Author: ATVLive

Kuvendi Komunal i Deçanit ka miratuar sot propozim-vendimin për organizimin e planit zhvillimor komunal 2023-2032, me 21 vota pro dhe dy abstenime.

Drejtori i Urbanizmit dhe Planifikimit Hapësinor, Ramë Melaj, tha se ky proces tregon përkushtimin ndaj zhvillimit të qëndrueshëm dhe mbrojtjes së mjedisit në komunën e Deçanit.

“Pas një pune shumë të madhe që është bëre nga e gjithë ekzekutivi kemi arritur që draftin e PZHKS ta dërgojmë në ministri dhe të aprovohet nga ministria që të bëhet shqyrtimi publik i këtij dokumenti, do të thotë për të vazhduar tutje për t’u finalizuar dhe të hyjë në fuqi ky dokument. Këto janë hapat ligjorë të bazuar në udhëzimin administrativ të cilat parashihen me lidhin e planifikimit duhet që asambleja komunale të marr vendim për hapjen e shqyrtimit publik të këtij dokumenti, pas marrjes së vendimit nga asambleja duhet të merret konfirmimi ligjorë që jemi në rregull me ligjin dhe atëherë kemi 30 ditë afat që të bëhet shqyrtimi publik. Secili nga ju gjatë kësaj periudhe 30 ditore mund të jap komentet e juaja, propozimet e juaja ku ne si drejtori që jemi përgjegjës për këtë dokument e kemi personin përgjegjës, i cili të gjitha të dhënat që ju i bini apo interesin që e shihni për zhvillimin apo ndryshimin e këtij drafti i marrim dhe e krijojmë një raport. Ai raport duhet patjetër të kalojë në ministri (MMPHI) dhe të aprovohet si i tillë dhe pastaj vjen nga ministria një vendim që dokumenti është në rregull dhe ne duhet edhe një herë që ta votojmë që të jetë ai dokument në fuqi”, ka sqaruar Melaj.

Rifat Stojkaj, drejtori për Bujqësi, Pylltari dhe Zhvillim Rural theksoi se në planin zhvillimor janë inkorporuar sugjerimet dhe nevojat e fermerëve, duke përfshirë dy projekte kapitale që shërbejnë si investime në infrastrukturë për të rritur prodhimin bujqësor dhe menaxhuar ujin në tokat bujqësore.

Projekti parashikon ndërtimin e 52 kilometrave të kanaleve të ujit për të furnizuar ujë mjaftueshëm për tokat bujqësore, duke mbuluar mbi 95% të pronave bujqësore. Përveç kësaj, Stojkaj tha se janë punuar në rritjen e fermave blegtorale dhe shtimit të efikasitetit dhe prodhimit.

“Sa i përket pjesës së bujqësisë, personalisht kanë qenë në vizita për katër vjet, ku 200 fermerë me të cilët, me të gjitha sfidat e tyre kanë kaluar këtu, janë bërë programe. Kemi mbajtur dy debate publike, kemi mbajtur takime me ekspertë në forume të ndryshme dhe të gjithë kanë qenë pjesë që janë futur dhe janë inkorporuar në këtë plan zhvillimor. Dua të përmend dy projekte kapitale që janë në komunën tonë, por njëkohësisht që u shërbejnë fermerëve që janë pjesë programore e këtij plani që janë pendat akumuluese përmes të cilëve synohet që të gjithat tokat bujqësore të kenë ujë të mjaftueshëm për t’i ujitur ato toka, pastaj parashihen rreth 52 kilometra kanale të ujitjes të investohen dhe të betonohen gjatë kësaj periudhe, ku parashihet mbi 95 për qind e pronave bujqësore të kenë ujë të mjaftueshëm për fermerët tanë. Është punuar edhe në segmentin blegtoral duke i rritur fermat, duke e rritur numrin e krerëve për qumështore, të rritet numri i serave, të ndihmohen fermerët me mekanizma, të krijohen depot dhe frigoriferët për konservimin dhe përpunimin e produkteve bujqësore”, tha ai.

