Author: G.O.

Pas aksidentit ditë më parë, ku një vdiq një person nga Kosova edhe një person tjetër ka humbur jetën në Shqipëri.

Lajmi për vdekjen e kanë bërë të ditur familjarët.

“Të nderuar familjarë, miq e dashamirë, me dhembje të madhe dhe pikëllim të thellë ju njoftojmë se me datë 20.01.2024 në moshen 42 vjeqar ka ndërruar jetë D.K pas aksidentit që bëri me 15.01.2024 në Shqiperi “, shkruan në njoftimin mortor.

Ambasadori i Gjermanisë në Kosovë, Jorn Rohde, ka folur lidhur me sulmin terrorist ndaj Policisë së Kosovës më 24 shtator, ku ka thënë se Banjska ndryshoi gjithçka.

Rohde ka thënë se ai vetë as nuk e ka imagjinuar se do të ndodhte diçka e tillë, derisa ka kërkuar që autorët të dalin para drejtësisë dhe të ndëshkohen.

“Banjska ndryshoi gjithçka. Ishte një sulm terrorist. Këta nuk ishin qytetarë të pakënaqur, por kishin raketahedhës, automatikë, granata… Jemi ende në kërkim të autorëve të dyshuar që duhet të dalin para drejtësisë. Vetë Milan Radoiçiq tha se është përgjegjës, por ende nuk ka përgjegjësi, nuk mund të pranojmë parimin e mosndëshkimit. Nëse kryen një krim, duhet të gjykohesh. Shpresojmë se Serbia është duke punuar në këtë”, ka deklaruar Rohde në një intervistë për Kosovo Online.

Ambasadori gjerman ka bërë me dije se Gjermania do ta shtojë praninë e saj në Kosovë me një kontigjent nga maji.

“Personalisht, nuk mund ta imagjinoja se do të ndodhte diçka e tillë, dhe për këtë arsye NATO e shtoi praninë e saj dhe Gjermania do të bëjë të njëjtën gjë me një kontingjent të ri nga maji. Ajo që duam është paqe dhe stabilitet. Sulmet si ky janë saktësisht e kundërta e kësaj. Nëse nuk dënohen autorët e sulmit në Banjskë, si mund të rritet besimi mes dy vendeve. Kjo ishte një punë e madhe dhe me të vërtetë autorët duhet të ndëshkohen”, ka deklaruar Rohde.

3 persona kanë vdekur pas zjarrit që shpërtheu në konviktin e një shkolle në Kinën qendrore.

Kështu ka njoftuar agjencia shtetërore e lajmeve Xinhua.

Siç raporton BBC, zjarri vdekjeprurës ndodhi të premten në mbrëmje në një shkollë për fëmijë të vegjël në fshatin Yanshanpu.

Drejtori i shkollës është arrestuar dhe një hetim është duke u zhvilluar.

Ndërkaq një person që ka mbetur i lënduar po trajtohet në spital dhe ndodhet në gjendje stabile.

Rreth 61 mijë vizita të pacientëve me grip sezonal kanë frekuentuar Qendrat e Mjekësisë Familjare në Komunën e Prishtinës. Kështu ka bërë të ditur për Ekonomia Online, drejtori i Shëndetësisë, Izet Sadiku.

Sipas Sadikut, në Kosovë qarkullojnë tri lloje të gripave dhe se i pranishëm ende është Covid-19.

Sadiku ka thënë se për dy javë të janarit, QMF-të në Kryeqytet kanë dhënë 200 mijë shërbime, një rritje e madhe krahasuar me dhjetorin.

“Kemi një numër shumë të madh një fluks ju edini që edhe në javën e kaluar Ministria e Shëndetësisë e ka shpallur me rekomandim të IKShPK-së si gjendje epidemisë së gripit në Kosovë dhe realisht sipas informatave në Kosovë janë duke qarkulluar tre virus, virusi i gripit, pastaj Covid-19 dhe virusi që njihet në popull si virusi gripi derrave dhe kemi pasur tre virus që qarkullojnë nëpër opinion dhe kjo ka ndikuar që me u rrit fluksi i pacientëve dhe kërkesa e tyre për shërbime mjekësore”, ka deklaruar Sadiku.

E shkak i numrit të madh të pacientëve, Sadiku thotë se edhe stafi është i mbingarkuar, shkaku i numrit të vogël të punëtorëve shëndetësor.

