ATV

Author: ATVLive

  • SHBA-ja sanksionon anëtaren serbe të Presidencës së Bosnjës dhe krerë të Republikës Sërpska

    SHBA-ja sanksionon anëtaren serbe të Presidencës së Bosnjës dhe krerë të Republikës Sërpska

    Shtetet e Bashkuara kanë vendosur sanksione ndaj anëtares serbe të Presidencës së Bosnje e Hercegovinës, Zhelka Cvijanoviq, dhe zyrtarëve të tjerë të lartë nga Republika Sërpska, për shkak të minimit të Marrëveshjes së Paqes të arritur në Dejton më 1995.

    Në listën e sanksioneve të Departamentit amerikan të Thesarit janë futur edhe kryetari i Parlamentit të Republikës Sërpska, Nenad Stevandiq, kryeministri i këtij entiteti, Radovan Vishkoviq dhe ministri i Drejtësisë në Republikën Sërpska, Millosh Bukejlloviq.

    Thesari tha se zyrtarët e sanksionuar janë drejtpërdrejtë përgjegjës për inkurajimin e miratimit të vendimeve nga Asambleja Kombëtare e entitetit të Republikës Sërpska për të shpallur vendimet e Gjykatës Kushtetuese të Bosnjës si të pavlefshme në këtë entitet. Me këtë veprim, sipas SHBA-së, ata kanë kërcënuar zbatimin e Marrëveshjes së Dejtonit.

    “Këto veprime kërcënojnë stabilitetin, sovranitetin dhe integritetin territorial të Bosnje e Hercegovinës dhe paqes të fituar me mund të mbështetur nga Marrëveshja e Dejtonit. Kjo sjellje kërcënon më tej trajektoren e të ardhmes së shtetit dhe integrimit të suksesshëm në institucionet euroatlantike”, tha nënsekretari i Thesarit për Terrorizëm dhe Financimin e Inteligjencës, Brian E.Nelson.

    “Ne do të vazhdojmë të mbështesim popullin e Bosnje e Hercegovinës në përpjekjet e tyre për sundim të ligjit dhe të sigurohemi që paqja dhe prosperiteti të mbizotërojnë”, shtoi ai.

    Presidenti i Republikës Sërpska, Millorad Dodik, ka sponsorizuar ligjin që i shpallë të pavlefshme vendimet e Gjykatës Kushtetuese të Bosnjës në territorin e këtij entiteti.

    Vetë Dodik më herë është futur në listën e sanksioneve amerikane. Më 5 janar të vitit 2022, SHBA-ja e akuzoi atë se drejtëpërdretjë apo në mënyrë të tërthortë kishte shkelur, penguar apo kërcënuar që Marrëveshja e Dejtonit të mos zbatohej, por edhe nën akuza se është përfshirë në aktivitete korruptive.

    Edhe në korrik të vitit 2017, Thesari e kishte akuzuar Dodikun se po pengonte zbatimin e Marrëveshjes së Dejtonit.

    Pas miratimit të ligjit sa i përket vendimeve të Kushtetueses, përfaqësuesi i lartë ndërkombëtar në Bosnje, Christian Schmidt më 1 korrik përdori autoritetin e tij duke shfuqizuar këtë legjislacion dhe publikisht dënoi ligjin, që tha se minon rendin kushtetues, sundimin e ligjit dhe ndarjen e pushtetit.

    Pavarësisht vendimit të Schmidtit, Dodik e nënshkroi ligjin më 7 korrik.

    Dodik po ashtu ka thënë se nuk do të pranojë vendimet e Schmidtit, ndërkaq Asambleja e Republikës Sërpska po ashtu ka marrë vendim që vendimet e përfaqësuesit të lartë të mos publikohen në Republikën Sërpska.

    Në korrik, presidenti i Republikës Sërpska ka paditur Schmidin, duke thënë se ai po vepron në Bosnje pa autorizimin e Këshillit të Sigurimit të Kombeve të Bashkuara.

    Udhëheqësit në Republikën Sërpska vazhdimisht kanë deklaruar se nuk e njohin Schmidin, i cili u emërua më 2021 si përfaqësues i lartë. Emërimi i tij nuk u konfirmua nga Këshilli i Sigurimit, për shkak se në këtë institucion, emërimin e tij e kundërshtuan Kina dhe Rusia. Megjithatë, shtetet e tjera anëtare të këshillit tha se konfirmimi i emërimit të Schmidit nuk kërkohet.

    Çfarë ndikime kanë këto sanksione?
    Thesari tha se të gjitha pronat e personave të sanksionuar që janë në SHBA apo janë nën kontrollin e shtetasve amerikanë duhet të raportohen në Zyrën për Kontrollin e Aseteve të Huaja.

    Gjithashtu, çdo subjekt që është nën pronësi, qoftë në mënyrë të drejtpërdrejtë apo tërthorazi nga personat e sanksionuar, po ashtu do të bllokohen. Sanksionet parashohin edhe bllokimin e transaksioneve nga shtetasit amerikanë me të sanksionuarit, përveç nëse marrin licencë nga Zyra për Kontrollin e Aseteve të Huaja. Ndalesat po ashtu përfshijnë edhe kontribute apo ofrimin e fondeve mallrave apo shërbimeve për të sanksionuarit./REL

  • Simiq “kërcënon” me mospjesëmarrje në zgjedhjet e reja në veri të Kosovës

    Simiq “kërcënon” me mospjesëmarrje në zgjedhjet e reja në veri të Kosovës

    Nënkryetari i Listës Serbe, Igor Simiq në një intervistë për media ka “kërcënuar” me mospjesëmarrje në zgjedhje të reja në veri të Kosovës, pa u plotësuar disa kushte.

    “Pa plotësuar kushtet që na i kanë vënë qytetarët, nuk mund të diskutojmë mundësinë e zgjedhjeve”, tha Simiq.

    Nga ana e tyre, analistët në Kosovë e kanë komentuar këtë deklaratë të Simqit, duke thënë se bazuar në këtë shteti serb e ka arritur qëllimin për krijimin e trazirave në Kosovë.

    Sipas tyre, zgjedhjet do të bëhen për t’i tërhequr serbët nga veriu, kësisoj edhe Simiq po i kundërshton ato.

  • ​KE publikon raportin “screening” për Shqipërinë

    ​KE publikon raportin “screening” për Shqipërinë

    Komisioni Evropian ka publikuar raportin “screening” për Shqipërinë, një vit pas hapjes së negociatave Shqipëri-Bashkimi Evropian dhe përfundimit të raundit të parë të takimeve.

    Në raport është evidentuar rrugëtimi i Shqipërisë drejt BE-së, problematikat kryesore në vend, por edhe arritjet në reforma kyçe.

    Raporti screening i Komisionit Evropian po ashtu paraqet paraqitur rekomandimet për hapat pasardhës që duhen ndërmarrë në kuadër të procesit të negociatave për anëtarësim.

    Raporti nis me gjetjen se Shqipëria ka vendosur në rendin e saj kushtetues themelet e një shteti demokratik dhe po ndjek konsolidimin e institucioneve të saj demokratike, ndërsa më pas ndalet tek zgjedhjet dhe financimi i fushatave.

