Author: ATVLive

Kryetari i Vushtrrisë Ferit Idrizi, ka vizituar kompaninë “Leoni Dekor”, ku për herë të parë ka filluar me mësimin dual për nxënësit e shkollës së mesme të lartë “Lutfi Musiqi”, raporton EO.

I pari i Vushtrrisë ka parë nga afër se si po shkon puna e nxënësve në këtë kompani.

Ai ka thënë se mësimi dual është bërë për herë të parë në Vushtrri, ku nxënësit e kanë mundësinë që përveç mësimit teorik të kenë edhe atë praktikë.

Përveç kësaj, Idrizi ka njoftuar se nxënësit e kanë të hequr shujtën ditore, sigurimin shëndetësor dhe një stimulim material.

“Jam shumë i lumtur kur i kam parë nxënësit dhe kemi filluar mësimi dual. Një koncept bashkëkohor i përgatitjes të rinjve për tregun e punës. Atë që e pamë në terren e pamë që nxënësit ishin shumë të kënaqur me arritjet e tyre të deritashme. Faton Hyseni është i pari që na ka hapur dyert këtyre nxënësve për tu përgatitur profesionalisht në vendin e punës me të gjitha kushtet qysh i kanë të rinjtë në vendet Perëndimore në vendet e zhvilluara, si në Suedi ose Finlandë. E kanë sigurimin shëndetësorë, shujtën ditore të ushqimit dhe një stimulim material”, ka thënë Idrizi.

Drejtori i kompanisë “Leoni Dekor”, Faton Hyseni, ka thënë se ky proces është i nevojshëm për shkak se nxënësit iu ofrohen kushte më të mira në të ardhmen.

“Dua ta falënderoj kryetarin për mundësinë e mësimit dual për nxënësit që janë duke e kryer praktikën këtu. Jemi shumë të kënaqur me këtë proces është proces shumë i nevojshme nxënësit janë duke e kryer këtë trajtim dhe janë duke u avancuar dhe shpresoj që në të ardhmen do të jenë bartës të trajtimit në kompaninë tonë po edhe kudo që e gjejnë vetën. Prej kryetarit kemi pasur shumë mbështetje ka qenë i nevojshëm ky proces dhe kryetari e ka mbështet”, u shpreh Hyseni.

Kurse instruktori i kësaj kompanie, Riad Sejdiu ka thënë se të punësuar në këtë kompani janë 7 nxënës dhe në të ardhmen pret të ketë rritje të numrit.

“Jemi duke zhvilluar mësimin dual për nxënësit e shkollës së mesme, për momentin jemi duke punuar në kompaninë me nxënësit. Me të vërtetë është bërë një punë e madhe, me këtë marrëveshje që arrit me shkollën dhe kompaninë nxënësit janë ngrit dhe zhvilluar në mënyrë profesionale, teorike dhe praktike. Për momentin janë shtatë nxënës, pasi që është hera e parë që është punuar besojmë që më vonë të rritet numri”, ka deklaruar Sejdiu.

Nxënësja Leonita Deliu, është shprehur falënderues ndaj kryetarit për mundësinë e praktikës.

“E falënderojmë kryetarin për mundësinë, jam në klasë të 10 jam në praktikë, po kalojmë shumë mirë me të gjithë. Është hera e parë që po punojmë nga shkurti kemi filluar të punojmë tani janë bërë gjashtë muaj punë”.

Kurse nxënësi, Valmir Ismaili ka njoftuar që kalon shumë mirë në punë për shkak të kushteve të mira të ofruar nga kryetari.

“Jam në shkollën e mesme teknike, në profesionin e zdrukthëtarisë. Ndihemi shumë mirë që shkolla na ka ofruar. Këtu kam mësuar shumë, kemi shujtën ditore, sigurimin shëndetësor, kushtet janë shumë të mira”, tha Ismaili.

Ish-komandanti i UÇK-së në zonën e Llapit, Rrustem Mustafa, ka reaguar pas deklaratave të krerëve të shtetit për siç kanë deklaruar ata, rrezikun për luftë që i kanoset vendit nga Serbia.

Sipas tij, kjo është një “udhë pa krye”, pasi konsideron se lidërët shtetërorë po “zbaviten” me “përralla sikur për fëmijë.”

