ATV

Author: ATVLive

  • “Tre Vllaznit”, nga kjo e diel transmetohet nga ora 20:00 në ATV

    “Tre Vllaznit”, nga kjo e diel transmetohet nga ora 20:00 në ATV

    Seriali televiziv “Tre Vllaznit“, prodhim i televizionit ATV, nga kjo e diel vjen me një termin të ri transmetimi.

    Duke filluar nga e diela e 30 prillit, shikuesit do të kenë mundësi të ndjekin serinë e tyre të preferuar nga ora 20.00.

    Në të njëjtën kohë, do të bëhet edhe transmetimi në kanalin zyrtar të ATV-së në YouTube, duke mundësuar që secili episod i ri i serialit të arrijë në kohë reale te të gjithë shikuesit shqiptar kudo që ndodhet nëpër botë.

    Seriali “Tre Vllaznit” tashmë ka fituar një popullaritet të jashtëzakonshëm në mesin e publikut shqiptar duke grumbulluar miliona shikime në YouTube dhe rrjetet e tjera sociale, e duke e bërë atë serialin më të dashur te shqiptarët që jetojnë jo vetëm në Kosovë por edhe diasporë.

    Këtë të diel do të transmetohet episodi i 33-të i serialit “Tre Vllaznit”.

    Nën regji të Shkumbin Istrefit, me producent Zijad Mehic, ngjarja që zhvillohet në këtë serial tregon jetën e tre vëllezërve që jetojnë së bashku në një apartament në Prishtinë, me aktorët: Ilir Tafa (Bajrami) në rolin e vëllait të madh, Valmir Krasniqi (Besimi) në rolin e vëllait të dytë dhe Lum Veseli (Blini) në rolin e vëllait të vogël.

    Secili nga këta vëllezër e përfaqëson një brez dhe një koncept të vëllazërisë në mënyrë të ndryshme nga tjetri. Vëllai i madh mban bindjet nga vitet e 50’ta dhe ka nostalgji për komunizmin, ku shpesh tregon paaftësi dhe sjellje mashtruese. Vëllai i dytë është një pseudo producent muzikor me një stil urban, ndërsa vëllai i vogël është një super-student që shpesh përplaset me botën paralele të të dy vëllezërve të tij më të mëdhenj.

    Me gjithë suksesin e deritashëm, seriali “Tre Vllaznit” është bërë edhe një trend kulturor, duke kapur vëmendjen dhe zemrat e audiencës shqiptare në të gjithë botën me portretin e tij unik të dinamikave të një familjeje problematike që jeton në Prishtinë.

    Përveç tre vëllezërve, ky serial pasurohet edhe nga një kastë tjetër gjigante e aktorëve shumë të njohur për publikun shqiptar, si: Edita Dula, Teuta Krasniqi, Flakron Aliu, Shengyl Ismaili, Sabri Fejzullahu, Basri Shala, Nëntor Fetiu, Fatos Kryeziu, Avni Hoti, Arber Salihu, Shpëtim Kastrati e shumë të tjerë.

    Në terminin e mëhershëm në orën 21.00, nga kjo e diel do të transmetohet emisioni 8a8 me Adelina Ismajlin. /atvlive.tv

  • ​Kurti: Mbështetja e grave në biznes fuqizon ekonominë e vendit

    ​Kurti: Mbështetja e grave në biznes fuqizon ekonominë e vendit

    Kryeministri i Kosovës, Albin Kurti është shprehur se fuqizimi i grave në biznes ndikon zhvillimin e ekonomisë në përgjithësi.

    Kurti këto komente i bëri në ceremoninë “Java e Pronësisë Industriale dhe Inovacionit”, e cila iu dedikua grave në Inovacion dhe Kreativitet dhe është organizuar nga Ministria e Industrisë, Ndërmarrësisë dhe Tregtisë.

    Ai u shpreh se gratë kanë dëshmuar që janë protagoniste, si ndërmarrëse e si punëtore e sot janë shumë aktive, prandaj janë të obliguar t’i mbështesin ato.

    Kurti po ashtu u shpreh se mundësia në financa për gratë nuk është vetëm fuqizim i grave në biznes, por fuqizim i ekonomisë në përgjithësi.

