Sërish ka ndodhur një përplasje midis deputetëve të Partisë Demokratike të Kosovës dhe atyre të Lëvizjes Vetëvendosje.
Kjo ka ndodhur në momentet kur mazhoranca në Kuvend po insiston në mbajtjen e seancës së Kuvendit dhe kjo po kundërshtohet nga PDK-ja.
Në këto momente, ka pasur shtyrje dhe tensione midis deputetëve të PDK-së dhe LVV-së. Tensionet dhe gjuha e ashpër mes tyre po vazhdon.
Ambasadori amerikan në Serbi, Christopher Hill, tha më 13 korrik se Shtetet e Bashkuara nuk dëshirojnë të kenë ndonjë marrëdhënie me shefin e Agjencisë për Siguri dhe Informacion të Serbisë (BIA), Aleksandar Vulin, por se sanksionet e vendosura ndaj tij si individ nuk nënkuptojnë marrëdhënie më të këqija me Serbinë.
“SHBA-ja studioi me kujdes Vulinin dhe aktivitetet e tij, dhe arriti në përfundimin se ai nuk është dikush që duam në Amerikë. Në këtë mënyrë, sanksionet janë një mënyrë për të mbrojtur SHBA-në”, u tha Hill gazetarëve, gjatë një turneu në zonën arkeologjike Belo Bërdo.
Më 11 korrik, Zyra për Kontrollin e Aseteve të Huaja në Departamentin amerikan të Thesarit vendosi në listën e sanksioneve drejtorin e BIA-s, Vulin.
Sipas Thesarit, Vulin është përfshirë në afera korruptive për “të shtyrë përpara agjendat e tij politike dhe interesat e tij personale në kurriz të paqes dhe stabilitetit në Ballkanin Perëndimor”.
Ambasadori Hill tha se mendon që Serbia është në rrugën e duhur dhe se marrëdhëniet mes SHBA-së dhe Serbisë janë të mira, dhe po përmirësohen.
“SHBA-ja dëshiron të ndihmojë Serbinë, e cila tregon qartë se dëshiron të jetë pjesë e institucioneve perëndimore. Ne do ta ndihmojmë atë në masën që dëshiron vetë Beogradi”, tha Hill.
Gjatë një vizite në punimet për restaurimin dhe rehabilitimin e një zone arkeologjike, të cilat po kryhen nga Qeveria e Serbisë dhe mbikëqyren nga Ambasada amerikane, Hill shtoi se Vulin nuk do të mund të marrë një vizë amerikane.
Nënsekretari i Departamentit të Thesarit të SHBA-së, Brian E. Nelson, deklaroi në shpjegimin e sanksioneve kundër Vulinit, më 11 korrik, se vendimi e mbante atë përgjegjës për aktet e supozuara korruptive dhe destabilizuese që mundësonin edhe aktivitetet keqdashëse të Rusisë në rajon.
Ai shtoi se Departamenti i Thesarit nuk do të përmbahet nga shënjestrimi i aktorëve që “abuzojnë me pozitat e tyre për përfitime personale, në të njëjtën kohë duke minuar autoritetet demokratike në Ballkanin Perëndimor”
Partia e Vulinit, Lëvizja Socialiste, e cila është pjesë e koalicionit me Partinë Progresive Serbe në pushtet, hodhi poshtë akuzat dhe kritikoi SHBA-në. Vetë Vulin nuk është deklaruar publikisht.
Presidenti i Serbisë, Aleksandar Vuçiq, ende nuk i është përgjigjur pyetjeve nëse do të zëvendësojë Vulinin, por ka paralajmëruar hetim për akuzat e SHBA-së.
Para se të bëhej shef i BIA-s, Vulin ka shërbyer si ministër i Mbrojtjes, dhe si ministër i Brendshëm.
Peci: Dhuna në Kuvend është instaluar nga Vetëvendosje, mbetet aty derisa ata nuk kërkojnë falje
Read more
Kryetari i Kuvendit të Kosovës, Glauk Konjufca, ka thënë se episodi i rrahjes së sotme në sallën plenare në Kuvend është ditë e rëndë për Kosovën.
