Author: G.O.

Kryeministri i Shqipërisë Edi Rama i ka dhënë mbështetje të vendimit të Qeverisë së Kosovës e cila i kërkon Agjencisë Kadastrale të regjistrojë Manastirin e Deçanit, pas Vendimit të Gjykatës Kushtetuese.

Ai ka inkurajon lidershipin e Kosovës që të punojë me aleatët për të treguar se Kosova është një partner i matur dhe i besueshëm i Komunitetit Euroatlantik.

“E mbështes plotësisht vendimin e Qeverisë së Republikës së Kosovës për zbatimin e vendimit të Gjykatës Kushtetuese lidhur me Manastirin e Deçanit; më mirë vonë se kurrë. E inkurajoj lidershipin e Kosovës që të vazhdojë të punojë me aleatët tanë të përbashkët për të demonstruar se Republika e Kosovës është me të vërtetë një partner i matur dhe i besueshëm i Komunitetit Euroatlantik”, shkruan Rama.

Ndryshe, të mërkurën qeveria ka urdhëruar Agjencinë Kadastrale të zbatojë vendimin e Gjykatës Kushtetuese për pronat në afërsi të Manastirit të Deçanit.

Kryeministri i vendit, Albin Kurti ka deklaruar se i kanë kërkuar Agjencionit Kadastral të Kosovës që ta zbatojë vendimin e Gjykatës Kushtetuese lidhur me tokën rreth Manastirit të Deçanit. Kurti ka thënë se këtë vendim e ka marrë për ta hequr si kusht për pranimin e Kosovës në Këshill të Evropës.

Në raportin e auditorit të publikuar sot thuhet se të hyrat për klubet dhe organizatat sportive të arritura përmes Ligjit të Sponzorisimit nuk janë duke e arritur qëllimin e tyre për ngritjen e cilësisë në sport.

Auditorja e Përgjithshme, Vlora Spanca, ka thënë në konferencë për media se ekziston një mungesë e dukshme e dëshmive që vërtetojnë se kontributet financiare në mënyrë efektive kanë përmirësuar cilësinë e sportit në Kosovë dhe gjithashtu nuk ka dëshmi që sigurojnë se fondet janë shpenzuar.

“Ekziston një mungesë e dukshme e dëshmive që vërtetojnë se kontributet financiare në mënyrë efektive kanë përmirësuar cilësinë e sportit në Kosovë. Nuk ka dëshmi që sigurojnë se fondet janë shpenzuar, pra nuk ka një sistem që verifikon se aktivitetet janë realizuar në terren ashtu siç ishin planifikuar. Po ashtu MKRS gjatë periudhës 2020-2022 nuk ka zhvilluar asnjë monitorim. Kjo mungesë e monitorimit ka lënë hapësira për dyshime në lidhje me përdorimin e efektshëm të burimeve publike dhe realizimin e synimeve të interesit publik. Fondet e sponsorizimit nuk kanë arritur qëllimet për ngritje të cilësisë së sportit në vend. Kemi gjetur se një pjesë e këtyre fondeve përdoren shpesh për qëllime të marketingut të kompanive të sponsorizuara, duke rrezikuar që fondet mos të përdoren për interesin publik”, thuhet në raportin e auditorit.

Raporti gjithashtu ka vërtetuar se mbi 490 mijë euro nuk janë transferuar fare tek klubet sportive si sponosorizim nga kompanitë private.

Sponsorizimi dhe lirimi i 30% të tatimit në fitim për kompanitë private ka rezultuar me shmangie tatimore. Nga 45 mostrat e testuara kemi gjetur se mbi 490 mijë euro nuk janë transferuar fare tek klubet sportive si sponosorizim nga kompanitë private edhe pse në Administratën Tatimore të Kosovës kompanitë kishin raportuar se i kishin dhënë këto mjete për sponsorizim. Për më tepër këto kompani sponsorizuese janë liruar nga tatimi dhe si rrjedhojë nuk i kanë paguar tatim shtetit. Përveç kësaj, klubet sportive kanë përfituar sponsorizim mbi 1 (një) milion euro nga kompanitë private e për të cilat nuk kanë pasur vërtetim për sponsorizim nga ana e MKRS-së. Mungesa e koordinimit ndërmjet MKRS-së dhe Administratës Tatimore ka bërë që mos të ketë kontroll të duhur për shumat e sakta që duhet tatuar dhe liruar nga tatimi”, tha Spanca.

