Edhe pse në tre vjetët e fundit ka rritje të numrit të armeve të regjistruara me leje megjithatë në duart e qytetarëve vazhdon të ketë shumë më shumë armë pa leje.
Këto armë, sipas Policisë kryesisht përdoren edhe në ahengje familjare.
hkaktar për numrin e madh të armëve pa leje, sipas njohësve të fushës së sigurisë janë edhe dënimet e ulëta.
Kremta me armë, vazhdon të jetë fenomen në ahengjet familjare. Vetëm gjatë vitit 2022 Policia sekuestroi 156 armë të cilat u përdorën në raste të tilla.
Po ashtu gjatë atij viti në përgjithësi u sekuestruan 1400 sish. Megjithatë numri i armëve me leje në Kosovë, vazhdon të mbetet dukshëm më i ulët sesa i atyre pa leje.
Në vitin 2023 janë rreth 41,085 armë me leje. Në vitin 2022 janë rreth 37,450 ndërsa në vitin 2021 janë rreth 30,086. Sa i përket numrit të armëve pa leje sipas një hulumtimi të fundit të vitit 2015 kanë rezultuar rreth 250,000.
Sipas Institutit të Kosovës për Drejtësi, dënimet e ulëta nga gjykatat ndikojnë që të mos ulet numri i armëve pa leje.
“Politikat ndëshkimore duhet të ashpërsohen… Zakonisht dënohen me pak para. Rrallë me burg…
Posedimi i armëve në masë të madhe, vlerësohet rrezik i madh nga njohësit e sigurisë.
“Armët në duar të qytetarëve janë bombë me sahat. Duhet të bëhet kampanjë për t’u pajisur me leje…”
Leja e armës ka afat pesëvjeçar. Armët të cilat qytetarët i posedojnë më shumë me leje, janë ato të kategorisë B1: të shkurtra të zjarrit, gjysmë automatike.
Raporti i Grupit për studime juridike dhe politike ka shpalosur të dhënat e anketës së zhvilluar lidhur me perceptimin e qytetarëve për ndikimin politik në institucionet e drejtësisë dhe sigurinë në vend. Në këtë raport u tregua se besimi i qytetarëve ndaj institucioneve të drejtësisë mbetet i ulët.
Besimi i qytetarëve karshi gjykatave dhe prokurorive është i ulët.
Bazuar në rezultatet e ankesës së kryer nga Grupi për Studime Juridike dhe politike, Qytetarët megjithatë i besojnë më shumë Policisë se institucioneve të tjera të drejtësisë.
Ndërsa mbi 60 për qind e qytetarëve besojnë se politika ndikon që individë të caktuar të jenë të paprekshëm nga drejtësia.
“Për vitin 2022, 62,5 për qind e qytetarëve besojnë se politikanët kanë më pak gjasa të ndëshkohen nga ligji. Ndërsa, vetëm 22,7 për qind prej tyre mendojnë se qytetarët janë të barabartë përpara drejtësisë. Në krahasim me vitin e kaluar, trendi është negativ pasi që kemi një ngritje prej 2,5 për qind që mendojnë se politikanët janë të pandëshkueshëm. Shikuar si tërësi, ky indikator tregon se mbi 60 për qind e popullsisë besojnë se politika të bën të pa prekshëm nga drejtësia.
Në raport thuhet se qytetarët konsiderojnë se organet më pak të ndikuara politikisht janë Policia dhe EULEX-i. Po ashtu, 46 për qind e të anketuarve besojnë se institucionet e drejtësisë vazhdojnë të jenë të prekura nga mit-marrja.
Krahasuar më vitet paraprake anketimi dëshmon se përmirësim të përceptimit ndaj gjykatave nuk ka.
“Mbi 50 për qind e qytetarëve kanë theksuar se nuk kanë vërejtur përmirësim të gjyqësorit gjatë vitit 2022. Si konkluzion, këtë vit shihet se kemi trend negativ krahasuar me vitin e kaluar sa i përket mendimeve të qytetarëve në raport se a është përmirësuar sistemi i drejtësisë në vendin tonë apo jo.
Qytetarët po ashtu kanë vlerësuar edhe sigurinë në vend.
“Ne i kemi pyetur të anketuarit se si ata e vlerësojnë nivelin e sigurisë në vend. Nga vlerat 1-aspak i sigurt, deri në vlerën 5-plotësisht i sigurt, mesatarja e përgjigjeve të të anketuarve ka qenë 3,42.
Nga anketa e realizuar, raporti ofron të dhëna edhe për vlerësimin e qytetarëve për vettingun në drejtësi dhe për konfiskim civil të pasurisë së pajustifikueshme.
