ATV

Author: ATVLive

  • Vendimi i Qeverisë që çoi në burg Ridvan Muharremin

    Vendimi i Qeverisë që çoi në burg Ridvan Muharremin

    Me datë 26 shkurt të vitit 2022, Qeveria e Kosovës, kishte marrë vendim që të anashkalohet ligji i prokurimit dhe të bëhen negociata direkte.

    Ky vendim është marrë pas kërkesës së Departamentit të Rezervave Shtetërore, që të mundësohet përjashtimi nga procedurat e prokurimit.

    “Aprovohet kërkesa e Departamentit të Rezervave Shtetërore – Ministria e Industrisë, Ndërmmarrësisë dhe Tregtisë, që t’u mundësohet përjashtimi nga procedurat e prokurimit për furnizim me produkte të Rezervës Shtetërore të Mallrave, duke e klasifikuar lëndën e kontratës si sekret”, thuhet në dokumentin e siguruar nga Paparaci.

    Tutje, në vendim thuhet se MINT është e obliguar ta zbatojë këtë vendim, që ka nënshkrimin e kryeministrit Kurti.

    Ligji për prokurimin ka për qëllim të siguroj mënyrën më efikase, transparente dhe të drejtë të shfrytëzimit të fondeve publike, si dhe të gjitha burimeve të tjera të autoriteteve kontraktuese në Kosovë duke përcaktuar kushtet dhe rregullat që do të zbatohen, procedurat që do të ndiqen, të drejtat që do të respektohen dhe detyrimet që do të përmbushen nga personat, operatorët ekonomik dhe organet publike që zhvillojnë, përfshihen, marrin pjesë ose interesohen, në aktivitetet e prokurimit ose që përfshihen ose kanë të bëjnë me fondet dhe/ose burimet e tilla.

    Përjashtimi nga procedurat e prokurimit për furnizim me produkte të Rezervës Shtetërore të Mallrave, duke shfrytëzuar jotransparencën, i ka mundësuar Muharremit që të bënte dallavere me blerjen e vajit dhe grurit që ishte të destinuar për Kosovë, që dyshohet se nuk ka ardhur asnjëherë.

    Kohë më parë Nacionale kishte publikuar një përgjim në të cilin dy zyrtarë të kësaj ministrie flisnin për këtë aferë. Ata e përmendnin edhe Ridvan Muharremin, një të afërm të kryeministrit Albin Kurti të cilit në një moment i referohen edhe si “dallaverxhi”.

    Kompania polake prej të cilës ishte blerë vaji për Rezervën Shtetërore i cili dyshohet që nuk ka ardhur asnjëherë në Kosovë quhej Xanto dhe ajo nuk ishte lajmëruar më.

  • Tiktokerja që brenda natës u bë virale tregon se çfarë kishte postuar: Po me vjen marre!

    Tiktokerja që brenda natës u bë virale tregon se çfarë kishte postuar: Po me vjen marre!

    Emisioni veror i ATV-së, “n’mal An’det”, vazhdon të sjellë për shikuesit argëtim, intervista dhe eksplorim kulturor.

    Në këtë emision, vend të veçantë zënë mërgimtarët, të cilët bëjnë rrëfimet e tyre të ndryshme nëpër të cilat kanë kaluar.

    Tiktokerja Floreta Hajdaraj, mërgimtarja e cila është lindur dhe rritur në Itali, në këtë emision, ka rrëfyer emocionet e saj kur një postim në tiktok ishte bërë virale brenda natës.

    Floreta, në këtë emision ka treguar se si ka filluar aktivitetin e saj në rrjetet sociale, në veçanti në TikTok, rrjet ky që u bë mjaft i famshëm gjatë kohës sa njerëzit ishin në karantinë.

