Ka filluar takimi në Bruksel në mes të delegacionit të Kosovës dhe atij të Serbisë në kuadër të procesit të dialogut.
Delegacioni i Kosovës kryesohet nga zëvendëskryeministri Besnik Bislimi, e ai serb nga Petar Petkoviq.
Takimi në fjalë është duke u zhvilluar me Miroslav Lajçak, emisarin e Bashkimit Evropian për dialogun.
Sot po mbahet raundi i ri i dialogut në nivelin e negociatorëve.
Shqyrtimi i “Kërkesës së deputetes së Lidhjes Demokratike të Kosovës, Valentina Bunjaku – Rexhepi, lidhur me monitorimin e Autoritetit të Konkurrencës të Republikës së Kosovës, sa i përket zbatimit të Ligjit për zyrtarët publik, nuk ka kaluar në Komisionin për Ekonomi.
Kjo për shkak se deputetët e partisë në pushtet kanë abstenuar, duke mos e përkrahur të njëjtën.
Deputetja, Bunjaku, ka thënë se kërkesa e saj është të bëhet monitorim i jashtëzakonshëm i ligjit për Autoritetin e Konkurrencës nga Këshilli i Shërbyesve Civil.
“Kërkesa ime është monitorim i jashtëzakonshëm i ligjit për Autoritetin e Konkurrencës nga Këshilli i Shërbyesve Civil dhe kërkoj bashkërisht si komision të bëjmë këtë kërkesë dhe të dorëzojmë tek Këshilli i Shërbyesve Civil për monitorimin e këtij ligji”, tha Rexhepi-Bunajku.
Ndërsa, deputeti i Vetëvendosjes, Armend Muja ka thënë se kjo ka nevojë të qartësohet.
“Për mendimin tim ka nevojë pak për qartësim, a bëhet fjalë për monitorimin e ligjit për Autoritetin e Konkurrencës, kështu kjo bie në domenin e këtij komisioni dhe mendoj se si kërkesë mund të shtrohet si e veçantë. Dhe e dyta se kërkesa po i drejtohet komisionit të pavarur për mbikëqyrjen e shërbyesve civil, atëherë kjo shkon në domenin e kompetencave të komisionit tjetër funksional, që është komisioni për administratë publike”, tha Muja.
Ndërsa, me kërkesë të deputeteve të mazhorancës është hequr nga rendi i ditës Shqyrtimi i Raportit vjetor të Ndërmarrjes Publike të Operatorit të Sistemit, Transmisionit dhe Tregut – KOSTT Sh.a. për vitin 2023.
Kjo për shkak kohës së pamjaftueshme që kishin të njëjtit për të analizuar raportin.
Deputetja nga partia në pushtet, Jeta Statovci ka thënë se sipas procedurave dhe normave të parapara me rregulloren e Kuvendit, kjo pikë nuk e përmbush afatin e nevojshëm edhe për shqyrtim nga ana e deputeteve.
“Sipas procedurave dhe normave të parapara me rregulloren e Kuvendit, nuk e përmbush afatin e nevojshëm edhe për shqyrtim nga ana e deputeteve, mirëpo as aspektet e saj ligjore, që parashihet që materiali të jetë në dispozicion tre ditë para mbledhjes së komisionit. Në këtë rrethanë propozojmë që kjo pikë të hiqet nga rendi i ditës për një mbledhje të radhës”, tha Statovci.
Ndërkaq, kryetari i këtij komisioni, Ferat Shala e ka arsyetuar këtë, duke thënë se raporti i KOSTT-it ka ardhë 15 minuta para përfundimit të afatit ligjor.
Ai ka thënë se arsye tjetër që është thirrur kjo mbledhje, është për faktin se një pjesë e anëtarëve të bordit të KOSTT-it ju përfundon mandati javën tjetër, duke shtuar se nuk pajtohet me faktin se intencat e grupeve të caktuara që anëtarët e bordit të mos vinë të raportojnë dhe të ikin të përfundojnë mandatin pa e mbyll raportin.