Pas shumë kërkesave për takim, këtë të hënë pritet të takohen përfaqësues të Asociacionit të Komunave të Kosovës me kryeministrin, Albin Kurti. Nga Asociacioni i Komunave thonë se në këtë takim kërkesat e tyre do të jenë të qarta, respektivisht kthimi i të hyrave vetanake dhe rishikimi i ligjit për rritje të faturave për 100 për qind për tatim në pronë.
Të hënën e 15 majit, përfaqësues të Asociacionit të Komunave të Kosovës pritet t’i shkojnë në zyre kryeministrit, Albin Kurti. Ky takim vjen pas gati një muaj prejse Asociacioni i Komunave kërkoi takim me kryeministrin.
Për kërkesat që do të paraqesin, kryetarët e komunave mbajtën të shtunën një takim.
Nga Asociacioni i Komunave të kosovës presin që kërkesat të realizohen.
Komunat e Kosovës tashmë një kohë janë ankuar ndaj vendimit të Ministrisë së Financave për bllokimin e bartjes se të hyrave vetanke të komunave nga vitet paraprake.
Kryetari i Prishtinës, Përparim Rama madje ka kërcënuar se do ta dërgojë çështjen në Gjykatën Kushtetuese.
Ndërsa në mbledhjen e qeverisë së 10 majit, duke thënë se qeveria ka ndarë buxhet rekord për komunat, kryeministri, Albin Kurti kritikoi se në disa raste, siç tha, niveli i qeverisjes lokale po përdoret si opozitë ndaj nivelit qendror.
Punëtorët e Korporatës Energjetike disa muaj më parë kishin fituar lëndën për kompensimin e ditëve të punës gjatë fundjavave.
Meqë KEK-u nuk e zbatonte vendimin, Gjykata Themelore në Prishtinë vendosi që të fillojnë procedurat e përmbarimit për 3,3 milionë eurot.
1300 punëtorë të Korporatës Energjetike të Kosovës do t’i marrin afërsisht nga 3500 euro për ditët e punës gjatë vikendeve, gjatë viteve 2012-2018. Meqë Gjykata Themelorë në Prishtinë të premten ka urdhëruar përmbarimin e mjeteve financiare.
Për padinë që ishte ngritur para 10 vjetësh, Gjykata Themelore në Prishtinë vendosi në shtator të vitit 2022, por KEK-u nuk e zbatoi asnjëherë vendimin.
“Përmbaruesi do të merret me këtë çështje, meqë KEK-u ka shterur të gjitha mundësitë ligjore t’i ikë obligimit”
Punëtorët presin që shpejtë t’i kenë paratë në dispozicion.
“Nga ajo që kemi biseduar me avokatin, besoj se brenda 10 ditësh punëtorët do t’I kenë paratë në xhirollogaritë e tyre.”
Megjithatë, Sindikata pret vendimet edhe për disa padi tjera.
“Kemi lëndë për pagat jubilare. Për rrezikshmërinë.
Për shkak të disa pakënaqësive tjera lidhur me pagat, afro 3600 punëtorë të KEK-ut, do protestojë me 22 maj.
Administratorja e Agjencisë Amerikane për Zhvillim Ndërkombëtar, Samantha Power në konferencën e përbashkët me presidenten Vjosa Osmani theksoi edhe njëherë kërkesën për formimin e Asociacionit të komunave me shumicë serbe.
Përparimi drejt normalizimit të marrëdhënieve me Serbinë, sipas administratores Power sjellë benifite për të dy vendet. Ndërkaq, presidentja Osmani tha se kontributi i USAID-it është shembull i përkushtimit të Amerikës për Kosovën.
Në ditën e tretë të qëndrimit në Kosovë, Administratorja e Agjencisë Amerikane për Zhvillim Ndërkombëtar, Samantha Power, takoi presidenten Vjosa Osmani.
Zbatimi i marrëveshjes së Asociacionit të Komunave me Shumicë Serbe, ishte njëra nga temat e diskutuara edhe në këtë takim.
Çdo përparim drejt normalizimit me Serbinë, sipas administratores Power sjellë benifite për të dy vendet.
“Kam inkurajuar që Kosova dhe Serbia të intensifikojnë përpjekjet që ta shpejtojnë rrugën drejt këtij normalizimi. Sepse, çdo përparim në këtë drejtim do të ketë benefite për qytetarët e të dyja vendeve. Me themelimin e Asociacionit të komunave me shumicë serbe, kjo do t’i ndihmojë po ashtu normalizimit të raporteve, me këtë edhe zhvillimit ekonomik dhe biznesit.”