    “Kur u kanë karantina, TikTok-u u kanë shumë “in”. Kur ia kam nisë me postu, kam postu vetëm shqip dhe jo italisht. E kam parë që njerëzve iu pelqejke, ende më kujtohet kur kam marrë 100 “like” dhe jam gëzuar aq shumë. Mua nuk më ka interesu sa njerëz me kanë shiku, unë gjithmonë kam dashtë me postu, qoftë edhe sikur t’i kisha 100 ndjekës. Kur u kanë karantina, kam vazhdu me postu dhe kam arritë 100 mijë ndjeksa dhe ajo ajo u kanë arritje shumë e madhe”, tregon ajo.

    E pyetur se cila ka qenë video e parë e saj që është bërë virale, ajo ia kthen se po i vjen marre me tregu.

    “Mu pat thy thoni dhe e pata bërë një video ku kam thënë “mu ka thy thoni”, dhe ajo u pat ba virale. Njerëzit kanë bërë hajgare me këtë send, e ajo më kujtohet që ka qenë e para. Ndërsa njëra prej të fundmeve u kanë një video që kam thënë se çfarë kushte duhet me i pasë një djalë për me pasë një lidhje me mua, dhe nuk është vetëm për mua, por besoj se për çdo femër që duhet me i pasë do standarde. U komentu shumë, kam marrë shumë urrejtje. Me ka shtyrë me i ndi pak keq”, u rrwfye Floreta.

    Emisioni n’mal An’det, i cili vjen në një format më ndryshe, drejtohet nga yjet e ATV-së, Roberti, Emira dhe Jeta dhe jepet çdo ditë nga e hëna deri të premten prej orës 21:10.

    Në videon e më poshtme e gjeni emisionin e plotë “n’mal A n’det” që u transmetua mbrëmë:

  • ​PDK pas arrestimeve në MINT, kërkon shkarkim dhe hetim të ministres Hajdari

    ​PDK pas arrestimeve në MINT, kërkon shkarkim dhe hetim të ministres Hajdari

    Partia Demokratike e Kosovës pas arrestimit të Ridvan Muharremit dhe dy zyrtarëve të Ministrisë së Industrisë, Ndërmarrësisë dhe Tregtisë, nën dyshimin për keqpërdorim të rezervave shtetërore, kërkon shkarkimin dhe hetimin edhe të ministres, Rozeta Hajdari.

    Sekretari për organizim dhe zgjedhje në PDK, Betim Gjoshi, gjatë një konference për media, ka thënë se Ridvan Muharremi nuk është thjeshtë një sipërmarrës, por, përveç se mik i Kryeministrit, është personi përgjegjës, i cili me bekimin e Albin Kurtit dhe emërimin e Rozeta Hajdarit, është marrë me furnizimin e rezervave shtetërore të Kosovës.

    “Ridvan Muharremi është personi i cili në emër të Kryeministrit dhe me lejen e tij, përveç se është marrë me biznese të ndryshme, edhe të armëve, ka kërkuar edhe gjetjen e katër dëshmitarëve katolikë kundër krerëve të UÇK-së në Hagë. Ridvan Muharremi, miku i Kryeministrit, si person i autorizuar nga Rozeta Hajdari jashtëligjshëm sepse nuk i ka plotësuar kriteret, në emër të furnizimit me rezerva shtetërore, paratë e buxhetit të shtetit i ka dhënë ndërsa mallin nuk e ka marrë asnjëherë – duke i shkaktuar qindramijëra euro dëme vendit”, ka thënë Gjoshi.

    Sipas tij, sot, para se gjithash, përgjegjësia politike, publike por edhe penale, bie mbi Ministren e Industrisë, Ndërmarrësisë dhe Tregtisë, Rozeta Hajdari.

    “Kryeministri Albin Kurti, urgjentisht, sot, menjëherë, duhet që ta shkarkojë nga detyra Ministren Hajdari, për t’i hapur rrugë një hetimi të lirë, të pavarur dhe të pandikuar politikisht. Prandaj, shkarkim dhe hetim për ministren Hajdari, nën udhëheqjen e së cilës po vërtetohet, ashtu siç kemi denoncuar disa herë, se ka ndodhur një prej skandaleve më të mëdha në vend”, ka thënë tutje Gjoshi.

