Deputetët e Kuvendit të Kosovës kanë nderuar me një minutë heshtje të gjithë të rënët e Srebrenicës. Në sallë alternative, po mbahet seancë e jashtëzakonshme për përkujtimin e viktimave të gjenocidit të Srebrenicës në Bosnjë-Hercegovicës, raporton KP.
Në mbledhjen e djeshme të Qeverisë së Kosovës u miratua shpallja e 11 korrikut si ditë përkujtimi për gjenocidin në Srebrenicë, bazuar në rezolutën e Asamblesë së Përgjithshme të Kombeve të Bashkuara.
Çmimet e derivateve në vendin tonë kanë shënuar rritje këto ditë mbi pesë centë për litër. Çmimi për një litër naftë sot ka kushtuar deri 1 euro e 39 centë, ndërsa një litër benzinë tregtohet deri në 1 euro e 31 centë në tregun e Kosovës.
Çmimet e derivateve ngriten për çdo vit në kohën e pushimeve kur vijnë në Kosovë bashkatdhetarët si dhe në sezonin e korrje-shirjeve për mekanizimin bujqësor.
Sipas Shoqatës së konsumatorëve, çmimi i naftës është ngritur në kohën e ardhjes së bashkatdhetarëve dhe në fushatën e korrje-shirjeve. Ndonëse, naftëtarët mohojnë se kjo rritje e çmimeve ka ndodhur për mërgimtarët dhe bujqit.
Kryetari i shoqatës së naftëtarëve të Kosovës, Fadil Berjani ka thënë për KosovaPress se çmimi për një litër naftë sot është nga 1.28 euro-centë deri 1.38 euro centë, ndërsa ai për benzinë 1 euro e 31 centë.
Kryetari Berjani pretendon se çmimet e karburanteve janë më të lira në Kosovë se në rajon, përveç Maqedonisë së Veriut.
Kryetari i Shoqatës “Konsumatori”, Selatin Kaçaniku thekson për KosovaPress se ekziston mundësia se për arsye të ardhjes së bashkatdhetarëve në pushime në vendlindje, dhe nisjes së fushatës së korrje-shirjeve të shtrenjtohen derivatet nga naftëtarët.
“Të dyja këto, bashkatdhetarët dhe bujqit, naftëtarët i shfrytëzojnë dhe i japin ‘yrysh’ për shtrenjtimin e naftës dhe benzinës. Prandaj, patjetër që duhet ulën këto çmime, sepse pësojnë edhe qytetarët tjerë. Kështu konsumatorët janë më të nëpërkëmburit, ani se qytetari-konsumator është taksa pagues dhe mbushës buxhetit nga paguhen qeveritarët”, theksoi ai.
Kryetari i Shoqatës së Naftëtarëve, Fadil Berjani ka mohuar të ketë rritje të çmimeve të derivateve si rrjedhojë e ardhjes se bashkatdhetarëve.
“Jo nuk ka rritje të çmimeve që po vjen diaspora. Çmimin e percakton berëza dhe organizata prodhuese OPEC. Sa i përket korrjeve, besoj se bujqit tanë kanë subvencione nga Qeveria”, ka thënë Berjani në një përgjigje për KosovaPress.
Në anën tjetër çmimet e naftës në bursën ndërkombëtare kanë rënë të martën pas përpjekjeve të vazhdueshme diplomatike për të arritur një marrëveshje armëpushimi në Gaza dhe pasigurisë mbi kohën e uljes së normës së interesit të Rezervës Federale të SHBA-së (Fed).
Deputetët e Kuvendit të Kosovës kanë miratuar një deklaratë për gjenocidin serbë në Srebrenicë të ndodhur në vitin 1995.
Ishin 84 deputetë që votuan pro deklaratës dhe asnjë kundër.
Në vitin 2021 Kuvendi ka miratuar edhe rezolutë për gjenocidin serbë në Srebrenicë në vitin 1995.