“Po, unë e kam bërë agjendën mbështetur në rrethanat dhe situatën e krijuar, mbështetur në minimalisht në tre email-a që kam marr zyrtarisht dhe nga punëtorët e KOSTT-it, që kanë ankuar dhe kanë shprehur kundërshtime, shkelje të drejtave procedurale dhe juridike të punëtorëve brenda KOSTT-it. E kam thirr këtë mbledhje edhe për faktin se një pjesë e anëtarëve të bordit të KOSTT-it ju përfundon mandati javën tjetër, dhe intencat e grupeve të caktuara që anëtarët e bordit të mos vinë të raportojnë dhe të ikin të përfundojnë mandatin pa e mbyll raportin nuk kam mundur të pajtohem. Prandaj, raporti i KOST-it ka ardhë 15 minuta në përfundim të orarit, në ditën e fundit të afatit ligjor, edhe për atë ai iu kam shkruar email zyrtare”, tha ai.
Në anën tjetër, deputetja nga Lidhja Demokratike e Kosovës, Valentina Rexhepi-Bunajku ka propozuar që kjo pikë të shtyhet për të enjten
“Ata e kanë ditë që e kanë pas afatin e fundit ta dorëzojnë, nuk është dashtë të presin 30 qershorin, kanë mundur edhe më herët ta dorëzojnë raportin. Meqenëse mazhoranca nuk ka disponim sot të jetë në rend ditës kjo ditë, të shtyhet për të enjten dhe të shqyrtojmë këtë raport, besoj ju mjaftojnë tre ditë të lexoni raportin. Nuk jam tendencioze, por po ju lus si mazhorancë meqë i keni numrat, edhe me votim jeni të mjaftueshëm po kërkoj mirëkuptimin që ky komision të thirret të enjten ”, tha ajo./kp
Alivanosja, dhimbjet muskulare, kokëdhimbja, marramendja, diarrea e të vjellurat janë disa nga simptomat që mund të shkaktoi ekspozimi në temperatura të larta.
E me ngritjen e temperaturave në vendin tonë, është rritur edhe kërkesa e pacientëve për të marrë shërbime mjekësore në institucionet shëndetësore.
Kryeshefi i Qendrës së Mjekësisë Familjare në Prishtinë, Valdet Hashani në një intervistë për KosovaPress, thotë se fluksi i pacientëve që kanë kërkuar trajtim ditëve të fundit për shkak të ndryshimit të motit, është rritur për 20 për qind.
Ai tregon se të moshuarit, pacientët me sëmundje kronike dhe fëmijët janë rastet më të shpeshta që kërkojnë trajtim mjekësore si pasojë e të nxehtit.
“Me rritjen e temperaturave të cilat kanë qenë enorme në krahasim me një javë më herët. Nga 23-25 gradë sa kanë qenë normalisht u rritën temperaturat në 38 deri në 40 gradë celsius…Me ngritjen e këtyre temperaturave patëm edhe një fluks të pacientëve dhe mund të themi që mbi 20 për qind të pacientëve është rritur numri i tyre. Jo vetëm në QKMF por në të gjitha njësitë që i kemi në kuadër të QKMF-së, qofshin ato të Mjekësisë Familjare apo edhe ambulanta në fshat. Zakonisht më të shpeshtë kanë qenë pacientë më të moshuar, që kanë sëmundje kronike, qofshin ato kardiovaskulare, të shëndetit mendor ose edhe pacientë të cilët marrin barna, substanca apo barna të ndryshe. Edhe numri i pacientëve të cilët janë fëmijë ose vegjël është rritur numri i tyre, sidomos edhe i gastroenteriteve për shkak të infeksioneve të mundshme, për shkak të rënies së imunitetit”, thotë Hashani.
Derisa tregon simptomat me të ciklat mund të përballen pacientët si shkak i ekspozimit të gjatë në diell, Hashani thotë se kur temperaturat janë të larta duhen shmangur ushqimet e shpejta, pijet energjike dhe ato të gazuara.
