ATV

Author: ATVLive

  • Më 26 qershor, takimi Kurti-Vuçiq “për zbatimin e Marrëveshjes Bazë”

    Më 26 qershor, takimi Kurti-Vuçiq “për zbatimin e Marrëveshjes Bazë”

    Përgatiti: Fatlum Jashari

    Për herë të parë pas sulmit terrorist paramilitar të 24 Shtatorit në Banjskë, krerët shtetërorë të Kosovës dhe Serbisë pritet ta zhvillojnë një takim të nivelit të lartë në kuadër të dialogut në Bruksel.

    Bashkimi Evropian konfirmoi se kryeministri kosovar Albin Kurti dhe presidenti serb Aleksandar Vuçiq, janë ftuar për diskutime më 26 Qershor.

    “Mund të konfirmoj se një takim i nivelit të lartë në dialogun e lehtësuar nga Bashkimi Evropian, Beograd-Prishtinë, do të mbahet të mërkurën e ardhshme. Presidenti i Serbisë dhe kryeministri Kurti do t’i përfaqësojnë palët përkatëse dhe takimi do të kryesohet nga lehtësuesi – Përfaqësuesi i Lartë, Josep Borrell, mbështetur nga Përfaqësuesi i Posaçëm i BE-së për Dialogun, Miroslav Lajcak”., tha për ATV-në zëdhënësi i BE-së për Punë të Jashtme dhe Siguri, Peter Stano.

    Megjithatë, BE-ja nuk dha detaje për temat.

    Paraprakisht, blloku 27-anëtarësh kishte bërë të ditur se do të organizojë takim të nivelit të lartë vetëm kur të ketë pajtim për të diskutuar çështje konkrete.

    Pa dhënë shumë detaje, Qeveria konfirmoi pjesëmarrjen e kryeministrit në takimin e ftuar nga Borrell-i.

    “Me ftesë të Përfaqësuesit të Lartë të Bashkimit Evropian, Josep Borrell, Kryeministri i Republikës së Kosovës do të marrë pjesë në takimin e radhës të nivelit të lartë, në kuadër të procesit të dialogut, i cili është paraparë për javën tjetër, më 26 qershor. Në fokus kryesor ky takim do të ketë zbatimin e marrëveshjes bazike dhe aneksit të saj dhe rrugën përpara”, tha zëdhënësi i Qeverisë, Përparim Kryeziu.

    Takimi Kurti-Vucic vjen pak ditë pas vizitave të emisarit Miroslav Lajcak, në Prishtinë dhe në Beograd.

    Më 18 qershor, emisari evropian konfirmoi se do të bëjë një vlerësim për nivelin e konstruktivitetit të Kosovës dhe Serbisë në dialog – si parakusht që ato të përfitojnë nga Plani 6-miliardësh i Rritjes – teksa është paralajmëruar që shpërndarja e fondeve të nisë në muajin e ardhshëm.

    Diskutimet Kurti – Vucic, me lehtësimin e Borrellit, do të zhvillohen një ditë para takimit të liderëve të shteteve anëtare dhe atyre institucionalë të BE-së, më 27 dhe 28 Qershor.

    Paraprakisht, të hënën, do të zhvillohet takimi i ministrave të jashtëm të unionit, në të cilin është e ftuar ministrja Donika Gërvalla.

  • Përparim Rama zyrtarisht nuk është në dijeni se po hetohet nga prokuroria

    Përparim Rama zyrtarisht nuk është në dijeni se po hetohet nga prokuroria

    Përgatiti: Arton Hamiti

    Përparim Rama, zyrtarisht nuk është në dijeni nëse është duke u hetuar nga Prokuroria Speciale për tenderin e Arkitektit të Kryeqytetit. Komuna e Prishtinës, konfirmoi për ATV-në se asnjë zyrtar komunal nuk është ftuar nga PSRK-ja.

    “Kryeqyteti nuk ka asnjë informatë apo komunikim zyrtar rreth fillimit të hetimeve për kontratën me Shërbimin e Arkitektit të Kryeqytetit. Asnjë zyrtar komunal nuk është kontaktuar e as nuk është intervistuar nga Prokuroria Speciale. As Kryetari i Kryeqytetit nuk është ftuar për intervistim në asnjë cilësi për këtë kontratë, dhe për asnjë hetim tjetër për këtë çështje”, thuhet në përgjigjen e Komunës së Prishtinës.