Kryetari i Komunës së Deçanit, Bashkim Ramosaj, nënvizoi rëndësinë e planit zhvillimor komunal si një dokument i rëndësishëm. Ai theksoi nevojën për përmirësime në dokument, veçanërisht në aspektin e planifikimit hapësinor dhe zhvillim të parcelave të deklaruara si zona me interes të veçantë për komunën.

“Plani zhvillimor komunal është i rëndësishëm si dokument. Kjo nuk ka koment, por dua të tregoj një ecje shumë të zorshme drejt këtij plani, për shkak se koncepti që kemi ngritur si komunë nuk ka qenë krejt në përputhje me konceptet ose normat ligjore në objektivat që ka shteti, sidomos me parkun nacional dhe derisa nuk është krejt i qartë, nuk ka pasur asnjë udhëzues administrativ, nuk ka ndonjë plan hapësinor, na ka bërë të pamundur që të kalojmë në kundërthënie këtë plan zhvillimor komunal dhe na është dashur me këmbëngulje në një rrugëtim që ky dokument të na kthehet më shumë se shtatë, tetë herë derisa është harmanizuar me këto norma ligjore dhe derisa kanë bërë ndryshime, siç është plani hapësinor ose siç është mundësia për me na jep të drejtën për të bërë plan rregullues në ato parcela që i kemi shpallur zona me interes të veçanta për komunën”, tha ai.

Deputetët e Kuvendit të Kosovës nuk kanë arritur as sot të votojnë pro Projektligjit për shëndetin riprodhues dhe fertilizim të asistuar mjekësor.

Kryetari i Kuvendit, Glauk Konjufca, ka thënë se nuk pati kuorum për votimin e kësaj pike dhe ajo është shtyrë për seancën tjetër.

“Nuk kem i mundësi ta trajtojmë çështjen më tutje, amendamenti 4 qe ti trajtojmë amendamentet tjera, mbetet për një seancë tjetër edhe kjo”, ka thënë Konjufca.

Kjo pikë e rendit të ditës së sotshme nuk ka pasur kuorum edhe disa herë të tjera.

Presidenti i Serbisë, Aleksandar Vuçiq ka thënë se ‘e di që askush nga ne nuk do të jetë pjesë e BE-së përpara Ukrainës’. Vuçiq në Samitin e Vendeve të Ballkanit Perëndimor dhe BE-së ku po diskutohet Plani i rritjes për Ballkanin Perëndimor theksoi se ‘kur dhe nëse do të hyjmë së bashku me Ukrainën është një problem tjetër’.

Vuçiq shtoi se kryeministri i Shqipërisë, Edi Rama e hapi temën se a do të jenë pjesë e Bashkimit Evropian.

“Dhe vetëm një gjë për publikun këtu sepse Edi e hapi atë temë nëse do të jemi pjesë e Bashkimit Evropian apo jo, unë e di që nuk do të jemi pjesë e Evropës, asnjë prej nesh para se Ukraina të hyjë në Bashkimin Evropian. A do të mund të hyjmë në Bashkimin Evropian së bashku me Ukrainën apo jo, kjo është çështje tjetër dhe ju mund të thoni çfarë të doni, po ju them, inteligjenca ime po më thotë se kam të drejtë dhe nuk ka të bëjë me inteligjencën time, është për diçka që po ndodh, që do të thotë se ne do të duhet të presim edhe gjashtë vite të tjera, gjë që është gjithashtu në rregull. Ju jeni diku shumë popullor në vendin tim, Bashkimi Evropian nuk është aq popullor, ne nuk jemi aq të njohur, edhe pse ne jemi pjesa më e madhe e këtij rajoni dhe gjithsesi, kjo është diçka që do të na afrojë me Bashkimin Evropian dhe për këtë arsye jo vetëm që nuk do të mohoj rëndësinë e kësaj lloj nisme, por po e përgëzoj dhe po them edhe një herë shumë faleminderit të gjithëve që na mbështetët dhe që jeni kaq ndihmues”, theksoi ai.

Në Samitin e Kotorit po merr pjesë edhe kryeministri i Kosovës, Albin Kurti.