Ai potencoi se përveç ujit, për të shmangur rrezikun nga infeksionet bakteriale apo virale, pacientët duhen konsumuar më shumë pemë, perime dhe sallata.
“Fillimisht, pacientët ndjejnë dhimbje muskulare, kokëdhimbje. Mund të kenë edhe marramendje, të vjella e kështu me radhë. Por, nëse simptomat manifestohen me ndonjë infeksion qoftë viral ose bakterial, atëherë manifestohen edhe me vjellje, por edhe me barkqitje, që pastaj e komplikojnë gjendjen edhe më shumë…Ushqimet të cilat duhet të merren gjatë kësaj periudhe kohore është mirë që tu iket ushqimeve të cilat janë të ngrohta, të cilat kanë shumë kalori. Të merren sasi të mëdha të pemëve dhe perimeve, sallatave. Por, gjithmonë të kombinuara me lëngje. Por, jo lëngje të cilat janë për shembull pije energjike, që kanë sasi të mëdha të sheqerit, pije alkoolike…Duhet të konsumojnë ujë të pastër…Në rast se kanë nevojë për rehidrim mos të kërkohet menjëherë që të merren në formë të infuzioneve. Meqë ka preparate që janë edhe të lira edhe të mira, që janë nelit ose Ors i quan populli, ato janë për rehidrimin e organizmit”, potencon Hashani.
Ndër të tjera kryeshefi i QKMF-së në Prishtinë, Valdet Hashani tregon se si pasojë e temperaturave të larta, organizmi i njeriut dehidrohet, duke ndikuar në zvogëlimin e imunitetin, trashjen e gjakut dhe pompimin më të shpeshtë të zemrës.
“Meqë organizmi i njeriut kur është i dehidruar edhe imuniteti zvogëlohet, në këtë arsye qëllimi i organizmit përpos shumë funksioneve që i ka e ka edhe termorregullacionin dhe e rregullon temperaturën trupore në atë të ambientit. Nëse temperatura e trupit është 36 gradë, ndërsa jashtë ka qenë më e madhe, çfarë lufte apo mekanizmi i nevojitet për ta luftuar ose balancuar këtë temperaturë me atë të jashtme. Për shkak të kësaj organizmi shton nevojën për marrjen e lëngjeve, meqë bëhet dehidrimi ose nëpërmjet djersitjes, por edhe mushkërive lirohet një sasi e madhe e lëngjeve. Organizmi mbetet pa lëngje, zemra ose sistemi kardiovaskular, gjaku fillon të trashet të jetë më viskoz. Zemra pompon më shumë”, tregon Hashani.
Përveç këtyre, Hashani thekson se gjatë verës, duhen veshur rroba me ngjyra më të hapura, për të reflektuar rrezet e diellit si dhe rekomandon që pacientët të bartin ombrella.
Gjatë këtyre ditëve, Ministria e Shëndetësisë, Instituti Kombëtar i Shëndetësisë Publike (IKSHPK) dhe Instituti Hidrometeorologjik i Kosovës (IHK) kanë dhënë rekomandime për qytetarët. Ata këshillojnë që në intervalin kohor nga ora 10:00 deri në 16:00 të mos ekspozohen në rreze të drejtpërdrejta të diellit dhe të marrin masa mbrojtëse për të parandaluar ndikimin e nxehtësisë. /kp
Presidenti i Serbisë, Aleksandar Vuçiq, priti në Beograd zëvendësministrin rus të Punëve të Jashtme, Aleksandar Grushko, të cilin e falënderoi për mbështetjen e tij në lidhje me Rezolutën për Srebrenicën, e cila u votua në Asamblenë e Përgjithshme të Kombeve të Bashkuara në muajin maj.
