ATV

Author: ATVLive

  • Qeveria po përgatitet që zgjedhjet e reja në veri të jenë të pasfidueshme

    Qeveria po përgatitet që zgjedhjet e reja në veri të jenë të pasfidueshme

    Qeveria po përgatitet për zgjedhjet e reja në lokale në Mitrovicë të Veriut, Zveçan, Leposaviq dhe Zubin Potok – por, vetëm përmes iniciativës së qytetarëve dhe pas votimit për shkarkim të kryetarëve aktualë.

    Pa dhënë detaje se çfarë saktësisht është duke u bërë, kryeministri Albin Kurti tha se institucionet do të sigurohen që baza ligjore për shkaktimin e zgjedhjeve të reja në këto katër komuna, të jetë gati sa më shpejtë të jetë e mundur.

    Meqë asnjëherë më parë nuk janë shkaktuar zgjedhje referuar Nenit 72 të Ligjit për Vetëqeverisje Lokale, kryeministri Kurti tha se nuk e di sa kohë merr plotësimi i bazës ligjore e procedurale dhe procesi zgjedhor.

    “Ne çfarë po punojmë në këto ditë dhe do të vazhdojmë të punojmë edhe gjatë muajve të gushtit, kur është pushim në institucione, është që të sigurohemi që kjo përvojë e re që do të kemi, me ndërprerjen e mandateve të katër kryetarëve në veri, të ketë mbështetjen dhe garancitë ligjore dhe procedurale. Pra, duhet të sigurohemi që procesi i këtillë, që do të jetë përvojë e re për ne, të jetë aq i sigurt sa që i pasfidueshëm në kuptim legal dhe juridik”, tha Kurti.

    Detaje nuk dha as ministri Elbert Krasniqi, i cili iu referua vetëm legjislacionit ekzistues.

    “Baza ligjore, e cila del dhe buron nga Ligji për Vetëqeverisje Lokale, për të cilën unë kam kompetencë të flasë, tjerat pastaj janë në kompetencë të Komisionit Qendror të Zgjedhjeve”, tha Krasniqi.

    Pasi theksoi se shkaktimi i zgjedhjeve të reja përmes iniciativës qytetare, votimit për shkarkim të kryetarëve merr kohë, Selatin Kllokoqi nga D+, thekson se KQZ-ja duhet të plotësojë disa akte të brendshme para se të shkohet me këtë formë.

    “Mirëpo edhe këtu është një pengesë, sepse parashihet që kjo proceduralisht të rregullohet me rregullore nga KQZ-ja, e cila nuk është e rregulluar. Pra, hipotetikisht nëse do të ndodhte që kryetarët të mos japin dorëheqje, procedura e shkarkimit do të kërkonte kohë… Dhe, pjesa tjetër është edhe KQZ-ja duhet të aktivizohej që të aprovonte rregulloret e caktuara, të cilat e rregullojnë këtë çështje”, tha Kllokoqi.

    Si hap për deeskalim, Qeveria mbështetë zgjedhjet e reja në katër komunat me shumicë serbe në veri të Kosovës – por vetëm në pajtim me kuadrin ligjor dhe kushtetues, jo përmes dorëheqjes së kryetarëve të zgjedhur më 23 Prill.

    Qeveria, po ashtu, e lidhë procesin e ri zgjedhor me heqjen e masave ndëshkuese nga Bashkimi Evropian. /atvlive.tv

    Edicionin Qendror të lajmeve në ATV e gjeni në videon më poshtë:

  • Policët e rinj serb në veri vazhdojnë punën përkundër kërcenimeve

    Policët e rinj serb në veri vazhdojnë punën përkundër kërcenimeve

    Policët e rinj të Veriut po i bëjnë patrullat e para bashkë me kolegët me përvojë.

    76 zyrtarët e sapopranuar, 46 prej të cilëve janë të komunitetit serb, në vitin e parë do të trajnohen, për t’u ndarë pastaj nëpër sektorë.

    “Atëherë dihet saktë se për çfarë statusi aplikojnë. A do jenë hetues, a patrullë apo njësi të specializuara…”, tha zëvendësdrejtori i Policisë në Mitrovicën e Veriut, Veton Elshani.