    Megjithatë, pushteti lokal në kryeqytet nuk u përgjigj në lidhje me pretendimet se tenderi 12 milionësh iu besua konsorciumit pjesë e të cilit ishte edhe një mik i Përparim Ramës.

    Sidoqoftë, në dhjetor të vitit 2023, në emër të “Konsulencë për themelimin e Shërbimit të Arkitektit të Kryeqytetit” Komuna e Prishtinës kishte paguar mbi 1 milion euro.

    Këto pagesa për opozitën në kryeqytet janë shqetësuese.

    “Për neve vazhdon të jetë shqetësim i madh pagesa e faturave ende pa parë ndonjë rezultat praktik në qytet dhe siç e kemi thënë edhe më herët qëndrim i yni është se Përparim Rama po del të jetë një byro projektuese që vetëm vizaton e ngjyros, por projektet në realitet nuk janë kurrkund”, tha Leotrim Retkoceri, asamblist i PDK-së.

    Sipas Leotrim Retkocerit nga PDK-ja, Komuna e Prishtinës për shërbime arkitekturore po paguan shumëfish më shtrenjtë se çmimi i tregut.

    “Kemi pa pagesa në shifra shumë të larta për diçka që në tregun kosovar janë çmime shumë më të ulëta. Derisa është prej 2 deri në 4 euro për metër katror një hartim i planit, Komuna e Prishtinës po paguan deri në 22 euro për metër katror”, tha Retkoceri.

    Fillimin e hetimeve nën dyshimin për kurdisje të tenderit “Themelimi i Shërbimit të Arkitektit të Kryeqytetit” Prokuroria Speciale e konfirmoi të martën.

  • Pritet shtrenjtimi i ujit

    Pritet shtrenjtimi i ujit

    Përgatiti: Driton Sadiku

    Naser Raçi është pagues i rregullt i faturës së ujit.

    Mirëpo, në muajt e ardhshëm çmimi i faturës së tij mund të vijë më i lartë, nëse merret parasysh kërkesa e Kompanisë Rajonale të Ujësjellësit në Prishtinë.

    “Ne kemi bërë kërkesë në Autoritetin Rregullator të ujit që të kemi sado pak rritje të tarifës së ujit, por kjo mbetet që Autoriteti Rregullator i Ujit ta shohë perfomancën e kompanisë, të shohë kostot e larta që i kemi në trajtim për shpërndarje të ujit dhe më pas do të vendoset se a do të ketë ngritje të çmimit të ujit apo jo”, tha zëdhënësja e KRU “Prishtina”, Arjeta Mjeku.

    Megjithatë, ARRU-ja, gjatë të enjtes, nuk tregoi nëse tarifa për ujë do të rritet apo jo.

    Por nëse kjo ndodh, për Naser Raçin është e papranueshme.

    “Tmerr është, kjo marre është, edhe është uji i zotit, uji i Batllavës që nuk e pi kurrë veç për mu pastru se uji është i fëlliqur, a çka flasin në ujësjellës, Arjeta e ata krejt rrena janë, ujin e Batllavës nuk e pi kurrë se kom pasë problem me gur”, tha Raçi.

    Kundër shtrenjtimit të tarifës së ujit janë edhe disa qytetarët të tjerë.

    Aktualisht, çmimi për një metër kub ujë për ekonomitë familjare është 44 centë, ndërkaq për biznese 67 centë.

  • Punëtorët e ‘Trepçës’ sërish kanë probleme me mos ekzekutimin e pagave me kohë, reagon sindikata

    Punëtorët e ‘Trepçës’ sërish kanë probleme me mos ekzekutimin e pagave me kohë, reagon sindikata

    Sindikata e Pavarur e Minatorëve të Trepçës, përmes një reagimi në faqen zyrtare në facebook, ka akuzuar menaxhmentin dhe drejtuesit e Trepca Sh.A., për mos ekzekutimin e pagave për minatorët me kohë.

    Në reagim, kjo sindikatë ka akuzuar menaxhmentin i ndërmarrjes se kjo e fundit është munduar t’i shantazhojë minatorët.