    “Ne detyrohemi dhe obligohemi t’i përkrahim ato, që janë në fillim të nismave të tyre, ato që janë në mes të një vështirësie biznesore, dhe t’i nxisim ato që kanë dëshirën e vullnetin. Qasja në financa, qofshin ato edhe të ulëta, është përcaktuese për pronën apo rritjen e biznesit, por edhe vetë përvojat e aftësitë e deri tek rezultatet finale. Ne duhet të sigurohemi për një fillim sa më të barabartë, sepse edhe rrugëtimi para këtij fillimi në shumicën e rasteve nuk ka qenë i barabartë. Shumica e tyre kanë pasur më shumë sfida gjatë përvojave jetësore e të karrierës e ne si qeveri jemi të vëmendshëm për këto dallime që në fëmijëri dhe jemi duke ndërhyrë kudo që është e mundshme…Ato që kanë zgjedhur rrugën e të bërit biznes, kanë zgjedhur guximin dhe ne duhet t’i përkrahim. Andaj, investimi në këtë drejtim është i domosdoshëm. Qasja në mjetet financiare për gratë që e duan punën, është edhe interes afatgjatë i ekonomisë së vendit tonë. Mundësimi në financa për to, nuk është vetëm fuqizim i grave në biznes, por fuqizim i ekonomisë në përgjithësi”, u shpreh Kurti.

    Ministrja e Industrisë, Ndërmarrësisë dhe Tregtisë, Rozeta Hajdari u shpreh se përfshirja e grave në studimet shkencore, por edhe si ndërmarrëse të suksesshme po lënë gjurmë në ekonominë vendore.

    Ajo tha se kjo armatë punëtoresh po përkrahet me politika të shëndosha edhe nga Qeveria e Kosovës.

    “Kohëve të fundit gratë e Kosovës po përzgjedhin drejtimet e studimit në shkencë, teknologji, inxhinieri e matematikë ku çdo ditë e më tepër ky numër po rritet. Gjithashtu, edhe si ndërmarrëse të suksesshme me kreativitetin dhe idetë inovatore ato po krijojnë po krijojnë dhe po lënë gjurmë të dukshme në ekonominë e Kosovës dhe duhet të themi edhe me një dozë krenarie meritore se këtë armatë punëtore qeveria e Kosovës dhe MINT e ka mbështetur dhe po vijon ta mbështes me politika të shëndosha e normativa ligjore e programe e skema përkrahëse financiare…Sot teksa shënojmë këtë ditë të rëndësishme për pronësi intelektual dhe inovacionin si faktor me ndikim të lartë për zhvillimin e ekonomisë dhe shoqërisë duhet theksuar se me globalizmin e ekonomisë dhe krijimin e lidhjeve të shpejta të transportit dhe teknologjisë së inovacioneve ku tregu është shumë konkurrues dhe ndryshon me shpejtësi është vendimtare të bëhemi bashkë për të nxitur kreativitetin dhe inovacionin tek ndërmarrësitë tanë“, tha ajo.

    Teksa ka listuar shumë nisma ligjore që kanë ndërmarrë si MINT, ministrja Hajdari theksoi se më 11 maj në Bruksel do të nënshkruhet marrëveshje e pjesëmarrjes në programin tregu i përbashkët i Bashkimit Evropian me vlerë 4.2 miliardë euro.

    “Çka është me rëndësi të ndaj me ju një lajm të mirë është se kemi filluar negociatat dhe përmbyllur për marrëveshjen e pjesëmarrjes në programin tregu i përbashkët i Bashkimit Evropian me gjithsej vlerë 4.2 miliardë euro ku shumë biznese tona të vogla e të mesme mund të aplikojnë për thirrje për përfitime si një mundësi të shkëlqyeshme që bizneset e inovatorëve mund të jenë përfitues për përmirësimin e konkurrueshmërisë së industrisë dhe kjo marrëveshje do të nënshkruhet më 11 maj në Bruksel”, theksoi ajo.

    Ndërsa, zëvendësministrja e Kulturës, Rinisë dhe Sportit, Daulina Osmani u shpreh se gratë janë shtyllë nxitëse e inovacionit dhe kreativiteti dhe këtë e kanë dëshmuar pavarësisht sfidave.