    “Kuadri ligjor dhe institucional lejon një proces zgjedhor demokratik. Nevojiten përpjekje të mëtejshme për të adresuar disa paqartësi ligjore dhe mospërputhje të theksuara nga OSBE/ODIHR-i, si dhe rekomandime të tjera të përbashkëta të OSBE/ODIHR-it dhe Komisionit të Venecias. Legjislacioni për mediat në fushatat zgjedhore, veçanërisht për dezinformimin dhe platformat online duhet të forcohet më tej. Për financimin e partive politike dhe fushatave zgjedhore, rishikimi i kuadrit legjislativ parashikon më shumë transparencë, por kapacitetet zbatuese duhet të konsolidohen”, thuhet në raport.

    Në përmbledhjen e gjetjeve për gjyqësorin KE del në përfundimin se Shqipëria është e përgatitur në mënyrë të moderuar për funksionimin e gjyqësorit.

    “Kuadri legjislativ dhe institucional i Shqipërisë ka një nivel të lartë përputhshmërie me Legjislacionin e BE-së dhe standardet evropiane. Megjithatë, Shqipëria duhet të konsolidojë dhe thellojë më tej zbatimin e kuadrit ligjor dhe institucional të reformuar, veçanërisht në lidhje me forcimin e mëtejshëm të pavarësisë së gjyqtarëve dhe të sistemit gjyqësor dhe prokurorial, konsolidimin e llogaridhënies dhe integritetit në të gjitha nivelet, aksesin dhe cilësinë e drejtësisë si dhe ofrimit efikas të drejtësisë”, thuhet në raport.

    Duke vijuar me luftën kundër korrupsionit, raporti del në përfundimin se Shqipëria ka nivel përgatitjejeje në luftën kundër korrupsionit.

    “Kuadri legjislativ dhe institucional i Shqipërisë për anti-korrupsionin është pjesërisht në përputhje me Legjislacionin e BE-së. Korrupsioni është i përhapur në shumicën e fushave të jetës publike dhe të biznesit duke përfshirë të gjitha degët e qeverisjes qendrore dhe vendore dhe institucionet dhe mbetet një zonë me shqetësim serioz. Në përgjithësi, masat kundër korrupsionit kanë një ndikim të kufizuar në sektorët veçanërisht të cenueshëm”, thuhet në raport.

    Raporti i KE jep edhe rekomandimet.

    “Shqipëria duhet të trajtojë kompleksitetin e lartë të kuadrit të parandalimit të korrupsionit dhe të sigurojë efikasitetin e tij veçanërisht në sektorët e rrezikut si prona, prokurimi publik dhe financat publike. Për sa i përket zbatimit, Shqipëria duhet të bëjë përparim vendimtar drejt zgjidhjes së problemit të mosndëshkueshmërisë dhe natyrës së përgjithësuar dhe të përhapur të korrupsionit, konsolidimit të kapaciteteve operacionale dhe njerëzore të SPAK-ut dhe gjykatave të SPAK-ut si dhe drejt krijimit të një historie solide në shtypjen sistematike të korrupsionit, veçanërisht. në nivel të lartë, duke përfshirë konfiskimin përfundimtar të aseteve. Shqipëria duhet të trajtojë në mënyrë sistematike dhe efektive rekomandimet e Grupit të Shteteve të Këshillit të Evropës kundër Korrupsionit (GRECO)”, vijon raporti.

    Raporti prek gjerësisht përpjekjet për reformimin e administratës publike.

    “Shqipëria është mesatarisht e përgatitur në kuadrin e saj strategjik për reformën e administratës publike. Shqipëria duhet të zhvillojë dhe miratojë në kohë kuadrin e saj të ri strategjik për të siguruar vazhdimësinë e reformave. Duhet të sigurohet konsekuenca e përgjithshme dhe qëndrueshmëria financiare e strategjisë. Sistemi i koordinimit të politikave për zbatimin e reformave mbetet kompleks dhe koordinimi dhe drejtimi politik për zbatimin dhe monitorimin e reformave duhet të rritet”, thuhet në raport.

    “Shqipëria është mesatarisht e përgatitur për shërbimin e saj publik dhe zhvillimin e burimeve njerëzore. Kuadri rregullator i shërbimit civil nuk është gjithëpërfshirës dhe ka boshllëqe legjislative, duke përfshirë mungesën e një politike shpërblimi dhe mungesën e një klasifikimi të harmonizuar të vendeve të punës. Dispozitat për rekrutimin dhe promovimin e bazuar në merita ekzistojnë, por duhet të zbatohen në mënyrë të vazhdueshme në të gjitha nivelet në praktikë”, vijon raporti.

    Raporti vë në dukje se Shqipëria është mesatarisht e përgatitur për sistemin e saj të ofrimit të shërbimeve.

    “Dixhitalizimi i ofrimit të shërbimeve publike dixhitale është përmirësuar ndjeshëm, por duhet të garantohet aksesi ndaj shërbimeve administrative për të gjithë qytetarët dhe bizneset dhe trajtimi i barabartë për të gjithë”, thuhet në raport.

    Në lidhje me financat, raporti del në përfundimin se Shqipëria është mesatarisht e përgatitur për sistemin e saj të menaxhimit të financave publike.

    “Shqipëria ka një kuadër të mirë-krijuar për menaxhimin e financave publike. Megjithatë, ka nevojë për përmirësimin e mëtejshëm të kuadrit buxhetor afatmesëm dhe rritjen e kapaciteteve institucionale për monitorimin e rreziqeve fiskale dhe menaxhimin e investimeve publike”, vijon raporti.

    Ndërkaq, KE thekson se kuadri ligjor dhe institucional i Shqipërisë është pjesërisht i përafruar me legjislacionin e BE-së dhe standardet evropiane për të drejtat themelore.

    “Zbatimi duhet të forcohet për të garantuar gëzimin e plotë të të drejtave të njeriut në praktikë, veçanërisht në lidhje me forcimin e kapaciteteve të institucioneve të pavarura të të drejtave themelore, mbrojtjen e të dhënave personale dhe lirinë e shprehjes, barazinë gjinore dhe mosdiskriminimin, të drejtat e fëmijës , të drejtat e personave me aftësi të kufizuara, si dhe përfundimin e proceseve kalimtare në fushën e të drejtave pronësore dhe sigurimin e mbrojtjes së personave që u përkasin pakicave”, thuhet në raport.

    “Kuadri ligjor dhe institucional nuk është në përputhje me legjislacionin e BE-së lidhur me të drejtat e qytetarëve të BE-së. Shqipëria duhet të sigurojë përafrimin e plotë të kuadrit të saj legjislativ me legjislacionin e BE-së për të garantuar gëzimin e plotë të të gjitha të drejtave të shtetësisë së BE-së pas anëtarësimit. Shqipëria duhet të përmbahet nga zhvillimi dhe zbatimi i një skeme investitor -qytetari”, thekson raporti.

    Raporti ndalet tek lufta ndaj kriminalitetit.