    “Sot menaxhmenti i ndërmarrjes përmes një postimi ne rrjete sociale është munduar të shantazhoj, friksoj dhe etiketoj minatorët si bojkotues dhe saboutes të punës, të cilët në mënyrë të kundërligjshme e pengojn procesin e punës. Qasja e tillë fyese, joprofesionale dhe duke tentuar që të shantazhoj minatorët jo vetëm që është e papranueshme, por minatorët duan KËRKIM FALJE PUBLIKE nga menaxhmenti. Por ta dini se minatorët nuk mund ti shantozhoni e as t’i frikësoni, asnjëherë”, thuhet në reagim.

    Reagimi i plotë:

    Të nderuar minatorë,

    Tashmë e sa kohë jemi duke u ballafaquar me problemin më elementar nga marrdhënia e punës, sic është mos ekzekutimi i pagës me kohë.

    Sic duket është bërë tradite që menaxherët dhe drejtuesit ekzekutiv të Trepca Sh.A., çdo herë mos punën e tyre, ta adresojn në drejtim të minatorëve, duke tentuar që vazhdimisht dhe me çdo kusht fajin kryesor për dështimin e ndërmarrjes ta bartin minatorët. Për ironi të fatit përpjekjet tona të vazhdueshme për të kërkuar kushte me të mira pune dhe investime, injorohen nga të gjitha institucionet, punë e cila para së gjithash është detyrë dhe obligim i menaxhmentit dhe vet qeverisë!!!

    Sot menaxhmenti i ndërmarrjes përmes një postimi ne rrjete sociale është munduar të shantazhoj, friksoj dhe etiketoj minatoret si bojkotues dhe saboutes të punës, të cilët në mënyr të kundërligjshme e pengojn procesin e punës.

    Qasja e tillë fyese, joprofesionale dhe duke tentuar që të shantazhoj minatorët jo vetëm që është e papranueshme, por minatorët duan KËRKIM FALJE PUBLIKE nga menaxhmenti. Por ta dini se minatorët nuk mund ti shantozhoni e as ti friksioni, asnjëher.

    Pretendimet për ngecje në prodhim janë të paqendrushme. Ndërsa joprofesionalizmi dhe padijenia totale e këtij menaxhmenti janë evidente dhe sdojnë koment.

    Për informimin e opinionit muaji që lam pas ka shënuar rezultate të jashtzakonshme në prodhim, krahasuar me kushtet ekstrem të vështira të punës. Por ju zotri “Kryeshef”- menaxhment nuk e keni realizuar misionin për të cilin jeni mandatuar. Andaj nuk është e ndershme e as njerzore që dështimin tuaj ta faturoni dikund tjeter. Duhet të merrni përgjegjesin për deshtimet dhe dëmtimin e minierës.

    Në këtë situate në të cilen ndodhemi lusim institucionet e Republikës së Kosovës (qeverine) që të gjejnë një zgjidhje për evitimin e problemeve financiare në ndërmarrjen Trpeca Sh.A., duke bërë investime kapitale në ndërmarrje, si e vetmja rrugë dalje nga kaosi dhe problemet serioze në të cilat ndodhet ndërmarrja.
    Kjo situatë e rëndë në ndërmarrje kërkon reagim të shpejt dhe qasje serioze, si përpjekje për të shmangur problemet e vazhdueshme.

    Ekzekutimi në kohë dhe i plotë i pagave për minatorët, është obligim dhe detyrë e institucioneve përgjegjëse, andaj edhe kërkojm realizimin e tyre menjeher.

    Me fat!
    SPMTK

  • Vapa shkurton orët e mësimit në shkollën “Mihal Grameno”

    Vapa shkurton orët e mësimit në shkollën “Mihal Grameno”

    Përgatiti: Armand Hoti

    Temperaturat e larta, të enjten, e djersitën këtë nxënës të shkollës fillore “Mihal Grameno”, në Fushë-Kosovë.

    Kondicionerë nuk ka në asnjë prej klasave, andaj edhe vapa bëhet e padurueshme për nxënësit.