    “Gratë kanë dhënë kontribut të rëndësishëm në fushat të ndryshme të pronësisë intelektuale përkundër sfidave dhe vështirësive që ky sektor ka hasur ndër vite. Sot po nderojmë punën e rëndësishme të grave të profileve të ndryshme përfshirë këtu shkrimtare, regjisore, film-bërëse e sipërmarrëse që janë shtyllë nxitëse e inovacionit dhe kreativitetit…. Kemi përfunduar një proces shumë të rëndësishëm të reformimit të kornizës ligjore dhe rregullative në fushën e të drejtave të autorit për shkak të trendëve të reja dhe dinamikës që ndodh në sferën legjislative evropiane përkitazi me të drejtën e autorit…Projektligji për të drejtat e autorit është miratuar nga Qeveria e Kosovës dhe shumë shpejt pritet të miratohet edhe në Kuvendin e Kosovës”, theksoi ajo. /KP

  • Artpolis sjell edicionin e 11-të të Festivalit FemArt nën moton “Kalle Tutën”

    Artpolis sjell edicionin e 11-të të Festivalit FemArt nën moton “Kalle Tutën”

    Artpolis, përmes Festivalit FemArt, edhe sivjet pasuron skenën kulturore të Kosovës me aktivizëm artistik të nivelit botëror, krahas prezantimit dhe mbështetjes së skenës vendore dhe rajonale.

    Më 15-21 maj, 2023 në Prishtinë dhe Mitrovicë do të realizohet edicioni i 11-të i Festivalit Ndërkombëtar të Artisteve dhe Aktivisteve – FemArt, i cili vjen nën moton “Kalle Tutën”.

    “Kalle Tutën” vjen si thirrje për të flakur tutje tutën, me i dhënë mundësi të resë, guximit dhe dashnisë që të lindë.

    Guximi është parakusht që të mposhtim frikën. Për shumë gjatë na mësuan të heshtim, është koha të guxojmë të flasim. Do të flasim dhe do të kallim tutën guximshëm e me dashni edhe në edicionin e 11-të të Festivalit FemArt.

    “Më 15-21 maj, 2023 dhe çdo ditë tjetër do të flasim edhe për gratë që nuk dëgjohen, edhe për vajzat që ëndërrojnë. Kemi kaq shumë për të thënë përmes shfaqjeve teatrore, paneleve të diskutimit, ekspozitave, konferencave, performancave, punëtorive dhe këngëve e kërcimit”, thuhet në njoftim.

    “Arti dhe aktivizmi janë hapësira jonë e lirisë, e rrëfimit mbi jetën, kuriozitetit dhe magjepsjes sonë të pafund. Përmes artit tonë themi atë që mendojmë dhe besojmë, e përmes diversitetit tregojmë se kush jemi. Dallimet tona etnike, fetare, racore e gjinore përbashkohen rreth feminizmit tonë edhe në këtë edicion të FemArt. Kemi vullnet të rimarrim atë që na takon – jetën e përmbushur. Do ta bëjmë tash! Me guxim për çlirim”, thuhet tutje.

    Kalle tutën nga patriarkati! Kalle tutën e paragjykimit! Kalle tutën e dështimit! Kalle tutën nga gjithçka që të ndalon të lëvizësh. Mjaft kemi qëndruar një hap prapa! Bashkë e kallim tutën! Bashkë zhvendosemi një hap para!

    Prandaj, guxo të lëvizësh edhe në errësirën e natës. E nëse ke frikë të lëvizësh në errësirën e natës, së bashku e ndriçojmë qytetin! Guxo e kalle tutën për me i lënë vend dashnisë për veten dhe të tjerët!

    Gratë artiste do të bëjnë hapjen e Festivalit FemArt përmes shfaqjes “Fefu dhe Shoqet e Saj”, produksion i veçantë nga Artpolis dhe premierë në edicionin e 11-të të Festivalit. I gjithë ekipi në krijimin e kësaj shfaqje përbëhet nga artiste të dëshmuara të skenës teatrore kosovare, përfshirë këtu edhe Trupën Artistike Rezidente të Artpolis me regji të Arlinda Morinës.