    “Shqipëria ka përgatitje në luftën kundër krimit të organizuar. Bashkëpunimi për zbatimin e ligjit me shtetet anëtare të BE-së, EUROPOL dhe EUROJUST, si dhe një përfshirje shumë aktive në EMPACT, po japin rezultate pozitive. Nevojiten përpjekje të mëtejshme për të konsoliduar historikun e hetimeve, ndjekjeve penale, dënimeve përfundimtare dhe sekuestrimin dhe konfiskimin e aseteve të lidhura me krimin e organizuar.

    Autoritetet e zbatimit të ligjit kanë një nivel të mirë bashkëpunimi me homologët e tyre në shtetet anëtare të BE-së. Shqipëria duhet të miratojë një kuadër strategjik gjithëpërfshirës në fushën e drogës dhe të forcojë dhe funksionalizojë kuadrin e saj institucional, në veçanti duke krijuar një Observator Kombëtar të Drogave dhe një sistem kombëtar operacional të paralajmërimit të hershëm për shkëmbimin e informacionit në lidhje me substancat psikoaktive vdekjeprurëse. Shqipëria duhet të zhvillojë një histori solide të konfiskimeve të drogës dhe shkatërrimit dhe konfiskimit të aseteve përkatëse”, vijon raporti.

    Sipas raportit, bashkëpunimi rajonal dhe shkëmbimi i informacionit delikat me Europolin dhe Shtetet Anëtare është i kënaqshëm, por nevojitet punë e mëtejshme për të trajtuar financimin e terrorizmit dhe pastrimin e parave dhe materialet me përmbajtje terroriste në internet.

    “Shqipëria duhet të rrisë kapacitetin e saj administrativ për të përmbushur kërkesat e BE-së për bashkëpunimin gjyqësor në çështjet penale, civile dhe tregtare

    Bashkëpunimi me Shtetet Anëtare dhe Frontex për operacionet e ripranimit dhe kthimit është shumë i mirë. Shqipëria duhet të sigurojë kapacitete të përshtatshme pritjeje dhe emergjence. Shqipëria duhet të zbatojë procedurat e kthimit në përputhje me ligjin për të huajt dhe në përputhje me legjislacionin e BE-së.

    Vazhdon bashkëpunimi me EUAA për forcimin e sistemit kombëtar të azilit dhe pritjes. Mbetet për t’u arritur një zbatim efektiv dhe cilësor i ligjit për azilin që kërkon kapacitete administrative shtesë. Referimet në procedurën e azilit duhet të zbatohen në mënyrë sistematike”, thuhet në raport.

    “Politika e vizave e Shqipërisë duhet të përafrohet plotësisht me atë të BE-së. Numri i shtetasve shqiptarë që paraqesin kërkesa për azil në shtetet anëtare të BE-së kërkon ende përpjekje të vazhdueshme dhe të qëndrueshme. Bashkëpunimi operacional me Frontex është i mirë dhe duhet të vazhdojë të zhvillohet. Duhet të trajtohet qarkullimi i lartë i oficerëve në kufi”, vijon raporti.

    Raporti i KE vëren se Shqipëria është mes një niveli të moderuar dhe të mirë përgatitjeje për t’u bërë një ekonomi tregu funksionale.

    “Vazhdon të ketë një konsensus të gjerë të brendshëm mbi bazat e politikës ekonomike, duke përfshirë një rol të kufizuar të shtetit në ekonomi dhe një angazhim politik për liberalizimin e tregut. Hapësira fiskale dhe qëndrueshmëria e borxhit u përmirësuan mesatarisht, por raporti i të ardhurave tatimore mbeti nën potencial dhe kufizon krijimin e hapësirës së mjaftueshme fiskale për përballimin e goditjeve të brendshme dhe të jashtme dhe për financimin e investimeve që rrisin produktivitetin. Siguria e dobët ligjore, niveli i lartë i aktivitetit ekonomik informal (pavarësisht disa përparimeve në këtë drejtim gjatë dy viteve të fundit), niveli i ulët i zhvillimit të sektorit financiar dhe vështirësitë me regjistrimin e titujve të tokës vazhdojnë të kufizojnë funksionimin efektiv të ekonomisë së tregut, e cila reflektohet në konvergjencë të ngadaltë dhe rritje nën potencial. Shqipëria dorëzon Programin e saj të Reformës Ekonomike (ERP) rregullisht dhe në kohë Komisionit Evropian dhe autoritetet kanë mbetur të përkushtuara ndaj politikave të orientuara nga stabiliteti bazuar në një përzierje të gjerë politikash të përshtatshme gjatë dekadës së fundit. Pati vetëm një ndjekje të pjesshme të rekomandimeve të politikave të BE-së të përcaktuara në paketat e njëpasnjëshme të zgjerimit dhe të udhëzimeve të politikave të miratuara bashkërisht në kontekstin e ushtrimit të ERP-së. Shqipëria duhet të përshpejtojë zbatimin e udhëzimeve të politikave të miratuara bashkërisht në Dialogun Ekonomik dhe Financiar vjetor midis BE-së me vendet e Ballkanit Perëndimor dhe Turqisë, bazuar në vlerësimin e Komisionit për Programet e Reformës Ekonomike”, thuhet në raport./ATSH/

  • Etërit Misionarët e Dashurisë, dega meshtare aktive

    Etërit Misionarët e Dashurisë, dega meshtare aktive

    Don Lush Gjergji

    Sivjet festojmë një përvjetor të rëndësishëm për jetën dhe veprën e Shën Nënës Tereze, pra, edhe për ne, si pasardhës shpirtëror të Nënës dhe Shenjtëreshës tonë, për Kishën Katolike në Popullin Shqiptar, si dhe për mbarë Popullin tonë.

    Siç dihet tashmë Nëna jonë Tereze ka themeluar shumë degë femërore dhe mashkullore, gjithnjë me titullin Misionaret apo Misionarët e Dashurisë, mbi të gjitha:

    Misionaret e Dashurisë, rend apo kongregatë, Nëna Tereze do të thoshte, bashkësia e motrave, që i ka themeluar ajo qysh në vitin 1950. Këto murgesha ndahet pastaj në dy drejtime: – aktive, në vitin 1950; – kontemplative, në vitin 1976.
    Pse dy degë apo drejtime?

    Sepse vetë Nëna Tereze, së pari jetën dhe veprimtarinë e saj e ka definuar kështu: gjithnjë aktive, pra në kërkim të Jezusit në të varfër ndër më të varfër, në të gërbulure, në ata që janë në buzë të vdekjes, pra, me ata dhe për ata që askush nuk i do “përpos Zotit dhe neve”, pohonte ajo.

    Për të jetuar dhe vepruar kështu, na nevojitet ndihma dhe përkrahja e Zotit, pra, urata, meditimi, adhurimi, me një fjalë jeta shpirtërore. Motrat Misionaret e Dashurisë veprojnë gjithnjë dhe gjithkund ku ka njerëz të sëmurë, të braktisur, të kërcënuar dhe rrezikuar, kurse të enjten i kushtohen tërësisht jetës shpirtërore, “mbushin akumulatorin” për shërbim me dashuri dhe për dashuri.

    Ato tash në botë janë më 6 mijë në shumë vende dhe shtete të botës, ndër ne janë në Shkup (1980) dhe në Pejë (1982).