Gjithashtu kritika në këtë raport ka edhe për organizatat sporrtive për faktin se ato gjatë viteve 2020-2022, nuk kanë raportuar për shpenzimet e subvencioneve në vlerë prej 3.5 milionë euro të financuara nga MKRS.

“Në anën tjetër, Organizatat sportive gjatë viteve 2020-2022, nuk kanë raportuar për shpenzimet e subvencioneve në vlerë prej 3.5 milionë euro të financuara nga MKRS. Përveç financimeve me memorandume dhe me thirrje, MKRS financon organizatat sportive edhe pa thirrje publike , vetëm me kërkesa drejtuar Ministrisë, formë të cilën nuk e ka të paraparë në ligje dhe rregullore. Për më shumë, një nga Organizatat Joqeveritare përfituese e projektit “databaza sportive në Kosovë” nuk ka dorëzuar produktin/raportin final me kohë për të cilin Ministria kishte paguar 121,430 euro. Për më shumë, edhe pas dorëzimit të produktit, Ministria nuk e ka shqyrtuar dhe as pranuar të njëjtin përmes komisionit për të vlerësuar apo maksimizuar përfitimin nga ky projekt. Për pasojë, vlera për paranë e shpenzuar nuk është materializuar”, nënvizoi Spanca.

Për adresimin e këtyre çështjeve të trajtuara në raport, nga ZKA janë dhënë 10 rekomandime për dy institucione. 6 rekomandime për MKRS, 2 rekomandime për ATK-në dhe 2 të përbashkëta për të dy institucionet.

Guvernatori i Bankës Qendrore të Kosovës (BQK), Ahmet Ismaili tha se masat e vëna nga BE në qershor të vitit 2023, nuk kanë pasur ndikim direkt në punën e tyre, derisa potencoi se kanë vazhduar bashkëpunimin me partnerët dhe BE-në, ngase sipas tij BQK-ja qëllimshëm është përjashtuar nga çfarëdo lloj kufizimi.

Ai këto komente i bëri gjatë raportimit të tij në Komisionin për Buxhet, Punë dhe Transfere lidhur me Marrëveshjen e Stabilizim-Asocimit (MSA) dhe rregulloret e BQK-së, derisa iu përgjigj pyetjes së deputetit nga LDK-ja Avdullah Hoti, nëse kanë ndikuar masat e vëna nga BE në punën e BQK-së.

“Sa i përket masave ne si BQK nuk kemi ndonjë impakt direkt, ne kemi vazhduar me bashkëpunimin tone me partneret tanë me Bashkimin Evropian dhe bankat partnere pa asnjë kufizim… BQK-ja ka qenë, po besoj, qëllimshëm e përjashtuar nga çfarëdo lloj kufizimi. Kështu që ne kemi vazhduar të marrim asistencat e nevojshme, të jemi pjesëmarrës të gjithë dinamikës që ka qenë e paraparë, me këtë rast i falënderoj që ndikimet e tjera jashtë Bankës Qendrore nuk kanë reflektuar në cilësinë e bashkëpunimit tonë”, tha Ismaili.

Ismaili i pyetur nga deputeti i AAK-së, Pal Lekaj nëse lufta Ukrainë-Rusi ka ndikuar në ekonominë e Kosovës, tha se duke qenë se vendi ynë është i varur nga importi në masë të madhe është ndikuar drejtpërdrejt, porse shtoi se në mesin e këtij viti pritet që situata të normalizohet.

Ai shtoi se në sektorin financiar nuk ka pasur kokëçarje dhe se gradualisht është duke u reduktuar ndikimi negativ.