    “Fefu dhe Shoqet e Saj” do të prezantohet më 15 maj nga ora 20:00 në Menzën Ramiz Sadiku.

    Ndër të tjera publiku në Kosovë do të ketë rastin të shikojë shfaqjet e prezantuara në Festivalin prestigjioz të Avignonit; “Jogging” nga Libani, dhe “Olympe Et Moi” nga Franca, me artistët e nivelit botëror Hanane Hajj Ali, Patrick Mons dhe Veronique Ataly.

    Përveç tyre, pjesë e FemArt do të jetë Trupa Artistike nga Izraeli të udhëhequr nga një prej producenteve më të njohura në botë, Yu Jingyi, dhe aktori dhe artisti multidisiplinar Yehezkel Lazarov. Përveç prezantimit të shfaqjes “The Superfluos Man – Oblomov” ata do të ndajnë përvojën dhe njohuritë e tyre përmes një punëtorie dhjetë ditore me artistë nga Kosova, duke krijuar kështu një urë lidhëse të rëndësishëm ndërmjet dy vendeve duke bashkëpunuar me artistët e Trupës së Artpolis dhe Noah Dance Company që do të rezultojë me shfaqjen e përbashkët në natën e fundit të festivalit.

    “The Superfluos Man – Oblomov”, e prezantuar në “Isra-Drama: Ekspozimin Ndërkombëtar të Teatrit Izraelit”, është një përshtatje e klasikut rus Oblomov që ngre pyetjen: A ka të drejtë njeriu të jetojë jetën e tij pa lënë gjurmë?

    Në këtë edicion sjellim tingujt latin përmes koncertit të La Chica-s, e cila sjell temperamentin dhe entuziazmin shpirtëror venezuelas, të përzier me ndikimin multikulturor, urban dhe modern parisien. Në muzikën e saj ndërthuren zhanret e ndryshme si pop, hip-hop, ritëm dhe bluz, muzikë latine, muzikë afro-karaibe dhe ndikimi i muzikës klasike të Debussy-t që vjen në tri gjuhë; spanjisht, frëngjisht dhe anglisht.

    Këtyre iu bashkohen edhe artiste/ë dhe aktiviste/ë nga Sllovenia përmes shfaqjes “Pesë Llojet e Heshtjes”, me regji nga Maša Pelko, Polonia “Gruaja dhe Jeta” me regji të Piotr Łukaszczyk, Serbia “Vajzat” me regji të Milena Bogavac, si dhe DJ nga Bosnja dhe Herzegovina Marina Mimoza.

    E rol të rëndësishëm luan sivjet edhe skena artistike vendore, fuqizimi i së cilës është një nga synimet kryesore të Festivalit FemArt, që nga themelimi. FemArt, e krijuar nga gratë për gratë, hapësirë të veçantë iu jep edhe sivjet artisteve dhe aktivisteve vendore, prezantimit dhe promovimit të punëve të tyre.

    Pjesë e Festivalit është edhe filmi “Vera Andrron Detin” nga Kaltrina Krasniqi, që ka rrëmbyer dhjetëra çmime të rëndësishme vendore dhe ndërkombëtare, i cili shoqërohet me një panel diskutimi në mes artisteve që e krijuan filmin dhe publikut në Kino Armata.

    Në bashkëpunim me Teatrin Kombëtar do të prezantohen shfaqjet “Gratë” me regji të Nastazja Domaradzka, si dhe “Molly” me regji të Sibel Abdiu. Kurse në bashkëpunim me Teatrin e Qytetit të Prizrenit “Bekim Fehmiu” do të prezantohet shfaqja “Deni dhe Deti i Thellë i Kaltër” me regji të Ana Bateva. E sivjet bashkëpunimi vazhdon me Teatrin Oda, Teatrin Dodona, Teatrin e Qytetit të Mitrovicës, dhe Pallatin e Rinisë. Kurse tek Klubi i Boksit sjellim ekspozitën “Status” nga Mimozë Sahiti, me kurator Albert Heta.

    Ndërsa tek Dispanzeri afër QKMF-së në Prishtinë do të prezantohet shfaqja “Sober” me regji nga Butrint Pasha, në të cilën luajnë aktorët e Trupës Artistike Rezidente të Artpolis.