    Motrat Misionaret e Dashurisë, dega kontemplative, gjithnjë janë të përkushtuar jetës shpirtërore, të mbyllura, ndërsa të enjten, dalin për t’i ndihmuar dhe zëvendësuar Motrat Misionaret e Dashurisë. Siç shihet dhe hetohet ato përplotësohen, janë mozaiku i Zotit në Kishë dhe në botë.

    Forhåndsvisning av bilde

    Vëllezërit Misionaret e Dashurisë, dega aktive, që Nëna Tereze e ka themeluar qysh në vitin 1963, pra, para 60 viteve, dhe që është temë e trajtimit tonë.
    (Letra origjinale e Nënës Tereze në gjuhën shqipe, 12 maj 1963).1

    Vëllezërit Misionaret e Dashurisë, dega kontemplative, themeluar në vitin 1979.

    Etërit Misionarët e Dashurisë, të themeluar në vitin 1984.
    Përpos këtyre degëve rregulltarë, sipas frymëzimit të Nënës Tereze janë themeluar edhe tri lëvizje apo shoqata laike – shekullare:

    “Bashkëpunëtorët e Nënës Tereze”, që në shpirtin dhe frymën e saj të jetojnë dhe të veprojnë kudo në botë, pa dallim apo përjashtim feje dhe kombi. Nga kjo përvojë, jetë dhe dëshmi më vonë kanë lindur edhe dy drejtime shekullare apo laike në botë:
    Laikët misionarë të dashurisë, si të kushtuar, po ashtu edhe të martuar.
    Lëvizja meshtarak Corpus Domini – Korpi i Krishtit, e themeluar në vitin 1991
    Kjo është një paraqitje panoramike e themelimeve të Nënës Tereze. Gjitha këto themelime, në kohë të ndryshme, si dhe me përkushtime specifike, kanë një qëllim dhe dëshirë të përbashkët: që të jenë afër dhe bashkë me të varfër ndër më të varfër, duke njohur, zbuluar, shërbyer dhe dashur Jezu Krishtin në çdo trajtë apo qenie të tyre.

    Duke u nisur nga klithja e Jezusit nga kryqi: “Kam etje”, Nëna Tereze vendosi ta braktiste Kongregatën e “Motrave të Loretos”, ku ishte formuar, kishte jetuar dhe vepruar për 18 vite, dhe ky ishte tejet e lumtur.

    Nga dëshmia e saj mësojmë: “Isha shumë e lumtur me jetën rregulltarë si Motër e Loretos. Për mua ishte më vështirë të ndahesha prej tyre, se prej familjes dhe Shkupit tim… Mirëpo ishte një urdhër hyjnor: “Ti duhet të dalësh prej Motrave të Loretos për t’i shërbyer të varfrit ndër më të varfër…”

    Sari, veshja rregulltarë, ishte veshje tipike e grave të Bengalisë, me dallim që e kishin kryqin në cep të krahut, ndërsa në mbulesë të kresë apo “shlajer” katër vija të kaltërta që simbolizojnë katër kushtet rregulltarë: varfërinë, dëgjesës, pastërtinë dhe shërbimin falas për të varfër ndër më të varfër.

    Sot motrat apo vëllezërit e Nënës Tereze janë të pranishëm në pesë kontinente dhe përpos të varfërve, të braktisurve, të gërbulurve, merren edhe me alkoolistë, të droguare, të sëmurë nga Aidis apo sida, nga malaria, për të moshuar dhe fëmijë bonjakë.

    Vëllezërit Misionarët e Dashurisë

    Në vitin 1963, pra, para 60 viteve, Nëna Tereze së pari i mblodhi dhe i zgjodhi 3 të rinj, duke i edukuar dhe frymëzuar me motive ungjillore dhe më 25 mars 1963, ditën e Lajmërimit të Zojës apo Zoja Nunciatë, edhe zyrtarisht themeloi Vëllezërit Misionarët e Dashurisë..

    Në fillimi ishin nën udhëheqjen dhe frymëzimin e drejtpërdrejt të Nënës Tereze, kurse si udhëheqës shpirtëror e kishin meshtarin Travers Ball (1928 – 2000), jezuit nga Australia, i cili gjatë vitit të tretë të studimeve teologjike (1965) kishte vendosur që jetën e tija t’ia kushtonte të varfërve ndër më të varfër. Pasi e kishte marrë lejen prej eprorit gjeneral të jezuitëve të atëhershëm, atë Pedro Arrupe (1907 – 1991), atë Travers Ball, ishte larguar nga Kongregata e Jezuitëve, kishte marrë një emër të ri rregulltar, vëllai Andrew, dhe qysh në vitin 1966 kishte formuar bashkësinë e parë rregulltarë. Titulli i tij zyrtar ishte karizmatik dhe domethënës: “Shërbëtori i Përgjithshëm” duke i udhëhequr dhe edukuar në frymëzimin e Shën Nënës Tereze si dhe të Ungjillit.

    Mu për këtë vëllai Andrew konsiderohet si “bashkëthemelues” i Vëllezërve Misionarëve të Dashurisë.

    Ky rregull, kongregatë kishte marrë edhe aprovimin zyrtar ipeshkvor në vitin 1967. Gjatë kësaj periudhe të gjatë kohës shumëvjeçare kishte pasur disa ndërrime dhe ndryshime, por gjithnjë sipas frymëzimit ungjillor dhe asaj të Nënës Tereze. Më 12 qershor 2003 Kongregata për Kler me “Decretum laudis” e kishte pranuar dhe njohur si Kongregatë me të drejta papnore.

    Në vitin 2016 Vëllezërit Misionarët e Dashurisë ishin 420, të shpërndarë në 69 bashkësi dhe në 21 shtet në botë.

    Shtëpia Amë apo Gjenerale është në Kalkutë, në Indi.

    Kjo është historia dhe mrekullia e Zotit nëpërmjet Shën Nënës Tereze, vëllait Andrew dhe Vëllezërve Misionarëve të Dashurisë.

     Disa të dhëna:

    Motrat “Misionaret e Dashurisë” janë mbi 6 mijë në më se 130 shtete dhe me 730 shtëpi apo kuvende.

    Deri tash kanë pasur këto Eprore Gjenerale:

    Shën Nëna Tereze (1950 – 1997).

    Nëna Nirmale Joshi (1997 – 2009).

    Nëna Mery Prema Pierick (2009 – 2022).

    Nëna Joseph Michael (2022 – ).

    Tri data të rëndësishme në jetën e Shën Terezes:

    “Kthimi në Shtëpinë e Atit” – kalimi në amshim: 5 shtator 1997; lumturimi: 19 tetor 2003; shenjtërimi: 4 shtator 2016.

    “Misionaret e Dashurisë – dega kontemplative” :

    Këtë degë të motrave Misionaret e Dashurisë – dega kontemplative e ka themeluar në New York Nëna Tereze së bashku me motrën Nirmala Joshi në vitin 1976 me këtë qëllim: “ për t’i përkrahur motrat dhe të varfrit , sidomos varfërinë shpirtërore, me qendër Eukaristinë”.

