Author: G.O.

Policia e Kosovës ka arrestuar një burrë mbrëmë në Prishtinë, nën dyshimet se ka dhunuar një grua.

Rastin e ka raportuar në Polici viktima. I dyshuari, me vendim të prokurorit, është dërguar në mbajtje.

“DHUNIM – Prishtinë 13.11-15.12.2012- NN. Viktima femër kosovare ka raportuar se i dyshuari mashkull kosovar e ka detyruar me dhunë që të kryej marrëdhënie seksuale pa dëshirën e saj. I dyshuari është arrestuar dhe me vendim të prokurorit është dërguar në mbajtje”, thuhet në raport.

Një shtetas serb është arrestuar dje në Prishtinë.

Policia bëri të ditur se i njëjti kishte urdhër arrest ndërkombëtar të lëshuar nga Interpoli.

“Prishtinë 15.12.2023-10:20. Në bazë të urdhër arrestit ndërkombëtar të Interpolit është arrestuar i kërkuari mashkull shtetas i Serbisë”, thuhet në raportin e Policisë.

Tutje, Policia njoftoi se me vendim të prokurorit është dërguar në qendrën e mbajtjes.

Një mijë e 596 gjoba trafiku janë shqiptuar në 24 orët e fundit në vendin tonë.

Gjatë kësaj periudhe kanë ndodhur 21 aksidente me të lënduar dhe 33 me dëme materiale.

Ndërkaq,  në  24 orët e fundit, janë arrestuar 11 persona dhe shtatë janë dërguar në mbajtje.

Instituti Hidrometeorologjik i Kosovës ka njoftuar se të shtunën parashihet të mbajë mot kryesisht i vranët dhe kohëpaskohe me reshje shiu dhe bore.

Sipas institut, temperaturat minimale do të lëvizin ndërmjet -2 deri -1 gradë Celsius, ndërsa maksimalet e ditës parashihen të lëvizin ndërmjet 0-1 gradë Celsius.

“Do të fryjë erë kryesisht nga verilindja me shpejtësi 1-7m/s. Të dielën do të mbajë mot i vranët dhe me intervale me diell. Temperaturat minimale do të lëvizin ndërmjet -4 deri -2 gradë Celsius, ndërsa maksimalet e ditës parashihen të lëvizin ndërmjet  1-3 gradë Celsius. Do të fryjë erë e lehtë deri mesatare nga drejtimi i verilindjes dhe veriperëndimit”, thuhet në njoftim.

Ish-guvernatori i Bankës Qendrore të Kosovës, Fehmi Mehmeti ka thënë se rritja e normës së interesit është alternativa e vetme për ta ulur normën e inflacionit në vend. Sipas tij, kreditë në vend duhet të rriten por që kërkon kujdes sidomos në sektorë që konsdierohen me rrisk më të vogël, raporton Ekonomia Online.

Krahas remitencave, sektorin bankar Mehmeti e konsideron si kryesorin për zhvillimin ekonomik. Thotë se aktualisht në Kosovë ka stabilitet financiar dhe se bankat duhet të jenë në funksion të zhvillimit ekonomik të vendit.

Ndonëse është pro rritjes së kredive, Mehmeti kërkon kujdes të shtuar e sidomos te sektorët që konsiderohen me rrisk më të vogël, siç është ndërtimi, teksa citon edhe Raportin e Progresit që kërkon kujdes të shtuar ndaj këtij sektori.

“Realisht, kreditë janë përcaktues të zhvillimit ekonomik në vend. Një pjesë e konsumit financohet përpos remitencave edhe prej kredive konsumuese dhe konsumi është një prej atyre indikatorëve që e ka ndiku pozitivisht rritjen ekonomike në vend, gjithashtu edhe është në mbështetje të bizneseve duke pasur parasysh që sektori privat është bartës i zhvillimit ekonomik të vendit dhe një kontribut jashtëzakonisht të rëndësishëm e jep edhe sektori bankar”, thotë Mehmeti.