    FemArt sjell në Bibliotekën Kombëtare konferencën “Kalle Tutën: Një Konferencë për Jetesë të Guximshme”, që bën bashkë artiste/ë, aktiviste/ë dhe personalitete të shquara në këto panele diskutimi: “Përtej paragjykimeve: Fuqizimi i grave për të tejkaluar stereotipet në vendimmarrje në art dhe në kulturë”, “Paqja dhe siguria: Kapërcimi i frikës dhe ndërtimi i komuniteteve të qëndrueshme”, “Thyerja e stigmës: Shëndeti mendor dhe mirëqenia në kohë sfiduese”.

    Në Mitrovicë programi i FemArt realizohet në bashkëpunim me 7 Arte, si dhe Muzeun e Mitrovicës. Aty do të prezantohen dokumentari dhe paneli i diskutimit Biba May “Jo Më” produksion nga Artpolis, shfaqja “Gratë”, si dhe performanca “Olympe et Moi”.

    Edicioni i 11-të do të përmbyllet me koncertin e tre emrave të njohur në skenën e muzikës vjeneze Rina Kaçinari Trio, në përbërje të Rina Kaçinarit, Carles Muñoz Camarero dhe Jörg Mikula, me mysafir special Kori i Grave “Okarina”. Kjo treshe do të prezantojë në FemArt kompozime origjinale që përshkruajnë momentet e ndryshme të jetës trishtimin, dashurinë dhe lumturinë.

    Ditët në vazhdim FemArt do të ndajë me ju detajet e programit, përfshirë edhe konceptet e aktiviteteve, për të cilat mund të informoheni në rrjetet sociale dhe webfaqen e Festivalit.

  • Punëtorët e KEK-ut të premten në protestë, kërkojnë rritje të pagave

    Punëtorët e KEK-ut të premten në protestë, kërkojnë rritje të pagave

    Kryesia e sindikatave të punëtorëve të Korporatës Energjetike të Kosovës (KEK) ka njoftuar se të premten punëtorët e kësaj ndërmarrjeje do të protestojnë me kërkesën për rritje të pagave.

    Protesta do të mbahet para zyrave të KEK-ut në sheshin “Nëna Terezë” me moton “Ngrite zërin për ta ngritur pagën”.

    “Nga mbledhja e Kryesive të Sindikatave të KEK-ut më datë 20.04.2023 është marrë vendim për Protestë më datë 28.04.2023 duke filluar nga ora 11:00”, thuhet në njoftim.

    Qëllimi i protestës thuhet se është ngritja e pagave për të gjithë punëtorët e KEK-ut.

    “Edhe pse ishte një premtim nga ana e Bordit për realizimin e kërkesës së sindikatave të KEK-ut por edhe premtim publik përmes komunikatës së datës 03.04.2023. Si më poshtë: ‘Duke pasur tërë mirëkuptimin për kërkesat e punëtorëve, pas përfundimit të auditimit dhe certifikimit të pasqyrave financiare në fund të muajit Prill të këtij viti, Bordi dhe Menaxhmenti i KEK-ut, do të shqyrtojë kërkesën e sindikatave se sa do të ketë mundësi që të përfitojnë punonjësit e KEK-ut’. Përkundër premtimit kjo nuk po ndodhë prandaj ne vazhdojmë”, thuhet në njoftim.

  • Rritet numri i përfituesve të pensioneve për veteranë, prin Deçani

    Rritet numri i përfituesve të pensioneve për veteranë, prin Deçani

    Në tremujorin e parë të këtij vit ështët rritur numri i përfituesve nga skemat e pensioneve për veteranët e luftës. Në muajin mars të këtij viti përfituan pensione 36 mijë e 826 veteranë të UÇK-së ose 59 më shumë se në janar të këtij viti.

    Statistikat e fundit të Agjencisë së Statistikave të Kosovës (ASK), tregojnë se në janar kishin përfituar 36 mijë e 767 veteranë, dhe në shkurt 36 mijë e 821.

    Sipas skemës së pensioneve për veteranët e luftës nëpër komuna të Kosovës, numri më i madh është nga Deçani me 4.051, pastaj Peja me 3.675, Gjakova me 3.360, Prishtina me 2.731, Skenderaj me 2.616, Prizreni me 2.074 dhe Podujeva me 1.984.