    Për këtë arsye, udhëheqësia e shkollës vendosi që në ditët e fundit të procesit mësimor, t’i shkurtojë orët për 10 minuta, për katër ndërrimet.

    “Jemi duke punuar me orar të shkurtuar, sot dhe nesër. Shkaku i temperaturave të larta, e kemi parë të udhës ta shkurtojmë orarin. Këtë vendim e kemi marrë në bashkëpunim me DKA-në. E kemi parë më të udhës që fëmijët të mbajnë mësim 30 minuta e mësim tamam cilësor, sesa 40 minuta në atë të nxehtë, fëmijët nuk ishin të fokusuar në mësim”, tha sekretarja e shkollës, Gentiana Krasniqi – Ajvazi.

    Sekretarja e shkollës, Gentiana Krasniqi – Ajvazi, përmend nevojën e pajisjes me kondicionerë, të klasave ku mësojnë më shumë se 2200 nxënës.

    “Normalisht ka nevojë për klima në secilën klasë, ne këtu jemi vetëm një dhe po na vjen nxehtë, e lëre më 25-27 nxënës në një klasë, plus adoleshentët dhe këta të vegjlit e kanë një energji të madhe që lëvizin më shumë… kemi bërë kërkesë edhe në DKA”, tha Krasniqi – Ajvazi.

    Nënkryetari i Komunës së Fushë-Kosovës, Besnik Osmani, thotë se është lënë në vullnetin e drejtorëve të shkollave në këtë komunë, të vendosin për shkurtimin e orarit.

    “Nuk mund të them se po zbatohet në të gjitha shkollat, por është lënë në autonominë e drejtorëve të shkollave në bashkëpunim me këshillat e prindërve”, tha Osmani.

    Sipas nënkryetarit Osmani, instalimi i kondicionerëve do të bëhet së shpejti, në pesë shkolla të komunës.

    “Kemi tani një marrëveshje të re që ka të bëjë me energjinë solare që do ta kemi me bashkëpunim donator, ku do jenë tri shkolla nga donatori dhe dy shkolla nga ne që përfshin edhe pjesën e klimatizimit edhe ngrohjes edhe ftohjes me energji solare… të gjitha janë shkolla fillore, njëra prej tyre është “Mihal Grameno””, tha Osmani.

    Edhe disa shkolla të tjera, në komunat tjera, po e aplikojnë shkurtimin e orarit.

    Këshilli i Prindërve të Kosovës ka kërkuar që procesi mësimor të përfundojë të premten, për shkak të mungesës së klimatizimit nëpër shkolla.

  • Arrestohet burri që rrahu brutalisht gruan në Prizren

    Arrestohet burri që rrahu brutalisht gruan në Prizren

    Policia ka arrestuar të dyshuarin që rrahu bashkëshorten e tij në Prizren. Videoja e rrahjes brutale është publikuar sot në rrjetet sociale.

    Lajmin e ka konfirmuar zëdhënësi i Policisë, Vesel Gashi, i cili tha se edhe I dyshuari dhe viktima janë shoqëruar në stacionin policor dhe janë intervistuar.

    “Sot me datë 20.06.2024 disa media kanë publikuar një video regjistrim në të ciljn shihet sesi një mashkull ushtron dhunë ndaj nje femre. Posa është parë video regjistrimi hetuesit e Stacionit Policor të Prizrenit kane ndërmarr veprime hetimore dhe është identifikuar i dyshuari dhe viktima. Polcia ka lokalizuar të dy dhe janë shoqëruar për në stacionin policor. Janë intervsituar të dy nga hetuesit e dhunës në familje, ngase i dyshuari dhe viktima janë janë çift dhe bashkëjetojn.. Policia ka informuar prokurorin e shtetit dhe është vepruar në bazë të udhëzimeve të tij”.

    “Pas intervistimit të dyshuarit në prezencën e avokatit nga prokurori është lëshuar vendim mbi ndalimin për 48 orë për të. Viktima është njftuar për të drejtat e saj”.

  • ​Prioritetet dhe strategjitë e bashkëpunimit Kosovë-Suedi për 2021-2027

    ​Prioritetet dhe strategjitë e bashkëpunimit Kosovë-Suedi për 2021-2027

    Zëvendëskryeministri i Kosovës Besnik Bislimi tha se takimet vjetore me Suedinë, janë mundësi e mirë për të thelluar partneritetin, analizuar e reflektuar arritjet e deritanishme, sfidat gjatë zbatimit të projekteve si dhe mundësitë që paraqiten për të ardhmen.

