ATV

Author: ATVLive

  • Zhbllokim i dialogut Kosovë-Serbi apo vazhdim i status-quos

    Zhbllokim i dialogut Kosovë-Serbi apo vazhdim i status-quos

    BE kërkon që Kosova e Serbia të dërgojnë komentet rreth zbatimit të marrëveshjes për normalizim të marrëdhënieve. Por sipas analistëve nuk ka shpresa, se brenda një periudhe të shkurtër mund të shënohet progres.

    Kosova dhe Serbia kanë afat deri më 18 korrik t’u dërgojnë ndërmjetësuesve të Bashkimit Evropian komentet e tyre rreth rrugës së zbatimit të marrëveshjes për normalizimin e marrëdhënieve ndërmjet dy vendeve, për të cilën palët ranë dakord vitin e kaluar në Bruksel dhe në Ohër të Maqedonisë së Veriut. Dy takimet e fundit që u zhvilluan në Bruksel ndërmjet udhëheqësve të Kosovës dhe Serbisë me ndërmjetësit evropianë dhe në nivel kryenegociatorësh që synonin zhbllokimin e zbatimit të marrëveshjes, përfunduan pa ndonjë rezultat.

    Më 2 korrik, kryenegociatori i Kosovës, Besnik Bislimi dhe ai serb, Petar Petkoviq, u takuan në Bruksel. Bislimi deklaroi pas takimit se pala serbe ishte e interesuar vetëm për Asociacionin e Komunave me shumicë serbe, duke njoftuar njëkohësisht, se megjithatë deri më 18 korrik “qeveria e Kosovës do t’i dërgojë komentet me shkrim mbi Marrëveshjen Bazë”.

    Sipas Bislimit, “aty pritet të dëshmohet se Serbia nuk po e respekton Marrëveshjen”. Nga ana tjetër kryenegociatori i Serbisë, Petar Petkoviq, ka akuzuar Kosovën siç thotë “për mbytje të dialogut”.

    BE nuk do të krijohet boshllëk për dialogun

    BE ka vënë si afat datën 18 korrik për të hartuar një propozim të ri mbi këtë proces. Përfaqësuesit e vendeve anëtare të Bashkimit Evropian janë pajtuar që t’ia zgjasin mandatin të dërguarit të posaçëm të BE-së për dialogun Kosovë-Serbi, Miroslav Lajçak, deri në janar të vitit 2025. Pajtimi u arrit pasi që përfaqësuesi i lartë i BE-së për politikë të jashtme dhe siguri, Josep Borrell, e kishte emëruar Lajçakun si ambasador të BE-së në Zvicër, i cili ishte dashur të niste punën më 1 shtator, menjëherë pasi t’i skadonte mandati në rolin e lehtësuesit të dialogut mes Kosovës dhe Serbisë.

    Sipas zyrtarëve të BE-së, me vazhdimin edhe për pesë muaj të mandatit të Lajçakut në rolin e lehtësuesit të dialogut, BE-ja dëshiron të sigurojë që në këtë çështje të mos ketë boshllëk, derisa të emërohet pasardhësi i tij. Emërimi i pasardhësit të Lajçakut ndërlidhet direkt me procedurën për emërimin e udhëheqësve të rinj në institucionet e BE-së për mandatin e ardhshëm pesëvjeçar. Në kuadër të paketës së këtyre emërimeve është edhe nominimi i kryeministres së Estonisë, Kaja Kallas, në postin e përfaqësueses së lartë të BE-së për politikë të jashtme dhe të sigurisë, që do të ndërmjetësojë takimet e nivelit të lartë politik në kuadër të dialogut Kosovë-Serbi. Kreu në largim i diplomacisë evropiane, Josep Borrell, ka deklaruar se “përkundër ndryshimeve brenda strukturave të BE-së, detyrimet e Kosovës dhe Serbisë nuk do të hiqen”, duke ritheksuar se “normalizimi i marrëdhënieve ndërmjet Kosovës dhe Serbisë është në qendër të angazhimit evropian rreth Ballkanit Perëndimor”.

    Konjufca: Ndërlikime të panevojshme

    Në lidhje procesin e normalizimit të marrëdhënieve, së fundmi kryetari i parlamentit të Kosovës Glauk Konjufca, tha se “Serbia po i shkel parimet e marrëveshjes”.

