Author: G.O.

Rusia ka nisur një fushatë të gjerë ajrore kundër rrjetit energjetik të Ukrainës, duke goditur objekte dhe infrastrukturë energjetike në Kiev dhe në rajone të tjera, në atë që zyrtarët ukrainas e kanë cilësuar si një nga sulmet më të rënda të kombinuara ndaj sektorit energjetik në muajt e fundit.

Sipas zyrtarëve ukrainas, nga sulmet janë vrarë shtatë persona, mes tyre edhe një fëmijë. Sulmet pasuan disa ditë intensifikimi të goditjeve me dronë, kryesisht ndaj kryeqytetit, ndërsa Ukraina përballet me shqetësimet për një dimër të vështirë, me sulme të mundshme ndaj infrastrukturës energjetike dhe mungesë të sistemeve të mbrojtjes ajrore.

Operatori shtetëror i rrjetit elektrik të Ukrainës, Ukrenergo, njoftoi se kishte vendosur ndërprerje emergjente të energjisë elektrike në Kiev dhe në tri rajone përreth. Sipas kompanisë, kjo ishte hera e parë që një masë e tillë zbatohej në kryeqytet që nga pranvera.

Sulmet ruse gjatë dimrit të kaluar, të shoqëruara me temperatura rekord të ulëta, dëmtuan rëndë sistemet e energjisë dhe ngrohjes, duke i detyruar qytetarët ukrainas të përballeshin me kushte të vështira.

Në Kiev, disa tramvaje u ndalën për shkak të ndërprerjeve të energjisë, ndërsa qytetarët po ktheheshin në shtëpi pas punës. Kompania e ujësjellësit të kryeqytetit njoftoi gjithashtu se presioni në sistemin e ujit ishte ulur.

“Rusia ka përshkallëzuar sulmet masive ndaj infrastrukturës energjetike”, tha kryeministri Sergii Koretskyi në emisionin X pas sulmeve gjatë natës.

Forcat Ajrore të Ukrainës thanë se sistemet e mbrojtjes ajrore kishin kapur 254 nga 285 dronët rusë të lëshuar deri në orët e para të mbrëmjes.

Pas deklaratës së kryeministrit Albin Kurti se marrëveshja LVV-LDK për Bekim Sejdiun duhet të respektohet, ka reaguar deputeti i LDK-së, Avdullah Hoti, duke thënë se nuk mund të kërkohet mbështetja e një kandidati që tashmë është tërhequr nga gara.

Hoti ka kundërshtuar që dakordimi mes Kurtit dhe kryetarit të LDK-së, Lumir Abdixhiku, të shndërrohet në detyrim për deputetët e Kuvendit, duke theksuar se marrëveshjet politike nuk mund t’ua përcaktojnë votën deputetëve.

Ai ka shtuar se marrëveshjet politike mund të rinegociohen ose të ndryshohen, por jo dispozitat kushtetuese.

Postimi i plotë:

Si mund të thirret dikush në një marrëveshje kur vetë personi i përfshirë në atë marrëveshje është tërhequr nga kandidatura?!

Një dakordim mes dy kryetarëve të partive nuk mund të shndërrohet në urdhër për deputetët e Kuvendit.

Kushtetuta është shumë e qartë: deputetët, si përfaqësues të popullit, nuk i nënshtrohen asnjë detyrimi.

Marrëveshjet politike mund të ndryshohen. Ne jemi gati të votojmë një kandidat nga Lidhja Demokratike të Kosovës, sepse vetëm kështu sigurohet balanca e pushteteve. Ne zgjedhim “zgjedhjet e reja” në vend të nënshtrimit politik.

Marrëveshjet politike mund të negociohen, por jo Kushtetuta e Kosovës.

Prokuroria Themelore në Prizren, Departamenti i Krimeve të Rënda, ka ngritur aktakuzë kundër të pandehurit XH.K., në cilësinë e personit përgjegjës të personit juridik “E.I.” SH.P.K., si dhe ndaj personit juridik “E.I.” SH.P.K., për shkak të dyshimit të bazuar se kanë kryer veprën penale “Keqpërdorimi dhe mashtrimi në prokurim publik”, nga neni 415 i kodit penal të Republikës së Kosovës (KPRK).