Vuçiq postoi në Instagram një fotografi nga takimi me zëvendësin e ministrit të Jashtëm rus, Sergei Lavrov, ku shkroi se e falënderon Rusinë veçanërisht për mbështetjen e integritetit territorial të Serbisë.
“Kemi biseduar për marrëdhëniet dypalëshe ndërmjet Serbisë dhe Rusisë dhe i kemi vlerësuar si shumë të mira”, tha presidenti serb.
Rusia votoi kundër Rezolutës për Srebrenicën në Asamblenë e Përgjithshme të OKB-së.
Rezoluta, e cila u miratua, e shpall 11 korrikun Ditë Ndërkombëtare të Përkujtimit të Gjenocidit në Srebrenicë dhe kërkon t’i jepet fund mohimit të gjenocidit dhe madhërimit të kriminelëve të luftës.
Serbia loboi kundër miratimit të saj.
Një ditë më herët, Grushko takoi edhe ministrin e Punëve të Brendshme të Serbisë, Ivica Daçiq, me të cilin bisedoi për çështjet aktuale të sigurisë dhe shprehu nevojën për koordinim të vazhdueshëm të institucioneve kompetente të sigurisë, njoftoi MPB-ja serbe.
Grushko u prit edhe nga zëvendëskryeministri i Serbisë dhe ish-shefi i agjencisë serbe të inteligjencës, Aleksandar Vulin, i cili është në listën e sanksioneve të Shteteve të Bashkuara për shkak të lidhjeve të tij me Moskën.
Krahas bashkëpunimit politik, Serbia dhe Rusia janë duke thelluar edhe bashkëpunimin ushtarak dhe ekonomik.
Serbia ka mbështetjen e Rusisë në kundërshtimin e njohjes së pavarësisë së Kosovës.
Pavarësisht thirrjeve nga Bashkimi Evropian, Serbia nuk ka ndërmarrë sanksione kundër Rusisë, për shkak të pushtimit të Ukrainës./rel
Një muaj e gjysmë nga hyrja në fuqi e vendimit të Ministrisë së Punëve të Brendshme të Kosovës për konvertimin e patentë shoferëve serbë në ato të Republikës së Kosovës, procesi ka nisur të marrë hov. Deri tani, në veri të vendit janë dorëzuar rreth 1400 kërkesa për konvertimin e patentë shoferëve, kanë bërë të ditur nga Policia e Kosovës për RTK2.
Qytetarët e Mitrovicës së Veriut shprehen se shumë prej tyre apo familjarëve të tyre i kanë ndërruar tashmë patentat e shoferit serb me ato të Kosovës.
“Atëherë kam qenë ndër të parët që kam marrë letërnjoftimin e UNMIK-ut dhe pa asnjë problem e kam konvertuar nga ai serb në atë të Kosovës. Shumica e njerëzve po e ndërrojnë patentën e shoferit serb me atë të Kosovës. Çfarë të bëjnë njerëzit, nëse e kanë letërnjoftimin e Kosovës, jetojnë në Kosovë, duhet ta respektojnë ligjin për t’iu shmangur dënimit”, tha një banor i Mitrovicës së Veriut.
E një tjetër qytetar theksoi: “Djali im ndryshoi patentën e shoferit, të gjithë po i konvertojnë. E ndërroi që të mos dënohej”.
Zëvendësdrejtori i Policisë së Kosovës për rajonin e veriut, Veton Elshani, tha se deri më tani janë dorëzuar rreth 1400 kërkesa për ndërrim të patentë shoferëve dhe atë 387 në Mitrovicën e Veriut, 193 në Zveçan, 347 në Leposaviq dhe 198 në Zubin Potok.
“Në maj të këtij viti ka filluar procesi i aplikimit për konvertim të patentë shoferëve në RKS dhe i gjithë procesi do të jetë i përmbyllur deri më 10 gusht të këtij viti. Deri më tash kemi 1400 aplikime për konvertim të patentë shoferëve dhe procesi po ecën pa asnjë problem. Mendoj se deri në përfundim të afatit do të përmbyllet gjithçka”, theksoi Elshani.
