Author: G.O.

Kryetari i AAK-së, Ramush Haradinaj ka pritur në takim ambasadorin e Mbretërisë së Bashkuara në Kosovë, Jonathan Hargreaves.

Haardinaj, përmes një postimi në profilin e tij në rrjetin social Facebook, ka shkruar se Kosova vlerëson lart marrëdhëniet e shkëlqyera me Mbretërinë e Bashkuar dhe mbështetjen e vazhdueshme për forcimin e subjektivitetit tonë shtetëror në arenën ndërkombëtare.

Postimi i tij i plotë:

Me ambasadorin Jonathan Hargreaves, biseduam për proceset nëpër të cilat po kalon vendi ynë dhe për avancimin e marrëdhënieve bilaterale ndërmjet Mbretërisë së Bashkuar dhe Republikës së Kosovës.

Ambasadorin Hargreaves e falënderova për angazhimin e tij dhe të Mbretërisë së Bashkuar në mbështetje të Republikës së Kosovës.

Kosova vlerëson lart marrëdhëniet e shkëlqyera me Mbretërinë e Bashkuar dhe mbështetjen e vazhdueshme për forcimin e subjektivitetit tonë shtetëror në arenën ndërkombëtare. Në këtë drejtim, anëtarësimi i Kosovës në NATO mbetet një domosdoshmëri strategjike për paqen, sigurinë dhe stabilitetin afatgjatë në rajon.

Njoftimi i ministrit në detyrë të Punëve të Brendshme, Xhelal Sveçla, për nisjen e procedurave për themelimin e xhandarmërisë së Kosovës, po vlerësohet si një hap i rëndësishëm në forcimin e arkitekturës së sigurisë në vend.

Eksperti i sigurisë, Drizan Shala thotë se krijimi i një strukture të tillë ka qenë i nevojshëm tash e një kohë dhe se ajo do të ndikojë në menaxhimin më efikas të çështjeve të sigurisë dhe kontrollit kufitar.

Shala në një intervistë për Ekonomia Online tha se xhandarmëria pritet të ketë një emërtim të ri.

“Unë mendoj që veprimi i ndërmarrë nga ana e nivelit politik në Republikën e Kosovës është një vendim, i cili në kohë është i vonuar. Për arsye se kjo çështje do të duhej të ishte përfunduar që në 2023-ën, që nga përfundimi i sulmit terrorist diverzant nga ana e Beogradit zyrtar. Sepse është parë qartazi se do të duhet të kemi një ndryshim të arkitekturës së sigurisë dhe në kuadër të saj të kemi një strukturë të re, e cila do kishte me ndihmuar jashtëzakonisht në procese të sigurisë kombëtare. Në këtë aspekt, unë mendoj që xhandarmëria e Kosovës do të ketë një emërtim të ri, por nuk do të pranohet si terminologji e xhandarmërisë, por që funksioni dhe aktiviteti do të jetë i ngjashëm, të cilën është paraparë sipas ligjit në fuqi për sigurinë publike dhe asaj nacionale, por njëkohësisht sipas vendimit nga ana e Ministrisë së Punëve të Brendshme”, u shpreh Shala.

Ai vlerëson se Kosova tashmë i ka kapacitetet institucionale dhe operative për të krijuar një strukturë të tillë të sigurisë.

“Kosova besoj tani më ka përmbyllur në aspekte të saja, arkitekturën e sigurisë, sa i përket krijimit të njësive relevante brenda Policisë së Kosovës, por njëkohësisht ne kemi në stazhin final edhe në përmbylljen e fazës së transformimit të FSK-së në forca të armatosura. Unë mendoj se tani më është koha më optimale, më e duhura që ne të kemi një strukturë të tillë, e cila do kishte me qenë si një sinergji e këtyre dy mekanizmave më herët, por që në asnjë rrethanë nuk do kishte me minimizuar punën dhe funksionin e Policisë së Kosovës apo ndoshta dhe të Ushtrisë së Kosovës, meqenëse tani më koncepti do të jetë në formatin të cilin e ka Shteti i Turqisë”, thekson ai.