“Sipas vlerësimeve tona, fundi i vitit 2022, inflacioni ishte 11.6 për qind, fundi i vitit 2023 u mbyll me rreth 4.9 për qind. Pra, nga 2021-2023 filloi normalizimi dhe 2024 dhe të gjitha parashikimet edhe të organeve kryesore botërore kanë parashikim që te mesi i këtij viti do të kthehet në normalitet, sa i përket presionit inflacionist…Ekonomia jonë duke qenë e varur nga importi në masë të madhe është ndikuar drejtpërdrejt, kjo ka ndikuar sigurisht edhe në sistemin bankar në vendet ku ka reflektuar edhe në koston e financimit… Kosova nuk ka ndonjë bankë apo institucion financiar që është drejtpërdrejt e lidhur me Ukrainën ose Rusinë. Në sektorin financiar nuk ka pasur kokëçarje…Po mendojmë që gradualisht është duke u reduktuar ndikimi negativ, ka filluar ta stabilizohet viti 2023-2024”, theksoi Ismaili.

Ndërkaq, deputeti i PDK-së, Mergim Lushtaku, ka pyetur guvernatorin Ismaili në lidhje me një konkurs të BQK-së, për zgjedhjen e zëvendësguvernatorit, në të cilin është zgjedhur Milot Cakaj, për çka tha se ka mundur që të jetë i kurdisur.

Lushtaku ka pyetur Ismailin se a është në dijeni në lidhje me disa informata që kanë qarkulluar se Milot Cakaj, ka pasur lidhje me informatoren e BIA-s në Kosovë, Jelena Bjellica.

Lidhur me këtë, Ismaili tha se konkursi është përsëritur, por që Cakaj ka dalë i pari në listën e kandidatëve, ku kanë aplikuar 15 kandidatë.

“Konkursi i parë që po iu referoheni zotëri Lushtaku është shpallur më 19 gusht 2023. Në këtë konkurs kanë aplikuar 28 kandidatë, 18 janë zgjedhur për intervistim. Pas procesit të intervistimit asnjëri nga kandidatët nuk ka mbërri të kalojë 70 për qind të pragut siç ka qenë e përcaktuar në mënyrë analoge…Në rastin konkret që ju i referoheni, nuk e ka kaluar fare, për shkak të mungesës së dokumentacioneve. Dokumentacionet e tij kanë qenë të panoterizuara siç ka kërkuar konkursi…Pavarësisht nga kapaciteti, përvoja e këto me radhë nuk janë marrë në konsideratë. Pastaj, është përsëritur konkursi…Krahas të njëjtit proces ky që është shpallur me 19 gusht ka qenë i shpallur edhe për operacione financiare, në operacionet bankare kemi pasur kandidatë të suksesshëm, kanë qenë katër persona të suksesshëm dhe është emëruar një person i brendshëm, pra për herë të parë…Në njërin kemi dështuar, njërin e kemi emëruar. Pastaj janë ripërsëritur konkurset…Zotëri Cakaj ka dalë i pari në listën e kandidatëve, ku kanë aplikuar 15…”, potencoi Ismaili.

Përveç kësaj, guvernatori i BQK-së, gjatë raportimit të tij në Komisionin për Buxhet dhe Transfere tha se asnjë informatë e tillë nuk ka arritur në Bankën Qendrore, e po ashtu asnjë ankesë nuk është ushtruar ndaj procesit të përzgjedhjes të asnjërit nga këta zëvendësguvernatorë.

Ai shtoi se në BQK nuk ka vend askush që nuk plotëson integritetin profesion dhe të sigurisë kombëtare.

