Author: ATVLive

Ushtria izraelite thotë se pengu izraelito-amerikan Edan Alexander është kthyer në Izrael pasi u lirua nga Hamasi.

Alexander, 21 vjeç, po shërbente në një njësi elitare këmbësorie në kufirin me Gazën kur u kap nga Hamasi gjatë sulmeve të 7 tetorit, shkruan BBC, transmeton KosovaPress.

Nga 251 pengjet, 59 mbeten në Gaza, deri në 24 prej të cilëve besohet se janë gjallë.

Izraeli thotë se do të ketë “një korridor të sigurt” në Gaza për lirimin e Aleksandrit, por nuk është zotuar për një armëpushim.

Vizita e Presidentit Donald Trump në Lindjen e Mesme fillon të martën – ai e quan lirimin e planifikuar të Aleksandrit “lajm të shkëlqyer”.

Një zyrtar i lartë palestinez i thotë BBC-së se njoftimi i Hamasit është menduar si një gjest vullneti të mirë para mbërritjes së Trump.

Hamasi gjithashtu thotë se lirimi ka për qëllim të lehtësojë një marrëveshje ndihme – Gaza ka qenë nën një bllokadë izraelite për më shumë se dy muaj.

Në rrjetin social TikTok ka nisur një fushatë denigruese ndaj gjyqtares së Gjykatës Themelore në Prishtinë, Violeta Namani Hajra, e cila aktualisht është duke udhëhequr një rast të ndjeshëm gjyqësor ndaj Zoran Vukotiqit, i akuzuar për krime lufte gjatë luftës në Kosovë.

Në një nga videot që po qarkullon në këtë platformë, gjyqtarja kërcënohet dhe etiketohet si “gjyqtare e rreme”, një pretendim që synon të njollosë figurën e saj publike dhe të cenojë kredibilitetin e saj profesional.

Kjo video qe përfshinë kërcënime dhe sulme të tjera drejt shtetit të pavarur të Kosovës është publikuar nga një përdorues i TikTokut me emrin ‘MiljanRakic15’, i cili vazhdimisht poston video me përmbajtje të tilla, nxitës, ofenduese dhe denigruese për zyrtarët shtetërorë të Kosovës. Ai gjithashtu sjell video me shtrembërim të historisë sikurse në rastin e gjyqtares Namani Hajra e cila është e angazhuar në drejtimin e njërit prej proceseve më delikate që lidhen me krimet e luftës në Kosovë, çështje që kanë ndjeshmëri të lartë shoqërore dhe historike.

Instituti për krimet e kryera gjatë luftës në Kosovë organizoi forum diskutimi me temën: Ushtarët shqiptarë të vrarë në Armatën e ish-Jugosllavisë, raporton Ekonomia Online.

Drejtori i këtij instituti, Atdhe Hetemi, theksoi rëndësinë e dokumentimit dhe kërkimit të drejtësisë për rastet e identifikuara të vrasjeve të ushtarëve shqiptarë në Armatën e Ish-Jugosllavisë .

“Bëjmë një thirrje për ndërgjegjësim, dokumentim dhe përgjegjësi. Kjo seri forumesh ka për qëllim të sjellë në vëmendje kapituj që janë heshtur që shpesh janë anashkaluar nga kujtesa. Është përpjekja jonë për të krijuar një kujtesë të thellë dhe të qëndrueshme. Djemtë shqiptarë, shumica moshë e re, nuk ranë në lufte, por u vranë në paqe. Ky forum është hapi i parë i projektit që të zbulojë të vërtetën dhe është përpjekje për drejtësi. Instituti ynë nuk synon vetëm të përkujtojë, por edhe të ndërtohet një platformë institucionale”, tha Hetemi.

Kryeministri në detyrë, Albin Kurti, tha se kjo është një dëshmi se institucionet nuk i harrojnë viktimat.

“Jemi bashkë në këtë forum për ushtarët e vrarë në Armatën e Jugosllavisë. Kjo histori është e shtrirë në një periudhë të gjatë. Rasti i parë ishte në korrik të vitit 1951, ku u vra ushtari i parë. Ai ishte Ramadan Gashi. Sot e asaj dite nuk e kanë marrë trupin dhe asnjë shpjegim. Vit pas viti u vranë ushtarë shqiptarë. Institucionet e Kosovës i njohin ata me emër, historitë e rasteve të tyre dhe krimet e kryera nga shteti i Serbisë. Kërkohet drejtësi. Janë 135 raste që do të evidentohen. Këto janë njëra nga arsyet që është bërë ky institut”, tha Kurti.

Drejtoresha e Bibliotekës Kombëtare “Pjetër Bogdani” Blerina Rogova- Gaxha, theksoi nevojën për ndërtimin e kujtesës institucionale.

“Ajo që jemi përpjekur është rindërtimi i historisë, të memorizojmë dhe të risjellim momentet kyçe, sepse kështu kuptojmë historinë. Politika shtypëse dhe diskriminuese serbe nuk kishte target vetëm shpirtin e tyre, por nënshtrimin. Kjo është thirrje për sensibilizim, thirrje për drejtësi për të gjitha viktimat. Jemi dëshmitarë moralë që kjo ndihmon mobilizimin e kujtesës në formë institucionale. Duhet të punojmë që jeta dhe vdekja e tyre të mos mbeten vetëm numra dhe statistikë. Ato duhet të dokumentohen”, tha Rogova- Gaxha.

Ish- i burgosuri politik, Riza Xhakli, dha dëshmi personale për padrejtësitë e përjetuara në Armatën e ish –Jugosllavisë pas montimit të rastit të Aziz Kelmendit në kazermën e Paraçinit.

