ATV

Author: G.O.

  • Sejdiu: 30 mjekë në procedurë për largim nga Kosova, disa veçse kanë ikur

    Sejdiu: 30 mjekë në procedurë për largim nga Kosova, disa veçse kanë ikur

    Kryetari i Odës së Mjekëve të Kosovës, Pleurat Sejdiu thotë se në tre muajt e parë të këtij viti janë larguar nga Kosova 30 mjekë. Sejdiu për Ekonomia Online thotë se nga ky numër, disa veçse janë larguar e disa janë në proces të kompletimit të dokumentacionit për t’u larguar nga Kosova.

    E krahas ikjes së mjekëve, në Kosovë ekziston një numër i madh i mjekëve të papunë, që aktualisht shkon në mbi 400.

    Sejdiu thotë se institucionet përgjegjëse që nuk po ndërmarrin masa për ta ndalur ikjen e profesionistëve shëndetësor, teksa kritika ka edhe “për punësim të joprofesionistëve”.

    “Si fenomen është duke vazhduar me trendin e njëjtë një trajektore e cila tash e sa vite është e njëjtë me rënie dhe ngritje periodike. Për këtë tre mujor kemi 30 kolegë të rinj të cilët vetëm se kanë plotësuar dokumentacionin dhe janë në proces apo disa prej tyre vetëm se janë larguar e që neve na bën me dije se asgjë nuk ka ndryshuar gjatë kësaj kohe që mundohemi t’i ndalim pra nuk ka pas efekt nëse mund të them se është marrë ndonjë masë atraktive për me e ndal ose zvogëlua këtë trajektore apo numrin e largimit”, u shpreh Sejdiu.

    Por krahas ikjes së mjekëve sipas Sejdiut në Kosovë figurojnë edhe mbi 400 mjekë të papunë. E për këtë Sejdiu kërkon që Ministria e Shëndetësisë e komunat të krijojnë strategji për punësimin e tyre.

    “Me raportin e vitit 2023 do të thotë me 1 janar do të thotë të verifikuar përmes listave të pagave buxhetit të Kosovës dhe të ATK-së përfitimeve që i sjellin prej ATK-së janë të vetëdeklaruar 441 mjekë të papunë që është një numër shumë i madh… është shumë e vërtetë që disa komuna të vogla me qenë më pak atraktive kanë probleme për më i tërheq ata por nënkuptohet për shembull, Obliqi, Fushë-Kosova që janë para lagjes së Prishtinës janë të pakuptueshme kështu që unë mendoj se ka ardhur koha dhe është momenti i fundit që Ministria e Shëndetësisë dhe komunat në këtë rast të bëjnë një strategji të përbashkët se si të ia bëjnë  për funksionimin e këtyre të rinjve sepse duhet ditur se një mjek i cili për tri, katër vite është i papunë pret punë nuk ushtron profesionin ai është mund të them se 50 për qind e njohurive të tij apo e procesit mësimor është e barabartë me zero”, deklaroi Sejdiu.

    Shkak i kësaj gjendje, Sejdiu ka kritikuar edhe nivelin qendror dhe lokal për shkak se “punësimet janë keqpërdorur”.

    “Ministria e Financave jo vetëm tani por edhe në të kaluarën çdoherë e ka dokumentuar se kanë dhënë vende pune të reja për mjek në komuna po ata kryetarët e komunave të cilët janë ata përgjegjës kanë punësuar të tjerë jo mjek, jo punëtorë shëndetësor dhe ato vende janë keqpërdorur dhe tani rreziku vjen faza e dytë është që është më problematike është niveli sekondar i spitaleve i cili unë besoj se vetëm kanë filluar të kenë probleme për shkak të mungesës së specializimeve për një kohë dhe specializime pa kriter të cilat nuk janë dhënë për nevoja reale të këtyre spitaleve rajonale”, thotë Sejdiu.

