Në Zveçan edhe sot serbët janë mbledhur pranë ndërtesës së komunës.
Raportohet se para komunës janë vendosur edhe disa tenda (çadra) të reja para rrethojës metalike që r ka vendosur KFOR-i.
Dje, KFOR-i në Leposaviq ka hequr tërësisht telin me gjemba që ishte vendosur rreth ndërtesës së komunës ditëve të kaluara. Teli ndodhet anash. Ka mbetur vetëm një pjesë e kangjellave metalike.
Nata në veri raportohet se ka kaluar e qetë.
Në orët e para të së premtes, ka ndodhur një shpërthim në sheshin “Adem Jashari” në Mitrovicë, ku si pasojë, janë dëmtuar xhamat e dy kafeneve.
Lajmin për klankosova.tv e ka konfirmuar zyrtari për Informim i Policisë, Avni Zahiti.
“Rreth orës 03:20, është raportuar se në sheshin ‘Adem Jashari’ si pasojë e një shpërthimi janë dëmtuar xhamat e dy kafeneve dhe një dyqani. Përveç dëmeve materiale, nuk raportohet për të lënduar, rasti në procedurë hetimore”, ka thënë Zahiti.
Katër fëmijë të vegjël që u goditën me thikë në një park në Annecy, në juglindje të Francës, tani janë në gjendje të qëndrueshme.
Fëmijët nga një deri në tre vjeç po trajtohen në spital.
Policia mposhti dhe arrestoi sulmuesin me thikë pasi ai hyri në një kënd lojërash për fëmijë për të kryer sulmin, shkruan BBC.
Mes të plagosurve është edhe një fëmijë britanik trevjeçar, ndërsa një tjetër holandez. Dy të rritur gjithashtu u plagosën, dhe janë në gjendje më kritike.
Policia ka konfirmuar se i dyshuari është një sirian 31-vjeçar, i cili kishte statusin e refugjatit në Suedi.
Ky tregim përmban detaje që disa lexues mund t’i gjejnë shqetësuese.
Deputeti rajonal Antoine Armand e përshkroi sulmin si “të neveritshëm” dhe tha se autoritetet po hetonin, por dinin “shumë pak”.
Pamjet video të sulmit të ngarkuara në mediat sociale tregojnë një shesh lojërash të vogël, ku jeta po vazhdon normalisht. Fëmijët vrapojnë përreth, dhe prindërit dhe kujdestarët e tyre janë aty.
Pastaj hyn një burrë me thikë dhe shumë shpejt dëgjohen britma. Ai po kërkon qartë fëmijë për të sulmuar – dhe ai sulmon një në një.
Sipas raportimeve, sulmuesi “nuk ka të dhëna kriminale apo psikiatrike”.
Prokurorja e Annecy Line Bonnet-Mathis u tha gazetarëve se viktimat e reja varionin nga 22 muajsh deri në tre vjeç.
“Nuk duket të ketë asnjë lloj motivimi terrorist”, tha ajo.
Policia thotë se i dyshuari ka statusin e refugjatit në Suedi dhe së fundmi ka ardhur në Francë, duke lënë pas një grua dhe një vajzë trevjeçare. Në një kërkesë të pasuksesshme për azil vitin e kaluar për statusin e refugjatit në Francë, ai tha se ishte një i krishterë sirian.
Gjatë incidentit, sulmuesi thirri emrin e Jezu Krishtit.
Një grua e identifikuar si ish-gruaja e tij tha për BFM TV se ish-partneri i saj ishte i krishterë.
“Ai nuk më telefonon për katër muaj. [Marrëdhënia jonë] u ndal sepse ne jetonim në Suedi dhe ai nuk donte të jetonte më në Suedi,” tha ajo, duke shtuar se ai nuk kishte shfaqur më parë sjellje të dyshimta.
Vitet e fundit, Franca është ballafaquar me sulme me thikë, të kryera shpesh nga të rinj të vetmuar me prejardhje në krime të vogla dhe me disa lidhje islamike. Është e qartë se ky sulm është i një natyre tjetër.
Deri më tani, shumica e politikanëve janë të kujdesshëm që të mos kërcejnë në përfundime, por është e pashmangshme që sulmi të ushqehet në debatin mbi emigracionin.
