Këto ngjashmëri janë vërejtur te disa nga protestuesit serbë në Zveçan, të cilët të hënën edhe ushtruan dhunë fizike ndaj pjesëtarëve të KFOR-it.
Me kapelat e ngjashme identifikohen pjesëtarët e grupit të tifozëve të futbollit në Serbi, i njohur si grupi i Veljko Belivuk, grup për të cilin javë më parë shkroi edhe New York Times.
Në artikullin e gazetës amerikane ishte cituar se gjatë një seancë gjyqësore me dyer të mbyllura, Veljko Belivuk kishte thënë se banda e tij ishte organizuar “për nevojat dhe me urdhër të presidentit Aleksandër Vucic”.
Megjithatë, ende nuk është e qartë se kush është përgjegjës as për shkrimet e simbolit “Z” në veturat e Policisë, KFOR-it e të mediave.
Sipas Qendrës Kosovare për Studime të Sigurisë, qasja e kufizuar e institucioneve në veri e bën më të vështirë identifikimin dhe ndjekjen e grupeve kriminale.
Hulumtimet e QKSS-së tregojnë për një rritje të ekstremizmit etno-politik.
Pjesë e një strategjie, sipas hulumtuesit Shpat Balaj, në identifikimin e grupeve kriminale, do të duhej të ishte ndarja e tyre nga banorët serbë lokalë.
Policia e Kosovës njoftoi në mbrëmjen e së hënës se ka arrestuar 5 persona, që dyshohen se morën pjesë në sulmet dhe dhunën ndaj pjesëtarëve të KFOR-it, në komunën e Zveçanit në veri të Kosovës. /atvlive.tv
Edicionin Qendror të lajmeve në ATV e gjeni në videon më poshtë:
Në Zveçan u nisën për të raportuar për protestat e qytetarëve serbë, por veturës së ekipit të ATV-së me qëllim të pengimit të raportimit iu shpërthyen gomat.
Përveç ATV-së, protestuesit serbë sulmuan edhe me plumba ekipe të shumë mediave të tjera, qoftë nga Kosova qoftë të huaja.
Për sulmet e vazhdueshme dhe të ashpra ndaj gazetarëve, shqetësim ka shprehur Asociacioni i Gazetarëve të Kosovës.
“Jemi absolutisht të alarmuar me nivelin e sulmeve ndaj gazetarëve, ekipeve që shkojnë nga Prishtina për të raportuar në tri komunat në veri të vendit. Situata është absolutisht alarmante dhe shqetësuese pasi që gjatë ditës së sotme dhe të djeshme një numër i madh i sulmeve ka ndodhur”, tha kryetari i AGK-së, Xhemajl Rexha.
Rexha madje tha se forcat e sigurisë nuk janë duke u ofruar siguri gazetarëve.
“Fatkeqësisht asnjë organ i sigurisë që është i thirrur për të bërë, nuk po bën mjaftueshëm, nuk po bën në fakt as minimumin për të ofruar siguri te gazetarët. Gazetarët të gjithë që shkojnë atje, janë në mëshirën e gjindshmërisë së tyre, për t’iu ikur këtyre sulmeve”, tha ai.
Përveç AGK-së, për siguri për gazetarët kërkuan edhe nga Federata Evropiane e Gazetarëve.
“Gazetarët janë sulmuar dhe automjetet e transmetuesve mediatikë janë vandalizuar në veri të Kosovës. Ne u bëjmë thirrje autoriteteve t’i mbrojnë gazetarët dhe të sigurojnë se ata mund të raportojnë në mënyrë të sigurt”, thuhet në reagimin nga Federata Evropiane e Gazetarëve.
Për shkak të situatës në veri, Asociacioni i Gazetarëve të Kosovës u ka bërë thirrje pronarëve të mediave, kryeredaktorëve dhe organeve udhëheqëse që të kenë prioritet mirëqenien e gazetarëve, kameramanëve, fotoreporterëve dhe shoferëve.
Ndërsa, gazetarëve u është kërkuar që t’u përmbahen instruksioneve të Policisë. /atvlive.tv
Edicionin Qendror të lajmeve në ATV e gjeni në videon më poshtë:
Ministria e Arsimit nuk ka informata rreth zhvillimit apo jo të procesit mësimor në komunat veriore. Por, sipas ministres së Arsimit, Arbërie Nagavci, disa shkolla në atë pjesë nuk janë duke mbajtur mësim.