Sipas Shalës, themelimi i xhandarmërisë do të ndikojë drejtpërdrejt në lehtësimin e barrës operative të Policisë së Kosovës, sidomos në zonat kufitare dhe në menaxhimin e situatave të ndjeshme të sigurisë.

“Sipas të gjitha gjasave do të jetë një ndihmesë jashtëzakonisht për Policinë e Kosovës, sepse deri më tani ishte përgjegjës për pjesën e brezit kufitar me shtetet fqinje, do të kishte me patur një minimizim të aktiviteteve të përditshme policore, sepse do të kishte me kaluar barrën dhe përgjegjësia e xhandarmërisë së Kosovës dhe njëkohësisht aksesin në mjetet ushtarake për të përmbyllur misionin dhe mandatin, do kishte me qenë tjetër e dëshirueshme, duke mos e ekspozuar ushtrinë në Kosovë në ndonjë aktivitet kërcënues, që mund të vihet, si me të cilin do kishte mund të menaxhojë xhandarmëria e Kosovës”, tha ai.

Ai pret që procesi i funksionalizimit të kësaj strukture të nisë relativisht shpejt pas formimit të grupit punues nga Ministria e Punëve të Brendshme.

“Unë po besoj dhe shpresoj se në një periudhë kohore afro 18-muajsh, që nga dita e nënshkrimit të vendimit nga ana e Ministrit të Punëve të Brendshme, ne do kemi strukturën e parë komanduese që udhëheq këtë strukturë”, u shpreh tutje Shala.

Ndërkaq, ministri në detyrë i Punëve të Brendshme, Xhelal Sveçla, njoftoi sot se është nënshkruar vendimi për themelimin e grupit punues që do të analizojë modalitetet e funksionimit të xhandarmërisë së Kosovës.

“Xhandarmëria e Republikës së Kosovës po bëhet. Si Ministër i Punëve të Brendshme sot kam nënshkruar themelimin e grupit punues i cili do të bëj analizimin dhe propozimin e modaliteteve për funksionimin e Xhandarmërisë së Republikës së Kosovës, si Agjencion i Ministrisë së Punëve të Brendshme. Xhandarmëria përfaqëson një hap të rëndësishëm në konsolidimin e arkitekturës sonë të sigurisë, me mision të qartë për të garantuar prezencë të fuqishme shtetërore në funksion të ruajtjes së kufinjve, integritetit dhe sovranitetit tonë territorial, mbrojtjen nga terrorizmi, menaxhimin e trazirave me rrezikshmëri të lartë dhe mbrojtjen e infrastrukturës kritike”, ka shkruar Sveçla në Facebook.

Komisioni Qendror i Zgjedhjeve në mbledhjen e sotme ka miratuar adresat e kutive postare për votimin me postë nga jashtë Kosovës, proces i cili do të zhvillohet nga 25 maji deri më 6 qershor, raporton Ekonomia Online.

Anëtari i KQZ-së dhe kryesuesi i Këshillit për Operacione Zgjedhore, Alban Krasniqi, tha se adresat e kutive postare mbesin pothuajse të njëjta me ato të zgjedhjeve të kaluara.

“Departamenti përkatës i ka sjellur adresat të cilat janë të njëjta të kutive postare si në të kaluarën, vetëm në dy vende janë ndryshuar”, tha ai.

Sipas KQZ-së, me qëllim të ofrimit të mundësisë për votim për shtetasit që janë regjistruar për të votuar përmes postës, kutitë postare janë funksionale në 22 shtete: Australi, Austri, Belgjikë, Çeki, Danimarkë, Francë, Gjermani, Holandë, Hungari, Itali, Kanada, Kroaci, Mali i Zi, Maqedonia e Veriut, Mbretëria e Bashkuar, Norvegji, ShBA, Shqipëri, Slloveni, Suedi, Turqi dhe Zvicër.