“Po ju tregoj që vetëm për 14 ditë kemi pasur në kryeqytet 61 mijë vizita ose dikun rreth 200 mijë shërbime mjekësorë për 14 ditë që ika ra vetëm që e krahasojmë me dhjetorin dikund 15 për qind më shumë  se në dhjetor kemi pasur kërkesa që bie që kemi një fluks të rritur të pacientëve të cilët janë shumica e tyre janë si pasojë e paraqitjes së epidemisë së gripit dhe këtu ka ndiku që stafi ynë me u ngarku dhe ju e dini që fatkeqësisht Prishtina është e pranueshme. Një sekret publik është kjo që Prishtina ka numër të vogël të punëtoreve shëndetësor numri i punëtorëve shëndetësor është i njëjtë prej vitit 2000, prandaj ne e dimë sa ka ndryshuar numri i banoreve në Prishtinë dhe ky staf që është sot në Prishtinë bazohet në regjistrimin e popullsisë së vitit 2011”, u shpreh Sadiku.

E lajm të mirë Sadiku e konsideron projektin për regjistrimin e pacientëve për mjek familjar. Ai ka ftuar qytetarët që të regjistrohen, në të kundërtën nuk do të mund të marrin shërbime mjekësore.

“Ministria e Shëndetësisë në këtë vite e ka filluar një projekt pilotim  për regjistrimin e pacientit për mjek familjar. Në Prishtinë është duke ndodh në dy lagje, në Dardani dhe Breg Diellit dhe po ftojë përmes jush qytetarët që me u regjistru me caktu mjekun familjar për arsye se nëse nuk e caktojnë mjekun  familjar nuk kanë më mujt me marr shërbime. Prandaj qytetarët që janë jorezident në Prishtinë që jetojnë në Prishtinë po e kanë një vendbanim dikun tjetër por krejt shërbimet i marrin në Prishtinë e kanë momentin që me u regjistrua si banorë të Prishtinës, nëse dëshirojnë që të ardhmen me marr shërbime mjekësorë në Prishtinë”, deklaroi ai.

E shkak i daljes së stafit në pension, Komuna e Prishtinës ka arritur që t’i punësojë 30 punëtorë shëndetësor, gjysma mjekë e gjysma tjetër infermierë.

“Nuk është shtuar asnjëherë numri prej vitit 2000. E ka të njëjtin staf, ne krejt çka po mundohemi me bë tani është që do ta kemi një konkurs për pranim të stafit të ri në bazë të asaj sa janë dal në pension. Ne kemi një numër të stafit që pensionohet gjatë vitit dhe ky numër që është pensionua të vitit 2023 është hapur një konkurs dhe kemi marrë 15 mjekë të rinj dhe kemi marrë rreth 15 infermierë”, theksoi Sadiku.

Afër 39 mijë qytetarë kanë aplikuar për pasaporta të Republikës së Kosovës që nga 3 janari e deri tash. Ky numër po konsiderohet mjaft i madh në Agjencinë për Regjistrim Civil, ku thonë se po punojnë në kushte të jashtëzakonshme e ku do të kalojë më shumë se 30 ditë, derisa qytetari të pajiset me pasaportë.

Në Agjencinë për Regjistrim Civil, thonë se vonesa për më shumë se një muaj për t’u pajisur me pasaportë, po ndodh për shkak se prodhimi nuk po mundet të zë hapin e aplikimeve.

Kryeshefi ekzekutiv i Agjencisë për Regjistrim Civil (ARC), Blerim Camaj, ka thënë se i kanë ngritur të gjitha kapacitetet për të pajisur qytetarët me pasaporta, për shkak se janë në gjendje të jashtëzakonshme.

“Saktësisht i kemi 38.708 qytetarë që kanë aplikuar për pasaporta që nga 3 janar 2024, deri më dje, kështu po e shohim që është një numër shumë i madhe, kërkesat e qytetarëve janë shumë të mëdha. Ne i kemi ngrit të gjitha kapacitetet për t’i pajisur qytetarët me pasaporta, por prodhimi nuk mundet të zë sa është numri i qytetarëve që janë duke aplikuar për pasaporta, në këtë situatë jemi në gjendje të jashtëzakonshme”, tha ai.

Camaj u shpreh se qytetarët duhet të presin 30 ditë që të marrin pasaportat, pasi që janë në situatë të jashtëzakonshme nga fluksi i madh i aplikimeve.

