Author: ATVLive

Policia e Kosovës e Kosovës i ka identifikuar tre persona të mitur për zjarrëvënien e shkaktuar ku për pasojë u dogj edhe Muzeu i Vjetër i Muzikës në Gjakovë.

Prokurori më pas ka vendosur që të tre personat të lirohen në procedurë të rregullt.

“Stacioni Policor në Gjakovë, më datë 30.08.2023, në ora 18:30 është njoftuar se Muzeu i Vjetër i Muzikës në Gjakovë ishte përfshirë nga zjarri. Të gjitha njësitet e nevojshme kanë dalë në vendin e ngjarjes. Përveç dëmeve materiale nuk ka pasoja në njerëz”, thuhet në një njoftim të policisë.

Policia bëri të ditur se rasti ka kaluar për hetim në Sektorin e Krimeve të Rënda.

“Më datë 31.08.2023, pas një pune intensive hetuesit policorë kanë arritur të identifikojnë tre persona të moshës së mitur, të dyshuar si kryes të mundshëm të veprës”, tha policia.

“Pas dëgjimit të tyre në prezencën e akterëve të nevojshëm në konsultim me prokuroin e çështjes të njëjtit janë liruar në procedurë të rregullt”.

Drejtori i Radio Kosovës, Arsim Halili, ka thënë se Kryetari i Komunës së Prishtinës, Përparim Rama, e ka pezulluar vendimin që kishte marrë për mbylljen e rrugës që çon te ndërtesa e ish-RTP-së.

Halili ka thënë se ky është një sinjal pozitiv i vullnetit të mirë për të diskutuar e për të gjetur një zgjidhje të përbashkët “që nuk e cenon funksionimin e mediumit publik dhe dy medieve tjera, punën e gazetarëve dhe interesin e publikut për të qenë i informuar”.

“Ne jemi të gatshëm për të ndihmuar në këtë drejtim dhe për të ofruar zgjidhje dhe krejt çka kërkojmë është qasja rrugore për të qarkulluar ekipet tona. Hyrja në oborrin e RTK-Radios është e kontrolluar, janë të vendosura laurat dhe monitorohet nga sigurimi, 24 orë në 7 ditë të javës që hapësira të menaxhohet e të mos keqpërdoret për parkimin e veturave tjera, përveç atyre që janë të lejuara.

Poashtu veturat e RTK-Radios nuk parkohen në Parkun e Universitetit të Prishtinës dhe Bibliotekës Kombëtare, por rruga, aktualisht e vetmja alternativë pas bllokimit të qasjes në sheshin “Xhorxh Bush” përdoret vetëm si tranzit për të arritur deri brenda hapësirës së radios”, ka shkruar Halili.

Drejtori i të ashtuquajturës “Zyre për Kosovën” në Qeverinë e Serbisë, Petar Petkoviq, është acaruar në kryeministrin Albin Kurti, duke thënë se nuk dëshiron paqe dhe deeskalim.

Petkoviq deklaroi se në vend që të shkojnë në drejtim të deeskalimit dhe se Policia e Kosovës të tërhiqet nga veriu, Prishtina dhe Albin Kurti po bëjnë të kundërtën.

”Atyre nuk u pëlqen de-përshkallëzimi, nuk u pëlqejnë thirrjet e BE-së, as njoftimi i 3 qershorit, ku të gjithë ranë dakord që policia të tërhiqet menjëherë nga veriu dhe të bëjnë të ashtuquajturit kryebashkiakë. Kurti në vend që të shkojë në atë drejtim, po bën të kundërtën. Është e qartë se ai nuk dëshiron paqe”, tha Petkoviq për tvpink.

Duke folur për arrestimin e djeshëm të një serbi në urën e Bistricës, Petkoviq thotë se bëhet fjalë për një të ri sportist.

Me rastin e fillimit të vitit shkollor 2023/24, Këshilli i Prindërve i ka uruar të gjithë nxënësit dhe prindërit për një fillim të mbarë, raporton Gazeta Blic.

“Në veçanti urojmë dhe përgëzojmë të gjithë fëmijët, të cilët sot ulen për herë të parë në bankat shkollor, Klasat e PARA!