Po ashtu, funksionale do të jetë edhe kutia postare e përhershme e KQZ-së në Kosovë.

Në mbledhjen e sotme, KQZ-ja ka miratuar edhe Planin operacional të sigurisë për zgjedhjet e parakohshme për Kuvendin e Republikës së Kosovës, të cilat do të mbahen më 7 qershor 2026.

Gjithashtu, është miratuar edhe dizajni dhe përmbajtja e fletëvotimit dhe broshurës për zgjedhjet e parakohshme parlamentare.

Është mbajtur forumi Itali–Kosovë për Agro Biznes, ngjarje e organizuar me synim forcimin e bashkëpunimit ekonomik ndërmjet Kosovës dhe Italisë, me fokus të veçantë në sektorin e agrobiznesit, raporton Ekonomia Online.

Kryeministri në detyrë, Albin Kurti, tha se Kosova ofron stabilitet makroekonomik dhe kushte të favorshme për investime, duke theksuar potencialin e forumit për krijimin e partneriteteve konkrete.

“Kosova sot ofron stabilitet makroekonomik, sistem financiar me standarde të larta, taksa konkurruese dhe një mjedis gjithnjë e më të favorshëm për investime. Në vitet e fundit kemi rritur eksportet, kemi përmirësuar klimën për biznes, dhe kemi tërhequr investime të reja. Por, mbi të gjitha, Kosova ka energjinë e njerëzve të saj si një popullsi e re, dinamike dhe sipërmarrëse, e cila kërkon partneritete serioze dhe afatgjata. Prandaj dhe ky forum ka rëndësi të veçantë e potencial të madh për të dhënë fruta. Këtu prezantohen kompanitë e produktet, si dhe krijohen kontaktet e drejtpërdrejta ndërmjet të interesuarve si prodhuesit, institucionet dhe investitorët. Dhe pikërisht këto kontakte janë baza mbi të cilën ndërtohen projektet konkrete dhe bashkëpunimet afatgjata”, tha ai.

Kurti shtoi se takimet biznes me biznes do të krijojnë mundësi të reja bashkëpunimi ndërmjet dy vendeve.

“Unë jam i bindur se takimet B2B, biznes me biznes, diskutimet profesionale dhe aktivitetet promovuese të organizuara sot do të krijojnë mundësi të reja bashkëpunimi mes Kosovës dhe Italisë, jo vetëm në sektorin agroindustrial, por edhe më gjerë. Kosova është e hapur për investime, për ide të reja dhe për partneritete serioze ekonomike”, tha Kurti.

Ministrja në detyrë e Industrisë, Ndërmarrësisë dhe Tregtisë, Mimoza Kusari-Lila, tha se pjesëmarrja e sipërmarrësve italianë dhe përfaqësuesve të sektorit agro-ushqimor dëshmon interesimin për partneritete afatgjata ekonomike.

“Prandaj sipërmarrës italianë nga rajone të ndryshme të Italisë, së bashku me përfaqësues nga institucione e përfaqësues të sektorit agro-ushqimor. Kjo pjesëmarrje e bën këtë, bën një sinjal të qartë të interesit të ndërsjellë për ndërtimin e partneriteteve afatgjate ekonomike dhe përkufizimin, krijimin e mundësive të reja për investime të këtij zhvillimi të qëndrueshëm. Ky forum është një hapësirë konkrete për dialog ekonomik për shkëmbim përvojash dhe për ndarje të praktikave më të mira në fushën e bujqësisë, agro-industrisë dhe sigurimit ushqimor. Italia mbetet një nga partnerët më të rëndësishëm tregtarë të Kosovës. Një ndër investitorët e rëndësishëm evropianë në rajon, prandaj synimi ynë është t’ju sjellim në Kosovë”, tha ajo.

Ministri në detyrë i Bujqësisë, Armend Muja, tha se Kosova synon të zhvillojë modele të reja të bujqësisë, me fokus në prodhimin organik.

