Author: G.O.

Lideri i Koresë së Veriut, Kim Jong Un, tha se Peniani nuk do të ngurrojë të kryejë sulm bërthamor, nëse “një armik na provokon me armë bërthamore”, raportuan mediat shtetërore të enjten.

Kimi i bëri këto komente gjatë një takimi me ushtarët që po punonin në bazën raketore të ushtrisë dhe i uroi ata për lëshimin e raketës balistike interkontinentale nga Peniani në fillim të kësaj jave, raportoi agjencia shtetërore e lajmeve KCNA.

Ai tha se testimi i raketës dëshmoi besnikërinë dhe qëndrimin e fuqishëm të forcave të armatosura, dhe se ishte “një shpjegim i qartë i zhvillimit të strategjisë dhe doktrinës bërthamore të DPRK-së për të mos ngurruar të kryejë sulm bërthamor kur armiku provokon me armë bërthamore”, sipas KCNA.

DPRK-ja është shkurtesë e emrit zyrtar të Veriut, Republika Demokratike Popullore e Koresë.

Të hënën, Koreja e Veriut e lëshoi në det raketën Hwason-18 ICBM gjatë një stërvitjeje që kishte për qëllim t’i paralajmëronte Shtetet e Bashkuara dhe Korenë e Jugut për hapa konfrontues. Si arsye për këtë, Koreja e Veriut e përmendi një takim të vonshëm mes SHBA-së dhe Koresë së Jugut për të biseduar për frenimin e planeve të saj bërthamore.

SHBA-ja, Koreja e Jugut dhe Japonia e kanë kritikuar testimin raketor të Koresë së Veriut duke e cilësuar si provokim dhe duke thënë se i ka shkelur shumë rezoluta të Këshillit të Sigurimit të OKB-së të cilat ia ndalojnë Veriut aktivitetet balistike.

Dy ditë më vonë, bombarduesit amerikanë me rreze të gjata veprimi kryen stërvitje të përbashkëta me avionët luftarakë të Japonisë dhe Koresë së Jugut, në shenjë force kundër Koresë së Veriut.

Bombarduesi B-1B është në gjendje të bartë ngarkesë të madhe të armëve konvencionale. Në të kaluarën, Koreja e Veriut e ka cilësuar fluturimin e bombarduesit amerikan mbi Gadishullin Korean si dëshmi e armiqësive amerikane dhe është përgjigjur duke kryer testime raketore.

Kim Jong Un tha se testimi i raketës balistike të hënën dëshmoi se Koreja e Veriut mund të përgjigjet, nëse Shtetet e Bashkuara do ta marrin “një vendim të gabuar kundër saj”.

Por, shumë ekspertë të huaj thonë se Koreja e Veriut ende përballet me pengesa teknologjike për të zotëruar raketa balistike interkontinentale me kokë bërthamore me të cilat do të mundë ta godiste SHBA-në./REL/

Presidentja e Kosovës, Vjosa Osmani do të mbajë sot (e enjte) takimin e radhës të Këshillit për Demokraci dhe të Drejta të Njeriut.

Sipas njoftimit, takimi do të fillojë nga ora 9:30.

Është plagosur mbrëmë një person me armë zjarri në Fushë-Kosovë, njoftoi Policia e Kosovës.

Sipas policisë deri tek ky incident ka ardhur pas një mosmarrëveshje në mes të dy grupeve me nga dy persona.

Lidhur me këtë rast janë arrestuar dy persona, teksa dy të tjerë mbetën të ende të panjohur për policinë.

I dyshuari i plagosur gjendet në QKUK-së për trajtim mjekësor me përcjellje policore, ndërsa tek i dyshuari i dytë është gjetur dhe konfiskuar një pistoletë.

Për këtë rast policia ka identifikuar edhe një person që gjendet në arrati.

“Rr.Nëna Terezë-Fushë Kosovë,20.12.2023-22:00. Janë arrestuar dy të dyshuar meshkuj kosovarë pasi që pas një mosmarrëveshje me dy të dyshuar të tjerë për momentin të panjohur ka ardhur deri tek incidenti i plagosjes me armë zjarri te njërit prej të dyshuarve të lartcekur. I dyshuari i plagosur gjendet në QKUK-së për trajtim mjekësor me përcjellje policore, ndërsa tek i dyshuari i dytë është gjetur dhe konfiskuar një pistoletë. Lidhur me rastin është identifikuar edhe i dyshuari i tretë i cili deri me tani gjendet në arrati. Është konsultuar prokurori kujdestar i cili ka lëshuar aktvendim mbi ndalimin e personave te dyshuar. Rasti është duke u hetuar”, thuhet në njoftim.

Gjeneral brigade Bundeswehr-it Ralf Hammerstein, ka thënë se siguria në Kosovë po përkeqësohet dukshëm dhe NATO po e shton praninë e saj në pranverë, edhe me ndihmën e Bundeswehr-it – forcat e armatosura të Gjermanisë.