    Ai shtoi ka thënë se është fatkeqësi që kryeministri Albin Kurti rrethohet me njerëz të tillë, të cilët çdo ditë e më shumë po arrestohen dhe përfshihen nëpër skandale të mëdha.

    “Pas përfshirjes së ambasadorit Martin Berishaj në aferën e madhe të tregtimit të energjisë, arrestimit të shefit të KEK-ut Nagip Krasniqi dhe arrestimit të zyrtarit të lartë të Vetëvendosjes për trafikim me drogë, Besnik Mujeci – Ridvan Muharremi është miku i katërt me radhë i Kryeministrit Albin Kurti i cili arrestohet dhe dyshohet për keqpërdorim taksave të qytetarëve tanë. Është fatkeqësi e madhe që Kryeministri i vendit tonë rrethohet dhe ka për miq të afërt këtë strukturë të njerëzve: Hajnat e energjisë, trafikantët e drogës dhe hajnat e bukës së gojës”, ka thënë Gjoshi.

    Në fund të konferencës, Gjoshi ka thënë se kjo Qeveri ka humbur çdo legjitimitet dhe vendi duhet të shkoj në zgjedhje të parakohshme.

    “Prej aferave me energjinë, koordinimit me Radojçiqin, trafikimit të drogës nga zyrtari i tyre i lartë e deri te hajnia me rezervat e shtetit – janë skandale të cilat këtë qeverisje e karakterizojnë vetëm në një mënyrë: Skandaloze! Të dëmshme! Të paaftë! Prandaj, sot, është prioritet shtetëror që vendi të shkoj në zgjedhje të parakohshme dhe mandati t’u kthehet qytetarëve. Kosova ka nevojë për një qeverisje të re, kredibile, të aftë dhe e cila rikthen prosperitetin e normalitetin në vend”, ka përfunduar Betim Gjoshi.

  • ​Tre të arrestuarit gjatë bastisjeve në mbajtje për 48 orë

    ​Tre të arrestuarit gjatë bastisjeve në mbajtje për 48 orë

    Me urdhër të Prokurorisë Speciale të Republikës së Kosovës (PSRK), Policia e Kosovës – Njësia e Veçantë e Hetimeve, ka realizuar sot bastisje në lokacione të ndryshme në Prishtinë, ku kanë arrestuar biznesmenin Ridvan Muharremi, drejtorin e Divizionit për Rezervat Shtetërore të Mallrave, Hafiz Gara si dhe drejtorin e Departamentit për Integrim Evropian dhe Koordinim të Politikave, Irfan Lipovica.

    Prokuroria Speciale deklaroi se tre personat e arrestuar dyshohen për veprat “Keqpërdorim i detyrës zyrtare”, si dhe “Dhënie të ndihmës në kryerjen e veprës penale të Keqpërdorimit të detyrës zyrtare”.

    Përmes një komunikate për media, PSRK tha se gjatë bastisjes janë siguruar dhe sekuestruar prova materiale të cilat do të përdoren për procedurë të mëtutjeshme hetimore.

    Po ashtu, është konfirmuar se të njëjtët me urdhër të Prokurorit të Shtetit, do të dërgohen në mbajtje për 48 orë, si dhe brenda afateve ligjore kohore do të bëhet kërkesë për caktimin e paraburgimit.

  • KB Trepça përforcohet me basketbollist kanadez

    KB Trepça përforcohet me basketbollist kanadez

    Basketbollisti kanadez, Jordy Tshimanga ka kompletuar kalimin e tij te KB Trepça, për ta nisur karrierën evropiane.

    Tshimanga, i cili luan në qendër dhe është i gjatë 211 centimetra, i bashkohet Trepçës nga kampionati kanadez (CEBL), ku edhe është duke luajtur në serinë e finaleve me ekipin e tij Calgary, raporton KosovaPress.

