Author: G.O.

Një ngjarje tragjike ka ndodhur në Vushtrri, ku një i ri ka humbur jetën pasi ka rënë nga kati i tretë i një objekti banesor që ishte në ndërtim e sipër, raporton Sinjali.

Lajmin e konfirmoi për Gazetën Sinjali zëdhënësi i Policisë së Kosovës për rajonin e Mitrovicës, Ilmi Prekazi.

“Nga emergjenca e spitalit të Vushtrrisë është konfirmuar se si pasojë e lëndimeve të pësuara, personi ka humbur jetën”, tha Prekazi.

Sipas informacioneve, viktima fillimisht kishte pësuar lëndime të rënda si pasojë e rënies nga lartësia, ndërsa është transportuar me urgjencë për ndihmë mjekësore.

Pavarësisht përpjekjeve të ekipeve mjekësore, i njëjti nuk ka arritur t’u mbijetojë plagëve dhe ka ndërruar jetë.

Në vendin e ngjarjes kanë dalë njësitë policore dhe prokurori, ndërsa rrethanat e rastit po hetohen për të zbuluar shkaqet e sakta të aksidentit.

Shefi i NATO-s mban fjalim në Suedi, ndërsa lë të kuptohet ndryshime të mëtejshme në angazhimet ushtarake të SHBA-së ndaj Evropës.

Aleatët e NATO-s duhet të shpenzojnë më shumë për të mbështetur Ukrainën, thonë udhëheqësit e NATO-s dhe Suedisë, shkruan The Guardian.

Rutte dhe Kristersson thonë gjithashtu se jo të gjitha vendet e NATO-s kontribuojnë në mënyrë të barabartë për të ndihmuar në financimin e mbrojtjes së Ukrainës, transmeton Sinjali.

Rutte thotë se shpenzimet “nuk janë të shpërndara në mënyrë të barabartë brenda NATO-s”, me një grup “të kufizuar” vendesh që udhëheqin përpjekjet Suedia, Kanadaja, Gjermania, Holanda, Danimarka por shumë të tjera “nuk po shpenzojnë mjaftueshëm kur bëhet fjalë për mbështetjen për Ukrainën”.

Kristersson thotë se Suedia është donatori i tretë më i madh dhe “do të ishte shumë më mirë nëse më shumë vende do të konkurronin me madhësinë e mbështetjes sonë”.

Ai thotë: “Ne duhet të jemi afatgjatë dhe të vendosur në mbështetjen tonë. Kështu që unë me të vërtetë do të doja që më shumë vende që flasin kaq mirë për Ukrainën të flasin hapur”.

Kancelari gjerman, Friedrich Merz, propozoi që vendeve të Ballkanit Perëndimor t’u jepet statusi i vëzhguesit në Bashkimin Evropian, ndërsa Ukrainës statusi i së ashtuquajturës anëtare e asociuar pa të drejtë vote.

Në një letër që Merz ua dërgoi liderëve të BE-së – presidentes së Komisionit Evropian, Ursula von der Leyen, presidentit të Këshillit Evropian, Antonio Costa, si dhe presidentit qipriot, Nikos Christodoulides, aktualisht kryesues i BE-së – ai vlerëson se nevojitet një dinamikë e re për Ukrainën, Ballkanin Perëndimor dhe Moldavinë.

Në letrën që Radio Evropa e Lirë e pa, Merz thekson se procesi i zgjerimit të BE-së është duke zgjatur shumë dhe, sipas tij, kjo shkakton zemërim të kuptueshëm si te vendet kandidate, ashtu edhe te shtetet anëtare.

Ballkani Perëndimor – vëzhgues në institucionet e BE-së

Për vendet e Ballkanit Perëndimor dhe Moldavinë, Merz propozon shqyrtimin e “zgjidhjeve inovative” për të përshpejtuar procesin e anëtarësimit të tyre në BE.

Ai sugjeron, mes tjerash, qasje të privilegjuar në tregun e vetëm evropian dhe lidhje më të ngushta me institucionet e BE-së në procesin e përditshëm të vendimmarrjes.

Ai, po ashtu, propozon dhënien e statusit të vëzhguesit për vendet e Ballkanit Perëndimor në të gjitha institucionet relevante të Bashkimit Evropian, si dhe mbajtjen e mbledhjeve të përbashkëta të Komisionit Evropian ose Parlamentit Evropian me përfaqësues të rajonit, për çështje që lidhen drejtpërdrejt me të.

