ATV

Author: G.O.

  • Lajçak sot në Kosovë

    Lajçak sot në Kosovë

    I dërguari i posaçëm për dialogun Kosovë-Serbi, Miroslav Lajçak, sot do të jetë në Kosovë, ku do të bisedojë me zëvendëskryeministrin Besnik Bislimi, kryenegociator i Kosovës në dialogun e Brukselit.

    Lajçaku dje ka qëndruar në Beograd, ku është takuar me presidentin e Serbisë, Aleksandar Vuçiq, me të cilin përveç tjerash ka diskutuar edhe për hapat e ardhshëm në normalizimin e marrëdhënieve me Kosovën.

    Ai ka shkruar në platformën X se në takimin me Vuçiqin, fokus i diskutimeve ka qenë perspektiva strategjike për vitin 2024, por gjithashtu kanë bërë një bilanc për të arriturat dhe ngecjet në dialog.

    Presidenti i Serbisë, Aleksandar Vuçiq, ka kërkuar anulimin e vendimit të Bankës Qendrore të Kosovës (BQK) për ndalimin e përdorimit të dinarit serb për pagesa me para të gatshme në Kosovë. Ai shtoi se e ka pasur një “takim konstruktiv dhe shumë të dobishëm” me Lajçakun.

    “E theksova domosdoshmërinë për themelimin e Asociacionit të komunave me shumicë serbe, për mbajtjen e zgjedhjeve lokale në veri të Kosovës urgjentisht, dhe kërkova mbështetje nga Bashkimi Evropian për ndalimin e provokimeve të mëtejshme që vijnë nga Prishtina”, shkroi Vuçiq në llogarinë e tij në Instagram, pas takimit me Lajçakun.

    Sipas zëdhënësit të BE-së, Peter Stano, përfaqësuesi special i BE-së për dialogun po i kryen këto vizita në Beograd dhe Prishtinë në përpjekje për të çuar përpara dialogun.

    “Bisedimet me presidentin Vuçiq në Beograd dhe me homologët kosovarë në Prishtinë, janë pjesë e mandatit të tij, janë pjesë e punës dhe përpjekjeve të tij të vazhdueshme në drejtim të ndihmës së të dyja palëve për të çuar përpara dialogun”, theksoi Stano.

    Ndryshe, Brukseli kërkoi nga autoritetet në Kosovë të hënën që të shtyjnë zbatimin e vendimit për ndalimin e përdorimit të dinarit serb në territorin e Kosovës, në mënyrë që të gjendet një zgjidhje në kuadër të dialogut ndërmjet Beogradit dhe Prishtinës.

    Nga Qeveria e Kosovës kanë argumentuar se vendimi i BQK-së është në përputhje me Kushtetutën e Kosovës, por QUINT-i ka thënë se ky vendim “ngre shqetësime në lidhje me ndikimin në veçanti në komunitetet me shumicë serbe”.

  • Filarmonia e Kosovës, tash e 20 vjet pa objekt – Objekti në të cilin performojnë artistët nuk i plotëson kushtet

    Filarmonia e Kosovës, tash e 20 vjet pa objekt – Objekti në të cilin performojnë artistët nuk i plotëson kushtet

    Provat para performancave janë të domosdoshme. Por, ndërtesa e Filarmonisë së Kosovës, në të cilin Festim Fanaj dhe kolegët e tij ushtrojnë tash e 20 vjet, nuk i plotëson kushtet.

    “Që nga themelimi, Filarmonia e Kosovës ka pasë probleme me objekt, sikur vend ushtrimi që është kjo sot këtu, që me herët ka qenë një objekt ku ka ushtruar kori i qytetit, është hapësirë e vogël, këtu zakonisht mund të ushtrojnë grupet kamertale që i bjen grupet më të vogla, ndoshta deri në 10-15 persona, dhe problemin e kemi për shkak që është ose shumë ftohtë ose shumë nxehtë”, thotë Festim Fanaj.

    Mungesa e një objekti nuk është halli i tyre i vetëm. Vështirësi gjatë provave, po iu shkakton edhe mungesa e instrumenteve.

    “Edhe këto mbajtëset e notave ose pulte e instrumentet tjera që po i shihni shumica janë donacion nga shteti japonez, disa nga instrumentistët i kanë instrumentet e tyre personale, por na mungojnë edhe shumë gjëra të tjera bazike të cilat janë mjete harxhuese dhe ato i paguajnë vetë instrumentistët.” , shtoi tutje ai.
    Për këtë institucion kaq të rëndësishëm thonë se nuk po trajtohet dinjitetshëm.