“Që t’i njoftojmë qytetarët dhe t’i garantojmë se Ministria e Punëve të Brendshme ka pasaporta të mjaftueshme dhe iu garantojmë se ne jemi të furnizuar dhe kemi kontratë për 3 vite, kështu që qytetarët duhet të ndjehen të lirë sepse ne kemi pasaporta të mjaftueshme por duhet të presin radhën deri sa të prodhojmë pasaportat dhe të pajisen me to…..Realisht me kushte normale është 15 ditë afati ligjor por në kushte të jashtëzakonshme siç jemi tani, sigurisht që do të kaloj edhe 30 ditëshe dhe nuk do kemi mundësi që t’i pajisim me pasaporta, sepse prodhimi nuk po mundet të zë hapin e aplikimeve”, shtoi ai.

Sipas tij, edhe qytetarët serbë janë duke aplikuar për pasaporta të Republikës të Kosovës.

“Edhe qytetarët serbë që kur kemi filluar me liberalizimin e vizave, kërkesat janë në rritje dhe në komunat veriore, gjithashtu edhe në komunat jugore, të cilat janë me shumicë serbe, qytetarët serbë vetëm janë duke aplikuar, është numri në rritje për pajisjen me pasaporta …. Në vitin e kaluar kanë qenë 22 mijë deri në 24 mijë mesatarja mujore, ndërsa në muajin dhjetore të viti të kaluar janë 36.665 që kanë aplikuar qytetarët vetëm në muajin dhjetore… Mirëpo nëse e llogaritim muajin janar 2024 me janarin e viti 2023, numri është më shumë se i dyfishuar, vetëm në dhjetë ditë pune kanë aplikuar për pasaporta rreth 38 mijë qytetarë”, përfundoj ai.

Përndryshe, zyrtarë në Aeroportin e Prishtinës, kanë njoftuar se nga data 1-15 janar 2024, nga 1-15 janar, në Aeroportin Ndërkombëtar “Adem Jashari” në Prishtinë janë regjistruar 103.248 udhëtarë në shkuarje, apo 20.531 udhëtarë më shumë se dyjavëshin e parë të vitit 2023.

“Kemi rreth 20% fluturime më shumë dhe rreth 15% udhëtarë më shumë se sa në periudhën e vitit të kaluar. Përafërsisht 112 fluturime janë më shumë dhe rreth 23 000 udhëtarë më shumë”, kanë potencuar zyrtarët e Aeroportit.

Kurse, drejtuesit e institucioneve po mundohen të mohojnë daljen e qytetarëve të Kosovës në vende të ndryshme pas liberalizimit të vizave. Ministri i Brendshëm, Xhelal Sveçla ka shkruar se sipas të dhënave nga pikat kufitare, nga 1 janari i këtij viti, kur vendi ynë gëzon të drejtën e lëvizjes së lirë pa viza e deri më 19 janar, në Republikën e Kosovës nga të gjitha pikat kufitare kanë hyrë 3687 autobusë, ndërsa kanë dalur nga të gjitha pikat kufitare 2408 autobusë.

“Për të dëshmuar se nuk bëhet fjalë për “ikje masive” por me raportime dezinformuese nga disa mediume të papërgjegjshme, për të njëjtën periudhë kohore, në vitin që lamë pas kanë hyrë 3511 autobusë ndërsa kanë dalur nga pikat kufitare 3731 autobusë. Pra, 35% më pak autobusë kanë dalur këtë vit pas liberalizimit të vizave sesa në vitin e kaluar”, ka shkruar ai.

Kryetari i Partisë Socialdemokrate (PSD), Dardan Molliqaj, ka thënë se formimi i Asociacionit të komunave me shumicë serbe, do të sjellë konflikt të përhershëm ndërmjet shqiptarëve dhe serbëve në veri të vendit.

Kreu i PSD-së ka thënë se liberalizimi i vizave është ndërruar me autonomi për serbët në Kosovë, pasi sipas tij, Asociacioni nuk do të sjellë anëtarësim në Këshill të Evropës.

Ndërsa liberalizimin e vizave për kosovarët, Molliqaj e konsideron si “shkëmbim të autonomisë së serbeve në Kosovë”, pasi me formimin e Asociacionit eventualisht mund të rezultojë me anëtarësim të Kosovës në Këshill të Evropës.