    Nga buxheti i shtetit, çdo muaj paguhen rreth 6 milionë 260 mijë euro për këtë kategori të skemës pensionale, shkruan KosovaPress.

    Ndërkohë, krahasuar me dy vitet e kaluara, ka një rënie të numrit të përfituesve nga kjo kategori, ku kishte arrit numri mbi 38 mijë.

    Sipas raportit të fundit të ASK-së, sipas rezultateve të dala nga ky publikim rezulton se gjatë muajit mars 2023: nga skema e ndihmës sociale kanë përfituar 21 mijë e 948 familje me gjithsej 86 945 anëtarë, dhe nga skema për mbështetje materiale familjeve që kanë fëmijë me aftësi të kufizuara kanë përfituar 3 mijë e 88 familje.

  • ​Vitia e Haxhiu: Personat e privuar nga liria do të trajtohen me dinjitet

    ​Vitia e Haxhiu: Personat e privuar nga liria do të trajtohen me dinjitet

    Ministria e Shëndetësisë dhe ajo e Drejtësisë sot shprehën përkushtimin për të përmirësuar kushtet dhe mundësitë që personat që janë të privuar nga liria të trajtohen me respekt dhe dinjitet.

    Këtë angazhim si ministri i Shëndetësisë, Arben Vitia, si ajo e Drejtësisë, Albulena Haxhiu i shprehën në tryezën e organizuar nga Zyra e Këshillit të Evropës në Prishtinë, me ç’rast u dhanë edhe rekomandimet që kanë dalur nga projekti “Përmirësimi i trajtimit të personave të privuar nga liria”.

    Ministri i Shëndetësisë, Arben Vitia shprehu përkushtimin për kujdes të vazhdueshëm për personat që janë të privuar nga liria.

    Ai tha se me qëllim të përmirësimit të trajtimit të këtyre personave kanë ndërmarrë edhe politika konkrete.

    “MSh është e përkushtuar që në vazhdimësi të përkujdeset personat me nevoja shëndetësore në vend veçmas për ata të privuar nga liria qoftë në institucionet e kujdesit shëndetësor, ku këta persona mbahen pa vullnetin e tyre qoftë në institucionet speciale apo edhe në burgje. Politikat e MSh lidhur me përmirësimin e trajtimit për personat e privuar nga liria janë dëshmuar edhe me vendime strategjike të ndërmarra deri më tani siç janë bartja e shërbimeve shëndetësore të burgjeve nga MD në MSh bazuar në rekomandimet e OBSH dhe Këshillit të Evropës me qëllim të trajtimit të të burgosurve në mënyrë ekuivalente me qytetarët tjerë. Themelimi i Institutit të Psikiatrisë Ligjore si një institucion i veçantë dhe unik në regjion, në të cilin mbahen personat që kanë rënë ndesh me ligjin dhe kanë çrregullime mendore. Sa i përket institucionit special në Shtime, qeveria ka marrë vendim që këtë institucion ta transferoj në kuadër të MSh me qëllim të ofrimit të kujdesit sa më profesional”, tha ai.

    Ministrja e Drejtësisë, Albulena Haxhiu deklaroi se trajtimi i personave të privuar nga liria në Kosovë është sipas standardeve ndërkombëtare, por ajo theksoi se nuk do të ndalen në adresimin e të gjitha sfidave.

    Haxhiu theksoi se janë angazhuar në krijimin e kushteve ligjore që këta persona të kenë qasje të plotë në të drejtat e tyre me qëllim që të trajtohen me dinjitet dhe respekt.

    “Kosova qëndron shumë mirë krahasuar me vendet në Ballkan, megjithatë ne nuk duhet të vetëkënaqemi, por do të vazhdojmë përpjekjet për adresimin e çdo sfide mes nesh. Kemi punuar dhe po vazhdojmë në krijimin e kushteve ligjore që personat e privuar nga liria të trajtohen me respekt, por edhe me dinjitet si dhe të kenë qasje të plotë në të drejtat e tyre të garantuara me ligj, por edhe me konventat tjera ndërkombëtare. Veç kësaj ne kemi ndërmarrë edhe hapa konkret në krijimin e kushteve më të mira infrastrukturore për këtë qëllim tash rreth dy muaj… ka themeluar institucionin shëndetësor për trajtimin e personave me nevoja të veçanta që mbulon shërbimet shëndetësore për nevoja të veçanta përbrenda burgut të Dubravës “, u shpreh ajo.