Ndërkaq, Milica Andriq Rakiq nga Iniciativa e Re Sociale tha se procesi i konvertimit të patentë shoferëve në RKS duhej të kishte ndodhur qysh në vitin 2021, e që do të pasonte me riregjistrimin e automjeteve.
”Ky veprim do të duhej t’i paraprinte gjithçkaje. E tërë kriza e shtatorit të vitit 2021 ka ndodhur për shkak të kësaj. Në vend që fillimisht qytetarëve t’u mundësohet konvertimi i dokumenteve, siç ishte rasti nga viti 2007 deri në vitin 2010 në jug dhe në veri më 2011 dhe 2017, Qeveria e Kosovës vendosi t’i konfiskojë automjetet. Ky do të duhej të ishte hapi i parë. Qysh në vitin 2021 do të duhej të niste procesi i konvertimit të dokumenteve, e më pas riregjistrimi i automjeteve”, tha ajo.
Afati për ndryshimin e patentë shoferëve skadon më 10 gusht. Pas kësaj date nuk do të jetë më i mundur përdorimi i patentë shoferëve serbë, që janë lëshuar për qytetarët e Kosovës.
Në prag të Ditës së Pavarësisë së Shteteve të Bashkuara të Amerikës, Oda Ekonomike Amerikane ndau Çmimet e Partneritetit SHBA-Kosovë për kompanitë që kanë kontribuar në marrëdhëniet e fuqishme të biznesit ndërmjet Kosovës dhe Shteteve të Bashkuara.
Ambasadori i Shteteve të Bashkuara të Amerikës në Kosovë, Jeffrey Hovenier, iu drejtua anëtarëve, partnerëve dhe pranuesve të mirënjohjeve, duke theksuar rëndësinë e partneritetit SHBA-Kosovë.
Ambasadori Hovenier vuri në dukje se kompanitë të cilat pranuan mirënjohjet jo vetëm që ndihmojnë bizneset amerikane të zgjerohen globalisht, por gjithashtu sjellin produkte dhe shërbime të cilësisë së lartë nga Kosova në Shtetet e Bashkuara. Ai shtoi se këto kompani luajnë një rol vendimtar për t’i bërë Shtetet e Bashkuara një nga partnerët më të rëndësishëm tregtarë të Kosovës. Ai theksoi rritjen e jashtëzakonshme të eksporteve të Kosovës në SHBA, nga 2.7 milionë euro në 2019 në mbi 100 milionë euro në vitin 2023.
Gjithashtu, ambasadori Hovenier tha se përkushtimi i Shteteve të Bashkuara ndaj Kosovës mbetet i fortë si kurrë më parë, me kompani si ato që nderohen sot që sigurojnë lidhje të forta mes njerëzve dhe mes bizneseve.
Blin Zeqiri, kryetar i Bordit të Guvernatorëve të Odës Amerikane, shprehu mirënjohjen e tij për partnerët dhe miqtë amerikanë për hapjen e rrugëve të rritjes dhe zhvillimit për Kosovën, duke sjellë burime financiare, ekspertizë të çmueshme, inovacion dhe më e rëndësishmja frymën e ndërmarrësisë amerikane, duke shtuar se Oda Amerikane ka qenë thelbësore në fuqizimin e kësaj marrëdhënieje, duke ofruar një platformë për dialog, bashkëpunim dhe rritje reciproke.
Drejtori Ekzekutiv i Odës Amerikane, Arian Zeka, tha se kompanitë të cilat nderohen me çmime, kanë prirë në importimin e mallrave dhe shërbimeve amerikane, eksportimin e produkteve të Kosovës në SHBA dhe investimin në ekonomitë e njëra-tjetrës, duke shtuar se ato jo vetëm që nxisin rritjen ekonomike, por shërbejnë edhe si ambasadorë të marrëdhënie të forta dhe të qëndrueshme mes dy kombeve tona.