Ai ka kërkuar nga të zgjedhurit e popullit dhe kabineti qeveritar të ruajnë qetësinë dhe të hapin një kapitull të ri, pas incidentit të sotëm, transmeton KP.
Konjufca tha se kryeministri Albin Kurti ka hequr dorë nga fjala e tij në seancë me qëllim të uljes së tensioneve në Kuvend.
“Ne i kemi betejat tona, ne i kemi mosmarrëveshjet tona. Si forca politike i kemi papajtueshmëritë tona të thella ndonjëherë, por ato mospajtime gjithmonë, le të themi se i bëjnë nder vendit nëse i mbajmë në nivelin e funksionimit të domosdoshëm, minimumit normal të funksionimit të institucioneve demokratike që monitorohen prej qytetarëve por edhe botës së jashtme. Po iu bëj thirrje si kryetar i Kuvendit që të merrni me qetësi punën që e bëjmë së bashku dhe të përpiqemi të kalojmë këtë ditë të vështirë dhe momente të vështira për vendin tonë. Pra po iu thërras për një minimum të një sjellje që ma merr mendja që do t’i gëzonte qytetarët e Republikës sonë nëse e shohin. Ne nuk i kemi kursyer fjalët më të rënda për njëri-tjetrin, por prapë ato janë fjalë. Por në momentin kur kalohet nga fjalët në goditje, ato si veprime pastaj nuk janë veprime që trajnohen vetëm në Kuvend. Me ato pastaj është një pushtet tjetër i veçantë që merret. A është për deputetin si postin më fisnik e denjë një sjellje e tillë. Meqenëse është kështu, bisedova edhe me kryeministrin ai po heq dorë nga fjala e tij”, tha ai.
Konjufca shtoi se sjellje të tilla si të sotmet në Kuvend nuk dëshiron të përsëriten.
“Kemi pas probleme të natyrave të tjera, por jo në kuptimin fizik drejt fytyrës, kokës dhe trupave me ia mësyrë njëri-tjetrit siç e pamë sot në Kuvendin e Kosovës. Këtë nuk ia dëshirojmë askujt dhe kjo është një sjellje që natyrisht do të gjykohet prej qytetarëve të Republikës së Kosovës dhe nuk do të kisha dëshiruar të përsëritet më në këtë Kuvend”, përfundoi ai.
Rrahja në Kuvend ka nisur gjatë kohës sa ishte duke folur kryeministri Albin Kurti. Ishte deputetja e PDK-së Ganimete Musliu që i ka vendosur Kurtit në foltore një fotografi në të cilën ai shihet me hundë të gjatë si “Pinoku”. Ajo fotografi është larguar dhe shqyer nga zëvendëskryeministri Besnik Bislimi.
Pas kësaj deputeti i PDK-së, Mërgim Lushtaku, është afruar ta lagë me ujë kryeministrin Kurti. Ministri Hekuran Murati është ngritur për të mbrojtur atë me një dosje e Lushtaku është kthyer që ta lagë edhe Besnik Bislimin. Pastaj aty janë afruar disa prej ministrave, deputetët e pushtetit e të PDK-së të cilët janë përfshirë në rrahje.
Kreu i Qeverisë Albin Kurti shumë shkurt e ka komentuar përleshjen e ndodhur në Kuvend e Kosovës.
“Nuk frikësohem nga këto sulme” u tha ai shkurt gazetarëve, teksa po shkonte nga Qeveria në Kuvend ku pritet të vazhdojë seanca, transmeton EO.
Kurti, ka thënë se Policia e Kosovës nuk do të tërhiqet nga veriu dhe se vetëm 25 për qind e policëve do të zhvendosen nga objektet komunale të katër komunave në veri.