“Italia përfaqëson një nga superfuqitë kryesore të përpunimit të ushqimit dhe janë pikërisht këto mësime që Kosova mund t’i ketë dhe t’i përvetësojë. Në Kosovë një nga pyetjet kryesore për bizneset italiane do jetë edhe legjislacioni në fuqi. Dua t’ju informoj që politikat bujqësore të Kosovës përfshi dhe skemat në mbështetjen e bujqësisë janë të ngjashme si nga struktura ashtu dhe investimi. Gjatë këtij viti do fillojmë me një strukturë të re, një politikë të re dhe modele të bujqësisë që mbështet prodhimin dhe mbështet bujqësinë organike ku ne mendojmë që Kosova ka një potencial të jashtëzakonshëm. Dëshiroj t’ju potencoj po ashtu që Kosova paraqet një energji të jashtëzakonshme sipërmarrësit, për investitorët veçanërisht në sektorin e bujqësisë”, tha ai.

Ambasadorja e Kosovës në Itali, Nita Shala, tha se Kosova ka potencial të madh në sektorin agro-ushqimor dhe synon partneritete serioze me kompani italiane.

“Ambasada e Republikës së Kosovës në Romë, në këtë rast, së bashku me qeverinë e Kosovës, po kujdeset për realizimin e plotë, përmes partnerëve italianë në vendin tonë dhe nga vendi jonë. Kosova, ndonëse një vend i vogël, ka shumëçka për të ofruar. Tokë pjellore, klimë të përshtatshme, prodhues të zellshëm, një brez të ri sipërmarrësish me një dëshirë të madhe për t’u zhvilluar sipas standardeve më të mira europiane.

Në vitet e fundit, sektori ynë bujqësor dhe agro-ushqimor ka treguar potencial të jashtëzakonshëm rritjeje, sidomos në prodhimet organike, bimët medicinale dhe aromatike, dhe tani, përpunim ushqimor dhe produkte vendore si cilësi, origjinë dhe identitet. Ajo që Kosova synon për këtë për këtë takim B2B, janë partnerë seriozë me të cilët mund të ndërtojmë vlerë të përbashkët”, tha ajo.

Ambasadori i Italisë në Kosovë, Maurizio Antonini, tha se forumi dëshmon përkushtimin e dy vendeve për forcimin e partneritetit ekonomik dhe tregtar.

“Sot më shumë se një ngjarje e thjeshtë tregtare, kjo pasqyron vullnetin konkret të Italisë dhe Kosovës për të forcuar një partneritet strategjik të bazuar në besim, bashkëpunim dhe një vizion të përbashkët për rritje të qëndrueshme. Bujqësia përfaqëson prej kohësh një nga shtyllat e vlerave, traditave dhe identitetit ekonomik italian. Pasuria dhe larmia e trashëgimisë sonë bujqësore, të kombinuara me kapacitetin e transformimit industrial dhe me ekselencën e zinxhirëve tanë prodhues, e bëjnë sektorin agro-ushqimor italian një nga më të strukturuarit, konkurruesit dhe më të vlerësuarit në botë”, tha ai.

Ai shtoi se Italia mbetet një nga partnerët kryesorë tregtarë të Kosovës, ndërsa sektori agro-ushqimor zë vend qendror në këto marrëdhënie.

“Edhe në marrëdhëniet ekonomike me Kosovën, sektori agro-ushqimor zë një rol qendror. Në vitin 2025, Italia u konfirmua si furnizuesi i katërt dhe një nga partnerët kryesorë tregtarë të Kosovës, me një pjesë tregu mbi 5%. Shkëmbimi i përgjithshëm tregtar arriti në 277 milionë euro dhe, në këtë kuadër, produktet ushqimore, pijet dhe duhani përfaqësojnë kategorinë kryesore të eksportit italian drejt Kosovës, me një vlerë prej 78 milionë eurosh dhe një pjesë prej 31.5% të totalit”, tha ai.