Kompanitë e mëposhtme janë shpërblyer me Çmimet e Partneritetit SHBA-Kosovë në gjashtë kategori të ndryshme respektive: LAB-OIL, Poligoni i Shenjëtarisë Katana, Delfin, Meditech, Auto Kaçandolli, Ventius International, Limak Kosovo International Airport, Minna, Walone Fashion Group, Artmotion, Nettxio, Radix Software Inc., RIT Kosova, Sutherland Global Services Kosovo, BP – Home Invest, Stonecastle Vineyards & Winery, Coca-Cola HBC, Birra Peja, Royal Beverage, AGNA Kosova, ELKOS Group, Meridian Corporation, Yesspharma, dhe Kostrade.
Ky aktivitet shënoi edhe inaugurimin zyrtar të hapësirës ekspozuese “AmCham Expo Space” në Prishtina Mall, dedikuar promovimit të kompanive anëtare të Odës Amerikane dhe ekspozimit të mallrave dhe shërbimeve të tyre.
Bazuar në mandatit e saj ligjor, për mbrojtjen e të dhënave personale të qytetarëve, përkatësisht dispozitat e Ligjit për Mbrojtjen e të Dhënave Personale, Agjencia për Informim dhe Privatësi (AIP) iu ka bërë thirrje ndërmarrjeve publike dhe private të mbrojnë të dhënat personale të qytetareve gjatë ofrimit të shërbimeve, përkatësisht gjatë shpërndarjes së faturave te konsumatorët.
Sipas komunikatës, në zbatim të përgjegjësive të saj Ligjore, Agjencia për Informim dhe Privatësi në fund të muajit shkurt 2024, ka kërkuar nga të gjitha Ndërmarrjet Publike dhe Private ndërmarrjen e masave të sigurisë gjatë shpërndarjes së faturave tek konsumatorët (qytetarët).
“Afati për Ndërmarrjet Publike dhe Private që shpërndajnë fatura tek qytetarët për të vendosur faturat në zarfe për shkak të mbrojtjes së të dhënave personale ka qenë 30 qershori 2024. Kërkesa është adresuar për të siguruar mbrojtjen e të dhënave personale të qytetarëve, duke parandaluar ekspozimin e paautorizuar të tyre. Në kuadër të sigurimit të mbrojtjes së të dhënave personale të qytetarëve të Republikës së Kosovës, Agjencia për Informim dhe Privatësi, kërkon nga Ndërmarrjet Publike dhe Private që ofrimin e shërbimeve për qytetarët (shpërndarjen e faturave) ta realizojnë në formatin që garanton mbrojtjen e të dhënave personale të qytetarëve nga ekspozimi dhe qasja e paautorizuar. Rrjedhimisht, Ndërmarrjet Publike dhe Private janë të obliguara të ndërmarrin masat e duhura të sigurisë me rastin e ofrimit të shërbimeve për qytetarët (shpërndarjes së faturave) dhe të vendosin masat e duhura teknike dhe organizative për të siguruar një nivel sigurie të përshtatshëm ndaj rreziqeve të mundshme të keqpërdorimit të të dhënave personale të qytetarëve. Në këtë kontekst, AIP kërkon nga këta kontrollues zbatimin e rregullave dhe standardeve për mbrojtjen e te dhënave personale të qytetarëve të Republikës së Kosovës siç përcaktohet me Ligjin për Mbrojtjen e të Dhënave Personale”, thuhet në komunikatë.
Në komunikatë thkesohet se qëllimi i Agjencisë për Informim dhe Privatësi është përmbushja e mandatit të saj ligjor në mbrojtjen e të dhënave personale të qytetarëve për të parandaluar ekspozimin e paautorizuar të tyre.
Kryeministri i Kosovës, Albin Kurti, ka shkruar edhe sot për shkrimtarin e madh shqiptar, Ismail Kadare, i cili ndërroi jetë dje në moshën 88-vjeçare në urgjencën e Tiranës.