    Rekomandimet e dala nga projekti “Përmirësimi i trajtimit të personave të privuar nga liria” thonë se qasjet aktuale të rehabilitimit për kujdesin forenzik të shëndetit mendor lënë shumë hapësirë për përmirësim. Ky raport thotë se trajtimet psiko-sociale duhet të zhvillohen më tej si elemente kyçe për shërimin, reduktimin e rrezikut dhe rehabilitimin e pacientëve psikiatrike forenzike./KP

  • Joe Biden shpall kandidaturën presidenciale për vitin 2024

    Joe Biden shpall kandidaturën presidenciale për vitin 2024

    Presidenti i ShBA-së Joe Biden ka njoftuar se do të kërkojë rizgjedhjen për president në vitin 2024, me zëvendëspresidenten Kamala Harris.

    Tani 80-vjeçar dhe tashmë presidenti më i vjetër në historinë e ShBA-së, Biden kishte sinjalizuar prej kohësh se do të kandidonte për një mandat tjetër katërvjeçar, shkruan BBC.

    Në një video ku bëri të ditura përpjekjet e tij për të mbajtur Shtëpinë e Bardhë, ai cilësoi zgjedhjet e ardhshme si një luftë për demokracinë dhe lirinë personale, duke thënë: “Ta përfundojmë punën”.

    Ish-presidenti Donald Trump ka nisur tashmë fushatën e tij, që do të thotë se dyshja mund të përballet për një rimeç zgjedhor në nëntor të vitit të ardhshëm.

  • Daçiq i gjykon shtetet që votuan në KiE për Kosovën, Malit të Zi i çon porosi të veçantë

    Daçiq i gjykon shtetet që votuan në KiE për Kosovën, Malit të Zi i çon porosi të veçantë

    Ministri i Jashtëm serb, Ivica Daçiq, ka përmendur me radhë shtetet që e kanë zhgënjyer Serbinë, duke votuar pro ose duke abstenuar dje në Këshillin e Evropës, ku u miratua aplikimi i Kosovës për anëtarësim në këtë instancë.

    Fillimisht, Kryediplomati serb Ivica Daçiq thotë se pa formimin e Asociacionit të komunave me shumicë serbe në Kosovë, nuk do të ketë përmbushje të pikave të tjera të marrëveshjes së Ohrit.

    “Nuk është që Marrëveshja e Ohrit nuk është më e vlefshme, por këtu po flasim për faktin se gjëja e parë në Marrëveshjen e Ohrit është Asociacioni. Nëse nuk ka Asociacion, pastaj nuk ka as pjesë të tjera të marrëveshjes”, tha Daçiq.

    Ai ka folur për votimin për nisjen e procedurave të anëtarësimit të Kosovës në Këshillin e Evropës. Sipas Daçiqit, Serbia do t’i hakmerret Malit të Zi, që votoi pro Kosovës në KiE.

    “Mali i Zi do të mund që, së paku, të abstenonte. Neve na duhet të veprojmë në mënyrë reciproke. Mali i Zi votoi për pranimin e Kosovës. Atyre gjithashtu do t’u duhet vota jonë ndonjëherë, në të cilët, ata sigurisht se nuk mund të llogarisin”, ka thënë Kryediplomati serb.

    Daciqi shtoi se ka qenë i surprizuar për të keq nga zëri i Ukrainës, sepse Serbia e ka dënuar cenimin e integritetit territorial të këtij shteti në të gjitha rezolutat e botës, por Kyivi abstenoi.

    “Për aq kohë sa Bosnja dhe Hercegovina është e shqetësuar, a ka pasur ndonjëherë ndonjë rast që ne nuk e kemi përmendur integritetin territorial të Bosnjës dhe Hercegovinës? Tani kur dikush të na pyet, ne do të abstenojmë. Pse të jemi ne për integritetin territorial të Bosnjës e ata të abstenojnë?”, tha Daçiq.