    Meqenëse shumica janë serbë, zëvendësdrejtori i policisë, Veton Elshani, beson në efekt pozitiv.

    “Ajo që ne besojmë që do të ndodhë është rritja e efektivitetit dhe efikasitetit të patrullimeve. Meqenëse policët e rinj kanë më shumë qasje në komunitet, në problemet e tyre dhe në zgjidhjen e problemeve të tyre”, tha Elshani.

    Ndërkohë në rrjete sociale në Serbi, janë bërë publike fotografitë e disa prej policëve të rinj, të cilët veç tjerash konsiderohen si tradhtarë.

    Kërcënimet e tilla, megjithëse nuk kanë ndikuar në punë, do të trajtohen seriozisht.

    “Kemi pasur diskutime me kolegët tanë. Nuk shohin kërcënime serioze. Janë më shumë komente sociale nga shtete tjera. Por, nëse kemi kërcënime serioze, do ta marrim me seriozitet dhe do t’i trajtojmë seriozisht. Dhe do marrim veprime”, tha Elshani.

    Ndërkohë, për këtë çështje kanë reaguar kryeministri i Kosovës, Albin Kurti e ambasadori i Shteteve të Bashkuara, Jeff Hovenier.

    “Fushata në platforma sociale që ka për qëllim kërcënimin e frikësimin, janë të papranueshme, edhe pse jemi të bindur se janë të shpërfillura. Ata janë policë të Kosovës sepse janë profesionistë, sepse janë qytetarë që kanë dashurinë për vendin”, tha Kurti.

    “Ndaj plotësisht këto shqetësime. Kërcënimet dhe frikësimet ndaj individëve që shërbejnë për të mirën e të gjithë qytetarëve të Kosovës janë krejtësisht të papranueshme. Siç e kam thënë edhe më parë, Policia e Kosovës ekziston për t’iu shërbyer të gjitha komuniteteve në Kosovë dhe përbërja e saj duhet të pasqyrojë
    diversitetin e Kosovës”, tha Hovenier.

    Konkurset për pranimin e policëve të rinj, po bëhen në vazhdën e zëvendësimit të policëve serbë që kishin dhënë dorëheqje në nëntor të vitit të kaluar. /atvlive.tv

    Edicionin Qendror të lajmeve në ATV e gjeni në videon më poshtë:

  • KRU “Prishtina” me aksion për shkyçje në Graçanicë

    KRU “Prishtina” me aksion për shkyçje në Graçanicë

    Krejt këtë revoltë e shkaktoi pasi që pronarja e këtij lokali në Graçanicë kuptoi se do t’i ndërpritet furnizimi me ujë në lokalin e saj, për shkak të borxhit mbi 2 mijë euro ndaj Kompanisë Rajonale të ujësjellësit “Prishtina”.

    Por përkundër rezistimit, shkyçja u bë.

    “I kam fëmijët katër vjet dhe gjashtë vjet, mos e dhashtë zoti të më shkyçësh nga uji, se a e di çfarë ndodh më pas. Pse keni ardhur në fshatin tim, kjo s’është e shqiptareve kjo është e serbëve”, thotë një qytetar.

    Aksioni vazhdoi edhe nëpër fshatra. Në Llapnasellë, u shkyç shtëpia e një qytetari tjetër serb me mbi 3 mijë euro borxh.

    Pas aksionit, banorët lokalë akuzuan Kompaninë e ujësjellësit për veprime politike.

    Zëdhënësja e kompanisë rajonale “Prishtina”, tha se ky aksion është vazhdimësi e aksionit që javë më parë filloi në Prishtinë, duke paralajmëruar se shkyçjet do të jenë intensive.

    “Sot jemi në komunën e Graçanicës për t’i shkyçur të gjithë konsumatorët që kanë kyçje ilegale e borxhe ndaj KRU-së. Ky aksion do të vazhdojë deri vonë në Graçanicë e do të vazhdojë edhe në Llapnasellë, shumë prej nesh kanë filluar të politizojnë këtë çështje, por ne s’kemi filluar me këtë komunë por me Prishtinën”, tha Arjeta Mjeku nga KRU “Prishtina”.