Derisa ka qenë duke folur për marrëveshjen për depërshkallëzimin e situatës në veri para deputetëve të Kosovës, Kurti ka deklaruar se Policia e Kosovës s’ka qenë kurrë më e pranishme sesa tash në veri.
Këto komente Kurti i ka bërë në seancën e Kuvendit që është mbajtur të enjten, para se ministrat e deputetët e pushtetit të përlesheshin fizikisht me deputetët e PDK-së.
Kryetari i Lidhjes Demokratike të Kosovës, Lumir Abdixhiku deklaroi se e dënojnë dhunën dhe se ajo nuk ka vend në Kuvendin e Kosovës. Ai tha se inicuesit e gjuhës së dhunës, nuk mund të mbajmë ligjërata sot.
Ai para gazetarëve u shpreh se LDK do të mbajë në frymën e saj, siç u shpreh ai, shembullin e sjelljes politike dhe demokratike në vend.
“Pamjet e dhunës në Kuvendin e Kosovës, në sallën parlamentare nuk e kanë vendin asnjëherë. Nuk e kishin vendin as sot, nuk e kanë pasur vendin as në të shkuarën. Gjithsesi, inicuesit, mirëmbajtësit e gjuhës së dhunës, të përçarjes dhe ndarjes politike në vend, nuk kanë çfarë të na mbajnë ligjerata sot. Ata kanë ushqyer në vazhdimësi dhunën, me veprime, me mjete, por gjithesi edhe me gjuhë. Ne dënojmë dhunën e sotme dhe konsiderojmë se nuk ka vend në Kuvend. Dhe LDK do të mbajë në frymën e vet themeltare dhe identitare, sjelljen e saj demokratike si shembull i sjelljes politike në vend”, tha Abdixhiku.
Kreu i LDK-së shtoi se nënkryetari Kujtim Shala është në takimin me kryetarin e Kuvendit e Kosovës, Glauk Konjufca.
“Këto elementet të nxitjes së dhunës janë të qarta për të gjithë se i patë. I patë dhe goditjet dhe sjelljet të tilla, për neve dhuna është dhunë dhe dënohet, por ne do të shohim edhe për burimin e kësaj dhune. Pra, nivelin polarizues që kemi në vend dhe mosaftësinë të sillemi si akterë normal politik përbashkues në sfidat përpara të Kosovës. Ne duhet të jemi përgjegjës karshi veprimeve tona dhe do të bëjmë përpjekje për të sjellur sjellje demokratike normale”, shtoi Abdixhiku.
Gjatë fjalimit të kryeministrit Albin Kurti në seancën e sotme të Kuvendit, deputetë e ministra janë përfshirë në përleshje fizike.
Deputeti i Partisë Demokratike të Kosovës në drejtim të foltores së Kuvendit, Mërgim Lushtaku, ka hedhur ujë në drejtim të Kurtit dhe zëvendëskryeministrit Besnik Bislimi. Ky i fundit e ka hedhur shishen në drejtim të tij. Më pas, Lushtaku e ka shtyrë ministrat Hekuran Murati dhe Albulena Haxhiun. Kjo e fundit është dëgjuar të thotë “a je normal”.
Ndërkaq, kryetari i Kuvendit të Kosovës, Glauk Konjufca ka thirrur Policinë brenda sallës së parlamentit.
Ambasadori amerikan Jeff Hovenier, ka reaguar pas rrahjes që ndodhi sot në Kuvendin e Kosovës, për çka ka thënë se dhuna nuk është mjet për të shprehur mospajtimet.
Sipas tij, “është për të ardhur keq të shohësh atë që ka ndodhur sot në Kuvendin e Kosovës”.
Hovenier ka shkruar në Twitter se përdorimi i dhunës nuk është mjet për të shprehur mospajtimet.
“Është për të ardhur keq të shoh se çfarë ka ndodhur sot në Kuvendin e Kosovës. Do të doja të mos kisha nevojë ta thosha këtë: përdorimi i dhunës nuk është kurrë një mjet i pranueshëm për të shprehur mospajtimet. Në çdo demokraci shpesh ka dallime të forta, por dallimet duhet të zgjidhen përmes diskursit – një qëllim themelor i çdo legjislativi të demokracisë”, ka shkruar Hovenier.