“Jemi njohur nga afër. Ishim bashkë në shërbim ushtarak. Ishte djalë i qetë, i mençur. Ishte student shembullor. Sot jam për të dëshmuar se jam njëri nga ata që u dënua padrejtësisht “, tha Xhakli.

Gani Morina nga Këshilli i familjarëve të ushtarëve të vrarë në Armatën e ish -Jugosllavisë tha se këto janë plagë të hapura, që kërkojnë drejtësi dhe kujtim të denjë.

“Jemi për të trajtuar një dhimbje krenare. Mbarimi i Luftës së dytë botërore për ne nuk solli liri. U mbushën burgjet me ushtarë, njerëzit vriteshin dhe pushkatoheshin. Vrasjet selektive e shpërfaqnin fytyrën kriminale, siç e kishte Jugosllavia”, tha Morina.

Gjykata Themelore në Gjakovë, ka shpall aktgjykim dënues ndaj të pandehurit Z. R., shtetas i Republikës së Kosovës, i cili sipas aktakuzës së Prokurorisë Themelore në Gjakovë, akuzohet për “Rrezikimi i trafikut publik”.

Sipas komunikatës, gjyqtari Driton Sadiku, pas mbajtës së shqyrtimit gjyqësorë, të pandehurin e shpalli fajtorë dhe i shqiptoi dënim me burgim në kohëzgjatje dy vjet dhe dënim plotësues, ashtu që të akuzuarit i merret leja e vozitjes, si dhe i ndalohet marrja e lejes së re të vozitjes në kohëzgjatje prej dy vjet, i cili dënim rrjedh nga data kur ky aktgjykim të bëhet i formës së prerë.

“Koha e mbajtur në burg nuk llogaritet në kohëzgjatjen e dënimit plotësues. Pas skadimit të këtij afati i akuzuari mund ta marrë lejen e vozitjes sipas kushteve të përgjithshme të parapara për marrjen e lejes përkatëse të vozitjes. I pandehuri akuzohet se “ me datën 17 mars 2024, në fshatin Skivjan, Komuna e Gjakovës, nga pakujdesia rrezikon sigurinë e trafikut publik dhe me këtë i shkakton vdekjen tani të ndjerit, B. D., në atë mënyrë që natën kritike derisa i pandehuri Z. R. ishte duke drejtuar automjetin e tipit “Volvo ”, me të arritur në vendin e lartcekur duke mos e përshtatur shpejtësinë e lëvizjes si dhe kushteve e rrethanave në rrugë dhe pa u siguruar mirë hyn në tejkalim të automjetit “Audi”, të cilën e drejtonte e dëmtuara, E. J., ku në përball kalim ishte i ndjeri B. D., duke drejtuar automjetin e tipit “Vë Golf”, dhe në pamundësi që t’i shmanget aksidentit, me pjesën e parë ballore të automjetit të tij e godet automjetin e të ndjerit në pjesën e parë dhe më pas nga inercioni i goditjes vetura e të pandehurit përplaset në pjesën e pasme të veturës së të dëmtuarës E. J., me ç’ rast përveç dëmeve materiale të shkaktuara në dy automjete, të nesërmen me datën 18 mars 2024, në QKUK në Prishtinë, ndërron jetë tani i ndjeri B. D., ndërsa lëndime trupore pëson edhe vet i pandehuri.”, thuhet në njoftim.

Kundër këtij aktgjykimi, palët kanë të drejtë ankese në afat prej tridhjetë ditëve nga dita e pranimit të aktgjykimit në formë të shkruar.

Partia Demokratike e Kosovës ka konfirmuar pjesëmarrjen në takimin konsultativ me të gjitha partitë politike të thirrur nga Presidentja e Kosovës, Vjosa Osmani, për të enjten në ora 13:00.

Faton Abdullahu, zëdhënësI i PDK-së:

Po, Kryetari Memli Krasniqi ka pranuar ftesën për takim nga Presidentja Vjosa Osmani. Na vjen mirë që, ashtu siç ka propozuar PDK, po ndërmerren hapa institucionalë që shpresojmë se mund të jenë ndihmues për të dalë nga kriza politike dhe për të hapur rrugën drejt krijimit të institucioneve të reja.

Kryetari Krasniqi do të merr pjesë në takim, me shpresën që të gjitha partitë të marrin pjesë me konstruktivitet dhe duke e vendosur interesin e qytetarëve në radhë të parë. Kosova ka nevojë për institucione të reja sa më parë.

Aksionet globale janë rritur pasi SHBA-të dhe Kina ranë dakord të ulin tarifat për mallrat e njëra-tjetrës për 90 ditë, në një deeskalim të madh të luftës së tyre tregtare.

Tarifat amerikane për importet kineze do të bien nga 145% në 30%, ndërsa tarifat kineze për mallrat amerikane do të bien nga 125% në 10%, shkruan BBC, transmeton KosovaPress.

Është një ulje më e madhe se sa pritej, shkruan korrespondenti i BBC-së, – por 30% është ende një tarifë e lartë.

13 orë më parë u raportua se zyrtarë të lartë të administratës amerikane thanë se arritën një marrëveshje tregtare me Kinën pas dy ditë negociatash në Gjenevë.

Shtëpia e Bardhë njoftoi një “marrëveshje tregtare me Kinën” në një deklaratë sot, por nuk zbuloi detaje.

Marrëveshja u arrit më shpejt sesa prisnin shumica e vëzhguesve pasi tarifat prej njëqind e dyzet e pesë për qind të Donald Trump mbi importet kineze praktikisht ndaluan gjashtëqind miliardë dollarë në tregtinë vjetore midis dy ekonomive më të mëdha botërore, raporton KosovaPress.