Sulmuesi i talentuar 16-vjeçar, Lamine Yamal thuhet se ka një klauzolë astronomike lirimi në kontratën e tij me Barcelonën.
Yamal kishte qenë në qendër të vëmendjes pasi ai doli në skenë gjatë sezonit 2023/24.
Paraqitjet mbresëlënëse të 16-vjeçarit me Barcelonën, Yamalit ia siguruan një vend në formacion startues për Spanjën.
Përgjatë ‘Euro 2024’ në Gjermani, Yamal shkëlqeu duke shënuar një gol dhe duke dhuruar tri asistime në gjashtë ndeshje sa i ka luajtur.
Goli i tij i barazimit ishte vendimtar në ndeshjen kundër Francës. Menjëherë pas tij, erdhi goli i Dani Olmos që siguroi një biletë për në finale në ‘Euro 2024’ për spanjollët.
Yamal përveç suksesit kolektiv, arriti edhe sukses personal. Ai u bë lojtari më i ri në histori të futbollit që ka shënuar në ‘Euro 2024’.
Për krejt këto arritje, është aktivizuar Barcelona së fundmi. Sipas CNN, Yamal ka nënshkruar marrëveshje të re me Barçën në tetor të vitit që shkoi, klauzola e së cilit është një miliard euro. Gjegjësisht, një e treta e buxhetit të Kosovës, përcjell Insajderi.org.
Qeveria e Kosovës ka ndarë 21 milionë euro pas humbjes që Kosova pësoi në Gjykatën e Arbitrazhit për rastin e Contour Global-it. Kryeministri Albin Kurti e ministri i Financave, Hekuran Murati, fajësuan Qeverinë Haradinaj. Ndërkohë, ndarja e 21 milionë eurove ka nxitur reagime edhe të politikanëve të tjerë.
Në mbledhjen e Qeverisë së Kosovës të mërkurën, u mor vendim që të ndahet 21 milionë euro për pagesë ndaj humbjes së rastit të Kosovës me kompaninë Contour Global.
Në këtë mbledhje, kryeministri Kurti e ministri Murati fajësuan ish-kryeministrin Ramush Haradinaj që kishte nënshkruar këtë kontratë.
E reagimi i Haradinajt ishte i menjëhershëm. Ai nuk la gjë pa i thënë Kurtit, duke thënë se po dëshmon që është kryeministër i dobët e “njeri i poshtër”.
“Albini çdo ditë po dëshmon se është edhe Kryeministër i dobët edhe njeri i poshtër. Me krenari dhe me lëvdata e ka pas shkelë kontratën me Contour Global (Ministrja e tij i ka dërgu letër dhe ia ka ndërprerë përkrahjen) e me faqe të zezë përgjegjësinë për dëmshpërblim po e heqë prej vetes. E pabesueshme ku ka mbërri logjika e politikës trushpërlarëse e Kurtit.” – ka shkruar ai në Facebook.
Haradinaj ka akuzuar Kurti për ndërprerjen e këtij projekti.
“Kurti e la Kosovën edhe pa 500 MW energji, ku që nga viti 2023 do t’i përfitonte Kosova me çmim prej 83€ e në ndërkohë ka blerë energji deri në 600€ e qytetarit të shkretë jo një por dy herë ia ka rritë çmimin e energjisë. Kjo është politika e mashtruesit Albin Kurti. E gjuan gurin, e vjedh popullin dhe në mënyrën më të poshtër e fsheh dorën.” – ka shkruar Haradinaj.
Ndërkohë edhe deputetja e LDK-së, Valentina Bunjaku-Rexhepi, ka kritikuar Qeverinë Kurti, që sipas saj, tentuan që ndarjen e 21 milionë eurove ta bëjë si të keqen më të mirë.
“Humbja e 21 milionë eurove nga buxheti i shtetit për shkak të humbjes së lëndës në Gjykatën e Arbitrazhit për rastin e Contour Global-it dhe krenaria e rrejshme e Qeverisë Kurti se kemi mundur të humbim edhe më shumë, tregon për të satën herë, se këta me propagandë e demagogji, e bëjnë edhe limonin e ëmbël. Qeveri e mashtrimit të madh!” – ka shkruar ajo në Facebook.