    “Kjo çështja e pozicionit të Kosovës po ndërlikohet pa nevojë. E para marrëveshja përbëhet prej parimeve dhe çështjeve konkrete. Parimet e përbëjnë frymën e marrëveshjes. Parimet nuk kanë afat, nuk mund të thotë Serbia me Kosovën mund të sillet agresore dhe në një moment mund të bëhet fqinjë e mirë. Çështjet konkrete mund të kenë afate. Problemi është se Serbia po i shkel parimet e marrëveshjes”, tha Konjufca. Sipas tij, nuk mund të kesh barazi sovrane mes shteteve kur Ana Bernabiq dërgon letrën për të zhvlerësuar marrëveshjen.

    Dallimet e mëdha mes palëve pengojnë procesin

    Ndërkohë analistët politikë nuk kanë shumë pritshmëri se mund të shënohet përparim në dialogun Kosovë-Serbi brenda një periudhe të shkurtër. Sidomos në këtë fazë dallimet ndërmjet palëve janë të mëdha. Këto dallime u vunë re edhe në përpjekjen e fundit të BE-së që të ulë në një tavolinë Kurtin dhe Vuçiqin, por ata nuk pranuan të takohen kokë më kokë. Shpend Demhasaj, analist politik i tha DW-së se “për aq kohë sa BE nuk vendos obligime dhe afate të qarta për palët për zbatim të marrëveshjeve të dakorduara, nuk pritet që të ketë zbatim të marrëveshjeve”.

    “Nëse mbetet në vullnetin e palëve (Serbi dhe Kosovë) marrëveshjet nuk do të zbatohen asnjëherë siç edhe nuk janë zbatuar deri me tani. Do të ketë manovra politike vetëm për ta fajësuar njëra tjetrën në sy të perëndimit dhe kaq. Prandaj, BE duhet të marrë rolin e ndërmjetësuesit duke vendos obligime të caktuara për secilën palë, dhe afate për secilin obligim e madje edhe ndëshkim për secilën palë që nuk zbaton obligimet në kohën e paracaktuar”, thotë Demhasaj. Sipas tij, “vetëm kështu mund të jetë i suksesshëm dialogu dhe mund të ketë zbatim të marrëveshjeve. Përndryshe edhe me datën 18 korrik thjesht mund të ketë komente nga palët që do të jenë krejtësisht të kundërta me njëra tjetrën dhe nuk do të mund të gjendet modalitet i zbatimit”.

    “Marrëveshja e Ohrit nuk i jep palëve atë që kërkojnë, por iu jep detyra pa kushte”

    Një analist tjetër, Blerim Burjani, i tha DW-së se udhëzuesi i BE-së ka qenë i qartë sa i përket zbatimit të Marrëveshjes së Ohrit, pa dallim dhe pa ndonjë përparësi ndaj pikave të marrëveshjes. Ato duhet të zbatohen nga palët. “Pra e tërë politika ndërkombëtare është koncentruar se si të fillojë zbatimi dhe të ndalen obstruksionet, të cilat vlerësohen si të pa papranueshme. Paraqitja e komenteve unë e kuptoj më shumë si presion se sa si qëllim për të përmbushur palët obligimin ndaj marrëveshjes. Kurti nuk do Asociacionin e Komunave serbe, kjo është qartë dhe ka pas shumë interpretime dëshirore apo, edhe të gabuara rreth kësaj teme në Kosovë dhe jashtë saj”, thotë Burjani. Sipas tij, në Kosovë nuk ka konsensus nacional për ta themeluar siç e quan ai, këtë “Asociacion kontravers në kuptimin juridik dhe kushtetues”.

    Marrëveshjen e Ohrit palët tentojnë ta minimizojnë dhe të bëjnë të pamundshme për t’u zbatuar, thekson Burjani. Sipas tij, Marrëveshja e Ohrit nuk i jep palëve atë që kërkojnë, por iu jep detyra pa kushte. Serbisë nuk i duhet një Asociacion pa kompetenca ekzekutive, ndërsa, Kosova e quan rrezik kushtetues dhe të sigurisë nëse themelohet një entitet i ri juridik në veri e në 10 komuna serbe. Pra qasja e deritashme e ndërmjetësuesve e ka përmbysë këtë zbatim, dhe është e kotë te i lihet palëve faji, e më së paku Kosovës”, thotë Burjani.

    Sipas tij, BE gjendet para ristrukturimit pas zgjedhjeve atje dhe fati i dialogut do të varet nga strukturat e reja që do të formohen, sikundër që çfarë qasje e re do te riformulohet.