“Banka Qendrore sa kam qenë unë Guvernator edhe tani objektivi primar i kësaj është stabiliteti financiar dhe gjithmonë kam kërkuar që bankat të jenë në funksion të zhvillimit ekonomik të vendit. Me këtë desha të jap mesazhin se jam pro rritjes së kredive por një rritje e kujdesshme dhe e shëndetshme nëpër sektorë të cilët kanë rrisk më të vogël. Këtë çka kisha kërkuar unë. Është mirë që sektori bankar, është mirë që bizneset dhe ekonomitë familjare, të gjithë që konsumojnë produkte financiare në këtë rast kredi, ta bëjnë një analizë vetës për të parë se sa janë të aftë për t’i konsumuar këto kredi. Edhe në Raportin e Komisionit Evropian, rekomandon që duhet të kenë kujdes ose monitorim nga afër për disa sektorë të cilët konsiderohen si sektorë me rrisk e që këtë rast është ndërtimi”, thotë tutje Mehmeti.

Në një intervistë për Ekonomia Online, Mehmeti është shprehur i bindur se do të ketë edhe më tutje rritje të normës së interesit. Kjo thotë do të varet shumë nga kërkesa e FMN-së ndaj Bankës Qendrore Evropiane.

“Norma e interesit është rritë, aktualisht norma efektive e interesit në Kosovë është rreth 6.6 për qind nga 5.8 për qind sa ka qenë. Pritet të ketë edhe rritje të mëtutjeshëm të normës së interesit nëse e kemi kërkesën e Fondit Monetar Ndërkombëtarë në adresë të Bankës Qendrore Evropiane që duhet të vazhdojë me rritjen e normave të interesit deri në gjysmën e vitit 2024 për ta kontrolluar inflacionin”, u shpreh Mehmeti, teksa rritjen e normës së interesit e sheh alternativë të vetme për ta kontrolluar inflacionin.

Sipas Mehmetit, nëse Fondi Monetar Ndërkombëtar vazhdon me kërkesë të njëjtë, atëherë edhe në Kosovë do të ketë rritje të mëtutjeshme të normës së interesit në kredi.

“Veprimet që i merr Banka Qendrore Evropiane janë alternativat e vetme të cilat i kanë në dispozicion për ta kontrolluar inflacionin. Për mua ka qenë i pritshëm rritja e inflacionin për arsye se të shumë faktorëve, në rend të parë kishim një ndërprerje të zinxhirit të furnizimit dhe më pastaj rritje të kërkesave pas pandemisë dhe kjo natyrshëm e ndikon rritjen e inflacionit por tash masat që janë ndërmarrë, prej zero për qind sa kanë qenë norma interesit ka shkuar në 3.5 për qind në mars të vitit 2023 dhe kjo me automatizëm i ndikon kreditë e reja dhe kreditë aktive të cilat në referencën e tyre i referohen Euroborit dhe kjo nëse vazhdon rritja e normës së interesit dhe Banka Qendrore Evropiane merr parasysh rekomandimet e FMN-së, me siguri që do të kemi rritje edhe mëtutjeshëm të normës së interesit në kredi”, thotë Mehmeti.

Holanda ka nisur procesin e ligjërimit të përdorimit të kanabisit, i cili do të lejojë prodhimin, furnizimin, pirjen e ligjshme si dhe synon uljen e përfshirjes së bandave kriminale në këtë aktivitet.

Përdoruesit e kanabisit në dy qytete holandeze mund të pinë duhan në mënyrë të ligjshme për herë të parë pasi autoritetet do të bëjnë një provë që do të zgjeronte tolerancën e vendit ndaj marihuanës në ligjshmëri të plotë.

Ministri i Shëndetësisë Ernst Kuipers e konsideroi një moment historik ndërsa kaloi në skaner kutinë e parë të kanabisit legal në kafenenë Baron në qytetin jugor të Bredës. Prodhimi do të kufizohet në një pjesë të vogël të fermave, kanabisi i të cilave do të monitorohet nga afër përpara se të dërgohet në kafene.