Kreu i PSD-së, ka thënë se gjatë këtij viti, protestat për të kundërshtuar Qeverinë do të jenë të mëdha, pasi Asociacionin e konsideron ndarje federative mes Kosovës dhe komunitetit serb.

“Tashmë është e qartë që po hyjmë në faza të implementimit dhe jemi të sigurt që Kosova po shkon drejt një konfliktit të përhershëm në mes të entitetit serb në Kosovë dhe shumicës shqiptare duke krijuar një ndarje federative mes Kosovës meqë njërën anë federata e komunitetit serb dhe pjesa që janë në anën tjetër, po ashtu shprehim indicet e para të një konfederate të mundshme në horizont në të ardhmen andaj ky vit ka me na përcjell me shumë aksione e protesta në kundërshtim të kësaj dhe e dyta ka të bëj me organizimin e brendshëm”, deklaroi Molliqaj për EO.

Kreu i PSD-së, ka thënë se meritat për liberalizimin e vizave kanë të gjitha qeveritë e kaluara, ndonëse e konsideron si proces të vonuar. Liberalizimin, Molliqaj e sheh si “shkëmbim me autonomi” për serbët. Thotë se Kosova nuk ka fituar asgjë nga Asociacioni. “Meritat për liberalizim iu takojnë të gjithëve, kjo ishte e drejtë që na u mohua, besoj që Kosovës i janë vënë kushte politike e besoj që secila Qeveri që ka qenë.

ka jep kontribut edhe qeveria e fundit po por besoj që përgjegjësia është që liberalizimi i vizave na është ndërruar me autonomi. Duhet t’i marrim përgjegjësitë, është e qartë që liberalizimi është shkëmbye më autonominë e serbëve në Kosovë, kjo është fitimi i vetëm që Kosova ka. Eventualisht anëtarësimi në Këshillin e Evropës. Nuk kemi siguri për njohjen e 5 vendeve anëtareve ose anëtarësim në NATO. Shpresoj që kjo t’ua lehtësojë jetën qytetarëve, ndonëse jam i shqetësuar jo vetëm në largimin masiv por edhe në cilësinë e jetës që po e kanë ata”, u shpreh Molliqaj për EO.

Ai foli edhe për zgjerimin e partisë në mërgatë. Paralajmëroi edhe tubime në dy qytete të Gjermanisë muajin e ardhshëm.  “Do të jetë vit i shtrirjes së strukturave tona në Kosovë dhe jashtë saj, në muajin shkurt jo jemi për tubime në gjermani dhe kjo me synimin për ta përgatitur për të marr pjesë në zgjedhje dhe për të qenë pjesë e kuvendit të Kosovës. Tubimet në Gjermani më 3 dhe 4 shkurt jemi në dy qytete të Gjermanisë, kjo pas një vizitë në fundvitin që lamë dhe pritet ta emërojmë Bekim Ukiqin si përfaqësues të PSD-së atje, dhe që po bën një punë të mirë atje. Deri në fundvit besoj se do të jenë 10 tubime e shume takime të vogla atje, do i nisim në Zvicër në shkurt dhe do të rrisim numrin e aktiviteteve që kanë qëllim mobilizimin strukturor”, u shpreh Molliqaj.

Instituti Hidrometeorologjik i Kosovës ka bërë të ditur se sot do të mbizotërojë mot i vranët dhe me reshje bore.

Gjatë ditës së shtune parashihet që temperaturat minimale të lëvizin mes -3 gradë Celsius deri -1 gradë Celsius.

Do të fryjë erë nga drejtimi i veriperëndimit me shpejtësi 1-5m/s.

“Të shtunën parashihet të mbajë mot i vranët dhe me reshje bore. Temperaturat minimale parashihen të lëvizin ndërmjet -3 deri -1 gradë Celsius, ndërsa maksimalet e ditës parashihen të lëvizin ndërmjet – 1 deri1 gradë Celsius. Do të fryjë erë nga drejtimi i veriperëndimit me shpejtësi 1-5m/s”, thuhet në njoftimin e IHMK-së.

Është gjetur 14-vjeçarja, e cila ishte raportuar si e zhdukur nga familjarët që nga e marta.

Lajmin e ka bërë të ditur Rivdan Tahiri, i cili shumë herë është angazhuar në raste të tilla për gjetjen e personave.

“Të dashur vullnetar dhe qytetar. Vajza e lajmëruar e zhdukur është gjetur shëndosh e mirë. Faleminderit Policisë (Prizren)”, ka shkruar ai.