“Jemi të informuar për situatën në veri, edhe në diskutimet që i kemi bërë në Qeveri. Nuk kemi raport zyrtar për shkollat atje, por kemi informata që në disa shkolla nuk është zhvilluar mësimi. Por për shkak të punës së trashëguar, përkundër angazhimit tonë që t’i përfshijmë këto institucione, ato kanë vazhduar të bëjnë rezistencën, sepse gjithë këto vite nuk kanë qenë të përfshirë në arsim, por vetëm janë përfshirë kur kanë përfituar diçka”, tha Nagavci.
Megjithatë, e para e Ministrisë së Arsimit kërkoi që të gjitha orët e humbura të kompensohen.
“Kompensimi i orëve të humbura është obligim i shkollave, të sigurohet që të mos humbet asnjë orë. Është e ditur që mësimi nuk është zhvilluar, e kemi diskutuar disa herë, e kemi përmendur që kjo ka ndodhur edhe si pasojë interferimeve politike nga prindërit. Shkollat duhet të jenë të angazhuara që nxënësit të mos humbasin asnjë kapitull, atyre ju takon si përgjegjësi”, tha ajo.
Përkundër angazhimit që institucionet arsimore të veriut të përfshihen në sistemin e arsimit në Kosovë, një gjë e tillë nuk është arritur. /atvlive.tv
Edicionin Qendror të lajmeve në ATV e gjeni në videon më poshtë:
“Nuk mund të lejojmë një konflikt tjetër në Evropë”, theksoi Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, duke folur për dhunën dhe tensionet në tri komunat me shumicë serbe në veri të Kosovës.
Në një konferencë me presidentin e Malit të Zi, Jakov Milatovic, Borrell dënoi, siç u shpreh, “me termat më të ashpër, dhunën ndaj qytetarëve, gazetarëve, forcave të rendit dhe KFOR-it”.
Teksa ritheksoi mbështetjen për KFOR-in në përmbushjen e mandatit për paqe dhe stabilitet në Kosovë, Borrell paralajmëroi mundësinë e një takimi urgjent ndërmjet kryeministrit të Kosovës dhe presidentit të Serbisë.
“Si hap i parë, pres që autoritetet e Kosovës t’i pezullojnë operacionet policore të fokusuara në ndërtesat komunale në veri të Kosovës dhe protestuesit e dhunshëm të tërhiqen. Kurse ne do të vazhdojmë angazhimin me dy liderët. BE-ja pret që të dyja palët të veprojnë me përgjegjësi dhe të angazhohen menjëherë në dialogun e lehtësuar nga BE-ja, për të gjetur një zgjidhje të qëndrueshme për situatën në veri, e cila garanton paqe dhe siguri për të gjithë qytetarët dhe shtron rrugën për zbatimin e marrëveshjes për shtegun drejt normalizimit. Për këtë, po punoj që urgjentisht të organizoj një takim të nivelit të lartë”, tha Borrell.
I shqetësuar, ai vuri në pah rrezikun e konfliktit që, sipas tij, nuk guxon të ndodhë.
“Nga palët pritet të kontribuojnë për bashkëpunim rajonal të frytshëm dhe për siguri në Evropë dhe për të tejkaluar trashëgiminë e së kaluarës. Ka mjaft dhunë. Ka pasur shumë dhunë. Kemi tepër dhunë në Evropë tashmë, nuk mund të lejojmë një tjetër konflikt. Shpresoj që zëri im do të dëgjohet dhe njerëzit do të veprojnë në pajtim me këto kërkesa”, tha Borrell.
Për shkak të situatës në veri, kryeministri Albin Kurti shtyu pjesëmarrjen në forumin e sigurisë në Bratislavë – GLOBSEC.
“Ka qenë e planifikuar që të shkojë. Por, për shkak të zhvillimeve në vend është shtyrë pjesëmarrja. Nuk është definitive ende nëse do të marrë pjesë ose jo”, tha zëdhënësi i Qeverisë, Përparim Kryeziu.
Në një reagim gjatë ditës, NATO-ja dënoi sulmin e paprovokuar në Zveçan, teksa kërkoi që të dyja palët të marrin përgjegjësinë për atë që ka ndodhur dhe të parandalojnë përshkallëzimin e mëtejmë të situatës. /atvlive.tv
Edicionin Qendror të lajmeve në ATV e gjeni në videon më poshtë:
Maturantë nga shumë shkolla të Kosovës u bënë pjesë e garës me biçikleta që u organizua në kryeqytet, në kuadër të edicionit të tetë të revistës shkollore “Siguria në rrugë”.
