të jetë qendër e gravitetit për edukimin, stërvitjen dhe realizimin e kurseve me qellim të mbështetjes dhe rritjes se gatishmërisë luftarake në nivel Force.

Kurse këto të cilat do të jene qenësore në ndërtimin e Liderëve, krijimin e bazës për këmbësori si specializim ushtarak, mbështetjen e njësive në operacione përmes transportit, reaguesve të parë ne fushëbetejë, operatorëve dhe qitësve në distanca të largëta”, theksohet në komunikatë.

Prokuroria Speciale e Republikës së Kosovës (PSRK), njoftoi se me kërkesë të PSRK-së dhe me urdhër të Gjykatës, në koordinim me EULEX-in dhe KFOR-in, Njësia Speciale e Policisë së Kosovës, ka zhvilluar sot aksion për bastisje në pesë (5) lokacione të ndryshme në komunat e pjesës veriore të Kosovës, kryesisht në pronat të cilat tanimë janë të evidentuara si prona të të dyshuarve M.R dhe V.R.

Prokuroria Speciale njoftoi se operacioni Policor ndërlidhet me sulmin terrorist të datës 24.9.2023, në fshatin Banjskë të komunës së Zveçanit, si dhe urdhër kontrolli është zhvilluar në pronat e të dyshuarve M.R dhe V.R. dhe në hapësirën e një objekti ndihmës të Spitalit Rajonal në Mitrovicë-Veri. Ky objekt i spitalit përdoret për sistemin e ngrohjes së spitalit dhe nuk ndërlidhet me hapësirat e spitalit ku trajtohen pacientet.

Pas realizimit të urdhër kontrollit në pronat e të dyshuarve janë sekuestruar në cilësi të provave materiale:

· 2 Automjete Mercedes

· Argjend 4.84 Kg

· 2 Motor 4X4

· 1 Barkë-Anije

· 7 DVR

· 2 Pllaka antiplumb me dy mbrojtës

· 3 Thika

· 2 Rutera

· 2 Çelësa të veturave

· 5 Gëzhoja

· 1 Dronë

· 5 USB

· 1 Kamera GoPro- SSD

· 1 Video kamerë me kartelë

· 1 Shënjestër optike

· 1 Spray

· 7 telefona celular

Po ashtu, Prokuroria Speciale do të parashtroj urdhrin ndalues në Gjykatën kompetente për sekuestrim të një vile buzë liqenit të Ujmanit, një penthouse dhe një lokali.