Drejtoria rajonale e Policisë në Gjilan, përkatësisht hetues nga Njësiti i Hetimeve rajonale në Gjilan në koordinim dhe me autorizim nga Prokuroria Themelore në Gjilan, si rezultat i një hetimi disamujor dhe veprimeve intensive hetimore me qëllim të sigurimit të provave dhe dëshmive relevante, përfshirë edhe zbatimin e masave të fshehta teknike të hetimit, sot më 19.05.2026 kanë arritur që të identifikonin dhe arrestonin gjashtë persona të dyshuar meshkuj kosovarë.

Gjatë zhvillimit të hetimeve janë siguruar prova që dyshohet se të njëjtit në bashkëveprim kanë qenë të përfshirë të paktën në një rast të veprës penale ‘’Vjedhje të rëndë’’, ndërsa ekzistojnë dyshime se ata janë të përfshirë edhe në disa raste të tjera të vjedhjeve dhe vjedhjeve të rënda për të cilat hetuesit policorë janë duke vazhduar punën intensive në sigurimin e provave dhe ndriçimin e plotë të rasteve.

Në kuadër të procedurave ligjore dhe me autorizim nga gjykata kompetente, janë realizuar kontrolle në disa lokacione në Gjilan, Prishtinë e Fushë-Kosovë. Gjatë këtyre kontrolleve janë sekuestruar dëshmi materiale, përfshirë edhe tri automjete që dyshohet se janë përdorur gjatë kryerjes së veprave penale si dhe telefona celularë.

Të dyshuarit janë intervistuar në prani të avokatëve mbrojtës, gjersa me vendim të prokurorit të shtetit që të gjashtë të dyshuarve u është caktuar masa e ndalimit për 48 orë.

Hetimet lidhur me këto rast janë duke vazhduar.

Punëtorët teknikë të disa shkollave në Prishtinë kanë hyrë në grevë për shkak të mos pagesës së pagave për muajin prill, raporton Ekonomia Online.

Në grevë kanë hyrë punëtorët teknikë të shkollave “Dardania”, “Asim Vokshi”, “Gjergj Fishta”, “Ismail Qemali”, “Hasan Prishtina” e shkolla të tjera në kryeqytet.

Kryetari i Federatës Sindikale të Punëtorëve të Sektorit Privat të Kosovës, Jusuf Azemi, tha se greva po mbahet pothuajse në të gjitha shkollat e Prishtinës dhe se punëtorët nuk do të kthehen në punë derisa pagat të ekzekutohen.

“Pjesa dërmuese e shkollave, po megjithatë deri tani nuk kam asnjë informacion se ndonjë shkollë e ka thyer grevën. Kështu që mendoj që të gjitha shkollat janë në grevë. Kërkesa për grevë është sepse ne jemi sot me datën 19 dhe nuk i kemi marrë pagat për muajin prill. Pagat tona janë aq të ulëta sa që edhe kur i marrim me kohë nuk po mund t’i ia dalim me lëre më tani kemi hyrë në javën e tretë që nuk i kemi marrë. Këtë gjendje e rëndon akoma më shumë se pjesa dërmuese jemi me kredi dhe për çdo ditë bankat tona na thërrasin për kamatën e tyre. Realisht, ne nuk e dimë arsyen pse nuk është bërë pagesa. Kemi komunikuar kështu në mënyrë spontane me institucionet relevante, por neve tani nuk na intereson se a është faji tek kompanitë apo tek komuna e Prishtinës, neve na intereson vetëm pagat tona. Përndryshe aq më keq këta punëtorë tani, disa shkolla që nga data 1 maj dhe disa që nga data 11, nuk kanë fare kontratë dhe faktikisht është diçka po themi kështu anarki e tepruar. Nuk kemi paga, nuk kemi kontrata, por në fakt krejt ajo çka kemi ne, kemi organizimin sindikal, jemi në grevë pothuajse gati të gjitha shkollat në nivel të komunës së Prishtinës dhe për këtë parregullsi do të bëjmë përgjegjësi aktorët e komunës së Prishtinës. Ata përse ta paguajnë dhe ata u duhet që këtyre punëtorëve me këto paga po thonë të mjerueshme, që së paku ta kemi afatin ligjor që duhet bërë pagesat. Këta nuk e kanë bërë dhe normal që edhe ne nuk i bëjmë shërbimet tona nëpër të gjitha shkollat në nivel të Prishtinës”, tha ai.