    “Duhet shtuar këtu çdoherë një sistem i dështuar i dhënies së specializimeve dhe tani kemi mungesa atje kemi një mbingarkesë në Prishtinë në disa larmi dhe kjo bën të pamundur edhe mungesa e një kornize ligjore obligative për këta të rinj që shkollohen nga shteti në këtë rast sepse këto që marrin këta nuk janë paga janë mbështetje financiare për shkollimin specialistik dhe nuk ka një kornizë ligjorë që i obligon të kthehen atje ku janë shkolluar”, u shpreh Sejdiu.

  • ​Kastrati: Kosova pritet të ketë më pak banorë krahasuar me vitin 2011

    ​Kastrati: Kosova pritet të ketë më pak banorë krahasuar me vitin 2011

    Drejtori Ekzekutiv të Agjencisë së Statistikave të Kosovës, Avni Kastrati, ka thënë se gjatë këtij procesi të regjistrimit të popullsisë pritet të ketë më pak banorë, kjo për shkak të rënies së natalitetit dhe migracionit.

    Ai në një prononcim para mediave ka thënë se të gjithë ata qytetarë që nuk regjistrohen, do të përballen me gjoba.

    Kastrati ka thënë se mund të ketë ndonjë bojkot në terren, porse do të vazhdojnë me procesin e tyre.

    “Sa i përket pjesës veriore kemi pas regjistrues dhe mbikëqyrës sa kemi kërkuar, mirëpo duket se ata kanë një lloj trysnie nga komuniteti i tyre, por ne kemi gjetur regjistrues dhe të hënën do të fillojnë trajnimet për komunitetin serb në veri, në katër komunat, dhe shpresojmë që edhe ata do të jenë të gatshëm. Mund të ketë ndonjë bojkotim ad-hoc apo ndonjë trysni, por ne do të ecim përpara me procesin. ASK i ofron kushte secilit komunitet të barabarta dhe mbështet në aspektin logjistik, nëse ata vendosin që nuk do të marrin pjesë në regjistrim, ne e kemi për obligim që të bëjmë një vlerësim të popullsisë për atë zonë, por do të ishte mirë, sepse ata në të kaluarën kur ka qenë regjistrimi në 2011 nuk morën pjesë, por pas tre viteve kishin bërë një kërkesë zyrtare në BE dhe në ASK që të regjistrohen vetëm ajo pjesë, ne nuk ishim dakord si Agjencion, sepse ishte një lloj ndarje. Edhe kësaj here ne po ecim me regjistrimin e popullsisë, ata duhet të jenë në trend me neve”, ka theksuar ai.

    Ai theksoi se trajnimi merr kohë dy ditë, dhe se regjistruesit kanë mundësi të shikojnë procesin edhe prej një video tetë orëshe për mënyrën se si plotësohet pyetësori.

    Sa i përket reagimit të Listës Serbe lidhur me këtë, Kastrati ka thënë se çdo organizim tjetër që bëhet në mënyrë publike kundër këtej procesi do të ndiqet me procedura ligjore.

    Kastrati ka thënë se nëse një person nuk regjistrohet në këtë proces, do të ketë sfida në të ardhmen.

    “Më duket sot ka qenë një deklaratë zyrtare e Listës Serbe që i ka bërë ftesë komunitetit tyre, por sigurisht ne do t’i ndjekim procedurat ligjore, sepse çdo qytetar e ka për obligim të regjistrohet, dhe çdo organizim tjetër, nuk ka të drejtë në mënyrë publike të bëjë fushatë kundër regjistrimit të popullsisë. Sigurisht ne do t’i ndjekim procedurat e zakonshme që janë. Por, besoj që qytetarët nuk e kanë atë mendim të njëjtë, sepse ne kemi kontakt me komunitetin në ato pjesë, por mund të ketë ndonjë presion jo i dukshëm në sipërfaqe. Por, patjetër për të gjithë do të ketë gjoba dhe vështirësi nëse një person nuk regjistrohet gjatë këtij procesi, sigurisht se do të kenë sfida në të ardhmen për të qenë pjesë e institucioneve, sepse nëse nuk je në regjistra, llogaritet që nuk ekziston. Prandaj, ftoj gjithë qytetarët pavarësisht përkatësisë etnike apo religjioze që të jenë pjesë e regjistrimit, sepse nuk ka pyetje konfidenciale, që zakonisht është sfiduese për disa institucione, sepse pyetjet janë të zakonshme”, nënvizoi Kastrati.