    Nëna Tereze e quante këtë veprimtari në heshtje, uratë, meditim dhe adhurim, si “apostolati i rrugës dhe buzëqeshjes”. Për Jezusin eukaristik ajo thoshte: “ Të dua, je i im!” dhe vazhdonte: “Shpirti kontemplativ jeton 24 orë në ditë me Jezusin dhe për Jezusin!”.

    “Vëllezërit Misionaret e Dashurisë – dega kontemplative” – e ka themeluar Nëna Tereze së bashku me atë Sebastian Vazhakala me 19 mars 1979, me seli qendrore në Romë, si institut dioqezan i Romës (8 dhjetor 1993).

    Ata, si dhe të gjitha institucionet e themeluar prej Shën Nënës Tereze, varen vetëm prej Provanisë hyjnore dhe bamirësisë.

    Qëllim kryesor është ky: “ta shuajmë urinë e Jezusit për njerëzit, për shpirtra, për shëlbim”,

    Atë Sebastian Vazhakala takimin e parë me Nënën Tereze i ka pasur në vitin 1966 në Ranchi, Indi, si student i filozofisë dhe prej atëherë nuk është ndarë më kurrë prej saj. Ai ndër të tjera thotë: “Ne bëjmë punën që e kërkon Jezusi… Puna jonë, pra, është vetë Jezusi, shenjtërimi ynë”.

    Vëllezëri e Dashurisë, dega konemplative, selinë qendrore e kanë në Romë, epror gjeneral është atë Sebastian Vazhakala dhe janë të pranishëm përpos Romës, Italisë, edhe në Shqipëri, në Indi dhe në Gana.

    Sot “Misionaret e Dashurisë” në Itali janë në 18 shtëpia apo kuvende, në Romë me 5 bashkësi.

    Prania e tyre më e madhe është në Indi, me 24 shtëpia apo kuvende dhe mbi pesmijë motra.

    OKB-ja dhe Nëna Tereze

    Peres De Cuelar, Sekretari i Përgjithshëm i OKB-së organizoi një takim – pritje në Selinë e OKB-se, më 26 tetor 1985, ku ndër të tjera tha kështu: “Ja gruaja më e fortë e botës. Ajo është Kombet e Bashkuara. Ajo është paqja në botë…”.

    OKB-ja ka caktuar 5 shtatorin si Dita ndërkombëtare e bamirësisë në botë qysh në vitin 2012 (dokumentit 67/105), për të nderuar “kthim e saj në Shtëpinë e Atit” – kalimin në amshim, si frymëzim të pashtershëm për bamirësi dhe edukim.

    Po ashtu OKB-ja ka botuar më 27 gusht 2021 pullën postale me portalin e Shën Nënës Tereze dhe me mbishkrimin: “Punë të vogla me dashuri të madhe”.

    Porositë bazë të Shën Nënës Tereze:

    “Të duash do të thotë të bësh gjëra të vogla me dashuri të madhe”.

    “Vuajtja është dhuratë e madhe e Zotit.”

    “Duhet të flasim më pak. Një vend për t’u lutur nuk është vend për thashetheme.”

    “Të varfrit na japin shumë më tepër se sa u japim ne atyre.”

    “Unë nuk lutem për sukses. Kërkoj plotësinë e fesë.”

    “Nëse i gjykoni njerëzit, nuk keni kohë t’i doni ata.”

    “Jep jo vetëm kujdesin, por edhe zemrën!”

    “Kam zgjedhur varfërinë për njerëzit tanë të varfër. Ne do jemi të aftë të duam të varfrit nëse njohim varfërinë dhe jemi vetë të varfër.”

    “Çfarë mund të bëni për të promovuar paqen në botë? Shko në shtëpi dhe duaje familjen.”

    “Disa njerëz vijnë në jetë si bekim. Disa të tjerë vijnë si mësim.”

    “Dashuria fillon duke u kujdesur për më të afërmit – ata në shtëpi.”

    “Varfëria më e tmerrshme është vetmia dhe ndjenja e të qenit pa dashuri.”

    “Kemi harruar se i përkasim njëri-tjetrit, prandaj s’kemi paqe. “

    “Pa dashuri dhe flijim jeta s’ka kuptim”.

    “Vetëm Dashuria do ta shpëtojë botën”.

    “Veprat e dashurisë janë vepra të paqes”.

    “Një fëmijë mund të ngjizet në zemrën tënde, pa lindur nga kraharori yt”.

    “Preke të gërbulurin me zemrën tënde”.

    “Dashuria nuk bënë mrekulli, ajo është mrekulli”.

    Prishtinë – Dugujevë, 30 korrik 2023

  • Zgjedhjet në veri: “Kosova të bëj kujdes në raport me aleatët”

    Zgjedhjet në veri: “Kosova të bëj kujdes në raport me aleatët”

    U prezantua si krijim i parakushteve për zbatim të marrëveshjes së ujdisë bazë të Brukselit e aneksit të Ohrit.

    Por dakordimi mes kryenegociatorit Besnik Bislimi e emisarit evropian të dialogut Miroslav Lajçak në Bratisllavë më 10 korrik, thuajse u ngri.

    Prishtina zyrtare lëvizi veç me tërheqjen e 25% të policisë nga veriu por jo më tej, për çka lypet një zgjidhje politike.

    Shefi i bisedimeve para ca dite u shpreh se Kosova, s’duhet të shpallë zgjedhjet pa heqjen e sanksioneve, deklaratë kjo që po cilësohet e ngutshme.

    Aleatët po këmbëngulin në votimet e reja rrugë kjo që sipas politologëve, Kosova s`ka nga t’i ik.

    Zgjidhja ideale, vlerësohet se do të ishte dorëheqja e katër kryetarëve veriorë si opsion më i favorshëm, pasi nga vjeshta presioni ndërkombëtar karshi Qeverisë do të rritet.

  • Kujdes nga këto faqe në Facebook ku flitet shqip! “Krimi Kibernetik”: Fshihen profile të huaja

    Kujdes nga këto faqe në Facebook ku flitet shqip! “Krimi Kibernetik”: Fshihen profile të huaja

    Një skemë mashtrimi ka nisur të aplikohet në internet. Disa faqe, kryesisht në rrjetin social “Facebook” që reklamojnë produkte që përdoren për udhëtim, me çmime shumë të ulëta janë mashtrim.

    Ndonëse shkruajnë në gjuhën shqipe, Krimi Kibernetik ka zbuluar se pas këtyre faqeve qëndrojnë shtetas të huaj, të cilët u marrin llogarinë bankare përdoruesve.

    Për këtë arsye, Krimi Kibernetik iu bën thirrje qytetarëve që të kenë kujdes se në cilat faqe të blenë produktet.

    “Nga Sektori për Hetimin e Krimeve Kibernetike në Drejtorinë Vendore të Policisë Tiranë, gjatë monitorimeve të kryera në burimet e hapura dhe në rrjetet sociale, me qëllim parandalimin e veprimtarive kriminale në fushën e krimeve kibernetike, janë konstatuar profile të ndryshme, kryesisht në rrjetin social “Facebook”, por jo vetëm, të cilat reklamojnë produkte që përdoren për udhëtim, me çmime shumë të ulëta, për të tërhequr vemendjen e sa më shumë përdoruesve.