Azemi tha se greva do të vazhdojë derisa punëtorët t’i marrin pagat në llogaritë e tyre bankare.

“Ne nuk e kemi ndërmend as të gjuajmë askënd, as të kallim askënd. Vendimi ynë dhe fuqia jonë është greva, dhe kjo grevë është shumë normale që do të zgjasë deri në momentin që pagat t’i shohim ne me sytë tanë, përndryshe nuk i besojmë askujt. Në momentin kur pagat bien në llogaritë tona, do të kthehemi në punë. Përndryshe, ne do të vazhdojmë me grevë po themi kështu të përditshme dhe nuk do të kryejmë asnjë shërbim”, tha ai.

Ai shtoi se kompanitë që kanë qenë të kontraktuara me Komunën e Prishtinës tashmë nuk kanë kontrata aktive, derisa akuzoi komunën për mos zgjidhje të situatës.

“Thashë edhe një herë, kompanitë nuk dua t’i përmendim sepse kompanitë e kanë kryer mandatin e tyre. Kontrata më nuk kanë me komunën e Prishtinës dhe kjo gjithçka ka skaduar. Aq më e keqe është që neve para një jave apo dy me udhëheqësit e komunës së Prishtinës na është premtuar që do të vijnë kompani të reja që të menaxhojnë derisa të zgjidhet operatori i ri. Edhe kjo siç po shihet nuk po ndodh sepse këta punëtorë tani jemi pothuajse 20 ditë kanë kaluar dhe këta nuk kanë fare kontrata, që ekziston mundësia që ndoshta edhe gjatë kësaj periudhe nuk do ta paguajnë askush sepse dikush do në anarki dhe anarki do të ketë”, tha ai.

Në Prishtinë është hapur edicioni i dhjetë i Prishtina International Theater Festival “Burbuqe Berisha”.

Ceremonia e hapjes mblodhi përfaqësues të institucioneve, partnerë të festivalit, artistë, studentë dhe dashamirë të teatrit.

E pranishme në hapje ishte edhe ushtruesja e detyrës së Presidentes së Kosovës, Albulena Haxhiu.

Në fjalën e saj, ajo foli për rolin e teatrit në shoqëri dhe për ndikimin e artit në ruajtjen e identitetit.

Pas ceremonisë, publiku ndoqi shfaqjen “Kanuni i fermës” me regji të Xheraldina Krasniqi, e cila hapi programin e këtij edicioni.

Festivali këtë vit shënon dhjetë vjet nga themelimi dhe mbetet festivali i vetëm ndërkombëtar i teatrit në Kosovë.

Të paktën 131 vdekje janë raportuar në një shpërthim të Ebolës në Republikën Demokratike të Kongos.

Sipas zyrtarëve lokalë, më shumë se 513 raste janë të dyshuara, në mesin e tyre edhe një mjek amerikan.

Një zëdhënës i qeverisë së Kongos ka deklaruar se rastet tani po raportohen në një zonë më të gjerë, raporton BBC.

Derisa, Qendra Amerikane për Kontrollin dhe Parandalimin e Sëmundjeve ka thënë dy raste të konfirmuara dhe një vdekje janë raportuar edhe në Ugandë.

Organizata Botërore e Shëndetësisë e ka shpallur shpërthimin emergjencë ndërkombëtare llojin aktual të Ebolës, i cili shkaktohet nga virusi Bundibugyo.