“Integrimi gradual mund të realizohet përmes ndërtimit të blloqeve që do të shërbenin si bazë për zbatimin e plotë të fushave përkatëse të politikave, dhe më pas do të shoqërohej me mbështetje më të madhe në zbatimin e ligjeve të BE-së. Përveç kësaj, mund ta avancojmë edhe integrimin institucional mbi bazën e progresit real. E gjithë kjo mund t’i afrojë ndjeshëm vendet kandidate me ne dhe të nxisë një ambicie të re për reforma të mëtejshme drejt anëtarësimit të plotë”, thuhet në letrën e kancelarit gjerman.

“Të qëndrojmë fort të përkushtuar ndaj premtimit se vendet e Ballkanit Perëndimor dhe Moldavia mund t’i bashkohen Bashkimit Evropian, siç është përcaktuar në Kriteret e Kopenhagës dhe në Agjendën e Selanikut të vitit 2003. Qëllimi ynë nuk ka ndryshuar: kompletimi i Bashkimit Evropian përmes përfshirjes së të gjitha vendeve kandidate”, theksohet në letër.

Nga vendet e Ballkanit Perëndimor, Shqipëria, Mali i Zi, Serbia, Bosnje dhe Hercgovina dhe Maqedonia e Veriut janë kandidate për anëtarësim, ndërsa Kosova jo.

Ukraina si anëtare e asociuar

Kreu i Qeverisë gjermane propozon që Ukrainës menjëherë t’i mundësohet të afrohet më shumë me Bashkimin Evropian dhe institucionet e tij kryesore, “pa ndikuar në negociatat e vazhdueshme të pranimit, por duke inkurajuar dhe mbështetur atë proces”.

Sipas tij, statusi i “shtetit anëtar të asociuar” mund të përfshijë, ndër të tjera, pjesëmarrjen në takimet e udhëheqësve ose ministrave të Bashkimit Evropian pa të drejtë vote, statusin e një anëtari të asociuar të Komisionit Evropian dhe Parlamentit Evropian, gjithashtu pa të drejtë vote, si dhe zbatimin gradual të ligjeve të Bashkimit Evropian në përputhje me përparimin e Ukrainës në negociatat e pranimit – “jo automatikisht, por pas miratimit të Këshillit të Bashkimit Evropian dhe me klauzolat e përshtatshme mbrojtëse”.

Merz, gjithashtu, propozon një mekanizëm automatik kthimi, në rast të kthimit prapa në vlerat themelore të Bashkimit Evropian, veçanërisht kur bëhet fjalë për sundimin e ligjit ose hapa prapa strukturorë në negociatat e pranimit.

“Ukraina është anëtare e familjes evropiane dhe ne do të vazhdojmë ta mbështesim atë në ndërtimin e një të ardhmeje paqësore dhe të begatë brenda Bashkimit Evropian. Me këtë qasje, Ukraina do të bënte një hap të madh përpara, duke iu afruar menjëherë anëtarësimit të plotë. Ne do t’i ofronim Ukrainës një ekuivalent të rëndësishëm të anëtarësimit, që tejkalon shumë atë që do të mund ta arrinim në afat të mesëm përmes metodologjisë sonë të pranimit, veçanërisht duke marrë parasysh procesin e ratifikimit”, thuhet në letën e kancelarit gjerman.

Ai nënvizon, po ashtu, se propozimi për Ukrainën pasqyron situatën specifike të këtij vendi.

Paralelisht, thuhet në letër, Bashkimi Evropian do të vazhdojë me procedurën e rregullt të pranimit, për të siguruar që pranimi formal të arrihet sa më shpejt që të jetë e mundur.

Kreu i Qeverisë gjermane beson se këto propozime nuk kërkojnë ndryshime në kuadrin institucional dhe ligjor të Bashkimit Evropian, por vetëm një “marrëveshje të fortë politike”.

Ai shton se këto çështje mund të zgjidhen nëse evropianët marrin një qasje konstruktive ndaj këtij statusi të veçantë, sepse do të ishte një sinjal i fortë politik, për të cilin Ukraina dhe qytetarët e saj kanë nevojë në kohën e luftës së vazhdueshme të tyre kundër agresionit rus. /REL

Një burrë ka rënë sot nga një kat i një objekti që është në ndërtim e sipër në Vushtrri, ka konfirmuar policia.

