Author: ATVLive

Përgatiti: Fatlum Jashari

Edhe pse ka muaj që Elektrosever është duke e shkelur marrëveshjen, licencën, ligjet dhe Kushtetutën e Kosovës, ende nuk ka vendimmarrje për ndëshkim eventual.

Duke i quajtur “gabime teknike”, Zyra e Rregullatorit për Energji konfirmoi se është në dijeni të shkeljeve nga Elektrosver – e cila në faturat e konsumit mujor përdor emërtimin dhe kodin postar ilegal serb për Mitrovicën.

“Zyra e Rregullatorit për Energji, pasi ka marrë informata se furnizuesi Elektrosever, në faturat e energjisë elektrike të shpërndara te konsumatorët, është duke përdorur disa nga emërtimet të cilat nuk janë në përputhje me Legjislacionin e aplikueshëm në Republikën e Kosovës, menjëherë ka kërkuar informacion të detajuar nga Elektrosever. Lidhur me këtë, Elektrosever ka sqaruar se në disa adresa të konsumatorëve ka pasur gabime teknike, këto gabime teknike kanë ardhur si rrjedhojë e bartjes së shënimeve nga baza e vjetër e konsumatorëve te Elektrokosmet në bazën e re të shënimeve të Elektrosever”, thuhet në përgjigjen e ZRRE-së.

Rregullatori njoftoi se ka marrë zotim nga Elektrosever, për përmirësim në faturat e reja.

“Pasi janë vërejtur këto gabime, korrigjimet e duhura janë bërë në bazën e shënimeve”, thuhet më tej në përgjigjen e ZRRE-së.

Megjithatë, kjo do të vërtetohet vetëm në fund të muajit.

Shkeljet nga kompania bijë e ndërmarrjes publike energjetike të Serbisë, e cila u licencua në Kosovë në Qershor të vitit 2022, i përmendi zëvendëskryeministri për dialog, Besnik Bislimi, në takimin e javës së kaluar Bruksel.

Pasi marrëveshjen për energjinë e vlerësoi si një nga më sfidueset për shkak të destruktivitetit të Serbisë, eksperti i këtij sektori Naim Bujupi tha se konteksti politik është i pashmangshëm në këtë rast.

“Në aspektin politik duhet të mobilizohet Qeveria dhe t’i bëhet me dije faktorit ndërkombëtar dhe gjithashtu t’i kërkohet Serbisë që ta zbatojë marrëveshjen”, tha Bujupi.

Ai theksoi nevojën për veprim nga Rregullatori – si autoritet licencues dhe mbikëqyrës.

“T’i lëshojë një vërejtje dhe t’i kërkojë që në një afat të caktuar t’i dërgojë të gjitha faturat në harmoni me kushtet ligjore dhe të zbatojë atë faturë që është aprovuar nga ZRRE-ja. Në të kundërtën, nëse zgjat kjo çështje dhe nuk zbatohet nga Elektrosever, atëherë si masë përfundimtare mund të shkohet në tërheqje të licencës”, tha Bujupi.

Para nisjes së faturimit të konsumit të energjisë, nga 1 Janari 2024, Elektrosever kishte shkelur të gjitha afatet e licencës, e cila i referohet udhërrëfyesit dhe marrëveshjes së Brukselit për energjinë.

Përgatiti: Donita Bytyqi

U paralajmërua se do të vendoset më 28 nëntor të vitit të kaluar në Prishtinë, por monumenti për Adem Jasharin, nuk pritet të përfundojë as për Festën e Flamurit të këtij viti.

Komuna është ende në procedurat fillestare të këtij projekti. Madje, nuk është caktuar as lokacioni.

Komuna para tre muajve ka hapur konkurs ndërkombëtar për këtë projekt.

Zëdhënësi Donat Lushaku tregon se punimi artistik nuk do të jetë në formën klasike. Ndërsa, do të jenë edhe anëtarët e tjerë të familjes Jashari.

Lushaku thotë se për jetësimin e këtij projekti, skulptorët pritet të zgjidhen në shtator.

Skulptori Sabri Behramaj është kritik ndaj kritereve të përcaktuara në konkurs.

“Si skulptor i mbi 50 veprave të realizuara në hapësira publike nuk më ka tërhequr të konkurroj dhe nuk kam konkurruar, sepse mjeshtëria e një skulptori shihet në realizimin e maketës 3D në formë fizike, jo në mënyrë digjitale”, tha Behramaj.

Për monumentin e Adem Jasharit, komuna ka ndarë 200 mijë euro në buxhet, por kostoja nuk dihet ende përfundimisht.

Përgatiti: Driton Sadiku

Muret dhe gjembat nuk ishin problem për Faton Hajrizin, i cili për të nëntën herë arriti të arratiset nga burgu ku po vuante dënimin.

Veçse kësaj here përveç grilave, ai kaloi edhe kufirin e u strehua diku jashtë shtetit, nga ku u paraqit në rrjete sociale.