Mustafa, përmes një statusi në Facebook, ka thënë se është e çuditshme sesi një çështje kaq serioze të mos ketë konfirmimin nga organizata ndërkombëtare sikurse është NATO.

“Një udhë pa krye!

Kur liderët institucional marrin në dorë “këmbanat e luftës” dhe na paralajmërojnë për ditët e luftës që po na presin, të gjithë duhet të ngrihemi në këmbë. Por, kur liderët tanë, zbaviten me këso kërcënime sikur të përralla për fëmijë, Pedri dhe Ujku i cili gënjente fshatarët me thirrjen “ndihmë, është ujku”, atëherë këta liderë janë për keqardhje.

Si ka mundësi, që për një çështje kaq serioze, ekzistenciale, pra se po rrezikohemi nga një luftë, të mos ketë konfirmim nga organizata më e fuqishme ushtarake në këtë rruzull tokësor -NATO- e cila është prezente në vendin tonë dhe ka për mision ta garantojë paqen dhe sigurinë në këtë pjesë të Ballkanit e të Evropës. Si ka mundësi, që për një çështje kaq serioze, ekzistenciale, pra se po rrezikohemi nga një luftë, t’i paralajmërosh qytetarët, por mos ta diskutosh fare këtë kërcënim me Kuvendin e Kosovës, si organi i vetëm Kushtetues për shpalljen e gjendjes emergjente apo gjendjen e luftës. Si ka mundësi, që për një çështje kaq serioze, ekzistenciale, pra se po rrezikohemi nga një luftë, të gjesh kohë “ta korrësh grurin” në arat e Malishevës.

Të gjithë po e kuptojmë se plasimi i këtyre kërcënimeve tek qytetarët e Kosovës ka për qëllim të krijojë pasiguri dhe ankth. Ky Pedri ynë që po na lajmëron se është ujku, a i shkon në mendje se si ndihen qytetarët tanë, e veçanërisht ata që janë afër kufirit me ujkun, pra ata të pjesës veriore të Kosovës kur dëgjojnë këto paralajmërime ogurzeza?

Të jesh lider i një institucioni shtetërorë dhe të argëtohesh me këso “kërcënime” është e pafalshme.

Qytetarët e Kosovës dhe Aleatët e saj më të fuqishëm në botë të cilët mbajnë 50% të ekonomisë botërore, i kanë treguar vendit tonë fqinj se ëndrra e saj për ri-kthim në Kosovë është e parealizueshme.”

Ai ka thënë se Serbia tashmë e di se çka nënkupton të kesh një armik si Kosovën.

“Fqinji ynë, tashmë e di se çka nënkupton të kesh një armik si Kosovën…

Me luftën tonë dhe me mbështetjen e Aleancës Perëndimorë kemi fituar në rrethana shumë më të vështira sesa që jemi sot. Andaj, ju them qytetarëve të Kosovës, në veçanti atyre që jetojnë në veri të vendit tonë, si dhe të gjitha komuniteteve të tjera, që të qëndrojnë të qetë dhe të vazhdojnë ta zhvillojnë bashkëjetesën sepse demokracia, paqja, siguria e zhvillimi ekonomik është e ardhmja ynë në këtë shtetin e ri që e mban emrin Republika e Kosovës.”

Partia Demokratike e Kosovës ka reaguar pas vendimit të Qeverisë Kurti për të t’i ndarë 21 milionë euro kompanisë “Contour Global” si epilog i procesit të arbitrazhit pas dështimit të ndërtimit të termocentralit, raporton EO.

Anëtari i kryesisë së PDK-së, Bernard Nikaj në një konferencë për media tha se përtej humbjes financiare, menaxhimi i munguar dhe i dështuar i këtij projekti, dëshmon se Qeveria ka dështuar të ndërtojë një vizion të qartë dhe të qëndrueshëm për adresimin e nevojave të qytetarëve të Kosovës për furnizim me energji.

“Dje Qeveria e Republikës së Kosovës vendosi që të paguajë 21 milion euro, si pasojë e humbjes së procesit të Arbitrazhit ndaj Kompanisë Coutour Global. 21 milion euro janë të barabarta me 42 mijë paga mesatare në Kosovë”, theksoi ai.

Nikaj rikujtoi se Qeveria nuk ka arritur të përfundojë projektet e nisura, e as nuk ka nisur ndonjë projekt të ri në këtë fushë.