    Kastrati ka thënë se do të ketë dy misione nga institucionet ndërkombëtare që do të monitorojnë regjistrimin, një do të vijë të dielën, ndërsa një tjetër me datën 22 prill që do vlerësojnë gjithë procesin e regjistrimit.

    I pyetur me pritshmëritë e këtij institucioni lidhur me numrin e qytetarëve, ai ka thënë se presin që ky numër të jetë më i vogël krahasuar me vitin 2011, kjo për shkak të rënies së natalitetit dhe migracionit.

    Ndërsa, ka treguar edhe për lojën shpërblyese që do të zhvillohet për ata që qëllojnë numrin.

    “Numrin e saktë s’po e themi sepse është një lojë shpërblyese. Është një pyetje e thjeshtë, kushti është që secili qytetar me qenë i regjistruar, ti mund të luash para se të regjistrohesh. Loja shpërblyese do të jetë prej datës 10 online deri me 10 maj, një javë para se të përfundojë regjistrimi me qëllim që mos të dijë askush sa është numri i popullsisë. Presim që do të ketë zvogëlim të numrit të popullsisë krahasuar me vitin 2011, për shkak zvogëlimit të natalitetit në dekadën e fundit dhe migracionit të lartë të kosovareve jashtë Kosovës

    Ai ka shtuar se në pyetësor do te këtë edhe pyetje në lidhje me dëmet e luftës.

    Kastrati ka thënë se regjistrimi do të zhvillohet çdo ditë të javës përveç të hënave, ndërsa ka informuar qytetarët që të regjistrohen në atë vendbanim ku është rezident në pjesën më të madhe të vitit.

    “Regjistrimi do të zhvillohet çdo ditë të javës përveç të hënave, ne kemi parë nga përvojat e kaluara dhe shtetet tjera, sepse gjatë ditëve të punës ka shumë familjarë që nuk është askush, kështu është edhe gjatë vikendit. Regjistruesi ka për detyrë t’i lë tre herë një letër informuese, që thuhet se ka qenë. Por, në rast se qytetarët nuk mund të kontaktojnë regjistruesin, kanë të drejtë të thërrasin në komunë apo në ASK, dhe dërgojmë stafin tjetër. Qytetarët duhet të regjistrohen në atë vendbanim ku është rezident më pjesën më të madhe të vitit”, ka përfunduar Kastrati.

  • Në bashkëpunim me ushtrinë turke, FSK- ja përfundon një trajnim që kishte për qëllim ngritjen e kapaciteteve ushtarake

    Në bashkëpunim me ushtrinë turke, FSK- ja përfundon një trajnim që kishte për qëllim ngritjen e kapaciteteve ushtarake

    Ministri i Mbrojtjes, Ejup Maqedonci, ka njoftuar se pjesëtarët e FSK-së në Regjimentin e Tretë të Këmbësorisë (R3K) kanë përfunduar me sukses trajnimin me Murtaja 81mm, të udhëhequr nga instruktorët e kontingjentit turk.

    “Trajnimi i realizuar në bashkëpunim me Ushtrinë Turke kishte për qëllim ngritjen e kapaciteteve ushtarake në nivel të regjimentit dhe rritjen e ndërveprushmërisë me partnerët në fushën e mbështetjes me zjarr për këmbësori të lehtë”, ka shkruar Maqedonci.