    Marrëveshjen e Brukselit dhe Aneksin e Ohrit, ndonëse nuk është nënshkruar nga palët, Bashkimi Evropian e konsideron si marrëveshje ligjërisht të detyrueshme dhe ka theksuar qartë se përparimi në zbatimin e saj është i lidhur ngushtë me përparimin e të dyja palëve në proceset integruese./DW/

  • KFOR trajnon ushtarët për skenarët e kontrollit të turmave gjatë trazirave

    KFOR trajnon ushtarët për skenarët e kontrollit të turmave gjatë trazirave

    Komanda Rajonale Perëndim e misionit të KFOR-it të udhëhequr nga NATO-ja zhvilloi ushtrimin trajnues me emrin “Swift Rescue”, të mbajtur në çdo komunë të Kosovës perëndimore, për të ruajtur gatishmërinë e lartë operacionale.

    KFOR, përmes një postim në rrjetin social Facebook, bën të ditur se gjatë ushtrimit, ata u trajnuan në skenarë kontrolli të turmave dhe trazirave dhe testuan disa procedura evakuimi.

    “KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të ofruar një mjedis të sigurt dhe të sigurt për të gjithë njerëzit që jetojnë në Kosovë dhe lirinë e lëvizjes, në çdo kohë dhe KFOR-i është reaguesi i tretë i sigurisë, pas Policisë së Kosovës dhe misionit të BE-së për Sundim të Ligjit (EULEX), respektivisht, me të cilët punojmë në koordinim të ngushtë”, thuhet në këtë njoftim.

  • Tri arsyet përse është mirë të qani

    Tri arsyet përse është mirë të qani

    Vlerësoni të qenët i fortë. Jeni një person që i bëni gjërat siç duhet. Prandaj, do të preferonit më mirë që t’i bëni ballë një problemi se sa të qaheni. Gjithsesi, e qara nuk do të ndryshojë asgjë – prandaj përse duhet të qani:

    Edhe pse është e vërtetë që e qara nuk është zgjidhje për shumë probleme, ajo ka efekte pozitive tek ju dhe marrëdhëniet me të tjerët.

    Ja cilat janë tre përfitimet e të qarit:

    Njihni veten duke qarë: Nuk qajmë vetëm kur jemi të mërzitur. Të qarit në fakt është një mënyrë shprehjeje të përvojës. Mund të ndieni një sërë emocionesh, si mërzitje, dhimbje, zhgënjim, acarim ose vetmi, shkruan EO.

    Prandaj, të qarit ju ndihmon t’i shihni gjërat më me qartësi, të njihni më mirë veten dhe të ndërgjegjësoheni për nevojat, dobësitë dhe cilësitë tuaja.

    Qarja nxit empatinë: Kur qani para njerëzve që kujdesen për ju, mund të forconi edhe më shumë marrëdhëniet mes jush.

    Gjëja më e mirë është që të shfryhemi tek dikush që kemi mundësi.

    Lehtëson stresin: Të qarit mund të lehtësojë tensionin emocional. Mund të ndiheni të qetë dhe trupi është më shumë i relaksuar. Në këtë mënyrë do t’i shihni edhe gjërat më qartë. Për më tepër lotët ulin nivelin e nervozizmit, ankthit dhe agresivitetit.

  • Konfirmohet aktakuza ndaj Januzit, Bahtijarit dhe Shalës

    Konfirmohet aktakuza ndaj Januzit, Bahtijarit dhe Shalës

    Është konfirmuar aktakuza ndaj tre ish-pjesëtarëve të UÇK-së, Sabit Januzit, Ismet Bahtijarit dhe Haxhi Shalës -Topit.

    Njoftimi u bë nga Dhomat e Specializuara të Hagës.

    Në njoftim thuhet se “Më 8 korrik, Gjykatësja e Procedurës Paraprake në çështjen Januzi, Bahtijari dhe Haxhi Shala konfirmoi ndryshimet në aktakuzën e përbashkët dhe urdhëroi ZPS-në të dorëzonte versionin e fundit të kësaj aktakuze deri më 10 korrik”.

    “Pasi të dorëzohet, ajo do të jetë aktakuza në fuqi në këtë çështje gjyqësore. Në përputhje me rregullën 90(3), gjykatësja Masëlo (Masselot) caktoi paraqitjen e mëtejshme të Januzit dhe Bahtijarit të premten, 12 korrik në orën 09:30”.

    Meqenëse pretendimet e reja faktike ishin pjesë e aktakuzës fillestare kundër Haxhi Shalës, nuk kërkohet që ai të jetë i pranishëm në seancë.

  • Zyrapi flet për përgjegjësitë e Selimit si Inspektor i Përgjithshëm i UÇK-së

    Zyrapi flet për përgjegjësitë e Selimit si Inspektor i Përgjithshëm i UÇK-së

    Dëshmitari Bislim Zyrapi gjatë dëshmisë së tij në Hagë, të mërkurën ka folur lidhur me përgjegjësitë që ka pasur Rexhep Selimi sa i takon kohës kur është emëruar si Inspektor i Përgjithshëm i Ushtrisë Çlirimtare të Kosovës (UÇK).