Siguria në rajonin e Ballkanit është e brishtë, prandaj dhe Shqipëria po forcon ushtrinë. Ministri i Mbrojtjes, Niko Peleshi tha se nuk jemi para një rreziku konkret, por konfliktet në veri të Kosovës ndikojnë që të shtohen masat.

Luftërat e hapura në botë dhe situata e tensionuar në rajonin e Ballkanit, për ministrin e Mbrojtjes të Shqipërisë Niko Peleshi duhet të jenë gjithmonë një alarm për Shqipërinë. Duke folur nga Shkodra, Peleshi tha se Shqipëria është një vend i sigurt si shtet anëtar i NATO-s, por gjithsesi kërkon që Forcat e Armatosura të jenë vigjilente dhe në gatishmëri.

“Jemi në moment të rëndësishëm sepse siguria është prioritet për shkak të konflikteve që po zgjerohen në mbarë botën. Ne jemi në një rajon të brishtë, pra në Rajonin e Ballkanit Perëndimor, fati i mirë është që jemi anëtar të NATO-s por gjithsesi konfliktet e fjetura të rajonit tonë delikat janë të lidhura me situatën e sigurisë në botë. Ne përgatitemi për më të keqen dhe shpresojmë për më të mirën”, tha Peleshi, raporton. Ju i keni ndjekur ngjarjet, s’ka ndonjë sekret, dy janë pikat e nxehta në Ballkan: veriu i Kosovës dhe Bosnja e Hercegovina për shkak të lidershpit të Republika Sërpskas. Ju i keni ndjekur zhvillimet e fundit, për fat të keq, një pjesëtar i policisë së Kosovës mbeti i vrarë nga një sulm terrorist në veri të Kosovës”, tha ai më tej, raporton “ReportTv”.

Ministri tha se qëllimi është për të rritur interesin e të rinjve për t’u bërë pjesë e ushtrisë shqiptare.

Autoriteti më i lartë Ushtarak i NATO-s, Komiteti Ushtarak, do të takohet personalisht më 17 dhe 18 janar 2024 në Bruksel.

Admirali Rob Bauer, kryetar i Komitetit Ushtarak, do të kryesojë takimin, ku do të marrin pjesë shefat e mbrojtjes aleate dhe homologu i tyre i ftuar nga Suedia.

Atyre do t’u bashkohet gjenerali Christopher Cavoli, komandant suprem i aleatëve për Evropë (SACEUR) dhe gjenerali Philippe Lavigne, komandant suprem i aleatëve për transformimin (SACT).

Takimi i Sesionit të Komitetit Ushtarak të Shefave të Mbrojtjes të NATO-s (MCCS) do t’u mundësojë shefave të mbrojtjes të takohen dhe të diskutojnë çështje me rëndësi strategjike për Aleancën Veri-Atlantike.

Zëvendëssekretari i përgjithshëm i NATO-s, Mircea Geoana do të bashkohet me Komitetin Ushtarak në seancën hapëse për të trajtuar prioritetet dhe sfidat kryesore të Aleancës.

Në sesionin e parë gjeneralin Cavoli nga SACEUR do të informojë shefat e mbrojtjes mbi përparimin e bërë drejt zbatimit dhe ekzekutimit të familjes së planeve të mbrojtjes që u miratua në Samitin e Vilnius në korrik 2023.

Diskutime më të gjera do të mbahen gjithashtu për mbrojtjen industriale kapaciteti, planifikimi operacional dhe mundësimi.

Gjenerali Lavigne nga SACT, do të informojë në sesionin e dytë dhe do të përditësojë transformimin luftarak të NATO-s.

Shefat e mbrojtjes do të diskutojnë gjithashtu udhërrëfyesin për përshtatjen ndaj kërcënimeve aktuale dhe të ardhshme.

Në sesionin e tretë, shefat e mbrojtjes do të diskutojnë mbrojtjen e integruar ajrore dhe raketore për të përmirësuar gatishmërinë, gatishmërinë dhe ndërveprueshmërinë në kohë paqeje, krizash dhe konfliktesh.

Në sesionin e katërt shefat e mbrojtjes do të japin udhëzime shtesë mbi parandalimin ushtarak dhe prioritetet e mbrojtjes të NATO-s, me fokus në kërkesat kyçe të aftësive përpara vendimeve të Samitit të Uashington në korrik 2024, njofton NATO.

Kryetari i Sindikatës së Policisë së Kosovës, Imer Zeqiri, pas takimit me ministrin e Punëve të Brendshme, Xhelal Sveçla, tha se diskutimet kanë qenë konstruktive dhe shpresëdhënëse.

Sipas tij, me ministrin janë pajtuar që të gjitha kërkesa dhe pakënaqësitë të realizohen me dialog, raporton Ekonomia Online.