“Përveç projektit të Termocentralit të Ri, qeveria e udhëhequr nga VV ka anuluar edhe projektin e gazit natyral, projekt i cili ishte nisur dhe përkrahur nga MCC, por edhe nga donatorë të tjerë siç janë EBRD dhe Komisioni Evropian. Rezultat i të gjitha këtyre dështimeve janë çmimet e larta të energjisë sot, të cilat qytetarët tanë i përjetojnë çdo ditë e çdo muaj në faturat e tyre, por edhe një pasiguri e skajshme e furnizimit posaçërisht në muajt e dimrit”, shtoi ai

Ndërsa, anëtari i tjetër i kryesisë, Blerand Stavileci ka thënë se dështimi këtij projekti është një dëm i madh që i është shkaktuar buxhetit dhe ekonomisë së vendit tonë.

“Gjendja në të cilën jemi, e mbi të gjitha, rritja e tarifave dy herë brenda dy viteve, edhe pse asnjë megavat nuk iu shtua sistemit, na tregon që dështimin e qëllimshëm të këtij projekti nga kjo qeveri, përveç parave të paguara nga buxheti i taksapaguesve do ta paguajmë edhe shumë vite më pas, sepse asnjë nga projektet aktuale nuk e zgjidhë ngarkesën e furnizimit bazë dhe siguria e furnizimit do të jete sfida më e madhe dhe problem i vazhdueshëm i sistemit dhe sektorit, e kjo do të thotë që do të vazhdojmë të jemi thellësisht e tmerrësisht të varur nga importi”, shtoi ai.

Stavileci tha se qytetarët e Kosovës kanë nevojë për një vizion të qartë, i cili siguron qëndrueshmëri energjetike me çmime të përballueshme.

“Të gjitha vonesat, mospuna dhe paaftësia e kësaj qeverie fatkeqësisht do të faturohen në kurrizin e qytetarëve, në dëm të së ardhmes së tyre. Ekonomia e vendit tonë dhe qytetarët e këtij vendi kanë nevojë për energji dhe ekonomi të qëndrueshme dhe çmime të përballueshme në mënyrë që të kenë standard të mirë jetese. Fatkeqësisht kjo nuk mund të pritet nga qeveria e udhëhequr nga VV”, theksoi Stavileci.

Kryetari i Partisë Demokratike të Kosovës, Memli Krasniqi, ka shkruar se në Kuvendin e Kosovës kanë miratuar Deklaratën për Mbështetjen e Rezolutës së Asamblesë së Përgjithshme të Kombeve të Bashkuara për Ditën Ndërkombëtare të Reflektimit dhe Përkujtimit të Gjenocidit të vitit 1995 në Srebrenicë.

Ai thotë se kjo u bë për të dërguar një mesazh të qartë se nuk do të harrojnë se si regjimi kriminal serb, 29 vite më parë kishte kryer gjenocid në Srebrenicë, duke vrarë 8372 civil të paarmatosure.

“Fatkeqësisht, edhe sot, qindra kriminelë serbë që sollën shumë vdekje e shumë dhembje në tërë Ballkanin, vazhdojnë të enden të lirë, pa marrë asnjëherë dënimin e merituar”, ka shkruar Krasniqi.

“Kriminelët kthehen në vendin e krimit shpesh sepse nuk janë ndëshkuar. Kurti dhe e gjithë klika e tij që kanë ndëshkuar kompaninë amerikane “Contour Global”, janë kriminelë. E pse kthehen këta në vendin e krimit dhe sa ishin të shpejtë me i pagua ato 21 milionë euro të rimbursimit, po se është projekt i tyre. Kurti e gjuan gurin e vjedh popullin e Kosovës”.

Kështu, ka deklaruar kryetari i Aleancës për Ardhmërinë e Kosovës, Ramush Haradinaj në një konferencë për media.

Ai, ka thënë se Kosova në tre vitet e fundit ka blerë rreth 500 milionë euro rrymë të shtrenjtë dhe ia ka faturuar qytetarëve të Kosovës duka ua rritur çmimin e energjisë elektrike dy herë.