    KB Trepça e konfirmoi Tshimangan si përforcimin më të ri përmes “Facebook”, ndërsa edhe tregoi karrierën e kanadezit ndër vite.

    “Tshimanga përveç kampionatit kanadez, karrier ka bërë edhe në Venezula.

    Karrieren profesionale e ka nisur në G-League në sezonin 2021/22 me ekipin Cleveland Charge për tu bashkuar pastaj me Iowa Wolves dhe për të vazhduar edhe në sezonin 2022/23.

    Në nivel të kolegjeve, Tshimanga është paraqitur me 2 kolegje të ndryshme, Nebraska Cornhuskers dhe Dayton Flyers”, shkroi Trepça në “Facebook”.

  • ​Lukashenko paralajmëron se Bjellorusia mund të përdorë armë bërthamore në rast “agresioni”

    ​Lukashenko paralajmëron se Bjellorusia mund të përdorë armë bërthamore në rast “agresioni”

    Bjellorusia do të ishte e gatshme të përdorte armët bërthamore të dhëna nga aleati i ngushtë Rusia përballë “agresionit” të huaj, tha të enjten presidenti Aleksander Lukashenko, ndërsa tensionet rriten rreth kufijve të vendit me vendet e NATO-s.

    Minsku ka luajtur një rol kyç në luftën e Rusisë në Ukrainë, me Moskën duke përdorur Bjellorusinë si një nga pikat e saj të nisjes për pushtim në fillim të vitit 2022, ndërsa stërvitjet e përbashkëta ushtarake Rusi-Bjellorusi gjatë vitit të kaluar kanë nxitur shqetësimet se trupat bjelloruse mund të bashkohen me forcat ruse.

    Sipas presidentit rus Vladimir Putin, në qershor, kokat bërthamore ruse thuhet se iu dorëzuan Bjellorusisë për “parandalim”, shkruan cnn, transmeton KosovaPress.

    Në një intervistë për agjencinë shtetërore të lajmeve Belta, Lukashenko pohoi se Bjellorusia “nuk do të përfshihej kurrë në këtë luftë” nëse ukrainasit nuk do e kalonin kufirin e saj. Por ai shtoi: “Ne do të vazhdojmë të ndihmojmë Rusinë, ata janë aleati ynë”.

    Ai paralajmëroi gjithashtu se nëse provokohet – veçanërisht nga vendet fqinje të NATO-s si Polonia, Lituania dhe Letonia – Bjellorusia “do të përgjigjet menjëherë me gjithçka që kemi”, përfshirë armët bërthamore.

    Nuk është e qartë se sa nga arsenali bërthamor i Rusisë u transportua në Bjellorusi kohët e fundit, dhe zyrtarët amerikanë dhe perëndimorë nuk e kanë konfirmuar publikisht se ndonjë armë është transferuar – megjithëse zyrtarë të lartë nga Agjencia e Inteligjencës së Mbrojtjes së SHBA-së (DIA) thanë se nuk kishin “asnjë arsye për të dyshuar” në pretendimin e Putinit.

    Gjatë intervistës, Lukashenko tha se nëse Bjellorusia do të sulmohej, “ne nuk do të vonojmë, të presim, e të tjerë. Ne do të përdorim të gjithë arsenalin e armëve tona për parandalim.”

    “Ne nuk sollëm armë bërthamore këtu për të trembur dikë”, shtoi ai. “Po, armët bërthamore përfaqësojnë një faktor të fortë parandalues. Por këto janë armë bërthamore taktike, jo strategjike. Kjo është arsyeja pse ne do t’i përdorim ato menjëherë nëse do të nisë agresioni kundër nesh.”

    Zyrtarët e lartë të DIA-s thanë në korrik se nuk besojnë se Lukashenko do të kishte ndonjë kontroll mbi arsenalin, i cili me shumë gjasa do të kontrollohej tërësisht nga Rusia.