    “Bashkëpunimi i ngushtë me Suedinë, ka për synim strategjik rritjen e ndikimit të projekteve të përbashkëta, duke i ndërlidhur ato edhe me reformat të cilat po i ndërmarrim në kontekst të procesit të integrimit evropian dhe të zhvillimit të vendit”, ka shkruar Bislimi.

    Zëvendëskryeministri tha se diskutuan mbi kontributin e vazhdueshëm e të palëkundur të Suedisë në zhvillimin e Kosovës, pasqyrën e strategjisë së bashkëpunimit zhvillimor, si dhe prioritetet e fushat e fokusit për periudhën 2021-2027

    “Ato prekin projekte e iniciativa ekzistuese dhe të mundshme në të ardhmen, me ndikim në të drejtat e njeriut, demokracinë, sundimin e ligjit, barazinë gjinore, gjithëpërfshirjen, zhvillimin e qëndrueshëm dhe mjedisin, si dhe zhvillimin ekonomik”, përfundoi ai.

  • “New York Times”: Kjo është Shqipëria, pak e çmendur, që i bëri rivalët e Grupit B të djersiten

    “New York Times”: Kjo është Shqipëria, pak e çmendur, që i bëri rivalët e Grupit B të djersiten

    Para se të shkelmonte një top në Grupin B, kroati Luka Modric, kishte paralajmëruar se ky ishte grupi më i vështirë i turneut. Ai mund të mos jetë fokusuar thjesht në përballjet e ekipit të tij me Italinë dhe Spanjën, por, kur shumë të tjerë folën para turneut për “Grupin e vdekjes”, ndoshta nuk kishin në mendje Shqipërinë, sipas “New York Times”.

    Pak do të kishin pritur që ata të ishin elementi më luftarak i grupit, megjithatë Shqipëria e renditur e 66-ta në botë, është bërë variabli argëtues në kuartet.

    Me një ndeshje për të luajtur, ata kanë ende një shans për avancim.

    E drejtuar nga ish-mbrojtësi i krahut të Arsenalit, Barcelonës dhe Brazilit, Sylvinho, Shqipëria është një skuadër kundërsulmuese fizike që kërkon të mbulojë çdo hendek të perceptuar të talenteve mes tyre dhe kundërshtarëve, përmes vrapimit të vështirë.

    Kësaj skuadre iu deshën 23 sekonda për të shënuar në Euro 2024, pasi Nedim Bajrami, vendosi një rekord të ri për golin më të shpejtë në historinë e Kampionatit Evropian kur hapi rezultatin kundër Italisë.

    Ndërsa Shqipëria e humbi përfundimisht atë ndeshje 2-1, goli i tyre i hershëm shërbeu si një paralajmërim; nënvlerësojeni këtë ekip dhe do të jeni në rrezik.

    Ishte një paralajmërim që Kroacia u përpoq ta dëgjonte. Takimi i së mërkurës mes dy ekipeve ishte një rrëmujë e papritur dhe argëtuese. Përsëri e pa Shqipërinë të ecë përpara herët.

    Qazim Laci, shënoi gol pas një goditje me kokë, pas një krosimi të shkëlqyer nga Jasir Asani në minutën e 11-të.

    Në pjesën e parë, Kroacia kishte regjistruar 69 përqind të posedimit të topit, por Shqipëria kishte shanset më të mira të lojës.

    Kristjan Asllani, humbi një shans të artë pas një sulmi të shpejtë të shkaktuar nga humbja e topit nga Modric.

    Edhe sulmuesi shqiptar Rey Manaj dukej i dëshpëruar, pasi nuk arriti të realizonte një goditje me kokë.

    Kjo ka qenë një temë e zakonshme për skuadrën e Sylvinhos, të cilit i ka munguar rrjedhshmëria sulmuese në pika të caktuara gjatë periudhës së tij 18-mujore në krye të Kombëtares Shqiptare.