“Investimi i “Contour Global”, prej 1.3 miliardë dollarë, ka qenë investimi më i madh i paraparë e i kontraktuar në Kosovë që nga shpallja e pavarësisë së Kosovës…Termocentrali i ri “Kosova e Re”, prej 500 megavateve, do ti jepte Kosovës stabilitet dhe pavarësi të përhershme energjetike me çmime shumë më të ulëta sesa këto që janë në treg pas vitit 2021… Kosova, do të fitonte qindra miliona euro për shkak se çmimi i megavatëve të prodhuar në Kosovë do të ishte shumë më i lirë sesa çmimi i megavatëve në tregjet globale. Kosova do të shiste energji, do të fitonte qindra miliona euro. Me dështimin e këtij projekti, Kosova ndër vite, në tre vitet që shkuan ka blerë rreth 500 milionë euro rrymë të shtrenjtë dhe atë ia ka faturuar qytetarëve të Kosovës, duke ua rritë çmimin, pra Qeveria Kurti dy herë.”, ka thënë Haradinaj.

Ramush Haradinaj, derisa ka folur për rritjen e çmimit të energjisë për siç ka thënë ai nga “Qeveria Kurti”, ka përmendur edhe ambasadorin Martin Berishaj.

Sipas Haradinajt, Kosova vazhdon të mbetet e varur për energji nga ajo që prodhohet në Stanari të Bosnjës por edhe furnitorëve të tjerë duke përfshirë edhe GEN-in.

“Në vitin 2016 u lëshua në prodhim në Stanari të Bosnjës termoelektrana Hamoviq, kompania EFT e pronarit Vuk Hamoviq është partnere në biznes me GEN-in serb dhe GEN-i serb është i njohur si partner për furnizim me energji për ambasadorin tonë që ende është ambasador Martin Berishaj e i cili është donator i Vetëvendosjes në zgjedhje. Edhe sot e kësaj dite Kosova vazhdon të mbetet e varur nga energjia e Stanarit por edhe furnitorëve tjerë edhe GEN-it dhe vazhdon me ble energji prej tyre edhe pse ka ndodhë pavarësimi energjetik pas katër viteve tash të Qeverisë Kurti ende e paguajmë energjinë e humbur në veri dhe suksesi më i madh ekonomik dhe jo vetëm ekonomik edhe gjeopolitik, edhe i sigurisë mbane në mend prej Serbisë dhe Rusisë është pikërisht dështimi i investimit në energji të termocentralit prej 500 megavatëve me teknologji të re, investim amerikan”, ka thënë Haradinaj.

Haradinaj, ka deklaruar se “kriminelët” kthehen shpesh në vendin e krimit sepse nuk ndëshkohen.

“Kriminelët kthehen në vendin e krimit shpesh sepse nuk janë ndëshkuar, Kurti dhe e gjithë klika e tij që kanë dështuar “Contour Global”, janë kriminelë. Ne ende sot furnizohemi prej termocentraleve që janë mbi gjysmë shekulli të vjetra, që më shumë prodhojnë helm se energji fatkeqësisht dhe jo vetëm kaq por vazhdojnë me ble energji pikërisht prej atyre që fola. E pse kthehen këta në vendin e krimit dhe sa ishin të shpejtë me i pagua ato 21 milionë euro të rimbursimit, po se është projekt i tyre. Kurti e gjuan gurin, e e vjedh popullin e Kosovës, dy herë ka rritur çmimin e energjisë”, është shprehur ai.

Qeveria e Kosovës të mërkurën ka marrë vendim që t’i paguaj mbi 21 milionë euro dëmshpërblim kompanisë amerikane “Contour Global”, pas humbjes në Gjykatën Arbitrazhit Ndërkombëtar vitin e kaluar.

Në një takim me Përfaqësuesin e Lartë të BE-së për Politikën e Jashtme dhe Sigurinë Josep Borrell në Uashington, D.C., Ministri i Jashtëm i Ukrainës Dmytro Kuleba diskutoi përshpejtimin e furnizimit me armë dhe municione në Ukrainë.

Këtë e tha kreu i diplomacisë ukrainase në një postim në platformën e mediave sociale X, transmeton Ukrinform.

“Gjatë takimit tonë, Josep Borrell dhe unë diskutuam mënyrat për të përshpejtuar dërgimin e armëve dhe municioneve në Ukrainë, veçanërisht të mbrojtjes ajrore, pas sulmeve ajrore të intensifikuara të Rusisë”, shkroi Kuleba.