    Një aksion i tillë do të vazhdojë edhe ditën e nesërme, kësaj radhe në komunën e Shtimes. Shuma e borxheve ndaj kësaj kompanie kalon vlerën e mbi 45 milionë eurove. /atvlive.tv

    Edicionin Qendror të lajmeve në ATV e gjeni në videon më poshtë:

  • Keqpërdorimet me pensione, projektligji për skemën pensionale nuk ofron zgjidhje

    Keqpërdorimet me pensione, projektligji për skemën pensionale nuk ofron zgjidhje

    Sipas statistikave, në muajin qershor në Kosovë kanë marrë pensionin bazik të moshës, mbi 148 mijë qytetarë.

    Por një numër i konsiderueshëm i tyre, ani pse jetojnë jashtë vendit, përfitojnë edhe pensionin e pleqërisë në Kosovë.

    Këtë keqpërdorim që vazhdon me vite, nuk pritet ta rregullojë as Ligji i ri për skemën pensionale, që tashmë është miratuar në Qeverinë e Kosovës.

    Këtij projektligji i është shtuar vetëm një paragraf, përmes të cilit iu ndalohet qytetarëve që nuk janë rezidentë në Kosovë të marrin pensione, nëse nuk janë të pranishëm fizikisht në vend mbi 183 ditë brenda vitit.

    Kjo praktikë e keqpërdorimit nuk po shihet se do të arrihet të zgjidhet vetëm përmes kësaj pike të ligjit.

    “Duhet një kontroll më i mirë, në vitin 2015 janë larguar më shumë se 10 mijë veta bazuar në një udhëzim administrativ, janë larguar nga skema pensionale. Ky nen mundohet ta përkufizojë më mirë, por te implementimi duhet të gjendet një mënyrë që të identifikohet që në bazë të ligjit nuk i takon pensioni”, tha Selatin Kllokoqi nga organizata “D+”.

    Për zbatimin e mëtejmë të kësaj dispozite, në projektligj thuhet se Ministria përgjegjëse mund të nxjerrë akt nënligjor.

    Deputeti nga partia në pushtet, Eman Rrahmani, beson se më konkretisht zgjidhjen e kësaj do ta mundësojë njëra nga marrëveshjet ndërkombëtare tashmë të miratuara.

    “Para rreth një muaji është kaluar një marrëveshje ndërkombëtare, e cila është financuar rreth 40 milionë euro për reformë në skemën pensionale dhe besoj që me ato reformë do të trajtohet secila problematikë. Edhe çështjen të cilën ju e ngritët, por edhe shumë çështje të tjera do të rregullohen përmes marrëveshjeve ndërkombëtare, që parashihet edhe një konsulent që do të vijë nga jashtë për të ndihmuar në skemën pensionale”, tha deputeti i LV-së, Eman Rrahmani.

    Ndërkohë, projektligji për skemën pensionale do të shqyrtohet në lexim të parë në Kuvend të premten. /atvkuve.tv

    Edicionin Qendror të lajmeve në ATV e gjeni në videon më poshtë:

  • Vdes në moshën 56-vjeçare, legjenda e muzikës Sinead O’Connor

    Vdes në moshën 56-vjeçare, legjenda e muzikës Sinead O’Connor

    Ka vdekur në moshën 56-vjeçare legjenda irlandeze e muzikës, Sinead O’Connor, raportojnë mediat e huaja, transmeton atvlive.tv.

    18 muaj më parë, asaj i kishte vdekur edhe djali i saj 17-vjeçar, Shane.

    Ylli irlandez i muzikës, tash e disa vite ishte në betejë me shëndetin mendor.

    Këngëtarja e mirënjohur nga Dublini publikoi 10 albume në studio, ndërsa kënga e saj “Nothing Compares 2” u u emërua singulli numër një botëror në vitin 1990 nga Billboard Music Awards.

    O’Connor iu dha çmimi inaugurues për albumin klasik irlandez në RTÉ Choice Music Awards në fillim të këtij viti.

    Këngëtarja mori një ovacion të fortë teksa ia kushtoi çmimin, për “I Do Not Want What I Haven’t Got”, “secilit dhe çdo anëtari të komunitetit të refugjatëve të Irlandës”.