Po ashtu, urojmë edhe ata të cilët kanë dhe janë duke kontribuar në sistemin arsimor përmes shpërndarjes së dijes tek fëmijët tanë, puna e të cilëve është mision dhe e shenjt, mësuesit/arsimtarët”, ka shkruar Këshilli i Prindërve.

“Urime 1 Shtatori! Qoftë një vit shkollor i mbarë dhe i suksesshëm”, ka shkruar tutje Këshilli i Prindërve.

Në dhomat e Klinikës së Kirurgjisë Plastike në Qendrën Klinike Universitare të Kosovës (QKUK) janë të shtrirë disa pacientë me nivele të ndryshme të djegieve.

Për më shumë se një muaj, aty gjendet edhe S.I., i djegur pothuajse në të gjitha pjesët e trupit, e më shumë në fytyrë dhe kokë.

“Jam djegur nga një gjenerator, por kam shpëtuar këtë herë”, thotë ai për Radion Evropa e Lirë.

Duke folur mezi, si pasojë e djegieve edhe në buzë, S.I. thotë se shërimi po i shkon ngadalë, për shkak të kushteve, siç i përshkruan ai, jo të mira në klinikë.

Me trupin mbi 50 për qind të djegur, në një shtrat tjetër është i shtrirë Agimi, 34 vjeç.

Ka më shumë se dy javë që nuk ka lëvizur fare, përveç në rastet kur i është dashur të futet në sallë të operacionit, për intervenime të ndryshme.

“Një shok i imi ma ka dhuruar lëkurën për shumë pjesë në trup, për duar, për këmbë, e disa pjesë të tjera”, rrëfen me vështirësi Agimi, i djegur nga shpërthimi i një bombole gazi.

Në Kosovë nuk ka ndonjë qendër të veçantë apo të specializuar për djegie. Rastet e tilla trajtohen në Klinikën e Kirurgjisë Plastike Rekonstruktive dhe Estetike të QKUK-së, por shpesh edhe jashtë vendit.

Edhe pse është e thirrur për të trajtuar raste të tumoreve të lëkurës dhe indeve të buta, patologji të shuplakave e të ngjashme, Klinika e Kirurgjisë Plastike trajton më së shumti raste të djegieve dhe pasoja të tyre, thonë mjekët në këtë institucion.

Sipas tyre, aty pranohen së paku 2-3 raste në muaj me djegie mbi 50 për qind.
Violeta Zatriqi, drejtoreshë e Kirurgjisë Plastike, thotë se një qendër e specializuar për djegie, është bërë domosdoshmëri.

Ajo thotë se rastet e rënda referohen jashtë vendit dhe se “kostoja për trajtimin e tyre është e madhe – mbi 100 mijë euro”.

“Do të thotë, është kosto që i kushton buxhetit të shtetit, por edhe buxhetit të pacientit”, thotë Zatriqi për Radion Evropa e Lirë.

Në klinikën që udhëheq ajo, punojnë 13 kirurgë plastikë, të cilët merren edhe me raste të djegieve.

Për shkak të përqendrimit të tyre te pacientët e djegur, Zatriqi thotë se ndodh shpesh që rastet e tjera, më pak urgjente, të trajtohen me vonesë.

“Qe disa javë nuk mund të kryhet asnjë operacion tjetër, sepse duhet t’u japim prioritet djegieve”, thotë ajo.

Qendër të djegieve nuk kanë as disa shtete fqinje të Kosovës, si Shqipëria apo Maqedonia e Veriut.

Sipas përllogaritjeve të Zatriqit, ndërtimi i një të tille në Kosovë do të kushtonte 6 deri në 7 milionë euro dhe do të shërbente edhe për pacientë të vendeve afër.

Ka plane për qendrën e djegieve

Në Shërbimin Spitalor Klinik dhe Universitar të Kosovës, i cili ka nën menaxhim QKUK-në dhe spitalet rajonale, thonë se planet për një qendër për djegie ekzistojnë, por nuk japin asnjë detaj për kohën se kur do të mund të ndërtohet.

“Në planin e menaxhmentit të SHSKUK-së, në koordinim të plotë me Ministrinë e Shëndetësisë, drejtuesit e klinikës dhe profesionistët e fushës përkatëse, parashihet që të ndërtohet dhe funksionalizohet një qendër e tillë”, thuhet në një deklaratë me shkrim të SHSKUK-së dërguar Radios Evropa e Lirë.