    Ai ka publikuar edhe disa fotografi nga ky trajnim.

  • Arrestohet 25-vjeçari në Kaçanik, ishte i dënuar me 1 vjet burgim për “keqpërdorim të fëmijëve në pornografi”

    Arrestohet 25-vjeçari në Kaçanik, ishte i dënuar me 1 vjet burgim për “keqpërdorim të fëmijëve në pornografi”

    Policia e Kosovës ka arrestuar një 25-vjeçar në Kaçanik pasi ishte i kërkuar nga Gjykata Themelore në Ferizaj për veprën penale “Keqpërdorim i fëmijëve në pornografi”.

    Në njoftimin e policisë bëhet e ditur se i arrestuari ishte i dënuar me 1 vjet burgim dhe i njëjti është dërguar në vuajtje të dënimit.

    “Me datën 05.04.2024 rreth orës 09:15, policët e stacionit në Kaçanik, në Kaçanik kanë arrestuar personin e kërkuar A.B ( M/K) i moshës 25-vjeçar. Ai ishte i kërkuar me urdhëresë të Gjykatës Themelore në Ferizaj për veprën penale‘Keqpërdorim i fëmijëve ne pornografi’ me dënim burgimi prej dymbëdhjetë muajve dhe pas kompletimit të dokumentacionit është dërguar në vuajtje të dënimit”, thuhet në njoftimin e policisë.

    Policia rajonale e Ferizajt ka falënderuar qytetarët për bashkëpunim teksa ka inkurajuar edhe të tjerët që të bashkëpunojnë me policinë.

  • ​Vajzat U19/ Kosova shënon fitore bindëse ndaj Luksemburgut

    ​Vajzat U19/ Kosova shënon fitore bindëse ndaj Luksemburgut

    Kombëtarja e Kosovës e grupmoshës U19 në konkurrencën e vajzave e ka mposhtur sot Kombëtaren e Luksemburgut, të të njëjtës grupmoshë, me rezultat bindës 4:0, në kuadër të rrethit të dytë për kualifikimet e Evropianit 2024.

    Dardanet e reja, me plotë përkushtim iu qasën lojës që nga fillimi i ndeshjes. Në pjesën e parë, Kosova zhbllokoi rezultatin duke shënuar golin e parë përmes Rreze Gashit në minutën e 40-të.

    Me të filluar pjesa e dytë, gjegjësisht në minutën e 49-të, Sahare Berisha shënon për 2:0. Vetëm pesë minuta më pas, Alba Shabani thellon epërsinë me golin e saj duke çuar rezultatin e Kosovës në 3:0.

    Ekipi kundërshtar i cili nuk arriti t’i rezistojë Kosovës, pak para fundit zyrtar të ndeshjes, përkatësisht në minutën 82 shkaktoi autogol, çfarë bëri që Kosova ta përmbyllë takimin me Luksemburgun me shifrat 4:0.

  • Asfaltimi i rrugës Prishtinë-Podujevë, Durmishi jep detaje

    Asfaltimi i rrugës Prishtinë-Podujevë, Durmishi jep detaje

    Zëvëndësministri i Infrastrukturës, Hysen Durmishi ka dhënë detaje lidhur me fillimin e punimeve në rrugën Prishtinë-Podujevë.

    “Sot, filluam me shtresën e parë të asfaltit tek LOT1 – Segmenti me gjatësi prej 800m, e me gjerësi prej 7,5m. Jemi të përkushtuar që punët të ecin me ritme sa më të shpejta, veçanërisht në prag të nisjes së sezonit të verës, ku pritet që ky segment të jetë gati për qarkullimin e automjeteve duke lehtësuar kështu lëvizjen dhe rritur parametrat e sigurisë rrugore”, shkruan Durmishi në njoftim.

  • Gjendet i vdekur një 42-vjeçar në Prizren

    Gjendet i vdekur një 42-vjeçar në Prizren

    Një person është gjetur pa shenja jete gjatë ditës së sotme në Prizren.

