Author: ATVLive

Trupi gjykues në çështjen kundër Pjetër Shalës, nuk e ka pranuar kërkesën e mbrojtjes për të shtyrë mbylljen e paraqitjes së provave nga ana e ZPS, që është planifikuar të ndodh më 6 korrik. Urdhri është marrë në seancën ku ka dëshmuar për të dytën ditë me radhë dëshmitari i prokurorisë, Marek Gasior.

Kryetarja e trupit gjykues, Mappie Veldt Foglia, ka thënë se nuk kanë vlerësuar asnjë arsye për të shtyrë mbylljen e paraqitjes së provave nga ZPS përtej 6 korrikut 2023.

“Trupi gjykues nuk shikon asnjë arsye për të shtyrë mbylljen e paraqitjes së provave nga ZPS dhe konstaton se kjo nuk është në interes të zhvillimit efektiv të procedurave. Kjo nuk cenon vendimmarrjen e turpit gjykues për kërkesën e ardhshme për leje për apelim nëse kjo do të miratohet dhe nëse Gjykata e Apelit do të tjetërsojë vendimin atëherë do të vendosim se si do të vijomë më tej. Për rrjedhojë kërkesa e mbrojtjes kundërshtohet”, ka thënë kryegjykatësja.

Megjithatë, trupi gjykues ka miratuar kërkesën e mbrojtjes së Shalës, për të shtyrë kundërpyetjet për dëshmitarin 4823, duke marrë vendim që ato të fillojnë të hënën e 3 korrikut.

Mbrojtja kishte kërkuar këtë në mënyrë që të mund të përgatisin pyetjet për këtë dëshmitar.

“Pasi ka marrë parasysh parashtrimet e palëve dhe duke marrë parasysh faktin që salla e gjyqit nuk është e disponueshme të enjten dhe të premten, trupi gjykues vendos të shtyjë kundërpyetjet për dëshmitarin 04826 deri javën që vjen, ne kemi marrë konfirmim se kemi përkthyes të disponueshëm për 3 korrik dhe kjo do të thotë që do të vazhdojmë me marrjën në pyetje të dëshmitarit, nga mbrojtja, të hënën. Gjithashtu për të siguruar kryerjen e efikase dhe të shpejtë të procesit gjyqësor, trupi gjykues i bën thirrje mbrojtjes që të sigurojë një pozitë të tillë që të ketë të disponueshëm ekspertët e vet gjatë gjithë javës që vjen dhe të ketë të disponueshëm dy dëshmitaret ekspertë”, ka thënë kryetarja e trupit gjykues.

Pas këtyre urdhrave, seanca ka vazhduar me dëgjimin e dëshmitarit të ZPS-së, Marek Gasior, në cilësinë e ekspertit mjekoligjor nga Polonia.

Ai është intervistuar nga prokuroria dhe nga mbrojtësi i viktimave.

Gjykimi ndaj Pjetër Shalës do të vazhdojë të hënën me 3 korrik.

Edhe këtë seancë, Pjetër Shala e ka ndjekur nga qendra e paraburgimit, ku ndodhet prej marsit të vitit 2021.

Sipas Speciales “Krimet për të cilat akuzohet Shala u kryen përafërsisht midis 17 majit 1999 dhe 5 qershorit 1999 kundër personave që u mbajtën të ndaluar në fabrikën e metalit në Kukës(Shqipëri), që pretendohet se përdorej prej Ushtrisë Çlirimtare të Kosovës”.

Pjetër Shala u arrestua më 16 mars 2021 nga autoritetet belge dhe u transferua në Hagë më 15 prill të atij viti, në bazë të një kërkese për bashkëpunim në zbatimin e fletarrestit dhe urdhrit për transferim lëshuar nga Dhomat e Specializuara të Kosovës./KosovaPress

Shtëpia e Bardhë tha të hënën se është “shumë shpejt për të ditur” se çfarë ndikimi do të ketë në rajon revolta e Wagner-it e fundjavës së kaluar në Rusi.

“Presidenti është i fokusuar në mbështetjen e Ukrainës. Ne nuk po mbajmë anë në këtë çështje të brendshme,” u tha gazetarëve zëdhënësi i Këshillit të Sigurisë Kombëtare të Shtëpisë së Bardhë, John Kirby, gjatë një konference të përditshme për shtyp.

Por ai shtoi: “Historia e këtij konflikti ka treguar se ushtria ruse nuk është aq e lavdëruar sa ndoshta ata donin të karakterizoheshin”.

Duke e kthyer fokusin përsëri te lufta 16-mujore e Ukrainës, ai tha: “Dhe përsëri, të mos tingëllojë si një rekord i thyer, por ajo që ne po përpiqemi të bëjmë është të sigurohemi që ukrainasit të kenë gjithçka që u nevojitet për të qenë të suksesshëm në atë luftë”.

Kirby gjithashtu nuk pranoi të komentojë nëse qeveria amerikane i konsideron ngjarjet që ndodhën me Grupin Wagner një “kryengritje, një grusht shteti, një tentativë për grusht shteti ose një rebelim të armatosur”.

Kryetari i Vushtrrisë, Ferit Idrizi dhe ministri i Bujqësisë, Pylltarisë dhe Zhvillimit Rural, Faton Peci, kanë parë nga afër nisjen e punimeve për ndërtimin e kanalit të sistemi të ujitjes në fshatin Sfaraqak, raporton EO.

Ky kanal është rreth 2 500 metra i gjatë që mbulon një sipërfaqe prej 200 hektarë.