Në një postim në rrjete sociale, shefi i qeverisë tha se kushdo që e ka lexuar Kadarenë e di etjen e tij të pashuar për të munguarit e mëdhenj.
“Sepse Kadareja e dëshironte hetimin e çështjes. Miti i furnizoi një sërë të gjatë të munguarish, duke nisur me Kostandinin. Si të thuash: nga Konstandini te Ukshini. Kadareja e di se dhe Ukshini e ka sjellë Doruntinën e vet. Koherencë e paanalizueshme e shkrimtarit të madh”, shkroi mes tjerash Kurti.
Postimi i plotë:
Nata e parë pa Kadarenë kaloi mbrëmë. Më herët e dinim që është atje diku me bibliotekën e tij, dhe, këtu te secila bibliotekë familjare nëpër shtëpitë tona. Do të lexohet edhe më shumë tash ai: që të na mungojë më pak neve që e duam, që të gjejmë më shumë veten që na duhet.
Shkrimtari ynë i madh u nda nga ne. Mbase filozofi francez, Gilles Deleuze, na thotë diçka që mund të na shërbejë për kuptimin e kësaj ndarjeje. Artisti bën një vepër artiste. Në një farë mënyre është vepra ajo që krijon përherë. Kadare nuk na la në paqen e një shoqërie të përgjumur, por na hodhi në intrigën e tij. Aty janë dhe do të jenë ende personazhet dhe situatat, gjenerali i të vdekurve dhe kako Pino, koncerti i fundit dhe pallati i dimrit të përhershëm, Broadëay i zhvendosur në Tiranë dhe hija e kineastit shqiptar në Paris, Eskili i degdisur dhe faraoni i tejvarrosur, trupi i Lul Mazrekut dhe përkthyesi i katërt, valltari i vargjeve të popullit apo autoriteti i nëndheshëm i Lasgushit… Të gjithë do të jenë aty nën paradigmën e uraganit të pandërprerë të letërsisë.
Shkrimtari i madh ka aftësinë të ndërtojë mision, dhe ky mision është vetëm stil, alegori, porosi, kolektiv kuptimi, dyshim kolektiv. Ai lidh kohët e shkrimeve, por edhe gjeografitë e prozës. Dalja e tij përtej kufijve ngjall problem, sepse ai e dyzon kufirin: e kthen nga kufi talenti në kufi politik, ose, edhe më mirë: ai përzien të tashmen me një të shkuar të dyfishtë. Andaj do të jetë sa shkëlqim edhe problem.
Si një mesazh i habitshëm mund të përmendet edhe fakti që vetëm së shpejti do të shfaqet në Francë biseda e tij e pothuaj tri dekadave më herët me të munguarin e madh Ukshin Hoti. Kushdo që e ka lexuar Kadarenë e di etjen e tij të pashuar për të munguarit e mëdhenj. Sepse Kadareja e dëshironte hetimin e çështjes. Miti i furnizoi një sërë të gjatë të munguarish, duke nisur me Kostandinin. Si të thuash: nga Konstandini te Ukshini. Kadareja e di se dhe Ukshini e ka sjellë Doruntinën e vet. Koherencë e paanalizueshme e shkrimtarit të madh.
I munguar i madh, nga dje, u bë edhe vetë Kadareja.
Kryetari i BIK’ut, Myftiu Naim Tërnava ka paralajmëruar padi ndaj ish-zëvendësministrit Milazim Gashi, i cili e akuzoi BIK-un se ka ndërtuar dy xhami – në Mat dhe Veternik – me para të Serbisë.
“Nuk ka ndodhë dhe nuk do të ndodhë kurrë që BIK të marrë para nga Serbia, prandaj ky njeri do të ndiqet penalisht. E sfidojë atë zotërinë dhe çdokënd tjetër në Kosovë që nëse argumentojnë një gjë të tillë, unë personalisht do t’i rrënojë ato xhami. Mirëpo kjo është shpifje, është çmenduri”, tha Tërnava.