Ndërsa, deputeti i pavarur, Haki Abazi, përveç Kurtit ka përmendur ministren Rozeta Hajdari, e zyrtaren e VV-së, Dejona Mihalli, si treshe që i kanë humbur 21 milionë euro Kosovës.
“Treshja Kurti- Mihaili- Hajdari i kushtojnë Kosovës 21 Milion Euro nga humbja në një arbitrazh. Kjo lëndë ka qenë krejt e lehtë që të vendoset në favor të Kosovës, por panjohuritë dhe mungesa e plotë e profesionalizimit ka bërë që jo vetëm në këtë rast të humbasim mundësitë për vendin!”
“Ky nuk është ndryshimi, ky është vetëm vazhdimi i keq!” – ka shkruar ndër të tjera Abazi.
Kujtojmë se Qeveria e Kosovës në qershor 2020 kishte njoftuar investitorin Contour Global për ndërprerje të marrëveshjes. Ndërsa me datë 19.11.2020, investitori Contour Global kishte paditur Qeverinë e Kosovës në Gjykatën e Arbitrazhit.
Qeveria e Kosovës në fund të vitit 2017 pati arritur marrëveshjen komerciale me kompaninë amerikane “Contour Global”, për ndërtimin e Termocentralit “Kosova e Re” me kapacitet 500 megavat.
Njësiti i hetimeve të Stacioni Policor në Partesh gjatë hetimit të një rasti të dhunës në familje, përmes rrugëve operative ka pranuar informacion se i dyshuari 67 vjeçar me inicialet M.J. është në posedim të një arme pa leje përkatëse.
Sipas Policisë, me leje të Prokurorit të Shtetit, është realizuar kontrolle në shtëpinë dhe objektet përcjellëse të të dyshuarit ku gjatë kontrollit është gjetur dhe konfiskuar në cilësinë e provës materiale për gjykatën një armë zjarri pistoletë M57 me një karikator dhe tetëdhjetë e tetë copë fishekë të kalibrit 7.62mm.
“I dyshuari është arrestuar dhe intervistuar në bazë të procedurave ligjore. Me urdhër të Prokurorit të Shtetit i dyshuari është dërguar në mbajtje për 48 orë dhe ndaj tij do të ngritët kallëzim penal për veprat penale ‘’Dhuna në familje’’ dhe ‘’Mbajtje në pronësi, kontroll të pa autorizuar të armeve dhe municionit’’, thuhet në njoftim.
Lojtarët e Uruguait u përleshën me tifozët e Kolumbisë pas humbjes së tyre në gjysmëfinale të Kupës së Amerikës të mërkurën përpara se personeli i sigurisë të ndërhynte për të rivendosur rendin.
Pasi Kolumbia vulosi një fitore 1-0 në Charlotte, videot në mediat sociale treguan se lojtarët e Uruguait u ngjitën në tribuna dhe shkëmbenin goditje me tifozët kundërshtarë, përcjellë kp.
Organi qeverisës i futbollit të Amerikës së Jugut CONMEBOL tha se po heton incidentin dhe se dënon fuqishëm çdo akt dhune që prek futbollin.
“Puna jonë bazohet në bindjen se futbolli na lidh dhe na bashkon nëpërmjet vlerave të tij pozitive”, tha CONMEBOL. “Nuk ka vend për intolerancë dhe dhunë brenda dhe jashtë fushës”, vazhdon deklarata.
Darëin Nunez i Uruguait dhe Ronald Araujo ishin ndër lojtarët në ballë të përleshjes. Kapiteni Jose Maria Gimenez tha se lojtarët po përpiqeshin të mbronin familjet e tyre.
“Më lejoni të them diçka para se t’ju ndërpresin, sepse ata nuk do të na lënë të flasim në mikrofon, ata nuk duan që unë të them asgjë për atë që po ndodh, por kjo është një fatkeqësi,” tha Gimenez.