Pas samitit të liderëve të Ballkanit Perëndimor dhe atyre të Bashkimit Evropian (BE), ku u diskutua për Planin e Rritjes për rajon, kryeministri i Malit të Zi, Millojko Spajiq tha se slogani “Një rajon, një vizion”, është diçka që donin të dërgonin si mesazh nga Mali i Zi.

Në një konferencë për media, Spajiq tha se ky është një rajon që do të jetë i avancuar ekonomikisht, që do të jetë pjesë e Bashkimit Evropian, dhe absolutisht një proces i pakthyeshëm.

Spajiq tha se kanë folur për disa tema shumë optimiste që shumë shpejt të jenë pjesë e tregut të përbashkët.

“Këto janë mesazhe të mëdha që nuk janë kurrë më afër dhe para së gjithash përgëzoj të gjithë ata që punuan në planin e rritjes për reformat që janë shumë ambicioze, mendoj se Malazezët janë padyshim më ambiciozët, por kjo është ajo që pritet nga ne, ju dëgjuat mesazhe nga rajoni sot se ata tashmë na konsiderojnë anëtarë të Bashkimit Evropian, se ne duhet të sillemi në atë mënyrë, unë me të vërtetë mendoj se Mali i Zi është qendra e vërtetë e rajonit, se ka mirëkuptim për të gjitha vendet e rajonit, që Mali i Zi do të jap jo 100% po 100 milion % që ti kemi raportet e shkëlqyera me të gjitha vendet e regjionit, nuk do të lëmë asnjë gur pa lëvizur derisa të gjejmë zgjidhje për të gjitha çështjet shumëpalëshe që do të lehtësojnë çështjet bilaterale në të ardhmen. E kuptojmë dhimbjen, i kuptojmë temat që rëndojnë nga e kaluara, por më vjen shumë mirë që të gjithë jemi kthyer nga ardhmja dhe asaj që na bashkon të gjithëve, e që është ekonomia dhe integrimet evropiane”, tha Spajiq.

Në këtë konferencë edhe komisionari evropian për Fqinjësi dhe Zgjerim, Oliver Varhelyi tha se plani i rritjes nuk është më një draft, por është një realitet që kanë filluar ta zbatojnë.

“Pra, komisioni i ardhshëm evropian duhet të jetë një komision i zgjerimit, një komision i zgjerimit që në fund të mandatit të tij do të shohë anëtarë të rinj që hyjnë. Dhe jam shumë i sigurt se me gjithçka që kemi bërë së bashku në këtë mandat, së fundi, me planin e rritjes, Ballkani Perëndimor do të jetë pjesë e atij zgjerimi. Sepse nëse shikoni atë që kemi vënë në tryezë së bashku, metodologjinë e re, planin ekonomik dhe investues, planin e rritjes, ajo që shihni është shpresoj se një grup mjetesh të pakthyeshme që na çojnë drejt zgjerimit. Thjesht për t’ju dhënë një element me të gjitha mjetet që kemi në dispozicion, deri në vitin 2027 Ballkani Perëndimor do të marrë të njëjtin nivel ose të krahasueshëm të intensitetit të ndihmës me atë që struktura jonë aktuale e kohezionit financon në mënyrë të dobishme shtetet anëtare, që do të thotë se ato do të arrijnë 90 pikë përqindjeje të intensitetit të ndihmës së 13 vendeve të kohezionit dhe të fondeve strukturore deri në fund të kësaj… periudhe financiare, e cila mbaron deri në vitin 2027”, tha Varhelyi.

Varhelyi ka përmendur se po bëjnë përparim edhe në pjesën dixhitale të axhendës së tyre, Ëi-Fi për Ballkanin Perëndimor, diçka që sipas tij po e shpërndajnë gradualisht kudo.