Samantha Power, dikur gazetare e cila raportoi nga lufta në Kosovë, e pati të vështirë ta shpreh ndryshimin qe ka pasur Kosova nga viti 1999.
“Kam takuar ndërmarrës të sektorit të teknologjisë, po ashtu fermerë, të cilët tashmë po eksportojnë në tregje evropiane, me njerëz të rinj që po punojnë për pajtimin mes komuniteteve dhe po ashtu liderët të cilët po avokojnë për të drejtat e gjitha komuniteteve etnike në Kosovë. Të gjithë janë duke punuar, secili në mënyrën e vet në drejtim të ndërtimit të një të ardhmeje më të ndritshme për veten dhe vendin e tyre. Por, prapë është e vështirë që të gjejë fjalët që të shpreh se në çmasë ka ndryshuar Kosova, prej se kam qenë këtu në vitin 1999”.
Teksa falënderoi e zyrtaren e Administratës Biden për mbështetjen, Presidentja, Vjosa Osmani, në konferencën e përbashkët pas takimit tha se kontributi i USAID-it është shembull i përkushtimit të Amerikës për Kosovën.
“Kontributi i USAID-it është nga shembujt më të fortë të përkushtimit të palëkundur të Shteteve të Bashkuara të Amerikës, për ta ndihmuar vendin tonë drejt sukseseve të reja. Për më shumë se dy dekada, USAID ka qëndruar krahë për krahë me Kosovën dhe popullin e saj, duke mbështetur programet, të cilat kanë fuqizuar gratë, rininë dhe komunitetet jo-shumicë në të gjitha fushat. Kanë mbështetur bizneset drejt rritjes së qëndrueshme ekonomike si dhe ka ndihmuar përpjekjet tona për ta forcuar demokracinë dhe sundimin e ligjit”
Shefja e USAD-it e cila në Prishtinë erdhi pasi vizitoi Beogradin, pas takimit me kryeministrin Albin Kurti, tha se procesi i normalizimit të marrëdhënieve të përfundojë me njohje reciproke.
Gjatë konferencës për media te premten u lansua edhe ankandi i parë i parkut me energji solare.
Presidenti i Ukrainës, Volodymyr Zelensky ka nisur vizitën e tij sot, më 13 maj, në Romë.
Pas vizitave me presidentin e Italisë, Sergio Mattarella dhe kryeministren Georgia Meloni ai u takua edhe me Papa Françeskun.
Është hera e parë që ata takohen që nga fillimi i luftës në Ukrainë.
Udhëtimi i tij vjen pas komenteve intriguese të Papa Françeskut muajin e kaluar, kur ai la të kuptohet se ishte përfshirë në një plan të fshehtë paqeje – një nismë që nuk u konfirmua nga Rusia dhe Ukraina.
Papa bën lutje të shpeshta në emër të popullit të “martirizuar” të Ukrainës dhe ka thënë se do të dëshironte të shkonte në Kiev dhe Moskë nëse një pelegrinazh papal mund të çonte përpara kauzën e paqes.
Muajin e kaluar, kryeministri i Ukrainës u takua me Papa Françeskun në Vatikan dhe tha se ai i kërkoi udhëheqësit fetar të ndihmonte Ukrainën të kthente fëmijët e marrë ilegalisht në Rusi gjatë pushtimit.
Luiz Ejlli përveç që u shpall fitues i Big Brother VIP Albania, ai në natën finale kurorëzoi dashurinë me martesë me moderatoren Kiara Tito.
Dyshja që u njohën dhe krijuan romancën brenda shtëpisë së famshme vendosën që të kurorëzoheshin gjatë transmetimit live në finalen e madhe të BBVA.
Por, ajo që mori vëmendje të madhe gjatë ceremonisë së martesës ishte se prezente ishin vetëm familja e Kiarës, ndërsa mungonte ajo e Luizit.
E gjithë kjo u përfol si një hatërmbetje dhe një pakënaqësi të mundshme mes nënës së Luizt me Kiarën, por për këtë këngëtari ka folur gjatë një interviste në emisionin ‘Më lër të flas’.
Luizi tha se nëna e tij është takuar me Kiarën pa praninë e tij dhe se nuk e dinë se çfarë ato kanë diskutuar me njëra-tjetrën.
“Kanë ngrënë drekë bashkë, kanë folur, nuk më kanë treguar çfarë kanë bërë, i kam ngacmuar pak nuk më janë përgjigjur asnjëherë kështu që le të rrjedh”, tha Luizi fillimisht.