Ai u dërgua në emergjencën e spitalit të Vushtrrisë për trajtim, ndërsa rasti është duke u hetuar.

Lajmin e ka konfirmuar zëdhënësi i policisë për rajonin e Mitrovicës, Ilmi Prekazi.

“Policia në Vushtrri ka pranuar informatën se një person i gjinisë mashkullore, ka rënë nga një kat i një ndërtese e cila është në ndërtim e sipër në Vushtrri. Njësitë policore kanë dalë në vendin e ngjarjes. Personi i lënduar është dërguar për trajtim mjekësor në emergjencën e spitalit të qytetit në Vushtrri. Njësitë policore kanë filluar me veprimet hetimore për sqarimin e rrethanave të rastit”, tha ai.

Tridhjetë e katër shtete evropiane, së bashku me Australinë, Kosta Rika dhe Bashkimi Evropian, kanë deklaruar se do t’i bashkohen gjykatës speciale për Ukrainën, e cila synon të ndjekë penalisht Rusinë për pushtimin e nisur në vitin 2022.

Presidenti ukrainas Volodymyr Zelensky nënshkroi vitin e kaluar një marrëveshje me Këshilli i Evropës për krijimin e një organi ligjor që do të trajtojë “krimin e agresionit” lidhur me luftën në Ukrainë.

Këshilli i Ministrave i organizatës, i përbërë nga ministrat e jashtëm të 46 shteteve anëtare, miratoi një rezolutë që vendos bazat për krijimin e gjykatës së ardhshme.

Sipas deklaratës zyrtare, 34 shtete anëtare të Këshillit të Evropës, së bashku me Bashkimin Evropian si institucion, Australia dhe Kosta Rika, kanë “shprehur qëllimin” për t’u bashkuar në marrëveshjen për themelimin e tribunalit.

Sekretari i përgjithshëm i Këshillit të Evropës, Alain Berset, deklaroi se “koha që Rusia të mbajë përgjegjësi për agresionin e saj po afron me shpejtësi”.

“Tribunali i posaçëm përfaqëson drejtësinë dhe shpresën. Tani duhet të ndërmerren veprime për të ndjekur këtë angazhim politik duke siguruar funksionimin dhe financimin e tribunalit”, tha ai.

Në mesin e anëtarëve të Këshillit të Evropës janë 27 vendet e BE-së, por edhe shtete jashtë bllokut si Turqia, Britania e Madhe dhe Ukraina.

Rusia u përjashtua nga Këshilli i Evropës në vitin 2022, pas nisjes së pushtimit të Ukrainës.

Ka nisur mbledhja komemorative për nder të Alush Gashit, profesorit dhe politikanit të shquar, raporton Ekonomia Online.

Para nisjes, kandidatja e LDK-së për presidente, Vjosa Osmani është shkruar në librinë e zisë.

I pranishëm ishte edhe kandidati i LDK-së për kryeministër, Lumir Abdixhiku, si dhe kryetari i komunës së Prishtinës, Përparim Rama.

Ani pse në ditët e fundit ka nisur largimi i mbeturinave vëllimore nga disa zona të Prishtinës, një ditë më parë kryeministri në detyrë, Albin Kurti, deklaroi se situata me mbeturinat në Kosovë është emergjente.

Për situatën e krijuar muajve të fundit, Drejtori i Shërbimeve Publike në kryeqytet, Leutrim Retkoceri, fajin ia la vendimit të Ministrisë së Mjedisit.

“Arsyeja pse ka qenë dhe është parë një vëllim kaq i madh i mbeturinave, është sepse për dy muaj rresht nuk janë marrë mbeturinat vëllimore dhe inertet nga kryeqyteti, pasi Ministria e Ambientit ka lëshuar një vendim, e cila ka bllokuar deponinë që ka qenë në Matiçan për këto mbeturina. Dhe kompanitë nuk kanë mundur t’i dërgojnë askund tjetër sepse nuk i kanë pranuar as në deponinë e Mirashit”, u shpreh ai.

Ai ka folur edhe për hapat që komuna ka ndërmarrë për menaxhimin e situatës dhe zgjidhjen afatgjate të problemit.