Sipas organizatorëve, aktivitete si ky kanë filluar të marrin rol edukativ dhe arsimor në vend.
“Diku në vitin 2013 ka filluar edicioni i parë i revistës shkollore “Siguria në Rrugë”. Dhe sot mbushëm 10 vjet të këtyre aktiviteteve jashtë-mësimore, por edhe mësimore, nëpër nivele të ndryshme të shkollave në mbarë Kosovën. Ministria e Arsimit është bashkëpunuese vazhdimisht në të gjitha këto aktivitete, për shkak se ka bërë përzgjedhjen e shkollave në të gjitha aktivitetet”, tha Muhamed Krasniqi nga Akademia “Tempulli”.
Nënkryetarja e Prishtinës, Donjeta Sahatqiu, premtoi se në të ardhmen do të ketë shtigje më të përshtatshme për çiklistët.
“Kemi zgjeruar shtigjet e biçikletave, jemi duke punuar në rritjen e sigurisë në to. Sigurisht që ka nevojë më të madhe dhe këtu ku jemi tash në shesh, kemi nevojë për ndryshimet e fundit, të cilat i nevojiten këtij sheshi që të bëhet tamam shesh”, tha nënkryetarja e Prishtinës, Donjeta Sahatçiu.
Aktivitete si ky u përkrahën edhe nga Policia e Kosovës.
Si çdo aktivitet tjetër, Policia e Kosovës edhe kësaj radhe do t’i mbështesë pothuajse në të gjitha komunat, përfshirë edhe kryeqytetin me pjesën e ligjërimit nëpër institucione apo shkolla. Fokus kanë qenë klasat e 12-ta, gjë që për ne është me rëndësi, meqë kjo moshë është mosha ku pothuajse shumica prej tyre do ta kenë fatin që t’i nënshtrohen testit të pjesës teorike, apo marrjes së patentë-shoferit”, tha nënkoloneli, Jeton Rexhepi.
Kjo ngjarje u organizua nga akademia “Tempulli” dhe Asociacioni Kosovar për Motorizëm dhe kishte mbështetjen e Ministrisë së Arsimit, Byrosë Kosovare të Sigurimit dhe Policisë. /atvlive.tv
Edicionin Qendror të lajmeve në ATV e gjeni në videon më poshtë:
Procesi zgjedhor në veri të vendit kaloi qetësisht, por jo edhe ai paszgjedhor. Shkuarja e kryetarëve të rinj shqiptarë në objektet komunale, u përcoll me tensione të shumta, shkaku i kundërshtimeve nga ana e qytetarëve të komunitetit serb.
Andaj vlerësohet se zgjidhja mund të jetë vetëm politike.
“Zgjidhje mund të kemi, por zgjidhja do të jetë politike, gjithmonë me ndërmjetësimin e Brukselit dhe sigurisht do të shkohej në zgjedhje. Ne e kemi pa edhe prej ambasadorëve të huaj që këto zgjedhje, këta kryetarë të komunave janë të përkohshëm me një detyrë teknike, deri në zgjedhjet e ardhshme”, tha analisti politik, Bekim Kabashi.
Se duhet punuar në javët në vazhdim për zgjedhjet e reja, të hënën e tha edhe eurodeputetja Viola Von Cramon, derisa për tensionet tha se do të mund të parandaloheshin nëse kryetarët nuk do të provonin të hynin në objekte me forcë.
Por, ndryshe mendon politologu Fidan Ukaj, që vlerëson se kryetarët e kanë vendin në komunë e jo nëpër fshatra.
“Ata nuk janë zgjedhur kryetarë të fshatrave, por të komunave dhe vendi ku duhet të ushtrohet ky funksion është kuvendi komunal. Dhe me të drejtë kryetarët e zgjedhur kanë shkuar në vendet e tyre të punës dhe duhet që funksioni i kryetarit të komunës të kryhet nga aty”, tha Ukaj.
Sipas tij, edhe rezistenca e serbëve nuk do të zgjasë shumë, vetëm duhet vendosmëri nga organet kompetente të Kosovës.
“Unë mendoj që mund të ketë një rezistencë në ditët e ardhshme, mirëpo besoj që nëse forcat e rendit do të jenë të vendosura që grupet kriminale që iu prijnë këtyre aksioneve do të arrestoheshin, e qytetarët e vendit do ta pranojnë një realitet të tillë”, tha Ukaj.