Hajrizi, i cili kishte mbajtur 17 vjet e gjysmë burg, po mbahej në Qendrën Korrektuese në Smrekonicë, për ta mbajtur edhe pjesën tjetër prej 7 vjet e gjysmë, derisa gëzonte edhe të drejtën për vizita në vikend.

E vendosja në këtë qendër, sipas Shërbimit Korrektues të Kosovës, është bërë për arsye të sjelljeve të mira, të personit në fjalë.

“Shërbimi Korrektues i Kosovës njofton opinionin publik se i dënuari F.H., ka qenë larguar disa herë në të kaluarën nga institucionet korrektuese. Megjithatë, vitet e fundit ka shfaqur sjellje të mira dhe ka respektuar të gjitha rregullat e rendit shtëpiak. I dënuari kishte kërkuar transferim në Qendrën Korrektuese në Smrekonicë, dhe bazuar në raportet profesionale, ai ka treguar sjellje të mira dhe ishte në proces të avancuar të risocializimit”, thuhet në njoftimin nga Shërbimi Korrektues i Kosovës.

Sidoqoftë, për ikjen e tij, ndëshkim morën dy zyrtarë të burgut, që u suspenduan.

Pikërisht vendi ku po mbahej, sipas juristëve, ishte fare lehtë i kalueshëm, pasi qendra është e stilit të hapur.

“Lehtësia apo mundësia e ikjes varet nga lloji i qendrës korrektuese. Në rastin e Smrekonicës ne e dimë që është institucion i tipit të hapur, madje nuk do ta quaja ikje, por vetëm largim, sepse është institucioni si i tillë”, tha avokati Valdet Hoxha.

Ndërkaq, njohësi i sigurisë, derisa vlerëson rrezikun që mund të kenë në shoqëri persona të tillë, thotë se burgjet duhet të modernizohen, që të shmangen rastet e tilla.

“Duhet të ketë modernizim dhe ristrukturim në sistemin e burgjeve që në të ardhmen të mos ndodhin gjëra të tilla, dhe një bashkëpunim më i theksuar me organet e ndjekjes për të reaguar dhe për të marrë informacione konkrete në kohë optimale për të parandaluar”, tha Drizan Shala, ekspert i sigurisë.

Sidoqoftë, nga Shërbimi Korrektues thanë se kanë nisur procedurat hetimore lidhur me rastin, por nuk treguan nëse ka edhe të burgosur të tjerë që janë në arrati.

Kryeministri Albin Kurti, thotë se buxheti vjetor sivjet për kujdesinë dhe investimet në trashëgiminë kulturore është më i larti ndonjëherë.

Ai tha gjithashtu se ky buxhet është trefish më i lartë sesa në vitin 2021.

“Në tri vjet qeverisje, janë restauruar mbi 100 asete të trashëgimisë kulturore – më shumë se në dy dekadat pararendëse bashkë”, theksoi tutje Kurti.

“E puna po vazhdon. Përditë.

Në pjesën e parë të këtij viti, kanë përfunduar restaurimet në:

Kullën e familjes Tafolli në Çadrak të Suharekës

Shkollën historike shqipe “Ismail Qemali” në Ferizaj

Mullirin e fshatit Majac të Podujevës i ndërtuar në shek. XIX

Mullirin e Cal Malushit në fshatin Kotradiq të Pejës

Ndërtesën e shkollës së parë shqipe në Pejë

Muzeun e Hidroelektranës në Prizren

Hamamin e Gazi Mehmed Pashës në Prizren – faza e parë

Kullën e Gjyle Kadrisë në fshatin Rastavicë, Deçan, e ndërtuar në shek. XIX

Shtëpinë Kullë të Vesel Godenit në Viti

Kullën e Zeqë Ramë Sadrisë në Brovinë në Gjakovë.

Ndërkaq punimet po vazhdojnë e janë drejt përfundimit në:

Shtëpinë e Hynilerëve në Prishtinë

Rezidencën e Presidentit Ibrahim Rugova

Shtëpitë tradicionale të Janjevës

Shtëpinë e familjes Kryeziu në Gjakovë, e cila karakterizohet me arkitekturë tradicionale të fundit të shek. XVIII

Shtëpinë e Adem Aga Gjonit në Prizren, e karakterizuar nga arkitektura tradicionale e shek. XVIII

Shtëpitë tradicionale të familjes Hajdini, në lagjen e quajtur Terziaj në Gjilan

Shtëpinë e familjes Safqi në Prishtinë, e ndërtuar rreth vitit 1800

Shtëpinë tradicionale të familjes Sylejmani brenda qendrës historike në Prishtinë, e ndërtuar në vitin 1880

Shtëpinë e familjes Kirajtani, një prej shtëpive më të veçanta të Prizrenit

Shtëpinë e familjes Munik në Prizren

Qendrën Kulturore Hebraike në Qendrën Historike të Prizrenit

Shtëpitë tradicionale në rrugën Marin Barleti në Prizren

Kishën Katolike në Ferizaj

Xhaminë në Turbohovc të Istogut

Kullën e Tal Belit në Krelan të Gjakovës

Postën e Vjetër në Mitrovicë”, shkroi gjithashtu shefi i qeverisë.