  • Ushqimet më të mira për t’i ngrënë në pranverë për një shëndet më të mirë

    Ushqimet më të mira për t’i ngrënë në pranverë për një shëndet më të mirë

    Pranvera është një stinë kur shumë njerëz ndjejnë rinovim dhe rikthim të energjisë. Ditët më të gjata, moti më i ngrohtë dhe lulëzimi i bukur e bëjnë këtë stinë perfekte për t’u fokusuar në ushqyerjen e shëndetshme dhe për të përfshirë në dietën tuaj ushqime të freskëta dhe sezonale. Ngrënia e ushqimeve të sezonit pranveror nuk ndihmon vetëm shëndetin tuaj, por edhe mjedisin dhe fermerët lokalë.

    Një nga mënyrat më të mira për të përfituar nga stina e pranverës është përfshirja e një larmie të frutave dhe perimeve të freskëta dhe të ngjyrosura në vaktet tuaja të ushqimit. Disa nga ushqimet më të mira për t’i ngrënë në pranverë janë arrat, shpargu, hudhra e pranverës, bishtajoret, spinaqi, karrota, pjeshka, luleshtrydhe, karçofët, salmoni, vezët dhe lakra e egër.

    Këto ushqime jo vetëm që janë të shijshme, por ofrojnë edhe substancat ushqyese shumë të rëndësishme si vitamina, minerale dhe fibra që mund të mbështesin shëndetin dhe mirëqenien tuaj të përgjithshme. Spinaqi, për shembull, është i pasur me vitaminë K dhe folat, ndërsa karrota është një burim i mirë i fibrit dhe antioksidantëve. Pjeshka është e pasur me proteinë dhe hekur, ndërsa luleshtrydha ka shumë vitaminë C dhe manganezium.

    Përfshirja e këtyre ushqimeve pranverore në vaktet tuaja nuk është vetëm një mënyrë shumë e shijshme dhe e shëndetshme për të ngrënë, por mund të jetë gjithashtu edhe një mënyrë argëtuese dhe kreative për të provuar receta dhe shije të reja. Me shumëllojshmërinë e prodhimeve të freskëta dhe sezonale të disponueshme gjatë kësaj kohe, ka mundësi të pafundme për përfshirjen e këtyre përbërësve në vaktet tuaja të ushqimit. /atvlive.tv

  • Kryeshefi i IPK-së nderohet nga DASH-i

    Kryeshefi i IPK-së nderohet nga DASH-i

    Kryeshefi Ekzekutiv i Inspektoratit Policor të Kosovës, Kushtrim Hodaj është nderuar dje nga Departamenti i Shtetit në Washington për sukses të jashtëzakonshëm operacional.

    Hodaj, siç ka bërë të ditur IPK është përzgjedhur fitues i çmimit kryesor për sukses të jashtëzakonshëm operacional, si i nominuar për realizimin me sukses operacionit antikorrupsion të Inspektoratit Policor të Kosovës, me ç’rast janë arrestuar 74 zyrtarë policorë në operacionin e vitit të kaluar të koduar me emrin “PIKA 1 dhe PIKA 2”.

    “Përfaqësuesit e Kosovës, Malit të Zi dhe të Ganës, të diplomuar në Akademinë Ndërkombëtarë të Zbatimit të Ligjit u vlerësuan që me punën e tyre kanë bërë një ndryshim të madh në komunitetet e tyre dhe sektorët e drejtësisë penale në mbarë botën.”, është bërë e ditur në komunikatë.

    Në këtë ceremoni kanë qenë të nominuar zyrtarë nga 52 shtete nga e gjithë bota, ndërkaq çmimi është ndarë nga nënsekretarja e Shtetit, Uzra Zeya dhe Ndihmës Sekretari i INL-it (Byroja për Çështje të Narkotikëve dhe Zbatimit të Ligjit), Todd Robinson.

    Hodaj është duke vazhduar vizitën zyrtare në Washington, ku gjatë ditëve ne vijim do të pritet nga zyrtarë të lartë nga fusha e sigurisë dhe drejtësisë në SHBA.