“Ne i kemi marrë të gjitha hapat e nevojshëm për sigurimin e lokacioneve dhe procedurën për të ndërtuar një qendër tranzitore të mbeturinave vëllimore, në të cilën po grumbullohen mbeturinat vëllimore dhe pastaj ato do të ndahen, klasifikohen dhe të shpërndahen në deponitë qendrore ashtu siç e kërkon edhe legjislacioni në fuqi. Aksioni është pritur jashtëzakonisht mirë nga qytetarët. Një fenomen çka është vërejtur është se në të gjitha lagjet, e sidomos ato urbane në kryeqytet, deponitë apo mbeturinat ilegale vendosen pranë kontejnerëve nga qytetarët që nuk jetojnë në ato lagje, fatkeqësisht”, thotë drejtori Retkoceri.

Duke folur për gjendjen aktuale në terren, Retkoceri tha se janë identifikuar dhjetëra lokacione problematike.

“Nga ekipi i Shërbimeve Publike që jemi organizuar nga e shtuna, i kemi identifikuar 72 lokacione. Nga këto, deri më tani janë pastruar tërësisht 55 lokacione. Ka mbetur edhe një numër i vogël i lokacioneve pa përfunduar dhe ne shumë shpejt do të mbërrijmë edhe te përfundimi i atyre lokacioneve dhe do të kujdesemi për mirëmbajtjen, për çka kërkojmë ndihmën e të gjithë qytetarëve dhe personave që mund të kontribuojnë në identifikimin e kryerësve të këtyre veprimeve që hedhin mbeturina dhe në anën tjetër ndihmojnë në lokalizimin sa më të shpejtë të këtyre vendeve ku duhet të intervenohet”,  thekson tutje ai.

Presidenti i Shteteve të Bashkuara, Donald Trump, tha se është i gatshëm të presë “disa ditë” për përgjigjen e Iranit ndaj propozimit më të fundit të Uashingtonit që synon përfundimin e luftës, por paralajmëroi se situata mund të përshkallëzohet shpejt, nëse Teherani nuk jep “përgjigjet e duhura”.

“Më besoni, nëse nuk marrim përgjigjet e duhura, gjithçka mund të përshpejtohet. Ne të gjithë jemi gati”, u tha Trump gazetarëve në një ngjarje në Konektikat.

I pyetur se sa gjatë është i gatshëm të presë, Trump tha: “Mund të jenë disa ditë, por gjithçka mund të ndodhë shumë shpejt”.

Më herët, gjatë fjalimit të tij në ceremoninë e diplomimit në Akademinë e Rojës Bregdetare të SHBA-së, Trump tha se Shtetet e Bashkuara mund të kryejnë sulme të tjera ndaj Iranit nëse negociatat dështojnë.

“I goditëm shumë fort. Mund të na duhet t’i godasim edhe më fort, por ndoshta jo”, tha ai, duke përsëritur qëndrimin e administratës së tij për programin bërthamor të Iranit.

“Nuk do ta lejojmë Iranin të ketë armë bërthamore. Është shumë e thjeshtë”, u shpreh Trump.

Këto komente erdhën menjëherë pasi Ministria e Jashtme e Iranit deklaroi se Teherani po shqyrton një propozim të ri amerikan, i cili thuhet se është dorëzuar përmes ndërmjetësve pakistanezë.

Pakistani ka organizuar të vetmin rund zyrtar të bisedimeve të paqes Iran-SHBA, që është mbajtur deri më tani, dhe që atëherë shërben si kanal kryesor i komunikimit midis dy palëve.

Trupat e Gardës Revolucionare Islamike të Iranit paralajmëruan më vonë se çdo sulm i ri nga SHBA-ja mund ta zgjerojë konfliktin “përtej rajonit”.

Që nga 28 shkurti, SHBA-ja dhe Izraeli janë në konflikt të hapur me Iranin dhe aleatët e tij, pas një vale sulmesh ajrore që goditën objektiva ushtarake dhe shtetërore iraniane dhe eliminuan disa figura të larta, përfshirë udhëheqësin suprem, Ajatollah Ali Khamenei.

Sulmet ndodhën në mes të negociatave për programin bërthamor të Iranit, duke i dhënë një goditje të fortë diplomacisë.

Irani reagoi me raketa dhe dronë ndaj Izraelit, bazave amerikane dhe vendeve aleate në rajon, si dhe mbylli Ngushticën e Hormuzit, duke tronditur tregtinë globale.

Gjyqësori iranian ka njoftuar se më 21 maj ka ekzekutuar dy burra, në kuadër të asaj që është përshkruar si një fushatë më e ashpër e ekzekutimeve në kohën e konfliktit me SHBA-në dhe Izraelin.