Konsumatorëve do tu garantohej një produkt me cilësi të lartë, ndërsa më parë ishte e pamundur të dihej se nga vinte kanabisi ose nëse ishte ndryshuar. Niveli i THC dhe CBD, përbërësit aktivë të kanabisit, do të matej, kështu që përdoruesit do të jenë ne dijeni të forcës së tij.

Kryetari i Aleancës për Ardhmërinë e Kosovës (AAK), Ramush Haradinaj, ka qëndruar në Junik në vazhdën e takimeve të grupit koordinues të degëve të AAK-së të rajonit perëndimor të vendit.

Haradinaj përmes një postimi në Facebook ka bërë të ditur se kanë diskutuar për zhvillimet politike në vend.

“Në Junik, në takimin e radhës së grupit koordinues të degëve të rajonit perëndimor të vendit zhvilluam një diskutim përmbajtësor për zhvillimet politike, aspektet organizative dhe punët që na presin në vitin 2024”, ka thënë Haradinaj.

Haradinaj ka shtuar se AAK asnjëherë nuk ka qenë më e fortë si në aspektin organizativ ashtu edhe në pozicionin e vet politik.

“Ishte konkluzion i përbashkët që Aleanca kurrë nuk ka qenë më e fortë, si në aspektin organizativ e po ashtu në pozicionin e vet politik, duke qenë të vendosur për t’i dhënë fund kësaj qeverie humbëse e cila ishte vetëshpallur qeveri e shpresës, por vetëm shpresë nuk i dha këtij vendi! Kjo qeveri tradhtoi besimin e secilit qytetar, pasi e solli të kundërtën e asaj që ka premtuar, duke e futur vendin në varfëri e qytetarët në zhgënjim të thellë. Është koha për t’i dalë zot vendit!”, është shprehur Haradinaj.

Kryeministri i vendit, Albin Kurti, bashkë me zëvendëskryeministren për Çështje të Pakicave dhe të Drejtat e Njeriut, Emilija Rexhepi, mori pjesë në ceremoninë e ndarjes së çmimeve për gratë e arta të Kosovës, ngjarje kjo e organizuar nga kabineti i zëvendëskryeministres Rexhepi dhe NGO “Lady”.

Në fjalën e tij, Kurti tha se po nderojmë gra të jashtëzakonshme për përkushtimin e tyre të palëkundur, për të kremtuar arritjet dhe kontributin e 63 grave të shquara në fusha të ndryshme, nga komunitetet tona.

Duke theksuar mbështetjen e Qeverisë, kryeministri theksoi se për vajzat studente kemi ndarë mbi 4600 bursa në fushat STEM- Shkencë, Teknologji, Inxhinieri dhe Matematikë, e cila ka bërë që pjesëmarrja e vajzave në këto fusha, të arrijë në 50% në Kosovë, ndërkohë që mesatarja në vendet e Bashkimit Evropian është 17%.

Ai përmendi edhe shtesat për fëmijë dhe nënat e reja lehona, duke thënë se deri më tani, kanë përfituar mbi 387 mijë fëmijë dhe 50 mijë nëna të reja.

Ai përmendi dhe skemën “Qeveria për Familjet” dhe veçorinë e re të shtuar, që ka cak punësimin e të mbijetuarave të dhunës në familje, thuhet në njoftim.

Në përfundim, ai fuqizoi mesazhin se arritjet e grave janë një dëshmi e fuqisë së unitetit dhe potencialit të jashtëzakonshëm dhe se vlerësimi i merituar për këto arritje, duhet të na shërbejnë si kujtesë për atë që mund të arrijmë së bashku.

“Le të vazhdojmë të mbështesim njëri-tjetrin, sepse së bashku do të krijojmë një të ardhme më të drejtë për të gjithë. Historitë e juaja do të vazhdojnë të na frymëzojnë, për lartësi të reja në rrugën e barazisë dhe të progresit”, është shprehur Kurti në fjalimin e tij.