    Fillimisht, avokati i Selimit, Geoffrey Roberts i tha dëshmitarit se ai për Zyrën e Prokurorit të Specializuar (ZPS) kishte folur për këto përgjegjësi, raporton “Betimi për Drejtësi“.

    “Përgjegjësitë e tij si Inspektor i Përgjithshëm ishte që të inspektonte njësitë, gatishmërinë e tyre dhe ç’nivele operative kishin arritur. Nëse kishte mungesë disipline, do të informonte komandantin dhe kishte shumë detyra të tjera të cila nuk po më kujtohen tani”, citoi Roberts të jetë përgjigjur Zyrapi.

    “Po në pika të shkurta e kam spjegu se nuk mund ta shpjegoj çdo pikë aty”, tha Zyrapi.

    Më pas, Roberts pyeti dëshmitarin se a është e vërtetë të thuhet se Inspektorati i Përgjithshëm i UÇK-së nuk kishte zyrë në Divjakë.

    “Po e saktë është! Nuk ka pas zyre të veçantë se unë e kam shpjegu se cilat zyre kanë pas dhe ku kanë qenë se nuk kemi pas edhe qaq shumë objekte që mund t’i vendosim që çdo sektor ta ketë zyrën e veçantë ose në shtëpi të veçantë për të zhvilluar këtë sektor. Kështu që në shumë vende ka lëvizë sektori herë në Lladrovc, herë në Bjeshkë të Berishës në Fshatin e Ri. Varësisht ku kemi mujtë ta takojmë dhe ku e kam pa”, tha dëshmitari.

    Gjithashtu, Zyrapi pohoi se është e saktë ajo që ka thënë për ZPS-në se njerëzit që e shoqëronin Selimin, nuk ishin gjithmonë të Policisë Ushtarake.

    “Zotëri Raci ka qenë përcjellës. Prej fillimi kur e kam njoftë Selimiin, e kam njoftë bashkë me atë që e ka vozitë e që pranë tij ka qenë”, tha tutje Zyrapi duke mohuar se kryente detyra të inspektimit.

    Edhe për Alush Agushin, dëshmitari pohoi se nuk ka pasur ndonjë rol në Inspektoratin e Përgjithshëm, por që nuk ishte pjesë as e Shtabit të Përgjithshëm. Por, sipas dëshmitarit ai mbante disa ushtarë pas vete, por që nuk është e thënë që i kishte drejtpërdrejt nën urdhra.

    Dëshmitari gjithashtu u pyet nga avokati Roberts se a kishte Selimi ndonjë drejtori dhe personel që vepronin nën urdhrat e tij.

    “Në atë kohë, jo. Nuk ka pas”, tha dëshmitari.

    Më pas, atij iu prezantua një dokument në të cilin kishte thënë se njësia speciale nuk ka të drejtë të arrestojë. Si rrjedhojë, Roberts prezantoi deklaratën e dëshmitarit që e ka dhënë gjatë kësaj periudhe në sallën e gjyqit gjatë pyetjeve të ZPS-së, e që kishte thënë se kjo metodë ishte përdorur njëherë në Zonën Operative të Pashtrikut nga Inspektori i Përgjithshëm.

    Për ZPS-në, dëshmitari tregoi se e ka pasur fjalën për Rexhep Selimin dhe që nuk kishte arrestuar, por është marrë masë disiplinore si pasojë e problemeve disiplinore të cilat kanë ndodhur, por që nuk do të duhej të veprohej kështu.

    “Viti ’99 më kujtohet. Diku ka qenë marsi i vitit ’99”, tha dëshmitari se i kujtohet që ka ndodhur kjo ngjarje.

    Dëshmitari Bislim Zyrapi, shpjegoi se Selimi nuk ka pasur njësi të veçantë, por ka pas mundësi që ta përdorë njësinë e Policisë Ushtarake.

    “Është e vërtetë që zotëri Selimi nuk ka pas njësi të veçantë, e ka pas njësinë e Policisë Ushtarake që ka mujtë me e përdorë, po edhe kur të përdoret duhet me e ditë komandanti. Nëse komandanti e ka leju që të përdoret kjo njësi është diçka tjetër. Unë e kam shpjegu vetëm në aspekte ushtarake që kjo njësi nuk mund të përdoret për këto nevoja dhe ajo është për nevojat e intervenimit në momentet e duhura dhe për zbulime-vëzhgime, por jo për arrestime. Meqenëse unë e kam shpjegu që zotëri Selimi nuk ka ba arrestime me këtë njësi në atë vend, por është përdorur se ajo njësi duhet të jetë gjithnjë e gatshme për veprim. Në këtë kontest është thënë”, tha Zyrapi.