Ky shpërthim vdekjeprurës i Ebolës vazhdon të përhapet, qeveria kongoleze është përpjekur t’i sigurojë njerëzit se ekipet e saj të reagimit po punojnë shumë për të gjurmuar dhe hetuar infeksionet e dyshuara dhe se nuk ka nevojë për panik.

Megjithatë, me rastet e identifikuara tani në zona të reja shqetësimi po rritet në mënyrë të pashmangshme.

Ministri në detyrë i Punëve të Brendshme, Xhelal Sveçla ka njoftuar se ka nënshkruar themelimin e grupit punues i cili do të bëj analizimin dhe propozimin e modaliteteve për funksionimin e Xhandarmërisë së Republikës së Kosovës, si Agjencion i Ministrisë së Punëve të Brendshme.

Përmes, një postimi në profilin e tij në rrjetin social Facebook, Sveçla ka thënë se Xhandarmëria përfaqëson një hap të rëndësishëm në konsolidimin e arkitekturës sonë të sigurisë, me mision të qartë për të garantuar prezencë të fuqishme shtetërore në funksion të ruajtjes së kufinjve, integritetit dhe sovranitetit tonë territorial.

Postimi i tij i plotë:

Xhandarmëria e Republikës së Kosovës po bëhet.

Si Ministër i Punëve të Brendshme sot kam nënshkruar themelimin e grupit punues i cili do të bëj analizimin dhe propozimin e modaliteteve për funksionimin e Xhandarmërisë së Republikës së Kosovës, si Agjencion i Ministrisë së Punëve të Brendshme.

Xhandarmëria përfaqëson një hap të rëndësishëm në konsolidimin e arkitekturës sonë të sigurisë, me mision të qartë për të garantuar prezencë të fuqishme shtetërore në funksion të ruajtjes së kufinjve, integritetit dhe sovranitetit tonë territorial, mbrojtjen nga terrorizmi, menaxhimin e trazirave me rrezikshmëri të lartë dhe mbrojtjen e infrastrukturës kritike.

Xhandarmëria e Republikës së Kosovës do të forcojë ndjeshëm kapacitetin shtetëror për parandalim, menaxhim dhe neutralizim të kërcënimeve që cënojnë sigurinë e qytetarëve dhe integritetin territorial të vendit tonë.

Mbrojtja e Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit, kanë njoftuar se nuk kanë prova dhe as dëshmitarë të tjerë për të paraqitur dhe me këtë kanë mbyllur çështjet e tyre në gjykimin për vepra penale kundër administrimit të drejtësisë.

Në njoftimin e saj, mbrojtja e Thaçit thotë se ky njoftim nuk do të thotë që mbrojtja nuk do marrë asnjë mjet juridik për çështje që kanë mbetur ende pa vendim nga ana e gjyqtarit, raporton “Betimi për Drejtësi“.

Mbrojtja e Smakajt ka thënë se në këtë fazë, nuk kanë ndërmend që të dorëzojnë prova, por rikujtoi që është një ankesë e Prokurorisë për të cilën ende s’ka vendim. Kjo çështje, sipas tyre do të varet nga vendimi në atë ankesë.

“Në rast se ankesa IA009-F00002 aprovohet tërësisht ose pjesërisht, mbrojtja e z. Bashkim Smakaj rezervon të drejtën të mbajë një deklaratë hyrëse të mbrojtjes dhe të paraqesë prova (gojore dhe/ose me shkrim) nga i akuzuari dhe/ose të tjerët, dhe në atë fazë duhet të mbahet një konferencë për përgatitjen e mbrojtjes”, thuhet në parashtrimin e mbrojtjes së Smakajt.

Ngjashëm është shprehur edhe ajo e Kilajt, se e ka mbyllur çështjen e saj por që do të paraqesë prova në rast se pranohen provat e Prokurorisë që janë objekt i ankesës së saj e për të cilën ende s’ka vendim.