Dubai ka dëshmuar prej kohësh se po përgatitet për… gjëra të mëdha. Mund të qeshim me ironi me lojën e fjalës, por realiteti është se ndërtimet më të mëdha në planet po zhvillohen aktualisht në metropolin e famshëm të Emirateve të Bashkuara Arabe.
Pavarësisht nëse po flasim për ishuj artificialë apo rrokaqiejt me muzeume dhe hotele, Dubai po përjeton një “bum” zhvillimi të përqendruar gjithmonë në turizmin luksoz. Mega projekti i fundit është Aeroporti Ndërkombëtar Al Maktoum, “metropoli i aeroportit” i parë në botë që do kushtojë 33 mld $.
Aeroporti i madh po ndërtohet për të thyer rekorde, duke synuar të bëhet aeroporti më i madh në botë deri në vitin 2050, me një kapacitet deri në 255 milionë pasagjerë në vit.
I njohur gjithashtu si Dubai World Central, aeroporti në Jebel Ali përfshin 35,000 hektarë. Për krahasim, Aeroporti Ndërkombëtar i Los Anxhelosit shtrihet në 3,500 hektarë, ndërsa Aeroporti Ndërkombëtar John F. Kennedy (kapaciteti 29 milionë pasagjerë në vit) përfshin 4,930 hektarë.
Ambasadori i Mbretërisë së Bashkuar në Shqipëri, Alastair King-Smith, tha se mbeten të shqetësuar për tensionet në veri të Kosovës duke shtuar se po bashkëpunojnë për të qetësuar gjendjen.
Smith u shpreh se duhet të ketë zgjidhje, ndërsa sugjeron tërheqjen e policisë nga ndërtesat e komunave, zgjedhje të reja dhe themelimin e Asociacionit.
“Aktualisht qeveria e Kosovës ka një rol vërtet të rëndësishëm; ata duhet të tërheqin forcat e policisë speciale nga ndërtesat e komunave dhe duhet t’i krijojnë mundësinë kryetarëve të komunave të kryejnë funksionet e tyre nga lokacione të tjera. Gjithashtu, ne mbështesim thirrjen për zgjedhje të reja lokale dhe gjithëpërfshirëse dhe bashkëpunimin për themelimin e Asociacionit të Komunave me Shumicë Serbe, siç është rënë dakord mes qeverive. Kështu që së bashku me partnerët tanë ndërkombëtarë, Francën, Gjermaninë, Shtetet e Bashkuara, ju përmendët BE-në, Italinë dhe të tjera me radhë, ne po bashkëpunojmë për të qetësuar situatën dhe për të gjetur një zgjidhje”, tha King-Smith.
Në këtë intervistë për “Report TV”, ai tha se rajoni i Ballkanit Perëndimor është shumë i rëndësishëm.
“Ne po përballemi me një luftë në Evropë me pushtimin e Ukrainës nga Rusia dhe tani po shohim të ndizen tensione të tjera. Ne nuk duhet ta lejojmë që kjo të ndodhë. Ky rajon është i rëndësishëm dhe stabiliteti i tij është i rëndësishëm, kështu që ne u bëjmë thirrje të gjithëve të gjejnë mënyrën të kapërcejnë të gjithë këto probleme dhe të gjejnë një zgjidhje që të funksionojë vërtet, jo vetëm për qeverinë, por më e rëndësishmja dhe kryesorja është që duhet të funksionojë për qytetarët dhe qytetarët e çdo komuniteti”, deklaroi ambasadori britanik në Tiranë.
Profesori amerikan, Daniel Serwer, i cili është njohës i zhvillimeve politike në Ballkan, ka thënë se Washingtoni dhe Brukseli e kanë mbështetur Serbinë duke shpresuar që ta bëjnë Beogradin të riorientohet drejt Perëndimit dhe larg Moskës.
Sipas tij, lejimi i dërgesës së armëve nga Beogradi në Ukrainë e ka përforcuar këtë shpresë.
Por thekson se nuk ka asnjë shenjë se presidenti Vuçiq është i përgatitur të dobësojë lidhjet e tij me Moskën dhe Pekinin.
Përkundrazi, thekson Serwer, presidenti serb ka vazhduar të refuzojë të përafrohet me sanksionet e BE-së ndaj Rusisë (dhe me shumë aspekte të tjera të politikës së jashtme të BE-së).