    Muzikantja e njohur me famë botërore, në vitin 2018 kishte ndryshuar emrin në Shuhada’ Sadaqat, pasi që ishte konvertuar në fenë islame. /atvlive.tv

  • BE-ja nuk ndryshon mendje, në fuqi masat ndëshkuese ndaj Kosovës

    BE-ja nuk ndryshon mendje, në fuqi masat ndëshkuese ndaj Kosovës

    Masat ndëshkuese ndaj Kosovës, vazhdojnë të jenë në fuqi edhe pas pajtueshmërisë mes Kosovës dhe BE-së në Bratislavë dhe tërheqjes së 25% të forcave policore nga ndërtesat komunale në 4 komunat veriore.

    Që nga 3 qershori, qëndrimi i 27 shteteve anëtare të BE-së nuk ka ndryshuar, konfirmoi ambasadori Tomas Szunyog.

    “Ka kushte dhe kërkesa të caktuara dhe ka edhe një deklaratë që thotë se do të ketë pasoja negative nëse ato lloj kërkesash dhe kushtesh nuk plotësohen. Pra, ne jemi ende të udhëhequr nga deklarata e 3 qershorit… Nuk ka asnjë sanksion… Por, nëse po mendoni për masat, qëndrimi ynë i konfirmuar nga shtetet anëtare i 3 qershorit, është ende i njëjtë”, tha Szunyog.

    Por, kryeministri Albin Kurti pret që masat të hiqen sa më parë.

    “Ne jemi duke u përgatitur që të kemi zgjedhje të parakohshme në veri të Kosovës. Ndërkaq, për këto masat që janë ndërmarrë ndaj neve e të cilat janë quajtur edhe të përkohshme, edhe të kthyeshme, natyrisht që presim që ato të hiqen sa më parë dhe është e logjikshme që kjo do të ndodhë paraprakisht. Pra, nuk bëhet fjalë për kushtëzime, por bëhet fjalë për rendin logjik të gjërave që duhet ta ketë si hap të parë zbatimin e dakordimit ndërmjet Bislimit dhe Lajçakut për 3 qershorin”, tha Kurti.

    Ditë më parë, zëvendëskryeministri i Kosovës, Besnik Bislimi, në një takim me gazetarët tha se Kosova nuk duhet të shpallë zgjedhje në veri, pa u hequr masat ndëshkuese të vendosura nga Bashkimi Evropian.

    Masat ndëshkuese ndaj Kosovës përfshijnë: pezullimin e përkohshëm të Marrëveshjes së Stabilizim-Asociimit, mosftesën e Kosovës në takime të nivelit të lartë dhe pezullimin e vizitave dypalëshe, përveç atyre që përqendrohen në adresimin e krizës në veri të Kosovës në kuadër të kornizës së dialogut të lehtësuar nga BE-ja. /atvlive.tv

    Edicionin Qendror të lajmeve në ATV e gjeni në videon më poshtë:

  • Dy pushues nga Kosova rrezikojnë mbytjen në Shëngjin, 30-vjeçarja në gjendje të rëndë

    Dy pushues nga Kosova rrezikojnë mbytjen në Shëngjin, 30-vjeçarja në gjendje të rëndë

    Dy pushues nga Kosova, kanë rrezikuar jetën mesditën e sotme në bregdetin e Shëngjinit.

    Një 40-vjeçar dhe një 30-vjeçare nga Kosova kanë rrezikuar të mbyten dhe kanë qenë pushuesit ata që i kanë nxjerr në breg, ku janë marrë menjëherë nga ambulanca dhe transportuar në gjendje të rëndë për jetën.

    40-vjeçari e ka gjendjen më të stabilizuar, ndërsa e reja është në terapi intensive dhe në gjendje të rëndë për jetën, pasi kishte pirë shumë ujë. /tch

  • Ky është filmi që s’duhet ta humbisni për asgjë në botë

    Ky është filmi që s’duhet ta humbisni për asgjë në botë

    Vetëm nëse ke jetuar në Tibet (ose Japoni, ku “Oppenheimer” nuk po transmetohet) mund të të ketë shpëtuar fenomeni global “Oppenheimer”, një film i jashtëzakonshëm, emocionues, që të mban peng para ekranit për plot 3 orë. “Oppenheimer” sjell historinë e Julius Robert Oppenheimer, shkencëtari që drejtoi “Projektin Manhattan”.