    Lëndimet e Manajt dhe Armando Brojës gjatë ndeshjeve kualifikuese, nënkuptuan se asnjë sulmues nuk kishte krijuar atë lloj kimie të lojës që i nevojitet skuadrës, për të qenë një skuadër e fuqishme kundër-sulmuese.

    Vendimi i menaxherit për të lënë jashtë skuadrës prej 26 lojtarësh për turneun, Myrto Uzunin, Keidi Baren dhe Sokol Cikalleshin gjithashtu bëri bujë.

    Cikalleshi, një sulmues i klubit turk Konyaspor nuk ishte golëshënuesi më i mirë, por loja e tij e qëndrueshme i dha Shqipërisë një terren të vlefshëm në ndeshjet kualifikuese.

    Megjithatë, ky ekip gjen gjithmonë një mënyrë për të krijuar rrugën e tij përmes turneut, duke tensionuar edhe ekipet më të njohura të botës.

    Mario Mandzukic, tani një ndihmës trajner me Kroacinë mund të shihej duke kërcyer papushim nga pankina, për t’u kërkuar lojtarëve të tij të përputheshin me intensitetin e Shqipërisë në pjesën e parë.

    U deshën një sërë ndryshimesh në pjesën e dytë që Kroacia të ndryshonte lojën në favor të saj. Marcelo Brozovic dhe Lovro Majer u zëvendësuan nga Mario Pasalic dhe Luka Sucic në pjesën e parë.

    Njëzet minuta më vonë, sulmuesi Ante Budimir u fut në lojë për t’i dhënë ekipit të tij një referencë më të mirë për krosimet.

    Kroacia rriti besimin. Mbrojtësit e tyre u futën gjithnjë e më tej në fushë. Budimir e vuri Andrej Kramaric në pozicionin e përshtatshëm për barazimin e tyre në minutën e 74-të.

    Dy minuta më vonë, dyshja u bashkuan për një tjetër gol.

    Një krosim i dedikuar për Luka Suçiqin, i goditur me pinboll në zonën e rreptësisë para se të kthehej nga mesfushori mbrojtës i Shqipërisë, Klaus Gjasula.

    Shqipëria mund të ishte shembur, por ata gjetën sërish forcën për një gol të dytë.

    Asllani, 22-vjeçari një mesfushor mjaft luftarak po shfaqet shpejt si pasardhësi përfundimtar i Brozovic në Inter Milan dhe ishte zemra e skuadrës së tij kombëtare.

    “Duhet të luftojmë për çdo pikë. Për vendin tonë dhe për federatën tonë”, tha Sylvinhos pas ndeshjes.

    Në minutën e 94 e 23 sekonda, Shqipëria mori golin e barazimit (goli i fundit i shënuar në një Euro jashtë kohës shtesë). Ishte një gol barazimi që ndihej si një fitore e minutës së fundit.

    Gjasula lojtari i dytë që shënoi autogol dhe gol në të njëjtën ndeshje në Euro 2022, i dha skuadrës së tij një shans të vogël për të kaluar në raundin e 16-të.

    “Kjo është Shqipëria; është pak e çmendur”, tha Asllani pas barazimit 2-2.

    “Ne e nisëm me këmbën e djathtë, dhe më pas mund të them se humbëm një shans të madh, por mendova se Modric do të merrte topin para meje.

    Mendoj se pësuam dy gola të shmangshëm. Ne do t’i shqyrtojmë ato, me siguri. Loja ishte e çmendur në 15 minutat e fundit”, shtoi ai.

    “Luftëtarët” e Sylvinhos, do të duhet të jenë në maksimumin e tyre për të arritur një rezultat kundër Spanjës në ndeshjen e tyre të fundit në grup, por ata janë një ekip që nuk ka pasur kurrë frikë nga puna e vështirë.

    Shqipëria nuk tërhiqet dhe kjo e bën atë një kundërshtare të vështirë në këtë turne.

  • Federata e Futbollit të Serbisë zyrtarisht i kërkon UEFA-s dënimin e Kroacisë dhe Shqipërisë!

    Federata e Futbollit të Serbisë zyrtarisht i kërkon UEFA-s dënimin e Kroacisë dhe Shqipërisë!