Ministrja e Drejtësisë, Albulena Haxhiu, përmes një statusi në facebook, ka bërë një reagim për dhunën e sotme në Kuvendin e Kosovës.
Ajo ka paralajmëruar opozitën se do të përballen me ligjin për korrupsionin dhe pasurimin antiligjor.
“Nuk do mend për të kuptuar se të tillët dëshpërimisht hedhin grushte, pasi që të njejtët po përballen e do të përballen me ligjin, për të gjitha krimet dhe korrupsionin e po ashtu pasurimin e tyre të jashtëligjshëm”, ka shkruar ajo.
Ajo në këtë postim thotë se Qeveria Kurti nuk ka asnjë ministër a zëvendësministër të kontrolluar nga Beogradi.
“Ata që nxitën dhe ndihmuan për kaq vite krimin e organizuar në veri, si Lista Srbska nuk janë në koalicion siç ndodhte me qeveritë e dikurshme. Madje krerët e tyre po hetohen nga institucionet e drejtësisë, e bashkëpunëtorë të tjerë të këtyre strukturave po arrestohen në veri të Mitrovicës. Një sërë hapash janë ndërmarrë drejt shtrirjes së sovranitetit e ligjvënies në veri të vendit, atje ku pushtetet e kaluara kishin lejuar madje edhe amnistuar krimet e strukturave paralele serbe për vite me radhë”, ka shkruar ajo. /atvlive.tv
Avokatit Besnik Berisha i është caktuar masa e ndalimit prej 48 orëve.
Lajmin për KosovaPress e konfirmuar sot avokati i Berishës, Naim Rudari.
Berisha dhe tre persona të tjerë janë arrestuar për tri vepra penale.
Prokuroria Themelore në Ferizaj ka bërë të ditur se avokati Besnik Berisha dhe tre personat e tjerë me inicialet N.Xh., I.S., dhe R.C., janë arrestuar për shkak të dyshimit të veprave penale “Dhënia e ndihmës kryesve pas kryerjes së veprave penale”, “Pengimi i të provuarit apo procedurës zyrtare” dhe “Ushtrimi i ndikimit”.
“Prokuroria Themelore në Ferizaj, njofton opinionin publik se në bashkëpunim me Policinë e Kosovës, Drejtorinë për Hetimin e Krimeve të Rënda (DHKR) në Prishtinë dhe njësive tjera mbështetëse, në bazë të urdhëresës së lëshuar nga Gjykata Themelore në Ferizaj për lëshimin e urdhëresës për kontroll dhe sekuestrim të përkohshëm të shtëpive dhe lokaleve përcjellëse, sot, ka realizuar një aksion ku, me ç’rast gjatë këtij aksioni, janë kontrolluar dhe bastisur shtëpitë dhe lokalet përcjellëse të gjashtë (6) personave të pandehur dhe me vendim të Prokurorit të Shtetit, janë arrestuar katër (4) të dyshuar me inicialet N.Xh., B.B., I.S., dhe R.C., për shkak të dyshimit të veprave penale “Dhënia e ndihmës kryesve pas kryerjes së veprave penale” nga neni 380 paragrafi 1 të Kodit Penal të Republikës së Kosovës, “Pengimi i të provuarit apo procedurës zyrtare “ nga neni 386 paragrafi 1, nën paragrafi 1.5 të KPRK-së dhe “Ushtrimi i ndikimit” nga neni 424 paragrafi 1 të KPRK-së.”, ka informuar prokuroria./KP
Deputeti i LDK-së, Armend Zemaj, nuk e ka konsideruar sulm gjuajtjen e ujit nga deputeti i PDK-së, Mërgim Lushtaku, ndaj kryeministrit Albin Kurti.