Ministri i Bujqësisë, Faton Peci, tha se krahas këtij investimi kapital, bujqit në Vushtrri kanë përfituar edhe 2.6 milionë euro grante.

“Është kënaqësi edhe për mua që si ministër të marrë pjesë në fillimin e punimeve të këtij investimi kapital që përkundër që nuk është një shifër shumë e madhe, efektin në ekonomi do ta ketë të konsiderueshme për shkak se flitet për 200 hektarë tokë bujqësore dhe pjellore, të cilat do ta kenë mundësinë që nga viti i ardhshëm të jenë në sistem të ujitjes”.

“Mua më gëzon ky fakt aq më tepër që jemi në njërën prej komunave më bujqësore në Kosovë dhe përveç këtij investimi kapital të këtij projekti dhe dje e kam analizuar numrin që kanë përfituar nga Komuna e Vushtrrisë del që përveç këtij investimi kapital janë edhe 2.6 milionë euro grante që janë në proces të implementimit të Komunës së Vushtrrisë”, tha Peci.

Kryetari i Vushtrrisë, Ferit Idrizi, tha se kostoja e këtij projekti kap shifrën e 196 mijë euro dhe se komplet financohet nga Ministria e Bujqësisë, raporton EO.

“Së pari të falënderoj ministër për këtë donacion që e ke dhënë për Komunën e Vushtrrisë për bujqit vushtrrias, do të futën në sistem të ujitjes rreth 200 hektarë tokë”.

“Vlera totale e projektit është 196 mijë euro dhe komplet e financuar nga Ministria e Bujqësisë dhe sa herë që kemi pas nevojë, ministrin Peci e kemi pas afër nesh”, tha Idrizi.

Është botuar në Fletoren Zyrtare shkarkimi i Safet Gjicit si kryetar i Bashkisë së Kukësit.

Vendimi mban datën 16 qershor, ndërsa ai është marrë me arsyetimin “për shkak të shkeljeve të rënda”

“VENDIM Nr. 367, datë 16.6.2023 PËR SHKARKIMIN NGA DETYRA TE KRYETARIT TË BASHKISË KUKËS, Z. SAFET GJICI

Në mbështetje te neneve 100 e 115, pika 1, të Kushtetutës, dhe të shkronjës “a”, të nenit 62, të ligjit nr. 139/2015, “Për vetëqeverisjen vendore”, të ndryshuar, me propozimin e Kryeministrit, Këshilli i Ministrave VENDOSI: Shkarkimin nga detyra, për shkak të shkeljeve të rënda, të kryetarit të Bashkisë Kukës, z. Safet Gjici. Ky vendim hyn në fuqi menjëherë dhe botohet në Fletoren Zyrtare”.

Pas publikimit të një videoje nga zyra e tij, ku ai shfaqet në momente intime, Gjici dha dorëheqjen, më pas erdhi shkarkimi i tij, ndërsa të shtunën, me urdhër të SPAK, ish-kreu i Bashkisë së Kukësit u vu në pranga. Gjykata e Posaçme miratoi kërkesën e prokurorisë për akuzën e “korrupsionit pasiv”. Fillimisht, SPAK kishte nisur hetimet për “shpërdorim detyre”.

Më 16 qershor, Gjici u shfaq në një video të publikuar online duke kryer marrëdhënie seksuale me një grua në zyrën e tij në Bashkinë e Kukësit. Më vonë, u publikua një tjetër fragment i asaj videoje ku Gjici diskutonte me vajzën në fjalë për mundësinë e akordimit të saj të një tenderi për menaxhimin e qenve endacakë të qytetit të Kukësit.

Në një postim në rrjetet sociale pas publikimit të videos, Gjici kërkoi falje dhe tha se prej disa kohësh kishte lidhje intime me vajzën në fjalë, si dhe akuzoi kundërshtarët politikë.

Haxhilerët që ndodhen në Arabinë Saudite për të përmbushur obligimin fetar të Haxhit arritën në Arafat, raporton Anadolu.

Haxhilerët u nisën grupe-grupe për në Arafat, 25 kilometra larg Mekës, duke filluar dje nga ora 16:30 sipas kohës lokale. Shumica e automjeteve që transportonin haxhilerët u nisën për në Arafat.

Haxhilerët të cilët u udhëzuan në rajonet ku do të qëndronin, e kaluan natën nëpër çadra të klimatizuara.

Haxhinjtë që do të largohen nga Arafati në mbrëmje do të shkojnë më pas në Muzdelife.

Haxhinjtë që do të mbledhin gurët për t’i hedhur shejtanit në Muzdelife, më pas do të shkojnë në zonën e “Xhemaratit” në Mina. Në ditën e parë të Kurban Bajramit, haxhilerët do të hedhin shtatë gurë mbi “shejtanin e madh”.

Pas gjuajtjes me gurë dhe prerjes së kurbanit haxhinjtë do të dalin nga ihrami. Në rastin e parë do të kryejnë tavafin e detyrueshëm dhe Saj’in dhe kështu, ata do të kenë përfunduar haxhin e tyre.

Haxhilerët do të hedhin nga 7 gurë tek “shejtani” i vogël, i mesëm dhe i madh”, përkatësisht, në të njëjtin rajon në ditën e dytë dhe të tretë të Bajramit si përkujtim i praktikës së profetit Ibrahim.

Më pas haxhilerët do të shkojnë në Medine dhe do të vazhdojnë adhurimet dhe vizitat e tyre këtu. Haxhinjtë që do të largohen nga Meka do t’i japin lamtumirën Qabesë dhe qytetit me tavafin e tyre të lamtumirës.