    “Projekti Manhattan” – nisma kërkimore dhe zhvilluese që çoi në prodhimin e armëve të para bërthamore, gjatë Luftës së Dytë Botërore. Projekti u drejtua nga SHBA, me mbështetjen e Kanadasë dhe Mbretërisë së Bashkuar.

    Ai krijoi bombën atomike, e cila u hodh në Hiroshima dhe Nagasaki, duke shkaktuar rreth 220 mijë viktima. Viktimat u llogaritën gjatë kohës kur u hodh dhe pasojave që la rrezatimi dhe ekspozimi ndaj uraniumit.

    Ka pa fund arsye pse duhet ta shohësh “Oppenheimer” dhe 10 prej tyre po t’i themi ne:

    Është një film nga legjendari Christopher Nolan

    Christopher Nolan

    Christopher Nolan është nga ata regjisorë që ka lënë gjurmë të pashlyeshme në kinema dhe mendja gjeniale që qëndron pas kryeveprave: “Inception”, “Interstellar”, “Dunkirk”, “The Dark Knight”, “The Prestige”, “Memento” e shumë të tjerë. Edhe nëse s’i ke parë këta filma, jemi 100% të bindur që ke dëgjuar të flitet për to.

    Nolan njihet si një regjisor kompleks, i cili ka një botëkuptim unik në kinema dhe filmat e tij, shpeshherë janë një ndërthurje e bukur mes filozofisë dhe shkencës.

    Bazohet në histori të vërtetë

    J.Robert Oppenheimer

    Vetë Nolan e ka quajtur J.Robert Oppenheimer si “njeriun më të rëndësishëm në botë” dhe krijimi i tij, së bashku me grupin e shkencëtarëve që e ndihmuan, ndryshoi botën. Filmi bazohet në veprën biografike që ka fituar edhe çmimin Pulitzer, “American Prometheus: The Triumph and Tragedy of J. Robert Oppenheimer”.

    Filmi eksploron në mendjen e shkencëtarit, ideologjitë e tij, pendesat, mendimet dhe mënyrën se si shteti përdor mendjet brilante në interesin e vet. Burri që qëndronte në krye të “Projektit Manhattan” dhe që zhvilloi bombën e parë atomike në botë, u ngrit në qiell dhe më pas u përplas për disa çaste, brutalisht në tokë.

    Do zbulosh se si u krijua bomba e parë atomike

    Ti mund ta dish ndikimin e jashtëzakonshëm që pati bomba e parë atomike që vrau një numër të madh njerëzish në Japoni, por ndoshta nuk e di se si është krijuar ajo. Filmi të tregon pikërisht arsyet se pse Amerika, me mbështetjen e Mbretërisë së Bashkuar dhe Kanadasë, krijoi armën më të fuqishme dhe më të paparashikueshme që shkaktoi një prej tragjedive më të mëdha në histori.

    Do të kuptosh më shumë mbi betejën ndaj nazistëve dhe “luftën e ftohtë” mes Rusisë dhe SHBA-së.

    Gjatë Luftës së Dytë Botërore, kur Gjermania ishte një kërcënim shumë serioz, SHBA konkurroi me nazistët kokë më kokë, për të krijuar armën më të fuqishme që çeli një derë të re në botën e bombës atomike. Në një luftë plot suspancë kundër nazistëve, Oppenheimer duhet të sfidonte kohën dhe shkencëtarët nazistë, për të krijuar atë që mendjet e tjera njerëzore as nuk e imagjinonin.

    Por, më pas, Hitleri vdiq, nazistët ranë dhe bomba ndryshoi trajektoren për t’u hedhur në Hiroshima dhe Nagasaki.

    A kishte ndonjë shans që bomba të dilte jashtë kontrollit dhe reaksioni zinxhir të mos ndalej kurrë dhe të shkatërronte të gjithë botën? “Shanset janë afër zeros”, u shpreh Oppenheimer, por mundësia ekzistonte.