    Ai tha se Inspektori i Përgjithshëm nuk i është drejtuar vetëm komandantëve të zonave për ta përdorë Policinë Ushtarake, por edhe komandantit të përgjithshëm.

    “Inspektori i Përgjithshëm nuk i drejtohet veç komandantit të zonës se ka mujtë t’i drejtohet veç komandantit të përgjithshëm që t’’i kërkoj Policinë Ushtarake pranë Shtabit të Përgjithshëm dhe që ka mujtë ta merr ose në mungesë të tyre mund ta marrë edhe nga zonat, e që komandantit të zonave t’i kërkohet që të përdoren këto njësi. Kurse, njësitë diversante që kanë qenë në atë kohë përdoren në momentin kur në qoftë se grupet janë të armatosur dhe kundërvihen me armë, atëherë përdoren këto njësi për t’i eliminuar ato ose për t’i çarmatosur”, tha Zyrapi.

    Ai shtoi se Selimi nuk e ka pasur rolin që të marrë masa disiplinore, por që të kontrollojë disiplinën. Sipas tij, të marrin masa disiplinore ka qenë autoritet i komandantëve të zonave, brigadave dhe të atij të përgjithshëm.

    Gjithashtu, dëshmuari u pyet nëse kishte parë ndonjë raport të shkruar të shkëmbyer në mes Selimit dhe komandantit të përgjithshëm, por që përgjigja e tij nuk u dëgjua. Më pas, seanca kaloi në sesion privat me kërkesën e avokatit Roberts për t’i bërë disa pyetje.

    Pasi u hap seanca, sërish u diskutua lidhur me çështjen e inspektorit të përgjithshëm e që para se të kalohet në pushim me kërkesën e Roberts u pranuan disa dokumente në prova materiale.

  • Nesër mblidhen deputetët, votohet për themelimin e Komisionit Hetimor për zjarret në IML

    Nesër mblidhen deputetët, votohet për themelimin e Komisionit Hetimor për zjarret në IML

    Kuvendi i Kosovës do të mblidhet të enjten në seancë plenare.

    Në rend dite janë paraparë gjithsej 30 pika.

    Seanca pritet të fillojë në ora 10:00.

    Njëra ndër pikat të cilat është në rend dite është votimi për themelimin e Komisionit Hetimor Parlamentar mbi përgjegjësitë ekzekutive të Ministrisë së Drejtësisë në raport me zjarret e dyshimta në Institutin e Mjekësisë Ligjore, zhdukjen e mostrave në rastin e Astrit Deharit dhe çdo veprimi e mosveprimi të kësaj ministrie që ka cenuar pavarësinë dhe përgjegjësitë ligjore të këtij instituti.

    Po ashtu, në rend dite është edhe votimi i Projekt-rezolutës për adresimin e gjetjeve të Raportit të Departamentit Amerikan të Shtetit-DASH.

    Si pikë e 28-të e rendit të ditës është edhe shqyrtimi i Projekt-Deklaratës për raportet e Republikës së Kosovës me Shtetet e Bashkuara të Amerikës.

    Rendi i ditës:

    1. Miratimi i procesverbaleve të seancave të mëparshme,

    4. Votimi i Projektligjit nr.08/L-309 për ratifikimin e Marrëveshjes së financimit, për programin e parë për “Financimin e politikave zhvillimore për efektivitetin fiskal, konkurrueshmërinë dhe rritjen e gjelbër”, në mes të Republikës së Kosovës e përfaqësuar nga Ministria e Financave, Punës dhe Transfereve dhe Asociacionit Ndërkombëtar për Zhvillim,

    5. Votimi i Statutit të Universitetit të Prishtinës “Hasan Prishtina” në Prishtinë,

    6. Votimi në lexim të dytë i Projektligjit nr.08/L-212 për shëndetin riprodhues dhe fertilizim të asistuar mjekësor,

    7. Votimi në parim i Projektligjit nr.08/L-266 për gjendjen civile,

    8. Votimi në parim i Projektligjit nr.08/L-300 për provimin e maturës shtetërore,

    9. Votimi në parim i Projektligjit nr.08/L-296 për të huajt,

    10. Shqyrtimi i dytë i Projektligjit nr.08/L-277 për Sport,

    11. Shqyrtimi i dytë i Projektligjit nr.08/L-264 për Rininë

    12. Shqyrtimi i dytë i Projektligjit nr.08/L-265 për regjistrin e pronarëve përfitues,

    13. Shqyrtimi i dytë i Projektligjit nr.08/L-256 për falimentimin,

    15. Shqyrtimi i dytë i Projektligjit nr.08/L-261 për mbrojtje nga zjarri,

    16. Shqyrtimi i dytë i Projektligjit nr.08/L-267 për letërnjoftimin,

    17. Shqyrtimi i dytë i Projektligjit nr.08/L-274 për Shërbimet Private të Sigurisë,

    18. Shqyrtimi i dytë Projektligjit nr. 08/L-249 për ndryshimin dhe plotësimin e Ligjit nr.06/L-056 për Këshillin Prokurorial të Kosovës,