    Pavarësisht se gjuha e përdorur në shkrimet e publikuara është shqip, dyshohet se administratorët e këtyre profileve nuk janë shtetas shqiptarë.

    Duke qenë se ka dyshime se në rastet kur përdoruesit e interesuar, vendosin të dhënat e tyre personale apo bankare, për të bërë porosinë për produktin e reklamuar, produkti nuk dërgohet në destinacion dhe të dhënat e paraqitura vendosen në posedimin e personave që kanë krijuar këto profile, ju këshillojmë që të siguroheni për autenticitetin e faqes apo të profileve që mund të shikoni, përpara se të kryeni porositë tuaja.

    DVP Tiranë fton të gjithë qytetarët që mund të jenë të dëmtuar nga ky aktivitet, ose që konstatojnë faqe të tilla, të paraqiten në Sektorin për Hetimin e Krimeve Kibernetike, në DVP Tiranë”.

  • Grafitet që i japin ngjyrë Prishtinës

    Grafitet që i japin ngjyrë Prishtinës

    Për tri ditë rresht, 120 artistë, vendorë e të huaj, secili më kreativ se tjetri, e kanë mbushur me grafite Rrugën B në Prishtinë.

    Kjo lagje, relativisht e re e kryeqytetit, është ndër zonat me më së shumti beton.

    Por, e ka ruajtur edhe një copë rruge, në të cilën që shtatë vjet me radhë, u mundëson artistëve ta promovojnë artin e tyre, në kuadër të festivalit Meeting of Styles Kosovo.

    Tema e këtij edicioni është, “Masa Kritike”.

    Për Mattia Martinin, 33-vjeçar nga Italia, kjo është hera e parë që merr pjesë në festival.

    “Më pëlqejnë njerëzit, vullnetarët, organizatorët, dhe mirëpritja është shumë e mirë dhe Prishtina është super e bukur. Më pëlqen shumë niveli i artistëve, mendoj se të gjithë janë vërtet të talentuar dhe është shumë frymëzues”, ka thënë Martin, që njihet në komunitetin e tij me nofkën Chus.

    Për Mattia Martinin, 33-vjeçar nga Italia, kjo është hera e parë që merr pjesë në festival.

    “Më pëlqejnë njerëzit, vullnetarët, organizatorët, dhe mirëpritja është shumë e mirë dhe Prishtina është super e bukur. Më pëlqen shumë niveli i artistëve, mendoj se të gjithë janë vërtet të talentuar dhe është shumë frymëzues”, ka thënë Martin, që njihet në komunitetin e tij me nofkën Chus.

    Për artisten zvicerane Line Guillod, festivali përbën mundësi të mirë për t’i shpërfaqur gratë dhe vendin e tyre në shoqëri.

    “Është portret i një gruaje. Emri i festivalit është Masa Kritike. Mendoj se një grua duhet të ketë pushtet në shoqëri. Për mua është shumë e rëndësishme të bëj portrete grash, sepse ne duhet të zëmë vendin tonë në rrugë, duhet të zëmë vend në shoqëri, në politikë”, ka thënë ajo.

    Edicioni i këtij viti, i shtati me radhë, ka nisur më 28 korrik dhe përfundon më 30 korrik.

    Zanafilla e këtyre organizimeve daton prej viteve të 90-ta, kur një organizatë joqeveritare me të njëjtin emër, Meeting of Styles, është krijuar në Gjermani për t’i mbështetur artistët, të cilën mund të bëjnë grafite ligjërisht, nëpër mijëra metra katrorë të zonave të braktisura.

    “Kombinoj shumë elementë nga arti i bukur, modelimi 3D dhe shkronjat. Unë jam në thelb një përshkrim i veprës sime të artit”, ka thënë 23-vjeçari.

  • Televizioni zviceran bën reportazh në Kosovë, Shqiptarët dhe serbët: Të jetosh së bashku është e mundur

    Televizioni zviceran bën reportazh në Kosovë, Shqiptarët dhe serbët: Të jetosh së bashku është e mundur

    Nëse flitet për bashkëjetesë mes shqiptarëve dhe serbëve në Kosovë, zakonisht flitet për konflikt. Por ndërsa situata në veri të Kosovës ka qenë e tensionuar prej muajsh, dy grupet etnike jetojnë në paqe krah për krah në pjesën tjetër të vendit, shkruan Radio Televizioni Zviceran SRF.

    Mediumi zviceran që ka ardhur në veri për ta parë më afër situatën e përshkruan si “fortesë me tela me gjemba” objektin e Komunës së Zveçanit.

    “Ushtarët e forcave mbrojtëse ndërkombëtare të KFOR-it qëndrojnë roje para automjeteve të blinduara ushtarake. Përpara barrierave, të cilat janë të veshura me flamuj serb, banorët vendas ulen nën cadra të kuqe në anë të rrugës. Ata protestojnë kundër pranisë së ushtarëve. Pavarësisht vapës së mesditës, rreth 30 persona janë këtu. Hanë dhe bisedojnë”..

    Ushtarët e KFOR-it ruajnë Shtëpinë Komunale të Zveçanit.
    Zveçani është një nga katër komunitetet me shumicë serbe në veriun e Kosovës. Zona ka qenë në titujt kryesorë në mbarë botën gjatë javëve të fundit për shkak të konfliktit.

    Përshkallëzimi më i keq në vite

    Pikërisht këtu ka ndodhur përshkallëzimi më i dhunshëm në Kosovë prej vitesh në fund të majit. Në atë kohë, demonstruesit serbë sulmuan ushtarët e KFOR-it me shufra hekuri dhe mjete shpërthyese të përgatitura vetë. Dhjetëra njerëz u plagosën, disa në gjendje të rëndë.

    Ndërmjet fshatrave u ngritën postblloqe.
    Protestat u shkaktuan kur katër kryebashkiakë të sapozgjedhur deshën ta merrnin detyrën në ndërtesat komunale nën mbrojtjen e policisë. Kryetarët e komunave janë me prejardhje shqiptare, ndërsa shumica e banorëve janë serbë. Ata i bojkotuan zgjedhjet. Kryetarët e komunave u zgjodhën me një pjesëmarrje të ulët prej më pak se katër për qind. Prandaj, shumë e konsiderojnë zgjedhjen e tyre të paligjshme.

    Protestat vazhdojnë

    Që atëherë, njerëzit janë mbledhur çdo ditë këtu për të protestuar. Puna me turne siguron që prania të mbahet ditë e natë. E njëjta situatë shfaqet edhe në komunitetet tjera serbe në veri. “Përderisa këtu janë kryetari dhe policia kosovare, ne do të vazhdojmë”, thotë Milloshi. Ai vjen çdo ditë në protesta. Emri i tij i vërtetë është ndryshe, por ai nuk dëshiron ta bëjë publik.