Sipas aktakuzës, më 10 dhjetor 2022, në Prizren, i pandehuri XH.K., në cilësinë e pronarit dhe personit përgjegjës të kompanisë “E.I.” SH.P.K., me dashje ka shkelur procedurat dhe rregullat e prokurimit publik, si dhe nuk ka zbatuar detyrimet e përcaktuara me kontratën për “Rregullimin e nxemjes qendrore në sallën e baletit në SHM “Lorenc Antoni”.

I pandehuri XH.K., ka përdorur materiale për ngrohjen qendrore në kundërshtim me detyrimet e përcaktuara në kontratë, duke vendosur gypa të galvanizuar dhe të çelikut të zi, të materialit “inox”, në vend të vendosjes së gypave të bakrit, të cilët nuk janë në përputhje me paramasat dhe parallogaritë për kryerjen e punimeve të ngrohjes qendrore, si dhe me specifikimet për furnizimin dhe montimin e pjesëve dhe pajisjeve si në kontratë, me qëllim të përfitimit për vete, duke i shkaktuar dëm material Komunës së Prizrenit.

Po ashtu, sipas aktakuzës personi juridik “E.I.” SH.P.K., ka shkelur rregullat e prokurimit publik dhe nuk ka zbatuar detyrimet e kontratës, me qëllim të përfitimit të dobisë pasurore.

Prokurori i çështjes, me rastin e ngritjes së aktakuzës, i ka propozuar gjykatës që, pas mbajtjes së shqyrtimit gjyqësor dhe administrimit e vlerësimit të provave, të pandehurit të shpallen fajtorë dhe të dënohen sipas ligjit.

Hysni Gucati nga OVL e UÇK-së,ka folur për protestën e nesërme që do zhvillohet në Prishtinë, kundër dënimit të ish-krerëve të UÇK-së.

Gucati, ka thënë se nesër pritet të jenë mbi 100 mijë pjesëmarrës në protestë.

‘’Nesër besoj do të jetë një ndër protestat më të mëdhaja në histori, nesër do të ketë qytetarë të të gjitha viseve shqiptare. Kemi informacione se nesër do të jetë mbi 100 mijë numri i madh’’, ka deklaruar ai, përcjell Gazeta Express.

Ish-kryeministri i Kosovës, Ramush Haradinaj, ka ftuar qytetarët që të marrin pjesë nesër në marshin protestues në mbështetje të ish-krerëve të UÇK-së.

Përmes një videoje të publikuar në profilin e tij në Facebook, Haradinaj ka deklaruar se vendimi dënues ndaj udhëheqësve të UÇK-së është i papranueshëm dhe i padrejtë.

Ai u ka bërë thirrje qytetarëve që t’i bashkohen marshit, i cili do të mbahet nesër në orën 16:00 në sheshin e kryeqytetit.

“Ju ftoj që të bashkoheni nesër në ora 16 në sheshin e kryeqytetit, Prishtinë, në mbrojtje të luftës së drejt të UÇK-së. Vendimi dënues për udhëheqësit e UÇK-së është i papranueshëm, është i padrejtë. Jo në emrin tim, jo në emrin e popullit të Kosovës. Duke e mbrojt luftën e drejt çlirimtare, mbrojmë atdheun”, ka thënë Haradinaj.

Grupi Parlamentar i Partisë Demokratike të Kosovës (PDK) ka lëshuar mbledhjen e Komisionit për Legjislacion, në shenjë kundërshtimi ndaj mosprocedimit të projektligjit për ndryshimin dhe plotësimin e Ligjit për Dhomat e Specializuara.

Deputetja e PDK-së, Blerta Deliu-Kodra, pas largimit nga mbledhja ka mbajtur një konferencë për media, ku ka deklaruar se partia e saj nuk do të bëhet pengesë për funksionalitetin e institucioneve, por nuk do të marrë pjesë në mbledhjet e komisioneve parlamentare pa u proceduar projektligji për Dhomat e Specializuara.