Nga 23 gushti, REL-i kontaktoi edhe Ministrinë e Shëndetësisë në lidhje me këtë çështje, por nuk mori përgjigje.

Në Fondin për Sigurime Shëndetësore, që funksionon nën mbikëqyrjen e Qeverisë së Kosovës, thonë se gjatë periudhës 2019-2023, njëmbëdhjetë persona me plagë nga djegiet kanë aplikuar për mbështetje financiare për t’u trajtuar jashtë vendit. Vetëm dy prej tyre janë financuar.

“Për këto dy raste, Fondi ka ndarë 60 mijë euro për trajtimin e nevojshëm shëndetësor”, thuhet shkurtimisht në një deklaratë dhënë REL-it.

Në Kosovë, një nga incidentet më të rënda, me pasojë dhjetëra persona të djegur, ka ndodhur në vitin 2021, kur në një qendër tregtare në Ferizaj kanë shpërthyer disa bombola gazi.

Dy të lënduar nuk u kanë mbijetuar plagëve, ndërsa disa janë dërguar për trajtim jashtë Kosovës.

Sipas mjekëve në Kirurgjinë Plastike, rastet më të shpeshta të djegieve ndodhin nga aksidentet, qoftë në punë, apo në kushte shtëpie. /REL

Gjykata e Apelit ka konstatuar se Gjykata Themelore në Prishtinë nuk kishte arritur të vërtetojë dyshimin se Irfan Lipovica, Haviz Gara dhe Ridvan Muharremi kanë krye kryer veprat penale për të cilat dyshohen.

Sipas gjetjeve të Apelit, paraburgimi i tyre ishte i paligjshëm për faktin se nuk ishte arritur të argumentoheshin fuqia provuese e provave me veprimet e të pandehurve.

“Sipas vlerësimit të Gjykatës së Apelit të Kosovës, pretendimet e mësipërme ankimore janë të bazuara, ngase në aktvendimin e ankimuar gjykata e shkallë së para nuk ka arritur që të vërtetoj dyshimin e bazuar së të pandehurit kanë kryer veprat penale për të cilat dyshohen, e për të cilat është kusht primar për ligjshmërinë e paraburgimit”, thuhet në gjetjet e Gjykatës së Apelit.

Një ditë pasi ishin arrestuar tre të dyshuarit, më 19 gusht Gjykata Themelore në Prishtinë ua kishte caktuar nga një muaj paraburgim dy zyrtarëve Haviz Gara dhe Irfan Lipovica si dhe biznesmenit Ridvan Muharremi që ishin arrestuar për aferën e rezervave shtetërore.

Sipas Apelit, gjykata e shkallës së parë s’ka dhënë vlerësim dhe arsyetim për faktet të cilat janë paraqitur në kërkesën për paraburgimin e LIpovicës, Garës e Muharremit, raporton “Betimi për Drejtësi”.

“… mirëpo në arsyetim e aktvendimit të ankimuar janë dhënë me tepër bindje e dyshimit të arsyeshme duke mos pasur mbështetje në artukulushmerin për të ndërlidhur provat me veprimet e të pandehurve, prandaj nuk është arritur që të argumentohet në fuqinë provuese të provave se me veprimet e të pandehurve është arritur që të ketë dyshim për veprat penale dhe me ketë gjykata vetëm ka potencuar kronologjinë e ngjarjes mirëpo nuk ka dhëne vlerësim dhe arsyetim mbi fakte të cilat janë paraqitur në kërkesën për caktimin e paraburgimit si dhe në arsyetimin e aktvendimit të ankimuar”, thuhet në aktvendimin e Apelit.

Sipas Apelit, masa e përcaktuar e paraburgimit nuk ka arritur nivelin e konsumimit të kushteve të paraburgimit që të pandehurit t’i nënshtrohen kufizimit të drejtës së lëvizjes.