“Prandaj, është koha për të kapërcyer të gjitha, si të them, mosmarrëveshjet e konsoliduara dhe tradicionale, për shembull në lidhje me CEFTA-n dhe të bëjmë një lëvizje përpara, sepse rajoni po humbet një mundësi. Rajoni nuk do të mund të përfitojë nga e gjithë kjo nëse vazhdojmë me mosmarrëveshjet e vjetra, mendoj se kjo kornizë ofron zgjidhje pragmatike edhe për tejkalimin e këtyre vështirësive. Dhe siç e thashë shumë, shumë herë, por nuk dua t’i referohem vetes, është se ky rajon më vete mund t’i shtojë një të tretën e PBB-së së tij, është në duart tuaja për ta bërë këtë, kështu që mendoj se nuk ka kohë më të mirë për ta bërë atë se tani. Në fund, lajmi i mirë është se plani i rritjes jo vetëm që është i gjallë dhe po fillon, por mendoj se do të jetë mjaft mbresëlënëse që ne mund të kemi axhendën e reformës të rënë dakord brenda pak ditësh me ju për diçka, për shembull, zgjati shumë më tepër me shtetet tona anëtare”, shtoi ai.

Liderët e vendeve të rajonit, përfaqësues të Bashkimit Evropian dhe Shteteve të Bashkuara të Amerikës, kanë diskutuar Planin e Rritjes për Ballkanin Perëndimor.

Samiti është mbajtur nën sloganin “Një rajon, vizion i përbashkët”.

Në kuadër të takimeve të 33-ta vjetore të Bankës Evropiane për Rindërtim dhe Zhvillim (BERZH) që po zhvillohen në Yerevan të Armenisë, sot u mbajt Seanca Plenare e Bordit të Guvernatorëve të BERZH. Në këtë seancë po merr pjesë edhe Ministri i Financave, Punës dhe Transfereve, z. Hekuran Murati krahas përfaqësuesve tjerë të shteteve anëtare të këtij institucioni.

Gjatë diskutimit, Ministri vuri në dukje performancën e mirë të ekonomisë së Kosovës, duke nënvizuar përpjekjet e vazhdueshme të Qeverisë për të qenë të vëmendshëm ndaj zhvillimeve globale dhe për të mbështetur në mënyrë aktive qytetarët dhe bizneset në tejkalimin e sfidave me të cilat u ballafaquan.

Megjithatë, marrë parasysh ndikimin mbi-proporcional që rritja e normave të interesit ka në ekonomitë në zhvillim, Ministri Murati theksoi rëndësinë e nevojës për rritje të mbështetjes për sektorin privat nga ana e BERZH-it në mënyrë që të mos ketë mungesë të likuiditetit në treg.

Ministri Murati nënvizoi rëndësinë e bashkëpunimit me institucione si BERZH, që luajnë një rol kyç në promovimin e zhvillimit ekonomik dhe qëndrueshmërisë në rajon. Ai ripërsëriti përkushtimin e Kosovës për të punuar ngushtë me BERZH dhe për të thelluar bashkëpunimin në projekte që do të kontribuojnë në zhvillimin dhe stabilitetin ekonomik të vendit.

Zëvendëskryeministrja dhe Ministrja e Punëve të Jashtme dhe Diasporës, Donika Gërvalla në një konferencë për media, ka folur për letrën e drejtuar presidentit të Asamblesë Parlamentare të Këshillit të Evropës, Theodoros Rousopoulos, ku thuhet se Qeveria e Kosovës është duke përgatitur një draftstatut për Asociacionin të cilin është zotuar ta dërgojë në Gjykatën Kushtetuese deri në fund të majit, raporton EO.

“Zotimi ynë në letrën dërguar Këshillit të Evropës është zotim serioz dhe i sinqert dhe është ripërsëritje e ofertës së kryeministri Kurti dhënë në Ohër, Bruksel dhe javëve të fundit”, tha ajo, raporton RTKlive.

Kryediplomatja kosovare tha se Kosova që nga aplikimi për Këshilli të Evropës ka lobuar që të jetë pjesë e kësaj organizate të rëndësishme. Gërvalla theksoi se qeveria e Kosovës ka shprehur vullnetin dhe se shpreson se zotimi i saj të përmbushet.