    “Është një hapësirë e vogël që nuk i plotëson të gjitha nevojat dhe kërkesat për të zhvilluar aktivitetin ditor, sidoqoftë me vullnetin e gjithë anëtarëve të Filarmonisë nuk kanë munguar sukseset, pavarësisht që jemi ballafaquar me probleme dhe me mungesa në aspektin e infrastrukturës. Duhet të pajtohemi që edhe në 5 vitet e ardhshme minimalisht të operojmë nëpër hapësirat ekzistence e shpresojmë që proceset të mos zvarriten tutje që të paktën Prishtina ta ketë sallën e saj.”, deklaroi Dardan Selimaj, menaxher i Filarmonisë së Kosovës.

    Që nga viti 2000 kur është themeluar, Filarmonia funksionon në një objekt të Komunës së Prishtinës, pas Ministrisë së Kulturës. Por, ky institucion nuk u përgjigj nëse ka ndonjë projekt lidhur me Filarmoninë.

    Pavarësisht problemeve infrastrukturore dhe mungesës së instrumenteve, më 27 janar Filarmonia e Kosovës prezanton dy premiera, njëkohësisht duke rikthyer pas disa vjetësh në program Simfoninë e shtatë të Beethovenit./ATVLIVE.TV/

  • Të zëshëm për miratim të projektligjit, por salla për IVF ende s’është e gatshme

    Të zëshëm për miratim të projektligjit, por salla për IVF ende s’është e gatshme

    Projektligji për shëndetin riprodhues dhe fertilizim të asistuar mjekësor pritet që të votohet në Kuvend së shpejti në lexim të dytë.

    E derisa ky projektligj mundëson që IVF-i të kryhet edhe në institucionet shtetërore, salla në Klinikën e Gjinekologjisë ku pritet të realizohet ky shërbim nuk është e gatshme.

    Furnizimi me të gjitha pajisjet dhe instalimi i tyre nuk është bërë ende, dhe sipas Ministrisë së Shëndetësisë nuk pritet të bëhet edhe disa muaj, pasi tenderi është në shqyrtim nga OSHP.

    Ndërkohë në ankesën e operatorit ekonomik në fjalë thuhet se Ministria e Shëndetësisë ka vendosur kritere diskriminuese duke e favorizuar vetëm një prodhues.

    Ndërkohë sipas Ministrisë specifikat teknike janë hartuar nga kolegjiumi i SHSKUK-së.

    Pavarësisht raportit të ekspertëve afati ligjor për marrjen e vendimi përfundimtar nga OSHP-ja ka skaduar.

    Ndërkohë sipas Ministrisë së Shëndetësisë vlera e parashikuar është rreth 1.2 milionë euro, ku përfshihen 5 Lote për: Pajisje të IVF-it, aksesor dhe inventar përcjellës për Sallën e IVF-it ne Klinikën e Gjinekologjisë me Obstetrikë./ATVLIVE.TV/

  • “Edukimi për siguri”, lëndë e re në shkolla nga shtatori

    “Edukimi për siguri”, lëndë e re në shkolla nga shtatori

    Nxënësit e klasave të 11-ta e 12-ta do të kenë mundësi që nga viti i ri shkollor 2024-2025 të mësojnë më shumë për sigurinë.

    Ministria e Arsimit ka vendosur që nga shtatori në kurrikulën shkollore ta fusë edhe lëndën Edukimi për Siguri, si kërkesë nga Ministria e Mbrojtjes.

    Megjithatë, kjo do të mbetet në dëshirën e nxënësve, meqë lënda do të jetë vetëm zgjedhore e jo obligative.

    Sidoqoftë, Ministria e Arsimit nuk saktësoi nëse kjo lëndë do të jetë zgjedhore në të gjitha shkollat e mesme.

    Njohës të arsimit thonë se duhet të ketë përgatitje institucionale e profesionale që kjo lëndë të sjellë dobi te nxënësit.

    “Besoj që ka një argumentim për këtë dhe ai argumentim duhet të bëhet publik. Të ndahen plan-programet, të ndahen shkollat e targetuara së pari për pilotim dhe të tjerat për gjithëpërfshirje, në mënyrë që kjo reformë të ketë një përfshirje shumë më aktive dhe të mos vijë vetëm si një reformë politike që ka një jetëgjatësi të shkurtër”, tha Rinor Qehaja nga Instituti ‘ EdGuard’.