Ai tha se në këtë takim, ku i pranishëm ishte edhe drejtori i Policisë së Kosovës, Gazmend Hoxha, janë dakorduar që kërkesat do të analizohen në detaje nga MPB-ja dhe në takimin e ardhshme të vendosen se cilat do të kenë prioritet.

Zeqiri ka thënë se edhe Sindikata e kupton se që të gjitha këto kërkesa, nuk mund të realizohen menjëherë. Ai tha se takimi i ardhshëm pritet të ndodhë në janar të viti të ardhshëm.

“Të bëhem shumë i sinqertë që biseda ka qenë jashtëzakonisht konstruktive edhe nga ministri Sveçla edhe normal nga drejtori i Policisë pasi që ishte prezent edhe ai aty. Gjatë tërë bisedës janë biseduar të gjitha kërkesat që i kemi parashtruar. Janë 14 kërkesa për të cilat kemi fol dhe bisedë e sipër në realitet nuk është marr ndonjë vendim. Është marr vendim që këto kërkesa të analizohen në detaje dhe në takimin e ardhshëm të vendosen se për cilat do të vendosen prioritete”.

“Është shumë normale që të gjitha këto kërkesa, edhe ne po deklarohemi që nuk mund të realizohen menjëherë. Mirëpo ne kërkuam edhe u dakorduam bashkë me ministrin që në takimin e ardhshmen të vendosim se prioritete për të cilat kërkesa janë të mundshme që të realizohen për Policinë e Kosovës. Ka qenë një bisedë konstruktive dhe shpresë dhënëse të gjitha këto kërkesa dhe pakënaqësitë të realizohen me dialog. Unë po shpresoj se kështu do të rrjedh edhe situata në vazhdimësi dhe në takimin e ardhshëm do t’i vendosim prioritet për cilat kërkesa mund të realizohen tani e cila nuk munden”, tha ai.

Vendet anëtare të Bashkimit Evropian dhe Parlamenti Evropian janë pajtuar që t’i ashpërsojnë procedurat e azilit, në kuadër të reformës evropiane për sistemin e azilit.

Qëllimi i marrëveshjes është që të zvogëlohet shkalla e migrimit në BE.

“Kemi bërë rrugë të gjatë për të arritur këtu. Por, ia kemi dalë. Evropa është më në fund e përkushtuar ndaj migrimit”, ka thënë zëvendëspresidenti i Komisionit Evropian, Margaritis Schinas, në një postim në X – platformë e njohur deri më tani si Twitter.

Presidentja e Parlamentit Evropian, Roberta Metsola, ka thënë se kjo ditë e mërkurë “do të hyjë në histori”.

“Dita kur BE-ja ka arritur marrëveshje për rregulla të reja për menaxhim të migrimit dhe azilit”.

Reforma është diskutuar qysh prej vitit 2015, kur një numër rekord migrantësh kanë arritur në BE.

Ndonëse shtetet me qeveri të krahut të djathtë, sikurse Hungaria, kanë qenë në të mirë të ashpërsimit të rregullave aktuale, organizatat për ndihmë dhe partitë politike të së majtës në Evropë, kanë shprehur shqetësim për degradim të të drejtave të njeriut.

Reforma “do të garantojë që ekziston përgjigje efektive evropiane për këtë sfidë evropiane”, ka thënë shefja e Komisionit Evropian, Ursula von der Leyen.

“Kjo do të thotë se evropianët do të vendosin se kush vjen në BE, dhe kush mund të qëndrojë këtu, jo kontrabanduesit”, ka thënë ajo.

Reforma parasheh rregulla më të ashpra për njerëzit që arrijnë në territorin e BE-së nga vendet që konsiderohen relativisht të sigurta.

Deri sa të merret një vendim ligjor për ta, azilkërkuesit do të strehohen nëpër disa qendra, nën rregulla strikte.

Kancelari gjerman, Olaf Scholz e ka mirëpritur reformën dhe ka thënë se ajo do të stabilizojë situatën në disa shtete.

“Kjo marrëveshje do të kufizojë migrimin ilegal dhe do të lehtësojë barrën në disa shtete që preken në veçanti, përfshirë Gjermaninë”, ka thënë ai.

Për herë të parë, vendet e BE-së do të obligohen për të marrë pjesë në të ashtuquajturin mekanizëm solidariteti, për t’i shpërndarë migrantët.

Kjo nënkupton që nëse një shtet nuk pranon të marrë refugjatë, atëherë ai shtet duhet të ofrojë mbështetje për vendet tjera në mënyrë tjetër, shembull, përmes kompensimit financiar.

Marrëveshja ende duhet të marrë konfirmimin final në seancën plenare të Parlamentit Evropian, dhe të nënshkruhet nga vendet anëtare të BE-së, proces që konsiderohet tejet formal./REL/