“Sot si Grup Parlamentar i Partisë Demokratike të Kosovës morëm pjesë në komisionet parlamentare dhe dëshmuam edhe një herë atë që nuk mund të ketë prioritet më të rëndësishëm sot sesa sjellja e ligjit për Dhomat e Specializuara. Pra, si PDK, konsiderojmë se e kemi dëshmuar me veprime se nuk bëhemi pengesë për funksionalitetin e institucioneve të Republikës së Kosovës. Mirëpo, ajo çka është krejtësisht e padrejtë është që të simulojmë normalitet për mbarëvajtje çështjesh të cilat kërkojnë veprim urgjent nga shteti”, ka thënë ajo.

Deliu-Kodra ka theksuar se për PDK-në, projektligji për ndryshimin dhe plotësimin e Ligjit për Dhomat e Specializuara duhet të jetë prioritet jo vetëm i kësaj partie, por edhe i subjekteve të tjera politike.

“Për Partinë Demokratike të Kosovës, projektligji për ndryshimin dhe plotësimin e ligjit për Dhomat e Specializuara, në funksion të mbrojtjes së Ushtrisë Çlirimtare të Kosovës, duhet të jetë prioritet mbi prioritetet. Konsiderojmë që ky duhet të jetë prioritet edhe për të gjitha partitë politike”, ka deklaruar Deliu-Kodra.

Ajo ka kritikuar Qeverinë për mospërfshirjen e këtij projektligji në rendin e ditës, duke theksuar se, pavarësisht vonesave për këtë çështje, në Kuvend janë proceduar një numër i madh projektligjesh me procedura të përshpejtuara.

“Sot në Kuvend, të nderuar përfaqësues të mediave, janë sjellë një numër i madh i projektligjeve me procedura të përshpejtuara, ndërkohë që qeveria i ka diskutuar 45 pika të rendit të ditës. Në Komisionin për Legjislacion, të cilin sapo e lëshuam, duke e thënë qartësisht që nuk do të jemi në komisione pa u sjellë ligji për Dhomat e Specializuara, sot janë sjellë gjashtë projektligje me procedura të përshpejtuara. Dje deputetët i kanë marrë materialet për këto projektligje, ndërkohë pa mbërritur që të diskutohen, të trajtohen, gjashtë projektligje sillen në rend dite në ditën kur nevojë imediate do të duhej të ishte sjellja e ligjit për Dhomat e Specializuara. Pra, projektligji për Dhomat e Specializuara fatkeqësisht vazhdon ende të mbetet në sirtarët e qeverisë”, është shprehur ajo.

Qeveria e Kosovës ka miratuar në mbledhjen e saj projektligjet për ratifikimin e marrëveshjeve financiare me Bashkimin Evropian për programet IPA 2021, IPA 2022 dhe Programin Shumëvjeçar IPA 2026-2027, raporton Ekonomia Online.

Në kuadër të pikave të miratuara është edhe Projektligji për ratifikimin e Amendamentit Nr. 1 të Marrëveshjes Financiare mes Kosovës dhe BE-së për “Programin IPA 2021”.

Kryeministri i Kosovës, Albin Kurti, tha se amendamenti krijon kushte më të përshtatshme për realizimin e projekteve të financuara nga Bashkimi Evropian dhe mundëson vazhdimin e procedurave për kontraktimin dhe shfrytëzimin e 22.2 milionë eurove.

“Amandamenti i marrëveshjes financiare për programin IPA 2021 krijon kushte më të përshtatshme për realizimin e projekteve të financuara nga Bashkimi Evropian. Zgjatja e periudhës së zbatimit e mundëson vijimin e procedurave për kontraktimin dhe shfrytëzimin e fondeve në vlerë prej 22.2 milionë eurosh. Me ratifikimin e këtij amandamenti krijojmë bazën e nevojshme që kjo mbështetje financiare të shfrytëzohet për qëllimet e përcaktuara dhe të sjellë përfitime konkrete për qytetarët”, tha Kurti.

Në mbledhje u miratua edhe Projektligji për ratifikimin e Amendamentit Nr. 1 të Marrëveshjes Financiare mes Kosovës dhe BE-së për “Programin IPA 2022”.

Sipas Kurtit, me këtë amendament krijohen kushtet për kontraktimin dhe shfrytëzimin e 55.7 milionë eurove të mbështetjes financiare nga Bashkimi Evropian.