“Ju lutemi të keni kujdes, familjet tona janë në tribuna, ka foshnja të vogla të porsalindura, ishte një fatkeqësi, nuk kishte polici dhe ne duhej të mbronim familjet tona. Ky është faji i dy-tre personave që kanë pirë pak pije dhe nuk dinë të pinë”.
Lojtarët dhe stafi nga Kolumbia dhe Uruguai gjithashtu u përfshinë në një përballje në fushë pas fishkëllimës së fundit.\
Headshot to Nunez pic.twitter.com/IYajPlxYne
— El Chapo (@ElonChapo) July 11, 2024
Pas Ballkanit që e nisi mirë aventurën në Ligën e Kampionëve duke triumfuar kundër UE Santas me rezultat 2-1, sot edhe dy skuadra të tjera kosovare do të paraqiten në Evropë, Llapi në Ligën e Evropës dhe Malisheva në Lugën e Konferencës.
Llapi do të ballafaqohet me skuadrën nga Polonia, Wisla në udhëtim për të kërkuar kështu të bëjë hapin e parë të rëndësishëm në këtë garë para ndeshjes kthyese në Podujevë. Kjo ndeshje nis nga ora 20:30, raporton KosovaPress.
Përveç Llapit, në aksion sot do të jetë edhe Malisheva e cila në Ligën e Konferencës do të ndeshet me Buducnostin e Malit të Zi, sfidë kjo e cila do të zhvillohet në stadiumin “Zahir Pajaziti” në Podujevë me fillim nga ora 17:00.
Në ditën e cila shënon 29 vjetorin e masakrës së Srebrenicës presidentja e Kosovës Vjosa Osmani ka përkujtuar djemt e burrat boshnjak që u vranë brutalisht nga regjimi gjenocidal i Millosheviqit.
Osmani tha se paqja e qëndrueshme është e mundur vetëm atëherë kur ka drejtësi për viktimat.
“Srebrenica nuk është vetëm një vend në hartë, por një simbol i nevojës së vazhdueshme për drejtësi, rëndësisë së të vërtetës dhe fuqisë së kujtimit. Tmerret e atij kapitulli të errët, kur mbi 8 mijë djem e burra boshnjakë u vranë brutalisht nga regjimi gjenocidal i Millosheviqit, janë kujtesë e mizorisë njerëzore. Sot, në Ditën Memoriale në shenjë të përkujtimit të gjenocidit në Srebrenicë, nderojmë kujtimin e jetëve të pafajshme të humbura dhe ripërsërisim se paqja e qëndrueshme është e mundur vetëm atëherë kur ka drejtësi për viktimat”, ka shkruar Osmani.
Shtetet e Bashkuara do të nisin dislokimin e raketave me rreze të gjatë veprimi në Gjermani më 2026, njoftuan dy shtetet gjatë takimit të aleancës së NATO-s. Ky konsiderohet një hap i madh që synon të luftojë, atë që aleatët e cilësojnë si kërcënimin në rritje që Rusia paraqet për Evropën.
Sipas vendimit, Uashingtoni do të dërgojë në Gjermani armët më të fuqishme amerikane që do të vendosen në kontinentin evropian që nga Lufta e Ftohtë dhe ky vendim po shihet si paralajmërim i qartë për presidentin rus, Vladimir Putin.
Në deklaratën e përbashkët të lëshuar nga SHBA-ja dhe Gjermania u tha se “dislokimet episodike” ishin përgatitje për stacionim afatgjatë në Evropë të aftësive ushtarake që përfshijnë raketat SM+6, Tomahawk dhe dislokimin e armëve hipersonike me rreze të gjatë veprimi.
Një dislokim i armëve të tilla do të ishte i ndalueshëm nga Traktati për forcat bërthamore me rreze të mesme veprimi, që SHBA-ja dhe Bashkimi Sovjetik kishin nënshkruar më 1987. Por, ky traktat u zhbë më 2019.