“Sa i përket kërkesave të nevojshme për tu emëruar ju siguroj që të gjitha ato janë të respektuara sipas ligjit për Bankën Qendrore. Secili kandidat është dashur ta sjellë certifikatën prej gjykatës, vërtetimin prej policisë. Për fat të keq, unë e kam kuptuar këtë po ashtu në Bankë Qendrore se asnjë nga drejtuesit e bankës qendrore nuk ka, as nuk ka pasur certifikatë të sigurisë dhe kur jam interesuar tash së voni del se nuk po mund të lëshohej, për shkak të ndryshimit të ligjit, për kompetencë ishte larguar nga AKI-ja… Asnjë informatë ju siguroj që nuk ka qenë e kësaj natyre, të paktën në Bankë Qendrore nuk ka ardhur, e po ashtu asnjë ankesë nuk është ushtruar ndaj procesit të përzgjedhjes të asnjërit nga këta zëvendësguvernatorë… Në praktikë e shëndetshme do të ishte që të gjithë drejtuesit minimalisht të kenë një certifikatë të sigurisë…Në pyetjen a ka, nuk kishte pasur ndonjëherë…Një informatë të tillë ne në asnjë organ nuk e kemi pranuar, përveç që e kemi parë një postim publik që është bërë lajm”, tha Ismaili.

Deputeti i Aleancës për Ardhmërinë e Kosovës, Pal Lekaj ka ironizuar me kryeministrin Albin Kurti lidhur me pranimin e vendimit për tokat e Manastirit të Deçanit.

Lekaj në një postim në ‘Facebook’ madje e quan “patriot” kreun e Qeverisë.

“HAHAHAHAHA, Ku je o Albin patrioti???? A lëshove bajrakun a?”, ka shkruar Lekaj në Facebook.

Kujtojmë se në mbledhjen e sotme të Qeverisë, kryeministri Albin Kurti ka bërë të ditur se ka kërkuar nga Agjencia Kadastrale ta zbatojë vendimin e Gjykatës Kushtetuese për dhënien e tokës së Manastirit të Deçanit.

Kurti tha se Kosovës i është bërë e qartë që të zgjedhin mes dy opsioneve, të zbatojnë vendimin e Gjykatës Kushtetuese për të ecur përpara drejt anëtarësimit në Këshill të Evropës këtë vit, apo të hiqet dorë nga çështja e Kosovës nga agjenda e anëtarësimit.

Një tërmet me magnitudë 2.6 të shkallës së Rihterit ka goditur sot Kosovën.

Sipas EMSC, epiqendra ishte në rajonin e Pejës dhe se thellësia hipoqendrore ishte 2 km.

Ambasadori i Gjermanisë në Prishtinë, Jorn Rohde, ka thënë se vendimi i sotëm i Qeverisë Kurti për të urdhëruar kalimin e 24 hektarëve tek Manastiri i Deçanit është një moment historik.

Rohde ka thënë se edhe pese zbatimi i vendimit të Gjykatës Kushtetuese të Kosovës është shumë i vonuar, ai shënon një hap të rëndësishëm të Kosovës për sundimin e ligjit.

Ambasadori gjerman ka falënderuar të gjithë aktorët politikë, përfshirë edhe Manastirin e Deçanit.

“Vendimi i Deçanit ishte shumë i vonuar, ai shënon një hap të rëndësishëm në angazhimin e 🇽🇰 për sundimin e ligjit. Urojmë qeverinë e Kosovës, të gjithë aktorët politikë të përfshirë dhe Manastirin e Deçanit në këtë moment historik”, ka shkruar Rohde.

Shefi i Bashkimit Evropian në Kosovë, Tomas Szunyog e ka mirëpritur vendimin e Qeverisë së Kosovës lidhur me Manastirin e Deçanit.

Szunyog theksoi se ruajtja e sundimit të ligjit dhe respektimi i pavarësisë së gjyqësorit janë parakushte të nevojshme për rrugën e Kosovës drejt BE-së, njofton Klankosova.tv.

“Një ditë e mirë për sundimin e ligjit në Kosovë! Zbatimi i shumëpritur i vendimit të Gjykatës Kushtetuese të vitit 2016 për çështjen e Manastirit të Deçanit & regjistrimi i tokës së manastirit më në fund bëhet realitet”, shkroi Tomas Szunyog në platformën X.