“Prandaj jo çdo kërkese për caktimin e paraburgimit duhet t’i jepet epiteti i aprovimit, mirëpo kjo duhet t’i nënshtrohet vlerësushmërisë sipas parimit të ligjshmërisë nga ana e gjyqtarit të procedurës paraprake në përputhje me provat si dhe më vlerësimin e pretendimeve të paraqitura nga ana e të pandehurve respektivisht te mbrojtësve”, thuhet më tej në arsyetimin e Apelit.

Në arsyetim thuhet se Kolegji penale i Apelit, me kryetare të Kolegjit Afërdita Bytyçin, në vlerësimin për ekzistimin e dyshimit të bazuar, ka konstatuar se se në këtë stad të procedurës penale nga gjykata e shkallë së pare është tejkaluar kompetenca e vlerësimit e parapara sipas normave ligjore.

“… nga fakti se gjykata në aktvendimin e ankimuar është lëshuar në vlefshmërinë e ligjshmërisë se ligjeve (administrative) si dhe vendimeve të qeverisë, si dhe në nxjerrjen e konkluzioneve të elementeve subjektive të dashjes në lidhje me veprat penale të cilat pretendohet të jene kryer nga ana e të pandehurve”, ka konstatuar Apeli.

Sipas Apelit, nuk është arritur që të krijohet bindja objektive në vlerësimin e secilës provë-fakt të paraqitur, në mënyrë që të krijohet kuptimësia e plotë se dyshimi i bazuar me të vërtete paraqet lidhje te sinkronizuar mes fakteve dhe veprimeve, e nga e cila edhe masa e përcaktuar e paraburgimit do të arrinte stadin e kufizimit të lirisë, duke mos shkelur neni 5 të Konventës Evropiane për të Drejtat e Njeriut si dhe duke zbutur nenin 29 të Kushtetutës së Kosovës.

“Kolegji i kësaj gjykate vlerëson se nga mos ekzistimi i dyshimit të bazuar të përcaktuar sipas nenit 19 pika 1.9 të KPPK-së, si dhe normës themeltare për te ekzistuar caktimi i paraburgimit nga nenin 184 par. 1 nën par. 1.1 nuk mund të qëndrojnë as kushtet /bazat e veçanta të masës së paraburgimit nga nenin 184 par.1 nën par. 1.2 pikat 1.2.2 dhe 1.2.3 te KPPK-së”, thuhet në fund të arsyetimit të Apelit.

“Betimi për Drejtësi” ka raportuar për vendimin e Apelit, ku avokati i Muharremit, Mahmut Halimi e kishte konfirmuar lirimin e të dyshuarve nga paraburgimi për aferën e rezervave shtetërore.

Ndryshe, sipas dosjes së Prokurorisë të cilën e ka publikuar “Betimi për Drejtësi”, thuhet se malli i paguar dhe i porositur për rezerva shtetërore – 200 mijë litra vaj, 120 mijë kg sheqer dhe 52.5 tonë grurë – nuk kishte ardhur në Kosovë. Vlera e këtij malli që nuk ka mbërritur në Kosovë sipas Prokurorisë është mbi 600 mijë euro.

Prokuroria Speciale nisi të premten e 18 gushtit aksionin për bastisjen e Ministrisë së Industrisë, Ndërmarrësisë dhe Tregtisë si dhe shkoi edhe te pronat e biznesmenit Ridvan Muharremi, raporton “Betimi për Drejtësi”.

Pas aksionit, dy zyrtarët e Ministrisë dhe biznesmeni u prangosën nën dyshimin për korrupsion dhe vepra tjera penale.

Ministrja Rozeta Hajdari kishte thënë se dy zyrtarët e MINT janë të pafajshëm dhe se nuk kanë bërë kurrfarë shkeljesh ligjore derisa ka akuzuar Policinë se ka marrë kundërligjshëm dokumentet e rezervës shtetërore, duke rrezikuar kështu sigurinë kombëtare..

Në mbrëmjen e së premtes kur ishin arrestuar të dyshuarit, Kryeministri Albin Kurti pati publikuar një video-mesazh, me të cilin ka akuzuar sistemin e drejtësisë së po tenton që të rikthejë në pushtet ish-kastën e kalbur politike. Kishte thënë se Rozeta Hajdari nuk është shkelëse e ligjit dhe nuk ka korrupsion te rezervat shtetërore./BetimipërDrejtësi

Drejtoresha e Arsimit në Komunën e Prishtinës, Besianë Musmurati ka bërë të ditur se është hapur thirrja për subvencionim me nga 70 euro për familjet të cilat duan t’i regjistrojnë fëmijët e tyre në çerdhe private, raporton Ekonomia Online.