    Njerëzit protestojnë ditë e natë
    Ditë e natë, njerëzit mblidhen këtu për të protestuar kundër kryetarëve të komunave me origjinë shqiptare dhe pranisë së policisë kosovare.
    Jelena gjithashtu nuk dëshiron ta japë emrin e saj të vërtetë. E reja punon si mësuese e anglishtes në shkollën lokale. Ajo ankohet se fshati i saj ka qenë i rrethuar që nga përleshjet e dhunshme. Shkolla ndodhet pranë qendrës komunitare dhe deri vonë ishte brenda zonës së përjashtimit. Prandaj, javët e fundit të vitit shkollor duhej të zhvilloheshin online.

    Biseda me njerëzit tregon se shumica e tyre shqetësohen më shumë se vetëm për kryetarët e bashkive. Ata e shohin veten si qytetarë të Serbisë dhe nuk duan të integrohen në shtetin kosovar. Këtu në Kosovën veriore, jeta duket si në Serbi. Jelena i mëson nxënësit e saj sipas planprogramit serb, ata paguhen me dinarë serbë, pagat dhe pensionet i paguan Serbia, duke përfshirë edhe Jelenën.

    Ovo je Serbia – kjo është Serbia, thuhet në bander.
    Ovo je Serbia – kjo është Serbia, thotë pankarta e shtrirë nëpër rrugë në komunitetin serb në veri të Kosovës.
    Ajo refuzon integrimin në sistemin shkollor kosovar. “Kosova po e rishkruan historinë, përfshirë edhe tonën, kjo është e papranueshme”, thotë Jelena. Ajo dëshiron që shkolla e saj të vazhdojë të mësojë perspektivën serbe për të kaluarën.

    Qeveria e Kosovës merr masa ndaj strukturave paralele

    Qeveria kosovare e Albin Kurtit nuk dëshiron më t’i pranojë këto struktura paralele që janë rritur ndër vite. Kurti dëshiron ta integrojë zonën veriore në shtetin kosovar dhe këtë po e bën më me vendosmëri se paraardhësit e tij. Që kur ai mori detyrën, situata në veri është bërë gjithnjë e më kritike, derisa përshkallëzimi i përmendur erdhi në fund të majit.

    Që atëherë, një qetësi e tensionuar është kthyer. Sistemi i sigurisë është zgjeruar shumë. Ushtarët e KFOR-it dhe policia speciale kosovare janë të dukshme në patrullat e tyre. Në udhëtimin mes fshatrave, njerëzit duhet të kalojnë postblloqe vazhdimisht. Kjo prani e forcave të sigurisë, veçanërisht e policisë speciale kosovare, nga shumë njerëz këtu në veri shihet si pushtim i huaj.

    Jo të gjithë refuzojnë të angazhohen në dialog

    Përderisa shumë e shohin bashkëpunimin me shtetin kosovar si tradhti, Nenad Radosavljeviq ka një qasje tjetër. Ai punon me kryetarin shqiptar në fshatin e tij të lindjes. “Unë jam një realist, edhe nëse kjo nuk është shumë e njohur për momentin”, thotë Nenadi. Nëpërmjet punës së tij, ai mund të ndihmojë në sigurimin e stabilitetit dhe avancimin e projekteve që përfitojnë njerëzit.

    Ai e sheh problemin në qeveritë e Serbisë dhe Kosovës. Ata donin të dalloheshin në konfliktin me elektoratin e tyre. Ata nuk kujdesen për interesat e popullatës lokale. Meqenëse shumica i marrin pagat dhe pensionet nga Serbia, ata janë të hapur ndaj shantazheve dhe duhet të sillen ashtu siç kërkon presidenti serb Aleksandar Vuçiq. Pra, edhe ai qëndron pas bojkotit të zgjedhjeve lokale. Varësia financiare është edhe arsyeja pse shumë nuk duan t’i japin emrat e tyre të vërtetë.

    Ndryshe situata në jug

    Ndërsa në veri nuk ka pothuajse asnjë shkëmbim midis grupeve të popullsisë në jetën e përditshme, bashkëjetesa në pjesën tjetër të vendit funksionon pa asnjë problem. Për shembull në rajonin e Brezovicës, në jug.

    Një tabelë reklamon schnapps të bëra vetë në tre gjuhë: serbisht, shqip dhe anglisht.
    Rajoni malor është i njohur për një zonë të madhe skijimi dhe është afër kufirit me Maqedoninë e Veriut. Zona është e banuar në mënyrë të barabartë me serbë dhe shqiptarë.

    Nikola është një kuzhinier në restorantin Tiffany.
    “Në jetën e përditshme nuk ka probleme mes serbëve dhe shqiptarëve”, thotë Nikolla. 22-vjeçari është shef kuzhine në restorantin Tiffany. Sigurisht që ka miq shqiptarë dhe i pëlqen të shkojë me ta në qytetet përreth për të pirë. Por mund ta shihni edhe këtu në restorantin në pronësi të Lulit, një shqiptari.

    Pronari i restorantit Luli
    Tetë vjet më parë, Luli hapi restorantin, i cili ndodhet pikërisht në rrugën që të çon në parkun kombëtar. Ai me qëllim punësoi vetëm serbët nga zona. Ai thotë: “Politika i krijon problemet, jo njerëzit”. Ai e ndjen atë në jetën e tij. Politikanët vendas nuk e pëlqejnë atë që ai po bën këtu në restorant dhe vazhdojnë t’i vënë pengesa në rrugën e tij.

    “Tiffany” është në rrugën që të çon në parkun kombëtar.

    Konflikti është i keq për biznesin

    Nëse konflikti në veri arrin në majë, ai do të ushtrojë presion mbi biznesin. “Atëherë kemi më pak mysafirë, sepse ata kanë frikë të vijnë në një komunitet me shumicë serbe”, thotë Luli. Situata këtu nuk është e krahasueshme me atë në veri.

    “Këtu situata nuk është ashtu siç tregohet në televizion”, thotë Nikolla. Për shkak të mediave, miqtë e tij në Serbi kanë një pasqyrë të gabuar të jetës në Kosovë. Në çdo rast, ai dëshiron të jetojë këtu në të ardhmen. Më pëlqen këtu, thotë, ka një punë të mirë, familja dhe miqtë e tij jetojnë këtu.

  • Kuvendi dështoi t’i ratifikojë marrëveshjet ndërkombëtare

    Kuvendi dështoi t’i ratifikojë marrëveshjet ndërkombëtare

    Qëndrimi i partive opozitare se do të bojkotojnë të gjitha propozimet që pushteti do t’i sjellë për votim, përfshirë edhe marrëveshjet ndërkombëtare, sipas njohësve të zhvillimeve politike, i bëjnë dëm interesit të qytetarëve. Në PDK kanë thënë se s’ka kuptim votimi i marrëveshjes në kohën kur për fajin e Albin Kurti, Kosovës i janë vënë sanksione. Sesioni pranveror është mbyllur pa shqyrtimin dhe ratifikimin e pesë marrëveshjeve, përshirë përmirësimin e rrjetit të transmisionit të energjisë dhe projektin e ngrohjes solare të Prishtinës.

    Në mungesë të votave të mjaftueshme, sesioni pranveror i Kuvendit është mbyllur pa u shqyrtuar e ratifikuar pesë marrëveshje ndërkombëtare.