    Nga Policia e Kosovës kanë thënë për Reporteri.net se viktima 42 vjeçar  është gjetur pa shenja jete në shtëpinë e tij.

    Zëdhënësi i Policisë për rajonin e Prizrenit, Shaqir Bytyqi tha se familjarët kanë deklaruar se viktima edhe më herët ka pasur probleme shëndetësore dhe sipas tyre bëhet fjalë për vdekje natyrale.

    Megjithatë,  policia me urdhër të prokurorit kujdestar ka hapur rast si “hetim i vdekjes”.

    “Me datë 05.04.2024 , rreth orës 00:30, në shtëpinë e tij në rrugë Petro Nino Luarasi , në Prizren nga mjekët e emergjencës është konstatuar vdekja e viktimës mashkull 42 vjeçar (R.O.).

    Nga familjarët është deklaruar se edhe më herë ka pas probleme shëndetësore.

    Sipas familjarëve dhe mjekëve kujdestar, në bazë të shenjave cilësohet si vdekje natyrale. Megjithatë me urdhër të prokurorit kujdestar hapet rast “Hetim I vdekjes” ndërsa trupi I pa jetë dërgohet në Institutin e Mjekësisë Ligjore në Prishtinë”, tha Bytyqi.

  • Austria dërgon 190 ushtarë në misionin e KFOR-it në Kosovë

    Austria dërgon 190 ushtarë në misionin e KFOR-it në Kosovë

    Ministrja e Mbrojtjes e Austrisë, Claudia Tanner, ka bërë të ditur se gjatë këtij muaji në misionin e KFOR-it do të dërgohet kontingjenti i 50-të i ushtarëve austriak, në kuadër të të cilit do të shërbejnë 190 ushtarë.

    Tanerova tha se vendi i saj është i përkushtuar për pjesëmarrje aktive në tejkalimin e krizave dhe sigurimin e paqes përmes operacioneve ndërkombëtare të paqes në mënyrë që të përballet me sfidat e reja të shekullit të 21-të.

    Ajo theksoi se zgjidhja e problemeve aktuale të sigurisë kërkon bashkëpunim të ngushtë në nivel evropian dhe ndërkombëtar.

    “Përveç përgjegjësisë së saj parësore për mbrojtjen ushtarake kombëtare, pjesëmarrja në operacionet paqeruajtëse ndërkombëtare është një prioritet i lartë për forcat e armatosura austriake. Ushtarët austriakë kanë dëshmuar gjithmonë se janë partnerë të besueshëm në Kosovë dhe jam e kënaqur që ky kurs vazhdon me rotacionin e kontingjentin e 50-të”, tha ajo.

    Austria merr pjesë në këtë mision që nga viti 1999. Komandanti i kontigjentit të ri do të jetë koloneli i Shtabit të Përgjithshëm Bernhard Gruber, i cili do të drejtojë rreth 190 ushtarë.

    Që nga 2 korriku 1999, Forcat e Armatosura të Austrisë janë aktive në Kosovë.

    Ministria austriake e Mbrojtjes thotë se Forcat e Armatosura të Austrisë kontribuojnë në ruajtjen e rendit dhe sigurisë publike, mbështesin organizatat ndërkombëtare dhe ndihmojnë në rindërtimin e rajonit.

  • ​Kurti u bën thirrje komunave për bashkëpunim në regjistrimin e popullsisë

    ​Kurti u bën thirrje komunave për bashkëpunim në regjistrimin e popullsisë

    Kryeministri i Kosovës, Albin Kurti bëri thirrje për angazhim të përbashkët në kryerjen e procesit të regjistrimit të popullsisë, në të cilin është përfshirë edhe pyetësori i dëmeve nga lufta 1998-1999 në ekonomitë familjare të popullit tonë.