    Vetë kasti e adhuron këtë film

    Në rolin e gjeneralit Leslie Groves, i cili e vendosi Oppenheimer në krye të “Projektit Manhattan”, është Matt Damon. Ai është shprehur se kishte bërë një pauzë nga aktrimi dhe kjo pauzë do të përfundonte vetëm nëse Christopher Nolan do ta merrte në telefon. Fatmirësisht, kjo ndodhi.

    Gjithashtu, Robert Downey Jr, i cili luan rolin e admiralit Lewis Strauss, u shpreh se ky është filmi më i mirë ku ka luajtur.

    Kast i jashtëzakonshëm

    Filmi ka bërë bashkë yje fantastikë, duke nisur që nga Cillian Muprhy, Emily Blunt, Matt Damon, Robert Downey Jr, Florence Pugh, Cassey Affleck, Rami Malek, Kenneth Branagh etj.

    Nuk ka CGI

    Filmi nuk ka CGI (Imazhe të gjeneruara me kompjuter) dhe të dhuron ndjesinë e plotë të kinemasë dhe ngjarjes që ka ndodhur. Siç është shprehur dhe Nolan: “CGI është komode për t’u parë, por realiteti s’është aq i rehatshëm. Duhet të ketë një ndikim, një pickim. Duhet të jetë i bukur dhe kërcënues njëkohësisht”.

    Tregon mendjen e komplikuar të një gjeniu

    Oppenheimer është pa diskutim një karakter dhe personazh shumë i ndërlikuar, i cili nuk bëri kompromis me vizionin e tij, ama pati një gijotinë të tmerrshme: Ndërgjegjjen.

    Sigurisht, “Oppenheimer” mund të konsiderohet si një “film i gjatë”, por na beso, ia vlen në çdo sekondë!

  • Djali i Enver Zymberit: Shpresoj që një ditë ta vesh uniformën e Policisë

    Djali i Enver Zymberit: Shpresoj që një ditë ta vesh uniformën e Policisë

    Në 12-vjetorin e vrasjes së pjesëtarit të Forcave Speciale të Policisë së Kosovës, Enver Zymberi, varrin e vizitoi djali i tij, Sokoli.

    Aty, ai rrëfeu për dhimbjen dhe mungesën që e ka për babin e tij, teksa shpreson që një ditë do ta vesh uniformën e Policisë së Kosovës.

    Në një rrëfim për Ekonomia Online, Sokoli tha se vendin e prindit të tij s’mund ta zëvendësoj askush por që po ia del falë të familjarëve të tij.

    “Po normal është e vështirë por falë Zotit nuk jam vet, e kam nënën, i kam motrat e axhallarët dhe normal që vendin e tij nuk mund ta zëvendësojë askush, por jemi bërë të fortë”, u shpreh ai.

    “Padyshim që jam duke punuar në atë drejtim dhe shpresoj që një ditë do ta vesh uniformën e Policisë së Kosovës”, u shpreh ai.

  • Nesër i jepet lamtumira e fundit profesorit Haqif Mulliqi

    Nesër i jepet lamtumira e fundit profesorit Haqif Mulliqi

    Gazetari dhe profesori i dramaturgjisë, Haqif Mulliqi, u nda papritmas nga jeta gjatë ditës së djeshme. Lajmin për vdekjen e tij e dhanë familjarët nëpërmjet postimeve në rrjete sociale.

    Vajza e të ndjerit, Getoarbë Mulliqi, ka dhënë detajet e ceremonisë mortore e cila pritet të mbahet nesër në orën 15:00 në varrezat e kryeqytetit.

    “Mbledhja Komemorative ne nder te bashkeshortit, babit, vellaut, mikut e profesorit Haqif Mulliqi, i cili na la papritur, do te mbahet te Enjten, me 27 korrik 2023, nga ora 13:00 ne Biblioteken Kombetare. Ndersa, ceremonia e varrimit, do te mbahet diten e njejte, nga ora 15:00, ne varrezat e kryeqytetit. Per ngushellime dyert do t’i hapim me 28,29 dhe 30 Korrik – ne Hotel Grand, nga ora 08:00 deri ne ora 13:00”, shkroi ajo.