Ajo tha se secila familje e Prishtinës që të hyrat i ka nën 500 euro dhe ka fëmijë të moshës 9 muaj deri në 6 vjet do të subvencionohen me 70 euro.

“Arsyeja kryesor që ju kam ftuar sot është për të ndarë me ju lajmin e mirë që kemi hapur thirrjen për subvencionim me nga 70 euro të familjeve të Prishtinës për të regjistruar fëmijët e tyre në çerdhet private. Secila familje e Prishtinës që të hyrat financiarë i ka nënë 500 euro dhe ka fëmijë të moshes 9 muaj deri në 6 vjet do të subvencionohet me nga 70 euro për të regjistruar fëmijët e tyre ne çfarë do çerdhe private”, ka thënë ajo.

E para e arsimit në Kryeqytet, ka thënë se përparësi do të kenë disa kategori si nënat vetushqyese, fëmijët me nevoja të veçanta e fëmijët e kategorive të dala nga lufta e UÇK-së.

“Ky lajm është shumë i mirë për prindërit e Prishtinës. Me një subvencionim me nga 70 euro në muaj ne do të presim përfshirje të fëmijëve ne çerdhe dhe edukim të hershëm. Do të rrisim pjesëmarrje e grave në tregun e punës si dhe do të lehtësojmë barrën financiare të shumë familjeve të Prishtinës. Kategoritë që do të jenë më përparësi janë nënat vetushqyese, fëmijët me nevoja të veçanta, fëmijët e prindërve të divorcuar, fëmijët e invalidëve të UÇK si dhe fëmijët e veteranëve të UÇK-së”, tha ajo.

Drejtoresha e Arsimit ka thënë se përfshirja në çerdhe dhe edukimi i hershëm sjellin benefite afatgjate në zhvillimin pozitiv të fëmijës, tanimë është vërtetuar shkencërisht.

“Arsimimi dhe edukimi transformojnë jetët e fëmijëve dhe thyejnë ciklin e varfërisë me të cilin ballafaqohen shumë fëmijë dhe 6 vitet e para të jetës janë vendimtare. Fëmijët mësojnë më shumë gjatë gjashtë viteve të para të jetës se sa në çdo moment tjetër të jetës së tyre”, ka thënë ajo.

Më tutje, Musmurati ka shtuar se investimi në edukimin e fëmijërisë së hershme është një mënyrë e mirë për të zvogëluar boshllëqet që shpesh i vendosin fëmijët me status të ulët social dhe ekonomik në disavantazh jetësor.

“Prandaj, ky është një lajm shumë i mirë për prindërit e rinj që jetojnë në Prishtinë sepse sado pak ju lehtëson barrën financiare të edukimit të hershëm për fëmijët e tyre. Si politikë e re, ky subvencionim do të ndihmojë edhe nënat e reja që të hyjnë në tregun e punës sa më parë dhe të rrisin përfshirjen e grave në tregun e punës”, ka thënë ajo.

Sipas saj, me subvencionimin me nga 70 euro në muaj për familjet e Prishtinës, do të rritet përfshirja e fëmijëve në çerdhe dhe edukim të hershëm dhe pjesëmarrja e grave në tregun e punës, si dhe do të lehtësohet barra financiare për shumë familje në Prishtinë.

“Ne kemi ndarë 100,000 Euro për financim të fazës së parë, por varësisht nga numri i aplikimeve do të rrisim edhe buxhetin. Prandaj i bëj thirrje të gjithë prindërve të Prishtinës që të hyrat familjare i kanë nën 500 Euro të aplikojnë në thirrjen e hapur për subvencionim, e cila tanimë është në uebfaqe të Komunës së Prishtinës dhe në rrjetet tona sociale”, ka thënë Musmurati.

Të gjithë qytetarët mund ta bëjnë aplikimin edhe në sportelin numër 5 në objektin e Komunës së Prishtinës.