Kryetarët e dalë nga zgjedhjet e 23 prillit në 4 komunat veriore të vendit, fituan me një përqindje të vogël të votave të qytetarëve, pasi serbët i bojkotuan zgjedhjet krejtësisht. /atvlive.tv
Edicionin Qendror të lajmeve në ATV e gjeni në videon më poshtë:
Kryeministri Albin Kurti ka reaguar për herë të parë pasi ambasadori Jeff Hovenier, njoftoi për sanksionet amerikane ndaj Kosovës, pas situatës së krijuar në veri të Kosovës.
Diplomati amerikan të hënën njoftoi se Kosova është përjashtuar nga stërvitja ushtarake “Defender Europe 2023” dhe se vendi i tij nuk do të lobojë te shtetet mosnjohëse që ato ta ndryshojnë qëndrimin ndaj pavarësisë së Kosovës. Kjo pasi, Qeveria Kurti urdhëroi dërgimin e Policisë së Kosovës në komunat veriore, për t’i asistuar kryetarët e rinj që të hynë në ndërtesat komunale.
Ndonëse Hovenier tha se Kurti nuk i ka dëgjuar këshillat e ShBA-së për shtensionimin e gjendjen në komunat veriore, shefi i qeverisë përmes një video-adresimi nuk është zmbrapsur apo tërhequr.
Kësisoj, Kurti tha se kryetarët e zgjedhur në Mitrovicën e Veriut, Leposaviq, Zubin Potok dhe Zveçan janë të vetmit që kanë çfarëdo legjitimiteti të jenë në ndërtesa të komunave dhe janë në shërbim të qytetarëve.
Sipas tij, ata kanë mbështetjen e plotë të Qeverisë që ai e drejton. Ai shtoi se komuniteti serb duhet të çlirohet nga ekstremistët dhe milicët për të cilët tha se kanë emra të veçantë.
Pavarësisht se nuk i përmendi reagimet e ashpra të sotme nga ambasadori Hovenier, Kurti u shpreh se “Policia jonë dhe KFOR-i atje janë kufiri ndërmjet ekstremistëve të dhunshëm dhe institucioneve paqësore”.
“Orëve të fundit, institucionet tona kanë shtuar edhe më shumë komunikimin me partnerët ndërkombëtarë, sepse qetësimin e situatës e kemi qëllim të përbashkët. Por përveç shqetësimeve dhe brengave, dje na u dëshmua para syve se edhe kërcënimet dhe rreziqet i kemi të përbashkëta”, tha ai.
Mes tjerash, Kurti falënderoi gazetarët, Policinë e Kosovës, KFOR-in si dhe qytetarët për mbështetjen, ndërsa të lënduarve nga tensionet e veriut, u uroi shërim të shpejtë.
Reagimi i plotë i Kurtit:
Të dashur qytetarë,
Kryetarët e zgjedhur nga zgjedhjet e 23 prillit, përkundër daljes së ultë në zgjedhje për shkak të bojkotit të diktuar dhe detyruar mbi serbët e Kosovës, megjithatë janë të vetmit që kanë çfarëdo legjitimiteti të jenë në ndërtesa të komunave, dhe në shërbim të qytetarëve.
Prandaj, ata kanë mbështetjen tonë të plotë, të pakushtëzuar dhe të pandërprerë.
Demokracia nuk mund të suspendohet, e as të mbahet peng. Ushtrimi i saj është garant i paqes dhe sigurisë, assesi kërcënim apo rrezikim.
Republika e Kosovës është vendi më demokratik në Ballkanin Perëndimor. Me institucione qeverisëse dhe të sigurisë të cilat trajnimet profesionale dhe orientimin vleror e kanë nga dhe kah shoqëritë perëndimore.
E dje, na u dëshmua përfundimisht dhe të gjithëve, se kë kemi përballë: grupe të së djathtës ekstreme me maska, që vandalizojnë, sulmojnë, djegin çdo gjë që nuk e konsiderojnë serbe, e që lartësojnë simbole nacionaliste dhe shoviniste, si kryqi me katër S-ja dhe Z-ja e agresionit rus në Ukrainë.
Ekstremistët dhe milicët kanë emra të veçantë. Ata nuk janë populli. Komuniteti serb duhet të çlirohet prej tyre. Ne i kemi identifikuar shumicën e tyre dje dhe sot. Nuk mund të ketë individë e as grupe mbi ligjin e më të fuqishëm se shteti.