Zemaj ka thënë se përleshja e sotme nuk tregon se ka përçarje mes opozitës e pozitës, sepse mes tyre nuk ka as bashkëpunim. Sipas tij, pushteti koordinohet me Listën Serbe.
“Në një shtet demokratik, incidentet duhet të jenë demokratike. Mos gjykoni diçka me sjellë një përfundim brenda Kuvendit dhe deputetëve të saj. Unë ndoshta s’i kam parë të gjitha pamjet. Çfarë konsideroni ju sulm? Gjuajtja me ujë nuk është sulm. Nuk ka përçarje as nuk ka bashkëpunim. Pushteti nuk koordinohet me opozitën. Pushteti koordinohet me Listën Serbe dhe kriminelët”, ka thënë Zemaj.
Këshilli Prokurorial i Kosovës (KPK) ka reaguar ndaj vendimit të Qeverisë së Kosovës për miratimin e Projektligjit të ri për Këshillin Prokurorial të Kosovës, në mbledhjen e mbajtur të mërkurën, duke e cilësuar si tentativë të re për të cenuar pavarësinë e saj.
KPK-ja, më këtë rast, thekson se miratimi i Ligjit të ri për KPK-në është vazhdim i procesit të njëanshëm të Qeverisë së Kosovës, i cili, njëkohësisht, minon bashkëpunimin për procesin e reformës, të shprehur përmes nënshkrimit të Deklaratës së Përbashkët të Zotimit nga institucionet tona relevante të drejtësisë.
“Këshilli Prokurorial, deklaron se përkundrejt asaj që Gjykata Kushtetuese e ka shpallur të pavlefshëm Ligjin për Këshillin Prokurorial të Kosovës, pas kërkesës për vlerësim të kushtetutshmërisë së tij, Qeveria e Kosovës nuk është mjaftuar me verdiktin e organit më të lartë kushtetues në vend dhe ka vazhduar me moskoordinimin e plotë dhe ka miratuar me nxitim dhe në mënyrë të njëanshme këtë Projektligj tejet të rëndësishëm, pa përfillur fare Strategjinë për Sundimin e Ligjit dhe procesin e reformës në drejtësi dhe duke injoruar plotësisht bashkërendimin e nevojshëm me sistemin prokurorial dhe partnerët vendorë dhe ndërkombëtarë”, thuhet në reagimin e KPK-së.
Siç njofton KPK-ja, sistemi prokurorial ka përkrahur reformën e filluar, përfshirë ndryshimet ligjore, për të cilat është shprehur vullneti i angazhimit të përbashkët, porse kjo nismë ligjore është dashur të realizohet në kohën e duhur, andaj çdo rikthim i iniciativave dhe i vendimeve të këtij lloji, pa respektuar ndarjen e pushteteve dhe pa koordinimin e ndërsjellë, siç ka ndodhur në të kaluarën dhe siç po ndodhë edhe tani nga ana e Qeverisë së Kosovës, është kthim i madh prapa dhe sjellë dështim.
“KPK-ja paralajmëron se do të ndjekë të gjitha rrugët ligjore dhe kushtetuese për ta kontestuar përmbajtjen e Ligjit të ri të KPK-së, pasi që i njëjti cenon mandatin kushtetues dhe pavarësinë e sistemit prokurorial, si dhe anashkalon standardet ndërkombëtare, duke pamundësuar funksionalizimin e tij dhe duke e bërë atë lehtësisht të ndikuar nga politika”, thuhet në komunikatë.
Këshilli Prokurorial i Kosovës, potencon po ashtu se mbetet i përkushtuar për të mbështetur proceset e përgjithshme reformuese dhe angazhohet që së bashku me të gjithë partnerët vendorë dhe ndërkombëtarë, të bashkëveprojë në çdolloj nisme që ka për qëllim reformimin e nevojshëm, në mënyrë që të fuqizohet sundimi i ligjit në Kosovë dhe sistemi prokurorial të bëjë punën e vet të pavarur, profesionale, llogaridhënëse dhe transparente.