  • ​Presidentja Osmani nis takimin me kryetarin e Klinës

    ​Presidentja Osmani nis takimin me kryetarin e Klinës

    Presidentja e Kosovës, Vjosa Osmani në kuadër të vizitave nëpër komuna, ka filluar takimin me kryetarin e Komunës së Klinës, Zenun Elezaj.

    Pas këtij takimi, pritet që rreth orës 12:40, Osmani dhe Elezaj të flasin për media.

  • E pazakontë në Kosovë: Nusja fton të dashurin në dasmën e saj, ish-vjehrra rrëfen ngjarjen

    E pazakontë në Kosovë: Nusja fton të dashurin në dasmën e saj, ish-vjehrra rrëfen ngjarjen

    Në një lidhje në emisionin N’FREKUENCË në ATV, një grua ka rrëfyer një ngjarje të pazakontë të jetës së saj.

    Zonja ka treguar se në dasmën e djalit të saj ishte i ftuar edhe i dashuri i nuses së djalit.

    Ajo ka thënë se ishin habitur se si nusja nuk donte ta puthte dhëndrin në dasmë, derisa më pas e kishte kuptuar se i dashuri i saj kishte qenë i pranishëm në ceremoni bashkë me familjen e tij.

    Krejt kjo, sipas zonjës ka ndodhur për shkak se qëllimi i nuses ishte rregullimi i dokumentacionit për të jetuar jashtë vendit.

  • Joseph: Amerika po e mbështet autonominë serbe si gur të shenjtë për mbylljen e çështjes së Kosovës

    Joseph: Amerika po e mbështet autonominë serbe si gur të shenjtë për mbylljen e çështjes së Kosovës

    Analisti amerikan i politikës së jashtme Edward Joseph kas reaguar ashpër ndaj siç thotë ai mbështetjes dhe butësisë që po tregohet ndaj presidentit serb Aleksandar Vuçiq nga ndërkombëtarët.

    Sipas tij, dhënia e asociacionit për serbët e Kosovës, pa avancimin e njohjes së Kosovës nga serbët dhe nga aleanca e plotë e NATO-s, është një propozim zor i arritur.

    “Zyrtarët amerikanë mbështesin autonominë serbe si gur të shenjtë për mbylljen e çështjes së Kosovës. Në realitet, dhënia e asociacionit për serbët e Kosovës, pa avancimin e njohjes së Kosovës nga serbët dhe nga aleanca e plotë e NATO-s, është një propozim pothuajse i paarritshëm”, ka shkruar analisti në Twitter.

    Reagimi i tij vjen pas një teksti të publikuar në Foreignpolicy, ku thuhet se Amerika po krijon kriza në Kosovë.

    “Nëse dikush mund ta kuptojë përplasjen e shëmtuar dhe të panevojshme mes Shteteve të Bashkuara dhe Kosovës, ai është Volodymyr Zelensky. Kërkojini presidentit ukrainas t’u japë rusëve etnikë autonomi dhe Zelensky do të bëjë menjëherë tre pyetje: A do të pranojnë rusishtfolësit që të jetojnë në Ukrainë, jo në Rusi? A do ta njohë Rusia sovranitetin dhe integritetin territorial të Ukrainës? Dhe a do të na lejojë përfundimisht dhënia e autonomisë të anëtarësohemi në NATO?”, thuhet në hyrjen e këtij teksti.

  • Kurti s’flet për bastisjet: Deklarohemi gjatë ditës

    Kurti s’flet për bastisjet: Deklarohemi gjatë ditës

    Kryeministri i Kosovës Albin Kurti ka refuzuar të flasë për bastisjet e policisë në Ministrinë e Industrisë, Ndërmarrësisë dhe Tregtisë dhe mundësinë e shkarkimit të ministres Rozeta Hajdari.

    Ai ka marrë pjesë në ceremoninë e lansimit të “Thirrjes publike për mbështetjen e konsumatorëve familjarë në investimin në pajisje shtëpiake efiçiente dhe sistemin diellor për ngrohjen e ujit sanitar”.