“Ne nuk mund ta përjashtojmë mundësinë e një sulmi kundër sovranitetit dhe integritetit territorial të aleatëve”, thanë aleatët e NATO-s përmes një deklarate të lëshuar të mërkurën, më 10 korrik.
Po ashtu, NATO paralajmëroi se më shumë ndihmë do t’i dërgohet Ukrainës, e cila po përballet me pushtimin rus që nga viti 2022.
Në deklaratën e NATO-s u tha se aleatët synojnë t’i ofrojnë Ukrainës të paktën 40 miliardë euro ndihmë ushtarake vitin e ardhshëm.
Në këtë dokument po ashtu është përdorur gjuhë më e ashpër ndaj Kinës, duke e akuzuar Pekinin se “mundëson” përpjekjet e luftës së Rusisë kundër Ukrainës. Në deklaratë u tha se Kina vazhdon të paraqesë sfida sistematike për sigurinë euroatlantike.
Sekretari i përgjithshëm i NATO-s, Jens Stoltenberg, u tha gazetarëve se për herë të parë 32 aleatët bashkërisht e kanë cilësuar Kinën si një shtet vendimtar në mundësimin e luftës së Rusisë. Ai tha se ky është një mesazh i rëndësishëm.
Stoltenberg tha se aleanca nuk është një organizatë që vendos sanksione, por shtoi se “në fund të fundit, ky do të jetë një vendim për secilin aleat, por mendoj se mesazhi që ne dërguam nga ky samit i NATO-s është shumë i qartë”.
NATO i bëri thirrje Kinës që të mos i dërgojë materiale dhe të mos i ofrojë mbështetje politike luftës së Rusisë.
Presidenti amerikan, Joe Biden, mirëpriti partnerët dhe aleatët e NATO-s në një darkë në Shtëpinë e Bardhë të mërkurën, për të festuar, siç tha ai, “aleancën më të madhe që bota ka pasur ndonjëherë”.
Ai tha se është i kënaqur që të gjithë anëtarët e NATO-s po zotohen që të zgjerojë bazat e tyre industriale për të zhvilluar plane për prodhimin e armëve brenda shteteve të tyre.
“Nuk mund të lejojmë që aleanca të mbetet prapa. Ne mund dhe do ta mbrojmë çdo centimetër të territorit të NATO-s dhe këtë do ta bëjmë së bashku”.
Shqetësimet për moshën dhe aftësinë e presidentit Biden për të udhëhequr me shtetin janë rritur, pasi shanset e tij për fitore në zgjedhjet presidenciale të nëntorit u dëmtuan nga paraqitja e tij në debatin e parë presidencial kundër Donald Trumpit muajin e kaluar.
Teksa po mbahet samiti treditor i NATO-s në Uashington, kandidati republikan për president të SHBA-së, Donald Trump, i tha Fox News Radio se ai nuk do të largonte shtetin nga NATO, por përsëriti qëndrimin e tij se dëshiron që shtetet e aleancës të paguajnë më shumë.
“Vetëm dua që të paguajnë faturat. Ne po mbrojmë Evropën dhe ata po na shfrytëzojnë shumë keq”, tha ai.
Gjatë samitit në Uashington, disa zyrtarë të lartë evropianë u takuan gjatë samitit me këshilltarin kryesor të Trumpit për politikën e jashtme, teksa paqartësia lidhur me të ardhmen e udhëheqjes amerikane ka ngritur shqetësime në mesin e aleatëve.
Trump në të kaluarën kishte shtyrë republikanët në Kongresin amerikan që të vononin miratimin e një pakete të madhe të ndihmës për Ukrainën, por më vonë ai ndryshoi qëndrim.
Sa i përket të ardhmes së Ukrainës në aleancë, në deklaratën e NATO-s u tha se aleanca do të vazhdojë të mbështesë Ukrainën “në rrugën e saj të pakthyeshme të integrimit të plotë euroatlantik, përfshirë anëtarësimin në NATO”./REL/