“Siç jeni informuar të gjithë sot në mëngjes i jam drejtuar me një letër në emër të Qeverisë, Këshillit të Evropës. Kemi përsëritur gatishmërinë tonë për të përgatitur draft- dokument për krijimin e një mekanizmi për vetëmenaxhim, koordinim dhe bashkëpunim të komunave me shumicë serbe në Kosovë. Ky draft do të përmbushte detyrimet e trashëguara ndërkombëtare të Kosovës, do të plotësonte nevojat e qytetarëve serb në Kosovës, dhe do të respektonte në tërësi Kushtetutën dhe të gjitha ligjet në Republikën e Kosovës, dhe parimet e KiE ku kemi bërë kërkesë të anëtarësohemi. Kosova dhe qeveria e saj kanë qenë përherë të përkushtuara për konsolidimin dhe forcimin ndërkombëtar të Kosovës, duke zënë kështu vendin e saj të merituar në mesin e shteteve të përparuara. Jemi ballafaquar me skepticizëm rreth asaj se a ka qenë momenti i duhur kur kemi parashtruar kërkesën tonë. Në favor të raportit votuan edhe shtete qe se kanë njohur Kosovën, madje disa prej tyre kanë qenë më të zëshmet. Gjatë gjithë periudhës, Kosova ka zhvilluar aktivitet të dendur lobimi”

Ish-deputeti i Vetëvendosjes, tani i pavarur, Haki Abazi, ka vendosur një karrige në hyrje të Kuvendit të Kosovës, në të cilën ka vendosur një njoftim mortor duke hapur të pame për vdekjen klinike të Kuvendit dhe Qeverisë së Kosovës.

Abazi i tha mediave se akuzuar Qeverinë Kurti për manipulim dhe fshehje të idesë për krijimin e Asociacionit të Kosovës, që sipas tij, forma e qeverisjes ka arritur nivel të lartë të hipokrizie.

“Është mashtrim total idesë së zgjedhjeve të parakohshme për ta manipuluar, për ta nxjerr energjinë për të mos tu pa ideja që ky është duke e bo Zajednicën, e pat sot mëngjes është duke e dërguar statutin e draftuar nga Friedrich-Ebert-Stiftung, qe tregon qartazi se ne çfarë niveli ka arritur hipokrizia dhe manipulimi në formën e qeverisjes”, është shprehur ai.

Për deputetin e Pavarur, Haki Abazi, historia është duke u ripërsëritur si ajo e viteve të 90’-ta, duke cilësuar se Qeveria Kurti ka tentuar të krijoj situata për të dirigjuar deputetët e tanishëm siç e quan ai “dredhje e dorës”.

“Në këtë vend deputetët e Kosovës e kanë shpall deklaratën kushtetuese të dy korrikut për t’i ikur dredhjes së dorës dhe çfarë po ndodhë në 2024 ose për tre vite më shumë me radhë, neve tentohet me na u dredh dora nga njerëz autokratë e njerëz palegjitimitet, të cilët nuk e kanë marrë votën e qytetarëve fare”, ka shtuar deputeti.

Gjithashtu, Abazi ka ritheksuar se ndryshime pozitive nuk ka pasur nga Qeveria Kurti dhe vetëm po thellohet korrupsioni dhe krimi i organizuar, ai ka kritikuar kryeministrin duke thënë se këto tema për të janë të parëndësishme.

“Asnjë gjë nuk ka ndryshuar, është stresuar dhe mund të stresohet vështirësia e funksionimit institucional nëse kthehemi në kombinat rikat e krimit të organizuar dhe korrupsionit që janë pjesë institucionale që si duket për Kurtin është e parëndësishme, e keni parë në raporte ndërkombëtare as krimi as korrupsioni nuk janë luftuar nga kjo qeveri”, tha Abazi.

Ndërsa sa i përket kalimit të tij në ndonjë parti, ish deputeti i Vetëvendosjes në mënyrë kategorike i mohon zërat se mund të kalojë në partitë e përfolura si ajo e PDK-së dhe ajo e PSD-së.