Ai shtoi se nëse ka ndonjë dëshmi se ato dy xhami janë ndërtuar me para të Serbisë do t’i rrënojë.
“Ne menduam se sistemi ateist-komunist iku dhe shkoi, mirëpo fatkeqësisht kanë mbetur disa neo-komunist, të cilët e kanë gjithherë primare fyerjen dhe shpifjen në raport me fenë, mirëpo në raport edhe me shqiptarinë tonë. E them me plotë përgjegjësi se nuk ka ndodhë, nuk po ndodhë dhe nuk do të ndodhë kurrë asnjëherë që Bashkësia Islame e Kosovës të marrë para nga Serbia. Por, e sfidojë atë zotërinë atje, e sfidojë dhe i them kështu me përgjegjësi të plotë, nëse ai dhe kushdo qoftë në Kosovë pinjollë të tij, kanë vetëm një argument në lidhje me atë çfarë kanë deklaruar, unë haptazi deklarojë sot se unë do të marrë buldozerin dhe do t’i rrënojë ato dy xhami, edhe tek ajo në ‘Veternik’ edhe kjo këtu në ‘Mat’. Mirëpo, kjo është shpifje, është çmenduri që vije nga një person i papërgjegjshëm.”
Tërnava ka ftuar edhe “xhematët e dy xhamive që të përgatisin në bashkëpunim me avokatët që vinë nga këto dy xhami lëndën dhe ta cojnë në prokurori”.
“Elhamduliah na e kemi shtetin, mirëpo sikur të kemi si duhet shtetin e së drejtës, atëherë ai kishte me përfunduar në Prokurori për të dhënë llogari, për shpifjen që e ka bërë, për gënjeshtrën që e ka bërë. Unë i ftoj edhe xhematët e të dy xhamive të përgatisin në bashkëpunim me avokatët që vinë nga këto dy xhami lëndën, ta çojmë në Prokurori dhe të ndjekin penalisht këtë njeri, këtë gjë do ta bëjë edhe vetë Bashkësia Islame e Kosovës, që ai të japë përgjegjësi para organeve tona, për shpifje për rrena të kulluara që i drejtohen Bashkësinë Islame të Kosovës.”
“Serbia i ka financuar xhaminë e Matiçanit dhe xhaminë në hyrje të Veternikut edhe midis Prishtinë te Xhamia e Madhe. Ke aksione të dyshimta, që janë financu e renovu xhamitë në Prishtinë”, kishte thënë Gashi.
Prokuroria Themelore në Gjilan, Departamenti përgjithshëm, ka ndaluar të dyshuarin B.K., në kohëzgjatje prej 48-orësh, për shkak të dyshimit se ka kryer veprën penale ‘’Keqpërdorimi i besimit’’, të Kodit penal të Republikës së Kosovës.
Dyshohet se i njëjti, me qëllim të përfitimit material ka keqpërdorur besimin tek e dëmtuara L.G., në atë mënyrë që nga ajo kishte marrë autorizim që të vepronte në emër të saj, në mënyrë që t’ia siguronte mjetet financiare të babait të saj, si ish i burgosur politik në burgjet e Jugosllavisë, ku për këtë shërbim kishte kërkuar 20% nga shuma totale e kompensimit.
“I dyshuari B.K., dyshohet se në vitin 2023 ka arritur ti nxjerrë këto mjete financiare nga Qeveria e Republikës së Kosovës, ku shuma rreth 24 mijë euro ishte depozituar në llogarinë e tij, mirëpo i njëjti për këtë nuk e kishte informuar të dëmtuarën, edhe pse njëjta vazhdimisht ishte interesuar”, thuhet në njoftimin e prokurorisë.
Me këto veprime dyshohet të ketë kryer veprën e sipërshënuar penale dhe ndaj tij brenda afatit ligjor Prokuroria Themelore në Gjilan, do të vendosë lidhur me masën për sigurinë e të pandehurit në procedurë penale.