“BE-ja bazohet në sundimin e ligjit. Ruajtja e sundimit të ligjit dhe respektimi i pavarësisë së gjyqësorit janë parakushte të nevojshme për rrugën e Kosovës drejt BE-së. Vendimi i sotëm është një hap i mirëpritur, i cili tregon përkushtimin e Kosovës”.

Shumica e mjekëve dhe profesorëve i janë përgjigjur pozitivisht obligimit ligjor për deklarimin e pasurisë në Agjencinë për Parandalimin e Korrupsionit. Kështu thotë drejtori i AKK-së, Yll Buleshakaj në një intervistë për KosovaPress derisa potencon se rreth 2 mijë e 100 mjekë dhe profesorë kanë deklaruar pasurinë e tyre brenda periudhës së rregullt kohore, e cila filloi me 12 shkurt dhe përfundoi dje me 12 mars.

Ndërkaq, Buleshkaj tregon se vetëm 90 persona nga këto dy kategori nuk kanë bërë ende deklarimin e pasurisë. Ai shton se këto ditë janë në proces të pastrimit të listës, për të parë nëse dikush prej mjekëve dhe profesorëve që nuk iu janë përgjigjur thirrjes, është në mesin e atyre që e kanë deklaruar pasurinë, por si pjesë të një detyre tjetër të tyre.

Buleshkaj për KosovaPress thotë se pas përfundimit të pastrimit të listës, janë të obliguar të shqiptojnë një gjobë prej 30 për qind të pagës së tyre mujore për secilin që është vonuar.

Përveç kësaj, ai tregon se të njëjtëve u jepet një afat shtesë prej 15 ditëve për ta kryer këtë obligim dhe nëse nuk e bëjnë, Agjencia për Parandalimin e Korrupsionit në mënyrë automatike do të përgatisë kallëzime penale dhe do t’i dërgojë ato në prokurorinë e shtetit.

“Pasurinë e kanë deklaruar nga numri i mjekëve dhe profesorëve rreth 2100. Ndërsa, nuk e kanë kryer këtë obligim rreth 90. Në mesin e 90-ve, po besojmë që mund të ketë plot, të cilët për shkak të detyrave të tjera, kanë mundur ta deklarojnë si pjesë të detyrës tjetër. Për shembull, ka plotë profesorë të universitetit të cilët punojnë edhe mjekë, apo në Qendrën Klinike Universitare të Kosovës dhe ata nuk kanë pasur nevojë ta bëjnë deklarimin dy herë… Këto ditë do të jemi në proces të pastrimit të kësaj liste, të shohim nëse dikush nga këta që rezultonin në data bazë që nuk e kanë kryer këtë obligim, është në mesin e atyre që e kanë deklaruar pasurinë, por si pjesë të një detyre tjetër të tyre…Pas përfundimit të pastrimit të listës, ne jemi të obliguar sipas ligjit të shqiptojmë për secilin që është vonuar një gjobë prej 30 për qind të pagës së tyre mujore. Pastaj u jepet një afat shtesë prej 15 ditëve për ta kryer këtë obligim. Në qoftë se nuk kryhet obligimi edhe në afatin 15 ditor, atëherë agjencia në mënyrë automatike do të përgatisë kallëzime penale dhe do t’i dërgojë këto në prokurorinë e shtetit, për shkak se konsiderohet vepër penale”, thotë Buleshkaj.

Ndërkaq, është raportuar në media se mbi 300 mjekë kanë nënshkruar një peticion dhe e kanë dërguar tek Institucioni i Avokatit të Popullit për të kundërshtuar vendimin për deklarimin e pasurisë në Agjencinë Kundër Korrupsion.

Lidhur me këtë, drejtori i AKK-së, Yll Buleshkaj thotë se është e drejtë e secilit që të dërgojë raste tek Avokati i Popullit, porse sipas tij deklarimi i pasurisë nuk shkel të drejtë të njeriut, sepse nuk është në kundërshtim me parimet bazë të njeriut.

Ai shton se ka plotë kategori të cilët paguhen më pak se mjekët dhe profesorët, e të cilët janë të obliguar ta bëjnë deklarimin e pasurisë.