Policia e Kosovës ka hasur sot në autostradë në një shofer, i cili ka vozitur në 238 km/h në zonën ku shpejtësia e lejuar ishte 100 km/h.

Shoferi është gjobitur me 500 euro, pesë pikë negative, si edhe gjashtë muaj ndalim të mjetit me veprim motorik.
“Njësia për Kontroll të Autostradave në zonën ku kufizimi i shpejtësisë është 100 km/h ka identifikuar shoferin duke drejtuar mjetin me shpejtësi 238 km/h, i njëjti është gjobitur 500 €, 5 pikë negative dhe 6 muaj i është ndaluar drejtimi i mjetit me veprim motorik”, thuhet në njoftimin e Policisë.

Policia po e zbaton ligjin e ri me gjoba më të ashpra, duke ua ndaluar edhe drejtimin e mjetit.

Me 80 vota për ka kaluar marrëveshja ndërmjet Kosovës dhe Bankës Evropiane për Rindërtim dhe Zhvillim për trajtimin e ujërave të zeza në Ferizaj, raporton Ekonomia Online.

Në mungesë të ministrit Hekuran Murati, prezantimin e këtij projektligji e bëri ministri Arben Vitia, i cili tha se kjo marrëveshje ka synim për të avancuar zhvillimin e vendit për një mjedis të pastër.

“Kjo marrëveshje është negociuar dhe finalizuar në kuadër të përpjekjeve të Kosovës për të avancuar zhvillimin e qëndrueshëm të vendit dhe në linjë me programin e qeverisë dhe vizionin për infrastrukturë të integruar në harmoni me mjedisin e pastër”, tha Vitia.

Lideri kinez, Xi Jinping, dhe presidenti rus, Vladimir Putin, i cilësuan raportet mes dy shteteve të tyre si “forcë stabilizuese në botën kaotike”, gjatë takimit të tyre në Pekin.

Në vizitën në Kinë, Putin po kërkon që të marrë mbështetje më të madhe nga Pekini për luftën që udhëheqësi rus ka nisur kundër Ukrainës më 2022 dhe për ekonominë e izoluar të shtetit të tij.

Ky është udhëtimi i parë jashtë vendit i Putinit që u rizgjodh edhe për një mandat presidencial në zgjedhjet e marsit.

Rusia është goditur me sanksione të paprecedenta nga Perëndimi që nga nisja e luftës kundër Ukrainës.

Gjatë takimit mes Xisë dhe Putinit, lideri kinez iu referua homologut të tij si “mik i vjetër”, duke shtuar se raportet Kinë-Rusi “ndihmëse për paqe”.

“Kina është e gatshme të punojë me Rusinë… për të ruajtur drejtësinë në botë”, shtoi Xi.

Putin, ndërkaq, i tha Xisë se raportet mes dy shteteve janë “faktorë stabilizues në arenën ndërkombëtare”.

“Raportet midis Rusisë dhe Kinës nuk janë oportuniste dhe nuk drejtohen kundrejt askujt”, tha Putin, sipas njoftimit të lëshuar nga Kremlini.

“Së bashku, ne respektojmë parimet e drejtësisë dhe rendit të botës demokratike që reflekton realitete multipolare dhe bazohet në të drejtën ndërkombëtare”, shtoi ai.

Pas takimit me dyer të mbyllura. Dy liderët nënshkruan një deklaratë të përbashkët për thellimin e “partneritetit strategjik gjithëpërfshirës” mes shteteve të tyre, raportoi agjencia shtetërore e lajmeve në Kinë, Xinhua.

Udhëheqësi rus arriti në Kinë të mërkurën, disa orë pasi tha se trupat ruse po përparojnë “në të gjitha frontet” në fushëbetejën në Ukrainë, pas nisjes së një sulmi të madh tokësor.

Xi ka kundërshtuar kritikat e Perëndimit për shkak të raporteve të afërta të shtetit të tij me Moskën.

Raportet tregtare Kinë-Rusi kanë lulëzuar që nga nisja e pushtimit rus të Ukrainës dhe më 2023, vlera e tregtisë mes dy shteteve arriti në 240 miliardë dollarë.