    Futja e lëndës së sigurisë në shkolla është nismë e Ministrisë së Mbrojtjes dhe është bërë me qëllim që nxënësit të marrin njohuri bazike ushtarake dhe të sigurisë./atvlive.tv/

  • Rreth 300 pjesëtarë të FSK-së pritet ta padisin Ministrinë e Mbrojtjes, kjo është arsyeja

    Rreth 300 pjesëtarë të FSK-së pritet ta padisin Ministrinë e Mbrojtjes, kjo është arsyeja

    Pjesëtarët e Forcës së Sigurisë, janë duke e paditur Qeverinë e Kosovës, respektivisht Ministrinë e Mbrojtjes për moskompensimin e diferencës së pagës sipas rregullores për rritje të pagave të pjesëtarëve të FSK-së, sipas gradave të tyre.

    Rregullore kjo që ishte në fuqi nga 14 shkurti i vitit 2020 deri me 28 korrik 2021.

    Pjesëtarët e Forcës së Sigurisë po kërkojnë kompensim për 18 muaj sa ishte në fuqi rregullorja e nënshkruar në kohen kur kryeministër ishte Ramush Haradinaj.
    E gjithë kjo, dëshmohet nga një komunikim mes Shtabit të Përgjithshëm të FSK-së dhe Ministrisë së Mbrojtjes në të cilin pati qasje ATV-ja.

    ATV-ja ndërkaq ka siguruar edhe një aktgjykim ku Gjykata Themelore në Pejë vendosi në favor të pjesëtarit të FSK-së që kompensimin vendosi ta kërkojë përmes rrugëve ligjore.

    “DETYROHET e paditura Ministria e Mbrojtjes – Forca e Sigurisë së Kosovës, që paditësit në emër të kompensimit shtesë për ngritje profesionale me gradën rreshter, për periudhën nga data 01.02.2020 deri me datën 28.07.2021, t’ia paguaj diferencën në shumën prej 2,583.00 € si dhe shpërblimin jubilar për 10 vite të përvojës së punës, shumën prej 112.20 €, në shumën e përgjithshme prej 2,695.20 €”, thuhet në aktgjykimin e Gjykatës Themelore në Pejë.

    Ndërkaq, pretendimet e Qeverisë në këtë rast gjyqësor, Gjykata Themelore në Pejë i cilësoi të pabazuara.

    Teksa Zyra e Kryeministrit e as Ministria e Mbrojtjes nuk kanë kthyer përgjigje, nga burime jozyrtare, televizioni kupton se numri i atyre që kanë përgatitur padi shkon deri në 300.

    Ndryshe, rregullorja parashihte që sipas gradave, pjesëtarët të marrin këto paga: ushtari 525 euro, ushtari i klasës së parë 580 euro, tetari 641 euro, ndërsa rreshteri 708 euro./atvlive.tv/

  • KESCO kërkon ngritje të tarifave për energji elektrike, ZRrE-ja pritet të vendosë në mars

    KESCO kërkon ngritje të tarifave për energji elektrike, ZRrE-ja pritet të vendosë në mars

    Kompania kosovare për furnizim me energji elektrike – KESCO – i ka propozuar Zyrës së Rregullatorit ngritje të serishme të tarifave.

    Në aplikimin për të hyrat e lejuara maksimale për vitin tarifor 2024-25, për mbulimin e të cilave barrën kryesore e kanë konsumatorët fundor, KESCO ka kërkuar që Rregullatori t’i aprovojë të hyra më ta larta sesa aktualet.

    Mes tjerash në arsyetimin e rritjes eventuale te kostove, kjo kompani përmend propozimin e KEK-ut për rritje të çmimit të furnizimit me shumicë në 31.5 euro për megavat orë.

    “Pa paragjykuar arsyeshmërinë e ofertës, me aplikimin e çmimeve të propozuar nga KEK kostot për konsumatorët fundor do të rriten për 6 milion €, apo një rritje prej 2% të MAR”, thuhet në aplikimin e KESCO-s.

    Në kontekstin e rritjes së kostove, KESCO flet për ndikimet e nevojës për import të energjisë.

    Pas shqyrtimit të aplikimeve të pranuara nga KESCO, KEDS dhe KOSTT, Zyra e Rregullatorit për Energji duhet të përpilojë raportin konsultativ i cili do të qartësojë nëse një kërkesë e tillë do të përfillet.