“Është e drejtë e secilit që të dërgojë raste tek Avokati i Popullit. Avokati i Popullit merret me raste të cilët i shkelin të drejtat e njeriut. Po besoj që deklarimi i pasurisë nuk shkel të drejtë të njeriut, sepse nuk është në kundërshtim me parimet bazë të njeriut. Ka plotë kategori të cilët edhe paguhen më pak se mjekët dhe profesorët, e të cilët janë të obliguar ta bëjnë deklarimin e pasurisë dhe marrin më pak nga paraja publike sesa këto kategori. Por, është e drejtë e tyre, ndërsa është obligim i yni që ta zbatojmë ligjin dhe të kërkojmë që të gjithë mjekët dhe gjithë profesorët e universiteteve publike të bëjnë deklarimin e pasurisë saktë dhe në kohë”, potencon Buleshkaj.

Ndërkaq, më 1 mars ka filluar edhe deklarimi i rregullt i pasurisë për të gjithë zyrtarët publikë që e kanë kryer këtë obligim edhe vitin e kaluar.

Buleshkaj thekson se nga 10 mijë zyrtarë publikë që janë të obliguar ta deklarojnë pasurinë, deri më tani mbi 1 mijë të tillë i janë përgjigjur pozitivisht thirrjes.

Për këtë, Buleshkaj thotë se po ndodhë për herë të parë, që deklarimi i pasurisë të bëhet në fillim të afatit, ngase sipas tij trendi ishte që deklarimi të bëhej në fund të periudhës së caktuar.

“Më 1 mars ka filluar deklarimi i rregullt i pasurisë për të gjithë zyrtarët publikë që e kanë kryer këtë deklarim edhe vitin e kaluar, për periudhë nga fillimi nga 1 janari i viti 2023 deri në fund të viti 2023. Dhe ky proces po shkon, c’është e vërteta, fillimisht po duket që po shkon mjaftë mirë . I kemi rreth 1 mijë të cilët e kanë kryer në javët e para deklarimin e pasurisë, sepse historikisht ka qenë që në javën e fundit ka qenë grupi më i madh i deklarimit. kemi një trend më pozitiv, ndoshta edhe pse është shumë më lehtë për ata që e kanë deklaruar më herët. Vetëm duhet t’i përmirësojnë ndryshimet të cilat kanë ndodhur gjatë vitit të kaluar me pasuritë e tyre. Ta llogarisin pagën nëse ka qenë ndryshe me vitin pararak, apo të shtojnë apo të largojnë nëse pasuritë, qofshin të luajtshme apo të paluajtshme ka pasur ndryshime… Janë rreth 10 mijë, i kemi 10 për qind që e kanë deklaruar javën e parë, që nuk ka ndodhur në historinë e agjencisë që të ketë një numër kaq të mirë”, thekson Buleshkaj për KosovaPress.

Mbi 2 mijë mjekë dhe profesorë në Kosovë për herë të parë kanë qenë të obliguar që ta deklarojnë pasurinë e tyre në Agjencinë për Parandalimin e Korrupsionit. Brenda afatit një mujor, i cili ka përfundua dje më 12 mars, 1500 mjekë nga spitalet rajonale dhe të Qendrës Klinike Universitare të Kosovës (QKUK), duke përfshirë edhe 800 profesorë nga shtatë universitetet publike, kanë qenë të detyruar ta kryejnë këtë obligim ligjor.

Emisari amerikan, Gabriel Esocbar, i është drejtuar presidentes Vjosa Osmani me disa fjalë në fillim të fjalimit të tij në konferencën e përbashkët për media pas një takimi që mbajtën.

“Faleminderit zonja Presidente për mikpritjen e ngrohtë në Kosovë. Ju jeni karakteri kryesor dhe trashëgimia e marrëdhënieve bilaterale mes SHBA-së dhe Kosovës dhe dua të them se kjo trashëgimi është e bazuar në një përkushtim të qëndrueshëm për sigurinë, integritetin territorial dhe pavarësinë e Kosovës”, ka theksuar mes tjerash emisari amerikan.