    19. Shqyrtimi i dytë Projektligjit nr. 08/L-272 për ndryshimin dhe plotësimin e Ligjit nr. 06/L-010 për noterinë, i ndryshuar dhe plotësuar me Ligjin nr. 08/L-149,

    20. Shqyrtimi i dytë Projektligjit nr. 08/L-289 për Komisionin e Pavarur të Mediave,

    21. Shqyrtimi i dytë Projektligjit nr.08/L-262 për ndryshimin dhe plotësimin e ligjeve që përmbajnë procedura të veçanta administrative dhe harmonizimin e tyre me Ligjin nr. 05/L- 031 për procedurën e përgjithshme administrative, faza e dytë,

    22. Shqyrtimi i dytë Projektligjit nr.08/L-294 për ndryshimin dhe plotësimin e Ligjit nr.08/L-197 për Zyrtarët Publikë,

    23. Shqyrtimi i parë i Projektligjit nr.08/L-304 për bankat,

    24. Shqyrtimi i parë i Projektligjit nr.08/L-305 për ofruesin e shërbimeve të navigacionit ajror,

    25. Votimi për themelimin e Komisionit Hetimor Parlamentar mbi përgjegjësitë ekzekutive të Ministrisë së Drejtësisë në raport me zjarret e dyshimta në Institutin e Mjekësisë Ligjore, zhdukjen e mostrave në rastin e Astrit Deharit dhe çdo veprimi e mosveprimi të kësaj ministrie që ka cenuar pavarësinë dhe përgjegjësitë ligjore të këtij instituti,

    26. Themelimi i Komisionit Hetimor Parlamentar për procesin e përllogaritjes së borxheve të kompanive ambalazhuese të ujit, si dhe mënyrën dhe bazën e shlyerjes së borxheve nga Ministria e Mjedisit, Planifikimit Hapësinor dhe Infrastrukturës.

    27. Votimi i Projekt-rezolutës për adresimin e gjetjeve të Raportit të Departamentit Amerikan të Shtetit-DASH,

    28. Shqyrtimi i Projekt-Deklaratës për raportet e Republikës së Kosovës me Shtetet e Bashkuara të Amerikës,

    29. Shqyrtimi i Projekt-rezolutës për adresimin e çështjes së emigrimit të qytetarëve nga Republika e Kosovës,

    30. Raportimi i Qeverisë së Republikës së Kosovës për progresin mbi zbatimin e Objektivave të Zhvillimit të Qëndrueshëm dhe reflektimin e Agjendës Transformuese të Kosovës në buxhet dhe politika qeveritare,

    31. Shqyrtimi i Programit Kombëtar për Integrim Evropian 2024-2028,

    32. Themelimi i Komisionit Ad-Hoc për përzgjedhjen e kandidatëve për dy (2) anëtarë të Bordit të Radiotelevizionit të Kosovës, prej tyre, një nga komuniteti shqiptar dhe një nga komuniteti serb.

  • Zelensky shpreson se politika e SHBA-së ndaj Ukrainës nuk do të ndryshojë pas zgjedhjeve

    Zelensky shpreson se politika e SHBA-së ndaj Ukrainës nuk do të ndryshojë pas zgjedhjeve

    Gjatë një vizite në Fondacionin dhe Institutin Presidencial Ronald Reagan në Shtetet e Bashkuara, Presidenti Volodymyr Zelensky ka shprehur shpresën se politika e SHBA për të mbështetur Ukrainën në luftën e saj kundër agresionit rus nuk do të ndryshojë pas zgjedhjeve presidenciale.

    Kështu thuhet në faqen e internetit të Presidentit të Ukrainës, transmeton Ukrinform.

    Vihet re se nëse diktatori rus nuk ndalet në Ukrainë, ai do të shkojë më tej dhe pas kësaj, SHBA-të do të duhet të mbrojnë vendet e NATO-s që më parë ishin pjesë e BRSS ose brenda sferës së ndikimit të saj.