    Në KESCO nuk u përgjigjën lidhur me këtë çështje. Por, eksperti i energjisë, Naim Bujupi, e vlerëson të dëmshme ngritjen eventuale të tarifave.

    “Sa pashë kostoja u rritë për shkak të importit. Sa i përket përballueshmerisë, duhet të bëhet analizë. E vetmja formë që nëse vërtetohet se tarifa nuk është e përballueshme, është subvencionimi i tarifës. Por kjo është me rrisk të lartë, sepse nënkupton se është rritje artificiale, që nënkupton se në të ardhmen ndikon negativisht në zhvillimin e qëndrueshëm të tregut”, thotë Bujupi.

    Ai nuk përjashton mundësinë e që ZRrE-ja të refuzojë këtë kërkesë.

    “Është mirë të pritet vendimi i ZRRE-së. në të kaluarën KESKO ka prezantuar koston e tyre, por ZRRE ka vendosur ndryshe. Kështu, pas vendimit të ZRRE-së shpjegohet rritja e tarifave”, shtoi tutje ai.

    Vendimi përfundimtar nga Rregullatori pritet të nxirret para fundit të muajit Mars.
    Në dy shqyrtimet e fundit, 2022 dhe 2023, janë ngritur tarifat e energjisë./atvlive.tv/

  • Ministria e Mbrojtjes tregon prioritetet për vitin 2024

    Ministria e Mbrojtjes tregon prioritetet për vitin 2024

    Ministria e Mbrojtjes e Kosovës ka bërë të ditura prioritetet e saj për vitin aktual.

    Në një postim në Facebook të kësaj ministrie thuhet zhvillimi i burimeve njerëzore, logjistike, infrastrukturore, kapaciteteve të inteligjencës dhe vazhdimi i blerjeve strategjike sipas konceptit shtet me shtet dhe shtet me prodhues janë në mesin e prioriteteve të parapara për 2024.

    Po ashtu, përmendet edhe ristrukturimi i Ministrisë së Mbrojtjes, ku pas miratimit të Ligjit për Agjencinë për Inteligjencë dhe Siguri të Mbrojtjes do të bëhet hartimi i akteve nënligjore dhe dokumenteve të tjera përcjellëse për funksionalizimin e agjencisë, si dhe hartimi i Ligjit për Komponentin Rezervë bazuar në Draft-Koncept Dokumentin për Komponentin Rezervë të Forcës së Sigurisë së Kosovës.

    Investimi në sisteme moderne të armatimit është prioritet tjetër që përmendet nga Ministria e Mbrojtjes, përfshirë edhe hartimin e Strategjisë për Zhvillimin e Industrisë së Mbrojtjes së Kosovës, zhvillimin e kapaciteteve të mirëmbajtjes, zgjerimin e infrastrukturës dhe krijimin e Qendrës shtetërore trajnuese për siguri kibernetike.

  • ​Interi i bindur në rinovimin e kontratës me Lautaron

    ​Interi i bindur në rinovimin e kontratës me Lautaron

    Interi ende nuk ka rënë dakord për një marrëveshje të re me Lautaro Martinez, por klubi është i bindur se sulmuesi do të nënshkruajë një kontratë të re.

    Sulmuesi 26-vjeçar argjentinas po kryeson sulmin për yllin e tyre të dytë të Scudetto-s këtë sezon, duke shënuar 18 gola dhe duke dhënë katër asistime në 18 paraqitjet e tij në ligë, duke qenë figura kryesore në skuadrën e Simone Inzaghit.

    Kontrata aktuale e Lautaros me Interin skadon në qershor 2026 dhe klubi nuk ka absolutisht asnjë qëllim të humbasë kapitenin e tyre, kështu që bisedimet me rrethin e tij në lidhje me një marrëveshje të re janë duke vazhduar, përcjellë KosovaPress

    Eksperti italian i transferimeve, Matteo Moretto tha se Interi po ndihet jashtëzakonisht optimist në lidhje me negociatat e kontratës me Lautaro, ‘i bindur’ se ai do të nënshkruajë një marrëveshje të re me klubin në të ardhmen e afërt.

    Sulmuesi 26-vjeçar dëshiron të qëndrojë gjithashtu me Nerazzurrët, kështu që do të duhej diçka domethënëse për të ndryshuar gjërat.