“Ai mban një derë të hapur për bashkëpunimin ushtarak me Rusinë, si dhe teknologjinë dhe investimet kineze të sigurisë”.
Profesori amerikan shtoi se kryeministri Kurti ka refuzuar kërkesat e BE-së dhe SHBA-së që ai beson se do të kufizojnë sovranitetin e vendit dhe do të kërcënojnë integritetin e tij territorial.
“Por ai ka nevojë për mbështetjen perëndimore që Kosova të mbijetojë dhe të lulëzojë”.
Serwer thekson se në veri të Mitrovicës shërbimet e sigurisë së Beogradit dhe rrjetet e tyre aleate të krimit të organizuar ende mbizotërojnë.
Kurti shton ai, është përpjekur të thyejë kontrollin e tyre duke zbatuar ligjin e Kosovës në veri, por deri më tani përpjekjet e tij nuk duket se kanë pasur sukses.
“Kryeministri duhet t’u tregojë serbëve në veri të Kosovës se çfarë mund të fitojnë ose duke lejuar kryetarët e komunave të zënë vendet e tyre që u takon ose duke mbajtur zgjedhje të reja. Ai duhet të propozojë një statut për AKS, pa kompetenca ekzekutive. SHBA dhe BE duhet t’i tregojnë Kurtit se çfarë mund të fitojë duke filluar negociatat për ASMM”.
“Imagjinoj, për shembull, që një falje e sinqertë për represionin vrasës të regjimit të Millosheviqit në vitet 1990 dhe një ofertë për të negociuar kompensim, veçanërisht për gratë e përdhunuara nga forcat serbe të sigurisë, do të shkonte shumë”, u shpreh Serwer.
Sipas ekspertit amerikan, Brukseli dhe Ëashingtoni kanë përdorur vetëm ‘karrota’ me Beogradin.
Ata thotë ai e lavdërojnë në mënyrë të papërshtatshme si dikush që e ka kthyer Serbinë drejt perëndimit.
“Ata shmangin çdo kritikë për korrupsionin e nivelit të lartë dhe sjelljen autokratike në Serbi. SHBA-ja vetëm pëshpërit kundërshtimin ndaj mobilizimit të tij dhe vendosjes së ushtrisë serbe në kufirin me Kosovën, përdor në mënyrë të papërshtatshme citon “të dyja palët” në kritikimin e rebelëve serbë kundër trupave të KFOR-it dhe ofron mbështetje të bollshme politike dhe ekonomike”.
“Vuçiq fut karotat në xhepa dhe vazhdon miqësinë me Moskën dhe Pekinin. Është koha që qetësimi të marrë fund”, shkroi Serwer në peacefare.
Shtëpia e Bardhë ka bërë publik raportin vjetor të statistikave të ushtarëve të Shteteve të Bashkuara të Amerikës të pajisura për luftim.
Ky raport flet për aktivitetet ushtarake të SHBA-ve në luftim të terrorizmit si dhe operacionet në Kosovë në bashkëpunim me Organizatën e Traktatit të Atlantikut të Veriut.
“Shtetet e Bashkuara vazhdojnë të kontribuojnë me forca në Forcën e Kosovës (KFOR), të udhëhequr nga Organizata e Traktatit të Atlantikut të Veriut në bashkëpunim me autoritetet lokale, partnerët dypalësh dhe institucionet ndërkombëtare, për të penguar armiqësitë e ripërtërira në Kosovë”, thuhet në raport.
Në mesin e 3,800 pjesëtarëve të Forcës së Sigurisë së Kosovës, vazhdon raporti i Shtëpisë së Bardhë, përafërsisht 591 prej tyre janë ushtarë amerikanë.
Ndërkaq numri i Forcave të Armatosura të Shteteve të Bashkuara të caktuara ose dislokuara në vendet tjera të Organizatës së Traktatit të Atlantikut të Veriut në Evropë, duke përfshirë ato të vendosura për të siguruar aleatët e SHBA-ve dhe për të penguar agresionin e mëtejshëm rus në Ukrainë, është 80 mijë.
Ambasadori amerikan në Beograd, Christopher Hill ka thënë se Shtetet e Bashkuara të Amerikës kanë probleme thelbësore me kryeministrin e Kosovës, Albin Kurti lidhur, për shkak të papajtueshmëruve për situatën e tensionuar në veri.