    Kreu i Shtetit shprehu shpresën se politika e SHBA-së për mbështetjen e Ukrainës në luftën e saj kundër agresionit rus nuk do të ndryshojë pas zgjedhjeve presidenciale të nëntorit dhe është e rëndësishme që diktatori rus ta dijë këtë.

    “Gjithçka varet vetëm nga vendimi i popullit amerikan, jo nga një person. Putini gjithmonë mbështetet në ndarjen e botës, ndarjen e SHBA-së dhe ndarjen e vendeve evropiane. Ai i frikësohet unitetit”, vuri në dukje Zelensky.

    Presidenti falënderoi gjithashtu partnerët për vendimin për të forcuar mbrojtjen ajrore të Ukrainës me pesë sisteme shtesë Patriot. Ai vuri në dukje se nevojiten më shumë sisteme të tilla të mbrojtjes ajrore sepse Ukraina ka një territor të madh dhe Rusia përdor dhe kombinon lloje të ndryshme raketash dhe ndryshon taktikat.

    Ukraina ka nevojë për armë me rreze të gjatë dhe leje për t’i përdorur ato kundër fushave ajrore në territorin rus nga ku ngrihen avionët që lëshojnë vazhdimisht bomba të drejtuara në vendin tonë. Përveç kësaj, Ukraina po pret me padurim avionët luftarakë F-16. Si koha e mbërritjes së tyre ashtu edhe numri i avionëve janë të rëndësishëm.

    “Rusia po përdor 300 avionë luftarakë kundër Ukrainës. Na duhen të paktën 128 avionë për t’iu kundërvënë, dhe këto shifra janë të njohura për partnerët tanë”, theksoi Presidenti.

    Siç raportohet, samiti i NATO-s po zhvillohet në Uashington më 9-11 korrik, me pjesëmarrjen e delegacionit ukrainas të kryesuar nga presidenti Volodymyr Zelensky.

  • Komisioni për Buxhet ratifikon dy marrëveshje ndërkombëtare, vlera e tyre mbi 100 milionë euro

    Komisioni për Buxhet ratifikon dy marrëveshje ndërkombëtare, vlera e tyre mbi 100 milionë euro

    Komisioni për Buxhet, Punë dhe Transfere, ka ratifikuar dy marrëveshje ndërkombëtare në vlerë prej 104 milionë euro, raporton EO.

    Marrëveshja e parë ka të bëjë për Investime për Projektin Energjia diellore në KEK-Porta Globale si dhe Marrëveshja për anëtarësimin e Republikës së Kosovës në Fondin Monetar Ndërkombëtar.

    Ministri Hekuran Murati tha se Marrëveshja e Kredisë mes Republikës së Kosovës dhe Bankës Evropiane për Investime për Projektin Energjia diellore fotovoltsike në KEK-Porta Globale mundësin harmonizimin e legjislacionit të brendshëm me atë të Bankës.

    “Ratifikimi i kësaj marrëveshje do të mundësoje harmonizimin e legjislacionit të brendshëm me atë te Bankës Ndërkombëtare për Rindërtim dhe Zhvillim, nga e cila si anëtare përfiton financiarisht për realizimin e projekteve që shpesh shërbejnë për te përputhur me standardet dhe legjislacionin e BE-se. Amendamenti i Marrëveshjes fshin Seksionin 3 të Nenit III të Marrëveshjes për Bankën Ndërkombëtare për Rindërtim dhe Zhvillim. Ky seksion qe kufizonte Bankën nga hyrja në garanci, huamarrje ose hua te drejtpërdrejta shuma e cilat nuk mund të tejkalonte një për qind të kapitalit te Bankës”, tha Murati.

  • Murati qetëson qytetarët: S’ka rrezik për luftë, situata në vend është e qetë

    Murati qetëson qytetarët: S’ka rrezik për luftë, situata në vend është e qetë

    Ndonëse krerët e shtetit në çdo deklarim kryefjalë e kanë “luftën” dhe “sulmin” nga Serbia, të kundërtën e mendon ministri i Financave, Punës dhe Transfereve, Hekuran Murati. Ky i fundit, ka thënë se situata është e qetë, raporton EO.

    Gjatë raportimit të mërkurën në Komisionin për Buxhet, Punë dhe Transfere, Murati u pyet nëse deklarimet për luftë largojnë investitorët.

    “Jemi të koordinuar në të kaluarën rreziku ka ardh edhe nga vetë brenda territorit kurse tash me rend dhe ligj nuk ka rrezik, çka mund të ketë rrezik është jashtë vendit në këtë rast, Serbi”, u shpreh Murati.