“Unë babanë nuk e kam, familja jeton në Amerikë, këtu kanë qenë nëna dhe motra, por nëna ka qenë shumë e sëmurë atë natë dhe motra e vriste shumë presionin që u bë nga jashtë e që thoshin që familja e ka shfrytëzuar e gjëra të tilla, kjo ishte arsyeja që sapo mbaroi finalja i hipa makinë dhe ika në Shkodër, unë nuk kam pasur kohë as të ushqehem gjatë këtyre ditëve, kam humbur katër kilogram, as nuk kam fjetur, uroj që pas këtij shpjegimi të qetësohen, se ato të qeta janë, se unë i njoh, unë e di se kënd kam nënë dhe kënd kam motër”, u shpreh këngëtari shkodran.
Një autobus me targa nga Lugina e Preshevës dhe një kamion me targa kosovare janë aksidentuar në hyrje të Fushë Kosovës.
Sipas Policisë, të lënduar deri më tani janë rreth 30 persona.
Zëdhënësi i Policisë, Bajram Krasniqi, ka thënë se aksidenti ka ndodhur rreth orës 15:50, dhe se në të është përfshirë edhe një veutrë gjithashtu.
“Në ora 15:50, policia është njoftuar për një aksident trafiku të ndodhur në rrugën nacionale Prishtinë-Pejë (fshati Vragoli). Në aksident është përfshirë një autobus me targa të huaja, një kamion me targa vendore dhe një veturë po ashtu me targa vendore. Njësitet përkatëse policore kanë dalë në vend-ngjarje. Si pasojë e aksidentit janë dhjetëra persona që kanë pësuar lëndime. Janë njoftuar edhe ekipet mjekësore”, ka bërë të ditur Krasniqi.
Ai ka thënë se jabnë duke u kryer hetimet dhe se më vonë do të ketë edhe detaje të reja nga ky aksident.
Kryeministri i Republikës së Kosovës, Albin Kurti, nderoi martirët dhe të rënët për liri në fshatin Korishë të Komunës së Prizrenit. Së bashku me Ministrin e Mbrojtjes, Armend Mehaj, Kryetarin e Komisionit Qeveritar për personat e zhdukur, Andin Hoti dhe deputetë të Kuvendit të Republikës, bëri homazhe te Memoriali i Martirëve në Korishë dhe zbuloi shtatoren e heroit Sali Shabani.
Me vendosje të luleve dhe një minutë heshtje, Kryeministri Kurti përkujtoi civilët shqiptarë nga Korisha dhe fshatrat Budakovë, Reshtan, Bllacë, Mushtisht, Maçitevë dhe Greikoc, të vrarë në maj të vitit 1999 me të vetmen arsye se ishin shqiptarë.
“Jam këtu si Kryeministër i Qeverisë së Republikës së Kosovës, jo vetëm thjeshtë të ndaj ndjesitë e përbashkëta për viktimat me familjarët e tyre dhe të gjithë të tjerët, por jam këtu sot në ditën e martirëve të Korishës, sidomos për të treguar që shteti i Kosovës do të kujdeset maksimalisht për trashëgiminë e luftës në Kosovë. Veçanërisht për ta njohur historinë e masakrave dhe të secilit krim e të secilit kriminel, si dhe për të denoncuar të gjitha hallkat e sistemit shtetëror të Serbisë”, tha Kryeministri.
“Kur sheh pllakën përkujtimore me emrat e të vrarëve në Korishë, vëren që të paktën 14 prej tyre kanë qenë fëmijë, pra ishin nën moshën 18 vjeçare atëherë kur u vranë. Mosha e tyre është dëshmia më e pakontestueshme e pafajësisë së gjithë këtij grupi aq të madh të njerëzve, që Serbia i vrau vetëm pse ishin shqiptarë”, tha Kryeministri Kurti. Ai theksoi procesin e filluar nga Qeveria e Republikës së Kosovës për memorializimin e fëmijëve të vrarë, të zhdukur apo që kanë humbur jetën nga kushtet e luftës, në krye të grupit punues të së cilit, është nënkryetarja e Kuvendit të Kosovës, znj.Saranda Bogujevci, vetë e mbijetuar si fëmijë nga masakra e Podujevës.
Duke kujtuar se pothuajse çdo ditë e pranverës nga fundi i marsit e deri në mes të qershorit, paraqet një datë përvjetori të masakrave të kryera nga Serbia në Kosovë, ai tha se një pjesë e mirë e agjendës së tij si Kryeministër është e rezervuar për ngjarjet përkujtimore sikur kjo këtu, sepse shënimi i përvitshëm i krimeve të kryera nga Serbia mbi ne shqiptarët në Kosovë, kërkon të ketë një traditë të saj të kultivuar që duhet mirëmbajtur, ashtu që të krijohen lidhjet mes gjeneratave dhe të përcjellet vetëdijshëm kujtesa e përbashkët për këto krime.