Ai shtoi se ai theksoi rëndësinë e rritjes së mëtejshme të prodhimit industrial të mbrojtjes evropiane dhe përsëriti thirrjen e Ukrainës për qeveritë e BE-së që të investojnë drejtpërdrejt në prodhuesit ukrainas të armëve.

“Kompanitë ukrainase mund të prodhojnë më shumë nëse kanë më shumë burime në dorë dhe investimi në to është mënyra më e shpejtë për të siguruar armë shtesë për luftëtarët tanë të vijës së parë”, theksoi ministri.

Palët diskutuan gjithashtu përdorimin e aseteve të palëvizshme të Rusisë për përfitimin e Ukrainës dhe i kushtuan vëmendje të veçantë ndihmës së vazhdueshme të BE-së në rimëkëmbjen e Ukrainës.

Kuleba falënderoi BE-në për gatishmërinë e saj për të ofruar pajisje shtesë të energjisë, si dhe për të ndihmuar në rikuperimin e spitalit të dëmtuar të fëmijëve Okhmatdyt në Kiev.

Siç raportoi Ukrinform, gjatë seancës së parë plenare të Samitit të Uashingtonit, krerët e shteteve dhe qeverive të NATO-s diskutuan se si ta afrojnë Ukrainën me anëtarësimin në NATO dhe ta bëjnë këtë rrugë të pakthyeshme.

Kryeministrja Giorgia Meloni ka kërkuar që një italian të emërohet i dërguari i ri special i NATO-s për frontin e saj jugor gjatë samitit të liderëve të vendeve që i përkasin aleancës në Uashington, tha zëvendëskryeministri dhe ministri i Jashtëm Antonio Tajani.

“Emërimi i të dërguarit të special të NATO-s për krahun jugor është një vendim i rëndësishëm,” tha Tajani në margjinat e samitit.

“Është diçka për të cilën Italia luftoi dhe ne besojmë se është e drejtë që një italian të zgjidhet për atë rol”, i tha kryeministrja (Sekretarit të Përgjithshëm të emëruar të NATO-s) Mark Rutte sot.

“Unë mendoj se është e drejtë duke pasur parasysh rolin që ka Italia, përfshirë numrin e personelit ushtarak që ka në misionet e NATO-s.

Do të ishte një vlerësim për vendin tonë”./ANSA/

Sipas raportimeve të së enjtes, reshjet e dendura të shiut që filluan të mërkurën në mbrëmje vazhduan gjatë gjithë natës, duke çuar në përmbytje të përhapura në disa rajone të Gjermanisë.

Në shtetin e Hesse, policia iu përgjigj shumë vendeve të prekura nga reshjet e dendura dhe përmbytjet. Në Diezenbach, një nënkalim u mbyll përkohësisht për shkak të përmbytjeve, siç raportojnë mediat gjermane.

Qyteti i Hanau dhe rajoni Main-Kinzig në Hesse panë rrugë të përmbytura, puseta të tejmbushura dhe pemë të shumta të rrëzuara, duke komplikuar më tej kushtet lokale.

Në Bavari, veçanërisht në Aschaffenburg, shirat e dendur përmbytën rrugët dhe bodrumet e ndërtesave.

Ndërkohë, në shtetet gjermane lindore të Saksonisë, qytete si Gorlitz dhe Bautzen u përballën gjithashtu me përmbytje të rrugëve dhe përmbytje të bodrumeve. Në Bautzen, një tren u përplas me pemët e rrëzuara që pengonin shinat.

Në kryeqytetin Berlin, bodrumi i arkivave të Bibliotekës Qendrore dhe Shtetërore u përmbyt pasi një tub kullimi i ujërave të shiut shpërtheu nën tendosjen e reshjeve të mëdha. Stafi i bibliotekës punoi urgjentisht, duke formuar brigada për të hequr ujin dhe për të parandaluar dëmtimin e qindra mijëra librave të ruajtura në arkiv.

Jonas Fansa, drejtor i bibliotekës, përshkroi situatën për televizionin RBB, duke theksuar shkallën e paprecedentë të përmbytjeve brenda ndërtesës së tyre.