    Ndërsa deputeti i Aleancës për Ardhmërinë e Kosovës, Pal Lekaj, pyeti Muratin nëse kjo deklaratë e tij është në shpëputhje me ato të krerëve të shtetit.

    “Nuk po korrespondon me deklaratat e kryetarit, kryeministrit se situata në veri është e qetë, dhe kemi dëgjuar deklarata nga kryetari i kuvendit se do zhvillohet një luftë, këto deklarata nuk janë të mira për vendin, investitorët. Është ndonjë prapavijë kjo, nuk besoj se është mirë që krerët e vendit të proklamojnë luftë. Këto deklarata janë të pamatura. A jeni të koordinuar, me koordinim a pa koordinim”, pyeti Lekaj.

    “Është tërësisht në përputhje deklarata e kryetarit dhe kryeministrit, kurrë më qetë situata nuk ka qenë në veri, rreziku mbetet vetëm nga jashtë”, u përgjigj Murati.

    Lekaj pyeti edhe për masat nga Bashkimi Evropian. Pyeti nëse i di sa është dëmi i shkaktuar nga masat e BE-së.

    “Ne po miratojmë marrëveshje ndërkombëtare po kemi të ngrira, nuk dimë kur do hiqen sanksionet, sado jemi të zbehtë me deklarime po pëson qytetari, vendi. Nuk ka muaj që nuk kërkohet të votohen marrëveshjet, nëse si ministër keni informacione sa ka pësu vendi në këtë drejtim, se është goxha shqetësuese për atë qe e kanë marrë implementimin e marrëveshjes përveç deklaratave të kryeministrit nuk kemi ndonjë informacion të saktë. Dua të dije si po shkon puna në këtë drejtim”, u shpreh Lekaj.

    Ndërsa, ministri Murati tha së sa i përket heqjes së masave, Kosova i ka plotësuar të gjitha kushtet.

    “Masat e keni parë se raporti është përgatit nga përfaqësuesi i lartë i BE-së dhe presim një vendimmarrje. Sa i përket problemeve ka disa raste te Ministria për Komunitete dhe Kthim që ka qenë fondet për mbështetje të komunitetit serb. Kanë pësuar zona ku ka me shumë serbe”, u shpreh Murati.

  • Kurti e Peci tregojnë se është siguruar buka e mot-motit, shprehen të bindur se s’do të ketë nevojë për import

    Kurti e Peci tregojnë se është siguruar buka e mot-motit, shprehen të bindur se s’do të ketë nevojë për import

    Kryeministri i Kosovës, Albin Kurti bashkë me ministrin e Bujqësisë, Pylltarisë dhe Zhillimit Rural, Faton Peci kanë vizituar fermerin Asman Kryeziu nga fshati Bubavec i Malishevës, i cili kultivon rreth 27 hektarë grurë, raporton EO.

    Nga aty, Kurti e Peci thanë se kjo vërë do të garantojë bukën e motmotit, me ç’rast premtuan edhe më tej mbështetje përmes subvencionimit.

    Kryeministri Kurti, ka thënë se Qeveria ka dhënë mbështetje fushës së bujqësisë me buxhet rreth 100 milionë euro. Kurti ka thënë se kanë shkurtuar edhe procesin e aplikimit për subvencione.

    “Pamë korrjen e grurit në një vend që ka qenë djerrinë ku paraprakisht janë nxjerr 260 metra kub grurë, siç tha edhe fermeri, djerrina me grurë është bërë arë me grurë dhe është në funksion të programit tonë që bukën e motmotit ta kemi tonën. Buka jonë në sofrën tonë nga toka jonë. Buxheti për Ministrinë e Bujqësisë është rreth 100 milionë euro ashtu siç e kemi premtuar dhe tash në njërën anë subvencionojmë edhe naftën edhe plehun edhe rendimentin me 4 cent, këtë të fundit për kilogram. Në anën tjetër e kemi zvogëluar jashtëzakonisht dokumentet që i nevojiten fermerëve për subvencione, ka raste ku nga tri javë aplikimi është shkurtuar për vetëm 30 minuta”, ka thënë Kurti, teksa është shprehur optimist se këtë vit nuk do të ketë nevojë për import të grurit.

    “Do të vazhdojmë me punë të mira, ky duket të jetë viti me të cilën me prodhimtarinë e shtuar prej 140 deri 150 mijë grurë do ta mbulojmë dhe tejkalojmë importin që e kemi pasur me 139 mijë në vitin e kaluar. Gjithë kjo po tregon që kjo verë e garanton bukën tonë, në sofrën tonë nga toka jonë, pra prodhimtari vendore pa pasur nevojë për import”, u shpreh Kurti.