    Në takimin e ftuar nga Ministria e Administrimit të Pushtetit Lokal me kryetarët e komunave, Kurti vlerësoi se është thelbësore bashkimi i forcave me qëllim të përbashkët për institucionalizimin, mbrojtjen dhe ruajtjen e kujtesës kolektive, e cila sipas tij do t’i shërbejë edhe brezave që do të vijnë pas nesh.

    Si proces të rëndësishëm dhe jetik regjistrimin e popullsisë, e konsideron edhe ministri i Administrimit dhe Pushtetit Lokal, Elbert Krasniqi.

    Ndërkaq, drejtori në Institutin për Krimet e Kryera Gjatë Luftës në Kosovë, Atdhe Hetemi tha se pret që të vendosen hapa konkret që çojnë drejt grumbullimit të të gjitha materialeve ekzistuese nga komunat e Kosovës në arkivat e Institutit për Krimet e Kryera gjatë luftës në Kosovë.

    “Në këtë regjistrim të popullsisë është përfshirë pyetësori i dëmeve nga lufta 1998-1999 në ekonomitë familjare të popullit tonë. Qytetarët do të deklarojnë dëmet ekonomike, shumat e pronave të shkatërruar si dhe dëmet në njerëz, familjarë të vrarë, të zhdukur, të plagosur apo të burgosur. Më saktësisht kjo periudhë përkufizohet prej 28 shkurtit 1998 deri më 12 qershor 1999. Kjo na ndërlidhë me pikën e dytë të rendit të ditës së sotme, institutin e Krimeve të kryera gjatë luftës në Kosovë të cilën e kemi funksionalizuar për të dokumentuar me saktësi të gjitha krimet anë e mbanë Kosovës. Është thelbësore që të bashkojmë forcat sepse qëllimin e kemi të përbashkët, për institucionalizimin, mbrojtjen dhe ruajtjen e kujtesës kolektive e cila nuk do të na shërbejë vetëm neve por edhe brezave që do të vijnë pas nesh. Me frymë të bashkëpunimit ju ftoj që të angazhohemi bashkë për të kontribuar në këto dy procese kaq të rëndësishme për republikën tonë, historinë tonë dhe të ardhmen tonë”, tha Kurti.

    Ministri Krasniqi tha se informacioni i siguruar nga regjistrimi i popullsisë është thelbësor për qeverisjen efektive, shpërndarjen e burimeve dhe politik bërjen.

    Ai konsideroi se ky proces është gurthemel i qeverisjes moderne dhe zhvillimit shoqëror, ngase sipas tij duke regjistruar me saktësi informacionin demografik do të mbrohet siguria publike dhe do të mbrohen të drejtat e njeriut.

    “Regjistrimi i popullsisë siguron që çdo individ të llogaritet brenda një shoqërie. Ai u siguron qeverive të dhëna të saktë për madhësinë, përbërjen dhe shpërndarjen e popullsisë së tyre. Ky informacion është thelbësor për qeverisjen efektive, shpërndarjen e burimeve dhe politik bërjen…Ky proces nuk është thjeshtë një procedurë burokratike është gurthemel i qeverisjes moderne dhe zhvillimit shoqëror, duke regjistruar me saktësi informacioni demografik ne do të kuptojmë dhe të shërbejmë më mirë qytetarëve tanë të mbrojnë sigurinë publike, të mbrojnë të drejtat e njeriut si dhe të nxisim zhvillimin gjithëpërfshirës dhe të qëndrueshëm”, theksoi Krasniqi.

    Drejtori në Institutin për Krimet e Kryera Gjatë Luftës në Kosovë, Atdhe Hetemi tha se duhet të vendosen hapa konkret që çojnë drejt grumbullimit të të gjitha materialeve ekzistuese nga komunat e Kosovës në arkivat e këtij instituti.

    Ai tha se përmes dokumentimit të saktë dhe të hollësishëm të krimeve të luftës dhe pasojave të tyre do të ndërtohet një themel i fortë për një të ardhme me paqe të qëndrueshme.