    Edhe po të ishin të pranishëm të gjithë deputetët e pushtetit, në seancën e fundit marrëveshjet nuk do të votoheshin për shkak të qëndrimit të opozitës. PDK-ja, si partia më e madhe opozitare ka marrë vendim që të mos marrë pjesë në votim në seanca e në komisione. Marrëveshjet ndërkombëtare mund të ratifikohen vetëm me votave e dy të tretave të deputetëve.

    Njëra nga marrëveshjet që po mbahet pezull është ajo për bashkëfinancimin e bursave për studentë të nivelin master mes Kosovës dhe Francës.

    Ish-zëvendësministri i Arsimit, Dukagjin Pupovci, e sheh të papërgjegjshme këtë sjellje të opozitës, që sipas tij është barrikaduar në kërkesën për zgjedhje të parakohshme.

    Kjo është një humbje e mundësisë për të rinjtë, pra sipas kësaj marrëveshjeje, diku për momentin për të paktën 12 persona që t’i kryejnë studimet master në Francë. Mendoj që kjo i dëmton njerëzit e dëmton sistemin në përgjithësi sepse ne kemi pak njerëz të cilët i kanë të përfunduara studimet në Francë dhe kjo është një mundësi unike që të bëhet një gjë e tillë”, ka thënë Pupovci.

    Në mesin e marrëveshjeve të pavotuara janë edhe ato për kreditë që do të mund t’i merrte Qeveria për projektin “Ngrohtorja solare e Prishtinës” dhe përmirësimin i rrjetit të transmisionit të KOSTT-it.

    Arbër Thaçi, hulumtues në KDI, thotë se sjelljen e papërgjegjshme të partive po e vuajnë më së shumti qytetarët, teksa kritikon edhe Kuvendin për trajtim të ngadalshëm të marrëveshjeve ndërkombëtare.

    “Humbësit më të mëdhenj të kësaj qasjeje janë qytetarët e Kosovës dhe vetë projektet që duhej të fillonin pas votimit në Kuvend. Çdonjëra nga ato paraqet projekte të rëndësishme, ndërsa vonesat për trajtimin e tyre janë të papranueshme”, ka thënë Thaçi.

    Deputetja e partisë më të madhe opozitare, Eliza Hoxha, ka thënë se Këshilli i Përgjithshëm i PDK-së ka vendosur që deputetët e subjektit të saj të mos votojnë marrëveshje ndërkombëtare. Sipas saj, është farsë të përmenden marrëveshjet derisa Qeveria i ka sjellë Kosovës sanksione.

    “Ju kujtoj që ne kemi votuar marrëveshje të shumta dhe ligje të shumta, paçka që nuk evidentohen sepse nuk punon sistemi ku ne mund të evidentohemi se kush cka po voton. Ky veprim i PDK-së ka ardhur pikërisht për arsye të sanksioneve, për arsye të veprimeve të Albin Kurtit. Është e pakuptueshme dhe nëse i votojmë ato marrëveshje përderisa edhe IPA edhe shumë sanksione të tjera nga BE-ja dhe Amerika që lidhen pikërisht me këto marrëveshje nuk kanë mundësi të zbatohen. Prandaj krejt kjo farsë se marrëveshjet nuk kalojnë sot sepse PDK-ja nuk po i voton është e paqëndrueshme”, ka thënë Hoxha.

    Hoxha në konferencë për media mbajtur të dielën ka deklaruar se për shkak të keqqeverisjes dhe vendosjes së masave ndëshkuese të BE-së e SHBA-së, Qeveria e drejtuar nga Albin Kurti duhet të dorëhiqet dhe vendi të shkojë në zgjedhje, më së largu në shtator.

  • Lista Serbe merr mesazhin e qartë nga SHBA-ja

    Lista Serbe merr mesazhin e qartë nga SHBA-ja

    Zyrtarët e Listës Serbe thonë se kanë marrë mesazh të qartë nga Washingtoni zyrtar. Dy prej udhëheqësve të kësaj partie, më të madhes së serbëve në Kosovë, qëndruan për vizitë në SHBA dhe në një intervistë për Zërin e Amerikës thanë se është e pakuptimtë të flitet për zgjedhje të reja pa shtensionim të situatës. E shtensionimin e shohin përmes asaj që po bën Qeveria

    Prishtinë, 30 korrik – Përfaqësuesi i Listës Serbe, subjektit kryesor politik të serbëve të Kosovës, Igor Simiq, u shpreh se pa shtensionimin e situatës në veri të Kosovës është e pakuptimtë të flitet për zgjedhje të reja.

    Në një intervistë për Zërin e Amerikës në gjuhën serbe, pas vizitës që së bashku me zyrtarin tjetër të Listës Serbe, Slavko Simiq, bënë në SHBA, tha se atyre u janë përcjellë mesazhe të qarta nga Washingtoni, por nuk tregoi për çka bëhet fjalë saktë.

    Ndërkohë kushtet e Listës Serbe për këto zgjedhje janë reduktuar në një, në atë që ka pranuar Qeveria ta bëjë – tërheqjen e njësive speciale të policisë nga ndërtesat komunale.

    “Në një atmosferë frike për mbijetesën dhe sigurinë e popullit serb, është e pamundur të zhvillohet një fushatë normale. Është e nevojshme që ato njësi të posaçme të tërhiqen, kjo është kërkesa e serbëve, kërkesa e Bashkimit Evropian dhe kërkesa e SHBA-së”, ka thënë Simiq.

    Qeveria e Kosovës, bazuar në Marrëveshjen e Bratislavës, ka nisur tërheqjen e njësive speciale nga ndërtesat në veri në masën 25 për qind. Po ashtu, ka paralajmëruar mbajtjen e zgjedhjeve pas verës.

    Më herët, Bashkimi Evropian pati paraqitur një plan 3-pikësh për uljen e tensioneve, e që parashihte: pezullimin e operacioneve policore në veri, zhvendosjen e kryetarëve të komunave në zyra alternative dhe shpalljen e zgjedhjeve të parakohshme me pjesëmarrje të pakushtëzuar të serbëve të Kosovës.

    Simiq gjatë intervistës nuk pranoi të thotë nëse Lista Serbe do të marrë pjesë në zgjedhjet e reja.

    “Pa u plotësuar kushtet që na kanë vënë qytetarët, nuk mund ta diskutojmë mundësinë e zgjedhjeve”, deklaroi ai.

    Ai ka mohuar se Lista Serbe është e varur nga Beogradi. Por tha se populli serb në Kosovë pa Beogradin s’do të mund të ekzistonte.

    Serbët bojkotuan zgjedhjet e 23 prillit në Mitrovicë të Veriut, Zveçan, Zubin-Potok e Leposaviq.

    Më pas, kur kryetarët e zgjedhur u vendosën në ndërtesat kryesore komunale me asistimin e policisë, nisën trazirat e serbëve. Ato arritën kulmin më 29 maj, kur u lënduan 93 ushtarë të KFOR-it, tre prej tyre me armë zjarri.

    Simiq i pyetur për këtë dhunë, si përgjigje dha: “I keni harruar edhe 53 serbë të lënduar”.