Të tillë janë kriminelët multi-milionerë si Milan Radojçiq e Zvonko Veselinoviq. Ata janë pronarë të mëdhenj të bizneseve e të kontrabandës, që i kushtëzojnë punëtorët e varfër të tyre, të dalin në protesta të dhunshme. Në fakt, kjo është mënyra e vetë shefave të tyre urdhërdhënës në Beograd ndaj administratës publike: mënyra e Aleksandar Vuçiq, Aleksandar Vulin dhe Ivica Daçiq.
Unë e di të dashur qytetarë që në grumbullimet dje dhe sot ka pasur edhe protestues paqësor. Por protestat dje e sot nuk ishin paqësore. Një protestë që sulmon policinë e cila e ruan rendin dhe zbaton ligjin, pjesëtarët e KFOR-it që e ruajnë qetësinë dhe stabilitetin, dhe gazetarët të cilët raportojnë mbi ngjarjet nga terreni, nuk janë protestë për komunën, por për pushtet. Në Kosovë, pushteti mund të merret vetëm përmes zgjedhjeve. Jo me dhunë dhe krim.
Policia jonë dhe KFOR-i atje janë kufiri ndërmjet ekstremistëve të dhunshëm dhe institucioneve paqësore.
Orëve të fundit, institucionet tona kanë shtuar edhe më shumë komunikimin me partnerët ndërkombëtarë, sepse qetësimin e situatës e kemi qëllim të përbashkët. Por përveç shqetësimeve dhe brengave, dje na u dëshmua para syve se edhe kërcënimet dhe rreziqet i kemi të përbashkëta.
Dhjetëra të lënduarve ju dëshiroj shërim të plotë dhe të shpejtë. Falënderoj kryetarët e komunave që përkundër vështirësive kanë shfaqur vullnetin e sinqertë për t’u shërbyer qytetarëve i cili dëshmohet edhe në këto situata.
Falënderoj policët e Kosovës, që përkundër tensioneve dhe sulmeve, kanë kryer detyrat e tyre me profesionalizmin më të lartë. Falënderoj pjesëtarët e KFOR-it që përkundër synimeve të huaja për destablizim, po ruajnë paqen dhe sigurinë. Falënderoj gazetarët dhe mediat që përkundër rreziqeve dhe pasigurisë, na sollën me zë dhe figurë fytyrën e vërtetë të protestave të milicëve të dhunshëm. Dhe falënderoj veçanërisht qytetarët e Republikës për mirëbesimin dhe mbështetjen.
Kryeministri i Kosovës, Albin Kurti, i ka thënë të martën të përditshmes britanike Guardian se, dita e hënë ka qenë shumë e rëndë, dhe se “jemi me fat që nuk është humbur asnjë jetë”.
Ai u është referuar përleshjeve në mes të pjesëtarëve të misionit të NATO-s në Kosovë, KFOR, me protestuesit serbë në Zveçan, të cilët e kanë kundërshtuar hyrjen e kryetarëve të rinj shqiptar në komunat e banuara me shumicë serbe – Zveçan, Leposaviq dhe Zubin Potok – nëpër ndërtesat komunale.
Kurti i ka fajësuar për dhunën në veri, ato që i ka quajtur “banda fashiste” të udhëhequra nga Qeveria e Serbisë.
Dhuna është dënuar nga NATO-ja dhe faktori ndërkombëtar, derisa Shtetet e Bashkuara i kanë kërkuar Qeverisë së Kosovës që të marrë hapa në uljen e tensioneve në veri.
Të premten, Sekretari amerikan i Shtetit, Antony Blinken, ka thënë se vendimi i Qeverisë së Kosovës, për të hyrë me forcat në ndërtesat komunale në veri, është marrë “kundër këshillës” së Shteteve të Bashkuara dhe partnerëve evropianë, dhe i cili “i ka përshkallëzuar pa nevojë tensionet”.
Kurti është shprehur i pakënaqur me këtë deklaratë.
“Mendoj se, jo vetëm që është e padrejtë dhe e gabuar e edhe lënduese, por në të njëjtën kohë është shumë naive”, ka thënë Kurti për Guardian, në një intervistë përmes telefonit.
“Ndoshta Sekretari Blinken do ta sqarojë këtë gjë më shumë një ditë, por definitivisht nuk ka qenë e dobishme”.
Prej asaj deklarate, Kurti ka thënë se ka folur me të dërguarin amerikan për Ballkanin Perëndimor, Gabriel Escobar.