    Federata e Futbollit të Serbisë i ka dërguar një letër Sekretarit të Përgjithshëm të UEFA-s, Teodor Teodoridis në lidhje me brohoritjet në ndeshjen ndërmjet Kroacisë dhe Shqipërisë, transmeton agjencia serbe e lajmeve Tanjug.

    Federata serbe pretendon se tifozët e Kroacisë dhe Shqipërisë kanë brohoritur “Vritni serbët” gjatë ndeshjes të së mërkurës, e cila përfundoi 2-2.

    “Siç jeni të informuar, në minutën e 58-të tifozët kroatë dhe shqiptarë kanë brohoritur “Vrite, vrite Serbin”, thuhet në ankesën nga Federata e Futbollit të Serbisë.

    Serbët janë të bindur se në momentin kur ka nisur brohoritja e tifozëve të dy kombëtareve, zyrtarët UEFA-s është dashur ta ndërpresin ndeshjen dhe ta vazhdojnë në tre hapat e parashikuar për raste të tilla.

    UEFA ende nuk ka komentuar ende për letrën e Federata e futbollit të Serbisë. /atvlive.tv

  • Ekspertët tregojnë ndikimin e temperaturës në humbjen e peshës!

    Ekspertët tregojnë ndikimin e temperaturës në humbjen e peshës!

    Jemi zyrtarisht në sezonin e verës dhe i nxehti do të jetë shoqërues i ditëve tona. Me siguri që edhe juve ju duket sikur po djersini më shumë në palestër apo gjatë stërvitjes në natyrë, por a ka realisht ndikim i nxehti i verës me djegien e kalorive gjatë këtij sezoni?

    Trupi ynë punon shumë për të mbajtur një temperaturë të brendshme të qëndrueshme prej rreth 37 gradë celsius. Ky është një proces fiziologjik i quajtur termorregullim. Nëse trupi ndjen se temperatura e tij e brendshme po rritet, gjëndrat e djersës aktivizohen për të djersitur dhe për ta mbajtur trupin të freskët. Pavarësisht se sa i nxehtë apo i/e djersitur ndiheni, trupi bën një punë të mirë për të qëndruar freskët.

    Nuk kërkon më shumë kalori për të prodhuar djersë dhe për këtë arsye, ju nuk digjni më shumë kalori në nxehtësi. Disa njerëz prodhojnë më shumë djersë se të tjerët, por nuk ka ndonjë studim që tregon se më shumë djersë do të thotë djegie më e lartë e kalorive. “Kur jashtë është shumë nxehtë, njerëzit mund të djersiten më shumë, gjë që çon edhe në dehidratim,”-thotë mjeku kardiolog Marc Eisenberg.

    Kur jeni të dehidratuar, presioni i gjakut mund të bjerë dhe si përgjigje ndaj kësaj, rrahjet e zemrës mund të rriten për të kompensuar presionin e ulët të gjakut. Një rritje e rrahjeve të zemrës nuk përkthehet as në një djegie të madhe të kalorive. Ju nuk do të digjni më shumë kalori në vapë, por historia ndryshon kur moti është i ftohtë.

    Sipas “National Institutes of Health”, trupi punon shumë për të ruajtur temperaturën e brendshme të trupit si në mjedise të nxehta ashtu edhe në të ftohta. Por, kur është ftohtë, ndodh humbja e nxehtësisë dhe temperatura e brendshme e trupit bie, hipotalamusi (një rajon i vogël në tru) rrit metabolizmin e trupit për të gjeneruar nxehtësi.

    Përveç kësaj, muskujt kontraktohen në mënyrë të pavullnetshme për të shkaktuar dridhje që çojnë në nxehtësi. Të dridhurat djegin njëherësh edhe kalori, që mund të çojë edhe në humbje peshe. A ndihmon stërvitja në vapë që të humbisni peshë? Ju mund të keni parë më pak kilogramë në verë pas ushtrimeve apo stërvitjes, por kjo me shumë mundësi ndodh për shkak të humbjes së ujit. Rritja e nxehtësisë bën që trupi të djersitet më shumë për të mbajtur veten të freskët. Nëse nuk pini ujë për të zëvendësuar djersën që po humbisni, mund të humbni disa kilogramë nga pesha ujore dhe të dehidratoheni.