    Lautaro është rritur si një nga sulmuesit më të mirë në futbollin evropian te Interi, duke shënuar 123 gola në 265 ndeshje për klubin.

  • ​Zgjidhen organet e reja të Federatës së Karatesë

    ​Zgjidhen organet e reja të Federatës së Karatesë

    Sot është mbajtur Kuvendi i Jashtëzakonshëm Zgjedhor i Federatës së Karatesë së Kosovës.

    Ky kuvend është ftuar bazuar në marrëveshjen e dy palëve të krijuara brenda FKK-së (marrëveshja e datës 9 janar 2024), në harmoni të plotë me Statutin e Federatës së Karatesë së Kosovës, nënshkrimet e 2/3 të anëtarëve të Kuvendit të FKK-së për thirrjen e kuvendit, dhe me aprovim nga Ministria e Kulturës, Rinisë dhe Sportit.

    Nga 49 klube me të drejtë vote, të pranishme në Kuvend ishin 48 klube, delegatët e të cilëve u nënshkruan në listën e pjesëmarrësve.

    Pas nënshkrimit në listën e pjesëmarrësve, një pjesë e delegatëve lëshuan Kuvendin duke hequr dorë nga e drejta e votës, përfshirë dhe kundërkandidatin e Besart Barutit për kryetar Shemsi Shaqiri.

    Kuvendi i Jashtëzakonshëm Zgjedhor, zgjodhi edhe strukturat udhëheqëse të FKK-së.

    Besart Baruti u rizgjodh Kryetar i Federatës së Karatësë së Kosovës.

    Ismail Fazliu-Nënkryetar i Federatës së Karatesë së Kosovës.

    Shkelzen Balaj-Nënkryetar i Federatës së Karatesë së Kosovës.

    Po ashtu, u zgjodhën 9 anëtarë të Bordit Ekzekutiv të FKK-së dhe 5 anëtarë të Këshillit Mbikqyrës të FKK-së.

    I gjithë procesi zgjedhor ishte transparent dhe u monitorua nga zyrtarë të KOK-ut dhe MKRS-së.

  • Greqia do të blejë avionë F-35 nga ShBA-ja

    Greqia do të blejë avionë F-35 nga ShBA-ja

    Kryeministri grek Kyriakos Mitsotakis foli të shtunën për arritjen e marrëdhënieve strategjike greko-amerikane dhe mbrojtjen e Greqisë përmes rritjes së fuqisë mbrojtëse në tokë, det dhe ajër, pa ngarkuar taksapaguesit grekë, pas letrës që mori nga sekretari amerikan i Shtetit Antony Blinken për marrjen e deri në 40 avionëve luftarakë F-35 të gjeneratës së pesë, si dhe fregata, tanke dhe materiale të tjera mbrojtëse.

    “Ky zhvillim justifikon diplomacinë aktive dhe të besueshme që po ndjekim kudo në vitet e fundit”, tha ai.

    Mitsotakis tha gjithashtu se “sot është një ditë shumë e rëndësishme për mbrojtjen kombëtare dhe për diplomacinë greke, sepse për shkak të letrës që mora nga Sekretari i Shtetit Amerikan, thellësia strategjike e marrëdhënieve greko-amerikane është evidentuar dhe vulosur… është rezultat i një përpjekjeje metodike, të heshtur dhe të gjatë që kombinoi qëndrueshmërinë e aleancës së Greqisë në frontet ndërkombëtare me promovimin e interesave të saj kombëtare.

    “Në një periudhë pasigurie, vendi ynë rikonfirmon se qëndron me seriozitet dhe pjekuri gjeopolitike në hartën ndërkombëtare, ndërsa në të njëjtën kohë u shërben të drejtave të tij kombëtare me mburojën e mbrojtjes së tij. Në rrugën e stabilitetit dhe paqes gjithmonë me krenari dhe besimi kombëtar”, përfundoi ai.

    Ndryshe, më 27 shtator 2022, u përfunduan procedurat e njoftimit të Kongresit për 30 milionë dollarë ndihmë grant për financimin e huaj ushtarak (FMF) për blerjet e mbrojtjes për Greqinë për të inkurajuar mbështetjen kritike për Ukrainën; dhe më 24 tetor 2023, Shtetet e Bashkuara akorduan një ndihmë shtesë prej 30 milionë dollarësh në FMF për Greqinë për të inkurajuar donacione të mëtejshme. /ANA-MPA