    “Nga ky takim mbes me shpresë që të vendosen hapa konkret që çojnë drejt grumbullimit të të gjitha materialeve ekzistuese nga komunat e Kosovës në arkivat e Institutit për Krimet e Kryera gjatë luftës në Kosovë. Përmes dokumentimit të saktë dhe të hollësishëm të krimeve të luftës dhe pasojave të tyre ne sigurisht që ndërtojmë një themel të fortë për një të ardhme me paqe të qëndrueshme…Sipas informacioneve që kam arritur të mbledhë nga ish pjesëmarrësit e këtyre komisioneve të gjitha materialet e mbledhura atëherë kanë përfunduar në dy adresa: Arkivin Qendror të Komisionit në Prishtinë të udhëhequr nga avokati Bajram Krasniqi si dhe në arkivat e secilës komunë të Kosovës. Megjithatë, ende nuk kemi arritur të identifikojmë vendosjen e saktë të arkivit qendror të komisionit, por kemi shumë interes që këto materiale t’i mbledhim nga arkivat e komunave të Kosovës. Për të arritur qëllimet tona kërkojmë bashkëpunimin e thellë dhe të vazhdueshëm me të gjitha komunat e Kosovës”, tha Hetemi.

    Ndërkaq, drejtori i Agjencisë së Statistikave të Kosovës, Avni Kastrati u bëri thirrje komunave të mbështesin dhe kontribuojnë në regjistrimin e popullsisë, duke u ndihmuar regjistruesve nëpër terrene në aspektin logjistik.

    Ai potencoi se në tri shtete të Evropës do të kryhet regjistrimi i popullsisë këtë vit, për çka shtoi se ky proces do të jetë sfidues për disa regjistrues të rinj që po marrin pjesë për herë të parë në këtë projekt.

    “Gjatë këtyre viteve kemi pasur një bashkëpunim shumë të mirë me komunat, por kërkohet që edhe në këto javët në vijim të jeni aktiv sepse duke sipërfaqësisht që është një kohë optimale, gjashtë javë por shumë shpejtë kalojë ditët, dhe kërkohet nga ju që në aspektin logjistik t’i mbështesni stafin që është në terren. Do të jetë sfiduese për disa regjistrues të cilët kanë një distancë të themi jo aq të madhe por në aspektin logjistik nëse keni mundësi t’i mbështesni. Tri shtete jemi në Evropë që do të kemi regjistrim të popullsisë këtë vit. Do të jetë sfidues për disa regjistrues të rinj dhe të reja sepse janë për herë të parë në një projekt të tillë”, tha Kastrati.

    Ndërkaq, regjistrimi i popullsisë ka filluar sot me 5 prill dhe do të zgjasë deri më 17 maj të këtij viti.

    Për dallim nga vitet e kaluara, këtë vit intervistat bëhen përmes pyetësorëve elektronik dhe jo vetëm në letër siç ka qenë më herët.

  • Krasniqi e quan Masakrën e Rezallës krim gjenocidal serb

    Krasniqi e quan Masakrën e Rezallës krim gjenocidal serb

    Kryetari i Partisë Demokratike të Kosovës (PDK), Memli Krasniqi ka kujtuar masakrën e Rezallës ku u vranë 98 civilë shqiptarë.

    Krasniqi e ka quajtur këtë masakër si krim gjenocidal serb për të cilin ekzekutorët akoma nuk kanë dalë para drejtësisë.

    “98 civilë shqiptarë, të të gjitha moshave, u vranë mizorisht në Rezallë me 5 prill të vitit 1999. Nuk u kursye askush. As fëmijët dhe as të moshuarit. Edhe për këtë masakër, sikur për shumë të tjera që ka kryer regjimi gjenocidal serb, ende s’kanë dalë para drejtësisë urdhërdhënësit dhe ekzekutorët”, ka shkruar ai në Facebook.