“Me amandamentin për programin IPA 2022 krijojmë kushtet për kontraktimin dhe shfrytëzimin e fondeve në vlerë prej 55.7 milionë eurosh të mbështetjes së Bashkimit Evropian. Zgjatja e afateve u mundëson institucioneve të përmbushin procedurat e nevojshme dhe të vijojnë me realizimin e projekteve të planifikuara, me synim që të njëjtat të shfrytëzohen plotësisht dhe të kthehen në investime që u shërbejnë nevojave të vendit dhe qytetarëve”, tha Kurti.

Po ashtu, Qeveria miratoi Projektligjin për ratifikimin e Marrëveshjes Financiare mes Kosovës dhe BE-së për Programin Shumëvjeçar IPA 2026-2027.

Kurti bëri të ditur se ky program parasheh mbështetje për projekte në vlerë të përgjithshme prej 193 milionë e 856 mijë eurosh.

“Programi shumëvjeçar IPA 2026-2027 mbështet realizimin e projekteve në vlerë të përgjithshme prej 193 milionë e 856 mijë eurosh. Kjo paketë përfshin rreth 180.5 milionë euro nga Bashkimi Evropian, 9 milionë euro bashkëfinancim nga qeveria, 1.8 milion euro nga Fondi i Kosovës për Efiçiencë të Energjisë dhe 2.5 milionë euro nga partnerët e tjerë zhvillimorë. Ratifikimi i marrëveshjes financiare i hap rrugë fillimit të zbatimit të programit. Institucionet përgjegjëse duhet të përqendrohen në përgatitjen dhe realizimin e projekteve që ky financim të shfrytëzohet plotësisht sipas prioriteteve të përcaktuara”, tha Kurti.

Qeveria e Kosovës ka miratuar propozim-vendimin për shqyrtimin e mëtejshëm të kërkesës për shpronësim për interes publik të pronave të paluajtshme që preken nga realizimi i projektit “Ndërtimi i Autostradës Prishtinë-Gjilan-Dheu i Bardhë”, në segmentin Banullë-Bresalc, raporton Ekonomia Online.

Kryeministri i Kosovës, Albin Kurti, gjatë mbledhjes së Qeverisë tha se propozimi i miratuar mundëson vazhdimin e procedurave për shpronësimin e pronave që preken nga ky projekt.

“Shqyrtimi i propozim-vendimit për shqyrtimin e mëtejshëm të kërkesës për shpronësim për interes publik të pronave të paluajtshme, që preken nga realizimi i projektit ‘Ndërtimi i autostradës Prishtinë-Gjilan dhe Dheu i Bardhë’, segmenti Banullë-Bresalc. Autostrada Prishtinë-Gjilan dhe Dheu i Bardhë synon të përmirësojë lidhjen me rajonin e Gjilanit dhe me pikën kufitare të Dheut të Bardhë. Propozimi i sotëm lejon shqyrtimin e mëtejshëm të kërkesës për shpronësimin e pronave në zonën kadastrale Banullë të Komunës së Lipjanit, të nevojshme për segmentin Banullë-Bresalc”, tha Kurti.

Zëvendësministri i Mjedisit dhe Planifikimit Hapësinor, Driton Hyseni tha se vendimi mundëson fillimin e procedurës së shpronësimit për interes publik të pronave që preken nga realizimi i projektit.

“Atëherë të nderuar kolegë, duke ju falënderuar për konfirmimet e vendimeve për të gjitha pikat deri tani edhe për këtë pikë ju lus miratimin e juaj, sepse ky vendim e mundëson fillimin e procedurës së shpronësimit për interes publik të pronave të paluajtshme të pronarëve dhe zotëruesve të interesit, të cilat preken nga realizimi i projektit ‘Ndërtimi i autostradës Prishtinë-Gjilan-Dheu i Bardhë’, në segmentin Banullë-Bresalc, pra të zonës kadastrale Banullë, Komuna e Lipjanit. Ky projekt, siç e dini, ka rëndësi të veçantë për përmirësimin e lidhjeve infrastrukturore, rritjen e sigurisë në komunikacion dhe lehtësimin e qarkullimit ndërmjet rajoneve tona. Gjithashtu, krijon edhe mundësi të zhvillimit të mëtejshëm ekonomik. Andaj, duke llogaritur rëndësinë e këtij projekti, ju lus për këtë pikë ta miratoni”, tha Hyseni.