Ai ka thënë se Escobar u ka kërkuar autoriteteve të Kosovës që t’i dërgojnë kryetarët në objekte tjera, apo edhe të punojnë prej shtëpisë – kërkesë që ai e ka refuzuar.
“Nuk mund të kemi kryetarë me Zoom [platformë e thirrjeve online], ne jemi republikë demokratike. Një republikë demokratike, nuk mund t’i dorëzohet milicisë fashiste”, ka shtuar ai.
Ambasadori amerikan në Kosovë, Jeffrey Hovenier, ka thënë të martën, në një bashkëbisedim me gazetarë se, Qeveria e Kosovës nuk është koordinuar me Shtetet e Bashkuara për veprimet e ndërmarra në veri dhe, për këtë arsye, ka pësuar pasojën e parë: “stërvitjet Defender Europe 2023 kanë marrë fund”, për të.
Opozita në Kosovë ka reaguar duke e bërë Kurtin fajtor për tensionim me aletatët, sidomos SHBA-të. Përfaqësuesit opozitarë i kanë bërë thirrje kryeministrit që të tregojë maturi politike, të ndryshojë qasjen dhe të zgjedh të ardhmen dhe rrugën euroatlantike të Kosovës.
Komunat veriore të Kosovës u tensionuan pasi kryetarët e dalë nga zgjedhjet e jashtëzakonshme të 23 prillit – të gjithë shqiptarë – u kundërshtuan nga serbët lokalë.
Krerët e mëparshëm të katër komunave në veri, Mitrovicë e Veriut, Zubin Potok, Zveçan dhe Leposaviq, të banuara me shumicë serbe, ishin nga Lista Serbe dhe u dorëhoqën në nëntor të vitit të kaluar, në shenjë pakënaqësie me një vendim të Qeverisë së Kosovës për riregjistrimin e makinave në targa RKS – Republika e Kosovës.
Zgjedhjet e 23 prillit u bojkotuan nga Lista Serbe dhe nga popullata shumicë serbe në veri, e cila tani nuk i pranon rezultatet, përkatësisht kryetarët e rinj. /REL
Një mjet ka shpërthyer afër komunës së Zveçanit rreth orës 19:15. Aty pran gjendej gazetari i ATV-së, Arian Hajdaraj, i cili po priste që të inkuadrohej drejtpërdrejt në Edicionin Qendror të lajmeve në ATV.
Fatmirësisht, gazetari Hajdaraj nuk ka pësuar ndonjë lëndim dhe ka vazhduar raportim nga po i njëjti vend. Pamjet nga momenti i shpërthimit janë kapur nga kamera e ATV-së.
Kryetari i Zveçanit, Ilir Peci, deklaroi se nuk ka pasur propozim nga Ambasada Amerikane që të mos dalin në punë. Ai tha se ditën e sotme punën e tij e ka kryer nga zyra për komunitete në fshatin Lipë të Zveçanit.
Peci tha për KosovaPress, se do të rikthehet në zyrën e kryetarit pasi që gjendja të stabilizohet.
“Nuk kemi pasur kësi lloj propozimi nga ambasada amerikane. Prej ambasadës kemi pasur propozim vetëm mos me u shkaktua ndonjë ekses, jo mos me u lajmërua (në objektet e komunës). Sot kemi vazhduar në Zyrën e Komuniteteve në fshatin Lipë në Komunën e Zveçanit, por jo në zyrën e kryetarit në objekt të komunës”, deklaroi Peci.
Peci shtoi se nuk do të shkojë në Komunë derisa të stabilizohet gjendja.
“Ta shohim sipas gjendjes, nëse stabilizohet gjendja dhe është në rregull, atëherë vazhdojmë në objektin e komunës. Nëse për momentin vazhdon kjo gjendje, atëherë do të vazhdojmë derisa të stabilizohet gjendja… Për momentin janë kushtet me vazhdua edhe prej aty për shërbime të qytetarëve”, shtoi ai.
Ditën e djeshme, kryetari i Zveçanit, Ilir Peci, dhe ai i Zubin Potokut, Izmir Zeqiri, kanë takuar ambasadorin amerikan, Jeffrey Hovenier.
Protestuesit serb po kundërshtojnë hyrjen e kryetarëve shqiptarë në ndërtesat komunale.
Situata në këto komuna është tensionuar të premten e 26 majit kur kryetarët e betuar u detyruan të futën në zyrat e tyre të punës nën asistencën e Policisë së Kosovës.