Në seancën fillestare më 27 shkurt 2026, Hashim Thaçi, Bashkim Smakaj, Fadil Fazliu, Isni Klilaj dhe Hajredin Kuçi, u deklaruan të pafajshëm për veprat penale që iu vihen në barrë.

Po atë ditë (27 shkurt 2026), nisi dëshminë edhe dëshmitari i parë në këtë çështje gjyqësore, i cili ishte me masa mbrojtëse. Dëshmia e tij përfundoi më 2 mars 2026.

Më 3 dhe 4 mars 2026 dëshmoi dëshmitari i dytë Koen Herlaar- ekspert i kriminalistikës në Institutin e Kriminalistikës së Holandës. Po më 4 mars nisi dëshminë dëshmitari i tretë, Chrisopher Kelly- hetues i forenzikës digjitale. Ky dëshmitar e përfundoi dëshminë më 5 mars. Ndërsa, si dëshmitare e mbrojtjes së Thaçit dëshmoi ekspertja e transkriptimit në fushën e kriminalistikës, Helen Fraser. Ajo dëshmoi mç 11 dhe 12 maj 2026.

Ndryshe, Hashim Thaçi ndodhet në Qendrën e Paraburgimit në Hagë që nga nëntori i vitit 2020. Ai është duke u gjykuar për krime lufte, si dhe më 2024 i është ngritur aktakuza kundër administrimit të drejtësisë.

Lidhur me rastin kundër administrimit të drejtësisë, Bashkim Smakaj, Fadil Fazliu dhe Isni Kilaj u arrestuan më 5 dhjetor 2024 në Kosovë dhe u transferuan në objektin e paraburgimit në DhSK, më 6 dhjetor 2024 në bazë të aktakuzës së konfirmuar dhe fletarrestimeve të lëshuara nga Haga.

Ndërsa, Thaçit i është dorëzuar fletarrestimi në objektin e paraburgimit në Hagë më 5 dhjetor 2024, gjithnjë sipas njoftimit të DhSK-së.

Kurse, Hajredin Kuçit i është dorëzuar aktakuza e konfirmuar dhe fletëthirrja për t’u paraqitur para gjykatëses së procedurës paraprake për paraqitjen e parë, e cila u mbajt 9 dhjetor.

Sipas aktakuzës, Thaçi individualisht dhe përmes veprimeve të përbashkëta me grupet; Grupi Fazliu (Fadil Fazliu dhe Fahri Fazliu), Grupin Smakaj (Bashkim Smakaj, Blerim Shala dhe Artan Behrami) si dhe Grupin Kilaj (Isni Kilaj dhe Vllaznim Kryeziu), kanë ndjekur një model të sjelljes për të penguar personat zyrtarë në kryerjen e detyrave zyrtare.

Në aktakuzë thuhet se Thaçi ka udhëhequr dhe marrë pjesë në këto përpjekje përmes vizitave të tij në objektet e paraburgimit gjatë kohës sa ishte i paraburgosur në kuadër të gjykimit të tij për krime lufte dhe krime kundër njerëzimit.

Aty thuhet se anëtarët e Grupit Fazliu, Grupit Smakaj dhe Grupit Kilaj u koordinuan për të ndikuar në dëshmitarët e ZPS-së gjatë vizitave jo të priveligjuara të datave 2 korrik, 9 shtator dhe 6 tetor 2023.

Si rrjedhojë, ndaj Thaçit rëndojnë tri akuza për pengim të personit zyrtar në kryerjen e detyrave zyrtare, tri për shkelje të fshehtësisë së procedurës dhe katër akuza për mosbindje ndaj gjykatës.

Ndërsa, Kilaj, Smakaj dhe Fazliu akuzohen për tentativë të pengimit të personave zyrtarë në kryerjen e detyrave zyrtare dhe mosbindje ndaj gjykatës. Kurse, Kuçi i ka dy akuza për mosbindje ndaj gjykatës.