Sipas agjencisë së lajmeve Tasnim, e cila është e lidhur me Gardën Revolucionare Islamike (IRGC), dy burrat janë akuzuar për formimin e një grupi me qëllim destabilizimin e sigurisë së vendit dhe për anëtarësi në një organizatë që autoritetet e kanë përshkruar si “terroriste separatiste”.

Tasnim i ka identifikuar ata si Ramin Zaleh dhe Karim Maroufpour.

Sipas gjyqësorit iranian, të dy kanë pranuar se kanë bashkëpunuar në një plan për vrasjen e komandantit të IRGC-së në Iranin perëndimor dhe për ruajtjen e armëve për këtë sulm.

Megjithatë, nuk është e qartë se në çfarë rrethanash janë marrë këto deklarata.

Organizatat për të drejtat e njeriut i kanë dënuar gjykimet e tilla.

Qendra për të Drejtat e Njeriut në Iran (CHRI), me seli në Oslo, ka deklaruar se shumë prej këtyre proceseve gjyqësore janë shoqëruar me “tortura, rrëfime të detyruara dhe mungesë të plotë të procesit të rregullt ligjor”.

Ekzekutimet janë intensifikuar që nga 18 marsi – disa javë pas fillimit të luftës me Shtetet e Bashkuara dhe Izraelin.

CHRI dhe organizata “Së bashku kundër dënimit me vdekje”, me seli në Paris, kanë raportuar se të paktën 1.639 persona janë ekzekutuar në Iran në vitin 2025, përfshirë 48 gra, duke e renditur Iranin ndër vendet me numrin më të lartë të ekzekutimeve në botë./REL

Sekretari i Përgjithshëm i NATO-s, Mark Rutte, të mërkurën kërkoi të qetësonte frikën e evropianëve lidhur me tërheqjen e trupave amerikane në kontinent, duke thënë se zvogëlimi i pranisë së trupave amerikane në Evropë nuk do të dëmtojë gatishmërinë mbrojtëse.

“Kur bëhet fjalë për njoftimin, 4,000 deri në 5,000, janë forca që nuk kanë ndikim në planet mbrojtëse të NATO-s”, u tha udhëheqësi i aleancës ushtarake gazetarëve.

Komentet e Rutte vijnë pas sulmit më të fundit të Presidentit të SHBA- së Donald Trump ndaj aleancës, i cili u nxit nga kritikat e kancelarit gjerman Friedrich Merz ndaj luftës SHBA-Izrael në Iran.

Në përgjigje të vërejtjeve të udhëheqëses gjermane, Trump tha se SHBA-të do të tërhiqnin menjëherë 5,000 trupa amerikane nga vendi, diçka që është praktikisht e pamundur dhe do ta ulte shumë projektimin e fuqisë së SHBA-së, pasi këto trupa nuk e mbrojnë kryesisht Gjermaninë, por janë të stacionuara si njësi operative të avancuara, të gatshme për vendosje kryesisht në Afrikë dhe Lindjen e Mesme.

Anëtarët e kabinetit të Trump, përfshirë zëvendëspresidentin JD Vance dhe sekretarin e shtetit Marco Rubio, janë përpjekur të sqarojnë konfuzionin mbi kërcënimin e presidentit për të tërhequr forcat nga Gjermania dhe më vonë nga Polonia.

Të martën, Vance tha se vendosja e 4,000 trupave në Poloni ishte shtyrë dhe jo anuluar. Ndërkohë, Rubio do të takohet me anëtarët evropianë të NATO-s në Suedi këtë javë.

Megjithatë, pavarësisht se sa të tronditur duket se janë aleatët evropianë nga kërcënimi i Trump, SHBA-ja ka planifikuar të orientojë mbrojtjen e saj drejt teatrove të tjera, kryesisht Azisë, për më shumë se një dekadë.

Rutte e përmendi këtë në fjalën e tij, duke thënë: “Ne e dimë që do të ketë rregullime. SHBA-të duhet të orientohen më shumë drejt, për shembull, Azisë. Kjo do të ndodhë me kalimin e kohës dhe në një mënyrë të strukturuar.”

Edhe Pentagoni e trajtoi situatën, duke thënë se do ta zvogëlonte numrin e brigadave të trupave amerikane në Evropë nga katër në tre, që do të thotë se nivelet e trupave do të binin në nivelet e vitit 2021 .