Hill ka thënë se është i pasigurt nëse Kurti ende mund të konsiderohet partner i SHBA-së, por ka thënë se ky vendim i takon ambasadës amerikane në Prishtinë.
“Mendoj se kemi një problem me zotin Kurti, ai nuk është i gatshëm ta pranojë. Më duket se kemi disa probleme shumë thelbësore me të, nëse ende mund ta konsiderojmë si partner. Por këtë vendim ia lë ambasadës sonë në Prishtinë”, ka deklaruar Hill te Zëri i Amerikës.
Hill ka theksuar se Kurti duhet të bëjë disa ndryshime në qasjen e tij lidhur me veriun, nëse dëshiron që të llogaris si partner te SHBA dhe BE. Sipas tij, kjo gjë i është bërë e qartë nga ambasadori në Prishtinë, Jeffrey Hovenier.
Ai ka thënë se nuk mban mend të ketë pasur ndonjëherë ndarje kaq të mëdha mes Prishtinës dhe Uashingtonit.
“… mendoj se zoti Kurti është informuar plotësisht nga ambasadori ynë në Prishtinë, nga zoti Lajçak dhe zoti Escobar, se do të duhet të bëjë disa ndryshime nëse dëshiron të llogarisë tek ne si mik dhe partner. Nuk mbaj mend të kem parë ndonjëherë ndarje kaq të thella në marrëdhëniet ndërmjet Prishtinës dhe Uashingtonit”, ka thënë Hill.
Ndërkohë, duke folur për presidentin serb, Aleksandar Vuçiq, Hill ka thënë se e konsiderojnë partner të mirë.
Christopher Hill: Ne e konsiderojmë ai si një partner të mirë, ai dhe qeveria e tij janë partnerë të mirë në këtë proces. Dhe shpresojmë që kështu të vazhdojë. Ne do të donim që ai të bënte ç’është e mundur për të shtensionuar situatën dhe shohim që tashmë po shohim shenja se zbatohet. Kjo është shumë pozitive”, është shprehur Hill.
Kryeministri i Shqipërisë, Edi Rama, ka deklaruar se e ka dorëzuar një draft-statut të Asociacionit të Komunave me Shumicë Serbe, te presidenti francez, Emmanuel Macron, dhe kancelari gjerman, Olaf Scholz. Për këtë dokument, ai ka thënë se i ka vënë në dijeni edhe presidentin e Këshillit Evropian dhe amerikanët.
Lidhur me këtë çështje ish-presidenti i Kosovës, Fatmir Sejdiu, u shpreh se “kjo bën që të konsiderohet si një çarje të raporteve, por që qeveria e Kosovës duhet të japë përgjigje të drejtpërdrejtë për këtë çështje, pavarësisht që, tash për tash, sikur që e tha edhe vetë kryeministri Rama, është konfidenciale”, deklaroi ish-presidenti Sejdiu.
Ish-presidenti Sejdiu foli edhe për kohën kur zhvilloheshin takime të niveleve të larta shtetërore në periudhën e shpalljes së pavarësisë dhe takimet e të sotmes, për të cilat i vlerëson si dy kontekste të ndryshme kohore, qoftë për nga tema, për nga intensiteti, qoftë për nga involvimi i partnerëve ndërkombëtarë në procese të caktuara.
Për periudhën e kohës së shpalljes së pavarësisë, ish-presidenti Sejdiu shprehet se ka qenë e përshkuar me një mbështetje të pa rezervë të ndërkombëtarëve, veçmas të vendeve të QUINT-it, sidomos në momentin e shpalljes së pavarësisë së vendit.
Në këtë vazhdë, ish-presidenti Sejdiu kujtoi edhe procesin e dialogut, që, sipas tij, ka pasur rënie e ngritje, varësisht nga rrethanat.
Qyteti i Delchevo-s në Maqedoninë e Veriut është përmbytur pasditen e së enjtes pas reshjeve të dendura të shiut.
Autoritetet vendase kanë bërë të ditur se stuhia ka zgjatur për rreth 2 orë, duke përmbytur të paktën 60 shtëpi, ndërsa shumë makina kanë mbetur nën ujë.
Në rrjetet sociale, janë publikuar edhe pamje nga përmbytjet e mëdha.