“Nuk kam parë kurrë një vëllim të tillë uji në objektin tonë”, tha Fansa./AA/

Partia Demokratike e Kosovës ka propozuar mocion, ku përmes rezolutës i obligohet qeverisë të tërhiqet nga tri projektligje. Opozita vlerëson se projektligji për Këshillin Prokurorial i Kosovës, për Komisionin e Pavarur të Mediave dhe për Zyrtarët Publik është në kundërshtim me frymën kushtetuese në Kosovë. Me këtë nuk është pajtuar partia në pushtet, Lëvizja Vetëvendosje, e cila tha se të tri këto projektligje kanë ndjekur të gjitha procedurat. Ky mocion nuk ka kaluar, për votuan 23 deputetë, kundër 53 dhe një abstenim.

Shefi i Grupit Parlamentar të Partisë Demokratike të Kosovës, Abelard Tahiri kërkoi që përmes një rezolute të obligohet qeveria për tërheqjen e tri projektligjeve.

“Propozojë një mocion përmbajtjesor i cili kërkon ndryshimin e rendit të ditës të kësaj seance. Ne si GP i PDK-së kërkojmë që përmes një rezolute ta obligojmë Qeverinë e Kosovës për tërheqjen e tri projektligjeve të cilat ne vlerësojmë që janë në kundërshtim me frymën kushtetuese. Procedimi sot i projektligjit për Këshillin Prokurorial të Kosovës, procedimi i ligjit për Këshillin e Pavarur të Mediave dhe procedimi i ligjit për Shërbyesit Civil, janë tri projektligje në kundërshtim me frymën kushtetuese në vendin tonë. Ne si opozitë nuk duam që thjesht ta kemi një betejë politike në këto tri projektligje, mund të punojmë se bashku sidomos në ligjin i cili e cenon fjalën e lirë dhe mediat e lira në vendin tonë”, deklaroi ai.

Kryetari i grupit të Lidhjes Demokratike të Kosovës, Arben Gashi tha se vlerësojnë se mocioni për tërheqjen e këtyre tri projektligjeve është i arsyeshëm pasi janë anti-kushtetuese.

Gashi tha se duhet të largohen nga rendi i ditës Ligjin për Këshillin Prokurorial të Kosovës, Ligjin për Komisionin e Pavarur të Mediave dhe projektligjin për zyrtarët publik, pasi do të ishin në vazhdën e ligjeve antikushtetuese.

“Do të ishin tri projektligjet e radhës të cilat do të ishin me përmbajtje anti-Kushtetuese dhe si Kuvend i Kosovës nuk do të duhej të lejojmë të ndodh nën përkujdesjen dhe vetëdijen tonë” , tha ai.

Ndërkaq, shefi i Grupit Parlamentar të Aleancës për Ardhmërinë e Kosovës, Besnik Tahiri ka dhënë detaje për tri ligjet të cilat opozita kërkoi që të mos votohen, duke theksuar dëmet që mund të jenë në të ardhmen.

“Si opozitë mendojmë se kjo seancë mund të jetë si më e dëmshmja e kësaj legjislature për shkak se kjo seancë siç po shihet ka mundësi t’i miratoj tri ligje të cilat në esencë kanë vetëm një qëllim, kapjen e institucioneve të pavarura, të cila mbikëqyren nga bordet respektive dhe do të krijojnë dëme afatgjate”, tha ai.

Deputeti i Lëvizjes Vetëvendosje, Adnan Rrustemi u shpreh i bindur se tri këto projektligje përmbushin standardet më të mira ndërkombëtare dhe se janë përgjigje ndaj fenomeneve shqetësuese në Kosovë.

“Nuk mund t’i kërkohet sponzorizuesit përmes rezolutës tërheqjen e këtyre projektligjeve nga rendi i ditës. Për çka ne si grup parlamentar jemi kundër pa dyshim dhe qëndrojmë mbrapa qoftë propozimeve nga qeveria, qoftë nga amendamentet që janë bërë nga komisionet funksionale. Të tri projektligjet kanë ndjekur secilën procedurë në kuptimin e dëgjimeve publike, diskutimet me palët e interesit dhe secili deputet e ka pasur mundësinë që të bëjë vërejtje, sugjerime. Është e pashembullt se si deputetët e opozitës nuk japin asnjë kontribut në procedurat mes dy leximeve, nuk bëjnë asnjë vërejtje, asnjë kundërshtim, të mos them që nuk bëjnë asnjë propozim dhe ndërkohë vijnë në seancë plenare nëpërmjet një mocioni në mënyrë të përmbledhur kërkojnë që tri projektligje të tërhiqen nga rendi i ditës”, përfundoi ai.